10. பி⁴க்கு²ஸம்யுத்தம்

1. கோலிதஸுத்தவண்ணனா

235. பி⁴க்கு²ஸம்யுத்தஸ்ஸ பட²மே, ஆவுஸோதி ஸாவகானம் ஆலாபோ. பு³த்³தா⁴ ஹி ப⁴க³வந்தோ ஸாவகே ஆலபந்தா, ‘‘பி⁴க்க²வே’’தி ஆலபந்தி, ஸாவகா பன ‘‘பு³த்³தே⁴ஹி ஸதி³ஸா மா ஹோமா’’தி, ‘‘ஆவுஸோ’’தி பட²மம் வத்வா பச்சா², ‘‘பி⁴க்க²வே’’தி ப⁴ணந்தி. பு³த்³தே⁴ஹி ச ஆலபிதே பி⁴க்கு²ஸங்கோ⁴, ‘‘ப⁴ந்தே’’தி படிவசனம் தே³தி ஸாவகேஹி, ‘‘ஆவுஸோ’’தி. அயம் வுச்சதீதி யஸ்மா து³தியஜ்ஜா²னே விதக்கவிசாரா நிருஜ்ஜ²ந்தி, யேஸம் நிரோதா⁴ ஸத்³தா³யதனம் அப்பவத்திம் க³ச்ச²தி, தஸ்மா யதே³தம் து³தியம் ஜா²னம் நாம, அயம் வுச்சதி ‘‘அரியானம் துண்ஹீபா⁴வோ’’தி. அயமேத்த² யோஜனா. ‘‘த⁴ம்மீ வா கதா² அரியோ வா துண்ஹீபா⁴வோ’’தி ஏத்த² பன கம்மட்டா²னமனஸிகாரோபி பட²மஜ்ஜா²னாதீ³னிபி அரியோ துண்ஹீபா⁴வோத்வேவ ஸங்க²ம் க³தானி.

விதக்கஸஹக³தாதி விதக்காரம்மணா. ஸஞ்ஞாமனஸிகாராதி ஸஞ்ஞா ச மனஸிகாரோ ச. ஸமுதா³சரந்தீதி பவத்தந்தி. தே²ரஸ்ஸ கிர து³தியஜ்ஜா²னம் ந பகு³ணம். அத²ஸ்ஸ ததோ வுட்டி²தஸ்ஸ விதக்கவிசாரா ந ஸந்ததோ உபட்ட²ஹிம்ஸு. இச்சஸ்ஸ து³தியஜ்ஜா²னம்பி ஸஞ்ஞாமனஸிகாராபி ஹானபா⁴கி³யாவ அஹேஸும், தம் த³ஸ்ஸேந்தோ ஏவமாஹ. ஸண்ட²பேஹீதி ஸம்மா ட²பேஹி. ஏகோதி³பா⁴வம் கரோஹீதி ஏகக்³க³ம் கரோஹி. ஸமாத³ஹாதி ஸம்மா ஆத³ஹ ஆரோபேஹி. மஹாபி⁴ஞ்ஞதந்தி ச²ளபி⁴ஞ்ஞதம். ஸத்தா² கிர இமினா உபாயேன ஸத்த தி³வஸே தே²ரஸ்ஸ ஹானபா⁴கி³யம் ஸமாதி⁴ம் வட்³டே⁴த்வா தே²ரம் ச²ளபி⁴ஞ்ஞதம் பாபேஸி. பட²மம்.

2. உபதிஸ்ஸஸுத்தவண்ணனா

236. து³தியே அத்தி² நு கோ² தம் கிஞ்சி லோகஸ்மிந்தி இத³ம் அதிஉளாரம்பி ஸத்தம் வா ஸங்கா²ரம் வா ஸந்தா⁴ய வுத்தம். ஸத்து²பி கோ²தி இத³ம் யஸ்மா ஆனந்த³த்தே²ரஸ்ஸ ஸத்த²ரி அதி⁴மத்தோ ச²ந்தோ³ ச பேமஞ்ச, தஸ்மா ‘‘கிம் நு கோ² இமஸ்ஸ தே²ரஸ்ஸ ஸத்து² விபரிணாமேனபி ஸோகாத³யோ நுப்பஜ்ஜேய்யு’’ந்தி ஜானனத்த²ம் புச்ச²தி? தீ³க⁴ரத்தந்தி ஸூகரக²தலேணத்³வாரே தீ³க⁴னக²பரிப்³பா³ஜகஸ்ஸ வேத³னாபரிக்³க³ஹஸுத்தந்தம் தே³ஸிததி³வஸதோ பட்டா²ய அதிக்கந்தகாலம் ஸந்தா⁴யாஹ. தஸ்மிஞ்ஹி தி³வஸே தே²ரஸ்ஸ இமே வட்டானுக³தகிலேஸா ஸமூஹதாதி. து³தியம்.

3. க⁴டஸுத்தவண்ணனா

237. ததியே ஏகவிஹாரேதி ஏகஸ்மிம் க³ப்³பே⁴. ததா³ கிர ப³ஹூ ஆக³ந்துகா பி⁴க்கூ² ஸன்னிபதிம்ஸு. தஸ்மிம் பரிவேணக்³கே³ன வா விஹாரக்³கே³ன வா ஸேனாஸனேஸு அபாபுணந்தேஸு த்³வின்னம் தே²ரானம் ஏகோ க³ப்³போ⁴ ஸம்பத்தோ. தே தி³வா பாடியேக்கேஸு டா²னேஸு நிஸீத³ந்தி, ரத்திம் பன நேஸம் அந்தரே சீவரஸாணிம் பஸாரேந்தி. தே அத்தனோ அத்தனோ பத்தபத்தட்டா²னேயேவ நிஸீத³ந்தி. தேன வுத்தம் ‘‘ஏகவிஹாரே’’தி. ஓளாரிகேனாதி இத³ம் ஓளாரிகாரம்மணதம் ஸந்தா⁴ய வுத்தம். தி³ப்³ப³சக்கு²தி³ப்³ப³ஸோததா⁴துவிஹாரேன ஹி ஸோ விஹாஸி, தேஸஞ்ச ரூபாயதனஸத்³தா³யதனஸங்கா²தம் ஓளாரிகம் ஆரம்மணம். இதி தி³ப்³ப³சக்கு²னா ரூபஸ்ஸ தி³ட்ட²த்தா தி³ப்³பா³ய ச ஸோததா⁴துயா ஸத்³த³ஸ்ஸ ஸுதத்தா ஸோ விஹாரோ ஓளாரிகோ நாம ஜாதோ. தி³ப்³ப³சக்கு² விஸுஜ்ஜீ²தி ப⁴க³வதோ ரூபத³ஸ்ஸனத்தா²ய விஸுத்³த⁴ம் அஹோஸி. தி³ப்³பா³ ச ஸோததா⁴தூதி ஸாபி ப⁴க³வதோ ஸத்³த³ஸுணனத்த²ம் விஸுஜ்ஜி². ப⁴க³வதோபி தே²ரஸ்ஸ ரூபத³ஸ்ஸனத்த²ஞ்சேவ ஸத்³த³ஸுணனத்த²ஞ்ச தது³ப⁴யம் விஸுஜ்ஜி². ததா³ கிர தே²ரோ ‘‘கத²ம் நு கோ² ஏதரஹி ஸத்தா² விஹரதீ’’தி ஆலோகம் வட்³டே⁴த்வா தி³ப்³பே³ன சக்கு²னா ஸத்தா²ரம் ஜேதவனே விஹாரே க³ந்த⁴குடியம் நிஸின்னம் தி³ஸ்வா தஸ்ஸ தி³ப்³பா³ய ஸோததா⁴துயா ஸத்³த³ம் ஸுணி. ஸத்தா²பி ததே²வ அகாஸி. ஏவம் தே அஞ்ஞமஞ்ஞம் பஸ்ஸிம்ஸு சேவ, ஸத்³த³ஞ்ச அஸ்ஸோஸும்.

ஆரத்³த⁴வீரியோதி பரிபுண்ணவீரியோ பக்³க³ஹிதவீரியோ. யாவதே³வ உபனிக்கே²பனமத்தாயாதி தியோஜனஸஹஸ்ஸவித்தா²ரஸ்ஸ ஹிமவதோ ஸந்திகே ட²பிதா ஸாஸபமத்தா பாஸாணஸக்க²ரா ‘‘ஹிமவா நு கோ² மஹா, அயம் நு கோ² பாஸாணஸக்க²ரா’’தி ஏவம் யாவ உபனிக்கே²பனமத்தஸ்ஸேவ அத்தா²ய ப⁴வேய்யாதி வுத்தம் ஹோதி. பரதோபி ஏஸேவ நயோ. கப்பந்தி ஆயுகப்பம். லோணக⁴டாயாதி சக்கவாளமுக²வட்டியா ஆதா⁴ரகம் கத்வா முக²வட்டியா ப்³ரஹ்மலோகம் ஆஹச்ச டி²தாய லோணசாடியாதி த³ஸ்ஸேதி.

இமே பன தே²ரா உபமம் ஆஹரந்தா ஸரிக்க²கேனேவ ச விஜ்ஜமானகு³ணேன ச ஆஹரிம்ஸு. கத²ம்? அயஞ்ஹி இத்³தி⁴ நாம அச்சுக்³க³தட்டே²ன சேவ விபுலட்டே²ன ச ஹிமவந்தஸதி³ஸா, பஞ்ஞா சதுபூ⁴மகத⁴ம்மே அனுபவிஸித்வா டி²தட்டே²ன ஸப்³ப³ப்³யஞ்ஜனேஸு அனுபவிட்ட²லோணரஸஸதி³ஸா. ஏவம் தாவ ஸரிக்க²கட்டே²ன ஆஹரிம்ஸு. ஸமாதி⁴லக்க²ணம் பன மஹாமோக்³க³ல்லானத்தே²ரஸ்ஸ விபூ⁴தம் பாகடம். கிஞ்சாபி ஸாரிபுத்தத்தே²ரஸ்ஸ அவிஜ்ஜமானஇத்³தி⁴ நாம நத்தி², ப⁴க³வதா பன ‘‘ஏதத³க்³க³ம், பி⁴க்க²வே, மம ஸாவகானம் பி⁴க்கூ²னம் இத்³தி⁴மந்தானம் யதி³த³ம் மஹாமோக்³க³ல்லானோ’’தி அயமேவ ஏதத³க்³கே³ ட²பிதோ. விபஸ்ஸனாலக்க²ணம் பன ஸாரிபுத்தத்தே²ரஸ்ஸ விபூ⁴தம் பாகடம். கிஞ்சாபி மஹாமோக்³க³ல்லானத்தே²ரஸ்ஸாபி பஞ்ஞா அத்தி², ப⁴க³வதா பன ‘‘ஏதத³க்³க³ம், பி⁴க்க²வே, மம ஸாவகானம் பி⁴க்கூ²னம் மஹாபஞ்ஞானம் யதி³த³ம் ஸாரிபுத்தோ’’தி (அ. நி. 1.189) அயமேவ ஏதத³க்³கே³ ட²பிதோ. தஸ்மா யதா² ஏதே அஞ்ஞமஞ்ஞஸ்ஸ து⁴ரம் ந பாபுணந்தி, ஏவம் விஜ்ஜமானகு³ணேன ஆஹரிம்ஸு. ஸமாதி⁴லக்க²ணஸ்மிஞ்ஹி மஹாமோக்³க³ல்லானோ நிப்ப²த்திம் க³தோ, விபஸ்ஸனாலக்க²ணே ஸாரிபுத்தத்தே²ரோ, த்³வீஸுபி ஏதேஸு ஸம்மாஸம்பு³த்³தோ⁴தி. ததியம்.

4. நவஸுத்தவண்ணனா

238. சதுத்தே² அப்போஸ்ஸுக்கோதி நிருஸ்ஸுக்கோ. ஸங்கஸாயதீதி விஹரதி. வேய்யாவச்சந்தி சீவரே கத்தப்³ப³கிச்சம். ஆபி⁴சேதஸிகானந்தி அபி⁴சித்தம் உத்தமசித்தம் நிஸ்ஸிதானம். நிகாமலாபீ⁴தி இச்சி²திச்சி²தக்க²ணே ஸமாபஜ்ஜனஸமத்த²தாய நிகாமலாபீ⁴. அகிச்ச²லாபீ⁴தி ஜா²னபாரிபந்தி²கே ஸுகே²ன விக்க²ம்பே⁴த்வா ஸமாபஜ்ஜனஸமத்த²தாய அது³க்க²லாபீ⁴. அகஸிரலாபீ⁴தி யதா²பரிச்சே²தே³ன வுட்டா²னஸமத்த²தாய விபுலலாபீ⁴, பகு³ணஜ்ஜா²னோதி அத்தோ². ஸிதி²லமாரப்³பா⁴தி ஸிதி²லவீரியம் பவத்தேத்வா. சதுத்த²ம்.

5. ஸுஜாதஸுத்தவண்ணனா

239. பஞ்சமே அபி⁴ரூபோதி அஞ்ஞானி ரூபானி அதிக்கந்தரூபோ. த³ஸ்ஸனீயோதி த³ட்ட²ப்³ப³யுத்தோ. பாஸாதி³கோதி த³ஸ்ஸனேன சித்தம் பஸாதே³தும் ஸமத்தோ². வண்ணபோக்க²ரதாயாதி ச²விவண்ணஸுந்த³ரதாய. பஞ்சமம்.

6. லகுண்ட³கப⁴த்³தி³யஸுத்தவண்ணனா

240. ச²ட்டே² து³ப்³ப³ண்ணந்தி விரூபஸரீரவண்ணம். ஓகோடிமகந்தி ரஸ்ஸம். பரிபூ⁴தரூபந்தி பமாணவஸேன பரிபூ⁴தஜாதிகம். தம் கிர ச²ப்³ப³க்³கி³யா பி⁴க்கூ², ‘‘ஆவுஸோ ப⁴த்³தி³ய, ஆவுஸோ, ப⁴த்³தி³யா’’தி தத்த² தத்த² பராமஸித்வா நானப்பகாரம் கீளந்தி ஆகட்³ட⁴ந்தி பரிகட்³ட⁴ந்தி. தேன வுத்தம் ‘‘பரிபூ⁴தரூப’’ந்தி. கஸ்மா பனேஸ ஏவரூபோ ஜாதோ? அயம் கிர அதீதே ஏகோ மஹாராஜா அஹோஸி, தஸ்ஸ மஹல்லகா ச மஹல்லகித்தி²யோ ச படிகூலா ஹோந்தி. ஸோ ஸசே மஹல்லகே பஸ்ஸதி, தேஸம் சூளம் ட²பாபேத்வா கச்ச²ம் ப³ந்தா⁴பேத்வா யதா²ருசி கீளாபேதி. மஹல்லகித்தி²யோபி தி³ஸ்வா தாஸம்பி இச்சி²திச்சி²தம் விப்பகாரம் கத்வா யதா²ருசி கீளாபேதி. தேஸம் புத்ததீ⁴தாதீ³னம் ஸந்திகே மஹாஸாரஜ்ஜம் உப்பஜ்ஜதி. தஸ்ஸ பாபகிரியா பத²விதோ பட்டா²ய ச²தே³வலோகே ஏககோலாஹலம் அகாஸி.

அத² ஸக்கோ சிந்தேஸி – ‘‘அயம் அந்த⁴பா³லோ மஹாஜனம் விஹேடே²தி, கரிஸ்ஸாமிஸ்ஸ நிக்³க³ஹ’’ந்தி. ஸோ மஹல்லககா³மியவண்ணம் கத்வா யானகே ஏகம் தக்கசாடிம் ஆரோபேத்வா யானம் பேஸேந்தோ நக³ரம் பவிஸதி. ராஜாபி ஹத்தி²ம் ஆருய்ஹ நக³ரதோ நிக்க²ந்தோ தம் தி³ஸ்வா – ‘‘அயம் மஹல்லகோ தக்கயானகேன அம்ஹாகம் அபி⁴முகோ² ஆக³ச்ச²தி, வாரேத² வாரேதா²’’தி ஆஹ. மனுஸ்ஸா இதோ சிதோ ச பக்க²ந்த³ந்தாபி ந பஸ்ஸந்தி. ஸக்கோ ஹி ‘‘ராஜாவ மம் பஸ்ஸது, மா அஞ்ஞே’’தி ஏவம் அதி⁴ட்ட²ஹி. அத² தேஸு மனுஸ்ஸேஸு ‘‘கஹம், தே³வ, கஹம் தே³வா’’தி வத³ந்தேஸு ஏவ ராஜா ஸஹ ஹத்தி²னா வச்சோ² விய தே⁴னுயா யானஸ்ஸ ஹேட்டா² பாவிஸி. ஸக்கோ தக்கசாடிம் பி⁴ந்தி³.

ராஜா ஸீஸதோ பட்டா²ய தக்கேன கிலின்னஸரீரோ அஹோஸி. ஸோ ஸரீரம் உப்³ப³ட்டாபேத்வா உய்யானபோக்க²ரணியம் ந்ஹத்வா அலங்கதஸரீரோ நக³ரம் பவிஸந்தோ புன தம் அத்³த³ஸ. தி³ஸ்வா ‘‘அயம் ஸோ அம்ஹேஹி தி³ட்ட²மஹல்லகோ புன தி³ஸ்ஸதி. வாரேத² வாரேத² ந’’ந்தி ஆஹ. மனுஸ்ஸா ‘‘கஹம், தே³வ, கஹம், தே³வா’’தி இதோ சிதோ ச விதா⁴விம்ஸு. ஸோ பட²மவிப்பகாரமேவ புன பாபுணி. தஸ்மிம் க²ணே ஸக்கோ கோ³ணே ச யானஞ்ச அந்தரதா⁴பேத்வா ஆகாஸே ட²த்வா ஆஹ, ‘‘அந்த⁴பா³ல, த்வம் மயி தக்கவாணிஜகோ ஏஸோ’’தி ஸஞ்ஞம் கரோஸி, ஸக்கோஹம் தே³வராஜா, ‘‘தவேதம் பாபகிரியம் நிவாரேஸ்ஸாமீ’’தி ஆக³தோ, ‘‘மா புன ஏவரூபம் அகாஸீ’’தி ஸந்தஜ்ஜேத்வா அக³மாஸி. இமினா கம்மேன ஸோ து³ப்³ப³ண்ணோ அஹோஸி.

விபஸ்ஸீஸம்மாஸம்பு³த்³த⁴காலே பனேஸ சித்தபத்தகோகிலோ நாம ஹுத்வா கே²மே மிக³தா³யே வஸந்தோ ஏகதி³வஸம் ஹிமவந்தம் க³ந்த்வா மது⁴ரம் அம்ப³ப²லம் துண்டே³ன க³ஹேத்வா ஆக³ச்ச²ந்தோ பி⁴க்கு²ஸங்க⁴பரிவாரம் ஸத்தா²ரம் தி³ஸ்வா சிந்தேஸி – ‘‘அஹம் அஞ்ஞேஸு தி³வஸேஸு ரித்தகோ ததா²க³தம் பஸ்ஸாமி. அஜ்ஜ பன மே இமம் அம்ப³பக்கம் அத்தி², த³ஸப³லஸ்ஸ தம் த³ஸ்ஸாமீ’’தி ஓதரித்வா ஆகாஸே சரதி. ஸத்தா² தஸ்ஸ சித்தம் ஞத்வா உபட்டா²கம் ஓலோகேஸி. ஸோ பத்தம் நீஹரித்வா த³ஸப³லம் வந்தி³த்வா ஸத்து² ஹத்தே² ட²பேஸி. கோகிலோ த³ஸப³லஸ்ஸ பத்தே அம்ப³பக்கம் பதிட்டா²பேஸி. ஸத்தா² தத்தே²வ நிஸீதி³த்வா தம் பரிபு⁴ஞ்ஜி. கோகிலோ பஸன்னசித்தோ புனப்புனம் த³ஸப³லஸ்ஸ கு³ணே ஆவஜ்ஜேத்வா த³ஸப³லம் வந்தி³த்வா அத்தனோ குலாவகம் க³ந்த்வா ஸத்தாஹம் பீதிஸுகே²னேவ வீதினாமேஸி. இமினா கம்மேன ஸரோ மது⁴ரோ அஹோஸி.

கஸ்ஸபஸம்மாஸம்பு³த்³த⁴காலே பன சேதியே ஆரத்³தே⁴ ‘‘கிம்பமாணம் கரோம? ஸத்தயோஜனப்பமாணம். அதிமஹந்தம் ஏதம், ச²யோஜனப்பமாணம் கரோம. இத³ம்பி அதிமஹந்தம், பஞ்சயோஜனம் கரோம, சதுயோஜனம், தியோஜனம், த்³வியோஜன’’ந்தி. அயம் ததா³ ஜேட்ட²கவட்³ட⁴கீ ஹுத்வா, ‘‘ஏவம், போ⁴, அனாக³தே ஸுக²படிஜக்³கி³தம் காதும் வட்டதீ’’தி வத்வா ரஜ்ஜும் ஆதா³ய பரிக்கி²பந்தோ கா³வுதமத்தகே ட²த்வா, ‘‘ஏகேகம் முக²ம் கா³வுதம் ஹோது, சேதியம் யோஜனாவட்டம் யோஜனுப்³பே³த⁴ம் ப⁴விஸ்ஸதீ’’தி ஆஹ. தே தஸ்ஸ வசனே அட்ட²ம்ஸு. சேதியம் ஸத்ததி³வஸஸத்தமாஸாதி⁴கேஹி ஸத்தஹி ஸம்வச்ச²ரேஹி நிட்டி²தம். இதி அப்பமாணஸ்ஸ பு³த்³த⁴ஸ்ஸ பமாணம் அகாஸீதி. தேன கம்மேன ஓகோடிமகோ ஜாதோ.

ஹத்த²யோ பஸதா³ மிகா³தி ஹத்தி²னோ ச பஸத³மிகா³ ச. நத்தி² காயஸ்மிம் துல்யதாதி காயஸ்மிம் பமாணம் நாம நத்தி², அகாரணம் காயபமாணந்தி அத்தோ². ச²ட்ட²ம்.

7. விஸாக²ஸுத்தவண்ணனா

241. ஸத்தமே போரியா வாசாயாதி புரவாஸீனம் நக³ரமனுஸ்ஸானம் வாசாஸதி³ஸாய அபரிஹீனக்க²ரபதா³ய மது⁴ரவாசாய. விஸ்ஸட்டா²யாதி அஸந்தி³த்³தா⁴ய அபலிபு³த்³தா⁴ய, பித்தஸேம்ஹேஹி அனுபஹதாயாதி அத்தோ². அனேலக³லாயாதி யதா² த³ந்த⁴மனுஸ்ஸா முகே²ன கே²ளம் க³ளந்தேன வாசம் பா⁴ஸந்தி, ந ஏவரூபாய, அத² கோ² நித்³தோ³ஸாய விஸத³வாசாய. பரியாபன்னாயாதி சதுஸச்சபரியாபன்னாய சத்தாரி ஸச்சானி அமுஞ்சித்வா பவத்தாய. அனிஸ்ஸிதாயாதி வட்டனிஸ்ஸிதம் கத்வா அகதி²தாய. த⁴ம்மோ ஹி இஸினம் த⁴ஜோதி நவவித⁴லோகுத்தரத⁴ம்மோ இஸீனம் த⁴ஜோ நாமாதி. ஸத்தமம்.

8. நந்த³ஸுத்தவண்ணனா

242. அட்ட²மே ஆகோடிதபச்சாகோடிதானீதி ஏகஸ்மிம் பஸ்ஸே பாணினா வா முக்³க³ரேன வா ஆகோடனேன ஆகோடிதானி, பரிவத்தேத்வா ஆகோடனேன பச்சாகோடிதானி. அஞ்ஜேத்வாதி அஞ்ஜனேன பூரேத்வா. அச்ச²ம் பத்தந்தி விப்பஸன்னவண்ணம் மத்திகாபத்தம். கஸ்மா பன தே²ரோ ஏவமகாஸீதி? ஸத்து² அஜ்ஜா²ஸயஜானனத்த²ம். ஏவம் கிரஸ்ஸ அஹோஸி ‘‘ஸசே ஸத்தா² ‘ஸோப⁴தி வத மே அயம் கனிட்ட²பா⁴திகோ’தி வக்க²தி, யாவஜீவம் இமினா வாகாரேன சரிஸ்ஸாமி. ஸசே ஏத்த² தோ³ஸம் த³ஸ்ஸதி, இமம் ஆகாரம் பஹாய ஸங்காரசோளம் க³ஹேத்வா சீவரம் கத்வா தா⁴ரேந்தோ பரியந்தஸேனாஸனே வஸந்தோ சரிஸ்ஸாமீ’’தி. அஸ்ஸஸீதி ப⁴விஸ்ஸஸி.

அஞ்ஞாதுஞ்சே²னாதி அபி⁴லக்கி²தேஸு இஸ்ஸரஜனகே³ஹேஸு கடுகப⁴ண்ட³ஸம்பா⁴ரம் ஸுக³ந்த⁴ம் போ⁴ஜனம் பரியேஸந்தஸ்ஸ உஞ்சோ² ஞாதுஞ்சோ² நாம. க⁴ரபடிபாடியா பன த்³வாரே டி²தேன லத்³த⁴ம் மிஸ்ஸகபோ⁴ஜனம் அஞ்ஞாதுஞ்சோ² நாம. அயமித⁴ அதி⁴ப்பேதோ. காமேஸு அனபேக்கி²னந்தி வத்து²காமகிலேஸகாமேஸு நிரபேக்க²ம். ஆரஞ்ஞிகோ சாதிஆதி³ ஸப்³ப³ம் ஸமாதா³னவஸேனேவ வுத்தம். காமேஸு ச அனபேக்கோ²தி இத³ம் ஸுத்தம் தே³வலோகே அச்ச²ராயோ த³ஸ்ஸேத்வா ஆக³தேன அபரபா⁴கே³ கதி²தம். இமஸ்ஸ கதி²ததி³வஸதோ பட்டா²ய தே²ரோ க⁴டேந்தோ வாயமந்தோ கதிபாஹேனேவ அரஹத்தே பதிட்டா²ய ஸதே³வகே லோகே அக்³க³த³க்கி²ணேய்யோ ஜாதோ. அட்ட²மம்.

9. திஸ்ஸஸுத்தவண்ணனா

243. நவமே து³ம்மனோதி உப்பன்னதோ³மனஸ்ஸோ. கஸ்மா பனாயம் ஏவம் து³க்கீ² து³ம்மனோ ஜாதோதி? க²த்தியபப்³ப³ஜிதோ ஹேஸ, தேன நம் பப்³பா³ஜேத்வா து³பட்டஸாடகம் நிவாஸாபேத்வா வரசீவரம் பாருபேத்வா அக்கீ²னி அஞ்ஜேத்வா மனோஸிலாதேலேன ஸீஸம் மக்கே²ஸும். ஸோ பி⁴க்கூ²ஸு ரத்திட்டா²னதி³வாட்டா²னம் க³தேஸு ‘‘பி⁴க்கு²னா நாம விவித்தோகாஸே நிஸீதி³தப்³ப³’’ந்தி அஜானந்தோ போ⁴ஜனஸாலம் க³ந்த்வா மஹாபீட²ம் ஆருஹித்வா நிஸீதி³. தி³ஸாவசரா ஆக³ந்துகா பம்ஸுகூலிகா பி⁴க்கூ² ஆக³ந்த்வா, ‘‘இமினாவ நீஹாரேன ரஜோகிண்ணேஹி க³த்தேஹி ந ஸக்கா த³ஸப³லம் பஸ்ஸிதும். ப⁴ண்ட³கம் தாவ ட²பேஸ்ஸாமா’’தி போ⁴ஜனஸாலம் அக³மம்ஸு. ஸோ தேஸு மஹாதே²ரேஸு ஆக³ச்ச²ந்தேஸு நிச்சலோ நிஸீதி³யேவ. அஞ்ஞே பி⁴க்கூ² ‘‘பாத³வத்தம் கரோம, தாலவண்டேன பீ³ஜாமா’’தி ஆபுச்ச²ந்தி. அயம் பன நிஸின்னகோவ ‘‘கதிவஸ்ஸத்தா²’’தி? புச்சி²த்வா, ‘‘மயம் அவஸ்ஸிகா. தும்ஹே பன கதிவஸ்ஸத்தா²’’தி? வுத்தே, ‘‘மயம் அஜ்ஜ பப்³ப³ஜிதா’’தி ஆஹ. அத² நம் பி⁴க்கூ², ‘‘ஆவுஸோ, அது⁴னா சி²ன்னசூளோஸி, அஜ்ஜாபி தே ஸீஸமூலே ஊகாக³ந்தோ⁴ வாயதியேவ, த்வம் நாம ஏத்தகேஸு வுட்³ட⁴தரேஸு வத்தம் ஆபுச்ச²ந்தேஸு நிஸ்ஸத்³தோ³ நிச்சலோ நிஸின்னோ, அபசிதிமத்தம்பி தே நத்தி², கஸ்ஸ ஸாஸனே பப்³ப³ஜிதோஸீ’’தி? பரிவாரேத்வா தம் வாசாஸத்தீஹி பஹரந்தா ‘‘கிம் த்வம் இணட்டோ வா ப⁴யட்டோ வா ஜீவிதும் அஸக்கோந்தோ பப்³ப³ஜிதோ’’தி? ஆஹம்ஸு. ஸோ ஏகம்பி தே²ரம் ஓலோகேஸி, தேன ‘‘கிம் மம் ஓலோகேஸி மஹல்லகா’’தி? வுத்தே அஞ்ஞம் ஓலோகேஸி, தேனபி ததே²வ வுத்தே அத²ஸ்ஸ ‘‘இமே மம் பரிவாரேத்வா வாசாஸத்தீஹி விஜ்ஜ²ந்தீ’’தி க²த்தியமானோ உப்பஜ்ஜி. அக்கீ²ஸு மணிவண்ணானி அஸ்ஸூனி ஸஞ்சரிம்ஸு. ததோ நே ஆஹ – ‘‘கஸ்ஸ ஸந்திகம் ஆக³தத்தா²’’தி. தே ‘‘கிம் பன த்வம் ‘மய்ஹம் ஸந்திகம் ஆக³தா’தி? அம்ஹே மஞ்ஞஸி கி³ஹிப்³யஞ்ஜனப⁴ட்ட²கா’’தி வத்வா, ‘‘ஸதே³வகே லோகே அக்³க³புக்³க³லஸ்ஸ ஸத்து² ஸந்திகம் ஆக³தம்ஹா’’தி ஆஹம்ஸு. ஸோ ‘‘மய்ஹம் பா⁴து ஸந்திகே ஆக³தா தும்ஹே, யதி³ ஏவம் இதா³னி வோ ஆக³தமக்³கே³னேவ க³மனம் கரிஸ்ஸாமீ’’தி குஜ்ஜி²த்வா நிக்க²ந்தோ அந்தராமக்³கே³ சிந்தேஸி – ‘‘மயி இமினாவ நீஹாரேன க³தே ஸத்தா² ஏதே ந நீஹராபேஸ்ஸதீ’’தி து³க்கீ² து³ம்மனோ அஸ்ஸூனி பவத்தயமானோ அக³மாஸி. இமினா காரணேன ஏஸ ஏவம் ஜாதோதி.

வாசாஸன்னிதோத³கேனாதி வசனபதோதே³ன. ஸஞ்ஜம்ப⁴ரிமகம்ஸூதி ஸஞ்ஜம்ப⁴ரிதம் நிரந்தரம் பு²டம் அகம்ஸு, உபரி விஜ்ஜி²ம்ஸூதி வுத்தம் ஹோதி. வத்தாதி பரே யதி³ச்ச²கம் வத³தியேவ. நோ ச வசனக்க²மோதி பரேஸம் வசனம் க²மிதும் ந ஸக்கோதி. இதா³னி தாவ த்வம் இமினா கோபேன இமினா வுத்தவாசாஸன்னிதோத³கேன வித்³தோ⁴. அதீதே பன ரட்ட²தோ ச பப்³பா³ஜிதோதி. ஏவம் வுத்தே, ‘‘கதரஸ்மிம் காலே ப⁴க³வா’’தி? பி⁴க்கூ² ப⁴க³வந்தம் யாசிம்ஸு.

ஸத்தா² ஆஹ – அதீதே பா³ராணஸியம் பா³ராணஸிராஜா ரஜ்ஜம் காரேஸி. அதே²கோ ஜாதிமா, ஏகோ மாதங்கோ³தி த்³வே இஸயோ பா³ராணஸிம் அக³மம்ஸு. தேஸு ஜாதிமா புரேதரம் க³ந்த்வா கும்ப⁴காரஸாலாயம் நிஸீதி³. மாதங்கோ³ தாபஸோ பச்சா² க³ந்த்வா தத்த² ஓகாஸம் யாசி கும்ப⁴காரோ ‘‘அத்தே²த்த² பட²மதரம் பவிட்டோ² பப்³ப³ஜிதோ, தம் புச்சா²’’தி ஆஹ. ஸோ அத்தனோ பரிக்கா²ரம் க³ஹேத்வா ஸாலாய த்³வாரமூலே ட²த்வா, ‘‘அம்ஹாகம்பி ஆசரிய ஏகரத்திவாஸாய ஓகாஸம் தே³தா²’’தி ஆஹ. ‘‘பவிஸ, போ⁴’’தி. பவிஸித்வா நிஸின்னம், ‘‘போ⁴, கிம் கோ³த்தோஸீ’’தி? புச்சி². ‘‘சண்டா³லகோ³த்தோம்ஹீ’’தி. ‘‘ந ஸக்கா தயா ஸத்³தி⁴ம் ஏகட்டா²னே நிஸீதி³தும், ஏகமந்தம் க³ச்சா²’’தி. ஸோ ச தத்தே²வ திணஸந்தா²ரகம் பத்த²ரித்வா நிபஜ்ஜி, ஜாதிமா த்³வாரம் நிஸ்ஸாய நிபஜ்ஜி. இதரோ பஸ்ஸாவத்தா²ய நிக்க²மந்தோ தம் உரஸ்மிம் அக்கமி. ‘‘கோ ஏஸோ’’தி ச வுத்தே? ‘‘அஹம் ஆசரியா’’தி ஆஹ. ‘‘ரே சண்டா³ல, கிம் அஞ்ஞதோ மக்³க³ம் ந பஸ்ஸஸி? அத² மே ஆக³ந்த்வா அக்கமஸீ’’தி. ‘‘ஆசரிய, அதி³ஸ்வா மே அக்கந்தோஸி, க²ம மய்ஹ’’ந்தி. ஸோ மஹாபுரிஸே ப³ஹி நிக்க²ந்தே சிந்தேஸி – ‘‘அயம் பச்சாக³ச்ச²ந்தோபி இதோவ ஆக³மிஸ்ஸதீ’’தி பரிவத்தேத்வா நிபஜ்ஜி. மஹாபுரிஸோபி ‘‘ஆசரியோ இதோ ஸீஸம் கத்வா நிபன்னோ, பாத³ஸமீபேன க³மிஸ்ஸாமீ’’தி பவிஸந்தோ புன உரஸ்மிம்யேவ அக்கமி. ‘‘கோ ஏஸோ’’தி ச வுத்தே? ‘‘அஹம் ஆசரியா’’தி ஆஹ. ‘‘பட²மம் தாவ தே அஜானந்தேன கதம், இதா³னி மம் க⁴டேந்தோவ அகாஸி, ஸூரியே தே உக்³க³ச்ச²ந்தே ஸத்ததா⁴ முத்³தா⁴ ப²லதூ’’தி ஸபி. மஹாபுரிஸோ கிஞ்சி அவத்வா புரேஅருணேயேவ ஸூரியம் க³ண்ஹி, நாஸ்ஸ உக்³க³ந்தும் அதா³ஸி. மனுஸ்ஸா ச ஹத்தி²அஸ்ஸாத³யோ ச பபு³ஜ்ஜி²ம்ஸு.

மனுஸ்ஸா ராஜகுலம் க³ந்த்வா, ‘‘தே³வ, ஸகலனக³ரே அப்பபு³த்³தோ⁴ நாம நத்தி², ந ச அருணுக்³க³ம் பஞ்ஞாயதி, கின்னு கோ² ஏத’’ந்தி? தேன ஹி நக³ரம் பரிவீமம்ஸதா²தி. தே பரிவீமம்ஸந்தா கும்ப⁴காரஸாலாயம் த்³வே தாபஸே தி³ஸ்வா, ‘‘இமேஸம் ஏதம் கம்மம் ப⁴விஸ்ஸதீ’’தி க³ந்த்வா ரஞ்ஞோ ஆரோசேஸும். ரஞ்ஞா ச ‘‘புச்ச²த² நே’’தி வுத்தா ஆக³ந்த்வா ஜாதிமந்தம் புச்சி²ம்ஸு – ‘‘தும்ஹேஹி அந்த⁴காரம் கத’’ந்தி. ‘‘ந மயா கதம், ஏஸ பன கூடஜடிலோ ச²வோ அனந்தமாயோ, தம் புச்ச²தா²’’தி. தே ஆக³ந்த்வா மஹாபுரிஸம் புச்சி²ம்ஸு – ‘‘தும்ஹேஹி, ப⁴ந்தே, அந்த⁴காரம் கத’’ந்தி. ‘‘ஆம அயம் ஆசரியோ மம் அபி⁴ஸபி, தஸ்மா மயா கத’’ந்தி. தே க³ந்த்வா ரஞ்ஞோ ஆரோசேஸும். ராஜாபி ஆக³ந்த்வா மஹாபுரிஸம் ‘‘தும்ஹேஹி கதம், ப⁴ந்தே’’தி? புச்சி². ‘‘ஆம, மஹாராஜா’’தி. ‘‘கஸ்மா ப⁴ந்தே’’தி? ‘‘இமினா அபி⁴ஸபிதோம்ஹி, ஸசே மம் ஏஸோ க²மாபேஸ்ஸதி, ஸூரியம் விஸ்ஸஜ்ஜேஸ்ஸாமீ’’தி. ராஜா ‘‘க²மாபேத², ப⁴ந்தே, ஏத’’ந்தி ஆஹ. இதரோ ‘‘மாதி³ஸோ ஜாதிமா கிம் ஏவரூபம் சண்டா³லம் க²மாபேஸ்ஸதி? ந க²மாபேமீ’’தி.

அத² நம் மனுஸ்ஸா ‘‘ந கிம் த்வம் அத்தனோ ருசியா க²மாபேஸ்ஸஸீ’’தி? வத்வா ஹத்தே²ஸு ச பாதே³ஸு ச க³ஹேத்வா பாத³மூலே நிபஜ்ஜாபேத்வா ‘‘க²மாபேஹீ’’தி ஆஹம்ஸு. ஸோ நிஸ்ஸத்³தோ³ நிபஜ்ஜி. புனபி நம் ‘‘க²மாபேஹீ’’தி ஆஹம்ஸு. ததோ ‘‘க²ம மய்ஹம், ஆசரியா’’தி ஆஹ. மஹாபுரிஸோ ‘‘அஹம் தாவ துய்ஹம் க²மித்வா ஸூரியம் விஸ்ஸஜ்ஜேஸ்ஸாமி, ஸூரியே பன உக்³க³தே தவ ஸீஸம் ஸத்ததா⁴ ப²லிஸ்ஸதீ’’தி வத்வா, ‘‘இமஸ்ஸ ஸீஸப்பமாணம் மத்திகாபிண்ட³ம் மத்த²கே ட²பேத்வா ஏதம் நதி³யா க³லப்பமாணே உத³கே ட²பேதா²’’தி ஆஹ. மனுஸ்ஸா ததா² அகம்ஸு. ஏத்தாவதா ஸரட்ட²கம் ராஜப³லம் ஸன்னிபதி. மஹாபுரிஸோ ஸூரியம் முஞ்சி. ஸூரியரஸ்மி ஆக³ந்த்வா மத்திகாபிண்ட³ம் பஹரி. ஸோ ஸத்ததா⁴ பி⁴ஜ்ஜி. தாவதே³வ ஸோ நிமுஜ்ஜித்வா ஏகேன தித்தே²ன உத்தரித்வா பலாயி. ஸத்தா² இமம் வத்து²ம் ஆஹரித்வா, ‘‘இதா³னி தாவ த்வம் பி⁴க்கூ²னம் ஸந்திகே பரிபா⁴ஸம் லப⁴ஸி, புப்³பே³பி இமம் கோத⁴ம் நிஸ்ஸாய ரட்ட²தோ பப்³பா³ஜிதோ’’தி அனுஸந்தி⁴ம் க⁴டேத்வா அத² நம் ஓவத³ந்தோ ந கோ² தே தம் திஸ்ஸ பதிரூபந்திஆதி³மாஹ. நவமம்.

10. தே²ரனாமகஸுத்தவண்ணனா

244. த³ஸமே வண்ணவாதீ³தி ஆனிஸம்ஸவாதீ³. யம் அதீதம் தம் பஹீனந்தி அதீதே க²ந்த⁴பஞ்சகே ச²ந்த³ராக³ப்பஹானேன தம் பஹீனம் நாம ஹோதி. அனாக³தந்தி அனாக³தம்பி க²ந்த⁴பஞ்சகம் தத்த² ச²ந்த³ராக³படினிஸ்ஸக்³கே³ன படினிஸ்ஸட்ட²ம் நாம ஹோதி. ஸப்³பா³பி⁴பு⁴ந்தி ஸப்³பா³ க²ந்தா⁴யதனதா⁴துயோ ச தயோ ப⁴வே ச அபி⁴ப⁴வித்வா டி²தம். ஸப்³ப³விது³ந்தி தம் வுத்தப்பகாரம் ஸப்³ப³ம் விதி³தம் பாகடம் கத்வா டி²தம். ஸப்³பே³ஸு த⁴ம்மேஸூதி தேஸ்வேவ த⁴ம்மேஸு தண்ஹாதி³ட்டி²லேபேஹி அனுபலித்தம். ஸப்³ப³ஞ்ஜஹந்தி ததே³வ ஸப்³ப³ம் தத்த² ச²ந்த³ராக³ப்பஹானேன ஜஹித்வா டி²தம். தண்ஹக்க²யே விமுத்தந்தி தண்ஹக்க²யஸங்கா²தே நிப்³பா³னே ததா³ரம்மணாய விமுத்தியா விமுத்தம். த³ஸமம்.

11. மஹாகப்பினஸுத்தவண்ணனா

245. ஏகாத³ஸமே மஹாகப்பினோதி ஏவம்னாமகோ அபி⁴ஞ்ஞாப³லப்பத்தோ அஸீதிமஹாஸாவகானம் அப்³ப⁴ந்தரோ மஹாதே²ரோ. ஸோ கிர கி³ஹிகாலே குக்குடவதீனக³ரே தியோஜனஸதிகம் ரஜ்ஜம் அகாஸி. பச்சி²மப⁴விகத்தா பன ததா²ரூபம் ஸாஸனம் ஸோதும் ஓஹிதஸோதோ விசரதி. அதே²கதி³வஸம் அமச்சஸஹஸ்ஸபரிவுதோ உய்யானகீளிகம் அக³மாஸி. ததா³ ச மஜ்ஜி²மதே³ஸதோ ஜங்க⁴வாணிஜா தம் நக³ரம் க³ந்த்வா, ப⁴ண்ட³ம் படிஸாமேத்வா, ‘‘ராஜானம் பஸ்ஸிஸ்ஸாமா’’தி பண்ணாகாரஹத்தா² ராஜகுலத்³வாரம் க³ந்த்வா, ‘‘ராஜா உய்யானம் க³தோ’’தி ஸுத்வா, உய்யானம் க³ந்த்வா, த்³வாரே டி²தா, படிஹாரஸ்ஸ ஆரோசயிம்ஸு. அத² ரஞ்ஞோ நிவேதி³தே ராஜா பக்கோஸாபேத்வா நிய்யாதிதபண்ணாகாரே வந்தி³த்வா டி²தே, ‘‘தாதா, குதோ ஆக³தத்தா²’’தி? புச்சி². ‘‘ஸாவத்தி²தோ தே³வா’’தி. ‘‘கச்சி வோ ரட்ட²ம் ஸுபி⁴க்க²ம், த⁴ம்மிகோ ராஜா’’தி? ‘‘ஆம, தே³வா’’தி. ‘‘அத்தி² பன தும்ஹாகம் தே³ஸே கிஞ்சி ஸாஸன’’ந்தி? ‘‘அத்தி², தே³வ, ந பன ஸக்கா உச்சி²ட்ட²முகே²ஹி கதே²து’’ந்தி. ராஜா ஸுவண்ணபி⁴ங்கா³ரேன உத³கம் தா³பேஸி. தே முக²ம் விக்கா²லேத்வா த³ஸப³லாபி⁴முகா² அஞ்ஜலிம் பக்³க³ண்ஹித்வா, ‘‘தே³வ, அம்ஹாகம் தே³ஸே பு³த்³த⁴ரதனம் நாம உப்பன்ன’’ந்தி ஆஹம்ஸு. ரஞ்ஞோ ‘‘பு³த்³தோ⁴’’தி வசனே ஸுதமத்தே ஸகலஸரீரம் ப²ரமானா பீதி உப்பஜ்ஜி. ததோ ‘‘பு³த்³தோ⁴தி, தாதா, வத³தா²’’தி? ஆஹ. ‘‘பு³த்³தோ⁴தி தே³வ வதா³மா’’தி. ஏவம் திக்க²த்தும் வதா³பேத்வா, ‘‘பு³த்³தோ⁴தி பத³ம் அபரிமாணம், நாஸ்ஸ ஸக்கா பரிமாணம் காது’’ந்தி தஸ்மிம்யேவ பஸன்னோ ஸதஸஹஸ்ஸம் த³த்வா புன ‘‘அஞ்ஞம் கிம் ஸாஸன’’ந்தி? புச்சி². ‘‘தே³வ த⁴ம்மரதனம் நாம உப்பன்ன’’ந்தி. தம்பி ஸுத்வா ததே²வ திக்க²த்தும் படிஞ்ஞம் க³ஹேத்வா அபரம்பி ஸதஸஹஸ்ஸம் த³த்வா புன ‘‘அஞ்ஞம் கிம் ஸாஸன’’ந்தி? புச்சி². ‘‘ஸங்க⁴ரதனம் தே³வ உப்பன்ன’’ந்தி. தம்பி ஸுத்வா ததே²வ திக்க²த்தும் படிஞ்ஞம் க³ஹேத்வா அபரம்பி ஸதஸஹஸ்ஸம் த³த்வா தி³ன்னபா⁴வம் பண்ணே லிகி²த்வா, ‘‘தாதா, தே³வியா ஸந்திகம் க³ச்ச²தா²’’தி பேஸேஸி. தேஸு க³தேஸு அமச்சே புச்சி², ‘‘தாதா, பு³த்³தோ⁴ லோகே உப்பன்னோ, தும்ஹே கிம் கரிஸ்ஸதா²’’தி? ‘‘தே³வ தும்ஹே கிம் கத்துகாமா’’தி? ‘‘அஹம் பப்³ப³ஜிஸ்ஸாமீ’’தி. ‘‘மயம்பி பப்³ப³ஜிஸ்ஸாமா’’தி. தே ஸப்³பே³பி க⁴ரம் வா குடும்ப³ம் வா அனபலோகேத்வா யே அஸ்ஸே ஆருய்ஹ க³தா, தேஹேவ நிக்க²மிம்ஸு.

வாணிஜா அனோஜாதே³வியா ஸந்திகம் க³ந்த்வா பண்ணம் த³ஸ்ஸேஸும். ஸா வாசேத்வா ‘‘ரஞ்ஞா தும்ஹாகம் ப³ஹூ கஹாபணா தி³ன்னா, கிம் தும்ஹேஹி கதம், தாதா’’தி? புச்சி². ‘‘பியஸாஸனம் தே³வி ஆனீத’’ந்தி. ‘‘அம்ஹேபி ஸக்கா, தாதா, ஸுணாபேது’’ந்தி. ‘‘ஸக்கா தே³வி, உச்சி²ட்ட²முகே²ஹி பன வத்தும் ந ஸக்கா’’தி. ஸா ஸுவண்ணபி⁴ங்கா³ரேன உத³கம் தா³பேஸி. தே முக²ம் விக்கா²லேத்வா ரஞ்ஞோ ஆரோசிதனயேனேவ ஆரோசேஸும். ஸாபி ஸுத்வா உப்பன்னபாமோஜ்ஜா தேனேவ நயேன ஏகேகஸ்மிம் பதே³ திக்க²த்தும் படிஞ்ஞம் க³ஹேத்வா படிஞ்ஞாக³ணனாய தீணி தீணி கத்வா நவஸதஸஹஸ்ஸானி அதா³ஸி. வாணிஜா ஸப்³பா³னிபி த்³வாத³ஸஸதஸஹஸ்ஸானி லபி⁴ம்ஸு. அத² நே ‘‘ராஜா கஹம், தாதா’’தி, புச்சி². ‘‘பப்³ப³ஜிஸ்ஸாமீதி நிக்க²ந்தோ தே³வீ’’தி. ‘‘தேன ஹி, தாதா, தும்ஹே க³ச்ச²தா²’’தி தே உய்யோஜேத்வா ரஞ்ஞா ஸத்³தி⁴ம் க³தானம் அமச்சானம் மாதுகா³மே பக்கோஸாபேத்வா, ‘‘தும்ஹே அத்தனோ ஸாமிகானம் க³தட்டா²னம் ஜானாத² அம்மா’’தி புச்சி². ‘‘ஜானாம அய்யே, ரஞ்ஞா ஸத்³தி⁴ம் உய்யானகீளிகம் க³தா’’தி. ஆம க³தா, தத்த² பன க³ந்த்வா, ‘‘பு³த்³தோ⁴ உப்பன்னோ, த⁴ம்மோ உப்பன்னோ, ஸங்கோ⁴ உப்பன்னோ’’தி ஸுத்வா, ‘‘த³ஸப³லஸ்ஸ ஸந்திகே பப்³ப³ஜிஸ்ஸாமா’’தி க³தா. ‘‘தும்ஹே கிம் கரிஸ்ஸதா²’’தி? ‘‘தும்ஹே பன அய்யே கிம் கத்துகாமா’’தி? ‘‘அஹம் பப்³ப³ஜிஸ்ஸாமி, ந தேஹி வந்தவமனம் ஜிவ்ஹக்³கே³ ட²பேய்ய’’ந்தி. ‘‘யதி³ ஏவம், மயம்பி பப்³ப³ஜிஸ்ஸாமா’’தி ஸப்³பா³ ரதே² யோஜாபேத்வா நிக்க²மிம்ஸு.

ராஜாபி அமச்சஸஹஸ்ஸேன ஸத்³தி⁴ம் க³ங்கா³ய தீரம் பாபுணி. தஸ்மிஞ்ச ஸமயே க³ங்கா³ பூரா ஹோதி. அத² நம் தி³ஸ்வா, ‘‘அயம் க³ங்கா³ பூரா சண்ட³மச்சா²கிண்ணா, அம்ஹேஹி ஸத்³தி⁴ம் ஆக³தா தா³ஸா வா மனுஸ்ஸா வா நத்தி², யே நோ நாவம் வா உளும்பம் வா கத்வா த³தே³ய்யும், ஏதஸ்ஸ பன ஸத்து² கு³ணா நாம ஹேட்டா² அவீசிதோ உபரி யாவ ப⁴வக்³கா³ பத்த²டா, ஸசே ஏஸ ஸத்தா² ஸம்மாஸம்பு³த்³தோ⁴, இமேஸம் அஸ்ஸானம் கு²ரபிட்டா²னி மா தேமேந்தூ’’தி உத³கபிட்டே²ன அஸ்ஸே பக்க²ந்தா³பேஸும். ஏகஅஸ்ஸஸ்ஸாபி கு²ரபிட்ட²மத்தம் ந தேமி, ராஜமக்³கே³ன க³ச்ச²ந்தா விய பரதீரம் பத்வா புரதோ அஞ்ஞம் மஹானதி³ம் பாபுணிம்ஸு. தத்த² அஞ்ஞா ஸச்சகிரியா நத்தி², தாய ஏவ ஸச்சகிரியாய தம்பி அட்³ட⁴யோஜனவித்தா²ரம் நதி³ம் அதிக்கமிம்ஸு. அத² ததியம் சந்த³பா⁴க³ம் நாம மஹானதி³ம் பத்வா தம்பி தாய ஏவ ஸச்சகிரியாய அதிக்கமிம்ஸு.

ஸத்தா²பி தம்தி³வஸம் பச்சூஸஸமயே மஹாகருணாஸமாபத்திதோ வுட்டா²ய லோகம் ஓலோகேந்தோ ‘‘அஜ்ஜ மஹாகப்பினோ தியோஜனஸதிகம் ரஜ்ஜம் பஹாய அமச்சஸஹஸ்ஸபரிவாரோ மம ஸந்திகே பப்³ப³ஜிதும் ஆக³ச்ச²தீ’’தி தி³ஸ்வா, ‘‘மயா தேஸம் பச்சுக்³க³மனம் காதும் யுத்த’’ந்தி பாதோவ ஸரீரபடிஜக்³க³னம் கத்வா, பி⁴க்கு²ஸங்க⁴பரிவாரோ ஸாவத்தி²யம் பிண்டா³ய சரித்வா, பச்சா²ப⁴த்தம் பிண்ட³பாதபடிக்கந்தோ ஸயமேவ பத்தசீவரம் க³ஹேத்வா, ஆகாஸே உப்பதித்வா சந்த³பா⁴கா³ய நதி³யா தீரே தேஸம் உத்தரணதித்த²ஸ்ஸ அபி⁴முகே² டா²னே மஹானிக்³ரோத⁴ருக்கோ² அத்தி², தத்த² பல்லங்கேன நிஸீதி³த்வா பரிமுக²ம் ஸதிம் உபட்ட²பேத்வா ச²ப்³ப³ண்ணபு³த்³த⁴ரஸ்மியோ விஸ்ஸஜ்ஜேஸி. தே தேன தித்தே²ன உத்தரந்தா ச ச²ப்³ப³ண்ணபு³த்³த⁴ரஸ்மியோ இதோ சிதோ ச விதா⁴வந்தியோ ஓலோகேந்தா த³ஸப³லஸ்ஸ புண்ணசந்த³ஸஸ்ஸிரிகம் முக²ம் தி³ஸ்வா, ‘‘யம் ஸத்தா²ரம் உத்³தி³ஸ்ஸ மயம் பப்³ப³ஜிதா, அத்³தா⁴ ஸோ ஏஸோ’’தி த³ஸ்ஸனேனேவ நிட்ட²ம் க³ந்த்வா தி³ட்ட²ட்டா²னதோ பட்டா²ய ஓனதா வந்த³மானா ஆக³ம்ம ஸத்தா²ரம் வந்தி³ம்ஸு. ராஜா கோ³ப்ப²கேஸு க³ஹேத்வா ஸத்தா²ரம் வந்தி³த்வா ஏகமந்தம் நிஸீதி³ ஸத்³தி⁴ம் அமச்சஸஹஸ்ஸேன. ஸத்தா² தேஸம் த⁴ம்மம் கதே²ஸி. தே³ஸனாபரியோஸானே ஸப்³பே³ அரஹத்தே பதிட்டா²ய ஸத்தா²ரம் பப்³ப³ஜ்ஜம் யாசிம்ஸு. ஸத்தா² ‘‘புப்³பே³ இமே சீவரதா³னஸ்ஸ தி³ன்னத்தா அத்தனோ சீவரானி க³ஹேத்வாவ ஆக³தா’’தி ஸுவண்ணவண்ணம் ஹத்த²ம் பஸாரேத்வா, ‘‘ஏத² பி⁴க்க²வோ ஸ்வாக்கா²தோ த⁴ம்மோ, சரத² ப்³ரஹ்மசரியம் ஸம்மா து³க்க²ஸ்ஸ அந்தகிரியாயா’’தி ஆஹ. ஸாவ தேஸம் ஆயஸ்மந்தானம் பப்³ப³ஜ்ஜா ச உபஸம்பதா³ ச அஹோஸி, வஸ்ஸஸட்டி²கத்தே²ரா விய ஸத்தா²ரம் பரிவாரயிம்ஸு.

அனோஜாபி தே³வீ ரத²ஸஹஸ்ஸபரிவாரா க³ங்கா³தீரம் பத்வா ரஞ்ஞோ அத்தா²ய ஆப⁴தம் நாவம் வா உளும்பம் வா அதி³ஸ்வா அத்தனோ ப்³யத்ததாய சிந்தேஸி – ‘‘ராஜா ஸச்சகிரியம் கத்வா க³தோ ப⁴விஸ்ஸதி, ஸோ பன ஸத்தா² ந கேவலம் தேஸம்யேவ அத்தா²ய நிப்³ப³த்தோ, ஸசே ஸோ ஸத்தா² ஸம்மாஸம்பு³த்³தோ⁴, அம்ஹாகம் ரதா² மா உத³கே நிமுஜ்ஜிம்ஸூ’’தி உத³கபிட்டே² ரதே² பக்க²ந்தா³பேஸி. ரதா²னம் நேமிவட்டிமத்தம்பி ந தேமி. து³தியததியனதீ³பி தேனேவ ஸச்சகாரேன உத்தரமானாயேவ நிக்³ரோத⁴ருக்க²மூலே ஸத்தா²ரம் அத்³த³ஸ. ஸத்தா² ‘‘இமாஸம் அத்தனோ ஸாமிகே பஸ்ஸந்தீனம் ச²ந்த³ராகோ³ உப்பஜ்ஜித்வா மக்³க³ப²லானம் அந்தராயம் கரேய்ய, ஸோ ஏவம் காதும் ந ஸக்கி²ஸ்ஸதீ’’தி யதா² அஞ்ஞமஞ்ஞே ந பஸ்ஸந்தி, ததா² அகாஸி. தா ஸப்³பா³பி தித்த²தோ உத்தரித்வா த³ஸப³லம் வந்தி³த்வா நிஸீதி³ம்ஸு. ஸத்தா² தாஸம் த⁴ம்மம் கதே²ஸி, தே³ஸனாபரியோஸானே ஸப்³பா³பி ஸோதாபத்திப²லே பதிட்டா²ய அஞ்ஞமஞ்ஞே பஸ்ஸிம்ஸு. ஸத்தா² ‘‘உப்பலவண்ணா ஆக³ச்ச²தூ’’தி சிந்தேஸி. தே²ரீ ஆக³ந்த்வா ஸப்³பா³ பப்³பா³ஜேத்வா ஆதா³ய பி⁴க்கு²னீனம் உபஸ்ஸயம் க³தா. ஸத்தா² பி⁴க்கு²ஸஹஸ்ஸம் க³ஹேத்வா ஆகாஸேன ஜேதவனம் அக³மாஸி. இமம் ஸந்தா⁴யேதம் வுத்தம் – ‘‘மஹாகப்பினோதி ஏவம் நாமகோ அபி⁴ஞ்ஞாப³லப்பத்தோ அஸீதிமஹாஸாவகானம் அப்³ப⁴ந்தரோ மஹாதே²ரோ’’தி.

ஜனேதஸ்மிந்தி ஜனிதே பஜாயாதி அத்தோ². யே கோ³த்தபடிஸாரினோதி யே ‘‘மயம் வாஸேட்டா² கோ³தமா’’தி கோ³த்தம் படிஸரந்தி படிஜானந்தி, தேஸம் க²த்தியோ ஸேட்டோ²தி அத்தோ². விஜ்ஜாசரணஸம்பன்னோதி அட்ட²ஹி விஜ்ஜாஹி சேவ பன்னரஸத⁴ம்மபே⁴தே³ன சரணேன ச ஸமன்னாக³தோ. தபதீதி விரோசதி. ஜா²யீ தபதி ப்³ராஹ்மணோதி கீ²ணாஸவப்³ராஹ்மணோ து³விதே⁴ன ஜா²னேன ஜா²யமானோ தபதி விரோசதி. தஸ்மிம் பன க²ணே காலுதா³யித்தே²ரோ து³விதே⁴ன ஜா²னேன ஜா²யமானோ அவிதூ³ரே நிஸின்னோ ஹோதி. பு³த்³தோ⁴ தபதீதி ஸப்³ப³ஞ்ஞுபு³த்³தோ⁴ விரோசதி. ஸப்³ப³மங்க³லகா³தா² கிரேஸா. பா⁴திகராஜா கிர ஏகம் பூஜம் காரேத்வா ஆசரியகம் ஆஹ – ‘‘தீஹி ரதனேஹி அமுத்தம் ஏகம் ஜயமங்க³லம் வத³தா²’’தி. ஸோ தேபிடகம் பு³த்³த⁴வசனம் ஸம்மஸித்வா இமம் கா³த²ம் வத³ந்தோ ‘‘தி³வா தபதி ஆதி³ச்சோ’’தி வத்வா அத்த²ங்க³மேந்தஸ்ஸ ஸூரியஸ்ஸ அஞ்ஜலிம் பக்³க³ண்ஹி. ‘‘ரத்திமாபா⁴தி சந்தி³மா’’தி, உட்ட²ஹந்தஸ்ஸ சந்த³ஸ்ஸ அஞ்ஜலிம் பக்³க³ண்ஹி. ‘‘ஸன்னத்³தோ⁴ க²த்தியோ தபதீ’’தி ரஞ்ஞோ அஞ்ஜலிம் பக்³க³ண்ஹி. ‘‘ஜா²யீ தபதி ப்³ராஹ்மணோ’’தி பி⁴க்கு²ஸங்க⁴ஸ்ஸ அஞ்ஜலிம் பக்³க³ண்ஹி. ‘‘பு³த்³தோ⁴ தபதி தேஜஸா’’தி வத்வா பன மஹாசேதியஸ்ஸ அஞ்ஜலிம் பக்³க³ண்ஹி. அத² நம் ராஜா ‘‘மா ஹத்த²ம் ஓதாரேஹீ’’தி உக்கி²த்தஸ்மிம்யேவ ஹத்தே² ஸஹஸ்ஸம் ட²பேஸி. ஏகாத³ஸமம்.

12. ஸஹாயகஸுத்தவண்ணனா

246. த்³வாத³ஸமே சிரரத்தம்ஸமேதிகாதி தீ³க⁴ரத்தம் ஸம்ஸந்தி³த்வா ஸமேத்வா டி²தலத்³தி⁴னோ. தே கிர பஞ்சஜாதிஸதானி ஏகதோவ விசரிம்ஸு. ஸமேதி நேஸம் ஸத்³த⁴ம்மோதி இதா³னி இமேஸம் அயம் ஸாஸனத⁴ம்மோ ஸம்ஸந்த³தி ஸமேதி. த⁴ம்மே பு³த்³த⁴ப்பவேதி³தேதி பு³த்³தே⁴ன பவேதி³தே த⁴ம்மே ஏதேஸம் ஸாஸனத⁴ம்மோ ஸோப⁴தீதி அத்தோ². ஸுவினீதா கப்பினேனாதி அத்தனோ உபஜ்ஜா²யேன அரியப்பவேதி³தே த⁴ம்மே ஸுட்டு² வினீதா. ஸேஸம் ஸப்³ப³த்த² உத்தானமேவாதி. த்³வாத³ஸமம்.

பி⁴க்கு²ஸம்யுத்தவண்ணனா நிட்டி²தா.

இதி ஸாரத்த²ப்பகாஸினியா ஸம்யுத்தனிகாய-அட்ட²கதா²ய

நிதா³னவக்³க³வண்ணனா நிட்டி²தா.