6. து³க்க²வக்³கோ³

1. பரிவீமம்ஸனஸுத்தவண்ணனா

51. து³க்க²வக்³க³ஸ்ஸ பட²மே பரிவீமம்ஸமானோதி உபபரிக்க²மானோ. ஜராமரணந்தி கஸ்மா ஜராமரணம் ஏகமேவ ‘‘அனேகவித⁴ம் நானப்பகாரக’’ந்தி வத்வா க³ஹிதந்தி சே? தஸ்மிம் க³ஹிதே ஸப்³ப³து³க்க²ஸ்ஸ க³ஹிதத்தா. யதா² ஹி சூளாய க³ஹிதே புரிஸே ஸோ புரிஸோ க³ஹிதோவ ஹோதி, ஏவம் ஜராமரணே க³ஹிதே ஸப்³ப³து³க்க²ம் க³ஹிதமேவ ஹோதி. தஸ்மா ‘‘யம் கோ² இத³ம் அனேகவித⁴ம் நானப்பகாரகம் து³க்க²ம் லோகே உப்பஜ்ஜதீ’’தி ந்ஹத்வா டி²தம் புரிஸம் விய ஸப்³ப³து³க்க²ம் த³ஸ்ஸேத்வா தம் சூளாய க³ண்ஹந்தோ விய ஜராமரணம் க³ண்ஹி.

ஜராமரணனிரோத⁴ஸாருப்பகா³மினீதி ஜராமரணனிரோத⁴ஸ்ஸ ஸாருப்பபா⁴வேன நிக்கிலேஸதாய பரிஸுத்³த⁴தாய ஸதி³ஸாவ ஹுத்வா கா³மினீதி அத்தோ². ததா² படிபன்னோ ச ஹோதீதி யதா² தம் படிபன்னோதி வுச்சதி, ஏவம் படிபன்னோ ஹோதி. அனுத⁴ம்மசாரீதி நிப்³பா³னத⁴ம்மம் அனுக³தம் படிபத்தித⁴ம்மம் சரதி, பூரேதீதி அத்தோ². து³க்க²க்க²யாய படிபன்னோதி ஸீலம் ஆதி³ம் கத்வா ஜராமரணது³க்க²ஸ்ஸ நிரோத⁴த்தா²ய படிபன்னோ. ஸங்கா²ரனிரோதா⁴யாதி ஸங்கா²ரது³க்க²ஸ்ஸ நிரோத⁴த்தா²ய. ஏத்தாவதா யாவ அரஹத்தா தே³ஸனா கதி²தா.

இதா³னி அரஹத்தப²லபச்சவேக்க²ணம் ஸததவிஹாரஞ்ச த³ஸ்ஸேத்வா தே³ஸனா நிவத்தேதப்³பா³ ஸியா, ததா² அகத்வா அவிஜ்ஜாக³தோதி இத³ம் கஸ்மா க³ண்ஹாதீதி? கீ²ணாஸவஸ்ஸ ஸமதிக்கந்தவட்டது³க்க²த³ஸ்ஸனத்த²ம். அபிச புன வட்டம் ஆரபி⁴த்வா விவட்டே கதி²யமானே பு³ஜ்ஜ²னகஸத்தோ சேத்த² அத்தி², தஸ்ஸ அஜ்ஜா²ஸயவஸேனாபி இத³ம் க³ண்ஹாதீதி வேதி³தப்³போ³. தத்த² அவிஜ்ஜாக³தோதி அவிஜ்ஜாய க³தோ உபக³தோ ஸமன்னாக³தோ. புரிஸபுக்³க³லோதி புரிஸோயேவ புக்³க³லோ. உப⁴யேனாபி ஸம்முதிகத²ம் கதே²தி. பு³த்³தா⁴னஞ்ஹி ஸம்முதிகதா² பரமத்த²கதா²தி த்³வே கதா² ஹோந்தி. தத்த² ‘‘ஸத்தோ நரோ புரிஸோ புக்³க³லோ திஸ்ஸோ நாகோ³’’தி ஏவம் பவத்தா ஸம்முதிகதா² நாம. ‘‘க²ந்தா⁴ தா⁴துயோ ஆயதனானீ’’தி ஏவம் பவத்தா பரமத்த²கதா² நாம. பரமத்த²ம் கதே²ந்தாபி ஸம்முதிம் அமுஞ்சித்வா கதே²ந்தி. தே ஸம்முதிம் கதே²ந்தாபி பரமத்த²ம் கதே²ந்தாபி ஸச்சமேவ கதே²ந்தி. தேனேவ வுத்தம் –

‘‘து³வே ஸச்சானி அக்கா²ஸி, ஸம்பு³த்³தோ⁴ வத³தம் வரோ;

ஸம்முதிம் பரமத்த²ஞ்ச, ததியம் நூபலப்³ப⁴தி;

ஸங்கேதவசனம் ஸச்சம், லோகஸம்முதிகாரணம்;

பரமத்த²வசனம் ஸச்சம், த⁴ம்மானம் பூ⁴தலக்க²ண’’ந்தி.

புஞ்ஞம் சே ஸங்கா²ரந்தி தேரஸசேதனாபே⁴த³ம் புஞ்ஞாபி⁴ஸங்கா²ரம். அபி⁴ஸங்க²ரோதீதி கரோதி. புஞ்ஞூபக³ம் ஹோதி விஞ்ஞாணந்தி கம்மவிஞ்ஞாணம் கம்மபுஞ்ஞேன உபக³தம் ஸம்பயுத்தம் ஹோதி, விபாகவிஞ்ஞாணம் விபாகபுஞ்ஞேன. அபுஞ்ஞம் சே ஸங்கா²ரந்தி த்³வாத³ஸசேதனாபே⁴த³ம் அபுஞ்ஞாபி⁴ஸங்கா²ரம் அபி⁴ஸங்க²ரோதி. ஆனேஞ்ஜம் சே ஸங்கா²ரந்தி சதுசேதனாபே⁴த³ம் ஆனேஞ்ஜாபி⁴ஸங்கா²ரம். ஆனேஞ்ஜூபக³ம் ஹோதி விஞ்ஞாணந்தி கம்மானேஞ்ஜேன கம்மவிஞ்ஞாணம், விபாகானேஞ்ஜேன விபாகவிஞ்ஞாணம் உபக³தம் ஹோதி. ஏத்த² ச திவித⁴ஸ்ஸ கம்மாபி⁴ஸங்கா²ரஸ்ஸ க³ஹிதத்தா த்³வாத³ஸபதி³கோ பச்சயாகாரோ க³ஹிதோவ ஹோதி. ஏத்தாவதா வட்டம் த³ஸ்ஸிதம்.

இதா³னி விவட்டம் த³ஸ்ஸேந்தோ யதோ கோ², பி⁴க்க²வேதிஆதி³மாஹ. தத்த² அவிஜ்ஜாதி சதூஸு ஸச்சேஸு அஞ்ஞாணம். விஜ்ஜாதி அரஹத்தமக்³க³ஞாணம். ஏத்த² ச பட²மமேவ அவிஜ்ஜாய பஹீனாய விஜ்ஜா உப்பஜ்ஜதி. யதா² பன சதுரங்கே³பி தமே ரத்திம் பதீ³புஜ்ஜலேன அந்த⁴காரோ பஹீயதி, ஏவம் விஜ்ஜுப்பாதா³ அவிஜ்ஜாய பஹானம் வேதி³தப்³ப³ம். ந கிஞ்சி லோகே உபாதி³யதீதி லோகே கிஞ்சி த⁴ம்மம் ந க³ண்ஹாதி ந பராமஸதி. அனுபாதி³யம் ந பரிதஸ்ஸதீதி அனுபாதி³யந்தோ அக³ண்ஹந்தோ நேவ தண்ஹாபரிதஸ்ஸனாய, ந ப⁴யபரிதஸ்ஸனாய பரிதஸ்ஸதி, ந தண்ஹாயதி ந பா⁴யதீதி அத்தோ². பச்சத்தஞ்ஞேவாதி ஸயமேவ அத்தனாவ பரினிப்³பா³யதி, ந அஞ்ஞஸ்ஸ ஆனுபா⁴வேன.

ஸோ ஸுக²ம் சே வேத³னந்தி இத³ம் கஸ்மா ஆரபி⁴? கீ²ணாஸவஸ்ஸ பச்சவேக்க²ணஞாணம் த³ஸ்ஸேத்வா ஸததவிஹாரம் த³ஸ்ஸேதும் ஆரபி⁴. அனஜ்ஜோ²ஸிதாதி தண்ஹாய கி³லித்வா பரினிட்ட²பேத்வா அக³ஹிதா. அத² து³க்க²வேத³னா கஸ்மா வுத்தா, கிம் தம்பி அபி⁴னந்த³ந்தோ அத்தீ²தி? ஆம அத்தி². ஸுக²ம் அபி⁴னந்த³ந்தோயேவ ஹி து³க்க²ம் அபி⁴னந்த³தி நாம து³க்க²ம் பத்வா ஸுக²ம் பத்த²னதோ ஸுக²ஸ்ஸ ச விபரிணாமது³க்க²தோதி. காயபரியந்திகந்தி காயபரிச்சி²ன்னம், யாவ பஞ்சத்³வாரகாயோ பவத்ததி, தாவ பவத்தம் பஞ்சத்³வாரிகவேத³னந்தி அத்தோ². ஜீவிதபரியந்திகந்தி ஜீவிதபரிச்சி²ன்னம். யாவ ஜீவிதம் பவத்ததி, தாவ பவத்தம் மனோத்³வாரிகவேத³னந்தி அத்தோ².

தத்த² பஞ்சத்³வாரிகவேத³னா பச்சா² உப்பஜ்ஜித்வா பட²மம் நிருஜ்ஜ²தி, மனோத்³வாரிகவேத³னா பட²மம் உப்பஜ்ஜித்வா பச்சா² நிருஜ்ஜ²தி. ஸா ஹி படிஸந்தி⁴க்க²ணே வத்து²ரூபஸ்மிம்யேவ பதிட்டா²தி. பஞ்சத்³வாரிகா பவத்தே பஞ்சத்³வாரவஸேன பவத்தமானா பட²மவயே வீஸதிவஸ்ஸகாலே ரஜ்ஜனது³ஸ்ஸனமுய்ஹனவஸேன அதி⁴மத்தா ப³லவதீ ஹோதி, பண்ணாஸவஸ்ஸகாலே டி²தா ஹோதி, ஸட்டி²வஸ்ஸகாலதோ பட்டா²ய பரிஹாயமானா அஸீதினவுதிவஸ்ஸகாலே மந்தா³ ஹோதி. ததா³ ஹி ஸத்தா ‘‘சிரரத்தம் ஏகதோ நிஸீதி³ம்ஹா நிபஜ்ஜிம்ஹா’’தி வத³ந்தேபி ‘‘ந ஸஞ்ஜானாமா’’தி வத³ந்தி. அதி⁴மத்தானிபி ரூபாதி³ஆரம்மணானி ‘‘ந பஸ்ஸாம ந ஸுணாம’’, ‘‘ஸுக³ந்த⁴ம் து³க்³க³ந்த⁴ம் வா ஸாது³ம் அஸாது³ம் வா த²த்³த⁴ம் முது³கந்தி வா ந ஜானாமா’’தி வத³ந்தி. இதி நேஸம் பஞ்சத்³வாரிகவேத³னா ப⁴க்³கா³ ஹோதி, மனோத்³வாரிகாவ பவத்ததி. ஸாபி அனுபுப்³பே³ன பரிஹாயமானா மரணஸமயே ஹத³யகோடிம்யேவ நிஸ்ஸாய பவத்ததி. யாவ பனேஸா பவத்ததி, தாவ ஸத்தோ ஜீவதீதி வுச்சதி. யதா³ நப்பவத்ததி, ததா³ மதோ நிருத்³தோ⁴தி வுச்சதி.

ஸ்வாயமத்தோ² வாபியா தீ³பேதப்³போ³ –

யதா² ஹி புரிஸோ பஞ்சஉத³கமக்³க³ஸம்பன்னம் வாபிம் கரேய்ய, பட²மம் தே³வே வுட்டே² பஞ்சஹி உத³கமக்³கே³ஹி உத³கம் பவிஸித்வா அந்தோவாபியம் ஆவாடே பூரேய்ய, புனப்புனம் தே³வே வஸ்ஸந்தே உத³கமக்³கே³ பூரேத்வா கா³வுதட்³ட⁴யோஜனமத்தம் ஓத்த²ரித்வா உத³கம் திட்டே²ய்ய ததோ ததோ விஸ்ஸந்த³மானம், அத² நித்³த⁴மனதும்பே³ விவரித்வா கே²த்தேஸு கம்மே கரியமானே உத³கம் நிக்க²மந்தம், ஸஸ்ஸபாககாலே (உத³கம் நிக்க²மந்தம்,) உத³கம் பரிஹீனம் ‘‘மச்சே² க³ண்ஹாமா’’தி வத்தப்³ப³தம் ஆபஜ்ஜேய்ய, ததோ கதிபாஹேன ஆவாடேஸுயேவ உத³கம் ஸண்ட²ஹேய்ய. யாவ பன தம் ஆவாடேஸு ஹோதி, தாவ ‘‘மஹாவாபியம் உத³கம் அத்தீ²’’தி ஸங்க²ம் க³ச்ச²தி. யதா³ பன தத்த² சி²ஜ்ஜதி, ததா³ ‘‘வாபியம் உத³கம் நத்தீ²’’தி வுச்சதி, ஏவம்ஸம்பத³மித³ம் வேதி³தப்³ப³ம்.

பட²மம் தே³வே வஸ்ஸந்தே பஞ்சஹி மக்³கே³ஹி உத³கே பவிஸந்தே ஆவாடானம் பூரணகாலோ விய ஹி பட²மமேவ படிஸந்தி⁴க்க²ணே மனோத்³வாரிகவேத³னாய வத்து²ரூபே பதிட்டி²தகாலோ, புனப்புனம் தே³வே வஸ்ஸந்தே பஞ்சன்னம் மக்³கா³னம் பூரிதகாலோ விய பவத்தே பஞ்சத்³வாரிகவேத³னாய பவத்திகாலோ, கா³வுதட்³ட⁴யோஜனமத்தம் அஜ்ஜோ²த்த²ரணம் விய பட²மவயே வீஸதிவஸ்ஸகாலே ரஜ்ஜனாதி³வஸேன தஸ்ஸா அதி⁴மத்தப³லவபா⁴வோ, யாவ வாபிதோ உத³கம் ந நிக்³க³ச்ச²தி, தாவ பூராய வாபியா டி²தகாலோ விய பஞ்ஞாஸவஸ்ஸகாலே தஸ்ஸா டி²தகாலோ, நித்³த⁴மனதும்பே³ஸு விவடேஸு கம்மந்தே கரியமானே உத³கஸ்ஸ நிக்க²மனகாலோ விய ஸட்டி²வஸ்ஸகாலதோ பட்டா²ய தஸ்ஸா பரிஹானி, உத³கே ப⁴ட்டே² உத³கமக்³கே³ஸு பரித்தோத³கஸ்ஸ டி²தகாலோ விய அஸீதினவுதிவஸ்ஸகாலே பஞ்சத்³வாரிகவேத³னாய மந்த³காலோ, ஆவாடேஸுயேவ உத³கஸ்ஸ பதிட்டா²னகாலோ விய ஹத³யவத்து²கோடிம் நிஸ்ஸாய மனோத்³வாரிகவேத³னாய பவத்திகாலோ, ஆவாடேஸு பரித்தேபி உத³கே ஸதி ‘‘வாபியம் உத³கம் அத்தீ²’’தி வத்தப்³ப³காலோ விய யாவ ஸா பவத்ததி, தாவ ‘‘ஸத்தோ ஜீவதீ’’தி வுச்சதி. யதா² பன ஆவாடேஸு உத³கே சி²ன்னே ‘‘நத்தி² வாபியம் உத³க’’ந்தி வுச்சதி, ஏவம் மனோத்³வாரிகவேத³னாய அப்பவத்தமானாய ‘‘ஸத்தோ மதோ’’தி வுச்சதி. இமம் வேத³னம் ஸந்தா⁴ய வுத்தம் ‘‘ஜீவிதபரியந்திகம் வேத³னம் வேதி³யமானோ’’தி.

காயஸ்ஸ பே⁴தா³தி காயஸ்ஸ பே⁴தே³ன. ஜீவிதபரியாதா³னா உத்³த⁴ந்தி ஜீவிதக்க²யதோ உத்³த⁴ம். இதே⁴வாதி படிஸந்தி⁴வஸேன பரதோ அக³ந்த்வா இதே⁴வ. ஸீதீப⁴விஸ்ஸந்தீதி பவத்திவிப்ப²ந்த³த³ரத²ரஹிதானி ஸீதானி அப்பவத்தனத⁴ம்மானி ப⁴விஸ்ஸந்தி. ஸரீரானீதி தா⁴துஸரீரானி. அவஸிஸ்ஸந்தீதி அவஸிட்டா²னி ப⁴விஸ்ஸந்தி.

கும்ப⁴காரபாகாதி கும்ப⁴காரஸ்ஸ பா⁴ஜனபசனட்டா²னதோ. படிஸிஸ்ஸேய்யாதி ட²பேய்ய. கபல்லானீதி ஸஹ முக²வட்டியா ஏகாப³த்³தா⁴னி கும்ப⁴கபல்லானி. அவஸிஸ்ஸேய்யுந்தி திட்டே²ய்யும். ஏவமேவ கோ²தி ஏத்த² இத³ம் ஓபம்மஸம்ஸந்த³னம் – ஆதி³த்தகும்ப⁴காரபாகோ விய ஹி தயோ ப⁴வா த³ட்ட²ப்³பா³, கும்ப⁴காரோ விய யோகா³வசரோ, பாகதோ கும்ப⁴காரபா⁴ஜனானம் நீஹரணத³ண்ட³கோ விய அரஹத்தமக்³க³ஞாணம், ஸமோ பூ⁴மிபா⁴கோ³ விய அஸங்க²தம் நிப்³பா³னதலம், த³ண்ட³கேன உண்ஹகும்ப⁴ம் ஆகட்³டி⁴த்வா ஸமே பூ⁴மிபா⁴கே³ கும்ப⁴ஸ்ஸ ட²பிதகாலோ விய ஆரத்³த⁴விபஸ்ஸகஸ்ஸ ரூபஸத்தகம் அரூபஸத்தகம் விபஸ்ஸந்தஸ்ஸ கம்மட்டா²னே ச பகு³ணே விபூ⁴தே உபட்ட²ஹமானே ததா²ரூபம் உதுஸப்பாயாதி³ம் லபி⁴த்வா ஏகாஸனே நிஸின்னஸ்ஸ விபஸ்ஸனம் வட்³டே⁴த்வா அக்³க³ப²லம் அரஹத்தம் பத்வா சதூஹி அபாயேஹி அத்தபா⁴வம் உத்³த⁴ரித்வா ப²லஸமாபத்திவஸேன அஸங்க²தே நிப்³பா³னதலே டி²தகாலோ த³ட்ட²ப்³போ³. கீ²ணாஸவோ பன உண்ஹகும்போ⁴ விய அரஹத்தப்பத்ததி³வஸேயேவ ந பரினிப்³பா³தி, ஸாஸனப்பவேணிம் பன க⁴டயமானோ பண்ணாஸஸட்டி²வஸ்ஸானி ட²த்வா சரிமகசித்தப்பத்தியா உபாதி³ண்ணகக்க²ந்த⁴பே⁴தா³ அனுபாதி³ஸேஸாய நிப்³பா³னதா⁴துயா பரினிப்³பா³தி. அத²ஸ்ஸ கும்ப⁴ஸ்ஸ விய கபல்லானி அனுபாதி³ண்ணகஸரீரானேவ அவஸிஸ்ஸந்தீதி. ஸரீரானி அவஸிஸ்ஸந்தீதி பஜானாதீதி இத³ம் பன கீ²ணாஸவஸ்ஸ அனுயோகா³ரோபனத்த²ம் வுத்தம்.

விஞ்ஞாணம் பஞ்ஞாயேதா²தி படிஸந்தி⁴விஞ்ஞாணம் பஞ்ஞாயேத². ஸாது⁴ ஸாதூ⁴தி தே²ரானம் ப்³யாகரணம் ஸம்பஹம்ஸதி. ஏவமேதந்தி யதே³தம் திவிதே⁴ அபி⁴ஸங்கா²ரே அஸதி படிஸந்தி⁴விஞ்ஞாணஸ்ஸ அப்பஞ்ஞாணந்திஆதி³, ஏவமேவ ஏதம். அதி⁴முச்சதா²தி ஸன்னிட்டா²னஸங்கா²தம் அதி⁴மோக்க²ம் படிலப⁴த². ஏஸேவந்தோ து³க்க²ஸ்ஸாதி அயமேவ வட்டது³க்க²ஸ்ஸ அந்தோ அயம் பரிச்சே²தோ³, யதி³த³ம் நிப்³பா³னந்தி. பட²மம்.

2. உபாதா³னஸுத்தவண்ணனா

52. து³தியே உபாதா³னியேஸூதி சதுன்னம் உபாதா³னானம் பச்சயேஸு தேபூ⁴மகத⁴ம்மேஸு. அஸ்ஸாதா³னுபஸ்ஸினோதி அஸ்ஸாத³ம் அனுபஸ்ஸந்தஸ்ஸ. தத்ராதி தஸ்மிம் அக்³கி³க்க²ந்தே⁴. ததா³ஹாரோதி தம்பச்சயோ. தது³பாதா³னோதி தஸ்ஸேவ வேவசனம். ஏவமேவ கோ²தி ஏத்த² அக்³கி³க்க²ந்தோ⁴ விய ஹி தயோ ப⁴வா, தேபூ⁴மகவட்டந்திபி ஏததே³வ, அக்³கி³ஜக்³க³கபுரிஸோ விய வட்டனிஸ்ஸிதோ பா³லபுது²ஜ்ஜனோ, ஸுக்க²திணகோ³மயாதி³பக்கி²பனம் விய அஸ்ஸாதா³னுபஸ்ஸினோ புது²ஜ்ஜனஸ்ஸ தண்ஹாதி³வஸேன ச²ஹி த்³வாரேஹி குஸலாகுஸலகம்மகரணம். திணகோ³மயாதீ³ஸு கீ²ணேஸு புனப்புனம் தேஸம் பக்கி²பனேன அக்³கி³க்க²ந்த⁴ஸ்ஸ வட்³ட⁴னம் விய பா³லபுது²ஜ்ஜனஸ்ஸ உட்டா²ய ஸமுட்டா²ய யதா²வுத்தகம்மாயூஹனேன அபராபரம் வட்டது³க்க²னிப்³ப³த்தனம்.

ந காலேன காலம் ஸுக்கா²னி சேவ திணானி பக்கி²பேய்யாதி தஞ்ஹி கோசி அத்த²காமோ ஏவம் வதே³ய்ய – ‘‘போ⁴ கஸ்மா உட்டா²ய ஸமுட்டா²ய கலாபே ப³ந்தி⁴த்வா ஸுக்க²திணகட்டா²னம் பச்சி²யஞ்ச பூரேத்வா ஸுக்க²கோ³மயானி பக்கி²பந்தோ ஏதம் அக்³கி³ம் ஜாலேஸி? அபி நு தே அத்தி² இதோனிதா³னம் காசி வட்³டீ⁴தி? வம்ஸாக³தமேதம் போ⁴ அம்ஹாகம், இதோனிதா³னம் பன மே அவட்³டி⁴யேவ, குதோ வட்³டி⁴? அஹஞ்ஹி இமம் அக்³கி³ம் ஜக்³க³ந்தோ நேவ ந்ஹாயிதும் ந பு⁴ஞ்ஜிதும் ந நிபஜ்ஜிதும் லபா⁴மீதி. தேன ஹி போ⁴ கிம் தே இமினா நிரத்த²கேன அக்³கி³ஜாலனேன? ஏஹி த்வம் ஏதானி ஆப⁴தானி திணாதீ³னி ஏத்த² நிக்கி²ப, தானி ஸயமேவ ஜா²யிஸ்ஸந்தி, த்வம் பன அஸுகஸ்மிம் டா²னே ஸீதோத³கா போக்க²ரணீ அத்தி², தத்த² ந்ஹத்வா, மாலாக³ந்த⁴விலேபனேஹி அத்தானம் மண்டே³த்வா ஸுனிவத்தோ² ஸுபாருதோவ பாது³காஹி நக³ரம் பவிஸித்வா பாஸாத³வரமாருய்ஹ வாதபானம் விவரித்வா மஹாவீதி²யம் விரோசமானோ நிஸீத³ ஏகக்³கோ³ ஸுக²ஸமப்பிதோ ஹுத்வா, தத்த² தே நிஸின்னஸ்ஸ திணாதீ³னம் க²யேன ஸயமேவ அயம் அக்³கி³ அப்பண்ணத்திபா⁴வம் க³மிஸ்ஸதீ’’தி. ஸோ ததா² கரேய்ய. ததே²வ ச தத்த² நிஸின்னஸ்ஸ ஸோ அக்³கி³ உபாதா³னக்க²யேன அப்பண்ணத்திபா⁴வம் க³ச்சே²ய்ய. இத³ம் ஸந்தா⁴யேதம் ‘‘ந காலேன கால’’ந்திஆதி³ வுத்தம்.

ஏவமேவ கோ²தி ஏத்த² பன இத³ம் ஓபம்மஸம்ஸந்த³னம் – சத்தாலீஸாய கட்ட²வாஹானம் ஜலமானோ மஹாஅக்³கி³க்க²ந்தோ⁴ விய ஹி தேபூ⁴மகவட்டம் த³ட்ட²ப்³ப³ம், அக்³கி³ஜக்³க³னகபுரிஸோ விய வட்டஸன்னிஸ்ஸிதகோ யோகா³வசரோ, அத்த²காமோ புரிஸோ விய ஸம்மாஸம்பு³த்³தோ⁴, தேன புரிஸேன தஸ்ஸ தி³ன்னஓவாதோ³ விய ததா²க³தேன ‘‘ஏஹி த்வம், பி⁴க்கு², தேபூ⁴மகத⁴ம்மேஸு நிப்³பி³ந்த³, ஏவம் வட்டது³க்கா² முச்சிஸ்ஸஸீ’’தி தஸ்ஸ தேபூ⁴மகத⁴ம்மேஸு கம்மட்டா²னஸ்ஸ கதி²தகாலோ, தஸ்ஸ புரிஸஸ்ஸ யதா²னுஸிட்ட²ம் படிபஜ்ஜித்வா பாஸாதே³ நிஸின்னகாலோ விய யோகி³னோ ஸுக³தோவாத³ம் ஸம்படிச்சி²த்வா ஸுஞ்ஞாகா³ரம் பவிட்ட²ஸ்ஸ தேபூ⁴மகத⁴ம்மேஸு விபஸ்ஸனம் பட்ட²பேத்வா அனுக்கமேன யதா²னுரூபம் ஆஹாரஸப்பாயாதி³ம் லபி⁴த்வா, ஏகாஸனே நிஸின்னஸ்ஸ அக்³க³ப²லே பதிட்டி²தகாலோ, தஸ்ஸ ந்ஹானவிலேபனாதீ³ஹி ஸுதோ⁴தமண்டி³தகாயத்தா தஸ்மிம் நிஸின்னஸ்ஸ ஏகக்³க³ஸுக²ஸமப்பிதகாலோ விய யோகி³னோ அரியமக்³க³போக்க²ரணியம் மக்³க³ஞாணோத³கேன ஸுன்ஹாதஸுதோ⁴தகிலேஸமலஸ்ஸ ஹிரோத்தப்பஸாடகே நிவாஸேத்வா ஸீலவிலேபனானுலித்தஸ்ஸ அரஹத்தமண்ட³னேன அத்தபா⁴வம் மண்டே³த்வா விமுத்திபுப்ப²தா³மம் பிளந்தி⁴த்வா இத்³தி⁴பாத³பாது³கா ஆருய்ஹ நிப்³பா³னனக³ரம் பவிஸித்வா த⁴ம்மபாஸாத³ம் ஆருய்ஹ ஸதிபட்டா²னமஹாவீதி²யம் விரோசமானஸ்ஸ நிப்³பா³னாரம்மணம் ப²லஸமாபத்திம் அப்பேத்வா நிஸின்னகாலோ. தஸ்ஸ பன புரிஸஸ்ஸ தஸ்மிம் நிஸின்னஸ்ஸ திணாதீ³னம் க²யேன அக்³கி³க்க²ந்த⁴ஸ்ஸ அப்பண்ணத்திக³மனகாலோ விய கீ²ணாஸவஸ்ஸ யாவதாயுகம் ட²த்வா உபாதி³ண்ணகக்க²ந்த⁴பே⁴தே³ன அனுபாதி³ஸேஸாய நிப்³பா³னதா⁴துயா பரினிப்³பு³தஸ்ஸ மஹாவட்டவூபஸமோ த³ட்ட²ப்³போ³. து³தியம்.

3. ஸம்யோஜனஸுத்தவண்ணனா

53. ததியே ஸம்யோஜனியேஸூதி த³ஸன்னம் ஸம்யோஜனானம் பச்சயேஸு. ஜா²யேய்யாதி ஜலேய்ய. தேலம் ஆஸிஞ்சேய்ய வட்டிம் உபஸம்ஹரேய்யாதி தீ³பபடிஜக்³க³னத்த²ம் தேலபா⁴ஜனஞ்ச மஹந்தஞ்ச வட்டிகபாலம் க³ஹேத்வா ஸமீபே நிச்சம் டி²தோவ தேலே கீ²ணே தேலம் ஆஸிஞ்சேய்ய, வட்டியா கீ²ணாய வட்டிம் உபஸம்ஹரேய்ய. ஸேஸமேத்த² ஸத்³தி⁴ம் ஓபம்மஸம்ஸந்த³னேன புரிமனயேனேவ வேதி³தப்³ப³ம். ததியம்.

4. து³தியஸம்யோஜனஸுத்தவண்ணனா

54. சதுத்தே² உபமம் பட²மம் கத்வா பச்சா² அத்தோ² வுத்தோ. ஸேஸம் தாதி³ஸமேவ. சதுத்த²ம்.

5. மஹாருக்க²ஸுத்தவண்ணனா

55. பஞ்சமே உத்³த⁴ம் ஓஜம் அபி⁴ஹரந்தீதி பத²வீரஸஞ்ச ஆபோரஸஞ்ச உபரி ஆரோபேந்தி. ஓஜாய ஆரோபிதத்தா ஹத்த²ஸதுப்³பே³த⁴ஸ்ஸ ருக்க²ஸ்ஸ அங்குரக்³கே³ஸு பி³ந்து³பி³ந்தூ³னி விய ஹுத்வா ஸினேஹோ திட்ட²தி. இத³ம் பனேத்த² ஓபம்மஸம்ஸந்த³னம் – மஹாருக்கோ² விய ஹி தேபூ⁴மகவட்டம், மூலானி விய ஆயதனானி, மூலேஹி ஓஜாய ஆரோஹனம் விய ச²ஹி த்³வாரேஹி கம்மாரோஹனம், ஓஜாய அபி⁴ருள்ஹத்தா மஹாருக்க²ஸ்ஸ யாவகப்பட்டா²னம் விய வட்டனிஸ்ஸிதபா³லபுது²ஜ்ஜனஸ்ஸ ச²ஹி த்³வாரேஹி கம்மம் ஆயூஹந்தஸ்ஸ அபராபரம் வட்டஸ்ஸ வட்³ட⁴னவஸேன தீ³க⁴ரத்தம் டா²னம்.

குத்³தா³லபிடகந்தி குத்³தா³லஞ்சேவ பச்சி²பா⁴ஜனஞ்ச. க²ண்டா³க²ண்டி³கம் சி²ந்தே³ய்யாதி கு²த்³த³கமஹந்தானி க²ண்டா³க²ண்டா³னி கரோந்தோ சி²ந்தே³ய்ய. இத³ம் பனேத்த² ஓபம்மஸம்ஸந்த³னம் – இதா⁴பி ஹி மஹாருக்கோ² விய தேபூ⁴மகவட்டம், ருக்க²ம் நாஸேதுகாமோ புரிஸோ விய யோகா³வசரோ, குத்³தா³லோ விய ஞாணம், பச்சி² விய ஸமாதி⁴, ருக்க²ச்சே²த³னப²ரஸு விய ஞாணம், ருக்க²ஸ்ஸ மூலே சி²ன்னகாலோ விய யோகி³னோ ஆசரியஸந்திகே கம்மட்டா²னம் க³ஹேத்வா மனஸிகரோந்தஸ்ஸ பஞ்ஞா, க²ண்டா³க²ண்டி³கம் சி²ந்த³னகாலோ விய ஸங்கே²பதோ சதுன்னம் மஹாபூ⁴தானம் மனஸிகாரோ, பா²லனம் விய த்³வேசத்தாலீஸாய கோட்டா²ஸேஸு வித்தா²ரமனஸிகாரோ, ஸகலிகம் ஸகலிகம் கரணகாலோ விய உபாதா³ரூபஸ்ஸ சேவ ரூபக்க²ந்தா⁴ரம்மணஸ்ஸ விஞ்ஞாணஸ்ஸ சாதி இமேஸம் வஸேன நாமரூபபரிக்³க³ஹோ, மூலானம் உபச்சே²த³னம் விய தஸ்ஸேவ நாமரூபஸ்ஸ பச்சயபரியேஸனம், வாதாதபே விஸோஸேத்வா அக்³கி³னா ட³ஹனகாலோ விய அனுபுப்³பே³ன விபஸ்ஸனம் வட்³டே⁴த்வா அஞ்ஞதரம் ஸப்பாயம் லபி⁴த்வா கம்மட்டா²னே விபூ⁴தே உபட்ட²ஹமானே ஏகபல்லங்கே நிஸின்னஸ்ஸ ஸமணத⁴ம்மம் கரோந்தஸ்ஸ அக்³க³ப²லப்பத்தி, மஸிகரணம் விய அரஹத்தப்பத்ததி³வஸேயேவ அபரினிப்³பா³யந்தஸ்ஸ யாவதாயுகம் டி²த காலோ, மஹாவாதே ஓபுனனம் நதி³யா பவாஹனம் விய ச உபாதி³ண்ணகக்க²ந்த⁴பே⁴தே³ன அனுபாதி³ஸேஸாய நிப்³பா³னதா⁴துயா பரினிப்³பு³தஸ்ஸ வட்டவூபஸமோ வேதி³தப்³போ³. பஞ்சமம்.

6. து³தியமஹாருக்க²ஸுத்தவண்ணனா

56. ச²ட்டே²பி உபமம் பட²மம் வத்வா பச்சா² அத்தோ² வுத்தோ, இத³மேவ நானத்தம். ச²ட்ட²ம்.

7. தருணருக்க²ஸுத்தவண்ணனா

57-59. ஸத்தமே தருணோதி அஜாதப²லோ. பலிமஜ்ஜேய்யாதி ஸோதே⁴ய்ய. பம்ஸும் த³தே³ய்யாதி த²த்³த⁴ப²ருஸபம்ஸும் ஹரித்வா முது³கோ³மயசுண்ணமிஸ்ஸம் மது⁴ரபம்ஸும் பக்கி²பேய்ய. வுத்³தி⁴ந்தி வுத்³தி⁴ம் ஆபஜ்ஜித்வா புப்பூ²பகோ³ புப்ப²ம், ப²லூபகோ³ ப²லம் க³ண்ஹேய்ய. இத³ம் பனேத்த² ஓபம்மஸம்ஸந்த³னம் – தருணருக்கோ² விய ஹி தேபூ⁴மகவட்டம், ருக்க²ஜக்³க³கோ புரிஸோ விய வட்டனிஸ்ஸிதோ புது²ஜ்ஜனோ, மூலப²லஸந்தானாதீ³னி விய தீஹி த்³வாரேஹி குஸலாகுஸலகம்மாயூஹனம், ருக்க²ஸ்ஸ வுட்³டி⁴ஆபஜ்ஜனம் விய புது²ஜ்ஜனஸ்ஸ தீஹி த்³வாரேஹி கம்மம் ஆயூஹதோ அபராபரம் வட்டப்பவத்தி. விவட்டம் வுத்தனயேனேவ வேதி³தப்³ப³ம். அட்ட²மனவமானி உத்தானத்தா²னேவ. ஸத்தமாதீ³னி.

10. நிதா³னஸுத்தவண்ணனா

60. த³ஸமே குரூஸு விஹரதீதி குரூதி ஏவம் ப³ஹுவசனவஸேன லத்³த⁴வோஹாரே ஜனபதே³ விஹரதி. கம்மாஸத⁴ம்மம் நாம குரூனம் நிக³மோதி ஏவம்னாமகோ குரூனம் நிக³மோ, தம் கோ³சரகா³மம் கத்வாதி அத்தோ². ஆயஸ்மாதி பியவசனமேதம் க³ருவசனமேதம். ஆனந்தோ³தி தஸ்ஸ தே²ரஸ்ஸ நாமம். ஏகமந்தம் நிஸீதீ³தி ச² நிஸஜ்ஜதோ³ஸே விவஜ்ஜேந்தோ த³க்கி²ணஜாணுமண்ட³லஸ்ஸ அபி⁴முக²ட்டா²னே ச²ப்³ப³ண்ணானம் பு³த்³த⁴ரஸ்மீனம் அந்தோ பவிஸித்வா பஸன்னலாகா²ரஸம் விகா³ஹந்தோ விய ஸுவண்ணபடம் பாருபந்தோ விய ரத்தகம்ப³லவிதானமஜ்ஜ²ம் பவிஸந்தோ விய த⁴ம்மப⁴ண்டா³கா³ரிகோ ஆயஸ்மா ஆனந்தோ³ நிஸீதி³. தேன வுத்தம் ‘‘ஏகமந்தம் நிஸீதீ³’’தி.

காய பன வேலாய கேன காரணேன அயமாயஸ்மா ப⁴க³வந்தம் உபஸங்கமந்தோதி? ஸாயன்ஹவேலாய பச்சயாகாரபஞ்ஹம் புச்ச²னகாரணேன. தம் தி³வஸம் கிர அயமாயஸ்மா குலஸங்க³ஹத்தா²ய க⁴ரத்³வாரே க⁴ரத்³வாரே ஸஹஸ்ஸப⁴ண்டி³கம் நிக்கி²பந்தோ விய கம்மாஸத⁴ம்மம் பிண்டா³ய சரித்வா பிண்ட³பாதபடிக்கந்தோ ஸத்து² வத்தம் த³ஸ்ஸேத்வா ஸத்த²ரி க³ந்த⁴குடிம் பவிட்டே² ஸத்தா²ரம் வந்தி³த்வா அத்தனோ தி³வாட்டா²னம் க³ந்த்வா அந்தேவாஸிகேஸு வத்தம் த³ஸ்ஸேத்வா படிக்கந்தேஸு தி³வாட்டா²னம் படிஸம்மஜ்ஜித்வா சம்மக்க²ண்ட³ம் பஞ்ஞபேத்வா உத³கதும்ப³தோ உத³கேன ஹத்த²பாதே³ ஸீதலம் கத்வா பல்லங்கம் ஆபு⁴ஜித்வா நிஸின்னோ ஸோதாபத்திப²லஸமாபத்திம் ஸமாபஜ்ஜித்வா. அத² பரிச்சி²ன்னகாலவஸேன ஸமாபத்திதோ வுட்டா²ய பச்சயாகாரே ஞாணம் ஓதாரேஸி. ஸோ ‘‘அவிஜ்ஜாபச்சயா ஸங்கா²ரா’’திஆதி³தோ பட்டா²ய அந்தம், அந்ததோ பட்டா²ய ஆதி³ம், உப⁴யந்ததோ பட்டா²ய மஜ்ஜ²ம், மஜ்ஜ²தோ பட்டா²ய உபோ⁴ அந்தே பாபேந்தோ திக்க²த்தும் த்³வாத³ஸபத³ம் பச்சயாகாரம் ஸம்மஸி. தஸ்ஸேவம் ஸம்மஸந்தஸ்ஸ பச்சயாகாரோ விபூ⁴தோ ஹுத்வா உத்தானகுத்தானகோ விய உபட்டா²ஸி. ததோ சிந்தேஸி – ‘‘அயம் பச்சயாகாரோ ஸப்³ப³பு³த்³தே⁴ஹி க³ம்பீ⁴ரோ சேவ க³ம்பீ⁴ராவபா⁴ஸோ சாதி கதி²தோ, மய்ஹம் கோ² பன பதே³ஸஞாணே டி²தஸ்ஸ ஸாவகஸ்ஸ ஸதோ உத்தானோ விய விபூ⁴தோ பாகடோ ஹுத்வா உபட்டா²தி, மய்ஹம்யேவ நு கோ² ஏஸ உத்தானகோ விய உபட்டா²தி, உதா³ஹு அஞ்ஞேஸம்பீதி அத்தனோ உபட்டா²னகாரணம் ஸத்து² ஆரோசேஸ்ஸாமீ’’தி நிஸின்னட்டா²னதோ உட்டா²ய சம்மக்க²ண்ட³ம் பப்போ²டேத்வா ஆதா³ய ஸாயன்ஹஸமயே ப⁴க³வந்தம் உபஸங்கமி. தேன வுத்தம் – ‘‘ஸாயன்ஹவேலாயம் பச்சயாகாரபஞ்ஹம் புச்ச²னகாரணேன உபஸங்கமந்தோ’’தி.

யாவ க³ம்பீ⁴ரோதி ஏத்த² யாவஸத்³தோ³ பமாணாதிக்கமே. அதிக்கம்ம பமாணம் க³ம்பீ⁴ரோ, அதிக³ம்பீ⁴ரோதி அத்தோ². க³ம்பீ⁴ராவபா⁴ஸோதி க³ம்பீ⁴ரோவ ஹுத்வா அவபா⁴ஸதி, தி³ஸ்ஸதீதி அத்தோ². ஏகஞ்ஹி உத்தானமேவ க³ம்பீ⁴ராவபா⁴ஸம் ஹோதி பூதிபண்ணரஸவஸேன காளவண்ணம் புராணஉத³கம் விய. தஞ்ஹி ஜாணுப்பமாணம்பி ஸதபோரிஸம் விய தி³ஸ்ஸதி. ஏகம் க³ம்பீ⁴ரம் உத்தானாவபா⁴ஸம் ஹோதி மணிபா⁴ஸம் விப்பஸன்னஉத³கம் விய. தஞ்ஹி ஸதபோரிஸம்பி ஜாணுப்பமாணம் விய கா²யதி. ஏகம் உத்தானம் உத்தானாவபா⁴ஸம் ஹோதி பாதிஆதீ³ஸு உத³கம் விய. ஏகம் க³ம்பீ⁴ரம் க³ம்பீ⁴ராவபா⁴ஸம் ஹோதி ஸினேருபாத³கமஹாஸமுத்³தே³ உத³கம் விய. ஏவம் உத³கமேவ சத்தாரி நாமானி லப⁴தி. படிச்சஸமுப்பாதே³ பனேதம் நத்தி². அயஞ்ஹி க³ம்பீ⁴ரோ ச க³ம்பீ⁴ராவபா⁴ஸோ சாதி ஏகமேவ நாமம் லப⁴தி. ஏவரூபோ ஸமானோபி அத² ச பன மே உத்தானகுத்தானகோ விய கா²யதி, ததி³த³ம் அச்ச²ரியம், ப⁴ந்தே, அப்³பு⁴தம், ப⁴ந்தேதி ஏவம் அத்தனோ விம்ஹயம் பகாஸேந்தோ பஞ்ஹம் புச்சி²த்வா துண்ஹீபூ⁴தோ நிஸீதி³.

ப⁴க³வா தஸ்ஸ வசனம் ஸுத்வா ‘‘ஆனந்தோ³ ப⁴வக்³க³க³ஹணாய ஹத்த²ம் பஸாரேந்தோ விய ஸினேரும் பி⁴ந்தி³த்வா மிஞ்ஜம் நீஹரிதும் வாயமமானோ விய வினா நாவாய மஹாஸமுத்³த³ம் தரிதுகாமோ விய பத²விம் பரிவத்தேத்வா பத²வோஜம் க³ஹேதும் வாயமமானோ விய பு³த்³த⁴விஸயம் பஞ்ஹம் அத்தனோ உத்தானுத்தானந்தி வத³தி, ஹந்த³ஸ்ஸ க³ம்பீ⁴ரபா⁴வம் ஆசிக்கா²மீ’’தி சிந்தேத்வா மா ஹேவந்திஆதி³மாஹ.

தத்த² மா ஹேவந்தி ஹ-காரோ நிபாதமத்தம், ஏவம் மா ப⁴ணீதி அத்தோ². ‘‘மா ஹேவ’’ந்தி ச இத³ம் வசனம் ப⁴க³வா ஆயஸ்மந்தம் ஆனந்த³ம் உஸ்ஸாதே³ந்தோபி ப⁴ணதி அபஸாதே³ந்தோபி. தத்த² உஸ்ஸாதே³ந்தோபீதி, ஆனந்த³, த்வம் மஹாபஞ்ஞோ விஸத³ஞாணோ, தேன தே க³ம்பீ⁴ரோபி படிச்சஸமுப்பாதோ³ உத்தானகோ விய கா²யதி, அஞ்ஞேஸம் பனேஸ உத்தானகோதி ந ஸல்லக்கே²தப்³போ³, க³ம்பீ⁴ரோயேவ ச ஸோ க³ம்பீ⁴ராவபா⁴ஸோ ச.

தத்த² சதஸ்ஸோ உபமா வத³ந்தி – ச² மாஸே ஸுபோ⁴ஜனரஸபுட்ட²ஸ்ஸ கிர கதயோக³ஸ்ஸ மஹாமல்லஸ்ஸ ஸமஜ்ஜஸமயே கதமல்லபாஸாணபரிசயஸ்ஸ யுத்³த⁴பூ⁴மிம் க³ச்ச²ந்தஸ்ஸ அந்தரா மல்லபாஸாணம் த³ஸ்ஸேஸும். ஸோ ‘‘கிம் ஏத’’ந்தி ஆஹ. மல்லபாஸாணோதி. ஆஹரத² நந்தி. ‘‘உக்கி²பிதும் ந ஸக்கோமா’’தி வுத்தே ஸயம் க³ந்த்வா ‘‘குஹிம் இமஸ்ஸ பா⁴ரியட்டா²ன’’ந்தி வத்வா த்³வீஹி ஹத்தே²ஹி த்³வே பாஸாணே உக்கி²பித்வா கீளாகு³ளே விய கி²பித்வா அக³மாஸி. தத்த² மல்லஸ்ஸ மல்லபாஸாணோ லஹுகோதி ந அஞ்ஞேஸம்பி லஹுகோதி வத்தப்³போ³. ச² மாஸே ஸுபோ⁴ஜனரஸபுட்டோ² மல்லோ விய ஹி கப்பஸதஸஹஸ்ஸம் அபி⁴னீஹாரஸம்பன்னோ ஆயஸ்மா ஆனந்தோ³. யதா² மல்லஸ்ஸ மஹாப³லதாய மல்லபாஸாணோ லஹுகோ, ஏவம் தே²ரஸ்ஸ மஹாபஞ்ஞதாய படிச்சஸமுப்பாதோ³ உத்தானோதி வத்தப்³போ³, ஸோ அஞ்ஞேஸம் உத்தானோதி ந வத்தப்³போ³.

மஹாஸமுத்³தே³ ச திமி நாம மஹாமச்சோ² த்³வியோஜனஸதிகோ, திமிங்க³லோ தியோஜனஸதிகோ, திமிரபிங்க³லோ பஞ்சயோஜனஸதிகோ, ஆனந்தோ³ திமினந்தோ³ அஜ்ஜா²ரோஹோ மஹாதிமீதி இமே சத்தாரோ யோஜனஸஹஸ்ஸிகா. தத்த² திமிரபிங்க³லேனேவ தீ³பேந்தி. தஸ்ஸ கிர த³க்கி²ணகண்ணம் சாலேந்தஸ்ஸ பஞ்சயோஜனஸதே பதே³ஸே உத³கம் சலதி, ததா² வாமகண்ணம், ததா² நங்கு³ட்ட²ம், ததா² ஸீஸம். த்³வே பன கண்ணே சாலேத்வா நங்கு³ட்டே²ன பஹரித்வா ஸீஸம் அபராபரம் கத்வா கீளிதும் ஆரத்³த⁴ஸ்ஸ ஸத்தட்ட²யோஜனஸதே டா²னே பா⁴ஜனே பக்கி²பித்வா உத்³த⁴னே ஆரோபிதம் விய உத³கம் பக்குத²தி. யோஜனஸதமத்தே பதே³ஸே உத³கம் பிட்டி²ம் சா²தே³தும் ந ஸக்கோதி. ஸோ ஏவம் வதே³ய்ய – ‘‘அயம் மஹாஸமுத்³தோ³ க³ம்பீ⁴ரோதி வத³ந்தி, குதஸ்ஸ க³ம்பீ⁴ரதா, மயம் பிட்டி²மத்தச்சா²த³னம்பி உத³கம் ந லபா⁴மா’’தி. தத்த² காயூபபன்னஸ்ஸ திமிரபிங்க³லஸ்ஸ மஹாஸமுத்³தோ³ உத்தானோதி அஞ்ஞேஸஞ்ச கு²த்³த³கமச்சா²னம் உத்தானோதி ந வத்தப்³போ³, ஏவமேவ ஞாணூபபன்னஸ்ஸ தே²ரஸ்ஸ படிச்சஸமுப்பாதோ³ உத்தானோதி அஞ்ஞேஸம்பி உத்தானோதி ந வத்தப்³போ³. ஸுபண்ணராஜா ச தி³யட்³ட⁴யோஜனஸதிகோ ஹோதி. தஸ்ஸ த³க்கி²ணபக்கோ² பஞ்ஞாஸயோஜனிகோ ஹோதி, ததா² வாமபக்கோ², பிஞ்ச²வட்டி ச ஸட்டி²யோஜனிகா, கீ³வா திம்ஸயோஜனிகா, முக²ம் நவயோஜனம், பாதா³ த்³வாத³ஸயோஜனிகா, தஸ்மிம் ஸுபண்ணவாதம் த³ஸ்ஸேதும் ஆரத்³தே⁴ ஸத்தட்ட²யோஜனஸதம் டா²னம் நப்பஹோதி. ஸோ ஏவம் வதே³ய்ய – ‘‘அயம் ஆகாஸோ அனந்தோதி வத³ந்தி, குதஸ்ஸ அனந்ததா, மயம் பக்க²வாதப்பத்த²ரணோகாஸம்பி ந லபா⁴மா’’தி. தத்த² காயூபபன்னஸ்ஸ ஸுபண்ணரஞ்ஞோ ஆகாஸோ பரித்தோதி அஞ்ஞேஸஞ்ச கு²த்³த³கபக்கீ²னம் பரித்தோதி ந வத்தப்³போ³, ஏவமேவ ஞாணூபபன்னஸ்ஸ தே²ரஸ்ஸ படிச்சஸமுப்பாதோ³ உத்தானோதி அஞ்ஞேஸம்பி உத்தானோதி ந வத்தப்³போ³.

ராஹு அஸுரிந்தோ³ பன பாத³ந்ததோ யாவ கேஸந்தா யோஜனானம் சத்தாரி ஸஹஸ்ஸானி அட்ட² ச ஸதானி ஹோந்தி. தஸ்ஸ த்³வின்னம் பா³ஹானம் அந்தரே த்³வாத³ஸயோஜனஸதிகம், ப³ஹலத்தேன ச²யோஜனஸதிகம், ஹத்த²பாத³தலானி தியோஜனஸதிகானி, ததா² முக²ம், ஏகங்கு³லிபப்³ப³ம் பஞ்ஞாஸயோஜனம், ததா² ப⁴முகந்தரம், நலாடம் தியோஜனஸதிகம், ஸீஸம் நவயோஜனஸதிகம். தஸ்ஸ மஹாஸமுத்³த³ம் ஓதிண்ணஸ்ஸ க³ம்பீ⁴ரம் உத³கம் ஜாணுப்பமாணம் ஹோதி. ஸோ ஏவம் வதே³ய்ய – ‘‘அயம் மஹாஸமுத்³தோ³ க³ம்பீ⁴ரோதி வத³ந்தி. குதஸ்ஸ க³ம்பீ⁴ரதா? மயம் ஜாணுப்படிச்சா²த³னமத்தம்பி உத³கம் ந லபா⁴மா’’தி. தத்த² காயூபபன்னஸ்ஸ ராஹுனோ மஹாஸமுத்³தோ³ உத்தானோதி அஞ்ஞேஸஞ்ச உத்தானோதி ந வத்தப்³போ³. ஏவமேவ ஞாணூபபன்னஸ்ஸ தே²ரஸ்ஸ படிச்சஸமுப்பாதோ³ உத்தானோதி அஞ்ஞேஸம்பி உத்தானோதி ந வத்தப்³போ³. ஏதமத்த²ம் ஸந்தா⁴ய ப⁴க³வா மா ஹேவம், ஆனந்த³, மா ஹேவம், ஆனந்தா³தி ஆஹ.

தே²ரஸ்ஸ ஹி சதூஹி காரணேஹி க³ம்பீ⁴ரோ படிச்சஸமுப்பாதோ³ உத்தானோதி உபட்டா²ஸி. கதமேஹி சதூஹி? புப்³பூ³பனிஸ்ஸயஸம்பத்தியா தித்த²வாஸேன ஸோதாபன்னதாய ப³ஹுஸ்ஸுதபா⁴வேனாதி.

இதோ கிர ஸதஸஹஸ்ஸிமே கப்பே பது³முத்தரோ நாம ஸத்தா² லோகே உப்பஜ்ஜி. தஸ்ஸ ஹம்ஸவதீ நாம நக³ரம் அஹோஸி, ஆனந்தோ³ நாம ராஜா பிதா, ஸுமேதா⁴ நாம தே³வீ மாதா, போ³தி⁴ஸத்தோ உத்தரகுமாரோ நாம அஹோஸி. ஸோ புத்தஸ்ஸ ஜாததி³வஸே மஹாபி⁴னிக்க²மனம் நிக்க²ம்ம பப்³ப³ஜித்வா பதா⁴னமனுயுத்தோ அனுக்கமேன ஸப்³ப³ஞ்ஞுதம் பத்வா, ‘‘அனேகஜாதிஸம்ஸார’’ந்தி உதா³னம் உதா³னேத்வா ஸத்தாஹம் போ³தி⁴பல்லங்கே வீதினாமேத்வா ‘‘பத²வியம் பாத³ம் ட²பேஸ்ஸாமீ’’தி பாத³ம் அபி⁴னீஹரி. அத² பத²விம் பி⁴ந்தி³த்வா மஹந்தம் பது³மம் உட்டா²ஸி. தஸ்ஸ து⁴ரபத்தானி நவுதிஹத்தா²னி, கேஸரம் திம்ஸஹத்த²ம், கண்ணிகா த்³வாத³ஸஹத்தா², நவக⁴டப்பமாணா ரேணு அஹோஸி.

ஸத்தா² பன உப்³பே³த⁴தோ அட்ட²பஞ்ஞாஸஹத்தோ² அஹோஸி, தஸ்ஸ உபி⁴ன்னம் பா³ஹானமந்தரம் அட்டா²ரஸஹத்த²ம், நலாடம் பஞ்சஹத்த²ம், ஹத்த²பாதா³ ஏகாத³ஸஹத்தா². தஸ்ஸ ஏகாத³ஸஹத்தே²ன பாதே³ன த்³வாத³ஸஹத்தா²ய கண்ணிகாய அக்கந்தமத்தாய நவக⁴டப்பமாணா ரேணு உட்டா²ய அட்ட²பஞ்ஞாஸஹத்த²ம் பதே³ஸம் உக்³க³ந்த்வா ஓகிண்ணமனோஸிலாசுண்ணம் விய பச்சோகிண்ணம். தது³பாதா³ய ப⁴க³வா ‘‘பது³முத்தரோ’’த்வேவ பஞ்ஞாயித்த². தஸ்ஸ தே³விலோ ச ஸுஜாதோ ச த்³வே அக்³க³ஸாவகா அஹேஸும், அமிதா ச அஸமா ச த்³வே அக்³க³ஸாவிகா, ஸுமனோ நாம உபட்டா²கோ. பது³முத்தரோ ப⁴க³வா பிதுஸங்க³ஹம் குருமானோ பி⁴க்கு²ஸதஸஹஸ்ஸபரிவாரோ ஹம்ஸவதியா ராஜதா⁴னியா வஸதி.

கனிட்ட²பா⁴தா பனஸ்ஸ ஸுமனகுமாரோ நாம. தஸ்ஸ ராஜா ஹம்ஸவதிதோ வீஸயோஜனஸதே போ⁴க³ம் அதா³ஸி. ஸோ கதா³சி ஆக³ந்த்வா பிதரஞ்ச ஸத்தா²ரஞ்ச பஸ்ஸதி. அதே²கதி³வஸம் பச்சந்தோ குபிதோ. ஸுமனோ ரஞ்ஞோ ஸாஸனம் பேஸேஸி. ராஜா ‘‘த்வம் மயா, தாத, கஸ்மா ட²பிதோ’’தி படிபேஸேஸி. ஸோ சோரே வூபஸமேத்வா ‘‘உபஸந்தோ, தே³வ, ஜனபதோ³’’தி ரஞ்ஞோ பேஸேஸி. ராஜா துட்டோ² ‘‘ஸீக⁴ம் மம புத்தோ ஆக³ச்ச²தூ’’தி ஆஹ. தஸ்ஸ ஸஹஸ்ஸமத்தா அமச்சா ஹோந்தி. ஸோ தேஹி ஸத்³தி⁴ம் அந்தராமக்³கே³ மந்தேஸி – ‘‘மய்ஹம் பிதா துட்டோ² ஸசே மே வரம் தே³தி, கிம் க³ண்ஹாமீ’’தி? அத² நம் ஏகச்சே ‘‘ஹத்தி²ம் க³ண்ஹத², அஸ்ஸம் க³ண்ஹத², ஜனபத³ம் க³ண்ஹத², ஸத்தரதனானி க³ண்ஹதா²’’தி ஆஹம்ஸு. அபரே ‘‘தும்ஹே பத²விஸ்ஸரஸ்ஸ புத்தா, ந தும்ஹாகம் த⁴னம் து³ல்லப⁴ம், லத்³த⁴ம்பி சேதம் ஸப்³ப³ம் பஹாய க³மனீயம், புஞ்ஞமேவ ஏகம் ஆதா³ய க³மனீயம், தஸ்மா தே³வே வரம் த³த³மானே தேமாஸம் பது³முத்தரம் ப⁴க³வந்தம் உபட்டா²தும் வரம் க³ண்ஹதா²’’தி. ஸோ ‘‘தும்ஹே மய்ஹம் கல்யாணமித்தா நாம, மமேதம் சித்தம் நத்தி², தும்ஹேஹி பன உப்பாதி³தம், ஏவம் கரிஸ்ஸாமீ’’தி, க³ந்த்வா பிதரம் வந்தி³த்வா பிதரா ஆலிங்கே³த்வா, மத்த²கே சும்பி³த்வா ‘‘வரம் தே, புத்த, தே³மீ’’தி வுத்தே ‘‘இச்சா²மஹம், மஹாராஜ, ப⁴க³வந்தம் தேமாஸம் சதூஹி பச்சயேஹி உபட்ட²ஹந்தோ ஜீவிதம் அவஞ்ஜ²ம் காதும், இத³ம் மே வரம் தே³ஹீ’’தி ஆஹ. ந ஸக்கா, தாத, அஞ்ஞம் வரேஹீதி. தே³வ, க²த்தியானம் நாம த்³வேகதா² நத்தி², ஏதமேவ மே தே³ஹி, ந மமஞ்ஞேன அத்தோ²தி. தாத, பு³த்³தா⁴னம் நாம சித்தம் து³ஜ்ஜானம், ஸசே ப⁴க³வா ந இச்சி²ஸ்ஸதி, மயா தி³ன்னம்பி கிம் ப⁴விஸ்ஸதீதி? ‘‘ஸாது⁴, தே³வ, அஹம் ப⁴க³வதோ சித்தம் ஜானிஸ்ஸாமீ’’தி விஹாரம் க³தோ.

தேன ச ஸமயேன ப⁴த்தகிச்சம் நிட்டா²பேத்வா ப⁴க³வா க³ந்த⁴குடிம் பவிட்டோ² ஹோதி. ஸோ மண்ட³லமாளே ஸன்னிஸின்னானம் பி⁴க்கூ²னம் ஸந்திகம் அக³மாஸி. தே நம் ஆஹம்ஸு – ‘‘ராஜபுத்த கஸ்மா ஆக³தோஸீ’’தி? ப⁴க³வந்தம் த³ஸ்ஸனாய, த³ஸ்ஸேத² மே ப⁴க³வந்தந்தி. ‘‘ந மயம், ராஜபுத்த, இச்சி²திச்சி²தக்க²ணே ஸத்தா²ரம் த³ட்டு²ம் லபா⁴மா’’தி. கோ பன, ப⁴ந்தே, லப⁴தீதி? ஸுமனத்தே²ரோ நாம ராஜபுத்தாதி. ஸோ ‘‘குஹிம் ப⁴ந்தே தே²ரோ’’தி? தே²ரஸ்ஸ நிஸின்னட்டா²னம் புச்சி²த்வா க³ந்த்வா வந்தி³த்வா – ‘‘இச்சா²மஹம், ப⁴ந்தே, ப⁴க³வந்தம் பஸ்ஸிதும், த³ஸ்ஸேத² மே ப⁴க³வந்த’’ந்தி ஆஹ. தே²ரோ ‘‘ஏஹி, ராஜபுத்தா’’தி தம் க³ஹேத்வா க³ந்த⁴குடிபரிவேணே ட²பேத்வா க³ந்த⁴குடிம் ஆருஹி. அத² நம் ப⁴க³வா ‘‘ஸுமன, கஸ்மா ஆக³தோஸீ’’தி ஆஹ. ராஜபுத்தோ, ப⁴ந்தே, ப⁴க³வந்தம் த³ஸ்ஸனாய ஆக³தோதி. தேன ஹி பி⁴க்கு² ஆஸனம் பஞ்ஞபேஹீதி. தே²ரோ ஆஸனம் பஞ்ஞபேஸி. நிஸீதி³ ப⁴க³வா பஞ்ஞத்தே ஆஸனே. ராஜபுத்தோ ப⁴க³வந்தம் வந்தி³த்வா படிஸந்தா²ரம் அகாஸி, ‘‘கதா³ ஆக³தோஸி ராஜபுத்தா’’தி? ப⁴ந்தே, தும்ஹேஸு க³ந்த⁴குடிம் பவிட்டே²ஸு, பி⁴க்கூ² பன ‘‘ந மயம் இச்சி²திச்சி²தக்க²ணே ப⁴க³வந்தம் த³ட்டு²ம் லபா⁴மா’’தி மம் தே²ரஸ்ஸ ஸந்திகம் பாஹேஸும், தே²ரோ பன ஏகவசனேனேவ த³ஸ்ஸேஸி, தே²ரோ, ப⁴ந்தே, தும்ஹாகம் ஸாஸனே வல்லபோ⁴ மஞ்ஞேதி. ஆம, ராஜகுமார, வல்லபோ⁴ ஏஸ பி⁴க்கு² மய்ஹம் ஸாஸனேதி. ப⁴ந்தே, பு³த்³தா⁴னம் ஸாஸனே கிம் கத்வா வல்லபோ⁴ ஹோதீதி? தா³னம் த³த்வா ஸீலம் ஸமாதி³யித்வா உபோஸத²கம்மம் கத்வா, குமாராதி. ப⁴க³வா அஹம்பி தே²ரோ விய பு³த்³த⁴ஸாஸனே வல்லபோ⁴ ஹோதுகாமோ, தேமாஸம் மே வஸ்ஸாவாஸம் அதி⁴வாஸேதா²தி. ப⁴க³வா, ‘‘அத்தி² நு கோ² க³தேன அத்தோ²’’தி ஓலோகேத்வா ‘‘அத்தீ²’’தி தி³ஸ்வா ‘‘ஸுஞ்ஞாகா³ரே கோ², ராஜகுமார, ததா²க³தா அபி⁴ரமந்தீ’’தி ஆஹ. குமாரோ ‘‘அஞ்ஞாதம் ப⁴க³வா, அஞ்ஞாதம் ஸுக³தா’’தி வத்வா – ‘‘அஹம், ப⁴ந்தே, புரிமதரம் க³ந்த்வா விஹாரம் காரேமி, மயா பேஸிதே பி⁴க்கு²ஸதஸஹஸ்ஸேன ஸத்³தி⁴ம் ஆக³ச்ச²தா²’’தி படிஞ்ஞம் க³ஹேத்வா பிது ஸந்திகம் க³ந்த்வா, ‘‘தி³ன்னா மே, தே³வ, ப⁴க³வதா படிஞ்ஞா, மயா பஹிதே தும்ஹே ப⁴க³வந்தம் பேஸேய்யாதா²’’தி பிதரம் வந்தி³த்வா நிக்க²மித்வா யோஜனே யோஜனே விஹாரம் காரேத்வா வீஸயோஜனஸதம் அத்³தா⁴னம் க³தோ. க³ந்த்வா அத்தனோ நக³ரே விஹாரட்டா²னம் விசினந்தோ ஸோப⁴னஸ்ஸ நாம குடும்பி³கஸ்ஸ உய்யானம் தி³ஸ்வா ஸதஸஹஸ்ஸேன கிணித்வா ஸதஸஹஸ்ஸம் விஸ்ஸஜ்ஜேத்வா விஹாரம் காரேஸி. தத்த² ப⁴க³வதோ க³ந்த⁴குடிம், ஸேஸபி⁴க்கூ²னஞ்ச ரத்திட்டா²னதி³வாட்டா²னத்தா²ய குடிலேணமண்ட³பே காராபேத்வா பாகாரபரிக்கே²பம் த்³வாரகோட்ட²கஞ்ச நிட்டா²பேத்வா பிது ஸந்திகம் பேஸேஸி ‘‘நிட்டி²தம் மய்ஹம் கிச்சம், ஸத்தா²ரம் பஹிணதா²’’தி.

ராஜா ப⁴க³வந்தம் போ⁴ஜேத்வா ‘‘ப⁴க³வா ஸுமனஸ்ஸ கிச்சம் நிட்டி²தம், தும்ஹாகம் ஆக³மனம் பச்சாஸீஸதீ’’தி. ப⁴க³வா ஸதஸஹஸ்ஸபி⁴க்கு²பரிவாரோ யோஜனே யோஜனே விஹாரேஸு வஸமானோ அக³மாஸி. குமாரோ ‘‘ஸத்தா² ஆக³ச்ச²தீ’’தி ஸுத்வா யோஜனம் பச்சுக்³க³ந்த்வா க³ந்த⁴மாலாதீ³ஹி பூஜயமானோ விஹாரம் பவேஸேத்வா –

‘‘ஸதஸஹஸ்ஸேன மே கீதம், ஸதஸஹஸ்ஸேன மாபிதம்;

ஸோப⁴னம் நாம உய்யானம் படிக்³க³ண்ஹ, மஹாமுனீ’’தி. –

விஹாரம் நிய்யாதேஸி. ஸோ வஸ்ஸூபனாயிகதி³வஸே தா³னம் த³த்வா அத்தனோ புத்ததா³ரே ச அமச்சே ச பக்கோஸாபேத்வா ஆஹ –‘‘ஸத்தா² அம்ஹாகம் ஸந்திகம் தூ³ரதோ ஆக³தோ, பு³த்³தா⁴ ச நாம த⁴ம்மக³ருனோவ, நாமிஸக³ருகா. தஸ்மா அஹம் இமம் தேமாஸம் த்³வே ஸாடகே நிவாஸேத்வா த³ஸ ஸீலானி ஸமாதி³யித்வா இதே⁴வ வஸிஸ்ஸாமி, தும்ஹே கீ²ணாஸவஸதஸஹஸ்ஸஸ்ஸ இமினாவ நீஹாரேன தேமாஸம் தா³னம் த³தே³ய்யாதா²’’தி.

ஸோ ஸுமனத்தே²ரஸ்ஸ வஸனட்டா²னஸபா⁴கே³யேவ டா²னே வஸந்தோ யம் தே²ரோ ப⁴க³வதோ வத்தம் கரோதி, தம் ஸப்³ப³ம் தி³ஸ்வா, ‘‘இமஸ்மிம் டா²னே ஏகந்தவல்லபோ⁴ ஏஸ தே²ரோ, ஏதஸ்ஸேவ டா²னந்தரம் பத்தே²தும் வட்டதீ’’தி சிந்தேத்வா, உபகட்டா²ய பவாரணாய கா³மம் பவிஸித்வா ஸத்தாஹம் மஹாதா³னம் த³த்வா ஸத்தமே தி³வஸே பி⁴க்கூ²ஸதஸஹஸ்ஸஸ்ஸ பாத³மூலே திசீவரம் ட²பேத்வா ப⁴க³வந்தம் வந்தி³த்வா, ‘‘ப⁴ந்தே, யதே³தம் மயா மக்³கே³ யோஜனந்தரிகவிஹாரகாராபனதோ பட்டா²ய புஞ்ஞம் கதம், தம் நேவ ஸக்கஸம்பத்திம், ந மாரப்³ரஹ்மஸம்பத்திம் பத்த²யந்தேன, பு³த்³த⁴ஸ்ஸ பன உபட்டா²கபா⁴வம் பத்தே²ந்தேன கதம். தஸ்மா அஹம்பி ப⁴க³வா அனாக³தே ஸுமனத்தே²ரோ விய ஏகஸ்ஸ பு³த்³த⁴ஸ்ஸ உபட்டா²கோ ஹோமீ’’தி பஞ்சபதிட்டி²தேன பதித்வா வந்தி³த்வா நிபன்னோ. ப⁴க³வா ‘‘மஹந்தம் குலபுத்தஸ்ஸ சித்தம், இஜ்ஜி²ஸ்ஸதி நு கோ², நோ’’தி ஓலோகேந்தோ, ‘‘அனாக³தே இதோ ஸதஸஹஸ்ஸிமே கப்பே கோ³தமோ நாம பு³த்³தோ⁴ உப்பஜ்ஜிஸ்ஸதி, தஸ்ஸேவ உபட்டா²கோ ப⁴விஸ்ஸதீ’’தி ஞத்வா –

‘‘இச்சி²தம் பத்தி²தம் துய்ஹம், ஸப்³ப³மேவ ஸமிஜ்ஜ²து;

ஸப்³பே³ பூரேந்து ஸங்கப்பா, சந்தோ³ பன்னரஸோ யதா²’’தி. –

ஆஹ. குமாரோ ஸுத்வா ‘‘பு³த்³தா⁴ நாம அத்³வேஜ்ஜ²கதா² ஹோந்தீ’’தி து³தியதி³வஸேயேவ தஸ்ஸ ப⁴க³வதோ பத்தசீவரம் க³ஹேத்வா பிட்டி²தோ பிட்டி²தோ க³ச்ச²ந்தோ விய அஹோஸி. ஸோ தஸ்மிம் பு³த்³து⁴ப்பாதே³ வஸ்ஸஸதஸஹஸ்ஸம் தா³னம் த³த்வா ஸக்³கே³ நிப்³ப³த்தித்வா கஸ்ஸபபு³த்³த⁴காலேபி பிண்டா³ய சரதோ தே²ரஸ்ஸ பத்தக்³க³ஹணத்த²ம் உத்தரிஸாடகம் த³த்வா பூஜம் அகாஸி. புன ஸக்³கே³ நிப்³ப³த்தித்வா ததோ சுதோ பா³ராணஸிராஜா ஹுத்வா அட்ட²ன்னம் பச்சேகபு³த்³தா⁴னம் பண்ணஸாலாயோ காரேத்வா மணிஆதா⁴ரகே உபட்ட²பேத்வா சதூஹி பச்சயேஹி த³ஸவஸ்ஸஸஹஸ்ஸானி உபட்டா²னம் அகாஸி. ஏதானி பாகடட்டா²னானி.

கப்பஸதஸஹஸ்ஸம் பன தா³னம் த³த³மானோவ அம்ஹாகம் போ³தி⁴ஸத்தேன ஸத்³தி⁴ம் துஸிதபுரே நிப்³ப³த்தித்வா ததோ சுதோ அமிதோத³னஸக்கஸ்ஸ கே³ஹே படிஸந்தி⁴ம் க³ஹேத்வா அனுபுப்³பே³ன கதாபி⁴னிக்க²மனோ ஸம்மாஸம்போ³தி⁴ம் பத்வா பட²மக³மனேன கபிலவத்து²ம் ஆக³ந்த்வா ததோ நிக்க²மந்தே ப⁴க³வதி ப⁴க³வதோ பரிவாரத்த²ம் ராஜகுமாரேஸு பப்³ப³ஜந்தேஸு ப⁴த்³தி³யாதீ³ஹி ஸத்³தி⁴ம் நிக்க²மித்வா ப⁴க³வதோ ஸந்திகே பப்³ப³ஜித்வா நசிரஸ்ஸேவ ஆயஸ்மதோ புண்ணஸ்ஸ மந்தாணிபுத்தஸ்ஸ ஸந்திகே த⁴ம்மகத²ம் ஸுத்வா ஸோதாபத்திப²லே பதிட்ட²ஹி. ஏவமேஸ ஆயஸ்மா புப்³பூ³பனிஸ்ஸயஸம்பன்னோ, தஸ்ஸிமாய புப்³பூ³பனிஸ்ஸயஸம்பத்தியா க³ம்பீ⁴ரோபி படிச்சஸமுப்பாதோ³ உத்தானகோ விய உபட்டா²ஸி.

தித்த²வாஸோதி பன க³ரூனம் ஸந்திகே உக்³க³ஹணஸவனபரிபுச்ச²னதா⁴ரணானி வுச்சந்தி. ஸோ தே²ரஸ்ஸ அதிவிய பரிஸுத்³தோ⁴. தேனாபிஸ்ஸாயம் க³ம்பீ⁴ரோபி உத்தானகோ விய உபட்டா²ஸி. ஸோதாபன்னானஞ்ச நாம பச்சயாகாரோ உத்தானகோ ஹுத்வா உபட்டா²தி, அயஞ்ச ஆயஸ்மா ஸோதாபன்னோ. ப³ஹுஸ்ஸுதானம் சதுஹத்தே² ஓவரகே பதீ³பே ஜலமானே மஞ்சபீட²ம் விய நாமரூபபரிச்சே²தோ³ பாகடோ ஹோதி, அயஞ்ச ஆயஸ்மா ப³ஹுஸ்ஸுதானம் அக்³கோ³. இதி பா³ஹுஸச்சபா⁴வேனபிஸ்ஸ க³ம்பீ⁴ரோபி பச்சயாகாரோ உத்தானகோ விய உபட்டா²ஸி. படிச்சஸமுப்பாதோ³ சதூஹி க³ம்பீ⁴ரதாஹி க³ம்பீ⁴ரோ. ஸா பனஸ்ஸ க³ம்பீ⁴ரதா விஸுத்³தி⁴மக்³கே³ வித்தா²ரிதாவ. ஸா ஸப்³பா³பி தே²ரஸ்ஸ உத்தானகா விய உபட்டா²ஸி. தேன ப⁴க³வா ஆயஸ்மந்தம் ஆனந்த³ம் உஸ்ஸாதே³ந்தோ மா ஹேவந்திஆதி³மாஹ. அயஞ்ஹேத்த² அதி⁴ப்பாயோ – ஆனந்த³, த்வம் மஹாபஞ்ஞோ விஸத³ஞாணோ, தேன தே க³ம்பீ⁴ரோபி படிச்சஸமுப்பாதோ³ உத்தானகோ விய கா²யதி. தஸ்மா ‘‘மய்ஹமேவ நு கோ² ஏஸ உத்தானகோ விய ஹுத்வா உபட்டா²தி, உதா³ஹு அஞ்ஞேஸம்பீ’’தி மா ஏவம் அவச.

யம் பன வுத்தம் ‘‘அபஸாதே³ந்தோ’’தி, தத்தா²யமதி⁴ப்பாயோ – ஆனந்த³, ‘‘அத² ச பன மே உத்தானகுத்தானகோ விய கா²யதீ’’தி மா ஹேவம் அவச. யதி³ ஹி தே ஏஸ உத்தானகுத்தானகோ விய கா²யதி, கஸ்மா த்வம் அத்தனோ த⁴ம்மதாய ஸோதாபன்னோ நாஹோஸி, மயா தி³ன்னனயே ட²த்வா ஸோதாபத்திமக்³க³ம் படிவிஜ்ஜி²? ஆனந்த³, இத³ம் நிப்³பா³னமேவ க³ம்பீ⁴ரம், பச்சயாகாரோ பன உத்தானகோ ஜாதோ, அத² கஸ்மா ஓளாரிகம் காமராக³ஸம்யோஜனம் படிக⁴ஸம்யோஜனம் ஓளாரிகம் காமராகா³னுஸயம் படிகா⁴னுஸயந்தி இமே சத்தாரோ கிலேஸே ஸமுக்³கா⁴தேத்வா ஸகதா³கா³மிப²லம் ந ஸச்சி²கரோஸி, தேயேவ அணுஸஹக³தே சத்தாரோ கிலேஸே ஸமுக்³கா⁴தேத்வா அனாகா³மிப²லம் ந ஸச்சி²கரோஸி, ரூபராகா³தீ³னி பஞ்ச ஸம்யோஜனானி, மானானுஸயம் ப⁴வராகா³னுஸயம் அவிஜ்ஜானுஸயந்தி இமே அட்ட² கிலேஸே ஸமுக்³கா⁴தேத்வா அரஹத்தம் ந ஸச்சி²கரோஸி? கஸ்மா வா ஸதஸஹஸ்ஸகப்பாதி⁴கம் ஏகம் அஸங்க்²யேய்யம் பூரிதபாரமினோ ஸாரிபுத்தமோக்³க³ல்லானா விய ஸாவகபாரமீஞாணம் ந படிவிஜ்ஜ²ஸி, ஸதஸஹஸ்ஸகப்பாதி⁴கானி த்³வே அஸங்க்²யேய்யானி பூரிதபாரமினோ பச்சேகபு³த்³தா⁴ விய ச பச்சேகபோ³தி⁴ஞாணம் ந படிவிஜ்ஜ²ஸி? யதி³ வா தே ஸப்³ப³தா²வ ஏஸ உத்தானகோ ஹுத்வா உபட்டா²ஸி. அத² கஸ்மா ஸதஸஹஸ்ஸகப்பாதி⁴கானி சத்தாரி அட்ட² ஸோளஸ வா அஸங்க்²யேய்யானி பூரிதபாரமினோ பு³த்³தா⁴ விய ஸப்³ப³ஞ்ஞுதஞ்ஞாணம் ந ஸச்சி²கரோஸி? கிம் அனத்தி²கோஸி ஏதேஹி விஸேஸாதி⁴க³மேஹி? பஸ்ஸ யாவ ச தே அபரத்³த⁴ம், த்வம் நாம ஸாவகபதே³ஸஞாணே டி²தோ அதிக³ம்பீ⁴ரம் பச்சயாகாரம் ‘‘உத்தானகோ விய மே உபட்டா²தீ’’தி வத³ஸி. தஸ்ஸ தே இத³ம் வசனம் பு³த்³தா⁴னம் கதா²ய பச்சனீகம் ஹோதி. தாதி³ஸேன நாம பி⁴க்கு²னா பு³த்³தா⁴னம் கதா²ய பச்சனீகம் கதே²தப்³ப³ந்தி ந யுத்தமேதம். நனு மய்ஹம், ஆனந்த³, இமம் பச்சயாகாரம் படிவிஜ்ஜி²தும் வாயமந்தஸ்ஸேவ கப்பஸதஸஹஸ்ஸாதி⁴கானி சத்தாரி அஸங்க்²யேய்யானி அதிக்கந்தானி. பச்சயாகாரபடிவிஜ்ஜ²னத்தா²ய ச பன மே அதி³ன்னதா³னம் நாம நத்தி², அபூரிதபாரமீ நாம நத்தி². ‘‘அஜ்ஜ பச்சயாகாரம் படிவிஜ்ஜி²ஸ்ஸாமீ’’தி பன மே நிருஸ்ஸாஹம் விய மாரப³லம் வித⁴மந்தஸ்ஸ அயம் மஹாபத²வீ த்³வங்கு³லமத்தம்பி நாகம்பி, ததா² பட²மயாமே புப்³பே³னிவாஸம், மஜ்ஜி²மயாமே தி³ப்³ப³சக்கு²ம் ஸம்பாதே³ந்தஸ்ஸ. பச்சி²மயாமே பன மே ப³லவபச்சூஸஸமயே, ‘‘அவிஜ்ஜா ஸங்கா²ரானம் நவஹி ஆகாரேஹி பச்சயோ ஹோதீ’’தி தி³ட்ட²மத்தேயேவ த³ஸஸஹஸ்ஸிலோகதா⁴து அயத³ண்டே³ன ஆகோடிதகம்ஸதா²லோ விய விரவஸதம் விரவஸஹஸ்ஸம் முஞ்சமானா வாதாஹதே பது³மினிபண்ணே உத³கபி³ந்து³ விய பகம்பித்த². ஏவம் க³ம்பீ⁴ரோ சாயம், ஆனந்த³, படிச்சஸமுப்பாதோ³ க³ம்பீ⁴ராவபா⁴ஸோ ச, ஏதஸ்ஸ, ஆனந்த³, த⁴ம்மஸ்ஸ அனனுபோ³தா⁴…பே… நாதிவத்ததீதி.

ஏதஸ்ஸ த⁴ம்மஸ்ஸாதி ஏதஸ்ஸ பச்சயத⁴ம்மஸ்ஸ. அனனுபோ³தா⁴தி ஞாதபரிஞ்ஞாவஸேன அனனுபு³ஜ்ஜ²னா. அப்படிவேதா⁴தி தீரணப்பஹானபரிஞ்ஞாவஸேன அப்படிவிஜ்ஜ²னா. தந்தாகுலகஜாதாதி தந்தம் விய ஆகுலஜாதா. யதா² நாம து³ன்னிக்கி²த்தம் மூஸிகச்சி²ன்னம் பேஸகாரானம் தந்தம் தஹிம் தஹிம் ஆகுலம் ஹோதி, ‘‘இத³ம் அக்³க³ம், இத³ம் மூல’’ந்தி அக்³கே³ன வா அக்³க³ம், மூலேன வா மூலம் ஸமானேதும் து³க்கரம் ஹோதி. ஏவமேவ ஸத்தா இமஸ்மிம் பச்சயாகாரே க²லிதா ஆகுலா ப்³யாகுலா ஹோந்தி, ந ஸக்கோந்தி பச்சயாகாரம் உஜும் காதும். தத்த² தந்தம் பச்சத்தபுரிஸகாரே ட²த்வா ஸக்காபி ப⁴வேய்ய உஜும் காதும், ட²பேத்வா பன த்³வே போ³தி⁴ஸத்தே அஞ்ஞோ ஸத்தோ அத்தனோ த⁴ம்மதாய பச்சயாகாரம் உஜும் காதும் ஸமத்தோ² நாம நத்தி². யதா² பன ஆகுலம் தந்தம் கஞ்ஜியம் த³த்வா கோச்சே²ன பஹடம் தத்த² தத்த² கு³ளகஜாதம் ஹோதி க³ண்டி²ப³த்³த⁴ம், ஏவமிமே ஸத்தா பச்சயேஸு பக்க²லித்வா பச்சயே உஜும் காதும் அஸக்கோந்தா த்³வாஸட்டி²தி³ட்டி²க³தவஸேன கு³ளகஜாதா ஹோந்தி க³ண்டி²ப³த்³தா⁴. யே ஹி கேசி தி³ட்டி²யோ ஸன்னிஸ்ஸிதா, ஸப்³பே³ தே பச்சயம் உஜும் காதும் அஸக்கோந்தாயேவ.

குலாக³ண்டி²கஜாதாதி குலாக³ண்டி²கம் வுச்சதி பேஸகாரகஞ்ஜியஸுத்தம். குலா நாம ஸகுணிகா, தஸ்ஸா குலாவகோதிபி ஏகே. யதா² ஹி தது³ப⁴யம்பி ஆகுலம் அக்³கே³ன வா அக்³க³ம், மூலேன வா மூலம் ஸமானேதும் து³க்கரந்தி புரிமனயேனேவ யோஜேதப்³ப³ம்.

முஞ்ஜபப்³ப³ஜபூ⁴தாதி முஞ்ஜதிணம் விய பப்³ப³ஜதிணம் விய ச பூ⁴தா தாதி³ஸா ஜாதா. யதா² ஹி தானி திணானி கோட்டேத்வா கதரஜ்ஜு ஜிண்ணகாலே கத்த²சி பதிதம் க³ஹேத்வா தேஸம் திணானம் ‘‘இத³ம் அக்³க³ம், இத³ம் மூல’’ந்தி அக்³கே³ன வா அக்³க³ம், மூலேன வா மூலம் ஸமானேதும் து³க்கரம், தம்பி பச்சத்தபுரிஸகாரே ட²த்வா ஸக்கா ப⁴வேய்ய உஜும் காதும், ட²பேத்வா பன த்³வே போ³தி⁴ஸத்தே அஞ்ஞோ ஸத்தோ அத்தனோ த⁴ம்மதாய பச்சயாகாரம் உஜும் காதும் ஸமத்தோ² நாம நத்தி², ஏவமயம் பஜா பச்சயம் உஜும் காதும் அஸக்கோந்தீ தி³ட்டி²க³தவஸேன க³ண்டி²கஜாதா ஹுத்வா அபாயம் து³க்³க³திம் வினிபாதம் ஸம்ஸாரம் நாதிவத்ததி.

தத்த² அபாயோதி நிரயதிரச்சா²னயோனிபேத்திவிஸயஅஸுரகாயா. ஸப்³பே³பி ஹி தே வட்³டி⁴ஸங்கா²தஸ்ஸ அயஸ்ஸ அபா⁴வதோ ‘‘அபாயோ’’தி வுச்சதி, ததா² து³க்க²ஸ்ஸ க³திபா⁴வதோ து³க்³க³தி, ஸுக²ஸமுஸ்ஸயதோ வினிபதிதத்தா வினிபாதோ. இதரோ பன –

‘‘க²ந்தா⁴னஞ்ச படிபாடி, தா⁴துஆயதனான ச;

அப்³போ⁴ச்சி²ன்னம் வத்தமானா, ஸம்ஸாரோதி பவுச்சதி’’.

தம் ஸப்³ப³ம்பி நாதிவத்ததி நாதிக்கமதி, அத² கோ² சுதிதோ படிஸந்தி⁴ம், படிஸந்தி⁴தோ சுதிந்தி ஏவம் புனப்புனம் சுதிபடிஸந்தி⁴யோ க³ண்ஹமானா தீஸு ப⁴வேஸு சதூஸு யோனீஸு பஞ்சஸு க³தீஸு ஸத்தஸு விஞ்ஞாணட்டி²தீஸு நவஸு ஸத்தாவாஸேஸு மஹாஸமுத்³தே³ வாதக்கி²த்தா நாவா விய யந்தே யுத்தகோ³ணோ விய ச பரிப்³ப⁴மதியேவ. இதி ஸப்³ப³மேதம் ப⁴க³வா ஆயஸ்மந்தம் ஆனந்த³ம் அபஸாதே³ந்தோ ஆஹ. ஸேஸமேத்த² வுத்தனயமேவாதி. த³ஸமம்.

து³க்க²வக்³கோ³ ச²ட்டோ².