7. மஹாவக்³கோ³

1. அஸ்ஸுதவாஸுத்தவண்ணனா

61. மஹாவக்³க³ஸ்ஸ பட²மே அஸ்ஸுதவாதி க²ந்த⁴தா⁴துஆயதனபச்சயாகாரஸதிபட்டா²னாதீ³ஸு உக்³க³ஹபரிபுச்சா²வினிச்ச²யரஹிதோ. புது²ஜ்ஜனோதி புதூ²னம் நானப்பகாரானம் கிலேஸாதீ³னம் ஜனனாதி³காரணேஹி புது²ஜ்ஜனோ. வுத்தஞ்ஹேதம் – ‘‘புது² கிலேஸே ஜனேந்தீதி புது²ஜ்ஜனா’’தி ஸப்³ப³ம் வித்தா²ரேதப்³ப³ம். அபிச புதூ²னம் க³ணனபத²மதீதானம் அரியத⁴ம்மபரம்முகா²னம் நீசத⁴ம்மஸமாசாரானம் ஜனானம் அந்தோக³த⁴த்தாபி புது²ஜ்ஜனோ, புது² வா அயம் விஸும்யேவ ஸங்க²ம் க³தோ, விஸம்ஸட்டோ² ஸீலஸுதாதி³கு³ணயுத்தேஹி அரியேஹி ஜனோதி புது²ஜ்ஜனோ. ஏவமேதேஹி ‘‘அஸ்ஸுதவா புது²ஜ்ஜனோ’’தி த்³வீஹிபி பதே³ஹி யே தே –

‘‘து³வே புது²ஜ்ஜனா வுத்தா, பு³த்³தே⁴னாதி³ச்சப³ந்து⁴னா;

அந்தோ⁴ புது²ஜ்ஜனோ ஏகோ, கல்யாணேகோ புது²ஜ்ஜனோ’’தி. (மஹானி. 94); –

த்³வே புது²ஜ்ஜனா வுத்தா, தேஸு அந்த⁴புது²ஜ்ஜனோ க³ஹிதோ. இமஸ்மிந்தி பச்சுப்பன்னபச்சக்க²காயம் த³ஸ்ஸேதி. சாதுமஹாபூ⁴திகஸ்மிந்தி சதுமஹாபூ⁴தகாயே சதுமஹாபூ⁴தேஹி நிப்³ப³த்தே சதுமஹாபூ⁴தமயேதி அத்தோ². நிப்³பி³ந்தே³ய்யாதி உக்கண்டே²ய்ய. விரஜ்ஜேய்யாதி ந ரஜ்ஜேய்ய. விமுச்சேய்யாதி முச்சிதுகாமோ ப⁴வேய்ய. ஆசயோதி வுட்³டி⁴. அபசயோதி பரிஹானி. ஆதா³னந்தி நிப்³ப³த்தி. நிக்கே²பனந்தி பே⁴தோ³.

தஸ்மாதி யஸ்மா இமே சத்தாரோ வுட்³டி⁴ஹானினிப்³ப³த்திபே⁴தா³ பஞ்ஞாயந்தி, தஸ்மா தம்காரணாதி அத்தோ². இதி ப⁴க³வா சாதுமஹாபூ⁴திகே காயே ரூபம் பரிக்³க³ஹேதும் அயுத்தரூபம் கத்வா அரூபம் பரிக்³க³ஹேதும் யுத்தரூபம் கரோதி. கஸ்மா? தேஸஞ்ஹி பி⁴க்கூ²னம் ரூபஸ்மிம் கா³ஹோ ப³லவா அதி⁴மத்தோ, தேன தேஸம் ரூபே கா³ஹஸ்ஸ பரிக்³க³ஹேதப்³ப³ரூபதம் த³ஸ்ஸேத்வா நிக்கட்³ட⁴ந்தோ அரூபே பதிட்டா²பனத்த²ம் ஏவமாஹ.

சித்தந்திஆதி³ ஸப்³ப³ம் மனாயதனஸ்ஸேவ நாமம். தஞ்ஹி சித்தவத்து²தாய சித்தகோ³சரதாய ஸம்பயுத்தத⁴ம்மசித்ததாய ச சித்தம், மனனட்டே²ன மனோ, விஜானனட்டே²ன விஞ்ஞாணந்தி வுச்சதி. நாலந்தி ந ஸமத்தோ². அஜ்ஜோ²ஸிதந்தி தண்ஹாய கி³லித்வா பரினிட்ட²பேத்வா க³ஹிதம். மமாயிதந்தி தண்ஹாமமத்தேன மம இத³ந்தி க³ஹிதம். பராமட்ட²ந்தி தி³ட்டி²யா பராமஸித்வா க³ஹிதம். ஏதம் மமாதி தண்ஹாகா³ஹோ, தேன அட்ட²ஸததண்ஹாவிசரிதம் க³ஹிதம் ஹோதி. ஏஸோஹமஸ்மீதி மானகா³ஹோ, தேன நவ மானா க³ஹிதா ஹோந்தி. ஏஸோ மே அத்தாதி தி³ட்டி²கா³ஹோ, தேன த்³வாஸட்டி² தி³ட்டி²யோ க³ஹிதா ஹோந்தி. தஸ்மாதி யஸ்மா ஏவம் தீ³க⁴ரத்தம் க³ஹிதம், தஸ்மா நிப்³பி³ந்தி³தும் ந ஸமத்தோ².

வரம், பி⁴க்க²வேதி இத³ம் கஸ்மா ஆஹ? பட²மஞ்ஹி தேன ரூபம் பரிக்³க³ஹேதும் அயுத்தரூபம் கதம், அரூபம் யுத்தரூபம், அத² ‘‘தேஸம் பி⁴க்கூ²னம் ரூபதோ கா³ஹோ நிக்க²மித்வா அரூபம் க³தோ’’தி ஞத்வா தம் நிக்கட்³டி⁴தும் இமம் தே³ஸனம் ஆரபி⁴. தத்த² அத்ததோ உபக³ச்சே²ய்யாதி அத்தாதி க³ண்ஹேய்ய. பி⁴ய்யோபீதி வஸ்ஸஸததோ உத்³த⁴ம்பி. கஸ்மா பன ப⁴க³வா ஏவமாஹ? கிம் அதிரேகவஸ்ஸஸதம் திட்ட²மானம் ரூபம் நாம அத்தி²? நனு பட²மவயே பவத்தம் ரூபம் மஜ்ஜி²மவயம் ந பாபுணாதி, மஜ்ஜி²மவயே பவத்தம் பச்சி²மவயம், புரேப⁴த்தே பவத்தம் பச்சா²ப⁴த்தம், பச்சா²ப⁴த்தே பவத்தம் பட²மயாமம், பட²மயாமே பவத்தம் மஜ்ஜி²மயாமம், மஜ்ஜி²மயாமே பவத்தம் பச்சி²மயாமம் ந பாபுணாதி? ததா² க³மனே பவத்தம் டா²னம், டா²னே பவத்தம் நிஸஜ்ஜம், நிஸஜ்ஜாய பவத்தம் ஸயனம் ந பாபுணாதி. ஏகஇரியாபதே²பி பாத³ஸ்ஸ உத்³த⁴ரணே பவத்தம் அதிஹரணம், அதிஹரணே பவத்தம் வீதிஹரணம், வீதிஹரணே பவத்தம் வோஸ்ஸஜ்ஜனம், வோஸ்ஸஜ்ஜனே பவத்தம் ஸன்னிக்கே²பனம், ஸன்னிக்கே²பனே பவத்தம் ஸன்னிருஜ்ஜ²னம் ந பாபுணாதி, தத்த² தத்தே²வ ஓதி⁴ ஓதி⁴ பப்³ப³ம் பப்³ப³ம் ஹுத்வா தத்தகபாலே பக்கி²த்ததிலா விய படபடாயந்தா ஸங்கா²ரா பி⁴ஜ்ஜந்தீதி? ஸச்சமேதம். யதா² பன பதீ³பஸ்ஸ ஜலதோ ஜாதா தம் தம் வட்டிப்பதே³ஸம் அனதிக்கமித்வா தத்த² தத்தே²வ பி⁴ஜ்ஜதி, அத² ச பன பவேணிஸம்ப³ந்த⁴வஸேன ஸப்³ப³ரத்திம் ஜலிதோ பதீ³போதி வுச்சதி, ஏவமிதா⁴பி பவேணிவஸேன அயம்பி காயோ ஏவம் சிரட்டி²திகோ விய கத்வா த³ஸ்ஸிதோ.

ரத்தியா ச தி³வஸஸ்ஸ சாதி ரத்திம்ஹி ச தி³வஸே ச. பு⁴ம்மத்தே² ஹேதம் ஸாமிவசனம். அஞ்ஞதே³வ உப்பஜ்ஜதி, அஞ்ஞம் நிருஜ்ஜ²தீதி யம் ரத்திம் உப்பஜ்ஜதி ச நிருஜ்ஜ²தி ச, ததோ அஞ்ஞதே³வ தி³வா உப்பஜ்ஜதி ச நிருஜ்ஜ²தி சாதி அத்தோ². அஞ்ஞம் உப்பஜ்ஜதி, அனுப்பன்னமேவ அஞ்ஞம் நிருஜ்ஜ²தீதி ஏவம் பன அத்தோ² ந க³ஹேதப்³போ³. ‘‘ரத்தியா ச தி³வஸஸ்ஸ சா’’தி இத³ம் புரிமபவேணிதோ பரித்தகம் பவேணிம் க³ஹேத்வா பவேணிவஸேனேவ வுத்தம், ஏகரத்திம் பன ஏகதி³வஸம் வா ஏகமேவ சித்தம் டா²தும் ஸமத்த²ம் நாம நத்தி². ஏகஸ்மிஞ்ஹி அச்ச²ராக்க²ணே அனேகானி சித்தகோடிஸதஸஹஸ்ஸானி உப்பஜ்ஜந்தி. வுத்தம்பி சேதம் மிலிந்த³பஞ்ஹே –

‘‘வாஹஸதம் கோ², மஹாராஜ, வீஹீனம், அட்³ட⁴சூளஞ்ச வாஹா, வீஹிஸத்தம்ப³ணானி, த்³வே ச தும்பா³, ஏகச்ச²ராக்க²ணே பவத்தஸ்ஸ சித்தஸ்ஸ ஏத்தகா வீஹீ லக்க²ம் ட²பீயமானா பரிக்க²யம் பரியாதா³னம் க³ச்சே²ய்யு’’ந்தி.

பவனேதி மஹாவனே. தம் முஞ்சித்வா அஞ்ஞம் க³ண்ஹாதி, தம் முஞ்சித்வா அஞ்ஞம் க³ண்ஹாதீதி இமினா ந ஸோ க³ண்ஹிதப்³ப³ஸாக²ம் அலபி⁴த்வா பூ⁴மிம் ஓதரதி. அத² கோ² தஸ்மிம் மஹாவனே விசரந்தோ தம் தம் ஸாக²ம் க³ண்ஹந்தோயேவ சரதீதி அயமத்தோ² த³ஸ்ஸிதோ.

ஏவமேவ கோ²தி ஏத்த² இத³ம் ஓபம்மஸம்ஸந்த³னம் – அரஞ்ஞமஹாவனம் விய ஹி ஆரம்மணவனம் வேதி³தப்³ப³ம். தஸ்மிம் வனே விசரணமக்கடோ விய ஆரம்மணவனே உப்பஜ்ஜனகசித்தம். ஸாகா²க³ஹணம் விய ஆரம்மணே லுப்³ப⁴னம். யதா² ஸோ அரஞ்ஞே விசரந்தோ மக்கடோ தம் தம் ஸாக²ம் பஹாய தம் தம் ஸாக²ம் க³ண்ஹாதி, ஏவமித³ம் ஆரம்மணவனே விசரந்தம் சித்தம்பி கதா³சி ரூபாரம்மணம் க³ஹேத்வா உப்பஜ்ஜதி, கதா³சி ஸத்³தா³தீ³ஸு அஞ்ஞதரம், கதா³சி அதீதம், கதா³சி அனாக³தம் வா பச்சுப்பன்னம் வா, ததா² கதா³சி அஜ்ஜ²த்தம், கதா³சி பா³ஹிரம். யதா² ச ஸோ அரஞ்ஞே விசரந்தோ மக்கடோ ஸாக²ம் அலபி⁴த்வா ஓருய்ஹ பூ⁴மியம் நிஸின்னோதி ந வத்தப்³போ³, ஏகம் பன பண்ணஸாக²ம் க³ஹேத்வாவ நிஸீத³தி, ஏவமேவ ஆரம்மணவனே விசரந்தம் சித்தம்பி ஏகம் ஓலுப்³பா⁴ரம்மணம் அலபி⁴த்வா உப்பன்னந்தி ந வத்தப்³ப³ம், ஏகஜாதியம் பன ஆரம்மணம் க³ஹேத்வாவ உப்பஜ்ஜதீதி வேதி³தப்³ப³ம். ஏத்தாவதா ச பன ப⁴க³வதா ரூபதோ நீஹரித்வா அரூபே கா³ஹோ பதிட்டா²பிதோ, அரூபதோ நீஹரித்வா ரூபே.

இதா³னி தம் உப⁴யதோ நிக்கட்³டி⁴துகாமோ தத்ர, பி⁴க்க²வே, ஸுதவா அரியஸாவகோதி தே³ஸனம் ஆரபி⁴. அயம் பனத்தோ² ஆஸீவிஸத³ட்டூ²பமாய தீ³பேதப்³போ³ – ஏகோ கிர புரிஸோ ஆஸீவிஸேன த³ட்டோ², அத²ஸ்ஸ விஸம் ஹரிஸ்ஸாமீதி சே²கோ பி⁴ஸக்கோ ஆக³ந்த்வா வமனம் காரேத்வா ஹேட்டா² க³ருளோ, உபரி நாகோ³தி மந்தம் பரிவத்தேத்வா விஸம் உபரி ஆரோபேஸி. ஸோ யாவ அக்கி²ப்பதே³ஸா ஆருள்ஹபா⁴வம் ஞத்வா ‘‘இதோ பரம் அபி⁴ருஹிதும் ந த³ஸ்ஸாமி, த³ட்ட²ட்டா²னேயேவ ட²பேஸ்ஸாமீ’’தி உபரி க³ருளோ, ஹேட்டா² நாகோ³தி மந்தம் பரிவத்தேத்வா கண்ணே து⁴மேத்வா த³ண்ட³கேன பஹரித்வா விஸம் ஓதாரேத்வா த³ட்ட²ட்டா²னேயேவ ட²பேஸி. தத்ரஸ்ஸ டி²தபா⁴வம் ஞத்வா அக³த³லேபேன விஸம் நிம்மதே²த்வா ந்ஹாபேத்வா ‘‘ஸுகீ² ஹோஹீ’’தி வத்வா யேனகாமம் பக்காமி.

தத்த² ஆஸீவிஸேன த³ட்ட²ஸ்ஸ காயே விஸபதிட்டா²னம் விய இமேஸம் பி⁴க்கூ²னம் ரூபே அதி⁴மத்தகா³ஹகாலோ, சே²கோ பி⁴ஸக்கோ விய ததா²க³தோ, மந்தம் பரிவத்தேத்வா உபரி விஸஸ்ஸ ஆரோபிதகாலோ விய ததா²க³தேன தேஸம் பி⁴க்கூ²னம் ரூபதோ கா³ஹம் நீஹரித்வா அரூபே பதிட்டா²பிதகாலோ, யாவ அக்கி²ப்பதே³ஸா ஆருள்ஹவிஸஸ்ஸ உபரி அபி⁴ருஹிதும் அத³த்வா புன மந்தப³லேன ஓதாரேத்வா த³ட்ட²ட்டா²னேயேவ ட²பனம் விய ஸத்தா²ரா தேஸம் பி⁴க்கூ²னம் அரூபதோ கா³ஹம் நீஹரித்வா ரூபே பதிட்டா²பிதகாலோ. த³ட்ட²ட்டா²னே டி²தஸ்ஸ விஸஸ்ஸ அக³த³லேபேன நிம்மத²னம் விய உப⁴யதோ கா³ஹம் நீஹரணத்தா²ய இமிஸ்ஸா தே³ஸனாய ஆரத்³த⁴காலோ வேதி³தப்³போ³. தத்த² நிப்³பி³ந்த³ம் விரஜ்ஜதீதி இமினா மக்³கோ³ கதி²தோ, விராகா³ விமுச்சதீதி ப²லம், விமுத்தஸ்மிந்திஆதி³னா பச்சவேக்க²ணா. பட²மம்.

2. து³தியஅஸ்ஸுதவாஸுத்தவண்ணனா

62. து³தியே ஸுக²வேத³னியந்தி ஸுக²வேத³னாய பச்சயம். ப²ஸ்ஸந்தி சக்கு²ஸம்ப²ஸ்ஸாதி³ம். நனு ச சக்கு²ஸம்ப²ஸ்ஸோ ஸுக²வேத³னாய பச்சயோ ந ஹோதீதி? ஸஹஜாதபச்சயேன ந ஹோதி, உபனிஸ்ஸயபச்சயேன பன ஜவனவேத³னாய ஹோதி, தம் ஸந்தா⁴யேதம் வுத்தம். ஸோதஸம்ப²ஸ்ஸாதீ³ஸுபி ஏஸேவ நயோ. தஜ்ஜந்தி தஜ்ஜாதிகம் தஸ்ஸாருப்பம், தஸ்ஸ ப²ஸ்ஸஸ்ஸ அனுரூபந்தி அத்தோ². து³க்க²வேத³னியந்திஆதி³ வுத்தனயேனேவ வேதி³தப்³ப³ம். ஸங்க⁴ட்டனஸமோதா⁴னாதி ஸங்க⁴ட்டனேன சேவ ஸமோதா⁴னேன ச, ஸங்க⁴ட்டனஸம்பிண்ட³னேனாதி அத்தோ². உஸ்மாதி உண்ஹாகாரோ. தேஜோ அபி⁴னிப்³ப³த்ததீதி அக்³கி³சுண்ணோ நிக்க²மதீதி ந க³ஹேதப்³ப³ம், உஸ்மாகாரஸ்ஸேவ பன ஏதம் வேவசனம். தத்த² த்³வின்னம் கட்டா²னந்தி த்³வின்னம் அரணீனம். தத்த² அதோ⁴அரணீ விய வத்து², உத்தராரணீ விய ஆரம்மணம், ஸங்க⁴ட்டனம் விய ப²ஸ்ஸோ, உஸ்மாதா⁴து விய வேத³னா. து³தியம்.

3. புத்தமம்ஸூபமஸுத்தவண்ணனா

63. ததியே சத்தாரோமே, பி⁴க்க²வே, ஆஹாராதிஆதி³ வுத்தனயமேவ. யஸ்மா பனஸ்ஸ அட்டு²ப்பத்திகோ நிக்கே²போ, தஸ்மா தம் த³ஸ்ஸேத்வாவேத்த² அனுபுப்³ப³பத³வண்ணனம் கரிஸ்ஸாமி. கதராய பன இத³ம் அட்டு²ப்பத்தியா நிக்கி²த்தந்தி? லாப⁴ஸக்காரேன. ப⁴க³வதோ கிர மஹாலாப⁴ஸக்காரோ உப்பஜ்ஜி, யதா² தம் சத்தாரோ அஸங்க்²யேய்யே பூரிததா³னபாரமீஸஞ்சயஸ்ஸ. ஸப்³ப³தி³ஸாஸு ஹிஸ்ஸ யமகமஹாமேகோ⁴ வுட்ட²ஹித்வா மஹோக⁴ம் விய ஸப்³ப³பாரமியோ ‘‘ஏகஸ்மிம் அத்தபா⁴வே விபாகம் த³ஸ்ஸாமா’’தி ஸம்பிண்டி³தா விய லாப⁴ஸக்காரமஹோக⁴ம் நிப்³ப³த்தயிம்ஸு. ததோ ததோ அன்னபானயானவத்த²மாலாக³ந்த⁴விலேபனாதி³ஹத்தா² க²த்தியப்³ராஹ்மணாத³யோ ஆக³ந்த்வா, ‘‘கஹம் பு³த்³தோ⁴, கஹம் ப⁴க³வா, கஹம் தே³வதே³வோ நராஸபோ⁴ புரிஸஸீஹோ’’தி? ப⁴க³வந்தம் பரியேஸந்தி. ஸகடஸதேஹிபி பச்சயே ஆஹரித்வா ஓகாஸம் அலப⁴மானா ஸமந்தா கா³வுதப்பமாணம்பி ஸகடது⁴ரேன ஸகடது⁴ரம் ஆஹச்ச திட்ட²ந்தி சேவ அனுப்பவத்தந்தி ச அந்த⁴கவிந்த³ப்³ராஹ்மணாத³யோ விய. ஸப்³ப³ம் க²ந்த⁴கே தேஸு தேஸு ஸுத்தேஸு ச ஆக³தனயேன வேதி³தப்³ப³ம்.

யதா² ப⁴க³வதோ, ஏவம் பி⁴க்கு²ஸங்க⁴ஸ்ஸாபி. வுத்தஞ்சேதம் –

‘‘தேன கோ² பன ஸமயேன ப⁴க³வா ஸக்கதோ ஹோதி க³ருகதோ மானிதோ பூஜிதோ அபசிதோ லாபீ⁴ சீவர-பிண்ட³பாத-ஸேனாஸன-கி³லான-பச்சய-பே⁴ஸஜ்ஜ-பரிக்கா²ரானம். பி⁴க்கு²ஸங்கோ⁴பி கோ² ஸக்கதோ ஹோதி…பே… பரிக்கா²ரான’’ந்தி (உதா³. 14; ஸம். நி. 2.70).

ததா² ‘‘யாவதா கோ², சுந்த³, ஏதரஹி ஸங்கோ⁴ வா க³ணோ வா லோகே உப்பன்னோ, நாஹம், சுந்த³, அஞ்ஞம் ஏகஸங்க⁴ம்பி ஸமனுபஸ்ஸாமி ஏவம் லாப⁴க்³க³யஸக்³க³பத்தம் யத²ரிவாயம், சுந்த³, பி⁴க்கு²ஸங்கோ⁴’’தி (தீ³. நி. 3.176).

ஸ்வாயம் ப⁴க³வதோ ச ஸங்க⁴ஸ்ஸ ச உப்பன்னோ லாப⁴ஸக்காரோ ஏகதோ ஹுத்வா த்³வின்னம் மஹானதீ³னம் உத³கம் விய அப்பமேய்யோ அஹோஸி. அத² ஸத்தா² ரஹோக³தோ சிந்தேஸி – ‘‘மஹாலாப⁴ஸக்காரோ அதீதபு³த்³தா⁴னம்பி ஏவரூபோ அஹோஸி, அனாக³தானம்பி ஏவரூபோ ப⁴விஸ்ஸதி. கிம் நு கோ² பி⁴க்கூ² ஆஹாரபரிக்³கா³ஹகேன ஸதிஸம்பஜஞ்ஞேன ஸமன்னாக³தா மஜ்ஜ²த்தா நிச்ச²ந்த³ராகா³ ஹுத்வா ஆஹாரம் பரிபு⁴ஞ்ஜிதும் ஸக்கோந்தி, ந ஸக்கோந்தீ’’தி?

ஸோ அத்³த³ஸ ஏகச்சே அது⁴னா பப்³ப³ஜிதே குலபுத்தே அபச்சவேக்கி²த்வா ஆஹாரம் பரிபு⁴ஞ்ஜமானே. தி³ஸ்வானஸ்ஸ ஏதத³ஹோஸி – ‘‘மயா கப்பஸதஸஹஸ்ஸாதி⁴கானி சத்தாரி அஸங்க்²யேய்யானி பாரமியோ பூரேந்தேன ந சீவராதி³ஹேது பூரிதா, உத்தமப²லஸ்ஸ பன அரஹத்தஸ்ஸத்தா²ய பூரிதா. இமேபி பி⁴க்கூ² மம ஸந்திகே பப்³ப³ஜந்தா ந சீவராதி³ஹேது பப்³ப³ஜிதா, அரஹத்தஸ்ஸேவ பன அத்தா²ய பப்³ப³ஜிதா. தே இதா³னி அஸாரமேவ ஸாரம் அனத்த²மேவ ச அத்த²ம் கரோந்தீ’’தி ஏவமஸ்ஸ த⁴ம்மஸம்வேகோ³ உத³பாதி³. ததோ சிந்தேஸி – ‘‘ஸசே பஞ்சமம் பாராஜிகம் பஞ்ஞபேதும் ஸக்கா அப⁴விஸ்ஸ, அபச்சவேக்கி²தாஹாரபரிபோ⁴கோ³ பஞ்சமம் பாராஜிகம் கத்வா பஞ்ஞபேதப்³போ³ ப⁴வேய்ய. ந பன ஸக்கா ஏவம் காதும், து⁴வபடிஸேவனட்டா²னஞ்ஹேதம் ஸத்தானம். யதா² பன கதி²தே பஞ்சமம் பாராஜிகம் விய நம் பஸ்ஸிஸ்ஸந்தி. ஏவம் த⁴ம்மாதா³ஸம் ஸம்வரம் மரியாத³ம் ட²பேஸ்ஸாமி, யம் ஆவஜ்ஜித்வா ஆவஜ்ஜித்வா அனாக³தே பி⁴க்கூ² சத்தாரோ பச்சயே பச்சவேக்கி²த்வா பரிபு⁴ஞ்ஜிஸ்ஸந்தீ’’தி. இமாய அட்டு²ப்பத்தியா இமம் புத்தமம்ஸூபமஸுத்தந்தம் நிக்கி²பி. தத்த² சத்தாரோமே, பி⁴க்க²வே, ஆஹாராதிஆதி³ ஹேட்டா² வுத்தத்த²மேவ.

சத்தாரோ பன ஆஹாரே வித்தா²ரேத்வா இதா³னி தேஸு ஆதீ³னவம் த³ஸ்ஸேதும் கத²ஞ்ச, பி⁴க்க²வே, கப³ளீகாரோ ஆஹாரோ த³ட்ட²ப்³போ³திஆதி³மாஹ? தத்த² ஜாயம்பதிகாதி ஜாயா சேவ பதி ச. பரித்தம் ஸம்ப³லந்தி புடப⁴த்தஸத்துமோத³காதீ³னம் அஞ்ஞதரம் அப்பமத்தகம் பாதே²ய்யம். கந்தாரமக்³க³ந்தி கந்தாரபூ⁴தம் மக்³க³ம், கந்தாரே வா மக்³க³ம். கந்தாரந்தி சோரகந்தாரம் வாளகந்தாரம் அமனுஸ்ஸகந்தாரம் நிருத³ககந்தாரம் அப்பப⁴க்க²கந்தாரந்தி பஞ்சவித⁴ம். தேஸு யத்த² சோரப⁴யம் அத்தி², தம் சோரகந்தாரம். யத்த² ஸீஹப்³யக்³கா⁴த³யோ வாளா அத்தி², தம் வாளகந்தாரம். யத்த² ப³லவாமுக²யக்கி²னிஆதீ³னம் அமனுஸ்ஸானம் வஸேன ப⁴யம் அத்தி², தம் அமனுஸ்ஸகந்தாரம். யத்த² பாதும் வா ந்ஹாயிதும் வா உத³கம் நத்தி², தம் நிருத³ககந்தாரம். யத்த² கா²தி³தப்³ப³ம் வா பு⁴ஞ்ஜிதப்³ப³ம் வா அந்தமஸோ கந்த³மூலாதி³மத்தம்பி நத்தி², தம் அப்பப⁴க்க²கந்தாரம் நாம. யத்த² பனேதம் பஞ்சவித⁴ம்பி ப⁴யம் அத்தி², தம் கந்தாரமேவ. தம் பனேதம் ஏகாஹத்³வீஹதீஹாதி³வஸேன நித்த²ரிதப்³ப³ம்பி அத்தி², ந தம் இத⁴ அதி⁴ப்பேதம். இத⁴ பன நிருத³கம் அப்பப⁴க்க²ம் யோஜனஸதிககந்தாரம் அதி⁴ப்பேதம். ஏவரூபே கந்தாரே மக்³க³ம். படிபஜ்ஜேய்யுந்தி சா²தகப⁴யேன சேவ ரோக³ப⁴யேன ச ராஜப⁴யேன ச உபத்³து³தா படிபஜ்ஜேய்யும் ‘‘ஏதம் கந்தாரம் நித்த²ரித்வா த⁴ம்மிகஸ்ஸ ரஞ்ஞோ நிருபத்³த³வே ரட்டே² ஸுக²ம் வஸிஸ்ஸாமா’’தி மஞ்ஞமானா.

ஏகபுத்தகோதி உக்கி²பித்வா க³ஹிதோ அனுகம்பிதப்³ப³யுத்தோ அதி²ரஸரீரோ ஏகபுத்தகோ. வல்லூரஞ்ச ஸோண்டி³கஞ்சாதி க⁴னக⁴னட்டா²னதோ க³ஹேத்வா வல்லூரம், அட்டி²னிஸ்ஸிதஸிரானிஸ்ஸிதட்டா²னானி க³ஹேத்வா ஸூலமம்ஸஞ்சாதி அத்தோ². படிபிஸேய்யுந்தி பஹரேய்யும். கஹம் ஏகபுத்தகாதி அயம் தேஸம் பரிதே³வனாகாரோ.

அயம் பனேத்த² பூ⁴தமத்த²ம் கத்வா ஆதி³தோ பட்டா²ய ஸங்கே²பதோ அத்த²வண்ணனா – த்³வே கிர ஜாயம்பதிகா புத்தம் க³ஹேத்வா பரித்தேன பாதே²ய்யேன யோஜனஸதிகம் கந்தாரமக்³க³ம் படிபஜ்ஜிம்ஸு. தேஸம் பஞ்ஞாஸயோஜனானி க³ந்த்வா பாதே²ய்யம் நிட்டா²ஸி, தே கு²ப்பிபாஸாதுரா விரளச்சா²யாயம் நிஸீதி³ம்ஸு. ததோ புரிஸோ ப⁴ரியம் ஆஹ – ‘‘ப⁴த்³தே³ இதோ ஸமந்தா பஞ்ஞாஸயோஜனானி கா³மோ வா நிக³மோ வா நத்தி². தஸ்மா யம் தம் புரிஸேன காதப்³ப³ம் ப³ஹும்பி கஸிகோ³ரக்கா²தி³கம்மம், ந தா³னி ஸக்கா தம் மயா காதும், ஏஹி மம் மாரேத்வா உபட்³ட⁴மம்ஸம் கா²தி³த்வா உபட்³ட⁴ம் பாதே²ய்யம் கத்வா புத்தேன ஸத்³தி⁴ம் கந்தாரம் நித்த²ராஹீ’’தி. புன ஸாபி தம் ஆஹ – ‘‘ஸாமி மயா தா³னி யம் தம் இத்தி²யா காதப்³ப³ம் ப³ஹும்பி ஸுத்தகந்தனாதி³கம்மம், தம் காதும் ந ஸக்கா, ஏஹி மம் மாரேத்வா உபட்³ட⁴மம்ஸம் கா²தி³த்வா உபட்³ட⁴ம் பாதே²ய்யம் கத்வா புத்தேன ஸத்³தி⁴ம் கந்தாரம் நித்த²ராஹீ’’தி. புன ஸோபி தம் ஆஹ – ‘‘ப⁴த்³தே³ மாதுகா³மமரணேன த்³வின்னம் மரணம் பஞ்ஞாயதி. ந ஹி மந்தோ³ குமாரோ மாதரா வினா ஜீவிதும் ஸக்கோதி. யதி³ பன மயம் ஜீவாம. புன தா³ரகம் லபே⁴ய்யாம. ஹந்த³ தா³னி புத்தகம் மாரேத்வா, மம்ஸம் க³ஹேத்வா கந்தாரம் நித்த²ராமா’’தி. ததோ மாதா புத்தமாஹ – ‘‘தாத, பிதுஸந்திகம் க³ச்சா²’’தி, ஸோ அக³மாஸி. அத²ஸ்ஸ பிதா, ‘‘மயா ‘புத்தகம் போஸேஸ்ஸாமீ’தி கஸிகோ³ரக்கா²தீ³ஹி அனப்பகம் து³க்க²மனுபூ⁴தம், ந ஸக்கோமி அஹம் புத்தம் மாரேதும், த்வம்யேவ தவ புத்தம் மாரேஹீ’’தி வத்வா, ‘‘தாத மாதுஸந்திகம் க³ச்சா²’’தி ஆஹ. ஸோ அக³மாஸி. அத²ஸ்ஸ மாதாபி, ‘‘மயா புத்தம் பத்தே²ந்தியா கோ³வதகுக்குரவததே³வதாயாசனாதீ³ஹிபி தாவ அனப்பகம் து³க்க²மனுபூ⁴தம், கோ பன வாதோ³ குச்சி²னா பரிஹரந்தியா? ந ஸக்கோமி அஹம் புத்தம் மாரேது’’ந்தி வத்வா ‘‘தாத, பிதுஸந்திகமேவ க³ச்சா²’’தி ஆஹ. ஏவம் ஸோ த்³வின்னமந்தரா க³ச்ச²ந்தோயேவ மதோ. தே தம் தி³ஸ்வா பரிதே³வித்வா வுத்தனயேன மம்ஸானி க³ஹேத்வா கா²த³ந்தா பக்கமிம்ஸு.

தேஸம் ஸோ புத்தமம்ஸாஹாரோ நவஹி காரணேஹி படிகூலத்தா நேவ த³வாய ஹோதி, ந மதா³ய, ந மண்ட³னாய, ந விபூ⁴ஸனாய, கேவலம் கந்தாரனித்த²ரணத்தா²யேவ ஹோதி. கதமேஹி நவஹி காரணேஹி படிகூலோதி சே? ஸஜாதிமம்ஸதாய ஞாதிமம்ஸதாய புத்தமம்ஸதாய பியபுத்தமம்ஸதாய தருணமம்ஸதாய ஆமகமம்ஸதாய அபோ⁴க³மம்ஸதாய அலோணதாய அதூ⁴பிததாயாதி. ஏவஞ்ஹி தே நவஹி காரணேஹி படிகூலம் தம் புத்தமம்ஸம் கா²த³ந்தா ந ஸாரத்தா கி³த்³த⁴மானஸா ஹுத்வா கா²தி³ம்ஸு, மஜ்ஜ²த்தபா⁴வேயேவ பன நிச்ச²ந்த³ராக³பரிபோ⁴கே³ டி²தா கா²தி³ம்ஸு. ந அட்டி²ன்ஹாருசம்மனிஸ்ஸிதட்டா²னானி அபனேத்வா தூ²லதூ²லம் வரமம்ஸமேவ கா²தி³ம்ஸு, ஹத்த²ஸம்பத்தம் மம்ஸமேவ பன கா²தி³ம்ஸு. ந யாவத³த்த²ம் கண்ட²ப்பமாணம் கத்வா கா²தி³ம்ஸு, தோ²கம் தோ²கம் பன ஏகதி³வஸம் யாபனமத்தமேவ கா²தி³ம்ஸு. ந அஞ்ஞமஞ்ஞம் மச்ச²ராயந்தா கா²தி³ம்ஸு, விக³தமச்சே²ரமலேன பன பரிஸுத்³தே⁴னேவ சேதஸா கா²தி³ம்ஸு. ந அஞ்ஞம் கிஞ்சி மிக³மம்ஸம் வா மோரமம்ஸாதீ³னம் வா அஞ்ஞதரம் கா²தா³மாதி ஸம்மூள்ஹா கா²தி³ம்ஸு, பியபுத்தமம்ஸபா⁴வம் பன ஜானந்தாவ கா²தி³ம்ஸு. ந ‘‘அஹோ வத மயம் புனபி ஏவரூபம் புத்தமம்ஸம் கா²தே³ய்யாமா’’தி பத்த²னம் கத்வா கா²தி³ம்ஸு, பத்த²னம் பன வீதிவத்தாவ ஹுத்வா கா²தி³ம்ஸு. ந ‘‘ஏத்தகம் கந்தாரே கா²தி³த்வா அவஸிட்ட²ம் கந்தாரம் அதிக்கம்ம லோணம்பி³லாதீ³ஹி யோஜேத்வா கா²தி³ஸ்ஸாமா’’தி ஸன்னிதி⁴ம் அகம்ஸு, கந்தாரபரியோஸானே பன ‘‘புரே மஹாஜனோ பஸ்ஸதீ’’தி பூ⁴மியம் வா நிக²ணிம்ஸு, அக்³கி³னா வா ஜா²பயிம்ஸு. ந ‘‘கோசி அஞ்ஞோ அம்ஹே விய ஏவரூபம் புத்தமம்ஸம் கா²தி³தும் ந லப⁴தீ’’தி மானம் வா த³ப்பம் வா அகம்ஸு, நிஹதமானா பன நிஹதத³ப்பா ஹுத்வா கா²தி³ம்ஸு. ‘‘கிம் இமினா அலோணேன அனம்பி³லேன அதூ⁴பிதேன து³க்³க³ந்தே⁴னா’’தி ந ஹீளேத்வா கா²தி³ம்ஸு, ஹீளனம் பன வீதிவத்தா ஹுத்வா கா²தி³ம்ஸு. ந ‘‘துய்ஹம் பா⁴கோ³ மய்ஹம் பா⁴கோ³ தவ புத்தோ மம புத்தோ’’தி அஞ்ஞமஞ்ஞம் அதிமஞ்ஞிம்ஸு. ஸமக்³கா³ பன ஸம்மோத³மானா ஹுத்வா கா²தி³ம்ஸு. இமம் நேஸம் ஏவரூபம் நிச்ச²ந்த³ராகா³தி³பரிபோ⁴க³ம் ஸம்பஸ்ஸமானோ ஸத்தா² பி⁴க்கு²ஸங்க⁴ம்பி தம் காரணம் அனுஜானாபேந்தோ தம் கிம் மஞ்ஞத², பி⁴க்க²வே, அபி நு தே த³வாய வா ஆஹாரம் ஆஹாரேய்யுந்திஆதி³மாஹ. தத்த² த³வாய வாதிஆதீ³னி விஸுத்³தி⁴மக்³கே³ (விஸுத்³தி⁴. 1.18) வித்தா²ரிதானேவ. கந்தாரஸ்ஸாதி நித்திண்ணாவஸேஸஸ்ஸ கந்தாரஸ்ஸ.

ஏவமேவ கோ²தி நவன்னம் பாடிகுல்யானம் வஸேன பியபுத்தமம்ஸஸதி³ஸோ கத்வா த³ட்ட²ப்³போ³தி அத்தோ². கதமேஸம் நவன்னம்? க³மனபாடிகுல்யதாதீ³னம். க³மனபாடிகுல்யதம் பச்சவேக்க²ந்தோபி கப³ளீகாராஹாரம் பரிக்³க³ண்ஹாதி, பரியேஸனபாடிகுல்யதம் பச்சவேக்க²ந்தோபி, பரிபோ⁴க³னிதா⁴னஆஸயபரிபக்காபரிபக்கஸம்மக்க²ணனிஸ்ஸந்த³பாடிகுல்யதம் பச்சவேக்க²ந்தோபி, தானி பனேதானி க³மனபாடிகுல்யதாதீ³னி விஸுத்³தி⁴மக்³கே³ (விஸுத்³தி⁴. 1.294) ஆஹாரபாடிகுல்யதானித்³தே³ஸே வித்தா²ரிதானேவ. இதி இமேஸம் நவன்னம் பாடிகுல்யானம் வஸேன புத்தமம்ஸூபமம் கத்வா ஆஹாரோ பரிபு⁴ஞ்ஜிதப்³போ³.

யதா² தே ஜாயம்பதிகா பாடிகுல்யம் பியபுத்தமம்ஸம் கா²த³ந்தா ந ஸாரத்தா கி³த்³த⁴மானஸா ஹுத்வா கா²தி³ம்ஸு, மஜ்ஜ²த்தபா⁴வேயேவ நிச்ச²ந்த³ராக³பரிபோ⁴கே³ டி²தா கா²தி³ம்ஸு, ஏவம் நிச்ச²ந்த³ராக³பரிபோ⁴க³ம் கத்வா பரிபு⁴ஞ்ஜிதப்³போ³. யதா² ச தே ந அட்டி²ன்ஹாருசம்மனிஸ்ஸிதம் அபனேத்வா தூ²லதூ²லம் வரமம்ஸமேவ கா²தி³ம்ஸு, ஹத்த²ஸம்பத்தமேவ பன கா²தி³ம்ஸு, ஏவம் ஸுக்க²ப⁴த்தமந்த³ப்³யஞ்ஜனாதீ³னி பிட்டி²ஹத்தே²ன அபடிக்கி²பித்வா வட்டகேன விய குக்குடேன விய ச ஓதி⁴ம் அத³ஸ்ஸேத்வா ததோ ததோ ஸப்பிமம்ஸாதி³ஸம்ஸட்ட²வரபோ⁴ஜனம்யேவ விசினித்வா அபு⁴ஞ்ஜந்தேன ஸீஹேன விய ஸபதா³னம் பரிபு⁴ஞ்ஜிதப்³போ³.

யதா² ச தே ந யாவத³த்த²ம் கண்ட²ப்பமாணம் கா²தி³ம்ஸு, தோ²கம் தோ²கம் பன ஏகேகதி³வஸம் யாபனமத்தமேவ கா²தி³ம்ஸு, ஏவமேவ ஆஹரஹத்த²காதி³ப்³ராஹ்மணானம் அஞ்ஞதரேன விய யாவத³த்த²ம் உத³ராவதே³ஹகம் அபு⁴ஞ்ஜந்தேன சதுன்னம் பஞ்சன்னம் வா ஆலோபானம் ஓகாஸம் ட²பேத்வாவ த⁴ம்மஸேனாபதினா விய பரிபு⁴ஞ்ஜிதப்³போ³. ஸோ கிர பஞ்சசத்தாலீஸ வஸ்ஸானி திட்ட²மானோ ‘‘பச்சா²ப⁴த்தே அம்பி³லுக்³கா³ரஸமுட்டா²பகம் கத்வா ஏகதி³வஸம்பி ஆஹாரம் ந ஆஹாரேஸி’’ந்தி வத்வா ஸீஹனாத³ம் நத³ந்தோ இமம் கா³த²மாஹ –

‘‘சத்தாரோ பஞ்ச ஆலோபே, அபு⁴த்வா உத³கம் பிவே;

அலம் பா²ஸுவிஹாராய, பஹிதத்தஸ்ஸ பி⁴க்கு²னோ’’தி. (தே²ரகா³. 983);

யதா² ச தே ந அஞ்ஞமஞ்ஞம் மச்ச²ராயந்தா கா²தி³ம்ஸு, விக³தமலமச்சே²ரேன பன பரிஸுத்³தே⁴னேவ சேதஸா கா²தி³ம்ஸு, ஏவமேவ பிண்ட³பாதம் லபி⁴த்வா அமச்ச²ராயித்வா ‘‘இமம் ஸப்³ப³ம் க³ண்ஹந்தஸ்ஸ ஸப்³ப³ம் த³ஸ்ஸாமி, உபட்³ட⁴ம் க³ண்ஹந்தஸ்ஸ உபட்³ட⁴ம், ஸசே க³ஹிதாவஸேஸோ ப⁴விஸ்ஸதி, அத்தனா பரிபு⁴ஞ்ஜிஸ்ஸாமீ’’தி ஸாரணீயத⁴ம்மே டி²தேனேவ பரிபு⁴ஞ்ஜிதப்³போ³. யதா² ச தே ந ‘‘அஞ்ஞம் கிஞ்சி மயம் மிக³மம்ஸம் வா மோரமம்ஸாதீ³னம் வா அஞ்ஞதரம் கா²தா³மா’’தி ஸம்மூள்ஹா கா²தி³ம்ஸு, பியபுத்தமம்ஸபா⁴வம் பன ஜானந்தாவ கா²தி³ம்ஸு, ஏவமேவ பிண்ட³பாதம் லபி⁴த்வா ‘‘அஹம் கா²தா³மி பு⁴ஞ்ஜாமீ’’தி அத்தூபலத்³தி⁴ஸம்மோஹம் அனுப்பாதே³த்வா ‘‘கப³ளீகாராஹாரோ ந ஜானாதி ‘சாதுமஹாபூ⁴திககாயம் வட்³டே⁴மீ’தி, காயோபி ந ஜானாதி ‘கப³ளீகாராஹாரோ மம் வட்³டே⁴தீ’’’தி, ஏவம் ஸம்மோஹம் பஹாய பரிபு⁴ஞ்ஜிதப்³போ³. ஸதிஸம்பஜஞ்ஞவஸேனாபி சேஸ அஸம்மூள்ஹேனேவ ஹுத்வா பரிபு⁴ஞ்ஜிதப்³போ³.

யதா² ச தே ந ‘‘அஹோ வத மயம் புனபி ஏவரூபம் புத்தமம்ஸம் கா²தே³ய்யாமா’’தி பத்த²னம் கத்வா கா²தி³ம்ஸு, பத்த²னம் பன வீதிவத்தாவ ஹுத்வா கா²தி³ம்ஸு, ஏவமேவ பணீதபோ⁴ஜனம் லத்³தா⁴ ‘அஹோ வதாஹம் ஸ்வேபி புனதி³வஸேபி ஏவரூபம் லபே⁴ய்யம்’, லூக²ம் வா பன லத்³தா⁴ ‘‘ஹிய்யோ விய மே அஜ்ஜ பணீதபோ⁴ஜனம் ந லத்³த⁴’’ந்தி பத்த²னம் வா அனுஸோசனம் வா அகத்வா நித்தண்ஹேன –

‘‘அதீதம் நானுஸோசாமி, நப்பஜப்பாமினாக³தம்;

பச்சுப்பன்னேன யாபேமி, தேன வண்ணோ பஸீத³தீ’’தி. (ஜா. 2.22.90) –

இமம் ஓவாத³ம் அனுஸ்ஸரந்தேன ‘‘பச்சுப்பன்னேனேவ யாபேஸ்ஸாமீ’’தி பரிபு⁴ஞ்ஜிதப்³போ³.

யதா² ச தே ந ‘‘ஏத்தகம் கந்தாரே கா²தி³த்வா அவஸிட்ட²ம் கந்தாரம் அதிக்கம்ம லோணம்பி³லாதீ³ஹி யோஜேத்வா கா²தி³ஸ்ஸாமா’’தி ஸன்னிதி⁴ம் அகம்ஸு, கந்தாரபரியோஸானே பன ‘‘புரே மஹாஜனோ பஸ்ஸதீ’’தி பூ⁴மியம் வா நிக²ணிம்ஸு, அக்³கி³னா வா ஜா²பயிம்ஸு, ஏவமேவ –

‘‘அன்னானமதோ² பானானம்,

கா²த³னீயானம் அதோ²பி வத்தா²னம்;

லத்³தா⁴ ந ஸன்னிதி⁴ம் கயிரா,

ந ச பரித்தஸே தானி அலப⁴மானோ’’தி. (ஸு. நி. 930); –

இமம் ஓவாத³ம் அனுஸ்ஸரந்தேன சதூஸு பச்சயேஸு யம் யம் லப⁴தி, ததோ ததோ அத்தனோ யாபனமத்தம் க³ஹேத்வா, ஸேஸம் ஸப்³ரஹ்மசாரீனம் விஸ்ஸஜ்ஜேத்வா ஸன்னிதி⁴ம் பரிவஜ்ஜந்தேன பரிபு⁴ஞ்ஜிதப்³போ³. யதா² ச தே ந ‘‘கோசி அஞ்ஞோ அம்ஹே விய ஏவரூபம் புத்தமம்ஸம் கா²தி³தும் ந லப⁴தீ’’தி மானம் வா த³ப்பம் வா அகம்ஸு, நிஹதமானா பன நிஹதத³ப்பா ஹுத்வா கா²தி³ம்ஸு, ஏவமேவ பணீதபோ⁴ஜனம் லபி⁴த்வா ‘‘அஹமஸ்மி லாபீ⁴ சீவரபிண்ட³பாதாதீ³ன’’ந்தி ந மானோ வா த³ப்போ வா காதப்³போ³. ‘‘நாயம் பப்³ப³ஜ்ஜா சீவராதி³ஹேது, அரஹத்தஹேது பனாயம் பப்³ப³ஜ்ஜா’’தி பச்சவேக்கி²த்வா நிஹதமானத³ப்பேனேவ பரிபு⁴ஞ்ஜிதப்³போ³.

யதா² ச தே ‘‘கிம் இமினா அலோணேன அனம்பி³லேன அதூ⁴பிதேன து³க்³க³ந்தே⁴னா’’தி ஹீளேத்வா ந கா²தி³ம்ஸு, ஹீளனம் பன வீதிவத்தா ஹுத்வா கா²தி³ம்ஸு, ஏவமேவ பிண்ட³பாதம் லபி⁴த்வா ‘‘கிம் இமினா அஸ்ஸகோ³ணப⁴த்தஸதி³ஸேன லூகே²ன நிரஸேன, ஸுவானதோ³ணியம் தம் பக்கி²பதா²’’தி ஏவம் பிண்ட³பாதம் வா ‘‘கோ இமம் பு⁴ஞ்ஜிஸ்ஸதி, காகஸுனகா²தீ³னம் தே³ஹீ’’தி ஏவம் தா³யகம் வா அஹீளேந்தேன –

‘‘ஸ பத்தபாணி விசரந்தோ, அமூகோ³ மூக³ஸம்மதோ;

அப்பம் தா³னம் ந ஹீளேய்ய, தா³தாரம் நாவஜானியா’’தி. (ஸு. நி. 718); –

இமம் ஓவாத³ம் அனுஸ்ஸரந்தேன பரிபு⁴ஞ்ஜிதப்³போ³. யதா² ச தே ந ‘‘துய்ஹம் பா⁴கோ³, மய்ஹம் பா⁴கோ³, தவ புத்தோ மம புத்தோ’’தி அஞ்ஞமஞ்ஞம் அதிமஞ்ஞிம்ஸு, ஸமக்³கா³ பன, ஸம்மோத³மானா ஹுத்வா கா²தி³ம்ஸு, ஏவமேவம் பிண்ட³பாதம் லபி⁴த்வா யதா² ஏகச்சோ ‘‘கோ தும்ஹாதி³ஸானம் த³ஸ்ஸதி நிக்காரணா உம்மாரேஸு பக்க²லந்தானம் ஆஹிண்ட³ந்தானம் விஜாதமாதாபி வோ தா³தப்³ப³ம் ந மஞ்ஞதி, மயம் பன க³தக³தட்டா²னே பணீதானி சீவராதீ³னி லபா⁴மா’’தி ஸீலவந்தே ஸப்³ரஹ்மசாரீ அதிமஞ்ஞதி, யம் ஸந்தா⁴ய வுத்தம் –

‘‘ஸோ தேன லாப⁴ஸக்காரஸிலோகேன அபி⁴பூ⁴தோ பரியாதி³ண்ணசித்தோ அஞ்ஞே பேஸலே பி⁴க்கூ² அதிமஞ்ஞதி. தஞ்ஹி தஸ்ஸ, பி⁴க்க²வே, மோக⁴புரிஸஸ்ஸ ஹோதி தீ³க⁴ரத்தம் அஹிதாய து³க்கா²யா’’தி (ஸம். நி. 2.161).

ஏவம் கஞ்சி அனதிமஞ்ஞித்வா ஸப்³பே³ஹி ஸப்³ரஹ்மசாரீஹி ஸத்³தி⁴ம் ஸமக்³கே³ன ஸம்மோத³மானேன ஹுத்வா பரிபு⁴ஞ்ஜிதப்³ப³ம்.

பரிஞ்ஞாதேதி ஞாதபரிஞ்ஞா தீரணபரிஞ்ஞா பஹானபரிஞ்ஞாதி இமாஹி தீஹி பரிஞ்ஞாஹி பரிஞ்ஞாதே. கத²ம்? இத⁴ பி⁴க்கு² ‘‘கப³ளீகாராஹாரோ நாம அயம் ஸவத்து²கவஸேன ஓஜட்ட²மகரூபம் ஹோதி, ஓஜட்ட²மகரூபம் கத்த² படிஹஞ்ஞதி? ஜிவ்ஹாபஸாதே³, ஜிவ்ஹாபஸாதோ³ கின்னிஸ்ஸிதோ? சதுமஹாபூ⁴தனிஸ்ஸிதோ. இதி ஓஜட்ட²மகம் ஜிவ்ஹாபஸாதோ³ தஸ்ஸ பச்சயானி மஹாபூ⁴தானீதி இமே த⁴ம்மா ரூபக்க²ந்தோ⁴ நாம, தம் பரிக்³க³ண்ஹதோ உப்பன்னா ப²ஸ்ஸபஞ்சமகா த⁴ம்மா சத்தாரோ அரூபக்க²ந்தா⁴. இதி ஸப்³பே³பிமே பஞ்சக்க²ந்தா⁴ ஸங்கே²பதோ நாமரூபமத்தம் ஹோதீ’’தி பஜானாதி. ஸோ தே த⁴ம்மே ஸரஸலக்க²ணதோ வவத்த²பேத்வா தேஸம் பச்சயம் பரியேஸந்தோ அனுலோமபடிலோமம் படிச்சஸமுப்பாத³ம் பஸ்ஸதி. ஏத்தாவதானேன கப³ளீகாராஹாரமுகே²ன ஸப்பச்சயஸ்ஸ நாமரூபஸ்ஸ யாதா²வதோ தி³ட்ட²த்தா கப³ளீகாராஹாரோ ஞாதபரிஞ்ஞாய பரிஞ்ஞாதோ ஹோதி. ஸோ ததே³வ ஸப்பச்சயம் நாமரூபம் அனிச்சம் து³க்க²ம் அனத்தாதி தீணி லக்க²ணானி ஆரோபேத்வா ஸத்தன்னம் அனுபஸ்ஸனானம் வஸேன ஸம்மஸதி. ஏத்தாவதானேன ஸோ திலக்க²ணபடிவேத⁴ஸம்மஸனஞாணஸங்கா²தாய தீரணபரிஞ்ஞாய பரிஞ்ஞாதோ ஹோதி. தஸ்மிம்யேவ நாமரூபே ச²ந்த³ராகா³வகட்³ட⁴னேன அனாகா³மிமக்³கே³ன பரிஜானதா பஹானபரிஞ்ஞாய பரிஞ்ஞாதோ ஹோதீதி.

பஞ்சகாமகு³ணிகோதி பஞ்சகாமகு³ணஸம்ப⁴வோ ராகோ³ பரிஞ்ஞாதோ ஹோதி. ஏத்த² பன திஸ்ஸோ பரிஞ்ஞா ஏகபரிஞ்ஞா ஸப்³ப³பரிஞ்ஞா மூலபரிஞ்ஞாதி. கதமா ஏகபரிஞ்ஞா? யோ பி⁴க்கு² ஜிவ்ஹாத்³வாரே ஏகரஸதண்ஹம் பரிஜானாதி, தேன பஞ்சகாமகு³ணிகோ ராகோ³ பரிஞ்ஞாதோவ ஹோதீதி. கஸ்மா? தஸ்ஸாயேவ தத்த² உப்பஜ்ஜனதோ. ஸாயேவ ஹி தண்ஹா சக்கு²த்³வாரே உப்பன்னா ரூபராகோ³ நாம ஹோதி, ஸோதத்³வாராதீ³ஸு உப்பன்னா ஸத்³த³ராகா³த³யோ. இதி யதா² ஏகஸ்ஸேவ சோரஸ்ஸ பஞ்சமக்³கே³ ஹனதோ ஏகஸ்மிம் மக்³கே³ க³ஹேத்வா ஸீஸே சி²ன்னே பஞ்சபி மக்³கா³ கே²மா ஹோந்தி, ஏவம் ஜிவ்ஹாத்³வாரே ரஸதண்ஹாய பரிஞ்ஞாதாய பஞ்சகாமகு³ணிகோ ராகோ³ பரிஞ்ஞாதோ ஹோதீதி அயம் ஏகபரிஞ்ஞா நாம.

கதமா ஸப்³ப³பரிஞ்ஞா? பத்தே பக்கி²த்தபிண்ட³பாதஸ்மிஞ்ஹி ஏகஸ்மிம்யேவ பஞ்சகாமகு³ணிகராகோ³ லப்³ப⁴தி. கத²ம்? பரிஸுத்³த⁴ம் தாவஸ்ஸ வண்ணம் ஓலோகயதோ ரூபராகோ³ ஹோதி, உண்ஹே ஸப்பிம்ஹி தத்த² ஆஸிஞ்சந்தே படபடாதி ஸத்³தோ³ உட்ட²ஹதி, ததா²ரூபம் கா²த³னீயம் வா கா²த³ந்தஸ்ஸ முருமுரூதி ஸத்³தோ³ உப்பஜ்ஜதி, தம் அஸ்ஸாத³யதோ ஸத்³த³ராகோ³. ஜீரகாதி³வஸக³ந்த⁴ம் அஸ்ஸாதே³ந்தஸ்ஸ க³ந்த⁴ராகோ³, ஸாது³ரஸவஸேன ரஸராகோ³. முது³போ⁴ஜனம் ப²ஸ்ஸவந்தந்தி அஸ்ஸாத³யதோ போ²ட்ட²ப்³ப³ராகோ³. இதி இமஸ்மிம் ஆஹாரே ஸதிஸம்பஜஞ்ஞேன பரிக்³க³ஹேத்வா நிச்ச²ந்த³ராக³பரிபோ⁴கே³ன பரிபு⁴த்தே ஸப்³போ³பி ஸோ பரிஞ்ஞாதோ ஹோதீதி அயம் ஸப்³ப³பரிஞ்ஞா நாம.

கதமா மூலபரிஞ்ஞா? பஞ்சகாமகு³ணிகராக³ஸ்ஸ ஹி கப³ளீகாராஹாரோ மூலம். கஸ்மா? தஸ்மிம் ஸதி தஸ்ஸுப்பத்திதோ. ப்³ராஹ்மணதிஸ்ஸப⁴யே கிர த்³வாத³ஸ வஸ்ஸானி ஜாயம்பதிகானம் உபனிஜ்ஜா²னசித்தம் நாம நாஹோஸி. கஸ்மா? ஆஹாரமந்த³தாய. ப⁴யே பன வூபஸந்தே யோஜனஸதிகோ தம்ப³பண்ணிதீ³போ தா³ரகானம் ஜாதமங்க³லேஹி ஏகமங்க³லோ அஹோஸி. இதி மூலபூ⁴தே ஆஹாரே பரிஞ்ஞாதே பஞ்சகாமகு³ணிகோ ராகோ³ பரிஞ்ஞாதோவ ஹோதீதி அயம் மூலபரிஞ்ஞா நாம.

நத்தி² தம் ஸம்யோஜனந்தி தேன ராகே³ன ஸத்³தி⁴ம் பஹானேகட்ட²தாய பஹீனத்தா நத்தி². ஏவமயம் தே³ஸனா யாவ அனாகா³மிமக்³கா³ கதி²தா. ‘‘ஏத்தகேன பன மா வோஸானம் ஆபஜ்ஜிம்ஸூ’’தி ஏதேஸம்யேவ ரூபாதீ³னம் வஸேன பஞ்சஸு க²ந்தே⁴ஸு விபஸ்ஸனம் வட்³டே⁴த்வா யாவ அரஹத்தா கதே²தும் வட்டதீதி. பட²மாஹாரோ (நிட்டி²தோ).

து³தியே நிச்சம்மாதி கு²ரதோ பட்டா²ய யாவ ஸிங்க³மூலா ஸகலஸரீரதோ உத்³தா³லிதசம்மா கிம்ஸுகராஸிவண்ணா. கஸ்மா பன அஞ்ஞம் ஹத்தி²அஸ்ஸகோ³ணாதி³உபமம் அக³ஹேத்வா நிச்சம்மகா³வூபமா க³ஹிதாதி? திதிக்கி²தும் அஸமத்த²பா⁴வதீ³பனத்த²ம். மாதுகா³மோ ஹி உப்பன்னம் து³க்க²வேத³னம் திதிக்கி²தும் அதி⁴வாஸேதும் ந ஸக்கோதி, ஏவமேவ ப²ஸ்ஸாஹாரோ அப³லோ து³ப்³ப³லோதி த³ஸ்ஸனத்த²ம் ஸதி³ஸமேவ உபமம் ஆஹரி. குட்டந்தி ஸிலாகுட்டாதீ³னம் அஞ்ஞதரம். குட்டனிஸ்ஸிதா பாணா நாம உண்ணனாபி⁴ஸரபூ³மூஸிகாத³யோ. ருக்க²னிஸ்ஸிதாதி உச்சாலிங்க³பாணகாத³யோ. உத³கனிஸ்ஸிதாதி மச்ச²ஸும்ஸுமாராத³யோ. ஆகாஸனிஸ்ஸிதாதி ட³ம்ஸமகஸகாககுலலாத³யோ. கா²தே³ய்யுந்தி லுஞ்சித்வா கா²தே³ய்யும். ஸா தஸ்மிம் தஸ்மிம் டா²னே தம் தம்டா²னஸன்னிஸ்ஸயமூலிகம் பாணகா²த³னப⁴யம் ஸம்பஸ்ஸமானா நேவ அத்தனோ ஸக்காரஸம்மானம், ந பிட்டி²பரிகம்மஸரீரஸம்பா³ஹனஉண்ஹோத³கானி இச்ச²தி, ஏவமேவ பி⁴க்கு² ப²ஸ்ஸாஹாரமூலகம் கிலேஸபாணககா²த³னப⁴யம் ஸம்பஸ்ஸமானோ தேபூ⁴மகப²ஸ்ஸேன அனத்தி²கோ ஹோதி.

ப²ஸ்ஸே, பி⁴க்க²வே, ஆஹாரே பரிஞ்ஞாதேதி தீஹி பரிஞ்ஞாஹி பரிஞ்ஞாதே. இதா⁴பி திஸ்ஸோ பரிஞ்ஞா. தத்த² ‘‘ப²ஸ்ஸோ ஸங்கா²ரக்க²ந்தோ⁴, தம்ஸம்பயுத்தா வேத³னா வேத³னாக்க²ந்தோ⁴, ஸஞ்ஞா ஸஞ்ஞாக்க²ந்தோ⁴, சித்தம் விஞ்ஞாணக்க²ந்தோ⁴, தேஸம் வத்தா²ரம்மணானி ரூபக்க²ந்தோ⁴’’தி ஏவம் ஸப்பச்சயஸ்ஸ நாமரூபஸ்ஸ யாதா²வதோ த³ஸ்ஸனம் ஞாதபரிஞ்ஞா. தத்தே²வ திலக்க²ணம் ஆரோபேத்வா ஸத்தன்னம் அனுபஸ்ஸனானம் வஸேன அனிச்சாதி³தோ துலனம் தீரணபரிஞ்ஞா. தஸ்மிம்யேவ பன நாமரூபே ச²ந்த³ராக³னிக்கட்³ட⁴னோ அரஹத்தமக்³கோ³ பஹானபரிஞ்ஞா. திஸ்ஸோ வேத³னாதி ஏவம் ப²ஸ்ஸாஹாரே தீஹி பரிஞ்ஞாஹி பரிஞ்ஞாதே திஸ்ஸோ வேத³னா பரிஞ்ஞாதாவ ஹோந்தி தம்மூலகத்தா தம்ஸம்பயுத்தத்தா ச. இதி ப²ஸ்ஸாஹாரவஸேன தே³ஸனா யாவ அரஹத்தா கதி²தா. து³தியாஹாரோ.

ததியே அங்கா³ரகாஸூதி அங்கா³ரானம் காஸு. காஸூதி ராஸிபி வுச்சதி ஆவாடோபி.

‘‘அங்கா³ரகாஸும் அபரே பு²ணந்தி,

நரா ருத³ந்தா பரித³ட்³ட⁴க³த்தா;

ப⁴யஞ்ஹி மம் விந்த³தி ஸூத தி³ஸ்வா,

புச்சா²மி தம் மாதலி தே³வஸாரதீ²’’தி. (ஜா. 2.22.462); –

ஏத்த² ராஸி ‘‘காஸூ’’தி வுத்தோ.

‘‘கின்னு ஸந்தரமானோவ, காஸும் க²னஸி ஸாரதீ²’’தி? (ஜா. 2.22.3). –

ஏத்த² ஆவாடோ. இதா⁴பி அயமேவ அதி⁴ப்பேதோ. ஸாதி⁴கபோரிஸாதி அதிரேகபோரிஸா பஞ்சரதனப்பமாணா. வீதச்சிகானம் வீததூ⁴மானந்தி ஏதேனஸ்ஸ மஹாபரிளாஹதம் த³ஸ்ஸேதி. ஜாலாய வா ஹி தூ⁴மே வா ஸதி வாதோ ஸமுட்டா²தி, பரிளாஹோ மஹா ந ஹோதி, தத³பா⁴வே வாதாபா⁴வதோ பரிளாஹோ மஹா ஹோதி. ஆரகாவஸ்ஸாதி தூ³ரேயேவ ப⁴வேய்ய.

ஏவமேவ கோ²தி ஏத்த² இத³ம் ஓபம்மஸம்ஸந்த³னம் – அங்கா³ரகாஸு விய ஹி தேபூ⁴மகவட்டம் த³ட்ட²ப்³ப³ம். ஜீவிதுகாமோ புரிஸோ விய வட்டனிஸ்ஸிதோ பா³லபுது²ஜ்ஜனோ. த்³வே ப³லவந்தோ புரிஸா விய குஸலாகுஸலகம்மம். தேஸம் தம் புரிஸம் நானாபா³ஹாஸு க³ஹேத்வா அங்கா³ரகாஸும் உபகட்³ட⁴னகாலோ விய புது²ஜ்ஜனஸ்ஸ கம்மாயூஹனகாலோ. கம்மஞ்ஹி ஆயூஹியமானமேவ படிஸந்தி⁴ம் ஆகட்³ட⁴தி நாம. அங்கா³ரகாஸுனிதா³னம் து³க்க²ம் விய கம்மனிதா³னம் வட்டது³க்க²ம் வேதி³தப்³ப³ம்.

பரிஞ்ஞாதேதி தீஹி பரிஞ்ஞாஹி பரிஞ்ஞாதே. பரிஞ்ஞாயோஜனா பனேத்த² ப²ஸ்ஸே வுத்தனயேனேவ வேதி³தப்³பா³. திஸ்ஸோ தண்ஹாதி காமதண்ஹா ப⁴வதண்ஹா விப⁴வதண்ஹாதி இமா பரிஞ்ஞாதா ஹோந்தி. கஸ்மா? தண்ஹாமூலகத்தா மனோஸஞ்சேதனாய. ந ஹி ஹேதும்ஹி அப்பஹீனே ப²லம் பஹீயதி. இதி மனோஸஞ்சேதனாஹாரவஸேனபி யாவ அரஹத்தா தே³ஸனா கதி²தா. ததியாஹாரோ.

சதுத்தே² ஆகு³சாரிந்தி பாபசாரிம் தோ³ஸகாரகம். கத²ம் ஸோ புரிஸோதி ஸோ புரிஸோ கத²ம்பூ⁴தோ, கிம் யாபேதி, ந யாபேதீதி புச்ச²தி? ததே²வ தே³வ ஜீவதீதி யதா² புப்³பே³, இதா³னிபி ததே²வ ஜீவதி.

ஏவமேவ கோ²தி இதா⁴பி இத³ம் ஓபம்மஸம்ஸந்த³னம் – ராஜா விய ஹி கம்மம் த³ட்ட²ப்³ப³ம், ஆகு³சாரீ புரிஸோ விய வட்டஸன்னிஸ்ஸிதோ பா³லபுது²ஜ்ஜனோ, தீணி ஸத்திஸதானி விய படிஸந்தி⁴விஞ்ஞாணம், ஆகு³சாரிம் புரிஸம் ‘‘தீஹி ஸத்திஸதேஹி ஹனதா²’’தி ரஞ்ஞா ஆணத்தகாலோ விய கம்மரஞ்ஞா வட்டஸன்னிஸ்ஸிதபுது²ஜ்ஜனம் க³ஹேத்வா படிஸந்தி⁴யம் பக்கி²பனகாலோ. தத்த² கிஞ்சாபி தீணி ஸத்திஸதானி விய படிஸந்தி⁴விஞ்ஞாணம், ஸத்தீஸு பன து³க்க²ம் நத்தி², ஸத்தீஹி பஹடவணமூலகம் து³க்க²ம், ஏவமேவ படிஸந்தி⁴யம்பி து³க்க²ம் நத்தி², தி³ன்னாய பன படிஸந்தி⁴யா பவத்தே விபாகது³க்க²ம் ஸத்திபஹடவணமூலகம் து³க்க²ம் விய ஹோதி.

பரிஞ்ஞாதேதி தீஹேவ பரிஞ்ஞாஹி பரிஞ்ஞாதே. இதா⁴பி பரிஞ்ஞாயோஜனா ப²ஸ்ஸாஹாரே வுத்தனயேனேவ வேதி³தப்³பா³. நாமரூபந்தி விஞ்ஞாணபச்சயா நாமரூபம். விஞ்ஞாணஸ்மிஞ்ஹி பரிஞ்ஞாதே தம் பரிஞ்ஞாதமேவ ஹோதி தம்மூலகத்தா ஸஹுப்பன்னத்தா ச. இதி விஞ்ஞாணாஹாரவஸேனபி யாவ அரஹத்தா தே³ஸனா கதி²தாதி. சதுத்தா²ஹாரோ. ததியம்.

4. அத்தி²ராக³ஸுத்தவண்ணனா

64. சதுத்தே² ராகோ³திஆதீ³னி லோப⁴ஸ்ஸேவ நாமானி. ஸோ ஹி ரஞ்ஜனவஸேன ராகோ³, நந்த³னவஸேன நந்தீ³, தண்ஹாயனவஸேன தண்ஹாதி வுச்சதி. பதிட்டி²தம் தத்த² விஞ்ஞாணம் விரூள்ஹந்தி கம்மம் ஜவாபேத்வா படிஸந்தி⁴ஆகட்³ட⁴னஸமத்த²தாய பதிட்டி²தஞ்சேவ விரூள்ஹஞ்ச. யத்தா²தி தேபூ⁴மகவட்டே பு⁴ம்மம், ஸப்³ப³த்த² வா புரிமபுரிமபதே³ ஏதம் பு⁴ம்மம். அத்தி² தத்த² ஸங்கா²ரானம் வுத்³தீ⁴தி இத³ம் இமஸ்மிம் விபாகவட்டே டி²தஸ்ஸ ஆயதிவட்டஹேதுகே ஸங்கா²ரே ஸந்தா⁴ய வுத்தம். யத்த² அத்தி² ஆயதிம் புனப்³ப⁴வாபி⁴னிப்³ப³த்தீதி யஸ்மிம் டா²னே ஆயதிம் புனப்³ப⁴வாபி⁴னிப்³ப³த்தி அத்தி².

ஏவமேவ கோ²தி ஏத்த² இத³ம் ஓபம்மஸம்ஸந்த³னம் – ரஜகசித்தகாரா விய ஹி ஸஹகம்மஸம்பா⁴ரம் கம்மம், ப²லகபி⁴த்திது³ஸ்ஸபடா விய தேபூ⁴மகவட்டம். யதா² ரஜகசித்தகாரா பரிஸுத்³தே⁴ஸு ப²லகாதீ³ஸு ரூபம் ஸமுட்டா²பேந்தி, ஏவமேவ ஸஸம்பா⁴ரககம்மம் ப⁴வேஸு ரூபம் ஸமுட்டா²பேதி. தத்த² யதா² அகுஸலேன சித்தகாரேன ஸமுட்டா²பிதம் ரூபம் விரூபம் ஹோதி து³ஸ்ஸண்டி²தம் அமனாபம், ஏவமேவ ஏகச்சோ கம்மம் கரோந்தோ ஞாணவிப்பயுத்தேன சித்தேன கரோதி, தம் கம்மம் ரூபம் ஸமுட்டா²பேந்தம் சக்கா²தீ³னம் ஸம்பத்திம் அத³த்வா து³ப்³ப³ண்ணம் து³ஸ்ஸண்டி²தம் மாதாபிதூனம்பி அமனாபம் ரூபம் ஸமுட்டா²பேதி. யதா² பன குஸலேன சித்தகாரேன ஸமுட்டா²பிதம் ரூபம் ஸுரூபம் ஹோதி ஸுஸண்டி²தம் மனாபம், ஏவமேவ ஏகச்சோ கம்மம் கரோந்தோ ஞாணஸம்பயுத்தேன சித்தேன கரோதி, தம் கம்மம் ரூபம் ஸமுட்டா²பேந்தம் சக்கா²தீ³னம் ஸம்பத்திம் த³த்வா ஸுவண்ணம் ஸுஸண்டி²தம் அலங்கதபடியத்தம் விய ரூபம் ஸமுட்டா²பேதி.

ஏத்த² ச ஆஹாரம் விஞ்ஞாணேன ஸத்³தி⁴ம் ஸங்கி²பித்வா ஆஹாரனாமரூபானம் அந்தரே ஏகோ ஸந்தி⁴, விபாகவிதி⁴ம் நாமரூபேன ஸங்கி²பித்வா நாமரூபஸங்கா²ரானம் அந்தரே ஏகோ ஸந்தி⁴, ஸங்கா²ரானஞ்ச ஆயதிப⁴வஸ்ஸ ச அந்தரே ஏகோ ஸந்தீ⁴தி வேதி³தப்³போ³.

கூடாகா³ரந்தி ஏககண்ணிகம் கா³ஹாபேத்வா கதம் அகா³ரம். கூடாகா³ரஸாலாதி த்³வே கண்ணிகே க³ஹேத்வா கதஸாலா. ஏவமேவ கோ²தி ஏத்த² கீ²ணாஸவஸ்ஸ கம்மம் ஸூரியரஸ்மிஸமம் வேதி³தப்³ப³ம். ஸூரியரஸ்மி பன அத்தி², ஸா கேவலம் பதிட்டா²ய அபா⁴வேன அப்பதிட்டா² நாம ஜாதா, கீ²ணாஸவஸ்ஸ கம்மம் நத்தி²தாய ஏவ அப்பதிட்ட²ம். தஸ்ஸ ஹி காயாத³யோ அத்தி², தேஹி பன கதகம்மம் குஸலாகுஸலம் நாம ந ஹோதி, கிரியமத்தே ட²த்வா அவிபாகம் ஹோதி. ஏவமஸ்ஸ கம்மம் நத்தி²தாய ஏவ அப்பதிட்ட²ம் நாம ஜாதந்தி. சதுத்த²ம்.

5. நக³ரஸுத்தவண்ணனா

65. பஞ்சமே நாமரூபே கோ² ஸதி விஞ்ஞாணந்தி ஏத்த² ‘‘ஸங்கா²ரேஸு ஸதி விஞ்ஞாண’’ந்தி ச ‘‘அவிஜ்ஜாய ஸதி ஸங்கா²ரா’’தி ச வத்தப்³ப³ம் ப⁴வேய்ய, தது³ப⁴யம்பி ந வுத்தம். கஸ்மா? அவிஜ்ஜாஸங்கா²ரா ஹி ததியோ ப⁴வோ, தேஹி ஸத்³தி⁴ம் அயம் விபஸ்ஸனா ந க⁴டீயதி. மஹாபுரிஸோ ஹி பச்சுப்பன்னபஞ்சவோகாரவஸேன அபி⁴னிவிட்டோ²தி.

நனு ச அவிஜ்ஜாஸங்கா²ரேஸு அதி³ட்டே²ஸு ந ஸக்கா பு³த்³தே⁴ன ப⁴விதுந்தி. ஸச்சம் ந ஸக்கா, இமினா பன தே ப⁴வஉபாதா³னதண்ஹாவஸேன தி³ட்டா²வ. தஸ்மா யதா² நாம கோ³த⁴ம் அனுப³ந்த⁴ந்தோ புரிஸோ தம் கூபம் பவிட்ட²ம் தி³ஸ்வா ஓதரித்வா பவிட்ட²ட்டா²னம் க²ணித்வா கோ³த⁴ம் க³ஹேத்வா பக்கமேய்ய, ந பரபா⁴க³ம் க²னேய்ய, கஸ்மா? கஸ்ஸசி நத்தி²தாய. ஏவம் மஹாபுரிஸோபி கோ³த⁴ம் அனுப³ந்த⁴ந்தோ புரிஸோ விய போ³தி⁴பல்லங்கே நிஸின்னோ ஜராமரணதோ பட்டா²ய ‘‘இமஸ்ஸ அயம் பச்சயோ, இமஸ்ஸ அயம் பச்சயோ’’தி பரியேஸந்தோ யாவ நாமரூபத⁴ம்மானம் பச்சயம் தி³ஸ்வா தஸ்ஸபி பச்சயம் பரியேஸந்தோ விஞ்ஞாணமேவ அத்³த³ஸ. ததோ ‘‘ஏத்தகோ பஞ்சவோகாரப⁴வவஸேன ஸம்மஸனசாரோ’’தி விபஸ்ஸனம் படினிவத்தேஸி, பரதோ துச்ச²கூபஸ்ஸ அபி⁴ன்னட்டா²னம் விய அவிஜ்ஜாஸங்கா²ரத்³வயம் அத்தி², ததே³தம் ஹேட்டா² விபஸ்ஸனாய க³ஹிதத்தா பாடியேக்கம் ஸம்மஸனூபக³ம் ந ஹோதீதி ந அக்³க³ஹேஸி.

பச்சுதா³வத்ததீதி படினிவத்ததி. கதமம் பனேத்த² விஞ்ஞாணம் பச்சுதா³வத்ததீதி? படிஸந்தி⁴விஞ்ஞாணம்பி விபஸ்ஸனாவிஞ்ஞாணம்பி. தத்த² படிஸந்தி⁴விஞ்ஞாணம் பச்சயதோ படினிவத்ததி, விபஸ்ஸனாவிஞ்ஞாணம் ஆரம்மணதோ. உப⁴யம்பி நாமரூபம் நாதிக்கமதி, நாமரூபதோ பரம் ந க³ச்ச²தி. ஏத்தாவதா ஜாயேத² வாதிஆதீ³ஸு விஞ்ஞாணே நாமரூபஸ்ஸ பச்சயே ஹோந்தே, நாமரூபே விஞ்ஞாணஸ்ஸ பச்சயே ஹோந்தே, த்³வீஸுபி அஞ்ஞமஞ்ஞபச்சயேஸு ஹோந்தேஸு ஏத்தகேன ஜாயேத² வா உபபஜ்ஜேத² வா. இதோ ஹி பரம் கிமஞ்ஞம் ஜாயேத² வா உபபஜ்ஜேத² வா, நனு ஏததே³வ ஜாயதி ச உபபஜ்ஜதி சாதி?

ஏவம் ஸத்³தி⁴ம் அபராபரசுதிபடிஸந்தீ⁴ஹி பஞ்ச பதா³னி த³ஸ்ஸேத்வா புன தம் ஏத்தாவதாதி வுத்தமத்த²ம் நிய்யாதேந்தோ யதி³த³ம் நாமரூபபச்சயா விஞ்ஞாணம், விஞ்ஞாணபச்சயா நாமரூபந்தி வத்வா ததோ பரம் அனுலோமபச்சயாகாரவஸேன விஞ்ஞாணபச்சயா நாமரூபமூலகம் ஆயதிஜராமரணம் த³ஸ்ஸேதும் நாமரூபபச்சயா ஸளாயதனந்திஆதி³மாஹ.

அஞ்ஜஸந்தி மக்³க³ஸ்ஸேவ வேவசனம். உத்³தா⁴பவந்தந்தி ஆபதோ உக்³க³தத்தா உத்³தா⁴பந்தி லத்³த⁴வோஹாரேன பாகாரவத்து²னா ஸமன்னாக³தம். ரமணீயந்தி ஸமந்தா சதுன்னம் த்³வாரானம் அப்³ப⁴ந்தரே ச நானாப⁴ண்டா³னம் ஸம்பத்தியா ரமணீயம். மாபேஹீதி மஹாஜனம் பேஸேத்வா வாஸம் காரேஹி. மாபேய்யாதி வாஸம் காரேய்ய. காரேந்தோ ச பட²மம் அட்டா²ரஸ மனுஸ்ஸகோடியோ பேஸேத்வா ‘‘ஸம்புண்ண’’ந்தி புச்சி²த்வா ‘‘ந தாவ ஸம்புண்ண’’ந்தி வுத்தே அபரானி பஞ்சகுலானி பேஸேய்ய. புன புச்சி²த்வா ‘‘ந தாவ ஸம்புண்ண’’ந்தி வுத்தே அபரானி பஞ்சபஞ்ஞாஸகுலானி பேஸேய்ய. புன புச்சி²த்வா ‘‘ந தாவ ஸம்புண்ண’’ந்தி வுத்தே அபரானி திம்ஸ குலானி பேஸேய்ய. புன புச்சி²த்வா ‘‘ந தாவ ஸம்புண்ண’’ந்தி வுத்தே அபரம் குலஸஹஸ்ஸம் பேஸேய்ய. புன புச்சி²த்வா ‘‘ந தாவ ஸம்புண்ண’’ந்தி வுத்தே அபரானி ஏகாத³ஸனஹுதானி குலானி பேஸேய்ய. புன புச்சி²த்வா ‘‘ந தாவ ஸம்புண்ண’’ந்தி வுத்தே அபரானி சதுராஸீதிகுலஸஹஸ்ஸானி பேஸேய்ய. புன ‘‘ஸம்புண்ண’’ந்தி புச்சி²தே, ‘‘மஹாராஜ, கிம் வதே³ஸி? மஹந்தம் நக³ரம் அஸம்பா³த⁴ம், இமினா நயேன குலானி பேஸேத்வா ந ஸக்கா பூரேதும், பே⁴ரிம் பன சராபேத்வா ‘அம்ஹாகம் நக³ரம் இமாய ச இமாய ச ஸம்பத்தியா ஸம்பன்னம், யே தத்த² வஸிதுகாமா, யதா²ஸுக²ம் க³ச்ச²ந்து, இமஞ்சிமஞ்ச பரிஹாரம் லபி⁴ஸ்ஸந்தீ’தி நக³ரஸ்ஸ சேவ வண்ணம் லோகஸ்ஸ ச பரிஹாரலாப⁴ம் கோ⁴ஸாபேதா²’’தி வதே³ய்ய. ஸோ ஏவம் கரேய்ய. ததோ மனுஸ்ஸா நக³ரகு³ணஞ்சேவ பரிஹாரலாப⁴ஞ்ச ஸுத்வா ஸப்³ப³தி³ஸாஹி ஸமோஸரித்வா நக³ரம் பூரேய்யும். தம் அபரேன ஸமயேன இத்³த⁴ஞ்சேவ அஸ்ஸ பீ²தஞ்ச. தம் ஸந்தா⁴ய தத³ஸ்ஸ நக³ரம் அபரேன ஸமயேன இத்³த⁴ஞ்சேவ பீ²தஞ்சாதிஆதி³ வுத்தம்.

தத்த² இத்³த⁴ந்தி ஸமித்³த⁴ம் ஸுபி⁴க்க²ம். பீ²தந்தி ஸப்³ப³ஸம்பத்தீஹி புப்பி²தம். பா³ஹுஜஞ்ஞந்தி ப³ஹூஹி ஞாதப்³ப³ம், ப³ஹுஜனானம் ஹிதம் வா. ‘‘ப³ஹுஜன’’ந்திபி பாடோ². ஆகிண்ணமனுஸ்ஸந்தி மனுஸ்ஸேஹி ஆகிண்ணம் நிரந்தரம் பு²ட்ட²ம். வுட்³டி⁴வேபுல்லப்பத்தந்தி வுட்³டி⁴ப்பத்தஞ்சேவ வேபுல்லப்பத்தஞ்ச, ஸேட்ட²பா⁴வஞ்சேவ விபுலபா⁴வஞ்ச பத்தம், த³ஸஸஹஸ்ஸசக்கவாளே அக்³க³னக³ரம் ஜாதந்தி அத்தோ².

ஏவமேவ கோ²தி ஏத்த² இத³ம் ஓபம்மஸம்ஸந்த³னம் – அரஞ்ஞபவனே சரமானபுரிஸோ விய ஹி தீ³பங்கரபாத³மூலதோ பட்டா²ய பாரமியோ பூரயமானோ மஹாபுரிஸோ த³ட்ட²ப்³போ³, தஸ்ஸ புரிஸஸ்ஸ புப்³ப³கேஹி மனுஸ்ஸேஹி அனுயாதமக்³க³த³ஸ்ஸனம் விய மஹாஸத்தஸ்ஸ அனுபுப்³பே³ன போ³தி⁴பல்லங்கே நிஸின்னஸ்ஸ புப்³ப³பா⁴கே³ அட்ட²ங்கி³கஸ்ஸ விபஸ்ஸனாமக்³க³ஸ்ஸ த³ஸ்ஸனம், புரிஸஸ்ஸ தம் ஏகபதி³கமக்³க³ம் அனுக³ச்ச²தோ அபரபா⁴கே³ மஹாமக்³க³த³ஸ்ஸனம் விய மஹாஸத்தஸ்ஸ உபரிவிபஸ்ஸனாய சிண்ணந்தே லோகுத்தரமக்³க³த³ஸ்ஸனம், புரிஸஸ்ஸ தேனேவ மக்³கே³ன க³ச்ச²தோ புரதோ நக³ரத³ஸ்ஸனம் விய ததா²க³தஸ்ஸ நிப்³பா³னனக³ரத³ஸ்ஸனம், ப³ஹினக³ரம் பனேத்த² அஞ்ஞேன தி³ட்ட²ம், அஞ்ஞேன மனுஸ்ஸவாஸம் கதம், நிப்³பா³னனக³ரம் ஸத்தா² ஸயமேவ பஸ்ஸி, ஸயம் வாஸமகாஸி. தஸ்ஸ புரிஸஸ்ஸ சதுன்னம் த்³வாரானம் தி³ட்ட²காலோ விய ததா²க³தஸ்ஸ சதுன்னம் மக்³கா³னம் தி³ட்ட²காலோ, தஸ்ஸ சதூஹி த்³வாரேஹி நக³ரம் பவிட்ட²காலோ விய ததா²க³தஸ்ஸ சதூஹி மக்³கே³ஹி நிப்³பா³னம் பவிட்ட²காலோ, தஸ்ஸ நக³ரப்³ப⁴ந்தரே ப⁴ண்ட³வவத்தா²னகாலோ விய ததா²க³தஸ்ஸ பச்சவேக்க²ணஞாணேன பரோபண்ணாஸகுஸலத⁴ம்மவவத்தா²னகாலோ. நக³ரஸ்ஸ அகா³ரகரணத்த²ம் குலபரியேஸனகாலோ விய ஸத்து² ப²லஸமாபத்திதோ வுட்டா²ய வேனேய்யஸத்தே வோலோகனகாலோ, தேன புரிஸேன யாசிதஸ்ஸ ரஞ்ஞோ ஏகம் மஹாகுடும்பி³கம் தி³ட்ட²காலோ விய மஹாப்³ரஹ்முனா யாசிதஸ்ஸ ப⁴க³வதோ அஞ்ஞாஸிகோண்ட³ஞ்ஞத்தே²ரம் தி³ட்ட²காலோ, ரஞ்ஞோ மஹாகுடும்பி³கம் பக்கோஸாபேத்வா ‘‘நக³ரவாஸம் கரோஹீ’’தி பஹிதகாலோ விய ப⁴க³வதோ ஏகஸ்மிம் பச்சா²ப⁴த்தே அட்டா²ரஸயோஜனமக்³க³ம் க³ந்த்வா ஆஸாள்ஹிபுண்ணமதி³வஸே பா³ராணஸியம் இஸிபதனம் பவிஸித்வா தே²ரம் காயஸக்கி²ம் கத்வா த⁴ம்மம் தே³ஸிதகாலோ, மஹாகுடும்பி³கேன அட்டா²ரஸ புரிஸகோடியோ க³ஹேத்வா நக³ரம் அஜ்ஜா²வுட்ட²காலோ விய ததா²க³தேன த⁴ம்மசக்கே பவத்திதே தே²ரஸ்ஸ அட்டா²ரஸஹி ப்³ரஹ்மகோடீஹி ஸத்³தி⁴ம் ஸோதாபத்திப²லே பதிட்டி²தகாலோ, ஏவம் நிப்³பா³னனக³ரம் பட²மம் ஆவாஸிதம், ததோ ஸம்புண்ணம் நக³ரந்தி புச்சி²த்வா ந தாவாதி வுத்தே பஞ்ச குலானி ஆதி³ம் கத்வா யாவ சதுராஸீதிகுலஸஹஸ்ஸபேஸனம் விய ததா²க³தஸ்ஸ பஞ்சமதி³வஸதோ பட்டா²ய அனத்தலக்க²ணஸுத்தாதீ³னி தே³ஸேத்வா பஞ்சவக்³கி³யே ஆதி³ம் கத்வா யஸபமுகா² பஞ்சபண்ணாஸ குலபுத்தா, திம்ஸ ப⁴த்³த³வக்³கி³யா, ஸஹஸ்ஸபுராணஜடிலா, பி³ம்பி³ஸாரபமுகா²னி ஏகாத³ஸபுரிஸனஹுதானி, திரோகுட்டானுமோத³னே சதுராஸீதிஸஹஸ்ஸானீதி ஏத்தகஸ்ஸ ஜனஸ்ஸ அரியமக்³க³ம் ஓதாரேத்வா நிப்³பா³னனக³ரம் பேஸிதகாலோ, அத² தேன நயேன நக³ரே அபூரியமானே பே⁴ரிம் சராபேத்வா நக³ரஸ்ஸ வண்ணகோ⁴ஸனம் குலானம் பரிஹாரலாப⁴கோ⁴ஸனம் விய ச மாஸஸ்ஸ அட்ட² தி³வஸே தத்த² தத்த² நிஸீதி³த்வா த⁴ம்மகதி²கானம் நிப்³பா³னவண்ணஸ்ஸ சேவ நிப்³பா³னப்பத்தானம் ஜாதிகந்தாராதி³னித்த²ரணானிஸம்ஸஸ்ஸ ச கோ⁴ஸனம், ததோ ஸப்³ப³தி³ஸாஹி ஆக³ந்த்வா மனுஸ்ஸானம் நக³ரஸமோஸரணம் விய தத்த² தத்த² த⁴ம்மகத²ம் ஸுத்வா ததோ ததோ நிக்க²மித்வா பப்³ப³ஜ்ஜம் ஆதி³ம் கத்வா அனுலோமபடிபத³ம் படிபன்னானம் அபரிமாணானம் குலபுத்தானம் நிப்³பா³னஸமோஸரணம் த³ட்ட²ப்³ப³ம்.

புராணம் மக்³க³ந்தி அரியம் அட்ட²ங்கி³கம் மக்³க³ம். அயஞ்ஹி அரியமக்³கோ³ பவாரணஸுத்தே (ஸம். நி. 1.215) அவத்தமானகட்டே²ன ‘‘அனுப்பன்னமக்³கோ³’’தி வுத்தோ, இமஸ்மிம் ஸுத்தே அவளஞ்ஜனட்டே²ன ‘‘புராணமக்³கோ³’’தி. ப்³ரஹ்மசரியந்தி ஸிக்க²த்தயஸங்க³ஹம் ஸகலஸாஸனம். இத்³த⁴ந்தி ஜா²னஸ்ஸாதே³ன ஸமித்³த⁴ம் ஸுபி⁴க்க²ம். பீ²தந்தி அபி⁴ஞ்ஞாப⁴ரணேஹி புப்பி²தம். வித்தா²ரிகந்தி வித்தி²ண்ணம். பா³ஹுஜஞ்ஞந்தி ப³ஹுஜனவிஞ்ஞேய்யம். யாவ தே³வமனுஸ்ஸேஹி ஸுப்பகாஸிதந்தி யாவ த³ஸஸஹஸ்ஸசக்கவாளே தே³வமனுஸ்ஸேஹி பரிச்சே²தோ³ அத்தி², ஏதஸ்மிம் அந்தரே ஸுப்பகாஸிதம் ஸுதே³ஸிதம் ததா²க³தேனாதி. பஞ்சமம்.

6. ஸம்மஸஸுத்தவண்ணனா

66. ச²ட்டே² ஆமந்தேஸீதி கஸ்மா ஆமந்தேஸி? யஸ்மாஸ்ஸ ஸுகு²மா திலக்க²ணாஹதா த⁴ம்மதே³ஸனா உபட்டா²ஸி. தஸ்மிம் கிர ஜனபதே³ மனுஸ்ஸா ஸஹேதுகா பஞ்ஞவந்தோ. ஸினித்³தா⁴னி கிரேத்த² போ⁴ஜனானி, தானிஸேவதோ ஜனஸ்ஸ பஞ்ஞா வட்³ட⁴தி, தே க³ம்பீ⁴ரம் திலக்க²ணாஹதம் த⁴ம்மகத²ம் படிவிஜ்ஜி²தும் ஸமத்தா² ஹோந்தி. தேனேவ ப⁴க³வா தீ³க⁴மஜ்ஜி²மேஸு மஹாஸதிபட்டா²னானி (தீ³. நி. 2.372 ஆத³யோ) மஹானிதா³னம் (தீ³. நி. 2.95 ஆத³யோ), ஆனேஞ்ஜஸப்பாயம் (ம. நி. 3.66 ஆத³யோ), ஸம்யுத்தகே சூளனிதா³னாதி³ஸுத்தந்தி ஏவமாதீ³னி அஞ்ஞானி க³ம்பீ⁴ரானி ஸுத்தானி தத்தே²வ கதே²ஸி. ஸம்மஸத² நோதி ஸம்மஸத² நு. அந்தரம் ஸம்மஸந்தி அப்³ப⁴ந்தரம் பச்சயஸம்மஸனம். ந ஸோ பி⁴க்கு² ப⁴க³வதோ சித்தம் ஆராதே⁴ஸீதி பச்சயாகாரவஸேன ப்³யாகாராபேதுகாமஸ்ஸ ப⁴க³வதோ ததா² அப்³யாகரித்வா த்³வத்திம்ஸாகாரவஸேன ப்³யாகரோந்தோ அஜ்ஜா²ஸயம் க³ஹேதும் நாஸக்கி².

ஏதத³வோசாதி தே³ஸனா யதா²னுஸந்தி⁴ம் ந க³தா, தே³ஸனாய யதா²னுஸந்தி⁴க³மனத்த²ம் ஏதத³வோச. தேனஹானந்த³, ஸுணாதா²தி இத³ம் தேபிடகே பு³த்³த⁴வசனே அஸம்பி⁴ன்னபத³ம். அஞ்ஞத்த² ஹி ஏவம் வுத்தம் நாம நத்தி². உபதி⁴னிதா³னந்தி க²ந்து⁴பதி⁴னிதா³னம். க²ந்த⁴பஞ்சகஞ்ஹேத்த² உபதீ⁴தி அதி⁴ப்பேதம். உப்பஜ்ஜதீதி ஜாயதி. நிவிஸதீதி புனப்புனம் பவத்திவஸேன பதிட்ட²ஹதி.

யம் கோ² லோகே பியரூபம் ஸாதரூபந்தி யம் லோகஸ்மிம் பியஸபா⁴வஞ்சேவ மது⁴ரஸபா⁴வஞ்ச. சக்கு²ம் லோகேதிஆதீ³ஸு லோகஸ்மிஞ்ஹி சக்கா²தீ³ஸு மமத்தேன அபி⁴னிவிட்டா² ஸத்தா ஸம்பத்தியம் பதிட்டி²தா அத்தனோ சக்கு²ம் ஆதா³ஸாதீ³ஸு நிமித்தக்³க³ஹணானுஸாரேன விப்பஸன்னபஞ்சபஸாத³ம் ஸுவண்ணவிமானே உக்³கா⁴டிதமணிஸீஹபஞ்ஜரம் விய மஞ்ஞந்தி, ஸோதம் ரஜதபனாளிகம் விய பாமங்க³ஸுத்தம் விய ச மஞ்ஞந்தி, துங்க³னாஸாதி லத்³த⁴வோஹாரம் கா⁴னம் வட்டேத்வா ட²பிதஹரிதாலவட்டிம் விய மஞ்ஞந்தி, ஜிவ்ஹம் ரத்தகம்ப³லபடலம் விய முது³ஸினித்³த⁴மது⁴ரரஸத³ம் மஞ்ஞந்தி, காயம் ஸாலலட்டி²ம் விய ஸுவண்ணதோரணம் விய ச மஞ்ஞந்தி, மனம் அஞ்ஞேஸம் மனேன அஸதி³ஸம் உளாரம் மஞ்ஞந்தி.

நிச்சதோ அத்³த³க்கு²ந்தி நிச்சந்தி அத்³த³ஸம்ஸு. ஸேஸபதே³ஸுபி ஏஸேவ நயோ. ந பரிமுச்சிம்ஸு து³க்க²ஸ்மாதி ஸகலஸ்மாபி வட்டது³க்கா² ந பரிமுச்சிம்ஸு. த³க்கி²ஸ்ஸந்தீதி பஸ்ஸிஸ்ஸந்தி. ஆபானீயகம்ஸோதி ஸரகஸ்ஸ நாமம். யஸ்மா பனேத்த² ஆபம் பிவந்தி, தஸ்மா ‘‘ஆபானீயோ’’தி வுச்சதி. ஆபானீயோ ச ஸோ கம்ஸோ சாதி ஆபானீயகம்ஸோ. ஸுராமண்ட³ஸரகஸ்ஸேதம் நாமம். ‘‘வண்ணஸம்பன்னோ’’திஆதி³வசனதோ பன கம்ஸே டி²தபானமேவ ஏவம் வுத்தம். க⁴ம்மாபி⁴தத்தோதி க⁴ம்மேன அபி⁴தத்தோ. க⁴ம்மபரேதோதி க⁴ம்மேன பு²ட்டோ², அனுக³தோதி அத்தோ². பிவதோ ஹி கோ² தம் சா²தே³ஸ்ஸதீதி பிவந்தஸ்ஸ தம் பானீயம் வண்ணாதி³ஸம்பத்தியா ருச்சிஸ்ஸதி, ஸகலஸரீரம் வா ப²ரித்வா துட்டி²ம் உப்பாத³யமானம் ட²ஸ்ஸதி. அப்படிஸங்கா²தி அபச்சவேக்கி²த்வா.

ஏவமேவ கோ²தி ஏத்த² இத³ம் ஓபம்மஸம்ஸந்த³னம் – ஆபானீயகம்ஸோ விய ஹி லோகே பியரூபம் ஸாதரூபம் ஆரம்மணம் த³ட்ட²ப்³ப³ம், க⁴ம்மாபி⁴தத்தபுரிஸோ விய வட்டனிஸ்ஸிதோ புது²ஜ்ஜனோ, ஆபானீயகம்ஸேன நிமந்தனபுரிஸோ விய லோகே பியரூபேன ஸாதரூபேன ஆரம்மணேன நிமந்தகஜனோ, ஆபானீயகம்ஸே ஸம்பத்திஞ்ச ஆதீ³னவஞ்ச ஆரோசேந்தோ ஆபானகமனுஸ்ஸோ விய ஆசரியுபஜ்ஜா²யாதி³கோ கல்யாணமித்தோ. யதே²வ ஹி தஸ்ஸ புரிஸஸ்ஸ அபலோகிதமனுஸ்ஸோ ஆபானீயகம்ஸே கு³ணஞ்ச ஆதீ³னவஞ்ச ஆரோசேதி, ஏவமேவ ஆசரியோ வா உபஜ்ஜா²யோ வா பி⁴க்கு²னோ பஞ்சஸு காமகு³ணேஸு அஸ்ஸாத³ஞ்ச நிஸ்ஸரணஞ்ச கதே²தி.

தத்த² யதா² ஆபானீயகம்ஸம்ஹி கு³ணே ச ஆதீ³னவே ச ஆரோசிதே ஸோ புரிஸோ பியவண்ணாதி³ஸம்பதா³யமேவ ஸஞ்ஜாதவேகோ³ ‘‘ஸசே மரணம் ப⁴விஸ்ஸதி, பச்சா² ஜானிஸ்ஸாமீ’’தி ஸஹஸா அப்படிஸங்கா²ய தம் பிவித்வா மரணம் வா மரணமத்தம் வா து³க்க²ம் நிக³ச்ச²தி, ஏவமேவ, பி⁴க்கு², ‘‘பஞ்சஸு காமகு³ணேஸு த³ஸ்ஸனாதி³வஸேன உப்பன்னஸோமனஸ்ஸமத்தமேவ அஸ்ஸாதோ³, ஆதீ³னவோ பன தி³ட்ட²த⁴ம்மிகஸம்பராயிகோ ப³ஹு நானப்பகாரோ, அப்பஸ்ஸாதா³ காமா ப³ஹுது³க்கா² ப³ஹுபாயாஸா’’தி ஏவம் ஆசரியுபஜ்ஜா²யேஹி ஆனிஸம்ஸஞ்ச ஆதீ³னவஞ்ச கதே²த்வா – ‘‘ஸமணபடிபத³ம் படிபஜ்ஜ, இந்த்³ரியேஸு கு³த்தத்³வாரோ ப⁴வ போ⁴ஜனே மத்தஞ்ஞூ ஜாக³ரியம் அனுயுத்தோ’’தி ஏவம் ஓவதி³தோபி அஸ்ஸாத³ப³த்³த⁴சித்ததாய ‘‘ஸசே வுத்தப்பகாரோ ஆதீ³னவோ ப⁴விஸ்ஸதி, பச்சா² ஜானிஸ்ஸாமீ’’தி ஆசரியுபஜ்ஜா²யே அபஸாதே³த்வா உத்³தே³ஸபரிபுச்சா²தீ³னி சேவ வத்தபடிபத்திஞ்ச பஹாய லோகாமிஸகத²ம் கதே²ந்தோ காமே பரிபு⁴ஞ்ஜிதுகாமதாய ஸிக்க²ம் பச்சக்கா²ய ஹீனாயாவத்ததி. ததோ து³ச்சரிதானி பூரேந்தோ ஸந்தி⁴ச்சே²த³னாதி³காலே ‘‘சோரோ அய’’ந்தி க³ஹேத்வா ரஞ்ஞோ த³ஸ்ஸிதோ இதே⁴வ ஹத்த²பாதா³தி³சே²த³னம் பத்வா ஸம்பராயே சதூஸு அபாயேஸு மஹாது³க்க²ம் அனுபோ⁴தி.

பானீயேன வா வினேதுந்தி ஸீதேன வாரினா ஹரிதும். த³தி⁴மண்ட³கேனாதி த³தி⁴மண்ட³னமத்தேன. ப⁴ட்ட²லோணிகாயாதி ஸலோணேன ஸத்துபானீயேன. லோணஸோவீரகேனாதி ஸப்³ப³த⁴ஞ்ஞப²லகளீராதீ³னி பக்கி²பித்வா லோணஸோவீரகம் நாம கரோந்தி, தேன.

ஓபம்மஸம்ஸந்த³னம் பனேத்த² – க⁴ம்மாபி⁴தத்தபுரிஸோ விய வட்டஸன்னிஸ்ஸிதகாலே யோகா³வசரோ த³ட்ட²ப்³போ³, தஸ்ஸ புரிஸஸ்ஸ படிஸங்கா² ஆபானீயகம்ஸம் பஹாய பானீயாதீ³ஹி பிபாஸஸ்ஸ வினோத³னம் விய பி⁴க்கு²னோ ஆசரியுபஜ்ஜா²யானம் ஓவாதே³ ட²த்வா ச²த்³வாராதீ³னி பரிக்³க³ஹேத்வா அனுக்கமேன விபஸ்ஸனம் வட்³டே⁴ந்தஸ்ஸ அரஹத்தப²லாதி⁴க³மோ, பானீயாதீ³னி சத்தாரி பானானி விய ஹி சத்தாரோ மக்³கா³, தேஸு அஞ்ஞதரம் பிவித்வா ஸுராபிபாஸிதம் வினோதே³த்வா ஸுகி²னோ யேன காமம் க³மனம் விய கீ²ணாஸவஸ்ஸ சதுமக்³க³பானம் பிவித்வா தண்ஹம் வினோதே³த்வா அக³தபுப்³ப³ம் நிப்³பா³னதி³ஸம் க³மனகாலோ வேதி³தப்³போ³. ச²ட்ட²ம்.

7. நளகலாபீஸுத்தவண்ணனா

67. ஸத்தமே கின்னு கோ², ஆவுஸோதி கஸ்மா புச்ச²தி? ‘‘ஏவம் புட்டோ² கத²ம் நு கோ² ப்³யாகரேய்யா’’தி. தே²ரஸ்ஸ அஜ்ஜா²ஸயஜானனத்த²ம். அபிச அதீதே த்³வே அக்³க³ஸாவகா இமம் பஞ்ஹம் வினிச்ச²யிம்ஸூதி அனாக³தே பி⁴க்கூ² ஜானிஸ்ஸந்தீதிபி புச்ச²தி. இதா³னேவ கோ² மயந்தி இத³ம் தே²ரோ யஸ்ஸ நாமரூபஸ்ஸ விஞ்ஞாணம் பச்சயோதி வுத்தம், ததே³வ நாமரூபம் விஞ்ஞாணஸ்ஸ பச்சயோதி வுத்தத்தா ஆஹ. நளகலாபியோதி இத⁴ பன அயகலாபாதி³வஸேன உபமம் அனாஹரித்வா விஞ்ஞாணனாமரூபானம் அப³லது³ப்³ப³லபா⁴வத³ஸ்ஸனத்த²ம் அயம் உபமா ஆப⁴தா.

நிரோதோ⁴ ஹோதீதி ஏத்தகே டா²னே பச்சயுப்பன்னபஞ்சவோகாரப⁴வவஸேன தே³ஸனா கதி²தா. ச²த்திம்ஸாய வத்தூ²ஹீதி ஹேட்டா² விஸ்ஸஜ்ஜிதேஸு த்³வாத³ஸஸு பதே³ஸு ஏகேகஸ்மிம் திண்ணம் திண்ணம் வஸேன ச²த்திம்ஸாய காரணேஹி. ஏத்த² ச பட²மோ த⁴ம்மகதி²ககு³ணோ, து³தியா படிபத்தி, ததியம் படிபத்திப²லம். தத்த² பட²மனயேன தே³ஸனாஸம்பத்தி கதி²தா, து³தியேன ஸேக்க²பூ⁴மி, ததியேன அஸேக்க²பூ⁴மீதி. ஸத்தமம்.

8. கோஸம்பி³ஸுத்தவண்ணனா

68. அட்ட²மே அஞ்ஞத்ரேவாதி ஏகச்சோ ஹி பரஸ்ஸ ஸத்³த³ஹித்வா யம் ஏஸ ப⁴ணதி, தம் பூ⁴தந்தி க³ண்ஹாதி. அபரஸ்ஸ நிஸீதி³த்வா சிந்தேந்தஸ்ஸ யம் காரணம் ருச்சதி, ஸோ ‘‘அத்தி² ஏத’’ந்தி ருசியா க³ண்ஹாதி. ஏகோ ‘‘சிரகாலதோ பட்டா²ய ஏவம் அனுஸ்ஸவோ அத்தி², பூ⁴தமேத’’ந்தி அனுஸ்ஸவேன க³ண்ஹாதி. அஞ்ஞஸ்ஸ விதக்கயதோ ஏகம் காரணம் உபட்டா²தி, ஸோ ‘‘அத்தே²த’’ந்தி ஆகாரபரிவிதக்கேன க³ண்ஹாதி. அபரஸ்ஸ சிந்தயதோ ஏகா தி³ட்டி² உப்பஜ்ஜதி, யாயஸ்ஸ தம் காரணம் நிஜ்ஜா²யந்தஸ்ஸ க²மதி, ஸோ ‘‘அத்தே²த’’ந்தி தி³ட்டி²னிஜ்ஜா²னக்க²ந்தியா க³ண்ஹாதி. தே²ரோ பன பஞ்சபி ஏதானி காரணானி படிக்கி²பித்வா பச்சக்க²ஞாணேன படிவித்³த⁴பா⁴வம் புச்ச²ந்தோ அஞ்ஞத்ரேவ, ஆவுஸோ முஸில, ஸத்³தா⁴யாதிஆதி³மாஹ. தத்த² அஞ்ஞத்ரேவாதி ஸத்³தா⁴தீ³னி காரணானி ட²பேத்வா, வினா ஏதேஹி காரணேஹீதி அத்தோ². ப⁴வனிரோதோ⁴ நிப்³பா³னந்தி பஞ்சக்க²ந்த⁴னிரோதோ⁴ நிப்³பா³னம்.

துண்ஹீ அஹோஸீதி தே²ரோ கீ²ணாஸவோ, அஹம் பன கீ²ணாஸவோதி வா ந வாதி வா அவத்வா துண்ஹீயேவ அஹோஸி. ஆயஸ்மா நாரதோ³ ஆயஸ்மந்தம் பவிட்ட²ம் ஏதத³வோசாதி கஸ்மா அவோச? ஸோ கிர சிந்தேஸி – ‘‘ப⁴வனிரோதோ⁴ நிப்³பா³னம் நாமாதி ஸேகே²ஹிபி ஜானிதப்³போ³ பஞ்ஹோ ஏஸ, அயம் பன தே²ரோ இமம் தே²ரம் அஸேக²பூ⁴மியா காரேதி, இமம் டா²னம் ஜானாபேஸ்ஸாமீ’’தி ஏதம் அவோச.

ஸம்மப்பஞ்ஞாய ஸுதி³ட்ட²ந்தி ஸஹ விபஸ்ஸனாய மக்³க³பஞ்ஞாய ஸுட்டு² தி³ட்ட²ம். ந சம்ஹி அரஹந்தி அனாகா³மிமக்³கே³ டி²தத்தா அரஹம் ந ஹோமீதி தீ³பேதி. யம் பனஸ்ஸ இதா³னி ‘‘ப⁴வனிரோதோ⁴ நிப்³பா³ன’’ந்தி ஞாணம், தம் ஏகூனவீஸதியா பச்சவேக்க²ணஞாணேஹி விமுத்தம் பச்சவேக்க²ணஞாணம். உத³பானோதி வீஸதிம்ஸஹத்த²க³ம்பீ⁴ரோ பானீயகூபோ. உத³கவாரகோதி உத³கஉஸ்ஸிஞ்சனவாரகோ. உத³கந்தி ஹி கோ² ஞாணம் அஸ்ஸாதி தீரே டி²தஸ்ஸ ஓலோகயதோ ஏவம் ஞாணம் ப⁴வேய்ய. ந ச காயேன பு²ஸித்வாதி உத³கம் பன நீஹரித்வா காயேன பு²ஸித்வா விஹரிதும் ந ஸக்குணேய்ய. உத³பானே உத³கத³ஸ்ஸனம் விய ஹி அனாகா³மினோ நிப்³பா³னத³ஸ்ஸனம், க⁴ம்மாபி⁴தத்தபுரிஸோ விய அனாகா³மீ, உத³கவாரகோ விய அரஹத்தமக்³கோ³, யதா² க⁴ம்மாபி⁴தத்தபுரிஸோ உத³பானே உத³கம் பஸ்ஸதி. ஏவம் அனாகா³மீ பச்சவேக்க²ணஞாணேன ‘‘உபரி அரஹத்தப²லஸமயோ நாம அத்தீ²’’தி ஜானாதி. யதா² பன ஸோ புரிஸோ உத³கவாரகஸ்ஸ நத்தி²தாய உத³கம் நீஹரித்வா காயேன பு²ஸிதும் ந லப⁴தி, ஏவம் அனாகா³மீ அரஹத்தமக்³க³ஸ்ஸ நத்தி²தாய நிப்³பா³னம் ஆரம்மணம் கத்வா அரஹத்தப²லஸமாபத்திம் அப்பேத்வா நிஸீதி³தும் ந லப⁴தி. அட்ட²மம்.

9. உபயந்திஸுத்தவண்ணனா

69. நவமே உபயந்தோதி உத³கவட்³ட⁴னஸமயே உபரி க³ச்ச²ந்தோ. மஹானதி³யோதி க³ங்கா³யமுனாதி³கா மஹாஸரிதாயோ. உபயாபேதீதி உபரி யாபேதி, வட்³டே⁴தி பூரேதீதி அத்தோ². அவிஜ்ஜா உபயந்தீதி அவிஜ்ஜா உபரி க³ச்ச²ந்தீ ஸங்கா²ரானம் பச்சயோ ப⁴விதும் ஸக்குணந்தீ. ஸங்கா²ரே உபயாபேதீதி ஸங்கா²ரே உபரி யாபேதி வட்³டே⁴தி. ஏவம் ஸப்³ப³பதே³ஸு அத்தோ² வேதி³தப்³போ³. அபயந்தோதி அபக³ச்ச²ந்தோ ஓஸரந்தோ. அவிஜ்ஜா அபயந்தீதி அவிஜ்ஜா அபக³ச்ச²மானா ஓஸரமானா உபரி ஸங்கா²ரானம் பச்சயோ ப⁴விதும் ந ஸக்குணந்தீதி அத்தோ². ஸங்கா²ரே அபயாபேதீதி ஸங்கா²ரே அபக³ச்சா²பேதி. ஏஸ நயோ ஸப்³ப³பதே³ஸு. நவமம்.

10. ஸுஸிமஸுத்தவண்ணனா

70. த³ஸமே க³ருகதோதி ஸப்³பே³ஹி தே³வமனுஸ்ஸேஹி பாஸாணச்ச²த்தம் விய சித்தேன க³ருகதோ. மானிதோதி மனேன பியாயிதோ. பூஜிதோதி சதுபச்சயபூஜாய பூஜிதோ. அபசிதோதி நீசவுத்திகரணேன அபசிதோ. ஸத்தா²ரஞ்ஹி தி³ஸ்வா மனுஸ்ஸா ஹத்தி²க்க²ந்தா⁴தீ³ஹி ஓதரந்தி மக்³க³ம் தே³ந்தி, அம்ஸகூடதோ ஸாடகம் அபனேந்தி, ஆஸனதோ வுட்ட²ஹந்தி வந்த³ந்தி. ஏவம் ஸோ தேஹி அபசிதோ நாம ஹோதி. ஸுஸிமோதி ஏவம்னாமகோ வேத³ங்கே³ஸு குஸலோ பண்டி³தபரிப்³பா³ஜகோ. ஏஹி த்வந்தி தேஸம் கிர ஏதத³ஹோஸி – ‘‘ஸமணோ கோ³தமோ ந ஜாதிகோ³த்தாதீ³னி ஆக³ம்ம லாப⁴க்³க³ப்பத்தோ ஜாதோ, கவிஸேட்டோ² பனேஸ உத்தமகவிதாய ஸாவகானம் க³ந்த²ம் ப³ந்தி⁴த்வா தே³தி, தம் தே உக்³க³ண்ஹித்வா உபட்டா²கானம் உபனிஸின்னகத²ம்பி அனுமோத³னம்பி ஸரப⁴ஞ்ஞம்பீதி ஏவமாதீ³னி கதே²ந்தி, தே தேஸம் பஸன்னா லாப⁴ம் உபஸம்ஹரந்தி. ஸசே மயம் யம் ஸமணோ கோ³தமோ ஜானாதி, ததோ தோ²கம் ஜானேய்யாம, அத்தனோ ஸமயம் தத்த² பக்கி²பித்வா மயம்பி உபட்டா²கானம் கதே²ய்யாம, ததோ ஏதேஹி லாபி⁴தரா ப⁴வேய்யாம. கோ நு கோ² ஸமணஸ்ஸ கோ³தமஸ்ஸ ஸந்திகே பப்³ப³ஜித்வா கி²ப்பமேவ உக்³க³ண்ஹிதும் ஸக்கி²ஸ்ஸதீ’’தி. தே ஏவம் சிந்தேத்வா ‘‘ஸுஸிமோ படிப³லோ’’தி தி³ஸ்வா தம் உபஸங்கமித்வா ஏவமாஹம்ஸு.

யேனாயஸ்மா ஆனந்தோ³ தேனுபஸங்கமீதி கஸ்மா உபஸங்கமி? ஏவம் கிரஸ்ஸ அஹோஸி, ‘‘கஸ்ஸ நு கோ² ஸந்திகம் க³ந்த்வா அஹம் இமம் த⁴ம்மம் கி²ப்பம் லத்³து⁴ம் ஸக்கி²ஸ்ஸாமீ’’தி? ததோ சிந்தேஸி – ‘‘ஸமணோ கோ³தமோ க³ரு தேஜுஸ்ஸதோ³ நியமமனுயுத்தோ, ந ஸக்கா அகாலே உபஸங்கமிதும், அஞ்ஞேபி ப³ஹூ க²த்தியாத³யோ ஸமணம் கோ³தமம் உபஸங்கமந்தி, தஸ்மிம்பி ஸமயே ந ஸக்கா உபஸங்கமிதும். ஸாவகேஸுபிஸ்ஸ ஸாரிபுத்தோ மஹாபஞ்ஞோ விபஸ்ஸனாலக்க²ணம்ஹி ஏதத³க்³கே³ ட²பிதோ, மஹாமோக்³க³ல்லானோ ஸமாதி⁴லக்க²ணஸ்மிம் ஏதத³க்³கே³ ட²பிதோ, மஹாகஸ்ஸபோ து⁴தங்க³த⁴ரேஸு அனுருத்³தோ⁴ தி³ப்³ப³சக்கு²கேஸு, புண்ணோ மந்தாணிபுத்தோ த⁴ம்மகதி²கேஸு, உபாலித்தே²ரோ வினயத⁴ரேஸு ஏதத³க்³கே³ ட²பிதோ, அயம் பன ஆனந்தோ³ ப³ஹுஸ்ஸுதோ திபிடகத⁴ரோ, ஸத்தா²பிஸ்ஸ தத்த² தத்த² கதி²தம் த⁴ம்மம் ஆஹரித்வா கதே²தி, பஞ்சஸு டா²னேஸு ஏதத³க்³கே³ ட²பிதோ, அட்ட²ன்னம் வரானம் லாபீ⁴, சதூஹி அச்ச²ரியப்³பு⁴தத⁴ம்மேஹி ஸமன்னாக³தோ, தஸ்ஸ ஸமீபம் க³தோ கி²ப்பம் த⁴ம்மம் லத்³து⁴ம் ஸக்கி²ஸ்ஸாமீ’’தி. தஸ்மா யேனாயஸ்மா ஆனந்தோ³ தேனுபஸங்கமி.

யேன ப⁴க³வா தேனுபஸங்கமீதி கஸ்மா ஸயம் அபப்³பா³ஜேத்வா உபஸங்கமி? ஏவம் கிரஸ்ஸ அஹோஸி – ‘‘அயம் தித்தி²யஸமயே பாடியேக்கோ ‘அஹம் ஸத்தா²’தி படிஜானந்தோ சரதி, பப்³ப³ஜித்வா ஸாஸனஸ்ஸ அலாபா⁴யபி பரிஸக்கேய்ய. ந கோ² பனஸ்ஸாஹம் அஜ்ஜா²ஸயம் ஆஜானாமி, ஸத்தா² ஜானிஸ்ஸதீ’’தி. தஸ்மா தம் ஆதா³ய யேன ப⁴க³வா தேனுபஸங்கமி. தேனஹானந்த³, ஸுஸிமம் பப்³பா³ஜேதா²தி ஸத்தா² கிர சிந்தேஸி – ‘‘அயம் பரிப்³பா³ஜகோ தித்தி²யஸமயே ‘அஹம் பாடியேக்கோ ஸத்தா²’தி படிஜானமானோ சரதி, ‘இத⁴ மக்³க³ப்³ரஹ்மசரியம் சரிதும் இச்சா²மீ’தி கிர வத³தி. கிம் நு கோ² மயி பஸன்னோ, உதா³ஹு மய்ஹம் ஸாவகேஸு, உதா³ஹு மய்ஹம் வா மம ஸாவகானம் வா த⁴ம்மகதா²ய பஸன்னோ’’தி? அத²ஸ்ஸ ஏகட்டா²னேபி பஸாதா³பா⁴வம் ஞத்வா, ‘‘அயம் மம ஸாஸனே த⁴ம்மம் தே²னேஸ்ஸாமீதி பப்³ப³ஜதி. இதிஸ்ஸ ஆக³மனம் அபரிஸுத்³த⁴ம்; நிப்ப²த்தி நு கோ² கீதி³ஸா’’தி? ஓலோகேந்தோ ‘‘கிஞ்சாபி ‘த⁴ம்மம் தே²னேஸ்ஸாமீ’தி பப்³ப³ஜதி, கதிபாஹேனேவ பன க⁴டேத்வா அரஹத்தம் க³ண்ஹிஸ்ஸதீ’’தி ஞத்வா ‘‘தேனஹானந்த³, ஸுஸிமம் பப்³பா³ஜேதா²’’தி ஆஹ.

அஞ்ஞா ப்³யாகதா ஹோதீதி தே கிர பி⁴க்கூ² ஸத்து² ஸந்திகே கம்மட்டா²னம் க³ஹேத்வா தேமாஸம் வஸ்ஸம் வஸந்தா தஸ்மிம்யேவ அந்தோதேமாஸே க⁴டேந்தா வாயமந்தா அரஹத்தம் படிலபி⁴ம்ஸு. தே ‘‘படிலத்³த⁴கு³ணம் ஸத்து² ஆரோசேஸ்ஸாமா’’தி பவாரிதபவாரணா ஸேனாஸனம் ஸம்ஸாமேத்வா ஸத்து² ஸந்திகம் ஆக³ந்த்வா அத்தனோ படிலத்³த⁴கு³ணம் ஆரோசேஸும். தம் ஸந்தா⁴யேதம் வுத்தம். அஞ்ஞாதி அரஹத்தஸ்ஸ நாமம். ப்³யாகதாதி ஆரோசிதா. அஸ்ஸோஸீதி ஸோ கிர ஓஹிதஸோதோ ஹுத்வா தேஸம் தேஸம் பி⁴க்கூ²னம் டி²தட்டா²னம் க³ச்ச²தி தம் தம் கத²ம் ஸுணிதுகாமோ. யேன தே பி⁴க்கூ² தேனுபஸங்கமீதி கஸ்மா உபஸங்கமி? தம் கிரஸ்ஸ பவத்திம் ஸுத்வா ஏதத³ஹோஸி – ‘‘அஞ்ஞா நாம இமஸ்மிம் ஸாஸனே பரமப்பமாணம் ஸாரபூ⁴தா ஆசரியமுட்டி² மஞ்ஞே ப⁴விஸ்ஸதி, புச்சி²த்வா நம் ஜானிஸ்ஸாமீ’’தி. தஸ்மா உபஸங்கமி.

அனேகவிஹிதந்தி அனேகவித⁴ம். இத்³தி⁴வித⁴ந்தி இத்³தி⁴கோட்டா²ஸம். ஆவிபா⁴வம் திரோபா⁴வந்தி ஆவிபா⁴வம் க³ஹேத்வா திரோபா⁴வம், திரோபா⁴வம் க³ஹேத்வா ஆவிபா⁴வம் காதும் ஸக்கோதா²தி புச்ச²தி. திரோகுட்டந்தி பரகுட்டம். இதரபத³த்³வயேபி ஏஸேவ நயோ. உம்முஜ்ஜனிமுஜ்ஜந்தி உம்முஜ்ஜனஞ்ச நிமுஜ்ஜனஞ்ச. பல்லங்கேனாதி பல்லங்கப³ந்த⁴னேன. கமதா²தி நிஸீதி³தும் வா க³ந்தும் வா ஸக்கோதா²தி புச்ச²தி? பக்கீ² ஸகுணோதி பக்க²யுத்தோ ஸகுணோ. அயமேத்த² ஸங்கே²போ, வித்தா²ரதோ பன இமஸ்ஸ இத்³தி⁴வித⁴ஸ்ஸ, இதோ பரேஸம் தி³ப்³ப³ஸோதாதீ³னஞ்ச வண்ணனானயோ விஸுத்³தி⁴மக்³கே³ வுத்தனயேன வேதி³தப்³போ³தி.

ஸந்தா விமோக்கா²தி அங்க³ஸந்ததாய சேவ ஆரம்மணஸந்ததாய ச ஸந்தா ஆருப்பவிமோக்கா². காயேன பு²ஸித்வாதி நாமகாயேன பு²ஸித்வா படிலபி⁴த்வா. பஞ்ஞாவிமுத்தா கோ² மயம், ஆவுஸோதி, ஆவுஸோ, மயம் நிஜ்ஜா²னகா ஸுக்க²விபஸ்ஸகா பஞ்ஞாமத்தேனேவ விமுத்தாதி த³ஸ்ஸேதி. ஆஜானேய்யாஸி வா த்வம், ஆவுஸோ ஸுஸிம, ந வா த்வம் ஆஜானேய்யாஸீதி கஸ்மா ஏவமாஹம்ஸு? ஏவம் கிர நேஸம் அஹோஸி – ‘‘மயம் இமஸ்ஸ அஜ்ஜா²ஸயம் க³ஹேத்வா கதே²தும் ந ஸக்கி²ஸ்ஸாம, த³ஸப³லம் பன புச்சி²த்வா நிக்கங்கோ² ப⁴விஸ்ஸதீ’’தி. த⁴ம்மட்டி²திஞாணந்தி விபஸ்ஸனாஞாணம், தம் பட²மதரம் உப்பஜ்ஜதி. நிப்³பா³னே ஞாணந்தி விபஸ்ஸனாய சிண்ணந்தே பவத்தமக்³க³ஞாணம், தம் பச்சா² உப்பஜ்ஜதி. தஸ்மா ப⁴க³வா ஏவமாஹ.

ஆஜானேய்யாஸி வாதிஆதி³ கஸ்மா வுத்தம்? வினாபி ஸமாதி⁴ம் ஏவம் ஞாணுப்பத்தித³ஸ்ஸனத்த²ம். இத³ஞ்ஹி வுத்தம் ஹோதி – ஸுஸிம, மக்³கோ³ வா ப²லம் வா ந ஸமாதி⁴னிஸ்ஸந்தோ³, ந ஸமாதி⁴ஆனிஸம்ஸோ, ந ஸமாதி⁴ஸ்ஸ நிப்ப²த்தி, விபஸ்ஸனாய பனேஸோ நிஸ்ஸந்தோ³, விபஸ்ஸனாய ஆனிஸம்ஸோ, விபஸ்ஸனாய நிப்ப²த்தி, தஸ்மா ஜானேய்யாஸி வா த்வம், ந வா த்வம் ஜானேய்யாஸி, அத² கோ² த⁴ம்மட்டி²திஞாணம் புப்³பே³, பச்சா² நிப்³பா³னே ஞாணந்தி.

இதா³னிஸ்ஸ படிவேத⁴ப⁴ப்³ப³தம் ஞத்வா தேபரிவட்டம் த⁴ம்மதே³ஸனம் தே³ஸேந்தோ தம் கிம் மஞ்ஞஸி, ஸுஸிம? ரூபம் நிச்சம் வா அனிச்சம் வாதிஆதி³மாஹ? தே பரிவட்டதே³ஸனாவஸானே பன தே²ரோ அரஹத்தம் பத்தோ. இதா³னிஸ்ஸ அனுயோக³ம் ஆரோபேந்தோ ஜாதிபச்சயா ஜராமரணந்தி, ஸுஸிம, பஸ்ஸஸீதிஆதி³மாஹ. அபி பன த்வம், ஸுஸிமாதி இத³ம் கஸ்மா ஆரபி⁴? நிஜ்ஜா²னகானம் ஸுக்க²விபஸ்ஸகபி⁴க்கூ²னம் பாகடகரணத்த²ம். அயஞ்ஹேத்த² அதி⁴ப்பாயோ – ந கேவலம் த்வமேவ நிஜ்ஜா²னகோ ஸுக்க²விபஸ்ஸகோ, ஏதேபி பி⁴க்கூ² ஏவரூபாயேவாதி. ஸேஸம் ஸப்³ப³த்த² பாகடமேவாதி. த³ஸமம்.

மஹாவக்³கோ³ ஸத்தமோ.