6. த⁴ம்மகதி²கஸுத்தவண்ணனா

16. ச²ட்டே² நிப்³பி³தா³யாதி நிப்³பி³ந்த³னத்தா²ய. விராகா³யாதி விரஜ்ஜனத்தா²ய. நிரோதா⁴யாதி நிருஜ்ஜ²னத்தா²ய. படிபன்னோ ஹோதீதி ஏத்த² ஸீலதோ பட்டா²ய யாவ அரஹத்தமக்³கா³ படிபன்னோதி வேதி³தப்³போ³. த⁴ம்மானுத⁴ம்மப்படிபன்னோதி லோகுத்தரஸ்ஸ நிப்³பா³னத⁴ம்மஸ்ஸ அனுத⁴ம்மபூ⁴தம் படிபத³ம் படிபன்னோ. அனுத⁴ம்மபூ⁴தந்தி அனுரூபஸபா⁴வபூ⁴தம். நிப்³பி³தா³ விராகா³ நிரோதா⁴தி நிப்³பி³தா³ய சேவ விராகே³ன ச நிரோதே⁴ன ச. அனுபாதா³ விமுத்தோதி சதூஹி உபாதா³னேஹி கிஞ்சி த⁴ம்மம் அனுபாதி³யித்வா விமுத்தோ. தி³ட்ட²த⁴ம்மனிப்³பா³னப்பத்தோதி தி³ட்டே²வ த⁴ம்மே நிப்³பா³னப்பத்தோ. அலம் வசனாயாதி, ஏவம் வத்தப்³ப³தம் அரஹதி, யுத்தோ அனுச்ச²விகோதி அத்தோ². ஏவமேத்த² ஏகேன நயேன த⁴ம்மகதி²கஸ்ஸ புச்சா² கதி²தா, த்³வீஹி தம் விஸேஸேத்வா ஸேக்கா²ஸேக்க²பூ⁴மியோ நித்³தி³ட்டா²தி. ச²ட்ட²ம்.