7. அசேலகஸ்ஸபஸுத்தவண்ணனா

17. ஸத்தமே அசேலோ கஸ்ஸபோதி லிங்கே³ன அசேலோ நிச்சேலோ, நாமேன கஸ்ஸபோ. தூ³ரதோவாதி மஹதா பி⁴க்கு²ஸங்கே⁴ன பரிவுதம் ஆக³ச்ச²ந்தம் தூ³ரதோ ஏவ அத்³த³ஸ. கிஞ்சிதே³வ தே³ஸந்தி கிஞ்சிதே³வ காரணம். ஓகாஸந்தி பஞ்ஹப்³யாகரணஸ்ஸ க²ணம் காலம். அந்தரக⁴ரந்தி ‘‘ந பல்லத்தி²காய அந்தரக⁴ரே நிஸீதி³ஸ்ஸாமீ’’தி ஏத்த² அந்தோனிவேஸனம் அந்தரக⁴ரம். ‘‘ஓக்கி²த்தசக்கு² அந்தரக⁴ரே க³மிஸ்ஸாமீ’’தி ஏத்த² இந்த³கீ²லதோ பட்டா²ய அந்தோகா³மோ. இதா⁴பி அயமேவ அதி⁴ப்பேதோ. யதா³கங்க²ஸீதி யம் இச்ச²ஸி.

கஸ்மா பன ப⁴க³வா கதே²துகாமோ யாவததியம் படிக்கி²பீதி? கா³ரவஜனனத்த²ம். தி³ட்டி²க³திகா ஹி கி²ப்பம் கதி²யமானே கா³ரவம் ந கரோந்தி, ‘‘ஸமணம் கோ³தமம் உபஸங்கமிதும்பி புச்சி²தும்பி ஸுகரம், புச்சி²தமத்தேயேவ கதே²தீ’’தி வசனம்பி ந ஸத்³த³ஹந்தி. த்³வே தயோ வாரே படிக்கி²த்தே பன கா³ரவம் கரோந்தி, ‘‘ஸமணம் கோ³தமம் உபஸங்கமிதும்பி பஞ்ஹம் புச்சி²தும்பி து³க்கர’’ந்தி யாவததியம் யாசிதே கதி²யமானம் ஸுஸ்ஸூஸந்தி ஸத்³த³ஹந்தி. இதி ப⁴க³வா ‘‘அயம் ஸுஸ்ஸூஸிஸ்ஸதி ஸத்³த³ஹிஸ்ஸதீ’’தி யாவததியம் யாசாபேத்வா கதே²ஸி. அபிச யதா² பி⁴ஸக்கோ தேலம் வா பா²ணிதம் வா பசந்தோ முது³பாகக²ரபாகானம் பாககாலம் ஆக³மயமானோ பாககாலம் அனதிக்கமித்வாவ ஓதாரேதி. ஏவம் ப⁴க³வா ஸத்தானம் ஞாணபரிபாகம் ஆக³மயமானோ ‘‘ஏத்தகேன காலேன இமஸ்ஸ ஞாணம் பரிபாகம் க³மிஸ்ஸதீ’’தி ஞத்வாவ யாவததியம் யாசாபேஸி.

மா ஹேவம், கஸ்ஸபாதி, கஸ்ஸப, மா ஏவம் ப⁴ணி. ஸயம்கதம் து³க்க²ந்தி ஹி வத்தும் ந வட்டதி, அத்தா நாம கோசி து³க்க²ஸ்ஸ காரகோ நத்தீ²தி தீ³பேதி. பரதோபி ஏஸேவ நயோ. அதி⁴ச்சஸமுப்பன்னந்தி அகாரணேன யதி³ச்சா²ய உப்பன்னம். இதி புட்டோ² ஸமானோதி கஸ்மா ஏவமாஹ? ஏவம் கிரஸ்ஸ அஹோஸி – ‘‘அயம் ‘ஸயம்கதம் து³க்க²’ந்திஆதி³னா புட்டோ² ‘மா ஹேவ’ந்தி வத³தி, ‘நத்தீ²’தி புட்டோ² ‘அத்தீ²’தி வத³தி. ‘ப⁴வம் கோ³தமோ து³க்க²ம் ந ஜானாதி ந பஸ்ஸதீ’தி புட்டோ² ‘ஜானாமி க்²வாஹ’ந்தி வத³தி. கிஞ்சி நு கோ² மயா விரஜ்ஜி²த்வா புச்சி²தோ’’தி மூலதோ பட்டா²ய அத்தனோ புச்ச²மேவ ஸோதே⁴ந்தோ ஏவமாஹ. ஆசிக்க²து ச மே, ப⁴ந்தே, ப⁴க³வாதி இத⁴ ஸத்த²ரி ஸஞ்ஜாதகா³ரவோ ‘‘ப⁴வ’’ந்தி அவத்வா ‘‘ப⁴க³வா’’தி வத³தி.

ஸோ கரோதீதிஆதி³, ‘‘ஸயம்கதம் து³க்க²’’ந்தி லத்³தி⁴யா படிஸேத⁴னத்த²ம் வுத்தம். ஏத்த² ச ஸதோதி இத³ம் பு⁴ம்மத்தே² ஸாமிவசனம், தஸ்மா ஏவமத்தோ² த³ட்ட²ப்³போ³ – ஸோ கரோதி ஸோ படிஸம்வேத³யதீதி கோ², கஸ்ஸப, ஆதி³ம்ஹியேவ ஏவம் ஸதி பச்சா² ஸயம்கதம் து³க்க²ந்தி அயம் லத்³தி⁴ ஹோதி. ஏத்த² ச து³க்க²ந்தி வட்டது³க்க²ம் அதி⁴ப்பேதம். இதி வத³ந்தி ஏதஸ்ஸ புரிமேன ஆதி³ஸத்³தே³ன அனந்தரேன ச ஸஸ்ஸதஸத்³தே³ன ஸம்ப³ந்தோ⁴ ஹோதி. ‘‘தீ³பேதி க³ண்ஹாதீ’’தி அயம் பனேத்த² பாட²ஸேஸோ. இத³ஞ்ஹி வுத்தம் ஹோதி – இதி ஏவம் வத³ந்தோ ஆதி³தோவ ஸஸ்ஸதம் தீ³பேதி, ஸஸ்ஸதம் க³ண்ஹாதி. கஸ்மா? தஸ்ஸ ஹி தம் த³ஸ்ஸனம் ஏதம் பரேதி, காரகஞ்ச வேத³கஞ்ச ஏகமேவ க³ண்ஹந்தம் ஏதம் ஸஸ்ஸதம் உபக³ச்ச²தீதி அத்தோ².

அஞ்ஞோ கரோதீதிஆதி³ பன ‘‘பரம்கதம் து³க்க²’’ந்தி லத்³தி⁴யா படிஸேத⁴னத்த²ம் வுத்தம். ‘‘ஆதி³தோ ஸதோ’’தி இத³ம் பன இதா⁴பி ஆஹரிதப்³ப³ம். அயஞ்ஹேத்த² அத்தோ² – அஞ்ஞோ கரோதி அஞ்ஞோ படிஸம்வேதி³யதீதி கோ² பன, கஸ்ஸப, ஆதி³ம்ஹியேவ ஏவம் ஸதி, பச்சா² ‘‘காரகோ இதே⁴வ உச்சி²ஜ்ஜதி, தேன கதம் அஞ்ஞோ படிஸம்வேதி³யதீ’’தி ஏவம் உப்பன்னாய உச்சே²த³தி³ட்டி²யா ஸத்³தி⁴ம் ஸம்பயுத்தாய வேத³னாய அபி⁴துன்னஸ்ஸ வித்³த⁴ஸ்ஸ ஸதோ ‘‘பரம்கதம் து³க்க²’’ந்தி அயம் லத்³தி⁴ ஹோதீதி. இதி வத³ந்திஆதி³ வுத்தனயேனேவ யோஜேதப்³ப³ம். தத்ராயம் யோஜனா – ஏவஞ்ச வத³ந்தோ ஆதி³தோவ உச்சே²த³ம் தீ³பேதி, உச்சே²த³ம் க³ண்ஹாதி. கஸ்மா? தஸ்ஸ ஹி தம் த³ஸ்ஸனம் ஏதம் பரேதி, ஏதம் உச்சே²த³ம் உபக³ச்ச²தீதி அத்தோ².

ஏதே தேதி யே ஸஸ்ஸதுச்சே²த³ஸங்கா²தே உபோ⁴ அந்தே (அனுபக³ம்ம ததா²க³தோ த⁴ம்மம் தே³ஸேதி, ஏதே தே, கஸ்ஸப, உபோ⁴ அந்தே) அனுபக³ம்ம பஹாய அனல்லீயித்வா மஜ்ஜே²ன ததா²க³தோ த⁴ம்மம் தே³ஸேதி, மஜ்ஜி²மாய படிபதா³ய டி²தோ தே³ஸேதீதி அத்தோ². கதரம் த⁴ம்மந்தி சே? யதி³த³ம் அவிஜ்ஜாபச்சயா ஸங்கா²ராதி. ஏத்த² ஹி காரணதோ ப²லம், காரணனிரோதே⁴ன சஸ்ஸ நிரோதோ⁴ தீ³பிதோ, ந கோசி காரகோ வா வேத³கோ வா நித்³தி³ட்டோ². ஏத்தாவதா ஸேஸபஞ்ஹா படிஸேதி⁴தா ஹோந்தி. உபோ⁴ அந்தே அனுபக³ம்மாதி இமினா ஹி ததியபஞ்ஹோ படிக்கி²த்தோ. அவிஜ்ஜாபச்சயா ஸங்கா²ராதி இமினா அதி⁴ச்சஸமுப்பன்னதா சேவ அஜானனஞ்ச படிக்கி²த்தந்தி வேதி³தப்³ப³ம்.

லபே⁴ய்யந்தி இத³ம் ஸோ ப⁴க³வதோ ஸந்திகே பி⁴க்கு²பா⁴வம் பத்த²யமானோ ஆஹ. அத² ப⁴க³வா யோனேன க²ந்த⁴கே தித்தி²யபரிவாஸோ (மஹாவ. 86) பஞ்ஞத்தோ, யம் அஞ்ஞதித்தி²யபுப்³போ³ ஸாமணேரபூ⁴மியம் டி²தோ ‘‘அஹம், ப⁴ந்தே, இத்த²ன்னாமோ அஞ்ஞதித்தி²யபுப்³போ³ இமஸ்மிம் த⁴ம்மவினயே ஆகங்கா²மி உபஸம்பத³ம். ஸ்வாஹம், ப⁴ந்தே, ஸங்க⁴ம் சத்தாரோ மாஸே பரிவாஸம் யாசாமீ’’திஆதி³னா நயேன ஸமாதி³யித்வா பரிவஸதி, தம் ஸந்தா⁴ய யோ கோ², கஸ்ஸப, அஞ்ஞதித்தி²யபுப்³போ³திஆதி³மாஹ. தத்த² பப்³ப³ஜ்ஜந்தி வசனஸிலிட்ட²தாவஸேன வுத்தம். அபரிவஸித்வாயேவ ஹி பப்³ப³ஜ்ஜம் லப⁴தி. உபஸம்பத³த்தி²கேன பன நாதிகாலேன கா³மப்பவேஸனாதீ³னி அட்ட² வத்தானி பூரேந்தேன பரிவஸிதப்³ப³ம். ஆரத்³த⁴சித்தாதி அட்ட²வத்தபூரணேன துட்ட²சித்தா. அயமேத்த² ஸங்கே²போ, வித்தா²ரதோ பனேஸ தித்தி²யபரிவாஸோ ஸமந்தபாஸாதி³காய வினயட்ட²கதா²ய பப்³ப³ஜ்ஜக்க²ந்த⁴கவண்ணனாயம் (மஹாவ. அட்ட². 86) வுத்தனயேனேவ வேதி³தப்³போ³.

அபிச மயாதி அயமேத்த² பாடோ², அஞ்ஞத்த² பன ‘‘அபிச மேத்தா²’’தி. புக்³க³லவேமத்ததா விதி³தாதி புக்³க³லனானத்தம் விதி³தம். ‘‘அயம் புக்³க³லோ பரிவாஸாரஹோ, அயம் ந பரிவாஸாரஹோ’’தி இத³ம் மய்ஹம் பாகடந்தி த³ஸ்ஸேதி. ததோ கஸ்ஸபோ சிந்தேஸி – ‘‘அஹோ அச்ச²ரியம் பு³த்³த⁴ஸாஸனம், யத்த² ஏவம் க⁴ம்ஸித்வா கோட்டேத்வா யுத்தமேவ க³ண்ஹந்தி, அயுத்தம் ச²ட்³டே³ந்தீ’’தி. ததோ ஸுட்டு²தரம் பப்³ப³ஜ்ஜாய ஸஞ்ஜாதுஸ்ஸாஹோ ஸசே, ப⁴ந்தேதிஆதி³மாஹ. அத² ப⁴க³வா தஸ்ஸ திப்³ப³ச்ச²ந்த³தம் விதி³த்வா ‘‘ந கஸ்ஸபோ பரிவாஸம் அரஹதீ’’தி அஞ்ஞதரம் பி⁴க்கு²ம் ஆமந்தேஸி – ‘‘க³ச்ச², பி⁴க்கு², கஸ்ஸபம் நஹாபேத்வா பப்³பா³ஜேத்வா ஆனேஹீ’’தி. ஸோ ததா² கத்வா தம் பப்³பா³ஜேத்வா ப⁴க³வதோ ஸந்திகம் அக³மாஸி. ப⁴க³வா க³ணே நிஸீதி³த்வா உபஸம்பாதே³ஸி. தேன வுத்தம் அலத்த² கோ² அசேலோ கஸ்ஸபோ ப⁴க³வதோ ஸந்திகே பப்³ப³ஜ்ஜம், அலத்த² உபஸம்பத³ந்தி. அசிரூபஸம்பன்னோதிஆதி³ ஸேஸம் ப்³ராஹ்மணஸம்யுத்தே (ஸம். நி. 1.187) வுத்தமேவாதி. ஸத்தமம்.