9. வஜ்ஜிபுத்தஸுத்தவண்ணனா

229. நவமே வஜ்ஜிபுத்தகோதி வஜ்ஜிரட்டே² ராஜபுத்தோ ச²த்தம் பஹாய பப்³ப³ஜிதோ. ஸப்³ப³ரத்திசாரோதி கத்திகனக்க²த்தம் கோ⁴ஸேத்வா ஸகலனக³ரம் த⁴ஜபடாகாதீ³ஹி படிமண்டே³த்வா பவத்திதோ ஸப்³ப³ரத்திசாரோ. இத³ஞ்ஹி நக்க²த்தம் யாவ சாதுமஹாராஜிகேஹி ஏகாப³த்³த⁴ம் ஹோதி. தூரியதாளிதவாதி³தனிக்³கோ⁴ஸஸத்³த³ந்தி பே⁴ரிஆதி³தூரியானம் தாளிதானம் வீணாதீ³னஞ்ச வாதி³தானம் நிக்³கோ⁴ஸஸத்³த³ம். அபா⁴ஸீதி வேஸாலியம் கிர ஸத்த ராஜஸஹஸ்ஸானி ஸத்தஸதானி ஸத்த ச ராஜானோ, தத்தகாவ தேஸம் உபராஜஸேனாபதிஆத³யோ. தேஸு அலங்கதபடியத்தேஸு நக்க²த்தகீளனத்தா²ய வீதி²ம் ஓதிண்ணேஸு ஸட்டி²ஹத்தே² மஹாசங்கமே சங்கமமானோ நப⁴ஸ்ஸ மஜ்ஜே² டி²தம் சந்த³ம் தி³ஸ்வா சங்கமனகோடியம் ப²லகம் நிஸ்ஸாய டி²தோ அபா⁴ஸி. அபவித்³த⁴ம்வ வனஸ்மிம் தா³ருகந்தி வத்த²வேட²னாலங்காரரஹிதத்தா வனே ச²ட்³டி³ததா³ருகம் விய ஜாதம். பாபியோதி லாமகதரோ அம்ஹேஹி அஞ்ஞோ கோசி அத்தி². பிஹயந்தீதி தே²ரோ ஆரஞ்ஞிகோ பம்ஸுகூலிகோ பிண்ட³பாதிகோ ஸபதா³னசாரிகோ அப்பிச்சோ² ஸந்துட்டோ²தி ப³ஹூ துய்ஹம் பத்த²யந்தீதி அத்தோ². ஸக்³க³கா³மினந்தி ஸக்³க³ம் க³ச்ச²ந்தானம் க³தானம்பி. நவமம்.