1. விவேகஸுத்தவண்ணனா

221. வனஸம்யுத்தஸ்ஸ பட²மே கோஸலேஸு விஹரதீதி ஸத்து² ஸந்திகே கம்மட்டா²னம் க³ஹேத்வா தஸ்ஸ ஜனபத³ஸ்ஸ ஸுலப⁴பி⁴க்க²தாய தத்த² க³ந்த்வா விஹரதி. ஸம்வேஜேதுகாமாதி விவேகம் படிபஜ்ஜாபேதுகாமா. விவேககாமோதி தயோ விவேகே பத்த²யந்தோ. நிச்ச²ரதீ ப³ஹித்³தா⁴தி பா³ஹிரேஸு புது²த்தாரம்மணேஸு சரதி. ஜனோ ஜனஸ்மிந்தி த்வம் ஜனோ அஞ்ஞஸ்மிம் ஜனே ச²ந்த³ராக³ம் வினயஸ்ஸு. பஜஹாஸீதி பஜஹ. ப⁴வாஸீதி ப⁴வ. ஸதம் தம் ஸாரயாமஸேதி ஸதிமந்தம் பண்டி³தம் தம் மயம்பி ஸாரயாம, ஸதம் வா த⁴ம்மம் மயம் தம் ஸாரயாமாதி அத்தோ². பாதாலரஜோதி அப்பதிட்ட²ட்டே²ன பாதாலஸங்கா²தோ கிலேஸரஜோ. மா தம் காமரஜோதி அயம் காமராக³ரஜோ தம் மா அவஹரி, அபாயமேவ மா நேதூதி அத்தோ². பம்ஸுகுந்தி²தோதி பம்ஸுமக்கி²தோ. விது⁴னந்தி விது⁴னந்தோ. ஸிதம் ரஜந்தி ஸரீரலக்³க³ம் ரஜம். ஸம்வேக³மாபாதீ³தி தே³வதாபி நாம மம் ஏவம் ஸாரேதீதி விவேகமாபன்னோ, உத்தமவீரியம் வா பக்³க³ய்ஹ பரமவிவேகம் மக்³க³மேவ படிபன்னோதி. பட²மம்.