8. வங்கீ³ஸஸம்யுத்தம்

1. நிக்க²ந்தஸுத்தவண்ணனா

209. வங்கீ³ஸஸம்யுத்தஸ்ஸ பட²மே அக்³கா³ளவே சேதியேதி ஆளவியம் அக்³க³சேதியே. அனுப்பன்னே பு³த்³தே⁴ அக்³கா³ளவகோ³தமகாதீ³னி யக்க²னாகா³தீ³னம் ப⁴வனானி, சேதியானி அஹேஸும். உப்பன்னே பு³த்³தே⁴ தானி அபனேத்வா மனுஸ்ஸா விஹாரே கரிம்ஸு. தேஸம் தானேவ நாமானி ஜாதானி. நிக்³ரோத⁴கப்பேனாதி நிக்³ரோத⁴ருக்க²மூலவாஸினா கப்பத்தே²ரேன. ஓஹிய்யகோதி ஓஹீனகோ. விஹாரபாலோதி ஸோ கிர ததா³ அவஸ்ஸிகோ ஹோதி பத்தசீவரக்³க³ஹணே அகோவிதோ³. அத² நம் தே²ரா பி⁴க்கூ² – ‘‘ஆவுஸோ, இமானி ச²த்துபாஹனகத்தரயட்டி²ஆதீ³னி ஓலோகேந்தோ நிஸீதா³’’தி விஹாரரக்க²கம் கத்வா பிண்டா³ய பவிஸிம்ஸு. தேன வுத்தம் ‘‘விஹாரபாலோ’’தி. ஸமலங்கரித்வாதி அத்தனோ விப⁴வானுரூபேன அலங்காரேன அலங்கரித்வா. சித்தம் அனுத்³த⁴ம்ஸேதீதி குஸலசித்தம் வித்³த⁴ம்ஸேதி வினாஸேதி. தம் குதேத்த² லப்³பா⁴தி ஏதஸ்மிம் ராகே³ உப்பன்னே தம் காரணம் குதோ லப்³பா⁴. யம் மே பரோதி யேன மே காரணேன அஞ்ஞோ புக்³க³லோ வா த⁴ம்மோ வா அனபி⁴ரதிம் வினோதே³த்வா இதா³னேவ அபி⁴ரதிம் உப்பாதே³ய்ய ஆசரியுபஜ்ஜா²யாபி மம் விஹாரே ஓஹாய க³தா.

அகா³ரஸ்மாதி அகா³ரதோ நிக்க²ந்தம். அனகா³ரியந்தி பப்³ப³ஜ்ஜம் உபக³தந்தி அத்தோ². கண்ஹதோதி கண்ஹபக்க²தோ மாரபக்க²தோ ஆதா⁴வந்தி. உக்³க³புத்தாதி உக்³க³தானம் புத்தா மஹேஸக்கா² ராஜஞ்ஞபூ⁴தா. த³ள்ஹத⁴ம்மினோதி த³ள்ஹத⁴னுனோ, உத்தமப்பமாணம் ஆசரியத⁴னும் தா⁴ரயமானா. ஸஹஸ்ஸம் அபலாயினந்தி யே தே ஸமந்தா ஸரேஹி பரிகிரேய்யும், தேஸம் அபலாயீனம் ஸங்க²ம் த³ஸ்ஸேந்தோ ‘‘ஸஹஸ்ஸ’’ந்தி ஆஹ. ஏததோ பி⁴ய்யோதி ஏதஸ்மா ஸஹஸ்ஸா அதிரேகதரா. நேவ மம் ப்³யாத⁴யிஸ்ஸந்தீதி மம் சாலேதும் ந ஸக்கி²ஸ்ஸந்தி. த⁴ம்மே ஸம்ஹி பதிட்டி²தந்தி அனபி⁴ரதிம் வினோதே³த்வா அபி⁴ரதிம் உப்பாத³னஸமத்தே² ஸகே ஸாஸனத⁴ம்மே பதிட்டி²தம். இத³ம் வுத்தம் ஹோதி – இஸ்ஸாஸஸஹஸ்ஸே தாவ ஸமந்தா ஸரேஹி பரிகிரந்தே ஸிக்கி²தோ புரிஸோ த³ண்ட³கம் க³ஹேத்வா ஸப்³பே³ ஸரே ஸரீரே அபதமானே அந்தராவ பஹரித்வா பாத³மூலே பாதேதி. தத்த² ஏகோபி இஸ்ஸாஸோ த்³வே ஸரே ஏகதோ ந கி²பதி, இமா பன இத்தி²யோ ரூபாரம்மணாதி³வஸேன பஞ்ச பஞ்ச ஸரே ஏகதோ கி²பந்தி. ஏவம் கி²பந்தியோ ஏதா ஸசேபி அதிரேகஸஹஸ்ஸா ஹோந்தி, நேவ மம் சாலேதும் ஸக்கி²ஸ்ஸந்தீதி.

ஸக்கீ² ஹி மே ஸுதம் ஏதந்தி மயா ஹி ஸம்முகா² ஏதம் ஸுதம். நிப்³பா³னக³மனம் மக்³க³ந்தி விபஸ்ஸனம் ஸந்தா⁴யாஹ. ஸோ ஹி நிப்³பா³னஸ்ஸ புப்³ப³பா⁴க³மக்³கோ³, லிங்க³விபல்லாஸேன பன ‘‘மக்³க³’’ந்தி ஆஹ. தத்த² மேதி தஸ்மிம் மே அத்தனோ தருணவிபஸ்ஸனாஸங்கா²தே நிப்³பா³னக³மனமக்³கே³ மனோ நிரதோ. பாபிமாதி கிலேஸம் ஆலபதி. மச்சூதிபி தமேவ ஆலபதி. ந மே மக்³க³ம்பி த³க்க²ஸீதி யதா² மே ப⁴வயோனிஆதீ³ஸு க³தமக்³க³ம்பி ந பஸ்ஸஸி, ததா² கரிஸ்ஸாமீதி. பட²மம்.

2. அரதீஸுத்தவண்ணனா

210. து³தியே நிக்க²மதீதி விஹாரா நிக்க²மதி. அபரஜ்ஜு வா காலேதி து³தியதி³வஸே வா பி⁴க்கா²சாரகாலே. விஹாரக³ருகோ கிரேஸ தே²ரோ. அரதிஞ்ச ரதிஞ்சாதி ஸாஸனே அரதிம் காமகு³ணேஸு ச ரதிம். ஸப்³ப³ஸோ கே³ஹஸிதஞ்ச விதக்கந்தி பஞ்சகாமகு³ணகே³ஹனிஸ்ஸிதம் பாபவிதக்கஞ்ச ஸப்³பா³காரேன பஹாய. வனத²ந்தி கிலேஸமஹாவனம். குஹிஞ்சீதி கிஸ்மிஞ்சி ஆரம்மணே. நிப்³ப³னதோ²தி நிக்கிலேஸவனோ. அரதோதி தண்ஹாரதிரஹிதோ.

பத²விஞ்ச வேஹாஸந்தி பத²விட்டி²தஞ்ச இத்தி²புரிஸவத்தா²லங்காராதி³வண்ணம், வேஹாஸட்ட²கஞ்ச சந்த³ஸூரியோபா⁴ஸாதி³. ரூபக³தந்தி ரூபமேவ. ஜக³தோக³த⁴ந்தி ஜக³தியா ஓக³த⁴ம், அந்தோபத²வியம் நாக³ப⁴வனக³தந்தி அத்தோ². பரிஜீயதீதி பரிஜீரதி. ஸப்³ப³மனிச்சந்தி ஸப்³ப³ம் தம் அனிச்சம். அயம் தே²ரஸ்ஸ மஹாவிபஸ்ஸனாதி வத³ந்தி. ஏவம் ஸமச்சாதி ஏவம் ஸமாக³ந்த்வா. சரந்தி முதத்தாதி விஞ்ஞாதத்தபா⁴வா விஹரந்தி.

உபதீ⁴ஸூதி க²ந்த⁴கிலேஸாபி⁴ஸங்கா²ரேஸு. க³தி⁴தாதி கி³த்³தா⁴. தி³ட்ட²ஸுதேதி சக்கு²னா தி³ட்டே² ரூபே, ஸோதேன ஸுதே ஸத்³தே³. படிகே⁴ ச முதே சாதி ஏத்த² படிக⁴பதே³ன க³ந்த⁴ரஸா க³ஹிதா, முதபதே³ன போ²ட்ட²ப்³பா³ரம்மணம். யோ ஏத்த² ந லிம்பதீதி யோ ஏதேஸு பஞ்சகாமகு³ணேஸு தண்ஹாதி³ட்டி²லேபேஹி ந லிம்பதி.

அத² ஸட்டி²னிஸ்ஸிதா ஸவிதக்கா, புதூ² ஜனதாய அத⁴ம்மா நிவிட்டா²தி அத² ச² ஆரம்மணனிஸ்ஸிதா புதூ² அத⁴ம்மவிதக்கா ஜனதாய நிவிட்டா²தி அத்தோ². ந ச வக்³க³க³தஸ்ஸ குஹிஞ்சீதி தேஸம் வஸேன ந கத்த²சி கிலேஸவக்³க³க³தோ ப⁴வேய்ய. நோ பன து³ட்டு²ல்லபா⁴ணீதி து³ட்டு²ல்லவசனபா⁴ணீபி ந ஸியா. ஸ பி⁴க்கூ²தி ஸோ ஏவம்விதோ⁴ பி⁴க்கு² நாம ஹோதி.

த³ப்³போ³தி த³ப்³ப³ஜாதிகோ பண்டி³தோ. சிரரத்தஸமாஹிதோதி தீ³க⁴ரத்தம் ஸமாஹிதசித்தோ. நிபகோதி நேபக்கேன ஸமன்னாக³தோ பரிணதபஞ்ஞோ. அபிஹாலூதி நித்தண்ஹோ. ஸந்தம் பத³ந்தி நிப்³பா³னம். அஜ்ஜ²க³மா முனீதி அதி⁴க³தோ முனி. படிச்ச பரினிப்³பு³தோ கங்க²தி காலந்தி நிப்³பா³னம் படிச்ச கிலேஸபரினிப்³பா³னேன பரினிப்³பு³தோ பரினிப்³பா³னகாலம் ஆக³மேதி. து³தியம்.

3. பேஸலஸுத்தவண்ணனா

211. ததியே அதிமஞ்ஞதீதி ‘‘கிம் இமே மஹல்லகா? ந ஏதேஸம் பாளி, ந அட்ட²கதா², ந பத³ப்³யஞ்ஜனமது⁴ரதா, அம்ஹாகம் பன பாளிபி அட்ட²கதா²பி நயஸதேன நயஸஹஸ்ஸேன உபட்டா²தீ’’தி அதிக்கமித்வா மஞ்ஞதி. கோ³தமாதி கோ³தமபு³த்³த⁴ஸாவகத்தா அத்தானம் ஆலபதி. மானபத²ந்தி மானாரம்மணஞ்சேவ மானஸஹபு⁴னோ ச த⁴ம்மே. விப்படிஸாரீஹுவாதி விப்படிஸாரீ அஹுவா, அஹோஸீதி அத்தோ². மக்³க³ஜினோதி மக்³கே³ன ஜிதகிலேஸோ. கித்திஞ்ச ஸுக²ஞ்சாதி வண்ணப⁴ணனஞ்ச காயிகசேதஸிகஸுக²ஞ்ச. அகி²லோத⁴ பதா⁴னவாதி அகி²லோ இத⁴ பதா⁴னவா வீரியஸம்பன்னோ. விஸுத்³தோ⁴தி விஸுத்³தோ⁴ ப⁴வேய்ய. அஸேஸந்தி நிஸ்ஸேஸம் நவவித⁴ம். விஜ்ஜாயந்தகரோதி விஜ்ஜாய கிலேஸானம் அந்தகரோ. ஸமிதாவீதி ராகா³தீ³னம் ஸமிததாய ஸமிதாவீ. ததியம்.

4. ஆனந்த³ஸுத்தவண்ணனா

212. சதுத்தே² ராகோ³தி ஆயஸ்மா ஆனந்தோ³ மஹாபுஞ்ஞோ ஸம்பா⁴விதோ, தம் ராஜராஜமஹாமத்தாத³யோ நிமந்தேத்வா அந்தோனிவேஸனே நிஸீதா³பேந்தி. ஸப்³பா³லங்காரபடிமண்டி³தாபி இத்தி²யோ தே²ரம் உபஸங்கமித்வா வந்தி³த்வா தாலவண்டேன பீ³ஜேந்தி, உபனிஸீதி³த்வா பஞ்ஹம் புச்ச²ந்தி த⁴ம்மம் ஸுணந்தி. தத்த² ஆயஸ்மதோ வங்கீ³ஸஸ்ஸ நவபப்³ப³ஜிதஸ்ஸ ஆரம்மணம் பரிக்³க³ஹேதும் அஸக்கோந்தஸ்ஸ இத்தி²ரூபாரம்மணே ராகோ³ சித்தம் அனுத்³த⁴ம்ஸேதி. ஸோ ஸத்³தா⁴பப்³ப³ஜிதத்தா உஜுஜாதிகோ குலபுத்தோ ‘‘அயம் மே ராகோ³ வட்³டி⁴த்வா தி³ட்ட²த⁴ம்மிகஸம்பராயிகம் அத்த²ம் நாஸேய்யா’’தி சிந்தேத்வா அனந்தரம் நிஸின்னோவ தே²ரஸ்ஸ அத்தானம் ஆவிகரோந்தோ காமராகே³னாதிஆதி³மாஹ.

தத்த² நிப்³பா³பனந்தி ராக³னிப்³பா³னகாரணம். விபரியேஸாதி விபல்லாஸேன. ஸுப⁴ம் ராகூ³பஸஞ்ஹிதந்தி ராக³ட்டா²னியம் இட்டா²ரம்மணம். பரதோ பஸ்ஸாதி அனிச்சதோ பஸ்ஸ. மா ச அத்ததோதி அத்ததோ மா பஸ்ஸ. காயக³தா த்யத்தூ²தி காயக³தா தே அத்து². அனிமித்தஞ்ச பா⁴வேஹீதி நிச்சாதீ³னம் நிமித்தானம் உக்³கா⁴டிதத்தா விபஸ்ஸனா அனிமித்தா நாம, தம் பா⁴வேஹீதி வத³தி. மானாபி⁴ஸமயாதி மானஸ்ஸ த³ஸ்ஸனாபி⁴ஸமயா சேவ பஹானாபி⁴ஸமயா ச. உபஸந்தோதி ராகா³தி³ஸந்ததாய உபஸந்தோ. சதுத்த²ம்.

5. ஸுபா⁴ஸிதஸுத்தவண்ணனா

213. பஞ்சமே அங்கே³ஹீதி காரணேஹி, அவயவேஹி வா. முஸாவாதா³வேரமணிஆதீ³னி ஹி சத்தாரி ஸுபா⁴ஸிதவாசாய காரணானி, ஸச்சவசனாத³யோ சத்தாரோ அவயவா. காரணத்தே² ச அங்க³ஸத்³தே³ ‘‘சதூஹீ’’தி நிஸ்ஸக்கவசனம் ஹோதி, அவயவத்தே² கரணவசனம். ஸமன்னாக³தாதி ஸமனுஆக³தா பவத்தா யுத்தா ச. வாசாதி ஸமுல்லபனவாசா, யா ‘‘வாசா கி³ரா ப்³யப்பதோ²’’தி (த⁴. ஸ. 636) ச, ‘‘நேலா கண்ணஸுகா²’’தி (தீ³. நி. 1.9) ச ஆக³தா. ‘‘யா பன வாசாய சே கதம் கம்ம’’ந்தி ஏவம் விஞ்ஞத்தி ச ‘‘யா சதூஹி வசீது³ச்சரிதேஹி ஆரதி…பே… அயம் வுச்சதி ஸம்மாவாசா’’தி (விப⁴. 206) ஏவம் விரதி ச, ‘‘ப²ருஸவாசா, பி⁴க்க²வே, ஆஸேவிதா பா⁴விதா ப³ஹுலீகதா நிரயஸம்வத்தனிகா ஹோதீ’’தி (அ. நி. 8.40) ஏவம் சேதனா ச வாசாதி ஆக³தா, ந ஸா இத⁴ அதி⁴ப்பேதா. கஸ்மா? அபா⁴ஸிதப்³ப³தோ. ஸுபா⁴ஸிதாதி ஸுட்டு² பா⁴ஸிதா. தேனஸ்ஸா அத்தா²வஹதம் தீ³பேதி. நோ து³ப்³பா⁴ஸிதாதி ந து³ட்டு² பா⁴ஸிதா. தேனஸ்ஸா அனத்தா²வஹனபஹானதம் தீ³பேதி. அனவஜ்ஜாதி ராகா³தி³வஜ்ஜரஹிதா. இமினாஸ்ஸா காரணஸுத்³தி⁴ம் சதுதோ³ஸாபா⁴வஞ்ச தீ³பேதி. அனனுவஜ்ஜாதி அனுவாத³விமுத்தா. இமினாஸ்ஸா ஸப்³பா³காரஸம்பத்திம் தீ³பேதி. விஞ்ஞூனந்தி பண்டி³தானம். தேன நிந்தா³பஸம்ஸாஸு பா³லா அப்பமாணாதி தீ³பேதி.

ஸுபா⁴ஸிதம்யேவ பா⁴ஸதீதி புக்³க³லாதி⁴ட்டா²னாய தே³ஸனாய சதூஸு வாசங்கே³ஸு அஞ்ஞதரனித்³தோ³ஸவசனமேதம். நோ து³ப்³பா⁴ஸிதந்தி தஸ்ஸேவ வாசங்க³ஸ்ஸ படிபக்க²பா⁴ஸனனிவாரணம். நோ து³ப்³பா⁴ஸிதந்தி இமினா மிச்சா²வாசப்பஹானம் தீ³பேதி. ஸுபா⁴ஸிதந்தி இமினா பஹீனமிச்சா²வாசேன பா⁴ஸிதப்³ப³வசனலக்க²ணம். அங்க³பரிதீ³பனத்த²ம் பனேத்த² அபா⁴ஸிதப்³ப³ம் புப்³பே³ அவத்வா பா⁴ஸிதப்³ப³மேவாஹ. ஏஸ நயோ த⁴ம்மம்யேவாதிஆதீ³ஸுபி. ஏத்த² ச பட²மேன பிஸுணதோ³ஸரஹிதம் ஸமக்³க³கரணம் வசனம் வுத்தம், து³தியேன ஸம்ப²ப்பலாபதோ³ஸரஹிதம் த⁴ம்மதோ அனபேதம் மந்தாவசனம், இதரேஹி த்³வீஹி ப²ருஸாலிகரஹிதானி பியஸச்சவசனானி. இமேஹி கோ²தி ஆதி³னா தானி அங்கா³னி பச்சக்க²தோ த³ஸ்ஸேந்தோ தம் வாசம் நிக³மேதி. யஞ்ச அஞ்ஞே படிஞ்ஞாதீ³ஹி அவயவேஹி, நாமாதீ³ஹி பதே³ஹி, லிங்க³வசனவிப⁴த்திகாலகாரகஸம்பத்தீஹி ச ஸமன்னாக³தம் முஸாவாதா³தி³வாசம்பி ஸுபா⁴ஸிதந்தி மஞ்ஞந்தி, தம் படிஸேதே⁴தி. அவயவாதி³ஸமன்னாக³தாபி ஹி ததா²ரூபீ வாசா து³ப்³பா⁴ஸிதாவ ஹோதி அத்தனோ ச பரேஸஞ்ச அனத்தா²வஹத்தா. இமேஹி பன சதூஹங்கே³ஹி ஸமன்னாக³தா ஸசேபி மிலக்கு²பா⁴ஸாபரியாபன்னா க⁴டசேடிகாகீ³திகபரியாபன்னாபி ஹோதி, ததா²பி ஸுபா⁴ஸிதாவ லோகியலோகுத்தரஹிதஸுகா²வஹத்தா. ததா² ஹி மக்³க³பஸ்ஸே ஸஸ்ஸம் ரக்க²ந்தியா ஸீஹளசேடிகாய ஸீஹளகேனேவ ஜாதிஜராமரணயுத்தம் கீ³திகம் கா³யந்தியா ஸத்³த³ம் ஸுத்வா மக்³க³ம் க³ச்ச²ந்தா ஸட்டி²மத்தா விபஸ்ஸகா பி⁴க்கூ² அரஹத்தம் பாபுணிம்ஸு. ததா² திஸ்ஸோ நாம ஆரத்³த⁴விபஸ்ஸகோ பி⁴க்கு² பது³மஸரஸமீபேன க³ச்ச²ந்தோ பது³மஸரே பது³மானி ப⁴ஞ்ஜித்வா –

‘‘பாதோவ பு²ல்லிதகோகனத³ம், ஸூரியாலோகேன பி⁴ஜ்ஜியதே;

ஏவம் மனுஸ்ஸத்தம் க³தா ஸத்தா, ஜராபி⁴வேகே³ன மத்³தி³யந்தீ’’தி. –

இமம் கீ³திகம் கா³யந்தியா சேடிகாய ஸுத்வா அரஹத்தம் பத்தோ.

பு³த்³த⁴ந்தரேபி அஞ்ஞதரோ புரிஸோ ஸத்தஹி புத்தேஹி ஸத்³தி⁴ம் அடவிதோ ஆக³ம்ம அஞ்ஞதராய இத்தி²யா முஸலேன தண்டு³லே கோட்டேந்தியா –

‘‘ஜராய பரிமத்³தி³தம் ஏதம், மிலாதச²விசம்மனிஸ்ஸிதம்;

மரணேன பி⁴ஜ்ஜதி ஏதம், மச்சுஸ்ஸ கா⁴ஸமாமிஸம்.

‘‘கிமீனம் ஆலயம் ஏதம், நானாகுணபேன பூரிதம்;

அஸுசிஸ்ஸ பா⁴ஜனம் ஏதம், கத³லிக்க²ந்த⁴ஸமம் இத³’’ந்தி. –

இமம் கீ³திகம் ஸுத்வா பச்சவேக்க²ந்தோ ஸஹ புத்தேஹி பச்சேகபோ³தி⁴ம் பத்தோ. ஏவம் இமேஹி சதூஹி அங்கே³ஹி ஸமன்னாக³தா வாசா ஸசேபி மிலக்கு²பா⁴ஸாபரியாபன்னா க⁴டசேடிகாகீ³திகபரியாபன்னாபி ஹோதி, ததா²பி ஸுபா⁴ஸிதாதி வேதி³தப்³பா³. ஸுபா⁴ஸிதத்தா ஏவ ச அனவஜ்ஜா ச அனனுவஜ்ஜா ச விஞ்ஞூனம் அத்த²த்தி²கானம் அத்த²படிஸரணானம், நோ ப்³யஞ்ஜனபடிஸரணானந்தி.

ஸாருப்பாஹீதி அனுச்ச²விகாஹி. அபி⁴த்த²வீதி பஸம்ஸி. ந தாபயேதி விப்படிஸாரேன ந தாபேய்ய ந விபா³தே⁴ய்ய. பரேதி பரேஹி பி⁴ந்த³ந்தோ நாபி⁴ப⁴வேய்ய ந பா³தே⁴ய்ய. இதி இமாய கா³தா²ய அபிஸுணவாசாவஸேன ப⁴க³வந்தம் தோ²மேதி. படினந்தி³தாதி பியாயிதா. யம் அனாதா³யாதி யம் வாசம் பா⁴ஸந்தோ பரேஸம் பாபானி அப்பியானி ப²ருஸவசனானி அனாதா³ய அத்த²ப்³யஞ்ஜனமது⁴ரம் பியமேவ பா⁴ஸதி, தம் வாசம் பா⁴ஸேய்யாதி பியவாசாவஸேன அபி⁴த்த²வி.

அமதாதி ஸாது⁴பா⁴வேன அமதஸதி³ஸா. வுத்தம்பி ஹேதம் – ‘‘ஸச்சம் ஹவே ஸாது³தரம் ரஸான’’ந்தி (ஸம். நி. 1.246) நிப்³பா³னாமதபச்சயத்தா வா அமதா. ஏஸ த⁴ம்மோ ஸனந்தனோதி யா அயம் ஸச்சவாசா நாம, ஏஸ போராணோ த⁴ம்மோ சரியா பவேணீ. இத³மேவ ஹி போராணானம் ஆசிண்ணம், ந தே அலிகம் பா⁴ஸிம்ஸு. தேனேவாஹ – ஸச்சே அத்தே² ச த⁴ம்மே ச, ஆஹு ஸந்தோ பதிட்டி²தாதி.

தத்த² ஸச்சே பதிட்டி²தத்தாவ அத்தனோ ச பரேஸஞ்ச அத்தே² பதிட்டி²தா, அத்தே² பதிட்டி²தத்தா ஏவ த⁴ம்மே பதிட்டி²தா ஹோந்தீதி வேதி³தப்³பா³. ஸச்சவிஸேஸனமேவ வா ஏதம். இத³ம் ஹி வுத்தம் ஹோதி – ஸச்சே பதிட்டி²தா, கீதி³ஸே? அத்தே² ச த⁴ம்மே ச, யம் பரேஸம் அத்த²தோ அனபேதத்தா அத்த²ம் அனுபரோத⁴கரம், த⁴ம்மதோ அனபேதத்தா த⁴ம்மம் த⁴ம்மிகமேவ அத்த²ம் ஸாதே⁴தீதி. இதி இமாய கா³தா²ய ஸச்சவசனவஸேன அபி⁴த்த²வி.

கே²மந்தி அப⁴யம் நிருபத்³த³வம். கேன காரணேனாதி சே. நிப்³பா³னபத்தியா து³க்க²ஸ்ஸந்தகிரியாய, யஸ்மா கிலேஸனிப்³பா³னம் பாபேதி, வட்டது³க்க²ஸ்ஸ ச அந்தகிரியாய ஸம்வத்ததீதி அத்தோ². அத² வா யம் பு³த்³தோ⁴ நிப்³பா³னபத்தியா து³க்க²ஸ்ஸந்தகிரியாயாதி த்³வின்னம் நிப்³பா³னதா⁴தூனம் அத்தா²ய கே²மமக்³க³ப்பகாஸனதோ கே²மம் வாசம் பா⁴ஸதி, ஸா வே வாசானமுத்தமாதி ஸா வாசா ஸப்³ப³வாசானம் ஸேட்டா²தி ஏவமேத்த² அத்தோ² த³ட்ட²ப்³போ³. இதி இமாய கா³தா²ய மந்தாவசனவஸேன ப⁴க³வந்தம் அபி⁴த்த²வந்தோ அரஹத்தனிகூடேன தே³ஸனம் நிட்ட²பேஸீதி. பஞ்சமம்.

6. ஸாரிபுத்தஸுத்தவண்ணனா

214. ச²ட்டே² போரியாதி அக்க²ராதி³பரிபுண்ணாய. விஸ்ஸட்டா²யாதி அவிப³த்³தா⁴ய அபலிபு³த்³தா⁴ய. த⁴ம்மஸேனாபதிஸ்ஸ ஹி கதே²ந்தஸ்ஸ பித்தாதீ³னம் வஸேன அபலிபு³த்³த⁴வசனம் ஹோதி, அயத³ண்டே³ன பஹதகம்ஸதாலதோ ஸத்³தோ³ விய நிச்ச²ரதி. அனேலக³லாயாதி அனேலாய அக³லாய நித்³தோ³ஸாய சேவ அக்க²லிதபத³ப்³யஞ்ஜனாய ச. தே²ரஸ்ஸ ஹி கத²யதோ பத³ம் வா ப்³யஞ்ஜனம் வா ந பரிஹாயதி. அத்த²ஸ்ஸ விஞ்ஞாபனியாதி அத்த²ஸ்ஸ விஞ்ஞாபனஸமத்தா²ய. பி⁴க்கு²னந்தி பி⁴க்கூ²னம்.

ஸம்கி²த்தேனபீதி ‘‘சத்தாரிமானி, ஆவுஸோ, அரியஸச்சானி. கதமானி சத்தாரி? து³க்க²ம் அரியஸச்சம்…பே… இமானி கோ², ஆவுஸோ, சத்தாரி அரியஸச்சானி, தஸ்மாதிஹ, ஆவுஸோ, இத³ம் து³க்க²ம் அரியஸச்சந்தி யோகோ³ கரணீயோ’’தி (ஸம். நி. 5.1096-1098) ஏவம் ஸம்கி²த்தேனபி தே³ஸேதி. வித்தா²ரேனபீதி ‘‘கதமம், ஆவுஸோ, து³க்க²ம் அரியஸச்ச’’ந்திஆதி³னா (ம. நி. 3.373) நயேன தானேவ விப⁴ஜந்தோ வித்தா²ரேனபி பா⁴ஸதி. க²ந்தா⁴தி³தே³ஸனாஸுபி ஏஸேவ நயோ. ஸாளிகாயிவ நிக்³கோ⁴ஸோதி யதா² மது⁴ரம் அம்ப³பக்கம் ஸாயித்வா பக்கே²ஹி வாதம் த³த்வா மது⁴ரஸ்ஸரம் நிச்சா²ரேந்தியா ஸாளிகஸகுணியா நிக்³கோ⁴ஸோ, ஏவம் தே²ரஸ்ஸ த⁴ம்மம் கதே²ந்தஸ்ஸ மது⁴ரோ நிக்³கோ⁴ஸோ ஹோதி. படிபா⁴னம் உதீ³ரயீதி ஸமுத்³த³தோ ஊமியோ விய அனந்தம் படிபா⁴னம் உட்ட²ஹதி. ஓதே⁴ந்தீதி ஓத³ஹந்தி. ச²ட்ட²ம்.

7. பவாரணாஸுத்தவண்ணனா

215. ஸத்தமே தத³ஹூதி தஸ்மிம் அஹு, தஸ்மிம் தி³வஸேதி அத்தோ². உபவஸந்தி ஏத்தா²தி உபோஸதோ². உபவஸந்தீதி ச ஸீலேன வா அனஸனேன வா உபேதா ஹுத்வா வஸந்தீதி அத்தோ². ஸோ பனேஸ உபோஸத²தி³வஸோ அட்ட²மீசாதுத்³த³ஸீபன்னரஸீபே⁴தே³ன திவிதோ⁴, தஸ்மா ஸேஸத்³வயனிவாரணத்த²ம் பன்னரஸேதி வுத்தம். பவாரணாயாதி வஸ்ஸம்-வுட்ட²-பவாரணாய. விஸுத்³தி⁴பவாரணாதிபி ஏதிஸ்ஸாவ நாமம். நிஸின்னோ ஹோதீதி ஸாயன்ஹஸமயே ஸம்பத்தபரிஸாய காலயுத்தம் த⁴ம்மம் தே³ஸேத்வா உத³ககோட்ட²கே க³த்தானி பரிஸிஞ்சித்வா நிவத்த²னிவாஸனோ ஏகம்ஸம் ஸுக³தமஹாசீவரம் கத்வா மஜ்ஜி²மத்த²ம்ப⁴ம் நிஸ்ஸாய பஞ்ஞத்தே வரபு³த்³தா⁴ஸனே புரத்தி²மதி³ஸாய உட்ட²ஹதோ சந்த³மண்ட³லஸ்ஸ ஸிரிம் ஸிரியா அபி⁴ப⁴வமானோ நிஸின்னோ ஹோதி. துண்ஹீபூ⁴தம் துண்ஹீபூ⁴தந்தி யதோ யதோ அனுவிலோகேதி, ததோ ததோ துண்ஹீபூ⁴தமேவ. தத்த² ஹி ஏகபி⁴க்கு²ஸ்ஸாபி ஹத்த²குக்குச்சம் வா பாத³குக்குச்சம் வா நத்தி², ஸப்³பே³ நிரவா ஸந்தேன இரியாபதே²ன நிஸீதி³ம்ஸு. அனுவிலோகேத்வாதி தி³ஸ்ஸமானபஞ்சபஸாதே³ஹி நேத்தேஹி அனுவிலோகேத்வா. ஹந்தா³தி வோஸ்ஸக்³க³த்தே² நிபாதோ. ந ச மே கிஞ்சி க³ரஹதா²தி ஏத்த² ந ச கிஞ்சீதி புச்ச²னத்தே² ந-காரோ. கிம் மே கிஞ்சி க³ரஹத²? யதி³ க³ரஹத², வத³த², இச்சா²பேமி வோ வத்துந்தி அத்தோ². காயிகம் வா வாசஸிகம் வாதி இமினா காயவசீத்³வாரானேவ பவாரேதி, ந மனோத்³வாரம். கஸ்மா? அபாகடத்தா. காயவசீத்³வாரேஸு ஹி தோ³ஸோ பாகடோ ஹோதி, ந மனோத்³வாரே. ‘‘ஏகமஞ்சே ஸயதோபி ஹி கிம் சிந்தேஸீ’’தி? புச்சி²த்வா சித்தாசாரம் ஜானாதி. இதி மனோத்³வாரம் அபாகடத்தா ந பவாரேதி, நோ அபரிஸுத்³த⁴த்தா. போ³தி⁴ஸத்தபூ⁴தஸ்ஸாபி ஹி தஸ்ஸ பூ⁴ரித³த்தச²த்³த³ந்தஸங்க²பாலத⁴ம்மபாலாதி³காலே மனோத்³வாரம் பரிஸுத்³த⁴ம், இதா³னேத்த² வத்தப்³ப³மேவ நத்தி².

ஏதத³வோசாதி த⁴ம்மஸேனாபதிட்டா²னே டி²தத்தா பி⁴க்கு²ஸங்க⁴ஸ்ஸ பா⁴ரம் வஹந்தோ ஏதம் அவோச. ந கோ² மயம், ப⁴ந்தேதி, ப⁴ந்தே, மயம் ப⁴க³வதோ ந கிஞ்சி க³ரஹாம. காயிகம் வா வாசஸிகம் வாதி இத³ம் சதுன்னம் அரக்கி²யதம் ஸந்தா⁴ய தே²ரோ ஆஹ. ப⁴க³வதோ ஹி சத்தாரி அரக்கி²யானி. யதா²ஹ –

‘‘சத்தாரிமானி, பி⁴க்க²வே, ததா²க³தஸ்ஸ அரக்கி²யானி. கதமானி சத்தாரி? பரிஸுத்³த⁴காயஸமாசாரோ, பி⁴க்க²வே, ததா²க³தோ, நத்தி² ததா²க³தஸ்ஸ காயது³ச்சரிதம், யம் ததா²க³தோ ரக்கே²ய்ய ‘மா மே இத³ம் பரோ அஞ்ஞாஸீ’தி. பரிஸுத்³த⁴வசீஸமாசாரோ, பி⁴க்க²வே, ததா²க³தோ, நத்தி² ததா²க³தஸ்ஸ வசீது³ச்சரிதம், யம் ததா²க³தோ ரக்கே²ய்ய, ‘மா மே இத³ம் பரோ அஞ்ஞாஸீ’தி. பரிஸுத்³த⁴மனோஸமாசாரோ, பி⁴க்க²வே, ததா²க³தோ, நத்தி² ததா²க³தஸ்ஸ மனோது³ச்சரிதம், யம் ததா²க³தோ ரக்கே²ய்ய, ‘மா மே இத³ம் பரோ அஞ்ஞாஸீ’தி. பரிஸுத்³தா⁴ஜீவோ, பி⁴க்க²வே, ததா²க³தோ, நத்தி² ததா²க³தஸ்ஸ மிச்சா²ஆஜீவோ, யம் ததா²க³தோ ரக்கே²ய்ய ‘‘மா மே இத³ம் பரோ அஞ்ஞாஸீ’’தி (அ. நி. 7.58).

இதா³னி ப⁴க³வதோ யதா²பூ⁴தகு³ணே கதே²ந்தோ ப⁴க³வா ஹி, ப⁴ந்தேதிஆதி³மாஹ. தத்த² அனுப்பன்னஸ்ஸாதி கஸ்ஸபஸம்மாஸம்பு³த்³த⁴தோ பட்டா²ய அஞ்ஞேன ஸமணேன வா ப்³ராஹ்மணேன வா அனுப்பாதி³தபுப்³ப³ஸ்ஸ. அஸஞ்ஜாதஸ்ஸாதி இத³ம் அனுப்பன்னவேவசனமேவ. அனக்கா²தஸ்ஸாதி அஞ்ஞேன அதே³ஸிதஸ்ஸ. பச்சா² ஸமன்னாக³தாதி பட²மக³தஸ்ஸ ப⁴க³வதோ பச்சா² ஸமனுஆக³தா. இதி தே²ரோ யஸ்மா ஸப்³பே³பி ப⁴க³வதோ ஸீலாத³யோ கு³ணா அரஹத்தமக்³க³மேவ நிஸ்ஸாய ஆக³தா, தஸ்மா அரஹத்தமக்³க³மேவ நிஸ்ஸாய கு³ணம் கதே²ஸி. தேன ஸப்³ப³கு³ணா கதி²தாவ ஹோந்தி. அஹஞ்ச கோ², ப⁴ந்தேதி இத³ம் தே²ரோ ஸதே³வகே லோகே அக்³க³புக்³க³லஸ்ஸ அத்தனோ சேவ ஸங்க⁴ஸ்ஸ ச காயிகவாசஸிகம் பவாரேந்தோ ஆஹ.

பிதரா பவத்திதந்தி சக்கவத்திம்ஹி காலங்கதே வா பப்³ப³ஜிதே வா ஸத்தாஹச்சயேன சக்கம் அந்தரதா⁴யதி, ததோ த³ஸவித⁴ம் த்³வாத³ஸவித⁴ம் சக்கவத்திவத்தம் பூரேத்வா நிஸின்னஸ்ஸ புத்தஸ்ஸ அஞ்ஞம் பாதுப⁴வதி, தம் ஸோ பவத்தேதி. ரதனமயத்தா பன ஸதி³ஸட்டே²ன ததே³வ வத்தம் கத்வா ‘‘பிதரா பவத்தித’’ந்தி வுத்தம். யஸ்மா வா ஸோ ‘‘அப்போஸ்ஸுக்கோ த்வம், தே³வ, ஹோஹி, அஹமனுஸாஸிஸ்ஸாமீ’’தி ஆஹ, தஸ்மா பிதரா பவத்திதம் ஆணாசக்கம் அனுப்பவத்தேதி நாம. ஸம்மதே³வ அனுப்பவத்தேஸீதி ஸம்மா நயேன ஹேதுனா காரணேனேவ அனுப்பவத்தேஸி. ப⁴க³வா ஹி சதுஸச்சத⁴ம்மம் கதே²தி, தே²ரோ தமேவ அனுகதே²தி, தஸ்மா ஏவமாஹ. உப⁴தோபா⁴க³விமுத்தாதி த்³வீஹி பா⁴கே³ஹி விமுத்தா, அரூபாவசரஸமாபத்தியா ரூபகாயதோ விமுத்தா, அக்³க³மக்³கே³ன நாமகாயதோதி. பஞ்ஞாவிமுத்தாதி பஞ்ஞாய விமுத்தா தேவிஜ்ஜாதி³பா⁴வம் அப்பத்தா கீ²ணாஸவா.

விஸுத்³தி⁴யாதி விஸுத்³த⁴த்தா²ய. ஸம்யோஜனப³ந்த⁴னச்சி²தா³தி ஸம்யோஜனஸங்கா²தே சேவ ப³ந்த⁴னஸங்கா²தே ச கிலேஸே சி²ந்தி³த்வா டி²தா. விஜிதஸங்கா³மந்தி விஜிதராக³தோ³ஸமோஹஸங்கா³மம், மாரப³லஸ்ஸ விஜிதத்தாபி விஜிதஸங்கா³மம். ஸத்த²வாஹந்தி அட்ட²ங்கி³கமக்³க³ரதே² ஆரோபேத்வா வேனேய்யஸத்த²ம் வாஹேதி ஸம்ஸாரகந்தாரம் உத்தாரேதீதி ப⁴க³வா ஸத்த²வாஹோ, தம் ஸத்த²வாஹம். பலாபோதி அந்தோதுச்சோ² து³ஸ்ஸீலோ. ஆதி³ச்சப³ந்து⁴னந்தி ஆதி³ச்சப³ந்து⁴ம் ஸத்தா²ரம் த³ஸப³லம் வந்தா³மீதி வத³தி. ஸத்தமம்.

8. பரோஸஹஸ்ஸஸுத்தவண்ணனா

216. அட்ட²மே பரோஸஹஸ்ஸந்தி அதிரேகஸஹஸ்ஸம். அகுதோப⁴யந்தி நிப்³பா³னே குதோசி ப⁴யம் நத்தி², நிப்³பா³னப்பத்தஸ்ஸ வா குதோசி ப⁴யம் நத்தீ²தி நிப்³பா³னம் அகுதோப⁴யம் நாம. இஸீனம் இஸிஸத்தமோதி விபஸ்ஸிதோ பட்டா²ய இஸீனம் ஸத்தமகோ இஸி.

கிம் நு தே வங்கீ³ஸாதி இத³ம் ப⁴க³வா அத்து²ப்பத்திவஸேன ஆஹ. ஸங்க⁴மஜ்ஜே² கிர கதா² உத³பாதி³ ‘‘வங்கீ³ஸத்தே²ரோ விஸ்ஸட்ட²வத்தோ, நேவ உத்³தே³ஸே, ந பரிபுச்சா²ய, ந யோனிஸோமனஸிகாரே கம்மம் கரோதி, கா³தா² ப³ந்த⁴ந்தோ சுண்ணியபதா³னி கரோந்தோ விசரதீ’’தி. அத² ப⁴க³வா சிந்தேஸி – ‘‘இமே பி⁴க்கூ² வங்கீ³ஸஸ்ஸ படிபா⁴னஸம்பத்திம் ந ஜானந்தி, சிந்தேத்வா சிந்தேத்வா வத³தீதி மஞ்ஞந்தி, படிபா⁴னஸம்பத்திமஸ்ஸ ஜானாபேஸ்ஸாமீ’’தி சிந்தேத்வா, ‘‘கிம் நு தே வங்கீ³ஸா’’திஆதி³மாஹ.

உம்மக்³க³பத²ந்தி அனேகானி கிலேஸும்முஜ்ஜனஸதானி, வட்டபத²த்தா பன பத²ந்தி வுத்தம். பபி⁴ஜ்ஜ கி²லானீதி ராக³கி²லாதீ³னி பஞ்ச பி⁴ந்தி³த்வா சரஸி. தம் பஸ்ஸதா²தி தம் ஏவம் அபி⁴பு⁴ய்ய பி⁴ந்தி³த்வா சரந்தம் பு³த்³த⁴ம் பஸ்ஸத². ப³ந்த⁴பமுஞ்சகரந்தி ப³ந்த⁴னமோசனகரம். அஸிதந்தி அனிஸ்ஸிதம். பா⁴க³ஸோ பவிப⁴ஜந்தி ஸதிபட்டா²னாதி³கோட்டா²ஸவஸேன த⁴ம்மம் விப⁴ஜந்தம். பவிப⁴ஜ்ஜாதி வா பாடோ², அங்க³பச்சங்க³கோட்டா²ஸவஸேன விப⁴ஜித்வா விப⁴ஜித்வா பஸ்ஸதா²தி அத்தோ².

ஓக⁴ஸ்ஸாதி சதுரோக⁴ஸ்ஸ. அனேகவிஹிதந்தி ஸதிபட்டா²னாதி³வஸேன அனேகவித⁴ம். தஸ்மிம் ச அமதே அக்கா²தேதி தஸ்மிம் தேன அக்கா²தே அமதே. த⁴ம்மத்³த³ஸாதி த⁴ம்மஸ்ஸ பஸ்ஸிதாரோ. டி²தா அஸம்ஹீராதி அஸம்ஹாரியா ஹுத்வா பதிட்டி²தா.

அதிவிஜ்ஜா²தி அதிவிஜ்ஜி²த்வா. ஸப்³ப³ட்டி²தீனந்தி ஸப்³பே³ஸம் தி³ட்டி²ட்டா²னானம் விஞ்ஞாணட்டி²தீனம் வா. அதிக்கமமத்³த³ஸாதி அதிக்கமபூ⁴தம் நிப்³பா³னமத்³த³ஸ. அக்³க³ந்தி உத்தமத⁴ம்மம். அக்³கே³தி வா பாடோ², பட²மதரந்தி அத்தோ². த³ஸத்³தா⁴னந்தி பஞ்சன்னம், அக்³க³த⁴ம்மம் பஞ்சவக்³கி³யானம், அக்³கே³ வா பஞ்சவக்³கி³யானம் த⁴ம்மம் தே³ஸேஸீதி அத்தோ². தஸ்மாதி யஸ்மா ஏஸ த⁴ம்மோ ஸுதே³ஸிதோதி ஜானந்தேன ச பமாதோ³ ந காதப்³போ³, தஸ்மா. அனுஸிக்கே²தி திஸ்ஸோ ஸிக்கா² ஸிக்கே²ய்ய. அட்ட²மம்.

9. கோண்ட³ஞ்ஞஸுத்தவண்ணனா

217. நவமே அஞ்ஞாஸிகோண்ட³ஞ்ஞோதி பட²மம் த⁴ம்மஸ்ஸ அஞ்ஞாதத்தா ஏவம் க³ஹிதனாமோ தே²ரோ. ஸுசிரஸ்ஸேவாதி கீவசிரஸ்ஸ? த்³வாத³ஸன்னம் ஸம்வச்ச²ரானம். ஏத்தகம் காலம் கத்த² விஹாஸீதி. ச²த்³த³ந்தப⁴வனே மந்தா³கினிபோக்க²ரணியா தீரே பச்சேகபு³த்³தா⁴னம் வஸனட்டா²னே. கஸ்மா? விஹாரக³ருதாய. ஸோ ஹி பஞ்ஞவா மஹாஸாவகோ. யதே²வ ப⁴க³வதோ, ஏவமஸ்ஸ த³ஸஸஹஸ்ஸசக்கவாளே தே³வமனுஸ்ஸானம் அப்³ப⁴ந்தரே கு³ணா பத்த²டாவ. தே³வமனுஸ்ஸா ததா²க³தஸ்ஸ ஸந்திகம் க³ந்த்வா க³ந்த⁴மாலாதீ³ஹி பூஜம் கத்வா ‘‘அக்³க³த⁴ம்மம் படிவித்³த⁴ஸாவகோ’’தி அனந்தரம் தே²ரம் உபஸங்கமித்வா பூஜேந்தி. ஸந்திகம் ஆக³தானஞ்ச நாம ததா²ரூபா த⁴ம்மகதா² வா படிஸந்தா²ரோ வா காதப்³போ³ ஹோதி. தே²ரோ ச விஹாரக³ருகோ, தேனஸ்ஸ ஸோ பபஞ்சோ விய உபட்டா²தி. இதி விஹாரக³ருதாய தத்த² க³ந்த்வா விஹாஸி.

அபரம்பி காரணம் – பி⁴க்கா²சாரவேலாயம் தாவ ஸப்³ப³ஸாவகா வஸ்ஸக்³கே³ன க³ச்ச²ந்தி. த⁴ம்மதே³ஸனாகாலே பன மஜ்ஜ²ட்டா²னே அலங்கதபு³த்³தா⁴ஸனம்ஹி ஸத்த²ரி நிஸின்னே த³க்கி²ணஹத்த²பஸ்ஸே த⁴ம்மஸேனாபதி, வாமஹத்த²பஸ்ஸே மஹாமோக்³க³ல்லானத்தே²ரோ நிஸீத³தி, தேஸம் பிட்டி²பா⁴கே³ அஞ்ஞாஸிகோண்ட³ஞ்ஞத்தே²ரஸ்ஸ ஆஸனம் பஞ்ஞாபேந்தி. ஸேஸா பி⁴க்கூ² தம் பரிவாரேத்வா நிஸீத³ந்தி. த்³வே அக்³க³ஸாவகா அக்³க³த⁴ம்மபடிவித்³த⁴த்தா ச மஹல்லகத்தா ச தே²ரே ஸகா³ரவா தே²ரம் மஹாப்³ரஹ்மம் விய அக்³கி³க்க²ந்த⁴ம் விய ஆஸீவிஸம் விய ச மஞ்ஞமானா து⁴ராஸனே நிஸீத³ந்தா ஓத்தப்பந்தி ஹராயந்தி. தே²ரோ சிந்தேஸி – ‘‘இமேஹி து⁴ராஸனத்தா²ய கப்பஸதஸஹஸ்ஸாதி⁴கம் அஸங்க்²யேய்யம் பாரமியோ பூரிதா, தே இதா³னி து⁴ராஸனே நிஸீத³ந்தா மம ஓத்தப்பந்தி ஹராயந்தி, பா²ஸுவிஹாரம் நேஸம் கரிஸ்ஸாமீ’’தி. ஸோ பதிரூபே காலே ததா²க³தம் உபஸங்கமித்வா ‘‘இச்சா²மஹம், ப⁴ந்தே, ஜனபதே³ வஸிது’’ந்தி ஆஹ, ஸத்தா² அனுஜானி.

தே²ரோ ஸேனாஸனம் ஸம்ஸாமேத்வா பத்தசீவரமாதா³ய ச²த்³த³ந்தப⁴வனே மந்தா³கினிதீரம் க³தோ. புப்³பே³ பச்சேகபு³த்³தா⁴னம் பாரிசரியாய கதபரிசயா அட்ட²ஸஹஸ்ஸா ஹத்தி²னாகா³ தே²ரம் தி³ஸ்வாவ ‘‘அம்ஹாகம் புஞ்ஞக்கே²த்தம் ஆக³த’’ந்தி நகே²ஹி சங்கமனம் நித்திணம் கத்வா ஆவரணஸாகா² ஹரித்வா தே²ரஸ்ஸ வஸனட்டா²னம் படிஜக்³கி³த்வா வத்தம் கத்வா ஸப்³பே³ ஸன்னிபதித்வா மந்தயிம்ஸு – ‘‘ஸசே ஹி மயம் ‘அயம் தே²ரஸ்ஸ கத்தப்³ப³ம் கரிஸ்ஸதி, அயம் கரிஸ்ஸதீ’தி படிபஜ்ஜிஸ்ஸாம, தே²ரோ ப³ஹுஞாதிககா³மம் க³தோ விய யதா²தோ⁴தேனேவ பத்தேன க³மிஸ்ஸதி, வாரேன நம் படிஜக்³கி³ஸ்ஸாம, ஏகஸ்ஸ பன வாரே பத்தே ஸேஸேஹிபி நப்பமஜ்ஜிதப்³ப³’’ந்தி வாரம் ட²பயிம்ஸு. வாரிகனாகோ³ பாதோவ தே²ரஸ்ஸ முகோ²த³கஞ்ச த³ந்தகட்ட²ஞ்ச ட²பேதி, வத்தம் கரோதி.

மந்தா³கினிபோக்க²ரணீ நாம சேஸா பண்ணாஸயோஜனா ஹோதி. தஸ்ஸா பஞ்சவீஸதியோஜனமத்தே டா²னே ஸேவாலோ வா பணகம் வா நத்தி², ப²லிகவண்ணம் உத³கமேவ ஹோதி. ததோ பரம் பன கடிப்பமாணே உத³கே அட்³ட⁴யோஜனவித்த²தம் ஸேஸபது³மவனம் பண்ணாஸயோஜனம் ஸரம் பரிக்கி²பித்வா டி²தம். தத³னந்தரம் தாவ மஹந்தமேவ ரத்தபது³மவனம், தத³னந்தரம் ரத்தகுமுத³வனம், தத³னந்தரம் ஸேதகுமுத³வனம், தத³னந்தரம் நீலுப்பலவனம், தத³னந்தரம் ரத்துப்பலவனம், தத³னந்தரம் ஸுக³ந்த⁴ரத்தஸாலிவனம், தத³னந்தரம் ஏளாலுகலாபு³கும்ப⁴ண்டா³தீ³னி மது⁴ரரஸானி வல்லிப²லானி, தத³னந்தரம் அட்³ட⁴யோஜனவித்தா²ரமேவ உச்சு²வனம், தத்த² பூக³ருக்க²க்க²ந்த⁴ப்பமாணா உச்சூ², தத³னந்தரம் கத³லிவனம், யதோ து³வே பக்கானி கா²த³ந்தா கிலமந்தி, தத³னந்தரம் சாடிப்பமாணப²லம் பனஸவனம், தத³னந்தரம் ஜம்பு³வனம், தத³னந்தரம் அம்ப³வனம், தத³னந்தரம் கபித்த²வனந்தி. ஸங்கே²பதோ தஸ்மிம் த³ஹே கா²தி³தப்³ப³யுத்தகம் ப²லம் நாம நத்தீ²தி ந வத்தப்³ப³ம். குஸுமானம் புப்ப²னஸமயே வாதோ ரேணுவட்டிம் உட்டா²பேத்வா பது³மினிபத்தேஸு ட²பேதி, தத்த² உத³கபு²ஸிதானி பதந்தி. ததோ ஆதி³ச்சபாகேன பச்சித்வா பக்கபயோக⁴னிகா விய திட்ட²தி, ஏதம் போக்க²ரமது⁴ நாம, தம் தே²ரஸ்ஸ ஆஹரித்வா தே³ந்தி. முளாலம் நங்க³லஸீஸமத்தம் ஹோதி, தம்பி ஆஹரித்வா தே³ந்தி. பி⁴ஸம் மஹாபே⁴ரிபோக்க²ரப்பமாணம் ஹோதி, தஸ்ஸ ஏகஸ்மிம் பப்³பே³ பாத³க⁴டகப்பமாணம் கீ²ரம் ஹோதி, தம் ஆஹரித்வா தே³ந்தி. போக்க²ரட்டீ²னி மது⁴ஸக்க²ராய யோஜேத்வா தே³ந்தி. உச்சு²ம் பாஸாணபிட்டே² ட²பேத்வா பாதே³ன அக்கமந்தி. ததோ ரஸோ பக்³க⁴ரித்வா ஸோண்டி³ஆவாடே பூரேத்வா, ஆதி³ச்சபாகேன பச்சித்வா கீ²ரபாஸாணபிண்டோ³ விய திட்ட²தி, தம் ஆஹரித்வா தே³ந்தி. பனஸகத³லிஅம்ப³பக்காதீ³ஸு கதா²வ நத்தி².

கேலாஸபப்³ப³தே நாக³த³த்தோ நாம தே³வபுத்தோ வஸதி. தே²ரோ காலேன காலம் தஸ்ஸ விமானத்³வாரம் க³ச்ச²தி. ஸோ நவஸப்பிபோக்க²ரமது⁴சுண்ணயுத்தஸ்ஸ நிருத³கபாயாஸஸ்ஸ பத்தம் பூரேத்வா தே³தி. ஸோ கிர கஸ்ஸபபு³த்³த⁴காலே வீஸதிவஸ்ஸஸஹஸ்ஸானி ஸுக³ந்த⁴ஸப்பினா கீ²ரஸலாகம் அதா³ஸி. தேனஸ்ஸேதம் போ⁴ஜனம் உப்பஜ்ஜதி. ஏவம் தே²ரோ த்³வாத³ஸ வஸ்ஸானி வஸித்வா அத்தனோ ஆயுஸங்கா²ரம் ஓலோகேந்தோ பரிக்கீ²ணபா⁴வம் ஞத்வா ‘‘கத்த² பரினிப்³பா³யிஸ்ஸாமீ’’தி சிந்தேத்வா – ‘‘ஹத்தி²னாகே³ஹி மம் த்³வாத³ஸ வஸ்ஸானி உபட்ட²ஹந்தேஹி து³க்கரம் கதம், ஸத்தா²ரம் அனுஜானாபேத்வா ஏதேஸம்யேவ ஸந்திகே பரினிப்³பா³யிஸ்ஸாமீ’’தி ஆகாஸேன ப⁴க³வதோ ஸந்திகம் அக³மாஸி. தேன வுத்தம் ‘‘ஸுசிரஸ்ஸேவ யேன ப⁴க³வா தேனுபஸங்கமீ’’தி.

நாமஞ்சாதி கஸ்மா நாமம் ஸாவேதி? தே²ரஞ்ஹி கேசி ஸஞ்ஜானந்தி, கேசி ந ஸஞ்ஜானந்தி. தத்த² தே²ரோ சிந்தேஸி – ‘‘யே மம் அஜானந்தா ‘கோ ஏஸ பண்ட³ரஸீஸோ ஓப⁴க்³கோ³ கோ³பானஸிவங்கோ மஹல்லகோ ஸத்தா²ரா ஸத்³தி⁴ம் படிஸந்தா²ரம் கரோதீ’தி சித்தம் பதூ³ஸேஸ்ஸந்தி, தே அபாயபூரகா ப⁴விஸ்ஸந்தி. யே பன மம் ஜானந்தா – ‘த³ஸஸஹஸ்ஸசக்கவாளே ஸத்தா² விய பஞ்ஞாதோ பாகடோ மஹாஸாவகோ’தி சித்தம் பஸாதே³ஸ்ஸந்தி, தே ஸக்³கூ³பகா³ ப⁴விஸ்ஸந்தீ’’தி, ஸத்தானம் அபாயமக்³க³ம் பித³ஹித்வா ஸக்³க³மக்³க³ம் விவரந்தோ நாமம் ஸாவேதி.

பு³த்³தா⁴னுபு³த்³தோ⁴தி பட²மம் ஸத்தா² சத்தாரி ஸச்சானி பு³ஜ்ஜி², பச்சா² தே²ரோ, தஸ்மா பு³த்³தா⁴னுபு³த்³தோ⁴தி, வுச்சதி. திப்³ப³னிக்கமோதி பா³ள்ஹவீரியோ. விவேகானந்தி திண்ணம் விவேகானம். தேவிஜ்ஜோ, சேதோபரியாயகோவிதோ³தி ச²ஸு அபி⁴ஞ்ஞாஸு சதஸ்ஸோ வத³தி. இதரா த்³வே கிஞ்சாபி ந வுத்தா, தே²ரோ பன ச²ளபி⁴ஞ்ஞோவ. இமிஸ்ஸா ச கா³தா²ய பரியோஸானே பரிஸா ஸன்னிஸீதி³. பரிஸாய ஸன்னிஸின்னபா⁴வம் ஞத்வா தே²ரோ ஸத்தா²ரா ஸத்³தி⁴ம் படிஸந்தா²ரம் கத்வா ‘‘பரிக்கீ²ணா மே, ப⁴ந்தே, ஆயுஸங்கா²ரா, பரினிப்³பா³யிஸ்ஸாமீ’’தி, பரினிப்³பா³னகாலம் அனுஜானாபேஸி. கத்த² பரினிப்³பா³யிஸ்ஸஸி கோண்ட³ஞ்ஞாதி? உபட்டா²கேஹி மே, ப⁴ந்தே, ஹத்தி²னாகே³ஹி து³க்கரம் கதம், தேஸம் ஸந்திகேதி. ஸத்தா² அனுஜானி.

தே²ரோ த³ஸப³லம் பத³க்கி²ணம் கத்வா – ‘‘புப்³ப³ம் தம் மே, ப⁴ந்தே, பட²மத³ஸ்ஸனம், இத³ம் பச்சி²மத³ஸ்ஸன’’ந்தி பரிதே³வந்தே மஹாஜனே ஸத்தா²ரம் வந்தி³த்வா நிக்க²மித்வா, த்³வாரகோட்ட²கே டி²தோ – ‘‘மா ஸோசித்த², மா பரிதே³வித்த², பு³த்³தா⁴ வா ஹோந்து பு³த்³த⁴ஸாவகா வா, உப்பன்னா ஸங்கா²ரா அபி⁴ஜ்ஜனகா நாம நத்தீ²’’தி மஹாஜனம் ஓவதி³த்வா பஸ்ஸந்தஸ்ஸேவ மஹாஜனஸ்ஸ வேஹாஸம் அப்³பு⁴க்³க³ம்ம மந்தா³கினிதீரே ஓதரித்வா போக்க²ரணியம் ந்ஹத்வா நிவத்த²னிவாஸனோ கதுத்தராஸங்கோ³ ஸேனாஸனம் ஸம்ஸாமேத்வா ப²லஸமாபத்தியா தயோ யாமே வீதினாமேத்வா ப³லவபச்சூஸஸமயே பரினிப்³பா³யி. தே²ரஸ்ஸ ஸஹபரினிப்³பா³னா ஹிமவதி ஸப்³ப³ருக்கா² புப்பே²ஹி ச ப²லேஹி ச ஓனதவினதா அஹேஸும். வாரிகனாகோ³ தே²ரஸ்ஸ பரினிப்³பு³தபா⁴வம் அஜானந்தோ பாதோவ முகோ²த³கத³ந்தகட்டா²னி உபட்ட²பேத்வா வத்தம் கத்வா கா²த³னீயப²லானி ஆஹரித்வா சங்கமனகோடியம் அட்டா²ஸி. ஸோ யாவ ஸூரியுக்³க³மனா தே²ரஸ்ஸ நிக்க²மனம் அபஸ்ஸந்தோ ‘‘கிம் நு கோ² ஏதம்? புப்³பே³ அய்யோ பாதோவ சங்கமதி, முக²ம் தோ⁴வதி. அஜ்ஜ பன பண்ணஸாலதோபி ந நிக்க²மதீ’’தி குடித்³வாரம் கம்பேத்வா ஓலோகேந்தோ தே²ரம் நிஸின்னகமேவ தி³ஸ்வா ஹத்த²ம் பஸாரேத்வா பராமஸித்வா அஸ்ஸாஸபஸ்ஸாஸே பரியேஸந்தோ தேஸம் அப்பவத்திபா⁴வம் ஞத்வா – ‘‘பரினிப்³பு³தோ தே²ரோ’’தி ஸோண்ட³ம் முகே² பக்கி²பித்வா மஹாரவம் விரவி. ஸகலஹிமவந்தோ ஏகனின்னாதோ³ அஹோஸி. அட்ட²னாக³ஸஹஸ்ஸானி ஸன்னிபதித்வா தே²ரம் ஜேட்ட²கனாக³ஸ்ஸ கும்பே⁴ நிஸீதா³பேத்வா ஸுபுப்பி²தருக்க²ஸாகா² க³ஹேத்வா பரிவாரேத்வா ஸகலஹிமவந்தம் அனுவிசரித்வா ஸகட்டா²னமேவ ஆக³தா.

ஸக்கோ விஸ்ஸகம்மம் ஆமந்தேஸி – ‘‘தாத, அம்ஹாகம் ஜேட்ட²பா⁴தா பரினிப்³பு³தோ, ஸக்காரம் கரிஸ்ஸாம, நவயோஜனிகம் ஸப்³ப³ரதனமயம் கூடாகா³ரம் மாபேஹீ’’தி. ஸோ ததா² கத்வா தே²ரம் தத்த² நிபஜ்ஜாபேத்வா ஹத்தி²னாகா³னம் அதா³ஸி. தே கூடாகா³ரம் உக்கி²பித்வா தியோஜனஸஹஸ்ஸம் ஹிமவந்தம் புனப்புனம் ஆவிஜ்ஜி²ம்ஸு. தேஸம் ஹத்த²தோ ஆகாஸட்ட²கா தே³வா க³ஹேத்வா ஸாது⁴கீளிதம் கீளிம்ஸு. ததோ வஸ்ஸவலாஹகா ஸீதவலாஹகா உண்ஹவலாஹகா சாதுமஹாராஜிகா தாவதிம்ஸாதி ஏதேனுபாயேன யாவ ப்³ரஹ்மலோகா கூடாகா³ரம் அக³மாஸி, புன ப்³ரஹ்மானோ தே³வானந்தி அனுபுப்³பே³ன ஹத்தி²னாகா³னம்யேவ கூடாகா³ரம் அத³ம்ஸு. ஏகேகா தே³வதா சதுரங்கு³லமத்தம் சந்த³னக⁴டிகம் ஆஹரி, சிதகோ நவயோஜனிகோ அஹோஸி. கூடாகா³ரம் சிதகம் ஆரோபயிம்ஸு. பஞ்ச பி⁴க்கு²ஸதானி ஆகாஸேனாக³ந்த்வா ஸப்³ப³ரத்திம் ஸஜ்ஜா²யமகம்ஸு. அனுருத்³த⁴த்தே²ரோ த⁴ம்மம் கதே²ஸி, ப³ஹூனம் தே³வதானம் த⁴ம்மாபி⁴ஸமயோ அஹோஸி. புனதி³வஸே அருணுக்³க³மனவேலாயமேவ சிதகம் நிப்³பா³பேத்வா ஸுமனமகுளவண்ணானம் தா⁴தூனம் பரிஸாவனம் பூரேத்வா ப⁴க³வதி நிக்க²மித்வா வேளுவனவிஹாரகோட்ட²கம் ஸம்பத்தே ஆஹரித்வா ஸத்து² ஹத்தே² ட²பயிம்ஸு. ஸத்தா² தா⁴துபரிஸாவனம் க³ஹேத்வா பத²வியா ஹத்த²ம் பஸாரேஸி, மஹாபத²விம் பி⁴ந்தி³த்வா ரஜதபு³ப்³பு³ளஸதி³ஸம் சேதியம் நிக்க²மி. ஸத்தா² ஸஹத்தே²ன சேதியே தா⁴துயோ நிதே⁴ஸி. அஜ்ஜாபி கிர தம் சேதியம் த⁴ரதியேவாதி. நவமம்.

10. மோக்³க³ல்லானஸுத்தவண்ணனா

218. த³ஸமே ஸமன்னேஸதீதி பரியேஸதி பச்சவேக்க²தி. நக³ஸ்ஸாதி பப்³ப³தஸ்ஸ. முனிந்தி பு³த்³த⁴முனிம். து³க்க²ஸ்ஸ பாரகு³ந்தி து³க்க²பாரம் க³தம். ஸமன்னேஸந்தி ஸமன்னேஸந்தோ. ஏவம் ஸப்³ப³ங்க³ஸம்பன்னந்தி ஏவம் ஸப்³ப³கு³ணஸம்பன்னம். அனேகாகாரஸம்பன்னந்தி அனேகேஹி கு³ணேஹி ஸமன்னாக³தம். த³ஸமம்.

11. க³க்³க³ராஸுத்தவண்ணனா

219. ஏகாத³ஸமே த்யாஸ்ஸுத³ந்தி தே அஸ்ஸுத³ம். அஸ்ஸுத³ந்தி நிபாதமத்தம். வண்ணேனாதி ஸரீரவண்ணேன. யஸஸாதி பரிவாரேன. விக³தமலோவ பா⁴ணுமாதி விக³தமலோ ஆதி³ச்சோ விய. ஏகாத³ஸமம்.

12. வங்கீ³ஸஸுத்தவண்ணனா

220. த்³வாத³ஸமே ஆயஸ்மாதி பியவசனம். வங்கீ³ஸோதி தஸ்ஸ தே²ரஸ்ஸ நாமம். ஸோ கிர புப்³பே³ பது³முத்தரகாலே படிபா⁴னஸம்பன்னம் ஸாவகம் தி³ஸ்வா தா³னம் த³த்வா பத்த²னம் கத்வா கப்பஸதஸஹஸ்ஸம் பாரமியோ பூரேத்வா அம்ஹாகம் ப⁴க³வதோ காலே ஸகலஜம்பு³தீ³பே வாத³காமதாய ஜம்பு³ஸாக²ம் பரிஹரித்வா ஏகேன பரிப்³பா³ஜகேன ஸத்³தி⁴ம் வாத³ம் கத்வா வாதே³ ஜயபராஜயானுபா⁴வேன தேனேவ பரிப்³பா³ஜகேன ஸத்³தி⁴ம் ஸம்வாஸம் கப்பேத்வா வஸமானாய ஏகிஸ்ஸா பரிப்³பா³ஜிகாய குச்சி²ம்ஹி நிப்³ப³த்தோ வயம் ஆக³ம்ம மாதிதோ பஞ்சவாத³ஸதானி, பிதிதோ பஞ்சவாத³ஸதானீதி வாத³ஸஹஸ்ஸம் உக்³க³ண்ஹித்வா விசரதி. ஏகஞ்ச விஜ்ஜம் ஜானாதி, யம் விஜ்ஜம் பரிஜப்பித்வா மதானம் ஸீஸம் அங்கு³லியா பஹரித்வா – ‘‘அஸுகட்டா²னே நிப்³ப³த்தோ’’தி ஜானாதி. ஸோ அனுபுப்³பே³ன கா³மனிக³மாதீ³ஸு விசரந்தோ பஞ்சஹி மாணவகஸதேஹி ஸத்³தி⁴ம் ஸாவத்தி²ம் அனுப்பத்தோ நக³ரத்³வாரே ஸாலாய நிஸீத³தி.

ததா³ ச நக³ரவாஸினோ புரேப⁴த்தம் தா³னம் த³த்வா பச்சா²ப⁴த்தம் ஸுத்³து⁴த்தராஸங்கா³ க³ந்த⁴மாலாதி³ஹத்தா² த⁴ம்மஸ்ஸவனாய விஹாரம் க³ச்ச²ந்தி. மாணவோ தி³ஸ்வா, ‘‘கஹம் க³ச்ச²தா²’’தி? புச்சி². தே ‘‘த³ஸப³லஸ்ஸ ஸந்திகம் த⁴ம்மஸ்ஸவனாயா’’தி ஆஹம்ஸு. ஸோபி ஸபரிவாரோ தேஹி ஸத்³தி⁴ம் க³ந்த்வா படிஸந்தா²ரம் கத்வா ஏகமந்தம் அட்டா²ஸி. அத² நம் ப⁴க³வா ஆஹ – ‘‘வங்கீ³ஸ, ப⁴த்³த³கம் கிர ஸிப்பம் ஜானாஸீ’’தி. ‘‘போ⁴ கோ³தம, அஹம் ப³ஹுஸிப்பம் ஜானாமி. தும்ஹே கதரம் ஸந்தா⁴ய வத³தா²’’தி? ச²வதூ³ஸகஸிப்பந்தி. ஆம, போ⁴ கோ³தமாதி. அத²ஸ்ஸ ப⁴க³வா அத்தனோ ஆனுபா⁴வேன நிரயே நிப்³ப³த்தஸ்ஸ ஸீஸம் த³ஸ்ஸேத்வா, ‘‘வங்கீ³ஸ, அயம் கஹம் நிப்³ப³த்தோ’’தி புச்சி². ஸோ மந்தம் ஜப்பித்வா அங்கு³லியா பஹரித்வா ‘‘நிரயே’’தி ஆஹ. ‘‘ஸாது⁴, வங்கீ³ஸ, ஸுகதி²த’’ந்தி தே³வலோகே நிப்³ப³த்தஸ்ஸ ஸீஸம் த³ஸ்ஸேஸி. தம்பி ஸோ ததே²வ ப்³யாகாஸி. அத²ஸ்ஸ கீ²ணாஸவஸ்ஸ ஸீஸம் த³ஸ்ஸேஸி. ஸோ புனப்புனம் மந்தம் பரிவத்தேத்வாபி அங்கு³லியா பஹரித்வாபி நிப்³ப³த்தட்டா²னம் ந பஸ்ஸதி.

அத² நம் ப⁴க³வா ‘‘கிலமஸி, வங்கீ³ஸா’’தி ஆஹ? ஆம போ⁴, கோ³தமாதி. புனப்புனம் உபதா⁴ரேஹீதி. ததா² கரோந்தோபி அதி³ஸ்வா, ‘‘தும்ஹே, போ⁴ கோ³தம, ஜானாதா²’’தி ஆஹ. ஆம, வங்கீ³ஸ, மம் நிஸ்ஸாய சேஸ க³தோ, அஹமஸ்ஸ க³திம் ஜானாமீதி. மந்தேன ஜானாஸி, போ⁴ கோ³தமாதி? ஆம, வங்கீ³ஸ, ஏகேன மந்தேனேவ ஜானாமீதி. போ⁴ கோ³தம, மய்ஹம் மந்தேன இமம் மந்தம் தே³தா²தி. அமூலிகோ, வங்கீ³ஸ, மய்ஹம் மந்தோதி. தே³த², போ⁴ கோ³தமாதி. ந ஸக்கா மய்ஹம் ஸந்திகே அபப்³ப³ஜிதஸ்ஸ தா³துந்தி. ஸோ அந்தேவாஸிகே ஆமந்தேஸி – ‘‘தாதா ஸமணோ கோ³தமோ அதிரேகஸிப்பம் ஜானாதி, அஹம் இமஸ்ஸ ஸந்திகே பப்³ப³ஜித்வா ஸிப்பம் க³ண்ஹாமி, ததோ ஸகலஜம்பு³தீ³பே அம்ஹேஹி ப³ஹுதரம் ஜானந்தோ நாம ந ப⁴விஸ்ஸதி. தும்ஹே யாவ அஹம் ஆக³ச்சா²மி, தாவ அனுக்கண்டி²த்வா விசரதா²’’தி தே உய்யோஜேத்வா ‘‘பப்³பா³ஜேத² ம’’ந்தி ஆஹ. ஸத்தா² நிக்³ரோத⁴கப்பஸ்ஸ படிபாதே³ஸி. தே²ரோ தம் அத்தனோ வஸனட்டா²னம் நேத்வா பப்³பா³ஜேஸி. ஸோ பப்³ப³ஜித்வா ஸத்து² ஸந்திகம் ஆக³ம்ம வந்தி³த்வா டி²தோ ‘‘ஸிப்பம் தே³தா²’’தி யாசி. வங்கீ³ஸ, தும்ஹே ஸிப்பம் க³ண்ஹந்தா அலோணபோ⁴ஜனத²ண்டி³லஸேய்யாதீ³ஹி பரிகம்மம் கத்வா க³ண்ஹத², இமஸ்ஸாபி ஸிப்பஸ்ஸ பரிகம்மம் அத்தி², தம் தாவ கரோஹீதி. ஸாது⁴, ப⁴ந்தேதி. அத²ஸ்ஸ ஸத்தா² த்³வத்திம்ஸாகாரகம்மட்டா²னம் ஆசிக்கி². ஸோ தம் அனுலோமபடிலோமம் மனஸிகரோந்தோ விபஸ்ஸனம் வட்³டே⁴த்வா அனுக்கமேன அரஹத்தம் பாபுணி.

விமுத்திஸுக²ம் படிஸம்வேதீ³தி ஏவம் அரஹத்தம் பத்வா விமுத்திஸுக²ம் படிஸம்வேதே³ந்தோ. காவேய்யமத்தாதி காவேய்யேன கப்³ப³கரணேன மத்தா. க²ந்தா⁴யதனதா⁴துயோதி இமானி க²ந்தா⁴தீ³னி பகாஸேந்தோ த⁴ம்மம் தே³ஸேஸி. யே நியாமக³தத்³த³ஸாதி யே நியாமக³தா சேவ நியாமத³ஸ்ஸாதி ச. ஸ்வாக³தந்தி ஸுஆக³மனம். இத்³தி⁴பத்தோம்ஹீதி இமினா இத்³தி⁴வித⁴ஞாணம் க³ஹிதம். சேதோபரியாயகோவிதோ³தி இமினா சேதோபரியஞாணம். தி³ப்³ப³ஸோதம் பன அவுத்தம்பி க³ஹிதமேவ ஹோதி. ஏவம் ச² அபி⁴ஞ்ஞாபத்தோ ஏஸோ மஹாஸாவகோதி வேதி³தப்³போ³. த்³வாத³ஸமம்.

இதி ஸாரத்த²ப்பகாஸினியா

ஸம்யுத்தனிகாய-அட்ட²கதா²ய

வங்கீ³ஸஸம்யுத்தவண்ணனா நிட்டி²தா.