4. அருணவதீஸுத்தவண்ணனா

185. சதுத்தே² அபி⁴பூ⁴ஸம்ப⁴வந்தி அபி⁴பூ⁴ ச ஸம்ப⁴வோ ச. தேஸு அபி⁴பூ⁴தே²ரோ ஸாரிபுத்தத்தே²ரோ விய பஞ்ஞாய அக்³கோ³, ஸம்ப⁴வத்தே²ரோ மஹாமோக்³க³ல்லானோ விய ஸமாதி⁴னா அக்³கோ³. உஜ்ஜா²யந்தீதி அவஜ்ஜா²யந்தி, லாமகதோ வா சிந்தேந்தி. கி²ய்யந்தீதி, கின்னாமேதம் கின்னாமேதந்தி? அஞ்ஞமஞ்ஞம் கதே²ந்தி. விபாசேந்தீதி வித்தா²ரயந்தா புனப்புனம் கதே²ந்தி. ஹேட்டி²மேன உபட்³ட⁴காயேனாதி நாபி⁴தோ பட்டா²ய ஹேட்டி²மகாயேன. பாளியம் ஏத்தகமேவ ஆக³தம். தே²ரோ பன ‘‘பகதிவண்ணம் விஜஹித்வா நாக³வண்ணம் க³ஹேத்வா த³ஸ்ஸேதி, ஸுபண்ணவண்ணம் க³ஹேத்வா வா த³ஸ்ஸேதீ’’திஆதி³னா (படி. ம. 3.13) நயேன ஆக³தம் அனேகப்பகாரம் இத்³தி⁴விகுப்³ப³னம் த³ஸ்ஸேஸி. இமா கா³தா²யோ அபா⁴ஸீதி தே²ரோ கிர சிந்தேஸி – ‘‘கத²ம் தே³ஸிதா நு கோ² த⁴ம்மதே³ஸனா ஸப்³பே³ஸம் பியா அஸ்ஸ மனாபா’’தி. ததோ ஆவஜ்ஜேந்தோ – ‘‘ஸப்³பே³பி பாஸண்டா³ ஸப்³பே³ தே³வமனுஸ்ஸா அத்தனோ அத்தனோ ஸமயே புரிஸகாரம் வண்ணயந்தி, வீரியஸ்ஸ அவண்ணவாதீ³ நாம நத்தி², வீரியபடிஸம்யுத்தம் கத்வா தே³ஸேஸ்ஸாமி, ஏவம் அயம் த⁴ம்மதே³ஸனா ஸப்³பே³ஸம் பியா ப⁴விஸ்ஸதி மனாபா’’தி ஞத்வா தீஸு பிடகேஸு விசினித்வா இமா கா³தா² அபா⁴ஸி.

தத்த² ஆரம்ப⁴தா²தி ஆரம்ப⁴வீரியம் கரோத². நிக்கமதா²தி நிக்கமவீரியம் கரோத². யுஞ்ஜதா²தி பயோக³ம் கரோத² பரக்கமத². மச்சுனோ ஸேனந்தி மச்சுனோ ஸேனா நாம கிலேஸஸேனா, தம் து⁴னாத². ஜாதிஸம்ஸாரந்தி ஜாதிஞ்ச ஸம்ஸாரஞ்ச, ஜாதிஸங்கா²தம் வா ஸம்ஸாரம். து³க்க²ஸ்ஸந்தம் கரிஸ்ஸதீதி வட்டது³க்க²ஸ்ஸ பரிச்சே²த³ம் கரிஸ்ஸதி. கிம் பன கத்வா தே²ரோ ஸஹஸ்ஸிலோகதா⁴தும் விஞ்ஞாபேஸீதி? நீலகஸிணம் தாவ ஸமாபஜ்ஜித்வா ஸப்³ப³த்த² ஆலோகட்டா²னே அந்த⁴காரம் ப²ரி, ஓதா³தகஸிணம் ஸமாபஜ்ஜித்வா அந்த⁴காரட்டா²னே ஓபா⁴ஸம். ததோ ‘‘கிமித³ம் அந்த⁴கார’’ந்தி? ஸத்தானம் ஆபோ⁴கே³ உப்பன்னே ஆலோகம் த³ஸ்ஸேஸி. ஆலோகட்டா²னே ஆலோககிச்சம் நத்தி², ‘‘கிம் ஆலோகோ அய’’ந்தி? விசினந்தானம் அத்தானம் த³ஸ்ஸேஸி. அத² தேஸம் தே²ரோதி வத³ந்தானம் இமா கா³தா²யோ அபா⁴ஸி, ஸப்³பே³ ஓஸடாய பரிஸாய மஜ்ஜே² நிஸீதி³த்வா த⁴ம்மம் தே³ஸேந்தஸ்ஸ விய ஸத்³த³ம் ஸுணிம்ஸு. அத்தோ²பி நேஸம் பாகடோ அஹோஸி. சதுத்த²ம்.