1. ஸனங்குமாரஸுத்தவண்ணனா

182. து³தியவக்³க³ஸ்ஸ பட²மே ஸப்பினீதீரேதி ஸப்பினீனாமிகாய நதி³யா தீரே. ஸனங்குமாரோதி ஸோ கிர பஞ்சஸிக²குமாரககாலே ஜா²னம் பா⁴வேத்வா ப்³ரஹ்மலோகே நிப்³ப³த்தோ குமாரகவண்ணேனேவ விசரதி. தேன நம் ‘‘குமாரோ’’தி ஸஞ்ஜானந்தி, போராணகத்தா பன ‘‘ஸனங்குமாரோ’’தி வுச்சதி. ஜனேதஸ்மிந்தி ஜனிதஸ்மிம், பஜாயாதி அத்தோ². யே கோ³த்தபடிஸாரினோதி யே ஜனேதஸ்மிம் கோ³த்தம் படிஸரந்தி தேஸு லோகே கோ³த்தபடிஸாரீஸு க²த்தியோ ஸேட்டோ². விஜ்ஜாசரணஸம்பன்னோதி ப⁴யபே⁴ரவஸுத்தபரியாயேன (ம. நி. 1.34 ஆத³யோ) புப்³பே³னிவாஸாதீ³ஹி வா தீஹி, அம்ப³ட்ட²ஸுத்தபரியாயேன (தீ³. நி. 1.278 ஆத³யோ) விபஸ்ஸனாஞாணம் மனோமயித்³தி⁴ ச² அபி⁴ஞ்ஞாயோதி இமாஹி வா அட்ட²ஹி விஜ்ஜாஹி, ஸீலேஸு பரிபூரகாரிதா இந்த்³ரியேஸு கு³த்தத்³வாரதா போ⁴ஜனே மத்தஞ்ஞுதா ஜாக³ரியானுயோகோ³ ஸத்த ஸத்³த⁴ம்மா சத்தாரி ரூபாவசரஜ்ஜா²னானீதி ஏவம் பன்னரஸத⁴ம்மபே⁴தே³ன சரணேன ச ஸமன்னாக³தோ. ஸோ ஸேட்டோ² தே³வமானுஸேதி ஸோ கீ²ணாஸவப்³ராஹ்மணோ தே³வேஸு ச மனுஸ்ஸேஸு ச ஸேட்டோ² உத்தமோதி. பட²மம்.