1. பட²மவக்³கோ³

1. ப்³ரஹ்மாயாசனஸுத்தவண்ணனா

172. ப்³ரஹ்மஸம்யுத்தஸ்ஸ பட²மே பரிவிதக்கோ உத³பாதீ³தி ஸப்³ப³பு³த்³தா⁴னம் ஆசிண்ணஸமாசிண்ணோ அயம் சேதஸோ விதக்கோ உத³பாதி³. கதா³ உத³பாதீ³தி? பு³த்³த⁴பூ⁴தஸ்ஸ அட்ட²மே ஸத்தாஹே ராஜாயதனமூலே ஸக்கேன தே³வானமிந்தே³ன ஆப⁴தம் த³ந்தகட்ட²ஞ்ச ஓஸத⁴ஹரீதகஞ்ச கா²தி³த்வா முக²ம் தோ⁴வித்வா சதூஹி லோகபாலேஹி உபனீதே பச்சக்³கே⁴ ஸேலமயபத்தே தபுஸ்ஸப⁴ல்லிகானம் பிண்ட³பாதம் பரிபு⁴ஞ்ஜித்வா புன பச்சாக³ந்த்வா அஜபாலனிக்³ரோதே⁴ நிஸின்னமத்தஸ்ஸ.

அதி⁴க³தோதி படிவித்³தோ⁴. த⁴ம்மோதி சதுஸச்சத⁴ம்மோ. க³ம்பீ⁴ரோதி உத்தானபடிக்கே²பவசனமேதம். து³த்³த³ஸோதி க³ம்பீ⁴ரத்தாவ து³த்³த³ஸோ து³க்கே²ன த³ட்ட²ப்³போ³, ந ஸக்கா ஸுகே²ன த³ட்டு²ம். து³த்³த³ஸத்தாவ து³ரனுபோ³தோ⁴ து³க்கே²ன அவபு³ஜ்ஜி²தப்³போ³, ந ஸக்கா ஸுகே²ன அவபு³ஜ்ஜி²தும். ஸந்தோதி நிப்³பு³தோ. பணீதோதி அதப்பகோ. இத³ம் த்³வயம் லோகுத்தரமேவ ஸந்தா⁴ய வுத்தம். அதக்காவசரோதி தக்கேன அவசரிதப்³போ³ ஓகா³ஹிதப்³போ³ ந ஹோதி, ஞாணேனேவ அவசரிதப்³போ³. நிபுணோதி ஸண்ஹோ. பண்டி³தவேத³னீயோதி ஸம்மாபடிபத³ம் படிபன்னேஹி பண்டி³தேஹி வேதி³தப்³போ³. ஆலயராமாதி ஸத்தா பஞ்சஸு காமகு³ணேஸு அல்லீயந்தி, தஸ்மா தே ஆலயாதி வுச்சந்தி. அட்ட²ஸததண்ஹாவிசரிதானி வா அல்லீயந்தி, தஸ்மாபி ஆலயாதி வுச்சந்தி. தேஹி ஆலயேஹி ரமந்தீதி ஆலயராமா. ஆலயேஸு ரதாதி ஆலயரதா. ஆலயேஸு ஸுட்டு² முதி³தாதி ஆலயஸம்முதி³தா. யதே²வ ஹி ஸுஸஜ்ஜிதம் புப்ப²ப²லப⁴ரிதருக்கா²தி³ஸம்பன்னம் உய்யானம் பவிட்டோ² ராஜா தாய தாய ஸம்பத்தியா ரமதி, ஸம்முதி³தோ ஆமோதி³தபமோதி³தோ ஹோதி, ந உக்கண்ட²தி, ஸாயம்பி நிக்க²மிதும் ந இச்ச²தி, ஏவமிமேஹிபி காமாலயதண்ஹாலயேஹி ஸத்தா ரமந்தி, ஸம்ஸாரவட்டே ஸம்முதி³தா அனுக்கண்டி²தா வஸந்தி. தேன தேஸம் ப⁴க³வா து³வித⁴ம் ஆலயம் உய்யானபூ⁴மிம் விய த³ஸ்ஸேந்தோ ‘‘ஆலயராமா’’திஆதி³மாஹ.

தத்த² யதி³த³ந்தி நிபாதோ, தஸ்ஸ டா²னம் ஸந்தா⁴ய ‘‘யம் இத³’’ந்தி, படிச்சஸமுப்பாத³ம் ஸந்தா⁴ய ‘‘யோ அய’’ந்தி ஏவமத்தோ² த³ட்ட²ப்³போ³. இத³ப்பச்சயதாபடிச்சஸமுப்பாதோ³தி இமேஸம் பச்சயா இத³ப்பச்சயா, இத³ப்பச்சயா ஏவ இத³ப்பச்சயதா, இத³ப்பச்சயதா ச ஸா படிச்சஸமுப்பாதோ³ சாதி இத³ப்பச்சயதாபடிச்சஸமுப்பாதோ³. ஸங்கா²ராதி³பச்சயானம் ஏதம் அதி⁴வசனம். ஸப்³ப³ஸங்கா²ரஸமதோ²திஆதி³ ஸப்³ப³ம் நிப்³பா³னமேவ. யஸ்மா ஹி தம் ஆக³ம்ம ஸப்³ப³ஸங்கா²ரவிப்ப²ந்தி³தானி ஸமந்தி, வூபஸம்மந்தி, தஸ்மா ஸப்³ப³ஸங்கா²ரஸமதோ²தி வுச்சதி. யஸ்மா ச தம் ஆக³ம்ம ஸப்³பே³ உபத⁴யோ படினிஸ்ஸட்டா² ஹோந்தி, ஸப்³பா³ தண்ஹா கீ²யந்தி, ஸப்³பே³ கிலேஸராகா³ விரஜ்ஜந்தி, ஸப்³ப³ம் து³க்க²ம் நிருஜ்ஜ²தி, தஸ்மா ஸப்³பூ³பதி⁴படினிஸ்ஸக்³கோ³ தண்ஹாக்க²யோ விராகோ³ நிரோதோ⁴தி வுச்சதி. யா பனேஸா தண்ஹா ப⁴வேன ப⁴வம், ப²லேன வா ஸத்³தி⁴ம் கம்மம் வினதி ஸம்ஸிப்³ப³தீதி கத்வா வானந்தி வுச்சதி, ததோ நிக்க²ந்தம் வானதோதி நிப்³பா³னம். ஸோ மமஸ்ஸ கிலமதோ²தி யா அஜானந்தானம் தே³ஸனா நாம, ஸோ மம கிலமதோ² அஸ்ஸ, ஸா மம விஹேஸா அஸ்ஸாதி அத்தோ². காயகிலமதோ² சேவ காயவிஹேஸா ச அஸ்ஸாதி வுத்தம் ஹோதி. சித்தே பன உப⁴யம்பேதம் பு³த்³தா⁴னம் நத்தி². அபிஸ்ஸூதி அனுப்³ரூஹனத்தே² நிபாதோ. ஸோ ‘‘ந கேவலம் அயம் பரிவிதக்கோ உத³பாதி³, இமாபி கா³தா² படிப⁴ம்ஸூ’’தி தீ³பேதி. அனச்ச²ரியாதி அனுஅச்ச²ரியா. படிப⁴ம்ஸூதி படிபா⁴னஸங்கா²தஸ்ஸ ஞாணஸ்ஸ கோ³சரா அஹேஸும், பரிவிதக்கயிதப்³ப³தம் பாபுணிம்ஸு.

கிச்சே²னாதி து³க்கே²ன, ந து³க்கா²ய படிபதா³ய. பு³த்³தா⁴னம் ஹி சத்தாரோபி மக்³கா³ ஸுக²படிபதா³வ ஹோந்தி. பாரமீபூரணகாலே பன ஸராக³ஸதோ³ஸஸமோஹஸ்ஸேவ ஸதோ ஆக³தாக³தானம் யாசகானம் அலங்கதபடியத்தம் ஸீஸம் கந்தித்வா க³லலோஹிதம் நீஹரித்வா ஸுஅஞ்ஜிதானி அக்கீ²னி உப்பாடேத்வா குலவம்ஸப்பதீ³பம் புத்தம் மனாபசாரினிம் ப⁴ரியந்தி ஏவமாதீ³னி தே³ந்தஸ்ஸ அஞ்ஞானி ச க²ந்திவாதி³ஸதி³ஸேஸு அத்தபா⁴வேஸு சே²ஜ்ஜபே⁴ஜ்ஜாதீ³னி பாபுணந்தஸ்ஸ ஆக³மனீயபடிபத³ம் ஸந்தா⁴யேதம் வுத்தம். ஹலந்தி ஏத்த² ஹ-காரோ நிபாதமத்தோ, அலந்தி அத்தோ². பகாஸிதுந்தி தே³ஸிதும், ஏவம் கிச்சே²ன அதி⁴க³தஸ்ஸ அலம் தே³ஸிதும் பரியத்தம் தே³ஸிதும். கோ அத்தோ² தே³ஸிதேனாதி வுத்தம் ஹோதி? ராக³தோ³ஸபரேதேஹீதி ராக³தோ³ஸபு²ட்டே²ஹி ராக³தோ³ஸானுக³தேஹி வா.

படிஸோதகா³மிந்தி நிச்சாதீ³னம் படிஸோதம், ‘‘அனிச்சம் து³க்க²மனத்தா அஸுப⁴’’ந்தி ஏவம் க³தம் சதுஸச்சத⁴ம்மம். ராக³ரத்தாதி காமராகே³ன ப⁴வராகே³ன தி³ட்டி²ராகே³ன ச ரத்தா. ந த³க்க²ந்தீதி அனிச்சம் து³க்க²மனத்தா அஸுப⁴ந்தி இமினா ஸபா⁴வேன ந பஸ்ஸிஸ்ஸந்தி, தே அபஸ்ஸந்தே கோ ஸக்கி²ஸ்ஸதி ஏவம் கா³ஹாபேதும். தமோக²ந்தே⁴ன ஆவுடாதி அவிஜ்ஜாராஸினா அஜ்ஜோ²த்த²டா.

அப்போஸ்ஸுக்கதாயாதி நிருஸ்ஸுக்கபா⁴வேன, அதே³ஸேதுகாமதாயாதி அத்தோ². கஸ்மா பனஸ்ஸ ஏவம் சித்தம் நமி? நனு ஏஸ முத்தோ மோசேஸ்ஸாமி, திண்ணோ தாரேஸ்ஸாமி –

‘‘கிம் மே அஞ்ஞாதவேஸேன, த⁴ம்மம் ஸச்சி²கதேனித⁴;

ஸப்³ப³ஞ்ஞுதம் பாபுணித்வா, தாரயிஸ்ஸம் ஸதே³வக’’ந்தி. (பு³. வம். 2.56) –

பத்த²னம் கத்வா பாரமியோ பூரேத்வா ஸப்³ப³ஞ்ஞுதம் பத்தோதி? ஸச்சமேதம், ததே³வம் பச்சவேக்க²ணானுபா⁴வேன பனஸ்ஸ ஏவம் சித்தம் நமி. தஸ்ஸ ஹி ஸப்³ப³ஞ்ஞுதம் பத்வா ஸத்தானம் கிலேஸக³ஹனதம், த⁴ம்மஸ்ஸ ச க³ம்பீ⁴ரதம் பச்சவேக்க²ந்தஸ்ஸ ஸத்தானம் கிலேஸக³ஹனதா ச த⁴ம்மக³ம்பீ⁴ரதா ச ஸப்³பா³காரேன பாகடா ஜாதா. அத²ஸ்ஸ – ‘‘இமே ஸத்தா கஞ்ஜியபுண்ணா லாபு³ விய, தக்கப⁴ரிதா சாடி விய, வஸாதேலபீதபிலோதிகா விய, அஞ்ஜனமக்கி²தஹத்தோ² விய ச கிலேஸப⁴ரிதா அதிஸம்கிலிட்டா² ராக³ரத்தா தோ³ஸது³ட்டா² மோஹமூள்ஹா, தே கிம் நாம படிவிஜ்ஜி²ஸ்ஸந்தீ’’தி? சிந்தயதோ கிலேஸக³ஹனபச்சவேக்க²ணானுபா⁴வேனாபி ஏவம் சித்தம் நமி.

‘‘அயஞ்ச த⁴ம்மோ பத²வீஸந்தா⁴ரகஉத³கக்க²ந்தோ⁴ விய க³ம்பீ⁴ரோ, பப்³ப³தேன படிச்சா²தே³த்வா ட²பிதோ ஸாஸபோ விய து³த்³த³ஸோ, ஸததா⁴ பி⁴ன்னஸ்ஸ வாலஸ்ஸ கோடியா கோடிபடிபாத³னம் விய து³ரனுபோ³தோ⁴. நனு மயா ஹி இமம் த⁴ம்மம் படிவிஜ்ஜி²தும் வாயமந்தேன அதி³ன்னம் தா³னம் நாம நத்தி², அரக்கி²தம் ஸீலம் நாம நத்தி², அபரிபூரிதா காசி பாரமீ நாம நத்தி², தஸ்ஸ மே நிருஸ்ஸாஹம் விய மாரப³லம் வித⁴மந்தஸ்ஸாபி பத²வீ ந கம்பித்த², பட²மயாமே புப்³பே³னிவாஸம் அனுஸ்ஸரந்தஸ்ஸாபி ந கம்பித்த², மஜ்ஜி²மயாமே தி³ப்³ப³சக்கு²ம் விஸோதே⁴ந்தஸ்ஸாபி ந கம்பித்த², பச்சி²மயாமே பன படிச்சஸமுப்பாத³ம் படிவிஜ்ஜ²ந்தஸ்ஸேவ மே த³ஸஸஹஸ்ஸிலோகதா⁴து கம்பித்த². இதி மாதி³ஸேனாபி திக்க²ஞாணேன கிச்சே²னேவாயம் த⁴ம்மோ படிவித்³தோ⁴. தம் லோகியமஹாஜனா கத²ம் படிவிஜ்ஜி²ஸ்ஸந்தீ’’தி? த⁴ம்மக³ம்பீ⁴ரபச்சவேக்க²ணானுபா⁴வேனாபி ஏவம் சித்தம் நமீதி வேதி³தப்³ப³ம்.

அபிச ப்³ரஹ்முனா யாசிதே தே³ஸேதுகாமதாயபிஸ்ஸ ஏவம் சித்தம் நமி. ஜானாதி ஹி ப⁴க³வா – ‘‘மம அப்போஸ்ஸுக்கதாய சித்தே நமமானே மம் மஹாப்³ரஹ்மா த⁴ம்மதே³ஸனம் யாசிஸ்ஸதி, இமே ச ஸத்தா ப்³ரஹ்மக³ருகா. தே ‘ஸத்தா² கிர த⁴ம்மம் ந தே³ஸேதுகாமோ அஹோஸி. அத² நம் மஹாப்³ரஹ்மா யாசித்வா தே³ஸாபேஸி. ஸந்தோ வத போ⁴ த⁴ம்மோ, பணீதோ வத போ⁴ த⁴ம்மோ’தி மஞ்ஞமானா ஸுஸ்ஸூஸிஸ்ஸந்தீ’’தி. இத³ம்பிஸ்ஸ காரணம் படிச்ச அப்போஸ்ஸுக்கதாய சித்தம் நமி, நோ த⁴ம்மதே³ஸனாயாதி வேதி³தப்³ப³ம்.

ஸஹம்பதிஸ்ஸாதி ஸோ கிர கஸ்ஸபஸ்ஸ ப⁴க³வதோ ஸாஸனே ஸஹகோ நாம தே²ரோ பட²மஜ்ஜா²னம் நிப்³ப³த்தேத்வா பட²மஜ்ஜா²னபூ⁴மியம் கப்பாயுகப்³ரஹ்மா ஹுத்வா நிப்³ப³த்தோ. தத்ர நம் ‘‘ஸஹம்பதிப்³ரஹ்மா’’தி படிஸஞ்ஜானந்தி. தம் ஸந்தா⁴யாஹ ‘‘ப்³ரஹ்முனோ ஸஹம்பதிஸ்ஸா’’தி. நஸ்ஸதி வத போ⁴தி ஸோ கிர இமம் ஸத்³த³ம் ததா² நிச்சா²ரேஸி, யதா² த³ஸஸஹஸ்ஸிலோகதா⁴துப்³ரஹ்மானோ ஸுத்வா ஸப்³பே³ ஸன்னிபதிம்ஸு. யத்ர ஹி நாமாதி யஸ்மிம் நாம லோகே. புரதோ பாதுரஹோஸீதி தேஹி த³ஸஹி ப்³ரஹ்மஸஹஸ்ஸேஹி ஸத்³தி⁴ம் பாதுரஹோஸி. அப்பரஜக்க²ஜாதிகாதி பஞ்ஞாமயே அக்கி²ம்ஹி அப்பம் பரித்தம் ராக³தோ³ஸமோஹரஜம் ஏதேஸம் ஏவம்ஸபா⁴வாதி அப்பரஜக்க²ஜாதிகா. அஸ்ஸவனதாதி அஸ்ஸவனதாய. ப⁴விஸ்ஸந்தீதி புரிமபு³த்³தே⁴ஸு த³ஸபுஞ்ஞகிரியவஸேன கதாதி⁴காரா பரிபாகக³தா பது³மானி விய ஸூரியரஸ்மிஸம்ப²ஸ்ஸம், த⁴ம்மதே³ஸனம்யேவ ஆகங்க²மானா சதுப்பதி³ககா³தா²வஸானே அரியபூ⁴மிம் ஓக்கமனாரஹா ந ஏகோ, ந த்³வே, அனேகஸதஸஹஸ்ஸா த⁴ம்மஸ்ஸ அஞ்ஞாதாரோ ப⁴விஸ்ஸந்தீதி த³ஸ்ஸேதி.

பாதுரஹோஸீதி பாதுப⁴வி. ஸமலேஹி சிந்திதோதி ஸமலேஹி ச²ஹி ஸத்தா²ரேஹி சிந்திதோ. தே ஹி புரேதரம் உப்பஜ்ஜித்வா ஸகலஜம்பு³தீ³பே கண்டகே பத்த²ரமானா விய, விஸம் ஸிஞ்சமானா விய ச ஸமலம் மிச்சா²தி³ட்டி²த⁴ம்மம் தே³ஸயிம்ஸு. அபாபுரேதந்தி விவரம் ஏதம். அமதஸ்ஸ த்³வாரந்தி அமதஸ்ஸ நிப்³பா³னஸ்ஸ த்³வாரபூ⁴தம் அரியமக்³க³ம். ஸுணந்து த⁴ம்மம் விமலேனானுபு³த்³த⁴ந்தி இமே ஸத்தா ராகா³தி³மலானம் அபா⁴வதோ விமலேன ஸம்மாஸம்பு³த்³தே⁴ன அனுபு³த்³த⁴ம் சதுஸச்சத⁴ம்மம் ஸுணந்து தாவ ப⁴க³வாதி யாசதி.

ஸேலே யதா² பப்³ப³தமுத்³த⁴னிட்டி²தோதி ஸேலமயே ஏகக்³க⁴னே பப்³ப³தமுத்³த⁴னி யதா²டி²தோவ. ந ஹி தஸ்ஸ டி²தஸ்ஸ த³ஸ்ஸனத்த²ம் கீ³வுக்கி²பனபஸாரணாதி³கிச்சம் அத்தி². ததூ²பமந்தி தப்படிபா⁴க³ம் ஸேலபப்³ப³தூபமம். அயம் பனேத்த² ஸங்கே²பத்தோ² – யதா² ஸேலபப்³ப³தமுத்³த⁴னி டி²தோவ சக்கு²மா புரிஸோ ஸமந்ததோ ஜனதம் பஸ்ஸேய்ய, ததா² த்வம்பி ஸுமேத⁴ ஸுந்த³ரபஞ்ஞ ஸப்³ப³ஞ்ஞுதஞாணேன ஸமந்தசக்கு² ப⁴க³வா த⁴ம்மமயம் பாஸாத³மாருய்ஹ ஸயம் அபேதஸோகோ ஸோகாவதிண்ணம் ஜாதிஜராபி⁴பூ⁴தம் ஜனதம் அவேக்க²ஸ்ஸு உபதா⁴ரய உபபரிக்க². அயம் பனேத்த² அதி⁴ப்பாயோ – யதா² ஹி பப்³ப³தபாதே³ ஸமந்தா மஹந்தம் கே²த்தம் கத்வா, தத்த² கேதா³ரபாளீஸு குடிகாயோ கத்வா ரத்திம் அக்³கி³ம் ஜாலேய்யும், சதுரங்க³ஸமன்னாக³தஞ்ச அந்த⁴காரம் அஸ்ஸ, அத² தஸ்ஸ பப்³ப³தஸ்ஸ மத்த²கே ட²த்வா சக்கு²மதோ புரிஸஸ்ஸ பூ⁴மிம் ஓலோகயதோ நேவ கே²த்தம் ந கேதா³ரபாளியோ ந குடியோ ந தத்த² ஸயிதமனுஸ்ஸா பஞ்ஞாயேய்யும். குடிகாஸு பன அக்³கி³ஜாலாமத்தகமேவ பஞ்ஞாயேய்ய, ஏவம் த⁴ம்மபாஸாத³ம் ஆருய்ஹ ஸத்தனிகாயம் ஓலோகயதோ ததா²க³தஸ்ஸ யே தே அகதகல்யாணா ஸத்தா, தே ஏகவிஹாரே த³க்கி²ணஜாணுபஸ்ஸே நிஸின்னாபி பு³த்³த⁴சக்கு²ஸ்ஸ ஆபாத²ம் நாக³ச்ச²ந்தி, ரத்திம் கி²த்தா ஸரா விய ஹோந்தி. யே பன கதகல்யாணா வேனேய்யபுக்³க³லா, தே ஏவஸ்ஸ தூ³ரேபி டி²தா ஆபாத²ம் ஆக³ச்ச²ந்தி ஸோ அக்³கி³ விய ஹிமவந்தபப்³ப³தோ விய ச. வுத்தம்பி சேதம் –

‘‘தூ³ரே ஸந்தோ பகாஸேந்தி, ஹிமவந்தோவ பப்³ப³தோ;

அஸந்தேத்த² ந தி³ஸ்ஸந்தி, ரத்திம் கி²த்தா யதா² ஸரா’’தி. (த⁴. ப. 304);

அஜ்ஜே²ஸனந்தி யாசனம். பு³த்³த⁴சக்கு²னாதி இந்த்³ரியபரோபரியத்தஞாணேன ச ஆஸயானுஸயஞாணேன ச. இமேஸம் ஹி த்³வின்னம் ஞாணானம் ‘‘பு³த்³த⁴சக்கூ²’’தி நாமம், ஸப்³ப³ஞ்ஞுதஞ்ஞாணஸ்ஸ ‘‘ஸமந்தசக்கூ²’’தி, திண்ணம் மக்³க³ஞாணானம் ‘‘த⁴ம்மசக்கூ²’’தி. அப்பரஜக்கே²திஆதீ³ஸு யேஸம் வுத்தனயேனேவ பஞ்ஞாசக்கு²ம்ஹி ராகா³தி³ரஜம் அப்பம், தே அப்பரஜக்கா². யேஸம் தம் மஹந்தம், தே மஹாரஜக்கா². யேஸம் ஸத்³தா⁴தீ³னி இந்த்³ரியானி திக்கா²னி, தே திக்கி²ந்த்³ரியா. யேஸம் தானி முதூ³னி, தே முதி³ந்த்³ரியா. யேஸம் தேயேவ ஸத்³தா⁴த³யோ ஆகாரா ஸுந்த³ரா, தே ஸ்வாகாரா. யே கதி²தகாரணம் ஸல்லக்கே²ந்தி, ஸுகே²ன ஸக்கா ஹோந்தி விஞ்ஞாபேதும், தே ஸுவிஞ்ஞாபயா. யே பரலோகஞ்சேவ வஜ்ஜஞ்ச ப⁴யதோ பஸ்ஸந்தி, தே பரலோகவஜ்ஜப⁴யத³ஸ்ஸாவினோ நாம.

அயம் பனேத்த² பாளி – ‘‘ஸத்³தோ⁴ புக்³க³லோ அப்பரஜக்கோ², அஸ்ஸத்³தோ⁴ புக்³க³லோ மஹாரஜக்கோ². ஆரத்³த⁴வீரியோ, குஸீதோ. உபட்டி²தஸ்ஸதி, முட்ட²ஸ்ஸதி. ஸமாஹிதோ, அஸமாஹிதோ. பஞ்ஞவா, து³ப்பஞ்ஞோ புக்³க³லோ மஹாரஜக்கோ². ததா² ஸத்³தோ⁴ புக்³க³லோ திக்கி²ந்த்³ரியோ…பே… பஞ்ஞவா புக்³க³லோ பரலோகவஜ்ஜப⁴யத³ஸ்ஸாவீ, து³ப்பஞ்ஞோ புக்³க³லோ ந பரலோகவஜ்ஜப⁴யத³ஸ்ஸாவீ. லோகோதி க²ந்த⁴லோகோ, ஆயதனலோகோ, தா⁴துலோகோ, ஸம்பத்திப⁴வலோகோ, ஸம்பத்திஸம்ப⁴வலோகோ, விபத்திப⁴வலோகோ, விபத்திஸம்ப⁴வலோகோ. ஏகோ லோகோ ஸப்³பே³ ஸத்தா ஆஹாரட்டி²திகா. த்³வே லோகா நாமஞ்ச ரூபஞ்ச. தயோ லோகா திஸ்ஸோ வேத³னா. சத்தாரோ லோகா சத்தாரோ ஆஹாரா. பஞ்ச லோகா பஞ்சுபாதா³னக்க²ந்தா⁴. ச² லோகா ச² அஜ்ஜ²த்திகானி ஆயதனானி. ஸத்த லோகா ஸத்த விஞ்ஞாணட்டி²தியோ. அட்ட² லோகா அட்ட² லோகத⁴ம்மா. நவ லோகா நவ ஸத்தாவாஸா. த³ஸ லோகா த³ஸாயதனானி. த்³வாத³ஸ லோகா த்³வாத³ஸாயதனானி. அட்டா²ரஸ லோகா அட்டா²ரஸ தா⁴துயோ. வஜ்ஜந்தி ஸப்³பே³ கிலேஸா வஜ்ஜா, ஸப்³பே³ து³ச்சரிதா வஜ்ஜா, ஸப்³பே³ அபி⁴ஸங்கா²ரா வஜ்ஜா, ஸப்³பே³ ப⁴வகா³மிகம்மா வஜ்ஜா, இதி இமஸ்மிஞ்ச லோகே இமஸ்மிஞ்ச வஜ்ஜே திப்³பா³ ப⁴யஸஞ்ஞா பச்சுபட்டி²தா ஹோதி, ஸேய்யதா²பி உக்கி²த்தாஸிகே வத⁴கே. இமேஹி பஞ்ஞாஸாய ஆகாரேஹி இமானி பஞ்சிந்த்³ரியானி ஜானாதி பஸ்ஸதி அஞ்ஞாஸி படிவிஜ்ஜி². இத³ம் ததா²க³தஸ்ஸ இந்த்³ரியபரோபரியத்தே ஞாண’’ந்தி (படி. ம. 1.112).

உப்பலினியந்தி உப்பலவனே. இதரேஸுபி ஏஸேவ நயோ. அந்தோனிமுக்³க³போஸீனீதி யானி அந்தோ நிமுக்³கா³னேவ போஸியந்தி. உத³கம் அச்சுக்³க³ம்ம டி²தானீ தி உத³கம் அதிக்கமித்வா டி²தானி. தத்த² யானி அச்சுக்³க³ம்ம டி²தானி, தானி ஸூரியரஸ்மிஸம்ப²ஸ்ஸம் ஆக³மயமானானி டி²தானி அஜ்ஜ புப்ப²னகானி. யானி பன ஸமோத³கம் டி²தானி, தானி ஸ்வே புப்ப²னகானி. யானி உத³கானுக்³க³தானி அந்தோனிமுக்³க³போஸீனி, தானி ததியதி³வஸே புப்ப²னகானி. உத³கா பன அனுக்³க³தானி அஞ்ஞானிபி ஸரோக³உப்பலாதீ³னி நாம அத்தி², யானி நேவ புப்பி²ஸ்ஸந்தி, மச்ச²கச்ச²பப⁴க்கா²னேவ ப⁴விஸ்ஸந்தி, தானி பாளிம் நாருள்ஹானி. ஆஹரித்வா பன தீ³பேதப்³பா³னீதி தீ³பிதானி. யதே²வ ஹி தானி சதுப்³பி³தா⁴னி புப்பா²னி, ஏவமேவம் உக்³க⁴டிதஞ்ஞூ விபஞ்சிதஞ்ஞூ நேய்யோ பத³பரமோதி சத்தாரோ புக்³க³லா.

தத்த² ‘‘யஸ்ஸ புக்³க³லஸ்ஸ ஸஹ உதா³ஹடவேலாய த⁴ம்மாபி⁴ஸமயோ ஹோதி, அயம் வுச்சதி புக்³க³லோ உக்³க⁴டிதஞ்ஞூ. யஸ்ஸ புக்³க³லஸ்ஸ ஸம்கி²த்தேன பா⁴ஸிதஸ்ஸ வித்தா²ரேன அத்தே² விப⁴ஜியமானே த⁴ம்மாபி⁴ஸமயோ ஹோதி, அயம் வுச்சதி புக்³க³லோ விபஞ்சிதஞ்ஞூ. யஸ்ஸ புக்³க³லஸ்ஸ உத்³தே³ஸதோ பரிபுச்ச²தோ யோனிஸோ மனஸிகரோதோ கல்யாணமித்தே ஸேவதோ ப⁴ஜதோ பயிருபாஸதோ அனுபுப்³பே³ன த⁴ம்மாபி⁴ஸமயோ ஹோதி, அயம் வுச்சதி புக்³க³லோ நேய்யோ. யஸ்ஸ புக்³க³லஸ்ஸ ப³ஹும்பி ஸுணதோ ப³ஹும்பி ப⁴ணதோ ப³ஹும்பி தா⁴ரயதோ ப³ஹும்பி வாசயதோ ந தாய ஜாதியா த⁴ம்மாபி⁴ஸமயோ ஹோதி, அயம் வுச்சதி புக்³க³லோ பத³பரமோ (பு. ப. 148-151). தத்த² ப⁴க³வா உப்பலவனாதி³ஸதி³ஸம் த³ஸஸஹஸ்ஸிலோகதா⁴தும் ஓலோகேந்தோ – ‘‘அஜ்ஜ புப்ப²னகானி விய உக்³க⁴டிதஞ்ஞூ, ஸ்வே புப்ப²னகானி விய விபஞ்சிதஞ்ஞூ, ததியதி³வஸே புப்ப²னகானி விய நேய்யோ, மச்ச²கச்ச²பப⁴க்கா²னி புப்பா²னி விய பத³பரமோ’’தி அத்³த³ஸ்ஸ. பஸ்ஸந்தோ ச ‘‘ஏத்தகா அப்பரஜக்கா², ஏத்தகா மஹாரஜக்கா², தத்ராபி ஏத்தகா உக்³க⁴டிதஞ்ஞூ’’தி ஏவம் ஸப்³பா³காரதோவ அத்³த³ஸ.

தத்த² திண்ணம் புக்³க³லானம் இமஸ்மிம்யேவ அத்தபா⁴வே ப⁴க³வதோ த⁴ம்மதே³ஸனா அத்த²ம் ஸாதே⁴தி. பத³பரமானம் அனாக³தத்தா²ய வாஸனா ஹோதி. அத² ப⁴க³வா இமேஸம் சதுன்னம் புக்³க³லானம் அத்தா²வஹம் த⁴ம்மதே³ஸனம் விதி³த்வா தே³ஸேதுகம்யதம் உப்பாதே³த்வா புன ஸப்³பே³பி தீஸு ப⁴வேஸு ஸத்தே ப⁴ப்³பா³ப⁴ப்³ப³வஸேன த்³வே கோட்டா²ஸே அகாஸி. யே ஸந்தா⁴ய வுத்தம் – ‘‘கதமே ஸத்தா அப⁴ப்³பா³? யே தே ஸத்தா கம்மாவரணேன ஸமன்னாக³தா கிலேஸாவரணேன ஸமன்னாக³தா விபாகாவரணேன ஸமன்னாக³தா அஸ்ஸத்³தா⁴ அச்ச²ந்தி³கா து³ப்பஞ்ஞா அப⁴ப்³பா³ நியாமம் ஓக்கமிதும் குஸலேஸு த⁴ம்மேஸு ஸம்மத்தம், இமே தே ஸத்தா அப⁴ப்³பா³. கதமே ஸத்தா ப⁴ப்³பா³? யே தே ஸத்தா ந கம்மாவரணேன…பே… இமே தே ஸத்தா ப⁴ப்³பா³’’தி (விப⁴. 827; படி. ம. 1.115). தத்த² ஸப்³பே³பி அப⁴ப்³ப³புக்³க³லே பஹாய ப⁴ப்³ப³புக்³க³லேயேவ ஞாணேன பரிக்³க³ஹேத்வா, ‘‘ஏத்தகா ராக³சரிதா ஏத்தகா தோ³ஸ-மோஹசரிதா விதக்க-ஸத்³தா⁴-பு³த்³தி⁴சரிதா’’தி ச² கோட்டா²ஸே அகாஸி. ஏவம் கத்வா த⁴ம்மம் தே³ஸேஸ்ஸாமீதி சிந்தேஸி.

பச்சபா⁴ஸீதி பதிஅபா⁴ஸி. அபாருதாதி விவடா. அமதஸ்ஸ த்³வாராதி அரியமக்³கோ³. ஸோ ஹி அமதஸங்கா²தஸ்ஸ நிப்³பா³னஸ்ஸ த்³வாரம், ஸோ மயா விவரித்வா ட²பிதோதி த³ஸ்ஸேதி. பமுஞ்சந்து ஸத்³த⁴ந்தி ஸப்³பே³ அத்தனோ ஸத்³த⁴ம் பமுஞ்சந்து விஸ்ஸஜ்ஜேந்து. பச்சி²மபத³த்³வயே அயமத்தோ² – அஹஞ்ஹி அத்தனோ பகு³ணம் ஸுப்பவத்திதம்பி இமம் பணீதம் உத்தமம் த⁴ம்மம் காயவாசாகிலமத²ஸஞ்ஞீ ஹுத்வா ந பா⁴ஸிம். இதா³னி பன ஸப்³போ³ ஜனோ ஸத்³தா⁴பா⁴ஜனம் உபனேது, பூரேஸ்ஸாமி தேஸம் ஸங்கப்பந்தி.

அந்தரதா⁴யீதி ஸத்தா²ரம் க³ந்த⁴மாலாதீ³ஹி பூஜேத்வா அந்தரஹிதோ, ஸகட்டா²னமேவ க³தோதி அத்தோ². க³தே ச பன தஸ்மிம் ப⁴க³வா ‘‘கஸ்ஸ நு கோ² அஹம் பட²மம் த⁴ம்மம் தே³ஸேய்ய’’ந்தி? ஆளாருத³கானம் காலங்கதபா⁴வம், பஞ்சவக்³கி³யானஞ்ச ப³ஹூபகாரபா⁴வம் ஞத்வா தேஸம் த⁴ம்மம் தே³ஸேதுகாமோ பா³ராணஸியம் இஸிபதனம் க³ந்த்வா த⁴ம்மசக்கம் பவத்தேஸீதி. பட²மம்.

2. கா³ரவஸுத்தவண்ணனா

173. து³தியே உத³பாதீ³தி அயம் விதக்கோ பஞ்சமே ஸத்தாஹே உத³பாதி³. அகா³ரவோதி அஞ்ஞஸ்மிம் கா³ரவரஹிதோ, கஞ்சி க³ருட்டா²னே அட்ட²பேத்வாதி அத்தோ². அப்பதிஸ்ஸோதி பதிஸ்ஸயரஹிதோ, கஞ்சி ஜேட்ட²கட்டா²னே அட்ட²பேத்வாதி அத்தோ².

ஸதே³வகேதிஆதீ³ஸு ஸத்³தி⁴ம் தே³வேஹி ஸதே³வகே. தே³வக்³க³ஹணேன சேத்த² மாரப்³ரஹ்மேஸு க³ஹிதேஸுபி மாரோ நாம வஸவத்தீ ஸப்³பே³ஸம் உபரி வஸம் வத்தேதி, ப்³ரஹ்மா நாம மஹானுபா⁴வோ ஏகங்கு³லியா ஏகஸ்மிம் சக்கவாளஸஹஸ்ஸே ஆலோகம் ப²ரதி. த்³வீஹி த்³வீஸு…பே… த³ஸஹி அங்கு³லீஹி த³ஸஸுபி சக்கவாளஸஹஸ்ஸேஸு ஆலோகம் ப²ரதி, ஸோ இமினா ஸீலஸம்பன்னதரோதி வத்தும் மா லப⁴தூதி ஸமாரகே ஸப்³ரஹ்மகேதி விஸும் வுத்தம். ததா² ஸமணா நாம ஏகனிகாயாதி³வஸேன ப³ஹுஸ்ஸுதா ஸீலவந்தோ பண்டி³தா, ப்³ராஹ்மணாபி வத்து²விஜ்ஜாதி³வஸேன ப³ஹுஸ்ஸுதா பண்டி³தா, தே இமினா ஸீலஸம்பன்னதராதி வத்தும் மா லப⁴ந்தூதி ஸஸ்ஸமணப்³ராஹ்மணியா பஜாயாதி வுத்தம். ஸதே³வமனுஸ்ஸாயாதி இத³ம் பன நிப்பதே³ஸதோ த³ஸ்ஸனத்த²ம் க³ஹிதமேவ க³ஹேத்வா வுத்தம். அபிசேத்த² புரிமானி தீணி பதா³னி லோகவஸேன வுத்தானி, பச்சி²மானி த்³வே பஜாவஸேன. ஸீலஸம்பன்னதரந்தி ஸீலேன ஸம்பன்னதரம், அதி⁴கதரந்தி அத்தோ². ஸேஸேஸுபி ஏஸேவ நயோ. ஏத்த² ச ஸீலாத³யோ சத்தாரோ த⁴ம்மா லோகியலோகுத்தரா கதி²தா, விமுத்திஞாணத³ஸ்ஸனம் லோகியமேவ. பச்சவேக்க²ணஞாணம் ஹேதம்.

பாதுரஹோஸீதி – ‘‘அயம் ஸத்தா² அவீசிதோ யாவ ப⁴வக்³கா³ ஸீலாதீ³ஹி அத்தனா அதி⁴கதரம் அபஸ்ஸந்தோ ‘மயா படிவித்³த⁴ம் நவலோகுத்தரத⁴ம்மமேவ ஸக்கத்வா க³ரும் கத்வா உபனிஸ்ஸாய விஹரிஸ்ஸாமீ’தி சிந்தேதி, காரணம் ப⁴க³வா சிந்தேதி, அத்த²ம் வுட்³டி⁴விஸேஸம் சிந்தேதி, க³ச்சா²மிஸ்ஸ உஸ்ஸாஹம் ஜனேஸ்ஸாமீ’’தி சிந்தேத்வா புரதோ பாகடோ அஹோஸி, அபி⁴முகே² அட்டா²ஸீதி அத்தோ².

விஹரந்தி சாதி ஏத்த² யோ வதே³ய்ய ‘‘விஹரந்தீதி வசனதோ பச்சுப்பன்னேபி ப³ஹூ பு³த்³தா⁴’’தி, ஸோ ‘‘ப⁴க³வாபி, ப⁴ந்தே, ஏதரஹி அரஹம் ஸம்மாஸம்பு³த்³தோ⁴’’தி இமினா வசனேன படிபா³ஹிதப்³போ³.

‘‘ந மே ஆசரியோ அத்தி², ஸதி³ஸோ மே ந விஜ்ஜதி;

ஸதே³வகஸ்மிம் லோகஸ்மிம், நத்தி² மே படிபுக்³க³லோ’’தி. (மஹாவ. 11; ம. நி. 1.285) –

ஆதீ³ஹி சஸ்ஸ ஸுத்தேஹி அஞ்ஞேஸம் பு³த்³தா⁴னம் அபா⁴வோ தீ³பேதப்³போ³. தஸ்மாதி யஸ்மா ஸப்³பே³பி பு³த்³தா⁴ ஸத்³த⁴ம்மக³ருனோ, தஸ்மா. மஹத்தமபி⁴கங்க²தாதி மஹந்தபா⁴வம் பத்த²யமானேன. ஸரம் பு³த்³தா⁴ன-ஸாஸனந்தி பு³த்³தா⁴னம் ஸாஸனம் ஸரந்தேன. து³தியம்.

3. ப்³ரஹ்மதே³வஸுத்தவண்ணனா

174. ததியே ஏகோதி டா²னாதீ³ஸு இரியாபதே²ஸு ஏககோ, ஏகவிஹாரீதி அத்தோ². வூபகட்டோ²தி காயேன வூபகட்டோ² நிஸ்ஸடோ. அப்பமத்தோதி ஸதியா அவிப்பவாஸே டி²தோ. ஆதாபீதி வீரியாதாபேன ஸமன்னாக³தோ. பஹிதத்தோதி பேஸிதத்தோ. குலபுத்தாதி ஆசாரகுலபுத்தா. ஸம்மதே³வாதி ந இணட்டா ந ப⁴யட்டா ந ஜீவிதபகதா ஹுத்வா, யதா² வா ததா² வா பப்³ப³ஜிதாபி யே அனுலோமபடிபத³ம் பூரேந்தி, தே ஸம்மதே³வ அகா³ரஸ்மா அனகா³ரியம் பப்³ப³ஜந்தி நாம. ப்³ரஹ்மசரியபரியோஸானந்தி மக்³க³ப்³ரஹ்மசரியஸ்ஸ பரியோஸானபூ⁴தம் அரியப²லம். தி³ட்டே²வ த⁴ம்மேதி இமஸ்மிம்யேவ அத்தபா⁴வே. ஸயம் அபி⁴ஞ்ஞா ஸச்சி²கத்வாதி ஸாமம் ஜானித்வா பச்சக்க²ம் கத்வா. உபஸம்பஜ்ஜாதி படிலபி⁴த்வா ஸம்பாதே³த்வா விஹாஸி. ஏவம் விஹரந்தோ ச கீ²ணா ஜாதி…பே… அப்³ப⁴ஞ்ஞாஸீதி. ஏதேனஸ்ஸ பச்சவேக்க²ணபூ⁴மி த³ஸ்ஸிதா.

கதமா பனஸ்ஸ ஜாதி கீ²ணா, கத²ஞ்ச நம் அப்³ப⁴ஞ்ஞாஸீதி? வுச்சதே, ந தாவஸ்ஸ அதீதா ஜாதி கீ²ணா புப்³பே³வ கீ²ணத்தா, ந அனாக³தா தத்த² வாயாமாபா⁴வதோ, ந பச்சுப்பன்னா விஜ்ஜமானத்தா. மக்³க³ஸ்ஸ பன அபா⁴விதத்தா யா உப்பஜ்ஜேய்ய ஏகசதுபஞ்சவோகாரப⁴வேஸு ஏகசதுபஞ்சக்க²ந்த⁴ப்பபே⁴தா³ ஜாதி. ஸா மக்³க³ஸ்ஸ பா⁴விதத்தா அனுப்பாத³த⁴ம்மதம் ஆபஜ்ஜனேன கீ²ணா. தம் ஸோ மக்³க³பா⁴வனாய பஹீனகிலேஸே பச்சவேக்கி²த்வா – ‘‘கிலேஸாபா⁴வே விஜ்ஜமானம்பி கம்மம் ஆயதிம் அப்படிஸந்தி⁴கம் ஹோதீ’’தி ஜானந்தோ ஜானாதி.

வுஸிதந்தி வுத்த²ம் பரிவுத்த²ம், கதம் சரிதம் நிட்டா²பிதந்தி அத்தோ². ப்³ரஹ்மசரியந்தி மக்³க³ப்³ரஹ்மசரியம். கதம் கரணீயந்தி சதூஸு ஸச்சேஸு சதூஹி மக்³கே³ஹி பரிஞ்ஞாபஹானஸச்சி²கிரியபா⁴வனாவஸேன ஸோளஸவித⁴ம்பி கிச்சம் நிட்டா²பிதந்தி அத்தோ². நாபரம் இத்த²த்தாயாதி இதா³னி புன இத்த²பா⁴வாய, ஏவம் ஸோளஸகிச்சபா⁴வாய, கிலேஸக்க²யாய வா கதமக்³க³பா⁴வனா நத்தீ²தி. அத² வா இத்த²த்தாயாதி இத்த²த்தபா⁴வதோ, இமஸ்மா ஏவம்பகாரா இதா³னி வத்தமானக்க²ந்த⁴ஸந்தானா அபரம் க²ந்த⁴ஸந்தானம் நத்தி², இமே பன பஞ்சக்க²ந்தா⁴ பரிஞ்ஞாதா திட்ட²ந்தி சி²ன்னமூலகோ ருக்கோ² வியாதி அப்³ப⁴ஞ்ஞாஸி. அஞ்ஞதரோதி ஏகோ. அரஹதந்தி அரஹந்தானம், ப⁴க³வதோ ஸாவகானம் அரஹதம் அப்³ப⁴ந்தரோ அஹோஸி.

ஸபதா³னந்தி ஸபதா³னசாரம், ஸம்பத்தக⁴ரம் அனுக்கம்ம படிபாடியா சரந்தோ. உபஸங்கமீதி உபஸங்கமந்தோ. மாதா பனஸ்ஸ புத்தம் தி³ஸ்வாவ க⁴ரா நிக்க²ம்ம பத்தம் க³ஹேத்வா அந்தோனிவேஸனம் பவேஸேத்வா பஞ்ஞத்தாஸனே நிஸீதா³பேஸி.

ஆஹுதிம் நிச்சம் பக்³க³ண்ஹாதீதி நிச்சகாலே ஆஹுதிபிண்ட³ம் பக்³க³ண்ஹாதி. தம் தி³வஸம் பன தஸ்மிம் க⁴ரே பூ⁴தப³லிகம்மம் ஹோதி. ஸப்³ப³கே³ஹம் ஹரிதுபலித்தம் விப்பகிண்ணலாஜம் வனமாலபரிக்கி²த்தம் உஸ்ஸிதத்³த⁴ஜபடாகம் தத்த² தத்த² புண்ணக⁴ரே ட²பேத்வா த³ண்ட³தீ³பிகா ஜாலேத்வா க³ந்த⁴சுண்ணமாலாதீ³ஹி அலங்கதம், ஸமந்ததோ ஸஞ்சா²தி³யமானா தூ⁴மகடச்சு² அஹோஸி. ஸாபி ப்³ராஹ்மணீ காலஸ்ஸேவ வுட்டா²ய ஸோளஸஹி க³ந்தோ⁴த³கக⁴டேஹி ந்ஹாயித்வா ஸப்³பா³லங்காரேன அத்தபா⁴வம் அலங்கரி. ஸா தஸ்மிம் ஸமயே மஹாகீ²ணாஸவம் நிஸீதா³பேத்வா, யாகு³உளுங்கமத்தம்பி அத³த்வா, ‘‘மஹாப்³ரஹ்மம் போ⁴ஜேஸ்ஸாமீ’’தி ஸுவண்ணபாதியம் பாயாஸம் பூரேத்வா ஸப்பிமது⁴ஸக்க²ராதீ³ஹி யோஜேத்வா நிவேஸனஸ்ஸ பச்சா²பா⁴கே³ ஹரிதுபலித்தபா⁴வாதீ³ஹி அலங்கதா பூ⁴தபீடி²கா அத்தி². ஸா தம் பாதிம் ஆதா³ய, தத்த² க³ந்த்வா, சதூஸு கோணேஸு மஜ்ஜே² ச ஏகேகம் பாயாஸபிண்ட³ம் ட²பேத்வா, ஏகம் பிண்ட³ம் ஹத்தே²ன க³ஹேத்வா, யாவ கப்பரா ஸப்பினா பக்³க⁴ரந்தேன பத²வியம் ஜாணுமண்ட³லம் பதிட்டா²பேத்வா ‘‘பு⁴ஞ்ஜது ப⁴வம் மஹாப்³ரஹ்மா, ஸாயது ப⁴வம் மஹாப்³ரஹ்மா, தப்பேது ப⁴வம் மஹாப்³ரஹ்மா’’தி வத³மானா ப்³ரஹ்மானம் போ⁴ஜேதி.

ஏதத³ஹோஸீதி மஹாகீ²ணாஸவஸ்ஸ ஸீலக³ந்த⁴ம் ச²தே³வலோகே அஜ்ஜோ²த்த²ரித்வா ப்³ரஹ்மலோகம் உபக³தம் கா⁴யமானஸ்ஸ ஏதம் அஹோஸி. ஸம்வேஜேய்யந்தி சோதே³ய்யம், ஸம்மாபடிபத்தியம் யோஜேய்யம். ‘அயம் ஹி ஏவரூபம் அக்³க³த³க்கி²ணேய்யம் மஹாகீ²ணாஸவம் நிஸீதா³பேத்வா யாகு³உளுங்கமத்தம்பி அத³த்வா, ‘‘மஹாப்³ரஹ்மம் போ⁴ஜேஸ்ஸாமீ’’தி துலம் பஹாய ஹத்தே²ன துலயந்தீ விய, பே⁴ரிம் பஹாய குச்சி²ம் வாதே³ந்தீ விய, அக்³கி³ம் பஹாய க²ஜ்ஜோபனகம் த⁴மமானா விய பூ⁴தப³லிம் குருமானா ஆஹிண்ட³தி. க³ச்சா²மிஸ்ஸா மிச்சா²த³ஸ்ஸனம் பி⁴ந்தி³த்வா அபாயமக்³க³தோ உத்³த⁴ரித்வா யதா² அஸீதிகோடித⁴னம் பு³த்³த⁴ஸாஸனே விப்பகிரித்வா ஸக்³க³மக்³க³ம் ஆரோஹதி, ததா² கரோமீதி வுத்தம் ஹோதி.

தூ³ரே இதோதி இமம்ஹா டா²னா தூ³ரே ப்³ரஹ்மலோகோ. ததோ ஹி கூடாகா³ரமத்தா ஸிலா பாதிதா ஏகேன அஹோரத்தேன அட்ட²சத்தாலீஸயோஜனஸஹஸ்ஸானி கே²பயமானா சதூஹி மாஸேஹி பத²வியம் பதிட்ட²ஹேய்ய, ஸப்³ப³ஹேட்டி²மோபி ப்³ரஹ்மலோகோ ஏவம் தூ³ரே. யஸ்ஸாஹுதிந்தி யஸ்ஸ ப்³ரஹ்முனோ ஆஹுதிம் பக்³க³ண்ஹாஸி, தஸ்ஸ ப்³ரஹ்மலோகோ தூ³ரேதி அத்தோ². ப்³ரஹ்மபத²ந்தி ஏத்த² ப்³ரஹ்மபதோ² நாம சத்தாரி குஸலஜ்ஜா²னானி, விபாகஜ்ஜா²னானி பன நேஸம் ஜீவிதபதோ² நாம, தம் ப்³ரஹ்மபத²ம் அஜானந்தீ த்வம் கிம் ஜப்பஸி விப்பலபஸி? ப்³ரஹ்மானோ ஹி ஸப்பீதிகஜ்ஜா²னேன யாபேந்தி, ந ஏதம் திணபீ³ஜானி பக்கி²பித்வா ரந்த⁴ம் கோ³யூஸம் கா²த³ந்தி, மா அகாரணா கிலமஸீதி.

ஏவம் வத்வா புன ஸோ மஹாப்³ரஹ்மா அஞ்ஜலிம் பக்³க³ய்ஹ அவகுஜ்ஜோ ஹுத்வா தே²ரம் உபதி³ஸந்தோ ஏஸோ ஹி தே ப்³ராஹ்மணி ப்³ரஹ்மதே³வோதிஆதி³மாஹ. தத்த² நிரூபதி⁴கோதி கிலேஸாபி⁴ஸங்கா²ரகாமகு³ணோபதீ⁴ஹி விரஹிதோ. அதிதே³வபத்தோதி தே³வானம் அதிதே³வபா⁴வம் ப்³ரஹ்மானம் அதிப்³ரஹ்மபா⁴வம் பத்தோ. அனஞ்ஞபோஸீதி ட²பேத்வா இமம் அத்தபா⁴வம் அஞ்ஞஸ்ஸ அத்தபா⁴வஸ்ஸ வா புத்ததா³ரஸ்ஸ வா அபோஸனதாய அனஞ்ஞபோஸீ.

ஆஹுனேய்யோதி ஆஹுனபிண்ட³ம் படிக்³க³ஹேதும் யுத்தோ. வேத³கூ³தி சதுமக்³க³ஸங்கா²தேஹி வேதே³ஹி து³க்க²ஸ்ஸந்தம் க³தோ. பா⁴விதத்தோதி அத்தானம் பா⁴வேத்வா வட்³டே⁴த்வா டி²தோ. அனூபலித்தோதி தண்ஹாதீ³ஹி லேபேஹி ஆலித்தோ. கா⁴ஸேஸனம் இரியதீதி ஆஹாரபரியேஸனம் சரதி.

ந தஸ்ஸ பச்சா² ந புரத்த²மத்தீ²தி பச்சா² வுச்சதி அதீதம், புரத்த²ம் வுச்சதி அனாக³தம், அதீதானாக³தேஸு க²ந்தே⁴ஸு ச²ந்த³ராக³விரஹிதஸ்ஸ பச்சா² வா புரத்த²ம் வா நத்தீ²தி வத³தி. ஸந்தோதிஆதீ³ஸு ராகா³தி³ஸந்ததாய ஸந்தோ. கோத⁴தூ⁴மவிக³மா விதூ⁴மோ, து³க்கா²பா⁴வா அனீகோ⁴, கத்தரத³ண்டா³தீ³னி க³ஹேத்வா விசரந்தோபி வத⁴கசேதனாய அபா⁴வா நிக்கி²த்தத³ண்டோ³. தஸதா²வரேஸூதி ஏத்த² பன புது²ஜ்ஜனா தஸா நாம, கீ²ணாஸவா தா²வரா நாம. ஸத்த பன ஸேகா² தஸாதி வத்தும் ந ஸக்கா, தா²வரா ந ஹோந்தி, ப⁴ஜமானா பன தா²வரபக்க²மேவ ப⁴ஜந்தி. ஸோ த்யாஹுதிந்தி ஸோ தே ஆஹுதிம்.

விஸேனிபூ⁴தோதி கிலேஸஸேனாய விஸேனோ ஜாதோ. அனேஜோதி நித்தண்ஹோ. ஸுஸீலோதி கீ²ணாஸவஸீலேன ஸுஸீலோ. ஸுவிமுத்தசித்தோதி ப²லவிமுத்தியா ஸுட்டு² விமுத்தசித்தோ. ஓக⁴திண்ணந்தி சத்தாரோ ஓகே⁴ திண்ணம். ஏத்தகேன கதா²மக்³கே³ன ப்³ரஹ்மா தே²ரஸ்ஸ வண்ணம் கதே²ந்தோ ஆயதனே ப்³ராஹ்மணிம் நியோஜேஸி. அவஸானகா³தா² பன ஸங்கீ³திகாரேஹி ட²பிதா. பதிட்ட²பேஸி த³க்கி²ணந்தி சதுபச்சயத³க்கி²ணம் பதிட்ட²பேஸி. ஸுக²மாயதிகந்தி ஸுகா²யதிகம் ஆயதிம் ஸுக²விபாகம், ஸுகா²வஹந்தி அத்தோ². ததியம்.

4. ப³கப்³ரஹ்மஸுத்தவண்ணனா

175. சதுத்தே² பாபகம் தி³ட்டி²க³தந்தி லாமிகா ஸஸ்ஸததி³ட்டி². இத³ம் நிச்சந்தி இத³ம் ஸஹ காயேன ப்³ரஹ்மட்டா²னம் அனிச்சம் ‘‘நிச்ச’’ந்தி வத³தி. து⁴வாதீ³னி தஸ்ஸேவ வேவசனானி. தத்த² து⁴வந்தி தி²ரம். ஸஸ்ஸதந்தி ஸதா³ விஜ்ஜமானம். கேவலந்தி அக²ண்ட³ம் ஸகலம். அசவனத⁴ம்மந்தி அசவனஸபா⁴வம். இத³ம் ஹி ந ஜாயதீதிஆதீ³ஸு இமஸ்மிம் டா²னே கோசி ஜாயனகோ வா ஜீயனகோ வா மீயனகோ வா சவனகோ வா உபபஜ்ஜனகோ வா நத்தி², தம் ஸந்தா⁴ய வத³தி. இதோ ச பனஞ்ஞந்தி இதோ ஸஹகாயா ப்³ரஹ்மட்டா²னா உத்தரி அஞ்ஞம் நிஸ்ஸரணம் நாம நத்தீ²தி. ஏவமஸ்ஸ தா²மக³தா ஸஸ்ஸததி³ட்டி² உப்பன்னா ஹோதி. ஏவம்வாதீ³ ச பன ஸோ உபரி திஸ்ஸோ ஜா²னபூ⁴மியோ சத்தாரோ மக்³கே³ சத்தாரி ப²லானி நிப்³பா³னந்தி ஸப்³ப³ம் படிபா³ஹதி. கதா³ பனஸ்ஸ ஸா தி³ட்டி² உப்பன்னாதி? பட²மஜ்ஜா²னபூ⁴மியம் நிப்³ப³த்தகாலே. து³தியஜ்ஜா²னபூ⁴மியந்தி ஏகே.

தத்ராயம் அனுபுப்³பி³கதா² – ஹேட்டு²பபத்திகோ கிரேஸ ப்³ரஹ்மா அனுப்பன்னே பு³த்³து⁴ப்பாதே³ இஸிபப்³ப³ஜ்ஜம் பப்³ப³ஜித்வா கஸிணபரிகம்மம் கத்வா ஸமாபத்தியோ நிப்³ப³த்தேத்வா அபரிஹீனஜ்ஜா²னோ காலம் கத்வா சதுத்த²ஜ்ஜா²னபூ⁴மியம் வேஹப்ப²லப்³ரஹ்மலோகே பஞ்சகப்பஸதிகம் ஆயும் க³ஹேத்வா நிப்³ப³த்தி. தத்த² யாவதாயுகம் ட²த்வா ஹேட்டு²பபத்திகம் கத்வா ததியஜ்ஜா²னம் பணீதம் பா⁴வேத்வா ஸுப⁴கிண்ஹப்³ரஹ்மலோகே சதுஸட்டி²கப்பம் ஆயும் க³ஹேத்வா நிப்³ப³த்தி. தத்த² து³தியஜ்ஜா²னம் பா⁴வேத்வா ஆப⁴ஸ்ஸரே அட்ட² கப்பே ஆயும் க³ஹேத்வா நிப்³ப³த்தி. தத்த² பட²மஜ்ஜா²னம் பா⁴வேத்வா, பட²மஜ்ஜா²னபூ⁴மியம் கப்பாயுகோ ஹுத்வா நிப்³ப³த்தி. ஸோ பட²மகாலே அத்தனா கதகம்மஞ்ச நிப்³ப³த்தட்டா²னஞ்ச அஞ்ஞாஸி, காலே பன க³ச்ச²ந்தே க³ச்ச²ந்தே உப⁴யம் பமுஸ்ஸித்வா ஸஸ்ஸததி³ட்டி²ம் உப்பாதே³ஸி.

அவிஜ்ஜாக³தோதி அவிஜ்ஜாய க³தோ ஸமன்னாக³தோ அஞ்ஞாணீ அந்தீ⁴பூ⁴தோ. யத்ர ஹி நாமாதி யோ நாம. வக்க²தீதி ப⁴ணதி. ‘‘யத்ரா’’தி நிபாதயோகே³ன பன அனாக³தவசனம் கதம்.

ஏவம் வுத்தே ஸோ ப்³ரஹ்மா யதா² நாம மக்³க³சோரோ த்³வே தயோ பஹாரே அதி⁴வாஸேந்தோ ஸஹாயே அனாசிக்கி²த்வாபி உத்தரிம் பஹாரம் பஹரியமானோ ‘‘அஸுகோ ச அஸுகோ ச மய்ஹம் ஸஹாயோ’’தி ஆசிக்க²தி, ஏவமேவ ப⁴க³வதா ஸந்தஜ்ஜியமானோ ஸதிம் லபி⁴த்வா, ‘‘ப⁴க³வா மய்ஹம் பதா³னுபத³ம் பேக்க²ந்தோ மம் நிப்பீளிதுகாமோ’’தி பீ⁴தோ அத்தனோ ஸஹாயே ஆசிக்க²ந்தோ த்³வாஸத்ததீதிஆதி³மாஹ. தஸ்ஸத்தோ² – போ⁴ கோ³தம, மயம் த்³வாஸத்ததி ஜனா புஞ்ஞகம்மா தேன புஞ்ஞகம்மேன இத⁴ நிப்³ப³த்தா. வஸவத்தினோ ஸயம் அஞ்ஞேஸம் வஸே அவத்தித்வா பரே அத்தனோ வஸே வத்தேம, ஜாதிஞ்ச ஜரஞ்ச அதீதா, அயம் நோ வேதே³ஹி க³தத்தா ‘‘வேத³கூ³’’தி ஸங்க²ம் க³தா ப⁴க³வா அந்திமா ப்³ரஹ்முபபத்தி. அஸ்மாபி⁴ஜப்பந்தி ஜனா அனேகாதி அனேகஜனா அம்ஹே அபி⁴ஜப்பந்தி. ‘‘அயம் கோ² ப⁴வம் ப்³ரஹ்மா, மஹாப்³ரஹ்மா, அபி⁴பூ⁴, அனபி⁴பூ⁴தோ, அஞ்ஞத³த்து²த³ஸோ, வஸவத்தீ, இஸ்ஸரோ, கத்தா, நிம்மாதா, ஸேட்டோ², ஸஜிதா, வஸீ, பிதா பூ⁴தப⁴ப்³யான’’ந்தி ஏவம் பத்தே²ந்தி பிஹேந்தீதி.

அத² நம் ப⁴க³வா அப்பம் ஹி ஏதந்திஆதி³மாஹ. தத்த² ஏதந்தி யம் த்வம் இத⁴ தவ ஆயும் ‘‘தீ³க⁴’’ந்தி மஞ்ஞஸி, ஏதம் அப்பம் பரித்தகம். ஸதம் ஸஹஸ்ஸானம் நிரப்³பு³தா³னந்தி நிரப்³பு³த³க³ணனாய ஸதஸஹஸ்ஸனிரப்³பு³தா³னம். ஆயும் பஜானாமீதி, ‘‘இதா³னி தவ அவஸிட்ட²ம் ஏத்தகம் ஆயூ’’தி அஹம் ஜானாமி. அனந்தத³ஸ்ஸீ ப⁴க³வா ஹமஸ்மீதி, ப⁴க³வா, தும்ஹே ‘‘அஹம் அனந்தத³ஸ்ஸீ ஜாதிஆதீ³னி உபாதிவத்தோ’’தி வத³த². கிம் மே புராணந்தி, யதி³ த்வம் அனந்தத³ஸ்ஸீ, ஏவம் ஸந்தே இத³ம் மே ஆசிக்க², கிம் மய்ஹம் புராணம்? வதஸீலவத்தந்தி ஸீலமேவ வுச்சதி. யமஹம் விஜஞ்ஞாதி யம் அஹம் தயா கதி²தம் ஜானேய்யம், தம் மே ஆசிக்கா²தி வத³தி.

இதா³னிஸ்ஸ ஆசிக்க²ந்தோ ப⁴க³வா யம் த்வம் அபாயேஸீதிஆதி³மாஹ. தத்ராயம் அதி⁴ப்பாயோ – புப்³பே³ கிரேஸ குலக⁴ரே நிப்³ப³த்தித்வா காமேஸு ஆதீ³னவம் தி³ஸ்வா – ‘‘ஜாதிஜராமரணஸ்ஸ அந்தம் கரிஸ்ஸாமீ’’தி நிக்க²ம்ம இஸிபப்³ப³ஜ்ஜம் பப்³ப³ஜித்வா ஸமாபத்தியோ நிப்³ப³த்தேத்வா அபி⁴ஞ்ஞாபாத³கஜ்ஜா²னஸ்ஸ லாபீ⁴ ஹுத்வா க³ங்கா³தீரே பண்ணஸாலம் காரேத்வா ஜா²னரதியா வீதினாமேதி. ததா³ ச காலேனகாலம் ஸத்த²வாஹா பஞ்சஹி ஸகடஸதேஹி மருகந்தாரம் படிபஜ்ஜந்தி. மருகந்தாரே பன தி³வா ந ஸக்கா க³ந்தும், ரத்திம் க³மனம் ஹோதி. அத² புரிமஸகடஸ்ஸ அக்³க³யுகே³ யுத்தப³லிப³த்³தா³ க³ச்ச²ந்தா க³ச்ச²ந்தா நிவத்தித்வா ஆக³தமக்³கா³பி⁴முகா² அஹேஸும், ஸப்³ப³ஸகடானி ததே²வ நிவத்தித்வா அருணே உக்³க³தே நிவத்திதபா⁴வம் ஜானிம்ஸு. தேஸஞ்ச ததா³ கந்தாரம் அதிக்கமனதி³வஸோ அஹோஸி. ஸப்³ப³ம் தா³ருத³கம் பரிக்கீ²ணம் – தஸ்மா ‘‘நத்தி² தா³னி அம்ஹாகம் ஜீவித’’ந்தி சிந்தேத்வா, கோ³ணே சக்கேஸு ப³ந்தி⁴த்வா, மனுஸ்ஸா ஸகடச்சா²யம் பவிஸித்வா நிபஜ்ஜிம்ஸு.

தாபஸோபி காலஸ்ஸேவ பண்ணஸாலதோ நிக்க²மித்வா பண்ணஸாலத்³வாரே நிஸின்னோ க³ங்க³ம் ஓலோகயமானோ அத்³த³ஸ க³ங்க³ம் மஹதா உத³கோகே⁴ன பூரியமானம் பவத்திதமணிக்க²ந்த⁴ம் விய ஆக³ச்ச²ந்தம், தி³ஸ்வா சிந்தேஸி – ‘‘அத்தி² நு கோ² இமஸ்மிம் லோகே ஏவரூபஸ்ஸ மது⁴ரோத³கஸ்ஸ அலாபே⁴ன கிலிஸ்ஸமானா ஸத்தா’’தி? ஸோ ஏவம் ஆவஜ்ஜேந்தோ மருகந்தாரே தம் ஸத்த²ம் தி³ஸ்வா ‘இமே ஸத்தா மா நஸ்ஸந்தூ’தி ‘‘இதோ சிதோ ச மஹாஉத³கக்க²ந்தோ⁴ சி²ஜ்ஜித்வா மருகந்தாரே ஸத்தா²பி⁴முகோ² க³ச்ச²தூ’’தி அபி⁴ஞ்ஞாசித்தேன அதி⁴ட்டா²ஸி. ஸஹ சித்துப்பாதே³ன மாதிகாருள்ஹம் விய உத³கம் தத்த² அக³மாஸி. மனுஸ்ஸா உத³கஸத்³தே³ன வுட்டா²ய உத³கம் தி³ஸ்வா ஹட்ட²துட்டா² ந்ஹாயித்வா பிவித்வா கோ³ணேபி பாயேத்வா ஸோத்தி²னா இச்சி²தட்டா²னம் அக³மம்ஸு. ஸத்தா² தம் ப்³ரஹ்முனோ புப்³ப³கம்மம் த³ஸ்ஸேந்தோ பட²மம் கா³த²மாஹ. தத்த² அபாயேஸீதி பாயேஸி. அ-காரோ நிபாதமத்தம். க³ம்மனீதி கி³ம்ஹே. ஸம்பரேதேதி கி³ம்ஹாதபேன பு²ட்டே² அனுக³தே.

அபரஸ்மிம்பி ஸமயே தாபஸோ க³ங்கா³தீரே பண்ணஸாலம் மாபேத்வா அரஞ்ஞகா³மகம் நிஸ்ஸாய வஸதி. தேன ச ஸமயேன சோரா தம் கா³மம் பஹரித்வா ஹத்த²ஸாரம் க³ஹேத்வா கா³வியோ ச கரமரே ச க³ஹேத்வா க³ச்ச²ந்தி. கா³வோபி ஸுனகா²பி மனுஸ்ஸாபி மஹாவிரவம் விரவந்தி. தாபஸோ தம் ஸத்³த³ம் ஸுத்வா ‘‘கின்னு கோ² ஏத’’ந்தி? ஆவஜ்ஜேந்தோ ‘‘மனுஸ்ஸானம் ப⁴யம் உப்பன்ன’’ந்தி ஞத்வா ‘‘மயி பஸ்ஸந்தே இமே ஸத்தா மா நஸ்ஸந்தூ’’தி அபி⁴ஞ்ஞாபாத³கஜ்ஜா²னம் ஸமாபஜ்ஜித்வா வுட்டா²ய அபி⁴ஞ்ஞாசித்தேன சோரானம் படிபதே² சதுரங்கி³னிம் ஸேனம் மாபேஸி. கம்மஸஜ்ஜா ஆக³ச்ச²ந்தா சோரா தி³ஸ்வா, ‘‘ராஜா மஞ்ஞே ஆக³தோ’’தி விலோபம் ச²ட்³டே³த்வா பக்கமிம்ஸு. தாபஸோ ‘‘யம் யஸ்ஸ ஸந்தகம், தம் தஸ்ஸேவ ஹோதூ’’தி அதி⁴ட்டா²ஸி, தம் ததே²வ அஹோஸி. மஹாஜனோ ஸோத்தி²பா⁴வம் பாபுணி. ஸத்தா² இத³ம்பி தஸ்ஸ புப்³ப³கம்மம் த³ஸ்ஸேந்தோ து³தியம் கா³த²மாஹ. தத்த² ஏணிகூலஸ்மிந்தி க³ங்கா³தீரே. க³ய்ஹகம் நீயமானந்தி க³ஹேத்வா நீயமானம், கரமரம் நீயமானந்திபி அத்தோ².

புன ஏகஸ்மிம் ஸமயே உபரிக³ங்கா³வாஸிகம் ஏகம் குலம் ஹேட்டா²க³ங்கா³வாஸிகேன குலேன ஸத்³தி⁴ம் மித்தஸந்த²வம் கத்வா, நாவாஸங்கா⁴டம் ப³ந்தி⁴த்வா, ப³ஹும் கா²த³னீயஞ்சேவ போ⁴ஜனீயஞ்ச க³ந்த⁴மாலாதீ³னி ச ஆரோபேத்வா க³ங்கா³ஸோதேன ஆக³ச்ச²தி. மனுஸ்ஸா கா²த³மானா பு⁴ஞ்ஜமானா நச்சந்தா கா³யந்தா தே³வவிமானேன க³ச்ச²ந்தா விய ப³லவஸோமனஸ்ஸா அஹேஸும். க³ங்கே³ய்யகோ நாகோ³ தி³ஸ்வா குபிதோ ‘‘இமே மயி ஸஞ்ஞம்பி ந கரோந்தி. இதா³னி நே ஸமுத்³த³மேவ பாபேஸ்ஸாமீ’’தி மஹந்தம் அத்தபா⁴வம் மாபேத்வா உத³கம் த்³விதா⁴ பி⁴ந்தி³த்வா உட்டா²ய ப²ணம் கத்வா, ஸுஸுகாரம் கரோந்தோ அட்டா²ஸி. மஹாஜனோ தி³ஸ்வா பீ⁴தோ விஸ்ஸரமகாஸி. தாபஸோ பண்ணஸாலாயம் நிஸின்னோ ஸுத்வா, ‘‘இமே கா³யந்தா நச்சந்தா ஸோமனஸ்ஸஜாதா ஆக³ச்ச²ந்தி. இதா³னி பன ப⁴யரவம் ரவிம்ஸு, கின்னு கோ²’’தி? ஆவஜ்ஜேந்தோ நாக³ராஜம் தி³ஸ்வா, ‘‘மயி பஸ்ஸந்தே ஸத்தா மா நஸ்ஸந்தூ’’தி அபி⁴ஞ்ஞாபாத³கஜ்ஜா²னம் ஸமாபஜ்ஜித்வா அத்தபா⁴வம் பஜஹித்வா ஸுபண்ணவண்ணம் மாபேத்வா நாக³ராஜஸ்ஸ த³ஸ்ஸேஸி. நாக³ராஜா பீ⁴தோ ப²ணம் ஸம்ஹரித்வா உத³கம் பவிட்டோ², மஹாஜனோ ஸோத்தி²பா⁴வம் பாபுணி. ஸத்தா² இத³ம்பி தஸ்ஸ புப்³ப³கம்மம் த³ஸ்ஸேந்தோ ததியம் கா³த²மாஹ. தத்த² லுத்³தே³னாதி தா³ருணேன. மனுஸ்ஸகம்யாதி மனுஸ்ஸகாமதாய, மனுஸ்ஸே விஹேடே²துகாமதாயாதி அத்தோ².

அபரஸ்மிம்பி ஸமயே ஏஸ இஸிபப்³ப³ஜ்ஜம் பப்³ப³ஜித்வா கேஸவோ நாம தாபஸோ அஹோஸி. தேன ஸமயேன அம்ஹாகம் போ³தி⁴ஸத்தோ கப்போ நாம மாணவோ கேஸவஸ்ஸ ப³த்³த⁴சரோ அந்தேவாஸிகோ ஹுத்வா ஆசரியஸ்ஸ கிம்காரபடிஸ்ஸாவீ மனாபசாரீ பு³த்³தி⁴ஸம்பன்னோ அத்த²சரோ அஹோஸி. கேஸவோ தேன வினா வஸிதும் ந ஸக்கோதி, தம் நிஸ்ஸாயேவ ஜீவிகம் கப்பேஸி. ஸத்தா² இத³ம்பி தஸ்ஸ புப்³ப³கம்மம் த³ஸ்ஸேந்தோ சதுத்த²ம் கா³த²மாஹ.

தத்த² ப³த்³த⁴சரோதி அந்தேவாஸிகோ, ஸோ பன ஜேட்ட²ந்தேவாஸிகோ அஹோஸி. ஸம்பு³த்³தி⁴மந்தம் வதினம் அமஞ்ஞீதி, ‘‘ஸம்மா பு³த்³தி⁴மா வதஸம்பன்னோ அய’’ந்தி ஏவம் மஞ்ஞமானோ கப்போ தவ அந்தேவாஸிகோ அஹோஸிம் அஹம் ஸோ தேன ஸமயேனாதி த³ஸ்ஸேதி. அஞ்ஞேபி ஜானாஸீதி ந கேவலம் மய்ஹம் ஆயுமேவ, அஞ்ஞேபி த்வம் ஜானாஸியேவ. ததா² ஹி பு³த்³தோ⁴தி ததா² ஹி த்வம் பு³த்³தோ⁴, யஸ்மா பு³த்³தோ⁴, தஸ்மா ஜானாஸீதி அத்தோ². ததா² ஹி த்யாயம் ஜலிதானுபா⁴வோதி யஸ்மா ச த்வம் பு³த்³தோ⁴, தஸ்மா தே அயம் ஜலிதோ ஆனுபா⁴வோ. ஓபா⁴ஸயம் திட்ட²தீதி ஸப்³ப³ம் ப்³ரஹ்மலோகம் ஓபா⁴ஸயந்தோ திட்ட²தி. சதுத்த²ம்.

5. அஞ்ஞதரப்³ரஹ்மஸுத்தவண்ணனா

176. பஞ்சமே தேஜோதா⁴தும் ஸமாபஜ்ஜித்வாதி தேஜோகஸிணபரிகம்மம் கத்வா பாத³கஜ்ஜா²னதோ வுட்டா²ய, ‘‘ஸரீரதோ ஜாலா நிக்க²மந்தூ’’தி அதி⁴ட்ட²ஹந்தோ அதி⁴ட்டா²னசித்தானுபா⁴வேன ஸகலஸரீரதோ ஜாலா நிக்க²மந்தி, ஏவம் தேஜோதா⁴தும் ஸமாபன்னோ நாம ஹோதி, ததா² ஸமாபஜ்ஜித்வா. தஸ்மிம் ப்³ரஹ்மலோகேதி கஸ்மா தே²ரோ தத்த² அக³மாஸி? தே²ரஸ்ஸ கிர தேஜோதா⁴தும் ஸமாபஜ்ஜித்வா தஸ்ஸ ப்³ரஹ்முனோ உபரி நிஸின்னம் ததா²க³தம் தி³ஸ்வா ‘‘அட்டி²வேதீ⁴ அயம் புக்³க³லோ, மயாபேத்த² க³ந்தப்³ப³’’ந்தி அஹோஸி, தஸ்மா அக³மாஸி. ஸேஸானம் க³மனேபி ஏஸேவ நயோ. ஸோ ஹி ப்³ரஹ்மா ததா²க³தஸ்ஸ சேவ ததா²க³தஸாவகானஞ்ச ஆனுபா⁴வம் அதி³ஸ்வா அப⁴ப்³போ³ வினயம் உபக³ந்தும், தேன ஸோ ஸன்னிபாதோ அஹோஸி. தத்த² ததா²க³தஸ்ஸ ஸரீரதோ உக்³க³தஜாலா ஸகலப்³ரஹ்மலோகம் அதிக்கமித்வா அஜடாகாஸே பக்க²ந்தா³, தா ச பன ச²ப்³ப³ண்ணா அஹேஸும், ததா²க³தஸ்ஸ ஸாவகானம் ஆபா⁴ பகதிவண்ணாவ.

பஸ்ஸஸி வீதிவத்தந்தந்தி இமஸ்மிம் ப்³ரஹ்மலோகே அஞ்ஞப்³ரஹ்மஸரீரவிமானாலங்காராதீ³னம் பபா⁴ அதிக்கமமானம் பு³த்³த⁴ஸ்ஸ ப⁴க³வதோ பப⁴ஸ்ஸரம் பப⁴ம் பஸ்ஸஸீதி புச்ச²தி. ந மே, மாரிஸ, ஸா தி³ட்டீ²தி யா மேஸா, ‘‘இதா⁴க³ந்தும் ஸமத்தோ² அஞ்ஞோ ஸமணோ வா ப்³ராஹ்மணோ வா நத்தீ²’’தி புரே தி³ட்டி², நத்தி² மே ஸா. கத²ம் வஜ்ஜந்தி கேன காரணேன வதே³ய்யம். நிச்சோம்ஹி ஸஸ்ஸதோதி இமஸ்ஸ கிர ப்³ரஹ்முனோ லத்³தி⁴தி³ட்டி² ஸஸ்ஸததி³ட்டி² சாதி த்³வே தி³ட்டி²யோ. தத்ராஸ்ஸ ததா²க³தஞ்சேவ ததா²க³தஸாவகே ச பஸ்ஸதோ லத்³தி⁴தி³ட்டி² பஹீனா. ப⁴க³வா பனேத்த² மஹந்தம் த⁴ம்மதே³ஸனம் தே³ஸேஸி. ப்³ரஹ்மா தே³ஸனாபரியோஸானே ஸோதாபத்திப²லே பதிட்ட²ஹி. இதிஸ்ஸ மக்³கே³ன ஸஸ்ஸததி³ட்டி² பஹீனா, தஸ்மா ஏவமாஹ.

ப்³ரஹ்மபாரிஸஜ்ஜந்தி ப்³ரஹ்மபாரிசாரிகம். தே²ரானஞ்ஹி ப⁴ண்ட³கா³ஹகத³ஹரா விய ப்³ரஹ்மானம்பி பாரிஸஜ்ஜா ப்³ரஹ்மானோ நாம ஹோந்தி. தேனுபஸங்கமாதி கஸ்மா தே²ரஸ்ஸேவ ஸந்திகம் பேஸேஸி? தே²ரே கிரஸ்ஸ தத்தகேனேவ கதா²ஸல்லாபேன விஸ்ஸாஸோ உத³பாதி³, தஸ்மா தஸ்ஸேவ ஸந்திகம் பேஸேஸி அஞ்ஞேபீதி யதா² தும்ஹே சத்தாரோ ஜனா, கின்னு கோ² ஏவரூபா அஞ்ஞேபி அத்தி², உதா³ஹு தும்ஹே சத்தாரோ ஏவ மஹித்³தி⁴காதி? தேவிஜ்ஜாதி புப்³பே³னிவாஸதி³ப்³ப³சக்கு²ஆஸவக்க²யஸங்கா²தாஹி தீஹி விஜ்ஜாஹி ஸமன்னாக³தா. இத்³தி⁴பத்தாதி இத்³தி⁴வித⁴ஞாணம் பத்தா. சேதோபரியாயகோவிதா³தி பரேஸம் சித்தாசாரே குஸலா. ஏவமேத்த² பஞ்ச அபி⁴ஞ்ஞாபி ஸரூபேன வுத்தா. தி³ப்³ப³ஸோதம் பன தாஸம் வஸேன ஆக³தமேவ ஹோதி. ப³ஹூதி ஏவரூபா ச²ளபி⁴ஞ்ஞா பு³த்³த⁴ஸாவகா ப³ஹூ க³ணனபத²ம் அதிக்கந்தா, ஸகலம் ஜம்பு³தீ³பம் காஸாவபஜ்ஜோதம் கத்வா விசரந்தீதி. பஞ்சமம்.

6. ப்³ரஹ்மலோகஸுத்தவண்ணனா

177. ச²ட்டே² பச்சேகம் த்³வாரபா³ஹந்தி ஏகேகோ ஏகேகம் த்³வாரபா³ஹம் நிஸ்ஸாய த்³வாரபாலா விய அட்ட²ம்ஸு. இத்³தோ⁴தி ஜா²னஸுகே²ன ஸமித்³தோ⁴. பீ²தோதி அபி⁴ஞ்ஞாபுப்பே²ஹி ஸுபுப்பி²தோ. அனதி⁴வாஸேந்தோதி அஸஹந்தோ. ஏதத³வோசாதி ஏதேஸம் நிம்மிதப்³ரஹ்மானம் மஜ்ஜே² நிஸின்னோ ஏதம் ‘‘பஸ்ஸஸி மே’’திஆதி³வசனம் அவோச.

தயோ ஸுபண்ணாதி கா³தா²ய பஞ்சஸதாதி ஸதபத³ம் ரூபவஸேன வா பந்திவஸேன வா யோஜேதப்³ப³ம். ரூபவஸேன தாவ தயோ ஸுபண்ணாதி தீணி ஸுபண்ணரூபஸதானி. சதுரோ ச ஹம்ஸாதி சத்தாரிஹம்ஸரூபஸதானி. பு³க்³கீ⁴னிஸா பஞ்சஸதாதி ப்³யக்³க⁴ஸதி³ஸா ஏகச்சே மிகா³ ப்³யக்³கீ⁴னிஸா நாம, தேஸம் ப்³யக்³கீ⁴னிஸாரூபகானம் பஞ்சஸதானி, பந்திவஸேன தயோ ஸுபண்ணாதி தீணி ஸுபண்ணபந்திஸதானி, சதுரோ ஹம்ஸாதி சத்தாரி ஹம்ஸபந்திஸதானி. ப்³யக்³கீ⁴னிஸா பஞ்சஸதாதி பஞ்ச ப்³யக்³கீ⁴னிஸா பந்திஸதானி. ஜா²யினோதி ஜா²யிஸ்ஸ மய்ஹம் விமானே அயம் விபூ⁴தீதி த³ஸ்ஸேதி. ஓபா⁴ஸயந்தி ஓபா⁴ஸயமானம். உத்தரஸ்ஸம் தி³ஸாயந்தி தம் கிர கனகவிமானம் தேஸம் மஹாப்³ரஹ்மானம் டி²தட்டா²னதோ உத்தரதி³ஸாயம் ஹோதி. தஸ்மா ஏவமாஹ. அயம் பனஸ்ஸ அதி⁴ப்பாயோ – ஏவரூபே கனகவிமானே வஸந்தோ அஹம் கஸ்ஸ அஞ்ஞஸ்ஸ உபட்டா²னம் க³மிஸ்ஸாமீதி. ரூபே ரணம் தி³ஸ்வாதி ரூபம்ஹி ஜாதிஜராப⁴ங்க³ஸங்கா²தம் தோ³ஸம் தி³ஸ்வா. ஸதா³ பவேதி⁴தந்தி ஸீதாதீ³ஹி ச நிச்சம் பவேதி⁴தம் சலிதம் க⁴ட்டிதம் ரூபம் தி³ஸ்வா. தஸ்மா ந ரூபே ரமதி ஸுமேதோ⁴தி யஸ்மா ரூபே ரணம் பஸ்ஸதி, ஸதா³ பவேதி⁴தஞ்ச ரூபம் பஸ்ஸதி, தஸ்மா ஸுமேதோ⁴ ஸுந்த³ரபஞ்ஞோ ஸோ ஸத்தா² ரூபே ந ரமதீதி. ச²ட்ட²ம்.

7. கோகாலிகஸுத்தவண்ணனா

178. ஸத்தமே அப்பமேய்யம் பமினந்தோதி அப்பமேய்யம் கீ²ணாஸவபுக்³க³லம் ‘‘ஏத்தகம் ஸீலம், ஏத்தகோ ஸமாதி⁴, ஏத்தகா பஞ்ஞா’’தி ஏவம் மினந்தோ. கோத⁴வித்³வா விகப்பயேதி கோ இத⁴ வித்³வா மேதா⁴வீ விகப்பேய்ய, கீ²ணாஸவோவ கீ²ணாஸவம் மினந்தோ கப்பேய்யாதி தீ³பேதி. நிவுதம் தம் மஞ்ஞேதி யோ பன புது²ஜ்ஜனோ தம் பமேதும் ஆரப⁴தி, தம் நிவுதம் அவகுஜ்ஜபஞ்ஞம் மஞ்ஞாமீதி. ஸத்தமம்.

8. கதமோத³கதிஸ்ஸஸுத்தவண்ணனா

179. அட்ட²மே அகிஸ்ஸவந்தி கிஸ்ஸவா வுச்சதி பஞ்ஞா, நிப்பஞ்ஞோதி அத்தோ². அட்ட²மம்.

9. துரூப்³ரஹ்மஸுத்தவண்ணனா

180. நவமே ஆபா³தி⁴கோதி ‘‘ஸாஸபமத்தீஹி பீளகாஹீ’’திஆதி³னா நயேன அனந்தரஸுத்தே ஆக³தேன ஆபா³தே⁴ன ஆபா³தி⁴கோ. பா³ள்ஹகி³லானோதி அதி⁴மத்தகி³லானோ. துரூதி கோகாலிகஸ்ஸ உபஜ்ஜா²யோ துருத்தே²ரோ நாம அனாகா³மிப²லம் பத்வா ப்³ரஹ்மலோகே நிப்³ப³த்தோ. ஸோ பூ⁴மட்ட²கதே³வதா ஆதி³ம் கத்வா, ‘‘அயுத்தம் கோகாலிகேன கதம் அக்³க³ஸாவகே அந்திமவத்து²னா அப்³பா⁴சிக்க²ந்தேனா’’தி பரம்பராய ப்³ரஹ்மலோகஸம்பத்தம் கோகாலிகஸ்ஸ பாபகம்மம் ஸுத்வா – ‘‘மா மய்ஹம் பஸ்ஸந்தஸ்ஸேவ வராகோ நஸ்ஸி, ஓவதி³ஸ்ஸாமி நம் தே²ரேஸு சித்தபஸாத³த்தா²யா’’தி ஆக³ந்த்வா தஸ்ஸ புரதோ அட்டா²ஸி. தம் ஸந்தா⁴ய வுத்தம் ‘‘துரூ பச்சேகப்³ரஹ்மா’’தி. பேஸலாதி பியஸீலா. கோஸி த்வம், ஆவுஸோதி நிபன்னகோவ கப³ரக்கீ²னி உம்மீலேத்வா ஏவமாஹ. பஸ்ஸ யாவஞ்ச தேதி பஸ்ஸ யத்தகம் தயா அபரத்³த⁴ம், அத்தனோ நலாடே மஹாக³ண்ட³ம் அபஸ்ஸந்தோ ஸாஸபமத்தாய பீளகாய மம் சோதே³தப்³ப³ம் மஞ்ஞஸீதி ஆஹ.

அத² நம் ‘‘அதி³ட்டி²ப்பத்தோ அயம் வராகோ, கி³லவிஸோ விய கஸ்ஸசி வசனம் ந கரிஸ்ஸதீ’’தி ஞத்வா புரிஸஸ்ஸ ஹீதிஆதி³மாஹ. தத்த² குடா²ரீதி குடா²ரிஸதி³ஸா ப²ருஸா வாசா. சி²ந்த³தீதி குஸலமூலஸங்கா²தே மூலேயேவ நிகந்ததி. நிந்தி³யந்தி நிந்தி³தப்³ப³ம் து³ஸ்ஸீலபுக்³க³லம். பஸம்ஸதீதி உத்தமத்தே² ஸம்பா⁴வேத்வா கீ²ணாஸவோதி வத³தி. தம் வா நிந்த³தி யோ பஸம்ஸியோதி, யோ வா பஸம்ஸிதப்³போ³ கீ²ணாஸவோ, தம் அந்திமவத்து²னா சோதே³ந்தோ ‘‘து³ஸ்ஸீலோ அய’’ந்தி வத³தி. வசினாதி முகே²ன ஸோ கலிந்தி, ஸோ தம் அபராத⁴ம் முகே²ன விசினாதி நாம. கலினா தேனாதி தேன அபராதே⁴ன ஸுக²ம் ந விந்த³தி. நிந்தி³யபஸம்ஸாய ஹி பஸம்ஸியனிந்தா³ய ச ஸமகோவ விபாகோ.

ஸப்³ப³ஸ்ஸாபி ஸஹாபி அத்தனாதி ஸப்³பே³ன ஸகேனபி அத்தனாபி ஸத்³தி⁴ம் யோ அக்கே²ஸு த⁴னபராஜயோ நாம, அயம் அப்பமத்தகோ அபராதோ⁴. யோ ஸுக³தேஸூதி யோ பன ஸம்மக்³க³தேஸு புக்³க³லேஸு சித்தம் பது³ஸ்ஸேய்ய, அயம் சித்தபதோ³ஸோவ ததோ கலிதோ மஹந்ததரோ கலி.

இதா³னி தஸ்ஸ மஹந்ததரபா⁴வம் த³ஸ்ஸேந்தோ ஸதம் ஸஹஸ்ஸானந்திஆதி³மாஹ. தத்த² ஸதம் ஸஹஸ்ஸானந்தி நிரப்³பு³த³க³ணனாய ஸதஸஹஸ்ஸம். ச²த்திம்ஸதீதி அபரானி ச²த்திம்ஸதி நிரப்³பு³தா³னி. பஞ்ச சாதி அப்³பு³த³க³ணனாய பஞ்ச அப்³பு³தா³னி. யமரியக³ரஹீதி யம் அரியே க³ரஹந்தோ நிரயம் உபபஜ்ஜதி, தத்த² ஏத்தகம் ஆயுப்பமாணந்தி. நவமம்.

10. கோகாலிகஸுத்தவண்ணனா

181. த³ஸமே கோகாலிகோ பி⁴க்கு² யேன ப⁴க³வா தேனுபஸங்கமீதி, கோ அயம் கோகாலிகோ, கஸ்மா ச உபஸங்கமி? அயம் கிர கோகாலிகரட்டே² கோகாலிகனக³ரே கோகாலிகஸேட்டி²ஸ்ஸ புத்தோ பப்³ப³ஜித்வா பிதரா காராபிதே விஹாரே படிவஸதி சூளகோகாலிகோதி நாமேன, ந தே³வத³த்தஸ்ஸ ஸிஸ்ஸோ. ஸோ ஹி ப்³ராஹ்மணபுத்தோ மஹாகோகாலிகோ நாம. ப⁴க³வதி பன ஸாவத்தி²யம் விஹரந்தே த்³வே அக்³க³ஸாவகா பஞ்சமத்தேஹி பி⁴க்கு²ஸதேஹி ஸத்³தி⁴ம் ஜனபத³சாரிகம் சரமானா உபகட்டா²ய வஸ்ஸூபனாயிகாய விவேகாவாஸம் வஸிதுகாமா தே பி⁴க்கூ² உய்யோஜேத்வா அத்தனோ பத்தசீவரமாதா³ய தஸ்மிம் ஜனபதே³ தம் நக³ரம் பத்வா தம் விஹாரம் அக³மம்ஸு. தத்த² நேஸம் கோகாலிகோ வத்தம் த³ஸ்ஸேஸி. தே தேன ஸத்³தி⁴ம் ஸம்மோதி³த்வா, ‘‘ஆவுஸோ, மயம் இத⁴ தேமாஸம் வஸிஸ்ஸாம, மா கஸ்ஸசி ஆரோசேஹீ’’தி படிஞ்ஞம் க³ஹேத்வா வஸிம்ஸு. வஸித்வா பவாரணாதி³வஸே பவாரேத்வா, ‘‘க³ச்சா²ம மயம், ஆவுஸோ’’தி கோகாலிகம் ஆபுச்சி²ம்ஸு. கோகாலிகோ ‘‘அஜ்ஜேகதி³வஸம், ஆவுஸோ, வஸித்வா ஸ்வே க³மிஸ்ஸதா²’’தி வத்வா து³தியதி³வஸே நக³ரம் பவிஸித்வா மனுஸ்ஸே ஆமந்தேஸி – ‘‘ஆவுஸோ, தும்ஹே அக்³க³ஸாவகே இதா⁴க³ந்த்வா வஸமானேபி ந ஜானாத², ந நே கோசி பச்சயேனாபி நிமந்தேதீ’’தி. நக³ரவாஸினோ, ‘‘கஹம், ப⁴ந்தே, தே²ரா, கஸ்மா நோ ந ஆரோசயித்தா²’’தி? கிம் ஆவுஸோ ஆரோசிதேன, கிம் ந பஸ்ஸத² த்³வே பி⁴க்கூ² தே²ராஸனே நிஸீத³ந்தே, ஏதே அக்³க³ஸாவகாதி. தே கி²ப்பம் ஸன்னிபதித்வா ஸப்பிபா²ணிதாதீ³னி சேவ சீவரது³ஸ்ஸானி ச ஸம்ஹரிம்ஸு.

கோகாலிகோ சிந்தேஸி – ‘‘பரமப்பிச்சா² அக்³க³ஸாவகா பயுத்தவாசாய உப்பன்னம் லாப⁴ம் ந ஸாதி³யிஸ்ஸந்தி, அஸாதி³யந்தா ‘ஆவாஸிகஸ்ஸ தே³தா²’தி வக்க²ந்தீ’’தி. தம் தம் லாப⁴ம் கா³ஹாபேத்வா தே²ரானம் ஸந்திகம் அக³மாஸி. தே²ரா தி³ஸ்வாவ ‘‘இமே பச்சயா நேவ அம்ஹாகம், ந கோகாலிகஸ்ஸ கப்பந்தீ’’தி படிக்கி²பித்வா பக்கமிம்ஸு. கோகாலிகோ ‘‘கத²ம் ஹி நாம அத்தனா அக³ண்ஹந்தா மய்ஹம்பி அதா³பேத்வா பக்கமிஸ்ஸந்தீ’’தி? ஆகா⁴தம் உப்பாதே³ஸி. தேபி ப⁴க³வதோ ஸந்திகம் க³ந்த்வா ப⁴க³வந்தம் வந்தி³த்வா புன அத்தனோ பரிஸம் ஆதா³ய ஜனபத³சாரிகம் சரந்தா அனுபுப்³பே³ன தஸ்மிம் ரட்டே² தமேவ நக³ரம் பச்சாக³மிம்ஸு. நாக³ரா தே²ரே ஸஞ்ஜானித்வா ஸஹ பரிக்கா²ரேஹி தா³னம் ஸஜ்ஜித்வா நக³ரமஜ்ஜே² மண்ட³பம் கத்வா தா³னம் அத³ம்ஸு, தே²ரானஞ்ச பரிக்கா²ரே உபனாமேஸும். தே²ரா பி⁴க்கு²ஸங்க⁴ஸ்ஸ நிய்யாத³யிம்ஸு. தம் தி³ஸ்வா கோகாலிகோ சிந்தேஸி – ‘‘இமே புப்³பே³ அப்பிச்சா² அஹேஸும், இதா³னி பாபிச்சா² ஜாதா, புப்³பே³பி அப்பிச்ச²ஸந்துட்ட²பவிவித்தஸதி³ஸா மஞ்ஞே’’தி தே²ரே உபஸங்கமித்வா, ‘‘ஆவுஸோ, தும்ஹே புப்³பே³ அப்பிச்சா² விய, இதா³னி பன பாபபி⁴க்கூ² ஜாதா’’தி வத்வா ‘‘மூலட்டா²னேயேவ நேஸம் பதிட்ட²ம் பி⁴ந்தி³ஸ்ஸாமீ’’தி தரமானரூபோ நிக்க²மித்வா ஸாவத்தி²ம் க³ந்த்வா யேன ப⁴க³வா தேனுபஸங்கமி. அயமேவ கோகாலிகோ இமினா ச காரணேன உபஸங்கமீதி வேதி³தப்³போ³.

ப⁴க³வா தம் துரிததுரிதம் ஆக³ச்ச²ந்தம் தி³ஸ்வாவ ஆவஜ்ஜேந்தோ அஞ்ஞாஸி – ‘‘அயம் அக்³க³ஸாவகே அக்கோஸிதுகாமோ ஆக³தோ’’தி. ‘‘ஸக்கா நு கோ² படிஸேதே⁴து’’ந்தி ச ஆவஜ்ஜேந்தோ, ‘‘ந ஸக்கா படிஸேதே⁴தும், தே²ரேஸு அபரஜ்ஜி²த்வா காலங்கதோ ஏகம்ஸேன பது³மனிரயே நிப்³ப³த்திஸ்ஸதீ’’தி தி³ஸ்வா, ‘‘ஸாரிபுத்தமோக்³க³ல்லானேபி நாம க³ரஹந்தம் ஸுத்வா ந நிஸேதே⁴தீ’’தி வாத³மோசனத்த²ம் அரியூபவாத³ஸ்ஸ ச மஹாஸாவஜ்ஜபா⁴வத³ஸ்ஸனத்த²ம் மா ஹேவந்தி திக்க²த்தும் படிஸேதே⁴ஸி. தத்த² மா ஹேவந்தி மா ஏவம் அப⁴ணி. ஸத்³தா⁴யிகோதி ஸத்³தா⁴ய ஆகரோ பஸாதா³வஹோ ஸத்³தா⁴தப்³ப³வசனோ வா. பச்சயிகோதி பத்தியாயிதப்³ப³வசனோ.

பக்காமீதி கம்மானுபா⁴வேன சோதி³யமானோ பக்காமி. ஓகாஸகதம் ஹி கம்மம் ந ஸக்கா படிபா³ஹிதும், தம் தஸ்ஸ தத்த² டா²தும் ந அதா³ஸி. அசிரபக்கந்தஸ்ஸாதி பக்கந்தஸ்ஸ ஸதோ ந சிரேனேவ. ஸப்³போ³ காயோ பு²டோ அஹோஸீதி கேஸக்³க³மத்தம்பி ஓகாஸம் ஆவஜ்ஜேத்வா ஸகலஸரீரம் அட்டீ²னி பி⁴ந்தி³த்வா உக்³க³தாஹி பீளகாஹி அஜ்ஜோ²த்த²டம் அஹோஸி. யஸ்மா பன பு³த்³தா⁴னுபா⁴வேன ததா²ரூபம் கம்மம் பு³த்³தா⁴னம் ஸம்முகீ²பா⁴வே விபாகம் ந தே³தி, த³ஸ்ஸனூபசாரே விஜஹிதமத்தே தே³தி, தஸ்மா தஸ்ஸ அசிரபக்கந்தஸ்ஸ பீளகா உட்ட²ஹிம்ஸு. கலாயமத்தியோதி சணகமத்தியோ. பே³லுவஸலாடுகமத்தியோதி தருணபே³லுவமத்தியோ. (பி³ல்லமத்தியோதி மஹாபே³லுவமத்தியோ.) பபி⁴ஜ்ஜிம்ஸூதி பி⁴ஜ்ஜிம்ஸு. தாஸு பி⁴ன்னாஸு ஸகலஸரீரம் பனஸபக்கம் விய அஹோஸி. ஸோ பக்கேன க³த்தேன ஜேதவனத்³வாரகோட்ட²கே விஸகி³லிதோ மச்சோ² விய கத³லிபத்தேஸு ஸயி. அத² த⁴ம்மஸவனத்த²ம் ஆக³தாக³தா மனுஸ்ஸா – ‘‘தி⁴ கோகாலிக, தி⁴ கோகாலிக, அயுத்தமகாஸி, அத்தனோயேவ முக²ம் நிஸ்ஸாய அனயப்³யஸனம் பத்தோ’’தி ஆஹம்ஸு. தேஸம் ஸுத்வா ஆரக்க²தே³வதா தி⁴-காரம் அகம்ஸு. ஆரக்க²கதே³வதானம் ஆகாஸதே³வதாதி இமினா உபாயேன யாவ அகனிட்ட²ப⁴வனா ஏகதி⁴காரோ உத³பாதி³. அத²ஸ்ஸ உபஜ்ஜா²யோ ஆக³ந்த்வா ஓவாத³ம் அக³ண்ஹந்தம் ஞத்வா க³ரஹித்வா பக்காமி.

காலமகாஸீதி உபஜ்ஜா²யே பக்கந்தே காலமகாஸி. பது³மம் நிரயந்தி பாடியேக்கோ பது³மனிரயோ நாம நத்தி², அவீசிமஹானிரயம்ஹியேவ பன பது³மக³ணனாய பச்சிதப்³பே³ ஏகஸ்மிம் டா²னே நிப்³ப³த்தி.

வீஸதிகா²ரிகோதி மாக³த⁴கேன பத்தே²ன சத்தாரோ பத்தா² கோஸலரட்டே² ஏகபத்தோ² ஹோதி, தேன பத்தே²ன சத்தாரோ பத்தா² ஆள்ஹகம், சத்தாரி ஆள்ஹகானி தோ³ணம், சதுதோ³ணா மானிகா, சதுமானிகா கா²ரீ, தாய கா²ரியா வீஸதிகா²ரிகோ. திலவாஹோதி மாக³த⁴கானம் ஸுகு²மதிலானம் திலஸகடம். அப்³பு³தோ³ நிரயோதி அப்³பு³தோ³ நாம பாடியேக்கோ நிரயோ நத்தி². அவீசிம்ஹியேவ பன அப்³பு³த³க³ணனாய பச்சிதப்³ப³ட்டா²னஸ்ஸேதம் நாமம். நிரப்³பு³தா³தீ³ஸுபி ஏஸேவ நயோ.

வஸ்ஸக³ணனாபி பனேத்த² ஏவம் வேதி³தப்³பா³ – யதே²வ ஹி ஸதம் ஸதஸஹஸ்ஸானி கோடி ஹோதி, ஏவம் ஸதம் ஸதஸஹஸ்ஸகோடியோ பகோடி நாம ஹோதி, ஸதம் ஸதஸஹஸ்ஸபகோடியோ கோடிபகோடி நாம, ஸதம் ஸதஸஹஸ்ஸகோடிபகோடியோ நஹுதம், ஸதம் ஸதஸஹஸ்ஸனஹுதானி நின்னஹுதம், ஸதம் ஸதஸஹஸ்ஸனின்னஹுதானி ஏகம் அப்³பு³த³ம், ததோ வீஸதிகு³ணம் நிரப்³பு³த³ம். ஏஸேவ நயோ ஸப்³ப³த்தா²தி. த³ஸமம்.

பட²மோ வக்³கோ³.