5. து³தியஸங்கா³மஸுத்தவண்ணனா

126. பஞ்சமே அப்³பு⁴ய்யாஸீதி பராஜயே க³ரஹப்பத்தோ ‘‘ஆராமம் க³ந்த்வா பி⁴க்கூ²னம் கதா²ஸல்லாபம் ஸுணாதா²’’தி ரத்திபா⁴கே³ பு³த்³த⁴ரக்கி²தேன நாம வுட்³ட⁴பப்³ப³ஜிதேன த⁴ம்மரக்கி²தஸ்ஸ வுட்³ட⁴பப்³ப³ஜிதஸ்ஸ ‘‘ஸசே ராஜா இமஞ்ச உபாயம் கத்வா க³ச்சே²ய்ய, புன ஜினேய்யா’’தி வுத்தஜயகாரணம் ஸுத்வா அபி⁴உய்யாஸி.

யாவஸ்ஸ உபகப்பதீதி யாவ தஸ்ஸ உபகப்பதி ஸய்ஹம் ஹோதி. யதா³ சஞ்ஞேதி யதா³ அஞ்ஞே. விலும்பந்தீதி தம் விலும்பித்வா டி²தபுக்³க³லம் விலும்பந்தி. விலும்பதீதி விலும்பியதி. டா²னம் ஹி மஞ்ஞதீதி ‘‘காரண’’ந்தி ஹி மஞ்ஞதி. யதா³தி யஸ்மிம் காலே. ஜேதாரம் லப⁴தே ஜயந்தி ஜயந்தோ புக்³க³லோ பச்சா² ஜேதாரம்பி லப⁴தி. ரோஸேதாரந்தி க⁴ட்டேதாரம். ரோஸகோதி க⁴ட்டகோ. கம்மவிவட்டேனாதி கம்மபரிணாமேன, தஸ்ஸ விலும்பனகம்மஸ்ஸ விபாகதா³னேன. ஸோ விலுத்தோ விலுப்பதீதி ஸோ விலும்பகோ விலும்பியதி. பஞ்சமம்.