2. பஞ்சராஜஸுத்தவண்ணனா

123. து³தியே ரூபாதி நீலபீதாதி³பே⁴த³ம் ரூபாரம்மணம். காமானம் அக்³க³ந்தி ஏதம் காமானம் உத்தமம் ஸேட்ட²ந்தி ரூபக³ருகோ ஆஹ. ஸேஸேஸுபி ஏஸேவ நயோ. யதோதி யதா³. மனாபபரியந்தந்தி மனாபனிப்ப²த்திகம் மனாபகோடிகம். தத்த² த்³வே மனாபானி புக்³க³லமனாபம் ஸம்முதிமனாபஞ்ச. புக்³க³லமனாபம் நாம யம் ஏகஸ்ஸ புக்³க³லஸ்ஸ இட்ட²ம் கந்தம் ஹோதி, ததே³வ அஞ்ஞஸ்ஸ அனிட்ட²ம் அகந்தம். பச்சந்தவாஸீனஞ்ஹி க³ண்டு³ப்பாதா³பி இட்டா² ஹோந்தி கந்தா மனாபா, மஜ்ஜி²மதே³ஸவாஸீனம் அதிஜேகு³ச்சா². தேஸஞ்ச மோரமம்ஸாதீ³னி இட்டா²னி ஹோந்தி, இதரேஸம் தானி அதிஜேகு³ச்சா²னி. இத³ம் புக்³க³லமனாபம். இதரம் ஸம்முதிமனாபம்.

இட்டா²னிட்டா²ரம்மணம் நாம லோகே படிவிப⁴த்தம் நத்தி², விப⁴ஜித்வா பன த³ஸ்ஸேதப்³ப³ம். விப⁴ஜந்தேன ச ந அதிஇஸ்ஸரானம் மஹாஸம்மதமஹாஸுத³ஸ்ஸனத⁴ம்மாஸோகாதீ³னம் வஸேன விப⁴ஜிதப்³ப³ம். தேஸஞ்ஹி தி³ப்பகப்பம்பி ஆரம்மணம் அமனாபம் உபட்டா²தி. அதிது³க்³க³தானம் து³ல்லப⁴ன்னபானானம் வஸேனபி ந விப⁴ஜிதப்³ப³ம். தேஸஞ்ஹி கணாஜகப⁴த்தஸித்தா²னிபி பூதிமம்ஸஸ்ஸ ரஸோபி அதிமது⁴ரோ அமதஸதி³ஸோ ஹோதி. மஜ்ஜி²மானம் பன க³ணகமஹாமத்தஸேட்டி² குடும்பி³கவாணிஜாதீ³னம் காலேன இட்ட²ம் காலேன அனிட்ட²ம் லப⁴மானானம் வஸேன விப⁴ஜிதப்³ப³ம். தஞ்ச பனேதம் ஆரம்மணம் ஜவனம் பரிச்சி²ந்தி³தும் ந ஸக்கோதி. ஜவனஞ்ஹி இட்டே²பி ரஜ்ஜதி அனிட்டே²பி, இட்டே²பி து³ஸ்ஸதி அனிட்டே²பி. ஏகந்ததோ பன விபாகசித்தம் இட்டா²னிட்ட²ம் பரிச்சி²ந்த³தி. கிஞ்சாபி ஹி மிச்சா²தி³ட்டி²கா பு³த்³த⁴ம் வா ஸங்க⁴ம் வா மஹாசேதியாதீ³னி வா உளாரானி ஆரம்மணானி தி³ஸ்வா அக்கீ²னி பித³ஹந்தி தோ³மனஸ்ஸம் ஆபஜ்ஜந்தி, த⁴ம்மஸத்³த³ம் ஸுத்வா கண்ணே த²கேந்தி, சக்கு²விஞ்ஞாணஸோதவிஞ்ஞாணானி பன தேஸம் குஸலவிபாகானேவ ஹோந்தி. கிஞ்சாபி கூ³த²ஸூகராத³யோ கூ³த²க³ந்த⁴ம் கா⁴யித்வா கா²தி³தும் லபி⁴ஸ்ஸாமாதி ஸோமனஸ்ஸஜாதா ஹோந்தி, கூ³த²த³ஸ்ஸனே பன நேஸம் சக்கு²விஞ்ஞாணம், தஸ்ஸ க³ந்த⁴கா⁴யனே கா⁴னவிஞ்ஞாணம், ரஸஸாயனே ஜிவ்ஹாவிஞ்ஞாணஞ்ச அகுஸலவிபாகமேவ ஹோதி. ப⁴க³வா பன புக்³க³லமனாபதம் ஸந்தா⁴ய தே ச, மஹாராஜ, ரூபாதிஆதி³மாஹ.

சந்த³னங்க³லிகோதி இத³ம் தஸ்ஸ உபாஸகஸ்ஸ நாமம். படிபா⁴தி மம் ப⁴க³வாதி ப⁴க³வா மய்ஹம் ஏகம் காரணம் உபட்டா²தி பஞ்ஞாயதி. தஸ்ஸ தே பஞ்ச ராஜானோ ஆமுத்தமணிகுண்ட³லே ஸஜ்ஜிதாய ஆபானபூ⁴மியா நிஸின்னவஸேனேவ மஹதா ராஜானுபா⁴வேன பரமேன இஸ்ஸரியவிப⁴வேன ஆக³ந்த்வாபி த³ஸப³லஸ்ஸ ஸந்திகே டி²தகாலதோ பட்டா²ய தி³வா பதீ³பே விய உத³காபி⁴ஸித்தே அங்கா³ரே விய ஸூரியுட்டா²னே க²ஜ்ஜோபனகே விய ச ஹதப்பபே⁴ ஹதஸோபே⁴ தம் ததா²க³தஞ்ச தேஹி ஸதகு³ணேன ஸஹஸ்ஸகு³ணேன விரோசமானம் தி³ஸ்வா, ‘‘மஹந்தா வத போ⁴ பு³த்³தா⁴ நாமா’’தி படிபா⁴னம் உத³பாதி³. தஸ்மா ஏவமாஹ.

கோகனத³ந்தி பது³மஸ்ஸேவேதம் வேவசனம். பாதோதி காலஸ்ஸேவ. ஸியாதி ப⁴வேய்ய. அவீதக³ந்த⁴ந்தி அவிக³தக³ந்த⁴ம். அங்கீ³ரஸந்தி ஸம்மாஸம்பு³த்³த⁴ம். ப⁴க³வதோ ஹி அங்க³தோ ரஸ்மியோ நிக்க²மந்தி, தஸ்மா அங்கீ³ரஸோதி வுச்சதி. யதா² கோகனத³ஸங்கா²தம் பது³மம் பாதோவ பு²ல்லம் அவீதக³ந்த⁴ம் ஸியா, ஏவமேவ ப⁴க³வந்தம் அங்கீ³ரஸம் தபந்தம் ஆதி³ச்சமிவ அந்தலிக்கே² விரோசமானம் பஸ்ஸாதி அயமேத்த² ஸங்கே²பத்தோ². ப⁴க³வந்தம் அச்சா²தே³ஸீதி ப⁴க³வதோ அதா³ஸீதி அத்தோ². லோகவோஹாரதோ பனேத்த² ஈதி³ஸம் வசனம் ஹோதி. ஸோ கிர உபாஸகோ – ‘‘ஏதே ததா²க³தஸ்ஸ கு³ணேஸு பஸீதி³த்வா மய்ஹம் பஞ்ச உத்தராஸங்கே³ தே³ந்தி, அஹம்பி தே ப⁴க³வதோவ த³ஸ்ஸாமீ’’தி சிந்தேத்வா அதா³ஸி. து³தியம்.