6. நித்³தா³தந்தீ³ஸுத்தவண்ணனா

16. ச²ட்டே² நித்³தா³தி, ‘‘அபி⁴ஜானாமஹம், அக்³கி³வேஸ்ஸன, கி³ம்ஹானம் பச்சி²மே மாஸே நித்³த³ம் ஓக்கமிதா’’தி (ம. நி. 1.387) ஏவரூபாய அப்³யாகதனித்³தா³ய புப்³ப³பா⁴கா³பரபா⁴கே³ஸு ஸேக²புது²ஜ்ஜனானம் ஸஸங்கா²ரிகஅகுஸலே சித்தே உப்பன்னம் தி²னமித்³த⁴ம். தந்தீ³தி அதிச்சா²தாதிஸீதாதி³காலேஸு உப்பன்னம் ஆக³ந்துகம் ஆலஸியம். வுத்தம்பி சேதம் – ‘‘தத்த² கதமா தந்தீ³? யா தந்தீ³ தந்தி³யனா தந்தி³மனதா ஆலஸ்யம் ஆலஸ்யாயனா ஆலஸ்யாயிதத்தம், அயம் வுச்சதி தந்தீ³’’தி (விப⁴. 857). விஜம்பி⁴தாதி காயவிஜம்ப⁴னா. அரதீதி அகுஸலபக்கா² உக்கண்டி²ததா. ப⁴த்தஸம்மதோ³தி ப⁴த்தமுச்சா² ப⁴த்தகிலமதோ². வித்தா²ரோ பன தேஸம் – ‘‘தத்த² கதமா விஜம்பி⁴தா? யா காயஸ்ஸ ஜம்ப⁴னா விஜம்ப⁴னா’’திஆதி³னா நயேன அபி⁴த⁴ம்மே ஆக³தோவ. ஏதேனாதி ஏதேன நித்³தா³தி³னா உபக்கிலேஸேன உபக்கிலிட்டோ² நிவாரிதபாதுபா⁴வோ. நப்பகாஸதீதி ந ஜோததி, ந பாதுப⁴வதீதி அத்தோ². அரியமக்³கோ³தி லோகுத்தரமக்³கோ³. இதா⁴தி இமஸ்மிம் லோகே. பாணினந்தி ஸத்தானம். வீரியேனாதி மக்³க³ஸஹஜாதவீரியேன. நம் பணாமேத்வாதி ஏதம் கிலேஸஜாதம் நீஹரித்வா. அரியமக்³கோ³தி லோகியலோகுத்தரமக்³கோ³. இதி மக்³கே³னேவ உபக்கிலேஸே நீஹரித்வா மக்³க³ஸ்ஸ விஸுத்³தி⁴ வுத்தாதி.

நித்³தா³தந்தீ³ஸுத்தவண்ணனா நிட்டி²தா.