6. ஆனேஞ்ஜஸப்பாயஸுத்தவண்ணனா

66. ஏவம் மே ஸுதந்தி ஆனேஞ்ஜஸப்பாயஸுத்தம். தத்த² அனிச்சாதி ஹுத்வா அபா⁴வட்டே²ன அனிச்சா. காமாதி வத்து²காமாபி கிலேஸகாமாபி. துச்சா²தி நிச்சஸாரது⁴வஸாரஅத்தஸாரவிரஹிதத்தா ரித்தா, ந பன நத்தீ²தி க³ஹேதப்³பா³. ந ஹி துச்ச²முட்டீ²தி வுத்தே முட்டி² நாம நத்தீ²தி வுத்தம் ஹோதி. யஸ்ஸ பன அப்³ப⁴ந்தரே கிஞ்சி நத்தி², ஸோ வுச்சதி துச்சோ². முஸாதி நாஸனகா. மோஸத⁴ம்மாதி நஸ்ஸனஸபா⁴வா, கே²த்தம் விய வத்து² விய ஹிரஞ்ஞஸுவண்ணம் விய ச ந பஞ்ஞாயித்த², கதிபாஹேனேவ ஸுபினகே தி³ட்டா² விய நஸ்ஸந்தி ந பஞ்ஞாயந்தி. தேன வுத்தம் ‘‘மோஸத⁴ம்மா’’தி, மாயாகதமேதந்தி யதா² மாயாய உத³கம் மணீதி கத்வா த³ஸ்ஸிதம், ப³த³ரிபண்ணம் கஹாபணோதி கத்வா த³ஸ்ஸிதம், அஞ்ஞம் வா பன ஏவரூபம் த³ஸ்ஸனூபசாரே டி²தஸ்ஸேவ ததா² பஞ்ஞாயதி, உபசாராதிக்கமதோ பட்டா²ய பாகதிகமேவ பஞ்ஞாயதி. ஏவம் காமாபி இத்தரபச்சுபட்டா²னட்டே²ன ‘‘மாயாகத’’ந்தி வுத்தா. யதா² ச மாயாகாரோ உத³காதீ³னி மணிஆதீ³னம் வஸேன த³ஸ்ஸேந்தோ வஞ்சேதி, ஏவம் காமாபி அனிச்சாதீ³னி நிச்சாதி³ஸபா⁴வம் த³ஸ்ஸேந்தா வஞ்சேந்தீதி வஞ்சனகட்டே²னபி ‘‘மாயாகத’’ந்தி வுத்தா. பா³லலாபனந்தி மய்ஹம் புத்தோ, மய்ஹம் தீ⁴தா, மய்ஹம் ஹிரஞ்ஞம் மய்ஹம் ஸுவண்ணந்தி ஏவம் பா³லானம் லாபனதோ பா³லலாபனம். தி³ட்ட²த⁴ம்மிகா காமாதி மானுஸகா பஞ்ச காமகு³ணா. ஸம்பராயிகாதி தே ட²பேத்வா அவஸேஸா. தி³ட்ட²த⁴ம்மிகா. காமஸஞ்ஞாதி மானுஸகே காமே ஆரப்³ப⁴ உப்பன்னஸஞ்ஞா. உப⁴யமேதம் மாரதே⁴ய்யந்தி ஏதே காமா ச காமஸஞ்ஞா ச உப⁴யம்பி மாரதே⁴ய்யம். யேஹி உப⁴யமேதம் க³ஹிதம், தேஸஞ்ஹி உபரி மாரோ வஸம் வத்தேதி. தம் ஸந்தா⁴ய ‘‘உப⁴யமேதம் மாரதே⁴ய்ய’’ந்தி வுத்தம்.

மாரஸ்ஸேஸ விஸயோதிஆதீ³ஸுபி யதா² சோளஸ்ஸ விஸயோ சோளவிஸயோ, பண்ட³ஸ்ஸ விஸயோ பண்ட³விஸயோ, ஸம்வரானம் விஸயோ ஸம்வரவிஸயோதி பவத்தனட்டா²னம் விஸயோதி வுச்சதி, ஏவம் யேஹி ஏதே காமா க³ஹிதா, தேஸம் உபரி மாரோ வஸம் வத்தேதி. தம் ஸந்தா⁴ய மாரஸ்ஸேஸ விஸயோதி வுத்தம். பஞ்ச பன காமகு³ணே நிவாபபீ³ஜம் விய விப்பகிரந்தோ மாரோ க³ச்ச²தி. யேஹி பன தே க³ஹிதா, தேஸம் உபரி மாரோ வஸம் வத்தேதி. தம் ஸந்தா⁴ய மாரஸ்ஸேஸ நிவாபோதி வுத்தம். யதா² ச யத்த² ஹத்தி²ஆத³யோ வஸம் வத்தேந்தி, ஸோ ஹத்தி²கோ³சரோ அஸ்ஸகோ³சரோ அஜகோ³சரோதி வுச்சதி, ஏவம் யேஹி ஏதே காமா க³ஹிதா, தேஸு மாரோ வஸம் வத்தேதி. தம் ஸந்தா⁴ய மாரஸ்ஸேஸ கோ³சரோதி வுத்தம்.

ஏத்தா²தி ஏதேஸு காமேஸு. மானஸாதி சித்தஸம்பூ⁴தா. தத்த² ஸியா – து³விதே⁴ தாவ காமே ஆரப்³ப⁴ அபி⁴ஜ்ஜா²னலக்க²ணா அபி⁴ஜ்ஜா², கரணுத்தரியலக்க²ணோ ஸாரம்போ⁴ ச உப்பஜ்ஜது, ப்³யாபாதோ³ கத²ம் உப்பஜ்ஜதீதி? மமாயிதே வத்து²ஸ்மிம் அச்சி²ன்னேபி ஸோசந்தி, அச்சி²ஜ்ஜந்தேபி ஸோசந்தி, அச்சி²ன்னஸங்கினோபி ஸோசந்தி, யோ ஏவரூபோ சித்தஸ்ஸ ஆகா⁴தோதி ஏவம் உப்பஜ்ஜதி. தேவ அரியஸாவகஸ்ஸாதி தே அரியஸாவகஸ்ஸ. வகாரோ ஆக³மஸந்தி⁴மத்தம் ஹோதி. இத⁴ மனுஸிக்க²தோதி இமஸ்மிம் ஸாஸனே ஸிக்க²ந்தஸ்ஸ தே தயோபி கிலேஸா அந்தராயகரா ஹோந்தி. அபி⁴பு⁴ய்ய லோகந்தி காமலோகம் அபி⁴ப⁴வித்வா. அதி⁴ட்டா²ய மனஸாதி ஜா²னாரம்மணசித்தேன அதி⁴ட்ட²ஹித்வா. அபரித்தந்தி காமாவசரசித்தம் பரித்தம் நாம, தஸ்ஸ படிக்கே²பேன மஹக்³க³தம் அபரித்தம் நாம. பமாணந்திபி காமாவசரமேவ, ரூபாவசரம் அரூபாவசரம் அப்பமாணம். ஸுபா⁴விதந்தி பன ஏதம் காமாவசராதீ³னம் நாமம் ந ஹோதி, லோகுத்தரஸ்ஸேவேதம் நாமம். தஸ்மா ஏதஸ்ஸ வஸேன அபரித்தம் அப்பமாணம் ஸுபா⁴விதந்தி ஸப்³ப³ம் லோகுத்தரமேவ வட்டதி.

தப்³ப³ஹுலவிஹாரினோதி காமபடிபா³ஹனேன தமேவ படிபத³ம் ப³ஹுலம் கத்வா விஹரந்தஸ்ஸ. ஆயதனே சித்தம் பஸீத³தீதி காரணே சித்தம் பஸீத³தி. கிம் பனேத்த² காரணம்? அரஹத்தம் வா, அரஹத்தஸ்ஸ விபஸ்ஸனம் வா, சதுத்த²ஜ்ஜா²னம் வா, சதுத்த²ஜ்ஜா²னஸ்ஸ உபசாரம் வா. ஸம்பஸாதே³ ஸதீதி ஏத்த² து³விதோ⁴ ஸம்பஸாதோ³ அதி⁴மோக்க²ஸம்பஸாதோ³ ச படிலாப⁴ஸம்பஸாதோ³ ச. அரஹத்தஸ்ஸ ஹி விபஸ்ஸனம் பட்ட²பேத்வா விஹரதோ மஹாபூ⁴தாதீ³ஸு உபட்ட²ஹந்தேஸு யேனிமே நீஹாரேன மஹாபூ⁴தா உபட்ட²ஹந்தி, உபாதா³ரூபா உபட்ட²ஹந்தி நாமரூபா உபட்ட²ஹந்தி, பச்சயா ஸப்³ப³தா² உபட்ட²ஹந்தி, லக்க²ணாரம்மணா விபஸ்ஸனா உபட்ட²ஹதி, அஜ்ஜேவ அரஹத்தம் க³ண்ஹிஸ்ஸாமீதி அப்படிலத்³தே⁴யேவ ஆஸா ஸந்திட்ட²தி, அதி⁴மோக்க²ம் படிலப⁴தி. ததியஜ்ஜா²னம் வா பாத³கம் கத்வா சதுத்த²ஜ்ஜா²னத்தா²ய கஸிணபரிகம்மம் கரோந்தஸ்ஸ நீவரணவிக்க²ம்ப⁴னாதீ³னி ஸமனுபஸ்ஸதோ யேனிமே நீஹாரேன நீவரணா விக்க²ம்ப⁴ந்தி, கிலேஸா ஸன்னிஸீத³ந்தி, ஸதி ஸந்திட்ட²தி, ஸங்கா²ரக³தம் வா விபூ⁴தம் பாகடம் ஹுத்வா தி³ப்³ப³சக்கு²கஸ்ஸ பரலோகோ விய உபட்டா²தி, சித்துப்பாதோ³ லேபபிண்டே³ லக்³க³மானோ விய உபசாரேன ஸமாதி⁴யதி, அஜ்ஜேவ சதுத்த²ஜ்ஜா²னம் நிப்³ப³த்தேஸ்ஸாமீதி அபடிலத்³தே⁴யேவ ஆஸா ஸந்திட்ட²தி, அதி⁴மோக்க²ம் படிலப⁴தி. அயம் அதி⁴மோக்க²ஸம்பஸாதோ³ நாம. தஸ்மிம் ஸம்பஸாதே³ ஸதி. யோ பன அரஹத்தம் வா படிலப⁴தி சதுத்த²ஜ்ஜா²னம் வா, தஸ்ஸ சித்தம் விப்பஸன்னம் ஹோதியேவ. இத⁴ பன ‘‘ஆயதனே சித்தம் பஸீத³தீ’’தி வசனதோ அரஹத்தவிபஸ்ஸனாய சேவ சதுத்த²ஜ்ஜா²னூபசாரஸ்ஸ ச படிலாபோ⁴ படிலாப⁴ஸம்பஸாதோ³தி வேதி³தப்³போ³. விபஸ்ஸனா ஹி பஞ்ஞாய அதி⁴முச்சனஸ்ஸ காரணம், உபசாரம் ஆனேஞ்ஜஸமாபத்தியா.

ஏதரஹி வா ஆனேஞ்ஜம் ஸமாபஜ்ஜதி. பஞ்ஞாய வா அதி⁴முச்சதீதி ஏத்த² ஏதரஹி வா பஞ்ஞாய அதி⁴முச்சதி, ஆனேஞ்ஜம் வா ஸமாபஜ்ஜதீதி ஏவம் பத³பரிவத்தனம் கத்வா அத்தோ² வேதி³தப்³போ³. இத³ஞ்ஹி வுத்தம் ஹோதி – தஸ்மிம் ஸம்பஸாதே³ ஸதி ஏதரஹி வா பஞ்ஞாய அதி⁴முச்சதி, அரஹத்தம் ஸச்சி²கரோதீதி அத்தோ². தம் அனபி⁴ஸம்பு⁴ணந்தோ ஆனேஞ்ஜம் வா ஸமாபஜ்ஜதி, அத² வா பஞ்ஞாய வா அதி⁴முச்சதீதி அரஹத்தமக்³க³ம் பா⁴வேதி, தம் அனபி⁴ஸம்பு⁴ணந்தோ ஆனேஞ்ஜம் வா ஸமாபஜ்ஜதி. அரஹத்தமக்³க³ம் பா⁴வேதும் அஸக்கோந்தோ ஏதரஹி சதுஸச்சம் வா ஸச்சி²கரோதி. தம் அனபி⁴ஸம்பு⁴ணந்தோ ஆனேஞ்ஜம் வா ஸமாபஜ்ஜதீதி.

தத்ராயம் நயோ – இத⁴ பி⁴க்கு² ததியஜ்ஜா²னம் பாத³கம் கத்வா சதுத்த²ஜ்ஜா²னஸ்ஸ கஸிணபரிகம்மம் கரோதி. தஸ்ஸ நீவரணா விக்க²ம்ப⁴ந்தி, ஸதி ஸந்திட்ட²தி, உபசாரேன சித்தம் ஸமாதி⁴யதி. ஸோ ரூபாரூபம் பரிக³ண்ஹாதி, பச்சயம் பரிக்³க³ண்ஹாதி, லக்க²ணாரம்மணிகம் விபஸ்ஸனம் வவத்த²பேதி, தஸ்ஸ ஏவம் ஹோதி – ‘‘உபசாரேன மே ஜா²னம் விஸேஸபா⁴கி³யம் ப⁴வேய்ய, திட்ட²து விஸேஸபா⁴கி³யதா, நிப்³பே³த⁴பா⁴கி³யம் நம் கரிஸ்ஸாமீ’’தி விபஸ்ஸனம் வட்³டே⁴த்வா அரஹத்தம் ஸச்சி²கரோதி. ஏத்தகேனஸ்ஸ கிச்சம் கதம் நாம ஹோதி. அரஹத்தம் ஸச்சி²காதும் அஸக்கோந்தோ பன ததோ ஓஸக்கிதமானஸோ அந்தரா ந திட்ட²தி, சதுத்த²ஜ்ஜா²னம் ஸமாபஜ்ஜதியேவ. யதா² கிம்? யதா² புரிஸோ ‘‘வனமஹிம்ஸம் கா⁴தேஸ்ஸாமீ’’தி ஸத்திம் க³ஹேத்வா அனுப³ந்த⁴ந்தோ ஸசே தம் கா⁴தேதி, ஸகலகா³மவாஸினோ தோஸேஸ்ஸதி, அஸக்கோந்தோ பன அந்தராமக்³கே³ ஸஸகோ³தா⁴த³யோ கு²த்³த³கமிகே³ கா⁴தேத்வா காஜம் பூரேத்வா ஏதியேவ.

தத்த² புரிஸஸ்ஸ ஸத்திம் க³ஹேத்வா வனமஹிம்ஸானுப³ந்த⁴னம் விய இமஸ்ஸ பி⁴க்கு²னோ ததியஜ்ஜா²னம் பாத³கம் கத்வா சதுத்த²ஜ்ஜா²னஸ்ஸ பரிகம்மகரணம், வனமஹிம்ஸகா⁴தனம் விய – ‘‘நீவரணவிக்க²ம்ப⁴னாதீ³னி ஸமனுபஸ்ஸதோ விஸேஸபா⁴கி³யம் ப⁴வேய்ய, திட்ட²து விஸேஸபா⁴கி³யதா, நிப்³பே³த⁴பா⁴கி³யம் நம் கரிஸ்ஸாமீ’’தி விபஸ்ஸனம் வட்³டே⁴த்வா அரஹத்தஸ்ஸ ஸச்சி²கரணம், மஹிம்ஸம் கா⁴தேதும் அஸக்கோந்தஸ்ஸ அந்தராமக்³கே³ ஸஸகோ³தா⁴த³யோ கு²த்³த³கமிகே³ கா⁴தேத்வா காஜம் பூரேத்வா க³மனம் விய அரஹத்தம் ஸச்சி²காதும் அஸக்கோந்தஸ்ஸ, ததோ ஓஸக்கித்வா சதுத்த²ஜ்ஜா²னஸமாபஜ்ஜனம் வேதி³தப்³ப³ம். மக்³க³பா⁴வனா சதுஸச்சஸச்சி²கிரியாயோஜனாஸுபி ஏஸேவ நயோ.

இதா³னி அரஹத்தம் ஸச்சி²காதும் அஸக்கோந்தஸ்ஸ நிப்³ப³த்தட்டா²னம் த³ஸ்ஸேந்தோ காயஸ்ஸ பே⁴தா³திஆதி³மாஹ. தத்த² யந்தி யேன காரணேன தம் ஸம்வத்தனிகம் விஞ்ஞாணம் அஸ்ஸ ஆனேஞ்ஜூபக³ம், தம் காரணம் விஜ்ஜதீதி அத்தோ². ஏத்த² ச தம்ஸம்வத்தனிகந்தி தஸ்ஸ பி⁴க்கு²னோ ஸம்வத்தனிகம். யேன விபாகவிஞ்ஞாணேன ஸோ பி⁴க்கு² ஸம்வத்ததி நிப்³ப³த்ததி, தம் விஞ்ஞாணம். ஆனேஞ்ஜூபக³ந்தி குஸலானேஞ்ஜஸபா⁴வூபக³தம் அஸ்ஸ, தாதி³ஸமேவ ப⁴வேய்யாதி அத்தோ². கேசி குஸலவிஞ்ஞாணம் வத³ந்தி. யம் தஸ்ஸ பி⁴க்கு²னோ ஸம்வத்தனிகம் உபபத்திஹேதுபூ⁴தம் குஸலவிஞ்ஞாணம் ஆனேஞ்ஜூபக³தம் அஸ்ஸ, விபாககாலேபி தன்னாமகமேவ அஸ்ஸாதி அத்தோ². ஸோ பனாயமத்தோ² – ‘‘புஞ்ஞம் சே ஸங்கா²ரம் அபி⁴ஸங்க²ரோதி, புஞ்ஞூபக³ம் ஹோதி விஞ்ஞாணம். அபுஞ்ஞம் சே ஸங்கா²ரம் அபி⁴ஸங்கா²ரோதி, அபுஞ்ஞுபக³ம் ஹோதி விஞ்ஞாணம். ஆனேஞ்ஜம் சே ஸங்கா²ரம் அபி⁴ஸங்க²ரோதி, ஆனேஞ்ஜூபக³ம் ஹோதி விஞ்ஞாண’’ந்தி (ஸம். நி. 2.51) இமினா நயேன வேதி³தப்³போ³. ஆனேஞ்ஜஸப்பாயாதி ஆனேஞ்ஜஸ்ஸ சதுத்த²ஜ்ஜா²னஸ்ஸ ஸப்பாயா. ந கேவலஞ்ச ஸா ஆனேஞ்ஜஸ்ஸேவ, உபரி அரஹத்தஸ்ஸாபி ஸப்பாயாவ உபகாரபூ⁴தாயேவாதி வேதி³தப்³பா³. இதி இமஸ்மிம் பட²மகஆனேஞ்ஜே ஸமாதி⁴வஸேன ஓஸக்கனா கதி²தா.

67. இதி படிஸஞ்சிக்க²தீதி சதுத்த²ஜ்ஜா²னம் பத்வா ஏவம் படிஸஞ்சிக்க²தி. அயஞ்ஹி பி⁴க்கு² ஹேட்டி²மேன பி⁴க்கு²னா பஞ்ஞவந்ததரோ தஸ்ஸ ச பி⁴க்கு²னோ அத்தனோ சாதி த்³வின்னம்பி கம்மட்டா²னம் ஏகதோ கத்வா ஸம்மஸதி. தப்³ப³ஹுலவிஹாரினோதி ரூபபடிபா³ஹனேன தமேவ படிபத³ம் ப³ஹுலம் கத்வா விஹரந்தஸ்ஸ. ஆனேஞ்ஜம் ஸமாபஜ்ஜதீதி ஆகாஸானஞ்சாயதானானேஞ்ஜம் ஸமாபஜ்ஜதி. ஸேஸம் புரிமஸதி³ஸமேவ. யதா² ச இத⁴, ஏவம் ஸப்³ப³த்த² விஸேஸமத்தமேவ பன வக்கா²ம. இதி இமஸ்மிம் து³தியஆனேஞ்ஜே விபஸ்ஸனாவஸேன ஓஸக்கனா கதி²தா, ‘‘யம்கிஞ்சி ரூப’’ந்தி ஏவம் விபஸ்ஸனாமக்³க³ம் த³ஸ்ஸேந்தேன கதி²தாதி அத்தோ².

இதி படிஸஞ்சிக்க²தீதி ஆகாஸானஞ்சாயதனம் பத்வா ஏவம் படிஸஞ்சிக்க²தி. அயஞ்ஹி ஹேட்டா² த்³வீஹி பி⁴க்கூ²ஹி பஞ்ஞவந்ததரோ தேஸஞ்ச பி⁴க்கூ²னம் அத்தனோ சாதி திண்ணம்பி கம்மட்டா²னம் ஏகதோ கத்வா ஸம்மஸதி. உப⁴யமேதம் அனிச்சந்தி ஏத்த² அட்ட² ஏகேககோட்டா²ஸா தி³ட்ட²த⁴ம்மிகஸம்பராயிகவஸேன பன ஸங்கி²பித்வா உப⁴யந்தி வுத்தம். நாலம் அபி⁴னந்தி³துந்தி தண்ஹாதி³ட்டி²வஸேன அபி⁴னந்தி³தும் ந யுத்தம். ஸேஸபத³த்³வயேபி ஏஸேவ நயோ. தப்³ப³ஹுலவிஹாரினோதி காமபடிபா³ஹனேன ச ரூபபடிபா³ஹனேன ச தமேவ படிபத³ம் ப³ஹுலம் கத்வா விஹரந்தஸ்ஸ. ஆனேஞ்ஜம் ஸமாபஜ்ஜதீதி விஞ்ஞாணஞ்சாயதனானேஞ்ஜம் ஸமாபஜ்ஜதி. இமஸ்மிம் ததியஆனேஞ்ஜே விபஸ்ஸனாவஸேன ஓஸக்கனா கதி²தா.

68. இதி படிஸஞ்சிக்க²தீதி விஞ்ஞாணஞ்சாயதனம் பத்வா ஏவம் படிஸஞ்சிக்க²தி. அயஞ்ஹி ஹேட்டா² தீஹி பி⁴க்கூ²ஹி பஞ்ஞவந்ததரோ தேஸஞ்ச பி⁴க்கூ²னம் அத்தனோ சாதி சதுன்னம்பி கம்மட்டா²னம் ஏகதோ கத்வா ஸம்மஸதி. யத்தே²தா அபரிஸேஸா நிருஜ்ஜ²ந்தீதி யம் ஆகிஞ்சஞ்ஞாயதனம் பத்வா ஏதா ஹேட்டா² வுத்தா ஸப்³ப³ஸஞ்ஞா நிருஜ்ஜ²ந்தி. ஏதம் ஸந்தம் ஏதம் பணீதந்தி ஏதம் அங்க³ஸந்ததாய ஆரம்மணஸந்ததாய ச ஸந்தம், அதப்பகட்டே²ன பணீதம். தப்³ப³ஹுலவிஹாரினோதி தாஸம் ஸஞ்ஞானம் படிபா³ஹனேன தமேவ படிபத³ம் ப³ஹுலம் கத்வா விஹரந்தஸ்ஸ. இமஸ்மிம் பட²மாகிஞ்சஞ்ஞாயதனே ஸமாதி⁴வஸேன ஓஸக்கனா கதி²தா.

இதி படிஸஞ்சிக்க²தீதி விஞ்ஞாணஞ்சாயதனமேவ பத்வா ஏவம் படிஸஞ்சிக்க²தி. அயஞ்ஹி ஹேட்டா² சதூஹி பி⁴க்கூ²ஹி பஞ்ஞவந்ததரோ தேஸஞ்ச பி⁴க்கூ²னம் அத்தனோ சாதி பஞ்சன்னம்பி கம்மட்டா²னம் ஏகதோ கத்வா ஸம்மஸதி. அத்தேன வா அத்தனியேன வாதி அஹம் மமாதி க³ஹேதப்³பே³ன ஸுஞ்ஞம் துச்ச²ம் ரித்தம். ஏவமேத்த² த்³விகோடிகா ஸுஞ்ஞதா த³ஸ்ஸிதா. தப்³ப³ஹுலவிஹாரினோதி ஹேட்டா² வுத்தபடிபத³ஞ்ச இமஞ்ச ஸுஞ்ஞதபடிபத³ம் ப³ஹுலம் கத்வா விஹரந்தஸ்ஸ. இமஸ்மிம் து³தியாகிஞ்சஞ்ஞாயதனே விபஸ்ஸனாவஸேன ஓஸக்கனா கதி²தா.

70. இதி படிஸஞ்சிக்க²தீதி விஞ்ஞாணஞ்சாயதனமேவ பத்வா ஏவம் படிஸஞ்சிக்க²தி. அயஞ்ஹி ஹேட்டா² பஞ்சஹி பி⁴க்கூ²ஹி பஞ்ஞவந்ததரோ தேஸஞ்ச பி⁴க்கூ²னம் அத்தனோ சாதி ச²ன்னம்பி கம்மட்டா²னம் ஏகதோ கத்வா ஸம்மஸதி. நாஹம் க்வசனி கஸ்ஸசி கிஞ்சனதஸ்மிம், ந ச மம க்வசனி கிஸ்மிஞ்சி கிஞ்சனம் நத்தீ²தி ஏத்த² பன சதுகோடிகா ஸுஞ்ஞதா கதி²தா. கத²ம்? அயஞ்ஹி நாஹம் க்வசனீதி க்வசி அத்தானம் ந பஸ்ஸதி, கஸ்ஸசி கிஞ்சனதஸ்மிந்தி அத்தனோ அத்தானம் கஸ்ஸசி பரஸ்ஸ கிஞ்சனபா⁴வே உபனேதப்³ப³ம் ந பஸ்ஸதி, அத்தனோ பா⁴திட்டா²னே பா⁴தரம் ஸஹாயட்டா²னே ஸஹாயம் பரிக்கா²ரட்டா²னே வா பரிக்கா²ரம் மஞ்ஞித்வா உபக³ந்த்வா உபனேதப்³ப³ம் ந பஸ்ஸதீதி அத்தோ². ந ச மம க்வசனீதி ஏத்த² மம – ஸத்³த³ம் தாவ ட²பேத்வா ந ச க்வசனி பரஸ்ஸ ச அத்தானம் க்வசி ந பஸ்ஸதீதி அயமத்தோ². இதா³னி மம – ஸத்³த³ம் ஆஹரித்வா மம கிஸ்மிஞ்சி கிஞ்சனம் நத்தீ²தி ஸோ பரஸ்ஸ அத்தா மம கிஸ்மிஞ்சி கிஞ்சனபா⁴வே அத்தீ²தி ந பஸ்ஸதி. அத்தனோ பா⁴திட்டா²னே பா⁴தரம் ஸஹாயட்டா²னே ஸஹாயம் பரிக்கா²ரட்டா²னே வா பரிக்கா²ரந்தி கிஸ்மிஞ்சி டா²னே பரஸ்ஸ அத்தானம் இமினா கிஞ்சனபா⁴வேன உபனேதப்³ப³ம் ந பஸ்ஸதீதி அத்தோ². ஏவமயம் யஸ்மா நேவ கத்த²சி அத்தானம் பஸ்ஸதி, ந தம் பரஸ்ஸ கிஞ்சனபா⁴வே உபனேதப்³ப³ம் பஸ்ஸதி, ந பரஸ்ஸ அத்தானம் பஸ்ஸதி, ந பரஸ்ஸ அத்தானம் அத்தனோ கிஞ்சனபா⁴வே உபனேதப்³ப³ம் பஸ்ஸதி, தஸ்மா அயம் ஸுஞ்ஞதா சதுகோடிகாதி வேதி³தப்³பா³. தப்³ப³ஹுலவிஹாரினோதி ஹேட்டா² வுத்தப்படிபத³ம் இமம் சதுகோடிஸுஞ்ஞதஞ்ச ப³ஹுலம் கத்வா விஹரந்தஸ்ஸ. இமஸ்மிம் ததியாகிஞ்சஞ்ஞாயதனேபி விபஸ்ஸனாவஸேனேவ ஓஸக்கனா கதி²தா.

இதி படிஸஞ்சிக்க²தீதி ஆகிஞ்சஞ்ஞாயதனம் பத்வா ஏவம் படிஸஞ்சிக்க²தி. அயஞ்ஹி ஹேட்டா² ச²ஹி பி⁴க்கூ²ஹி பஞ்ஞவந்ததரோ தேஸஞ்ச பி⁴க்கூ²னம் அத்தனோ சாதி ஸத்தன்னம்பி கம்மட்டா²னம் ஏகதோ கத்வா ஸம்மஸதி. யத்தே²தா அபரிஸேஸா நிருஜ்ஜ²ந்தீதி யம் நேவஸஞ்ஞானாஸஞ்ஞாயதனம் பத்வா ஏத்த² ஏதா ஹேட்டா² வுத்தா ஸப்³ப³ஸஞ்ஞா நிருஜ்ஜ²ந்தி. தப்³ப³ஹுலவிஹாரினோதி தாஸம் ஸஞ்ஞானம் படிபா³ஹனேன தமேவ படிபத³ம் ப³ஹுலம் கத்வா விஹரந்தஸ்ஸ. இமஸ்மிம் நேவஸஞ்ஞானாஸஞ்ஞாயதனே ஸமாதி⁴வஸேன ஓஸக்கனா கதி²தா.

71. நோ சஸ்ஸ நோ ச மே ஸியாதி ஸசே மய்ஹம் புப்³பே³ பஞ்சவித⁴ம் கம்மவட்டம் ந ஆயூஹிதம் அஸ்ஸ, யம் மே இத³ம் ஏதரஹி ஏவம் பஞ்சவித⁴ம் விபாகவட்டம் ஏதம் மே ந ஸியா நப்பவத்தேய்யாதி அத்தோ². ந ப⁴விஸ்ஸதீதி ஸசே ஏதரஹி பஞ்சவித⁴ம் கம்மவட்டம் ஆயூஹிதம் ந ப⁴விஸ்ஸதி. ந மே ப⁴விஸ்ஸதீதி தஸ்மிம் அஸதி அனாக³தே மே பஞ்சவித⁴ம் விபாகவட்டம் ந ப⁴விஸ்ஸதி. யத³த்தி² யம் பூ⁴தம் தம் பஜஹாமீதி யம் அத்தி² யம் பூ⁴தம் ஏதரஹி க²ந்த⁴பஞ்சகம், தம் பஜஹாமி. ஏவம் உபேக்க²ம் படிலப⁴தீதி ஸோ பி⁴க்கு² ஏவம் விபஸ்ஸனுபேக்க²ம் லப⁴தீதி அத்தோ².

பரினிப்³பா³யேய்ய நு கோ² ஸோ, ப⁴ந்தே, பி⁴க்கு² ந வா பரினிப்³பா³யேய்யாதி கிம் புச்சா²மீதி புச்ச²தி, ததியஜ்ஜா²னம் பாத³கம் கத்வா டி²தஸ்ஸ அரஹத்தம்பி ஓஸக்கனாபி படிபதா³பி படிஸந்தி⁴பி கதி²தா, ததா² சதுத்த²ஜ்ஜா²னாதீ³னி பாத³கானி கத்வா டி²தானம், நேவஸஞ்ஞானாஸஞ்ஞாயதனம் பாத³கம் கத்வா டி²தஸ்ஸ ந கிஞ்சி கதி²தம், தம் புச்சா²மீதி புச்ச²தி. அபேத்தா²தி அபி ஏத்த². ஸோ தம் உபேக்க²ம் அபி⁴னந்த³தீதி ஸோ தம் விபஸ்ஸனுபேக்க²ம் தண்ஹாதி³ட்டி²அபி⁴னந்த³னாஹி அபி⁴னந்த³தி. ஸேஸபத³த்³வயேபி ஏஸேவ நயோ. தன்னிஸ்ஸிதம் ஹோதி விஞ்ஞாணந்தி விஞ்ஞாணம் விபஸ்ஸனானிஸ்ஸிதம் ஹோதி. தது³பாதா³னந்தி யம் நிகந்திவிஞ்ஞாணம், தம் தஸ்ஸ உபாதா³னம் நாம க³ஹணம் நாம ஹோதி. ஸஉபாதா³னோதி ஸக³ஹணோ. ந பரினிப்³பா³யதீதி விபஸ்ஸனாய ஸாலயோ பி⁴க்கு² மம ஸாஸனே ந பரினிப்³பா³யதி. யோ பன விஹாரபரிவேணஉபட்டா²காதீ³ஸு ஸாலயோ, தஸ்மிம் வத்தப்³ப³மேவ நத்தீ²தி த³ஸ்ஸேதி. கஹம் பனாதி? கத்த² பன? உபாதி³யமானோ உபாதி³யதீதி படிஸந்தி⁴ம் க³ண்ஹமானோ க³ண்ஹாதி. உபாதா³னஸேட்ட²ம் கிர ஸோ, ப⁴ந்தேதி, ப⁴ந்தே, ஸோ கிர பி⁴க்கு² க³ஹேதப்³ப³ட்டா²னம் ஸேட்ட²ம் உத்தமம் ப⁴வம் உபாதி³யதி, ஸேட்ட²ப⁴வே படிஸந்தி⁴ம் க³ண்ஹாதீதி அத்தோ². இமினா தஸ்ஸ பி⁴க்கு²னோ படிஸந்தி⁴ கதி²தா. இதா³னிஸ்ஸ அரஹத்தம் கதே²தும் இதா⁴னந்தா³திஆதி³மாஹ.

73. நிஸ்ஸாய நிஸ்ஸாயாதி தம் தம் ஸமாபத்திம் நிஸ்ஸாய. ஓக⁴ஸ்ஸ நித்த²ரணா அக்கா²தாதி ஓக⁴தரணம் கதி²தம், ததியஜ்ஜா²னம் பாத³கம் கத்வா டி²தபி⁴க்கு²னோ ஓக⁴னித்த²ரணா கதி²தா…பே… நேவஸஞ்ஞானாஸஞ்ஞாயதனம் பாத³கம் கத்வா டி²தபி⁴க்கு²னோ ஓக⁴னித்த²ரணா கதி²தாதி வத³தி.

கதமோ பன, ப⁴ந்தே, அரியோ விமோக்கோ²தி இத⁴ கிம் புச்ச²தி? ஸமாபத்திம் தாவ பத³ட்டா²னம் கத்வா விபஸ்ஸனம் வட்³டே⁴த்வா அரஹத்தம் க³ண்ஹந்தோ பி⁴க்கு² நாவம் வா உளும்பாதீ³னி வா நிஸ்ஸாய மஹோக⁴ம் தரித்வா பாரம் க³ச்ச²ந்தோ விய ந கிலமதி. ஸுக்க²விபஸ்ஸகோ பன பகிண்ணகஸங்கா²ரே ஸம்மஸித்வா அரஹத்தம் க³ண்ஹந்தோ பா³ஹுப³லேன ஸோதம் சி²ந்தி³த்வா பாரம் க³ச்ச²ந்தோ விய கிலமதி. இதி இமஸ்ஸ ஸுக்க²விபஸ்ஸகஸ்ஸ அரஹத்தம் புச்சா²மீதி புச்ச²தி. அரியஸாவகோதி ஸுக்க²விபஸ்ஸகோ அரியஸாவகோ. அயஞ்ஹி ஹேட்டா² அட்ட²ஹி பி⁴க்கூ²ஹி பஞ்ஞவந்ததரோ தேஸஞ்ச பி⁴க்கூ²னம் அத்தனோ சாதி நவன்னம்பி கம்மட்டா²னம் ஏகதோ கத்வா ஸம்மஸதி. ஏஸ ஸக்காயோ யாவதா ஸக்காயோதி யத்தகோ தேபூ⁴மகவட்டஸங்கா²தோ ஸக்காயோ நாம அத்தி², ஸப்³போ³பி ஸோ ஏஸ ஸக்காயோ, ந இதோ பரம் ஸக்காயோ அத்தீ²தி படிஸஞ்சிக்க²தி.

ஏதம் அமதம் யதி³த³ம் அனுபாதா³ சித்தஸ்ஸ விமோக்கோ²தி யோ பனேஸ சித்தஸ்ஸ அனுபாதா³விமோக்கோ² நாம, ஏதம் அமதம் ஏதம் ஸந்தம் ஏதம் பணீதந்தி படிஸஞ்சிக்க²தி. அஞ்ஞத்த² ச ‘‘அனுபாதா³ சித்தஸ்ஸ விமோக்கோ²’’தி நிப்³பா³னம் வுச்சதி. இமஸ்மிம் பன ஸுத்தே ஸுக்க²விபஸ்ஸகஸ்ஸ அரஹத்தம் கதி²தம். ஸேஸம் ஸப்³ப³த்த² உத்தானமேவ.

கேவலம் பன இமஸ்மிம் ஸுத்தே ஸத்தஸு டா²னேஸு ஓஸக்கனா கதி²தா, அட்ட²ஸு டா²னேஸு படிஸந்தி⁴, நவஸு டா²னேஸு அரஹத்தம் கதி²தந்தி வேதி³தப்³ப³ம். கத²ம்? ததியம் ஜா²னம் தாவ பாத³கம் கத்வா டி²தஸ்ஸ பி⁴க்கு²னோ ஓஸக்கனா கதி²தா, படிஸந்தி⁴ கதி²தா, அரஹத்தம் கதி²தம், ததா² சதுத்த²ஜ்ஜா²னம், ததா² ஆகாஸானஞ்சாயதனம். விஞ்ஞாணஞ்சாயதனம் பன பத³ட்டா²னம் கத்வா டி²தானம் திண்ணம் பி⁴க்கூ²னம் ஓஸக்கனா கதி²தா, படிஸந்தி⁴ கதி²தா, அரஹத்தம் கதி²தம். ததா² ஆகிஞ்சஞ்ஞாயதனம் பாத³கம் கத்வா டி²தஸ்ஸ பி⁴க்கு²னோ. நேவஸஞ்ஞானாஸஞ்ஞாயதனம் பாத³கம் கத்வா டி²தஸ்ஸ பன ஓஸக்கனா நத்தி², படிஸந்தி⁴ பன அரஹத்தஞ்ச கதி²தம். ஸுக்க²விபஸ்ஸகஸ்ஸ அரஹத்தமேவ கதி²தந்தி. ஏவம் ஸத்தஸு டா²னேஸு ஓஸக்கனா கதி²தா, அட்ட²ஸு டா²னேஸு படிஸந்தி⁴, நவஸு டா²னேஸு அரஹத்தம் கதி²தந்தி வேதி³தப்³ப³ம். இமஞ்ச பன ஸத்தஸு டா²னேஸு ஓஸக்கனம் அட்ட²ஸு படிஸந்தி⁴ம் நவஸு அரஹத்தம் ஸமோதா⁴னேத்வா கதே²ந்தேன இமம் ஆனேஞ்ஜஸப்பாயஸுத்தம் ஸுகதி²தம் நாம ஹோதீதி.

பபஞ்சஸூத³னியா மஜ்ஜி²மனிகாயட்ட²கதா²ய

ஆனேஞ்ஜஸப்பாயஸுத்தவண்ணனா நிட்டி²தா.