5. ஜீவகஸுத்தவண்ணனா

51. ஏவம் மே ஸுதந்தி ஜீவகஸுத்தம். தத்த² ஜீவகஸ்ஸ கோமாரப⁴ச்சஸ்ஸ அம்ப³வனேதி ஏத்த² ஜீவதீதி ஜீவகோ. குமாரேன ப⁴தோதி கோமாரப⁴ச்சோ. யதா²ஹ ‘‘கிம் ஏதம் ப⁴ணே காகேஹி ஸம்பரிகிண்ணந்தி? தா³ரகோ தே³வாதி. ஜீவதி ப⁴ணேதி? ஜீவதி தே³வாதி. தேன ஹி ப⁴ணே தம் தா³ரகம் அம்ஹாகம் அந்தேபுரம் நேத்வா தா⁴தீனம் தே³த² போஸேதுந்தி. தஸ்ஸ ஜீவதீதி ஜீவகோதி நாமம் அகம்ஸு, குமாரேன போஸாபிதோதி கோமாரப⁴ச்சோதி நாமம் அகம்ஸூ’’தி (மஹாவ. 328). அயமேத்த² ஸங்கே²போ. வித்தா²ரேன பன ஜீவகவத்து² க²ந்த⁴கே ஆக³தமேவ. வினிச்ச²யகதா²பிஸ்ஸ ஸமந்தபாஸாதி³காய வினயட்ட²கதா²ய வுத்தா.

அயம் பன ஜீவகோ ஏகஸ்மிம் ஸமயே ப⁴க³வதோ தோ³ஸாபி⁴ஸன்னம் காயம் விரேசேத்வா ஸீவேய்யகம் து³ஸ்ஸயுக³ம் த³த்வா வத்தா²னுமோத³னபரியோஸானே ஸோதாபத்திப²லே பதிட்டா²ய சிந்தேஸி – ‘‘மயா தி³வஸஸ்ஸ த்³வத்திக்க²த்தும் பு³த்³து⁴பட்டா²னம் க³ந்தப்³ப³ம், இத³ஞ்ச வேளுவனம் அதிதூ³ரே, மய்ஹம் உய்யானம் அம்ப³வனம் ஆஸன்னதரம், யம்னூனாஹமேத்த² ப⁴க³வதோ விஹாரம் காரேய்ய’’ந்தி. ஸோ தஸ்மிம் அம்ப³வனே ரத்திட்டா²னதி³வாட்டா²னலேணகுடிமண்ட³பாதீ³னி ஸம்பாதே³த்வா ப⁴க³வதோ அனுச்ச²விகம் க³ந்த⁴குடிம் காரேத்வா அம்ப³வனம் அட்டா²ரஸஹத்து²ப்³பே³தே⁴ன தம்ப³பட்டவண்ணேன பாகாரேன பரிக்கி²பாபேத்வா பு³த்³த⁴ப்பமுக²ம் பி⁴க்கு²ஸங்க⁴ம் சீவரப⁴த்தேன ஸந்தப்பேத்வா த³க்கி²ணோத³கம் பாதேத்வா விஹாரம் நிய்யாதேஸி. தம் ஸந்தா⁴ய வுத்தம் – ‘‘ஜீவகஸ்ஸ கோமாரப⁴ச்சஸ்ஸ அம்ப³வனே’’தி.

ஆரப⁴ந்தீதி கா⁴தேந்தி. உத்³தி³ஸ்ஸகதந்தி உத்³தி³ஸித்வா கதம். படிச்சகம்மந்தி அத்தானம் படிச்ச கதம். அத² வா படிச்சகம்மந்தி நிமித்தகம்மஸ்ஸேதம் அதி⁴வசனம், தம் படிச்ச கம்மமேத்த² அத்தீ²தி மம்ஸம் ‘‘படிச்சகம்ம’’ந்தி வுத்தம் ஹோதி யோ ஏவரூபம் மம்ஸம் பரிபு⁴ஞ்ஜதி, ஸோபி தஸ்ஸ கம்மஸ்ஸ தா³யாதோ³ ஹோதி, வத⁴கஸ்ஸ விய தஸ்ஸாபி பாணகா⁴தகம்மம் ஹோதீதி தேஸம் லத்³தி⁴. த⁴ம்மஸ்ஸ சானுத⁴ம்மம் ப்³யாகரோந்தீதி ப⁴க³வதா வுத்தகாரணஸ்ஸ அனுகாரணம் கதே²ந்தி. ஏத்த² ச காரணம் நாம திகோடிபரிஸுத்³த⁴மச்ச²மம்ஸபரிபோ⁴கோ³, அனுகாரணம் நாம மஹாஜனஸ்ஸ ததா² ப்³யாகரணம். யஸ்மா பன ப⁴க³வா உத்³தி³ஸ்ஸகதம் ந பரிபு⁴ஞ்ஜதி, தஸ்மா நேவ தம் காரணம் ஹோதி, ந தித்தி²யானம் ததா² ப்³யாகரணம் அனுகாரணம். ஸஹத⁴ம்மிகோ வாதா³னுவாதோ³தி பரேஹி வுத்தகாரணேன ஸகாரணோ ஹுத்வா தும்ஹாகம் வாதோ³ வா அனுவாதோ³ வா விஞ்ஞூஹி க³ரஹிதப்³ப³காரணம் கோசி அப்பமத்தகோபி கிம் ந ஆக³ச்ச²தி. இத³ம் வுத்தம் ஹோதி – ‘‘கிம் ஸப்³பா³காரேனபி தும்ஹாகம் வாதே³ கா³ரய்ஹம் காரணம் நத்தீ²’’தி. அப்³பா⁴சிக்க²ந்தீதி அபி⁴ப⁴வித்வா ஆசிக்க²ந்தி.

52. டா²னேஹீதி காரணேஹி. தி³ட்டா²தீ³ஸு தி³ட்ட²ம் நாம பி⁴க்கூ²னம் அத்தா²ய மிக³மச்சே² வதி⁴த்வா க³ய்ஹமானம் தி³ட்ட²ம். ஸுதம் நாம பி⁴க்கூ²னம் அத்தா²ய மிக³மச்சே² வதி⁴த்வா க³ஹிதந்தி ஸுதம். பரிஸங்கிதம் நாம தி³ட்ட²பரிஸங்கிதம் ஸுதபரிஸங்கிதம் தது³ப⁴யவிமுத்தபரிஸங்கிதந்தி திவித⁴ம் ஹோதி.

தத்ராயம் ஸப்³ப³ஸங்கா³ஹகவினிச்ச²யோ – இத⁴ பி⁴க்கூ² பஸ்ஸந்தி மனுஸ்ஸே ஜாலவாகு³ராதி³ஹத்தே² கா³மதோ வா நிக்க²மந்தே அரஞ்ஞே வா விசரந்தே. து³தியதி³வஸே ச நேஸம் தம் கா³மம் பிண்டா³ய பவிட்டா²னம் ஸமச்ச²மம்ஸம் பிண்ட³பாதம் அபி⁴ஹரந்தி. தே தேன தி³ட்டே²ன பரிஸங்கந்தி ‘‘பி⁴க்கூ²னம் நு கோ² அத்தா²ய கத’’ந்தி, இத³ம் தி³ட்ட²பரிஸங்கிதம் நாம, ஏதம் க³ஹேதும் ந வட்டதி. யம் ஏவம் அபரிஸங்கிதம், தம் வட்டதி. ஸசே பன தே மனுஸ்ஸா ‘‘கஸ்மா, ப⁴ந்தே, ந க³ண்ஹதா²’’தி புச்சி²த்வா தமத்த²ம் ஸுத்வா ‘‘நயித³ம், ப⁴ந்தே, பி⁴க்கூ²னம் அத்தா²ய கதம், அம்ஹேஹி அத்தனோ அத்தா²ய வா ராஜயுத்தாதீ³னம் அத்தா²ய வா கத’’ந்தி வத³ந்தி, கப்பதி.

ந ஹேவ கோ² பி⁴க்கூ² பஸ்ஸந்தி, அபிச ஸுணந்தி ‘‘மனுஸ்ஸா கிர ஜாலவாகு³ராதி³ஹத்தா² கா³மதோ வா நிக்க²மந்தி அரஞ்ஞே வா விசரந்தீ’’தி. து³தியதி³வஸே ச நேஸம் தம் கா³மம் பிண்டா³ய பவிட்டா²னம் ஸமச்ச²மம்ஸம் பிண்ட³பாதம் அபி⁴ஹரந்தி. தே தேன ஸுதேன பரிஸங்கந்தி ‘‘பி⁴க்கூ²னம் நு கோ² அத்தா²ய கத’’ந்தி, இத³ம் ஸுதபரிஸங்கிதம் நாம, ஏதம் க³ஹேதும் ந வட்டதி. யம் ஏவம் அபரிஸங்கிதம், தம் வட்டதி. ஸசே பன தே மனுஸ்ஸா ‘‘கஸ்மா, ப⁴ந்தே, ந க³ண்ஹதா²’’தி புச்சி²த்வா தமத்த²ம் ஸுத்வா ‘‘நயித³ம், ப⁴ந்தே, பி⁴க்கூ²னம் அத்தா²ய கதம், அம்ஹேஹி அத்தனோ அத்தா²ய வா ராஜயுத்தாதீ³னம் அத்தா²ய வா கத’’ந்தி வத³ந்தி, கப்பதி.

ந ஹேவ கோ² பன பஸ்ஸந்தி ந ஸுணந்தி, அபிச தேஸம் கா³மம் பிண்டா³ய பவிட்டா²னம் பத்தம் க³ஹேத்வா ஸமச்ச²மம்ஸம் பிண்ட³பாதம் அபி⁴ஸங்க²ரித்வா அபி⁴ஹரந்தி. தே பரிஸங்கந்தி ‘‘பி⁴க்கூ²னம் நு கோ² அத்தா²ய கத’’ந்தி, இத³ம் தது³ப⁴யவிமுத்தபரிஸங்கிதம் நாம. ஏதம்பி க³ஹேதும் ந வட்டதி. யம் ஏவம் அபரிஸங்கிதம், தம் வட்டதி. ஸசே பன தே மனுஸ்ஸா ‘‘கஸ்மா, ப⁴ந்தே, ந க³ண்ஹதா²’’தி புச்சி²த்வா தமத்த²ம் ஸுத்வா ‘‘நயித³ம், ப⁴ந்தே, பி⁴க்கூ²னம் அத்தா²ய கதம், அம்ஹேஹி அத்தனோ அத்தா²ய வா ராஜயுத்தாதீ³னம் அத்தா²ய வா கதம், பவத்தமம்ஸம் வா கதம், கப்பியமேவ லபி⁴த்வா பி⁴க்கூ²னம் அத்தா²ய ஸம்பாதி³த’’ந்தி வத³ந்தி, கப்பதி.

மதானம் பேதகிச்சத்தா²ய மங்க³லாதீ³னம் வா அத்தா²ய கதேபி ஏஸேவ நயோ. யம் யஞ்ஹி பி⁴க்கூ²னம்யேவ அத்தா²ய அகதம், யத்த² ச நிப்³பே³மதிகா ஹோந்தி, தம் ஸப்³ப³ம் கப்பதி. ஸசே பன ஏகஸ்மிம் விஹாரே பி⁴க்கூ² உத்³தி³ஸ்ஸ கதம் ஹோதி, தே ச அத்தனோ அத்தா²ய கதபா⁴வம் ந ஜானந்தி, அஞ்ஞே ஜானந்தி. யே ஜானந்தி, தேஸம் ந வட்டதி, இதரேஸம் வட்டதி. அஞ்ஞே ந ஜானந்தி, தேயேவ ஜானந்தி, தேஸம்யேவ ந வட்டதி, அஞ்ஞேஸம் வட்டதி. தேபி ‘‘அம்ஹாகம் அத்தா²ய கதம்’’தி ஜானந்தி அஞ்ஞேபி ‘‘ஏதேஸம் அத்தா²ய கத’’ந்தி ஜானந்தி, ஸப்³பே³ஸம்பி தம் ந வட்டதி. ஸப்³பே³ ந ஜானந்தி, ஸப்³பே³ஸம் வட்டதி. பஞ்சஸு ஹி ஸஹத⁴ம்மிகேஸு யஸ்ஸ கஸ்ஸசி வா அத்தா²ய உத்³தி³ஸ்ஸ கதம் ஸப்³பே³ஸம் ந கப்பதி.

ஸசே பன கோசி ஏகம் பி⁴க்கு²ம் உத்³தி³ஸ்ஸ பாணம் வதி⁴த்வா தஸ்ஸ பத்தம் பூரேத்வா தே³தி, ஸோ சே அத்தனோ அத்தா²ய கதபா⁴வம் ஜானம்யேவ க³ஹேத்வா அஞ்ஞஸ்ஸ பி⁴க்கு²னோ தே³தி, ஸோ தஸ்ஸ ஸத்³தா⁴ய பரிபு⁴ஞ்ஜதி. கஸ்ஸாபத்தீதி? த்³வின்னம்பி அனாபத்தி. யஞ்ஹி உத்³தி³ஸ்ஸ கதம், தஸ்ஸ அபு⁴த்ததாய அனாபத்தி, இதரஸ்ஸ அஜானனதாய. கப்பியமம்ஸஸ்ஸ ஹி படிக்³க³ஹணே ஆபத்தி நத்தி². உத்³தி³ஸ்ஸகதஞ்ச அஜானித்வா பு⁴த்தஸ்ஸ பச்சா² ஞத்வா ஆபத்திதே³ஸனாகிச்சம் நாம நத்தி². அகப்பியமம்ஸம் பன அஜானித்வா பு⁴த்தேன பச்சா² ஞத்வாபி ஆபத்தி தே³ஸேதப்³பா³. உத்³தி³ஸ்ஸகதஞ்ஹி ஞத்வா பு⁴ஞ்ஜதோவ ஆபத்தி, அகப்பியமம்ஸம் அஜானித்வா பு⁴த்தஸ்ஸாபி ஆபத்தியேவ. தஸ்மா ஆபத்திபீ⁴ருகேன ரூபம் ஸல்லக்கே²ந்தேனாபி புச்சி²த்வாவ மம்ஸம் படிக்³க³ஹேதப்³ப³ம், பரிபோ⁴க³காலே புச்சி²த்வா பரிபு⁴ஞ்ஜிஸ்ஸாமீதி வா க³ஹேத்வா புச்சி²த்வாவ பரிபு⁴ஞ்ஜிதப்³ப³ம். கஸ்மா? து³விஞ்ஞேய்யத்தா. அச்ச²மம்ஸஞ்ஹி ஸூகரமம்ஸஸதி³ஸம் ஹோதி, தீ³பிமம்ஸாதீ³னி ச மிக³மம்ஸஸதி³ஸானி, தஸ்மா புச்சி²த்வா க³ஹணமேவ வட்டதீதி வத³ந்தி.

அதி³ட்ட²ந்தி பி⁴க்கூ²னம் அத்தா²ய வதி⁴த்வா க³ய்ஹமானம் அதி³ட்ட²ம். அஸுதந்தி பி⁴க்கூ²னம் அத்தா²ய வதி⁴த்வா க³ஹிதந்தி அஸுதம். அபரிஸங்கிதந்தி தி³ட்ட²பரிஸங்கிதாதி³வஸேன அபரிஸங்கிதம். பரிபோ⁴க³ந்தி வதா³மீதி இமேஹி தீஹி காரணேஹி பரிஸுத்³த⁴ம் திகோடிபரிஸுத்³த⁴ம் நாம ஹோதி, தஸ்ஸ பரிபோ⁴கோ³ அரஞ்ஞே ஜாதஸூபேய்யஸாகபரிபோ⁴க³ஸதி³ஸோ ஹோதி, ததா²ரூபம் பரிபு⁴ஞ்ஜந்தஸ்ஸ மேத்தாவிஹாரிஸ்ஸ பி⁴க்கு²னோ தோ³ஸோ வா வஜ்ஜம் வா நத்தி², தஸ்மா தம் பரிபு⁴ஞ்ஜிதப்³ப³ந்தி வதா³மீதி அத்தோ².

53. இதா³னி தாதி³ஸஸ்ஸ பரிபோ⁴கே³ மேத்தாவிஹாரினோபி அனவஜ்ஜதம் த³ஸ்ஸேதும் இத⁴, ஜீவக, பி⁴க்கூ²திஆதி³மாஹ. தத்த² கிஞ்சாபி அனியமேத்வா பி⁴க்கூ²தி வுத்தம், அத² கோ² அத்தானமேவ ஸந்தா⁴ய ஏதம் வுத்தந்தி வேதி³தப்³ப³ம். ப⁴க³வதா ஹி மஹாவச்ச²கோ³த்தஸுத்தே, சங்கீஸுத்தே, இமஸ்மிம் ஸுத்தேதி தீஸு டா²னேஸு அத்தானம்யேவ ஸந்தா⁴ய தே³ஸனா கதா. பணீதேன பிண்ட³பாதேனாதி ஹேட்டா² அனங்க³ணஸுத்தே யோ கோசி மஹக்³கோ⁴ பிண்ட³பாதோ பணீதபிண்ட³பாதோதி அதி⁴ப்பேதோ, இத⁴ பன மம்ஸூபஸேசனோவ அதி⁴ப்பேதோ. அக³தி²தோதி தண்ஹாய அக³தி²தோ. அமுச்சி²தோதி தண்ஹாமுச்ச²னாய அமுச்சி²தோ. அனஜ்ஜோ²பன்னோதி ந அதி⁴ஓபன்னோ, ஸப்³ப³ம் ஆலும்பித்வா ஏகப்பஹாரேனேவ கி³லிதுகாமோ காகோ விய ந ஹோதீதி அத்தோ². ஆதீ³னவத³ஸ்ஸாவீதி ஏகரத்திவாஸேன உத³ரபடலம் பவிஸித்வா நவஹி வணமுகே²ஹி நிக்க²மிஸ்ஸதீதிஆதி³னா நயேன ஆதீ³னவம் பஸ்ஸந்தோ. நிஸ்ஸரணபஞ்ஞோ பரிபு⁴ஞ்ஜதீதி இத³மத்த²மாஹாரபரிபோ⁴கோ³தி பஞ்ஞாய பரிச்சி²ந்தி³த்வா பரிபு⁴ஞ்ஜதி. அத்தப்³யாபா³தா⁴ய வா சேதேதீதி அத்தது³க்கா²ய வா சிதேதி. ஸுதமேதந்தி ஸுதம் மயா ஏதம் புப்³பே³, ஏதம் மய்ஹம் ஸவனமத்தமேவாதி த³ஸ்ஸேதி. ஸசே கோ² தே, ஜீவக, இத³ம் ஸந்தா⁴ய பா⁴ஸிதந்தி, ஜீவக, மஹாப்³ரஹ்முனா விக்க²ம்ப⁴னப்பஹானேன ப்³யாபாதா³த³யோ பஹீனா, தேன ஸோ மேத்தாவிஹாரீ மய்ஹம் ஸமுச்சே²த³ப்பஹானேன, ஸசே தே இத³ம் ஸந்தா⁴ய பா⁴ஸிதம், ஏவம் ஸந்தே தவ இத³ம் வசனம் அனுஜானாமீதி அத்தோ². ஸோ ஸம்படிச்சி².

54. அத²ஸ்ஸ ப⁴க³வா ஸேஸப்³ரஹ்மவிஹாரவஸேனாபி உத்தரி தே³ஸனம் வட்³டே⁴ந்தோ ‘‘இத⁴, ஜீவக, பி⁴க்கூ²’’திஆதி³மாஹ. தம் உத்தானத்த²மேவ.

55. யோ கோ² ஜீவகாதி அயம் பாடிஏக்கோ அனுஸந்தி⁴. இமஸ்மிஞ்ஹி டா²னே ப⁴க³வா த்³வாரம் த²கேதி, ஸத்தானுத்³த³யம் த³ஸ்ஸேதி. ஸசே ஹி கஸ்ஸசி ஏவமஸ்ஸ ‘‘ஏகம் ரஸபிண்ட³பாதம் த³த்வா கப்பஸதஸஹஸ்ஸம் ஸக்³க³ஸம்பத்திம் படிலப⁴ந்தி, யம்கிஞ்சி கத்வா பரம் மாரேத்வாபி ரஸபிண்ட³பாதோவ தா³தப்³போ³’’தி, தம் படிஸேதே⁴ந்தோ ‘‘யோ கோ², ஜீவக, ததா²க³தம் வா’’திஆதி³மாஹ.

தத்த² இமினா பட²மேன டா²னேனாதி இமினா ஆணத்திமத்தேனேவ தாவ பட²மேன காரணேன. க³லப்பவேத⁴கேனாதி யோத்தேன க³லே ப³ந்தி⁴த்வா கட்³டி⁴தோ க³லேன பவேதே⁴ந்தேன. ஆரபி⁴யமானோதி மாரியமானோ. அகப்பியேன ஆஸாதே³தீதி அச்ச²மம்ஸம் ஸூகரமம்ஸந்தி, தீ³பிமம்ஸம் வா மிக³மம்ஸந்தி கா²தா³பேத்வா – ‘‘த்வம் கிம் ஸமணோ நாம, அகப்பியமம்ஸம் தே கா²தி³த’’ந்தி க⁴ட்டேதி. யே பன து³ப்³பி⁴க்கா²தீ³ஸு வா ப்³யாதி⁴னிக்³க³ஹணத்த²ம் வா ‘‘அச்ச²மம்ஸம் நாம ஸூகரமம்ஸஸதி³ஸம், தீ³பிமம்ஸம் மிக³மம்ஸஸதி³ஸ’’ந்தி ஜானந்தா ‘‘ஸூகரமம்ஸம் இத³ம், மிக³மம்ஸம் இத³’’ந்தி வத்வா ஹிதஜ்ஜா²ஸயேன கா²தா³பேந்தி, ந தே ஸந்தா⁴யேதம் வுத்தம். தேஸஞ்ஹி ப³ஹுபுஞ்ஞமேவ ஹோதி. ஏஸாஹம், ப⁴ந்தே, ப⁴க³வந்தம் ஸரணம் க³ச்சா²மி த⁴ம்மஞ்ச பி⁴க்கு²ஸங்க⁴ஞ்சாதி அயம் ஆக³தப²லோ விஞ்ஞாதஸாஸனோ தி³ட்ட²ஸச்சோ அரியஸாவகோ. இமம் பன த⁴ம்மதே³ஸனம் ஓகா³ஹந்தோ பஸாத³ம் உப்பாதே³த்வா த⁴ம்மகதா²ய து²திம் கரோந்தோ ஏவமாஹ. ஸேஸம் ஸப்³ப³த்த² உத்தானமேவாதி.

பபஞ்சஸூத³னியா மஜ்ஜி²மனிகாயட்ட²கதா²ய

ஜீவகஸுத்தவண்ணனா நிட்டி²தா.