3. ஸேக²ஸுத்தவண்ணனா

22. ஏவம் மே ஸுதந்தி ஸேக²ஸுத்தம். தத்த² நவம் ஸந்தா²கா³ரந்தி அது⁴னா காரிதம் ஸந்தா²கா³ரம், ஏகா மஹாஸாலாதி அத்தோ². உய்யோக³காலாதீ³ஸு ஹி ராஜானோ தத்த² ட²த்வா ‘‘ஏத்தகா புரதோ க³ச்ச²ந்து, ஏத்தகா பச்சா², ஏத்தகா உபோ⁴ஹி பஸ்ஸேஹி, ஏத்தகா ஹத்தீ²ஸு அபி⁴ருஹந்து, ஏத்தகா அஸ்ஸேஸு, ஏத்தகா ரதே²ஸு திட்ட²ந்தூ’’தி ஏவம் ஸந்த²ம் கரோந்தி, மரியாத³ம் ப³ந்த⁴ந்தி, தஸ்மா தம் டா²னம் ஸந்தா²கா³ரந்தி வுச்சதி. உய்யோக³ட்டா²னதோ ச ஆக³ந்த்வா யாவ கே³ஹேஸு அல்லகோ³மயபரிப⁴ண்டா³தீ³னி கரோந்தி, தாவ த்³வே தீணி தி³வஸானி தே ராஜானோ தத்த² ஸந்த²ம்ப⁴ந்தீதிபி ஸந்தா²கா³ரம். தேஸம் ராஜூனம் ஸஹ அத்தா²னுஸாஸனம் அகா³ரந்திபி ஸந்தா²கா³ரம் க³ணராஜானோ ஹி தே, தஸ்மா உப்பன்னகிச்சம் ஏகஸ்ஸ வஸேன ந சி²ஜ்ஜதி, ஸப்³பே³ஸம் ச²ந்தோ³ லத்³து⁴ம் வட்டதி, தஸ்மா ஸப்³பே³ தத்த² ஸன்னிபதித்வா அனுஸாஸந்தி. தேன வுத்தம் ‘‘ஸஹ அத்தா²னுஸாஸனம் அகா³ரந்திபி ஸந்தா²கா³ர’’ந்தி. யஸ்மா பனேதே தத்த² ஸன்னிபதித்வா ‘‘இமஸ்மிம் காலே கஸிதும் வட்டதி, இமஸ்மிம் காலே வபிது’’ந்தி ஏவமாதி³னா நயேன க⁴ராவாஸகிச்சானி ஸம்மந்தயந்தி, தஸ்மா சி²த்³தா³வசி²த்³த³ம் க⁴ராவாஸம் தத்த² ஸந்த²ரந்தீதிபி ஸந்தா²கா³ரம். அசிரகாரிதம் ஹோதீதி கட்ட²கம்ம-ஸிலாகம்ம-சித்தகம்மாதி³வஸேன ஸுஸஜ்ஜிதம் தே³வவிமானம் விய அது⁴னா நிட்டா²பிதம். ஸமணேன வாதி ஏத்த² யஸ்மா க⁴ரவத்து²பரிக்³க³ஹகாலேயேவ தே³வதா அத்தனோ வஸனட்டா²னம் க³ண்ஹந்தி, தஸ்மா ‘‘தே³வேன வா’’தி அவத்வா ‘‘ஸமணேன வா ப்³ராஹ்மணேன வா கேனசி வா மனுஸ்ஸபூ⁴தேனா’’தி வுத்தம்.

யேன ப⁴க³வா தேனுபஸங்கமிம்ஸூதி ஸந்தா²கா³ரம் நிட்டி²தந்தி ஸுத்வா ‘‘க³ச்சா²ம, நம் பஸ்ஸிஸ்ஸாமா’’தி க³ந்த்வா த்³வாரகோட்ட²கதோ பட்டா²ய ஸப்³ப³ம் ஓலோகேத்வா ‘‘இத³ம் ஸந்தா²கா³ரம் தே³வவிமானஸதி³ஸம் அதிவிய மனோரமம் ஸஸ்ஸிரிகம் கேன பட²மம் பரிபு⁴த்தம் அம்ஹாகம் தீ³க⁴ரத்தம் ஹிதாய ஸுகா²ய அஸ்ஸா’’தி சிந்தேத்வா ‘‘அம்ஹாகம் ஞாதிஸேட்ட²ஸ்ஸ பட²மம் தி³ய்யமானேபி ஸத்து²னோவ அனுச்ச²விகம், த³க்கி²ணேய்யவஸேன தி³ய்யமானேபி ஸத்து²னோவ அனுச்ச²விகம், தஸ்மா பட²மம் ஸத்தா²ரம் பரிபு⁴ஞ்ஜாபேஸ்ஸாம, பி⁴க்கு²ஸங்க⁴ஸ்ஸ ஆக³மனம் கரிஸ்ஸாம, பி⁴க்கு²ஸங்கே⁴ ஆக³தே தேபிடகம் பு³த்³த⁴வசனம் ஆக³தமேவ ப⁴விஸ்ஸதி, ஸத்தா²ரம் தியாமரத்திம் அம்ஹாகம் த⁴ம்மகத²ம் கதா²பேஸ்ஸாம, இதி தீஹி ரதனேஹி பரிபு⁴த்தம் மயம் பச்சா² பரிபு⁴ஞ்ஜிஸ்ஸாம, ஏவம் நோ தீ³க⁴ரத்தம் ஹிதாய ஸுகா²ய ப⁴விஸ்ஸதீ’’தி ஸன்னிட்டா²னம் கத்வா உபஸங்கமிம்ஸு.

யேன ஸந்தா²கா³ரம் தேனுபஸங்கமிம்ஸூதி தம் தி³வஸம் கிர ஸந்தா²கா³ரம் கிஞ்சாபி ராஜகுலானம் த³ஸ்ஸனத்தா²ய தே³வவிமானம் விய ஸுஸஜ்ஜிதம் ஹோதி ஸுபடிஜக்³கி³தம், பு³த்³தா⁴ரஹம் பன கத்வா அப்பஞ்ஞத்தம். பு³த்³தா⁴ ஹி நாம அரஞ்ஞஜ்ஜா²ஸயா அரஞ்ஞாராமா அந்தோகா³மே வஸேய்யும் வா நோ வா, தஸ்மா ப⁴க³வதோ மனம் ஜானித்வாவ பஞ்ஞாபேஸ்ஸாமாதி சிந்தேத்வா தே ப⁴க³வந்தம் உபஸங்கமிம்ஸு. இதா³னி பன மனம் லபி⁴த்வா பஞ்ஞாபேதுகாமா யேன ஸந்தா²கா³ரம் தேனுபஸங்கமிம்ஸு.

ஸப்³ப³ஸந்த²ரிம் ஸந்தா²கா³ரம் ஸந்த²ரித்வாதி யதா² ஸப்³ப³மேவ ஸந்த²தம் ஹோதி, ஏவம் தம் ஸந்த²ராபேத்வா. ஸப்³ப³பட²மம் தாவ ‘‘கோ³மயம் நாம ஸப்³ப³மங்க³லேஸு வட்டதீ’’தி ஸுதா⁴பரிகம்மகதம்பி பூ⁴மிம் அல்லகோ³மயேன ஓபுஞ்சா²பேத்வா பரிஸுக்க²பா⁴வம் ஞத்வா யதா² அக்கந்தட்டா²னே பத³ம் ந பஞ்ஞாயதி, ஏவம் சதுஜ்ஜாதியக³ந்தே⁴ஹி லிம்பாபேத்வா உபரி நானாவண்ணே கடஸாரகே ஸந்த²ரித்வா தேஸம் உபரி மஹாபிட்டி²ககோஜவகே ஆதி³ம் கத்வா ஹத்த²த்த²ரக-அஸ்ஸத்த²ரக-ஸீஹத்த²ரக-ப்³யக்³க⁴த்த²ரக-சந்த³த்த²ரக-ஸூரியத்த²ரக-சித்தத்த²ரகாதீ³ஹி நானாவண்ணேஹி அத்த²ரணேஹி ஸந்த²ரிதப்³ப³கயுத்தம் ஸப்³போ³காஸம் ஸந்த²ராபேஸும். தேன வுத்தம் ‘‘ஸப்³ப³ஸந்த²ரிம் ஸந்தா²கா³ரம் ஸந்த²ரித்வா’’தி.

ஆஸனானி பஞ்ஞாபேத்வாதி மஜ்ஜ²ட்டா²னே தாவ மங்க³லத்த²ம்ப⁴ம் நிஸ்ஸாய மஹாரஹம் பு³த்³தா⁴ஸனம் பஞ்ஞாபேத்வா தத்த² யம் யம் முது³கஞ்ச மனோரமஞ்ச பச்சத்த²ரணம், தம் தம் பச்சத்த²ரித்வா ப⁴க³வதோ லோஹிதகம் மனுஞ்ஞத³ஸ்ஸனம் உபதா⁴னம் உபத³ஹித்வா உபரி ஸுவண்ணரஜததாரகவிசித்தம் விதானம் ப³ந்தி⁴த்வா க³ந்த⁴தா³மபுப்ப²தா³மபத்ததா³மாதீ³ஹி பச்சத்த²ரணேஹி அலங்கரித்வா ஸமந்தா த்³வாத³ஸஹத்த²ட்டா²னே புப்ப²ஜாலம் கரித்வா திம்ஸஹத்த²மத்தம் டா²னம் படஸாணியா பரிக்கி²பாபேத்வா பச்சி²மபி⁴த்திம் நிஸ்ஸாய பி⁴க்கு²ஸங்க⁴ஸ்ஸ பல்லங்கபீட²-அபஸ்ஸயபீட²-முண்ட³பீடா²னி பஞ்ஞாபேத்வா உபரி ஸேதபச்சத்த²ரணேஹி பச்சத்த²ராபேத்வா பாசீனபி⁴த்திம் நிஸ்ஸாய அத்தனோ அத்தனோ மஹாபிட்டி²ககோஜவகே பஞ்ஞாபேத்வா ஹம்ஸலோமாதி³பூரிதானி உபதா⁴னானி ட²பாபேஸும் ‘‘ஏவம் அகிலமமானா ஸப்³ப³ரத்திம் த⁴ம்மம் ஸுணிஸ்ஸாமா’’தி. இத³ம் ஸந்தா⁴ய வுத்தம் ‘‘ஆஸனானி பஞ்ஞாபேத்வா’’தி.

உத³கமணிகந்தி மஹாகுச்சி²கம் உத³கசாடிம். உபட்ட²பேத்வாதி ஏவம் ப⁴க³வா ச பி⁴க்கு²ஸங்கோ⁴ ச யதா²ருசியா ஹத்தே² வா தோ⁴விஸ்ஸந்தி பாதே³ வா, முக²ம் வா விக்கா²லேஸ்ஸந்தீதி தேஸு தேஸு டா²னேஸு மணிவண்ணஸ்ஸ உத³கஸ்ஸ பூராபேத்வா வாஸத்தா²ய நானாபுப்பா²னி சேவ உத³கவாஸசுண்ணானி ச பக்கி²பித்வா கத³லிபண்ணேஹி பித³ஹித்வா பதிட்டா²பேஸும். இத³ம் ஸந்தா⁴ய வுத்தம் ‘‘உபட்ட²பேத்வா’’தி.

தேலப்பதீ³பம் ஆரோபேத்வாதி ரஜதஸுவண்ணாதி³மயத³ண்டா³ஸு தீ³பிகாஸு யோனகரூபகிராதரூபகாதீ³னம் ஹத்தே² ட²பிதஸுவண்ணரஜதாதி³மயகபல்லகாதீ³ஸு ச தேலப்பதீ³பம் ஜலயித்வாதி அத்தோ². யேன ப⁴க³வா தேனுபஸங்கமிம்ஸூதி ஏத்த² பன தே ஸக்யராஜானோ ந கேவலம் ஸந்தா²கா³ரமேவ, அத² கோ² யோஜனாவட்டே கபிலவத்து²ஸ்மிம் நக³ரவீதி²யோபி ஸம்மஜ்ஜாபேத்வா த⁴ஜே உஸ்ஸாபேத்வா கே³ஹத்³வாரேஸு புண்ணக⁴டே ச கத³லியோ ச ட²பாபேத்வா ஸகலனக³ரம் தீ³பமாலாதீ³ஹி விப்பகிண்ணதாரகம் விய கத்வா ‘‘கீ²ரபாயகே தா³ரகே கீ²ரம் பாயேத², த³ஹரே குமாரே லஹும் லஹும் போ⁴ஜேத்வா ஸயாபேத², உச்சாஸத்³த³ம் மா கரித்த², அஜ்ஜ ஏகரத்திம் ஸத்தா² அந்தோகா³மே வஸிஸ்ஸதி, பு³த்³தா⁴ நாம அப்பஸத்³த³காமா ஹோந்தீ’’தி பே⁴ரிம் சராபேத்வா ஸயம் த³ண்ட³தீ³பிகா ஆதா³ய யேன ப⁴க³வா தேனுபஸங்கமிம்ஸு.

அத² கோ² ப⁴க³வா நிவாஸேத்வா பத்தசீவரமாதா³ய ஸத்³தி⁴ம் பி⁴க்கு²ஸங்கே⁴ன யேன நவம் ஸந்தா²கா³ரம் தேனுபஸங்கமீதி. ‘‘யஸ்ஸ தா³னி, ப⁴ந்தே, ப⁴க³வா காலம் மஞ்ஞதீ’’தி ஏவம் கிர காலே ஆரோசிதே ப⁴க³வா லாகா²ரஸேன திந்தரத்தகோவிளாரபுப்ப²வண்ணம் ரத்தது³பட்டம் கத்தரியா பது³மம் கந்தந்தோ விய ஸம்விதா⁴ய திமண்ட³லம் படிச்சா²தே³ந்தோ நிவாஸேத்வா ஸுவண்ணபாமங்கே³ன பது³மகலாபம் பரிக்கி²பந்தோ விய விஜ்ஜுல்லதாஸஸ்ஸிரிகம் காயப³ந்த⁴னம் ப³ந்தி⁴த்வா ரத்தகம்ப³லேன க³ஜகும்ப⁴ம் பரியோனத்³த⁴ந்தோ விய ரதனஸதுப்³பே³தே⁴ ஸுவண்ணக்³கி⁴கே பவாளஜாலம் கி²பமானோ விய ஸுவண்ணசேதியே ரத்தகம்ப³லகஞ்சுகம் படிமுஞ்சந்தோ விய க³ச்ச²ந்தம் புண்ணசந்த³ம் ரத்தவண்ணவலாஹகேன படிச்சா²த³யமானோ விய கஞ்சனபப்³ப³தமத்த²கே ஸுபக்கலாகா²ரஸம் பரிஸிஞ்சந்தோ விய சித்தகூடபப்³ப³தமத்த²கம் விஜ்ஜுல்லதாய பரிக்கி²பந்தோ விய ச ஸசக்கவாளஸினேருயுக³ந்த⁴ரம் மஹாபத²விம் சாலேத்வா க³ஹிதம் நிக்³ரோத⁴பல்லவஸமானவண்ணம் ரத்தவரபம்ஸுகூலம் பாருபித்வா க³ந்த⁴குடித்³வாரதோ நிக்க²மி கஞ்சனகு³ஹதோ ஸீஹோ விய உத³யபப்³ப³தகூடதோ புண்ணசந்தோ³ விய ச. நிக்க²மித்வா பன க³ந்த⁴குடிபமுகே² அட்டா²ஸி.

அத²ஸ்ஸ காயதோ மேக⁴முகே²ஹி விஜ்ஜுகலாபா விய ரஸ்மியோ நிக்க²மித்வா ஸுவண்ணரஸதா⁴ராபரிஸேகமஞ்ஜரிபத்தபுப்ப²ப²லவிடபே விய ஆராமருக்கே² கரிம்ஸு. தாவதே³வ ச அத்தனோ அத்தனோ பத்தசீவரமாதா³ய மஹாபி⁴க்கு²ஸங்கோ⁴ ப⁴க³வந்தம் பரிவாரேஸி. தே பன பரிவாரேத்வா டி²தா பி⁴க்கூ² ஏவரூபா அஹேஸும் அப்பிச்சா² ஸந்துட்டா² பவிவித்தா அஸம்ஸட்டா² ஆரத்³த⁴வீரியா வத்தாரோ வசனக்க²மா சோத³கா பாபக³ரஹீ ஸீலஸம்பன்னா ஸமாதி⁴ஸம்பன்னா பஞ்ஞாவிமுத்திவிமுத்திஞாணத³ஸ்ஸனஸம்பன்னாதி. தேஹி பரிவாரிதோ ப⁴க³வா ரத்தகம்ப³லபரிக்கி²த்தோ விய ஸுவண்ணக்க²ந்தோ⁴ ரத்தபது³மஸண்ட³மஜ்ஜ²க³தா விய ஸுவண்ணனாவா பவாளவேதி³காபரிக்கி²த்தோ விய ஸுவண்ணபாஸாதோ³ விரோசித்த². ஸாரிபுத்தமோக்³க³ல்லானாத³யோ மஹாதே²ராபி நம் மேக⁴வண்ணம் பம்ஸுகூலம் பாருபித்வா மணிவம்மவம்மிகா விய மஹானாகா³ பரிவாரயிம்ஸு வந்தராகா³ பி⁴ன்னகிலேஸா விஜடிதஜடா சி²ன்னப³ந்த⁴னா குலே வா க³ணே வா அலக்³கா³.

இதி ப⁴க³வா ஸயம் வீதராகோ³ வீதராகே³ஹி, வீததோ³ஸோ வீததோ³ஸேஹி, வீதமோஹோ வீதமோஹேஹி, நித்தண்ஹோ நித்தண்ஹேஹி, நிக்கிலேஸோ நிக்கிலேஸேஹி, ஸயம் பு³த்³தோ⁴ ப³ஹுஸ்ஸுதபு³த்³தே⁴ஹி பரிவாரிதோ, பத்தபரிவாரிதம் விய கேஸரம், கேஸரபரிவாரிதா விய கண்ணிகா, அட்ட²னாக³ஸஹஸ்ஸபரிவாரிதோ விய ச²த்³த³ந்தோ நாக³ராஜா, நவுதிஹம்ஸஸஹஸ்ஸபரிவாரிதோ விய த⁴தரட்டோ² ஹம்ஸராஜா, ஸேனங்க³பரிவாரிதோ விய சக்கவத்தி, மருக³ணபரிவாரிதோ விய ஸக்கோ தே³வராஜா, ப்³ரஹ்மக³ணபரிவாரிதோ விய ஹாரிதமஹாப்³ரஹ்மா, தாராக³ணபரிவாரிதோ விய புண்ணசந்தோ³, அஸமேன பு³த்³த⁴வேஸேன அபரிமாணேன பு³த்³த⁴விலாஸேன கபிலவத்து²க³மனமக்³க³ம் படிபஜ்ஜி.

அத²ஸ்ஸ புரத்தி²மகாயதோ ஸுவண்ணவண்ணா ரஸ்மீ உட்ட²ஹித்வா அஸீதிஹத்த²ட்டா²னம் அக்³க³ஹேஸி. பச்சி²மகாயதோ த³க்கி²ணஹத்த²தோ, வாமஹத்த²தோ ஸுவண்ணவண்ணா ரஸ்மீ உட்ட²ஹித்வா அஸீதிஹத்த²ட்டா²னம் அக்³க³ஹேஸி. உபரி கேஸந்ததோ பட்டா²ய ஸப்³ப³கேஸாவத்தேஹி மோரகீ³வவண்ணா ரஸ்மீ உட்ட²ஹித்வா க³க³னதலே அஸீதிஹத்த²ட்டா²னம் அக்³க³ஹேஸி. ஹேட்டா² பாத³தலேஹி பவாளவண்ணா ரஸ்மீ உட்ட²ஹித்வா க⁴னபத²வியம் அஸீதிஹத்த²ட்டா²னம் அக்³க³ஹேஸி. ஏவம் ஸமந்தா அஸீதிஹத்த²மத்தம் டா²னம் ச²ப்³ப³ண்ணா பு³த்³த⁴ரஸ்மியோ விஜ்ஜோதமானா விப்ப²ந்த³மானா கஞ்சனத³ண்ட³தீ³பிகாஹி நிச்ச²ரித்வா ஆகாஸம் பக்க²ந்த³ஜாலா விய சாதுத்³தீ³பிகமஹாமேக⁴தோ நிக்க²ந்தவிஜ்ஜுல்லதா விய விதா⁴விம்ஸு. ஸப்³ப³தி³ஸாபா⁴கா³ ஸுவண்ணசம்பகபுப்பே²ஹி விகிரியமானா விய, ஸுவண்ணக⁴டா நிக்க²ந்தஸுவண்ணரஸதா⁴ராஹி ஸிஞ்சமானா விய, பஸாரிதஸுவண்ணபடபரிக்கி²த்தா விய, வேரம்ப⁴வாதஸமுட்டி²தகிம்ஸுககணிகாரபுப்ப²சுண்ணஸமோகிண்ணா விய விப்பகிரிம்ஸு.

ப⁴க³வதோபி அஸீதிஅனுப்³யஞ்ஜனப்³யாமப்பபா⁴த்³வத்திம்ஸவரலக்க²ணஸமுஜ்ஜலம் ஸரீரம் ஸமுக்³க³ததாரகம் விய க³க³னதலம், விகஸிதமிவ பது³மவனம், ஸப்³ப³பாலிபு²ல்லோ விய யோஜனஸதிகோ பாரிச்ச²த்தகோ, படிபாடியா ட²பிதானம் த்³வத்திம்ஸூசந்தா³னம் த்³வத்திம்ஸஸூரியானம் த்³வத்திம்ஸசக்கவத்தீனம் த்³வத்திம்ஸதே³வராஜானம் த்³வத்திம்ஸமஹாப்³ரஹ்மானம் ஸிரியா ஸிரிம் அபி⁴ப⁴வமானம் விய விரோசித்த², யதா² தம் த³ஸஹி பாரமீஹி த³ஸஹி உபபாரமீஹி த³ஸஹி பரமத்த²பாரமீஹி ஸுபூரிதாஹி ஸமதிம்ஸபாரமிதாஹி அலங்கதம். கப்பஸதஸஹஸாதி⁴கானி சத்தாரி அஸங்க்²யேய்யானி தி³ன்னதா³னம் ரக்கி²தஸீலம் கதகல்யாணகம்மம் ஏகஸ்மிம் அத்தபா⁴வே ஓஸரித்வா விபாகம் தா³தும் டா²னம் அலப⁴மானம் ஸம்பா³த⁴பத்தம் விய அஹோஸி. நாவாஸஹஸ்ஸப⁴ண்ட³ம் ஏகனாவம் ஆரோபனகாலோ விய, ஸகடஸஹஸ்ஸப⁴ண்ட³ம் ஏகஸகடம் ஆரோபனகாலோ விய, பஞ்சவீஸதியா நதீ³னம் ஓக⁴ஸ்ஸ ஸம்பி⁴ஜ்ஜ முக²த்³வாரே ஏகதோ ராஸீபூ⁴தகாலோ விய ச அஹோஸி.

இமாய பு³த்³த⁴ஸிரியா ஓபா⁴ஸமானஸ்ஸாபி ச ப⁴க³வதோ புரதோ அனேகானி த³ண்ட³தீ³பிகஸஹஸ்ஸானி உக்கி²பிம்ஸு. ததா² பச்ச²தோ. வாமபஸ்ஸே த³க்கி²ணபஸ்ஸே. ஜாதிகுஸுமசம்பகவனமல்லிகரத்துப்பலனீலுப்பலமகுலஸிந்து³வாரபுப்பா²னி சேவ நீலபீதாதி³வண்ணஸுக³ந்த⁴க³ந்த⁴சுண்ணானி ச சாதுத்³தீ³பிகமேக⁴விஸ்ஸட்டோ²த³கவுட்டி²யோ விய விப்பகிரிம்ஸு. பஞ்சங்கி³கதூரியனிக்³கோ⁴ஸா சேவ பு³த்³த⁴த⁴ம்மஸங்க⁴கு³ணப்படிஸம்யுத்தா து²திகோ⁴ஸா ச ஸப்³ப³தி³ஸா பூரயிம்ஸு. தே³வமனுஸ்ஸனாக³ஸுபண்ணக³ந்த⁴ப்³ப³யக்கா²தீ³னம் அக்கீ²னி அமதபானம் விய லபி⁴ம்ஸு. இமஸ்மிம் பன டா²னே ட²த்வா பத³ஸஹஸ்ஸேன க³மனவண்ணம் வத்தும் வட்டதி. தத்ரித³ம் முக²மத்தம் –

‘‘ஏவம் ஸப்³ப³ங்க³ஸம்பன்னோ, கம்பயந்தோ வஸுந்த⁴ரம்;

அஹேட²யந்தோ பாணானி, யாதி லோகவினாயகோ.

த³க்கி²ணம் பட²மம் பாத³ம், உத்³த⁴ரந்தோ நராஸபோ⁴;

க³ச்ச²ந்தோ ஸிரிஸம்பன்னோ, ஸோப⁴தே த்³விபது³த்தமோ.

க³ச்ச²தோ பு³த்³த⁴ஸேட்ட²ஸ்ஸ, ஹேட்டா² பாத³தலம் முது³;

ஸமம் ஸம்பு²ஸதே பூ⁴மிம், ரஜஸா நுபலிப்பதி.

நின்னட்டா²னம் உன்னமதி, க³ச்ச²ந்தே லோகனாயகே;

உன்னதஞ்ச ஸமம் ஹோதி, பத²வீ ச அசேதனா.

பாஸாணா ஸக்க²ரா சேவ, கத²லா கா²ணுகண்டகா;

ஸப்³பே³ மக்³கா³ விவஜ்ஜந்தி, க³ச்ச²ந்தே லோகனாயகே.

நாதிதூ³ரே உத்³த⁴ரதி, நச்சாஸன்னே ச நிக்கி²பம்;

அக⁴ட்டயந்தோ நிய்யாதி, உபோ⁴ ஜாணூ ச கோ³ப்ப²கே.

நாதிஸீக⁴ம் பக்கமதி, ஸம்பன்னசரணோ முனி;

ந சாதிஸணிகம் யாதி, க³ச்ச²மானோ ஸமாஹிதோ.

உத்³த⁴ம் அதோ⁴ ச திரியம், தி³ஸஞ்ச விதி³ஸம் ததா²;

ந பேக்க²மானோ ஸோ யாதி, யுக³மத்தம்ஹி பேக்க²தி.

நாக³விக்கந்தசாரோ ஸோ, க³மனே ஸோப⁴தே ஜினோ;

சாரும் க³ச்ச²தி லோகக்³கோ³, ஹாஸயந்தோ ஸதே³வகே.

உளுராஜாவ ஸோப⁴ந்தோ, சதுசாரீவ கேஸரீ;

தோஸயந்தோ ப³ஹூ ஸத்தே, புரம் ஸேட்ட²ம் உபாக³மீ’’தி.

வண்ணகாலோ நாம கிரேஸ, ஏவம்விதே⁴ஸு காலேஸு பு³த்³த⁴ஸ்ஸ ஸரீரவண்ணே வா கு³ணவண்ணே வா த⁴ம்மகதி²கஸ்ஸ தா²மோயேவ பமாணம் சுண்ணியபதே³ஹி வா கா³தா²ப³ந்தே⁴ன வா யத்தகம் ஸக்கோதி, தத்தகம் வத்தப்³ப³ம். து³க்கதி²தந்தி ந வத்தப்³ப³ம். அப்பமாணவண்ணா ஹி பு³த்³தா⁴, தேஸம் பு³த்³தா⁴பி அனவஸேஸதோ வண்ணம் வத்தும் அஸமத்தா², பகே³வ இதரா பஜாதி. இமினா ஸிரிவிலாஸேன அலங்கதப்படியத்தம் ஸக்யராஜபுரம் பவிஸித்வா ப⁴க³வா பஸன்னசித்தேன ஜனேன க³ந்த⁴தூ⁴மவாஸசுண்ணாதீ³ஹி பூஜயமானோ ஸந்தா²கா³ரம் பாவிஸி. தேன வுத்தம் – ‘‘அத² கோ² ப⁴க³வா நிவாஸேத்வா பத்தசீவரமாதா³ய ஸத்³தி⁴ம் பி⁴க்கு²ஸங்கே⁴ன யேன ஏவம் ஸந்தா²கா³ரம் தேனுபஸங்கமீ’’தி.

ப⁴க³வந்தம்யேவ புரக்க²த்வாதி ப⁴க³வந்தம் புரதோ கத்வா. தத்த² ப⁴க³வா பி⁴க்கூ²னஞ்சேவ உபாஸகானஞ்ச மஜ்ஜே² நிஸின்னோ க³ந்தோ⁴த³கேன ந்ஹாபேத்வா து³கூலசும்ப³டகேன வோத³கம் கத்வா ஜாதிஹிங்கு³லகேன மஜ்ஜித்வா ரத்தகம்ப³லபலிவேடி²தே பீடே² ட²பிதரத்தஸுவண்ணக⁴னபடிமா விய அதிவிரோசித்த². அயம் பனேத்த² போராணானம் வண்ணப⁴ணனமக்³கோ³ –

‘‘க³ந்த்வான மண்ட³லமாளம், நாக³விக்கந்தசரணோ;

ஓபா⁴ஸயந்தோ லோகக்³கோ³, நிஸீதி³ வரமாஸனே.

தஸ்மிம் நிஸின்னோ நரத³ம்மஸாரதி²,

தே³வாதிதே³வோ ஸதபுஞ்ஞலக்க²ணோ;

பு³த்³தா⁴ஸனே மஜ்ஜ²க³தோ விரோசதி,

ஸுவண்ணனேக்க²ம் விய பண்டு³கம்ப³லே.

நேக்க²ம் ஜம்போ³னத³ஸ்ஸேவ, நிக்கி²த்தம் பண்டு³கம்ப³லே;

விரோசதி வீதமலோ, மணிவேரோசனோ யதா².

மஹாஸாலோவ ஸம்பு²ல்லோ, நேருராஜாவலங்கதோ;

ஸுவண்ணயூபஸங்காஸோ, பது³மோ கோகனதோ³ யதா².

ஜலந்தோ தீ³பருக்கோ²வ, பப்³ப³தக்³கே³ யதா² ஸிகீ²;

தே³வானம் பாரிச்ச²த்தோவ, ஸப்³ப³பு²ல்லோ விரோசதா²’’தி.

காபிலவத்த²வே ஸக்யே ப³ஹுதே³வ ரத்திம் த⁴ம்மியா கதா²யாதி ஏத்த² த⁴ம்மீ கதா² நாம ஸந்தா²கா³ரஅனுமோத³னப்படிஸம்யுத்தா பகிண்ணககதா² வேதி³தப்³பா³. ததா³ ஹி ப⁴க³வா ஆகாஸக³ங்க³ம் ஓதாரேந்தோ விய பத²வோஜம் ஆகட்³ட⁴ந்தோ விய மஹாஜம்பு³ம் க²ந்தே⁴ க³ஹேத்வா சாலேந்தோ விய யோஜனிகம் மது⁴ப⁴ண்ட³ம் சக்கயந்தேன பீளேத்வா மது⁴பானம் பாயமானோ விய காபிலவத்த²வானம் ஸக்யானம் ஹிதஸுகா²வஹம் பகிண்ணககத²ம் கதே²ஸி. ‘‘ஆவாஸதா³னம் நாமேதம் மஹாராஜ மஹந்தம், தும்ஹாகம் ஆவாஸோ மயா பரிபு⁴த்தோ பி⁴க்கு²ஸங்கே⁴ன பரிபு⁴த்தோ மயா ச பி⁴க்கு²ஸங்கே⁴ன ச பரிபு⁴த்தோ பன த⁴ம்மரதனேன பரிபு⁴த்தோ யேவாதி தீஹி ரதனேஹி பரிபு⁴த்தோ நாம ஹோதி. ஆவாஸதா³னஸ்மிஞ்ஹி தி³ன்னே ஸப்³ப³தா³னம் தி³ன்னமேவ ஹோதி. பூ⁴மட்ட²கபண்ணஸாலாய வா ஸாகா²மண்ட³பஸ்ஸ வாபி ஆனிஸம்ஸோ நாம பரிச்சி²ந்தி³தும் ந ஸக்கா’’தி நானானயவிசித்தம் ப³ஹும் த⁴ம்மகத²ம் கதே²த்வா –

‘‘ஸீதம் உண்ஹம் படிஹந்தி, ததோ வாளமிகா³னி ச;

ஸரீஸபே ச மகஸே, ஸிஸிரே சாபி வுட்டி²யோ.

ததோ வாதாதபோ கோ⁴ரோ, ஸஞ்ஜாதோ படிஹஞ்ஞதி;

லேணத்த²ஞ்ச ஸுக²த்த²ஞ்ச, ஜா²யிதுஞ்ச விபஸ்ஸிதும்.

விஹாரதா³னம் ஸங்க⁴ஸ்ஸ, அக்³க³ம் பு³த்³தே⁴ன வண்ணிதம்;

தஸ்மா ஹி பண்டி³தோ போஸோ, ஸம்பஸ்ஸம் அத்த²மத்தனோ.

விஹாரே காரயே ரம்மே, வாஸயேத்த² ப³ஹுஸ்ஸுதே;

தேஸம் அன்னஞ்ச பானஞ்ச, வத்த²ஸேனாஸனானி ச.

த³தே³ய்ய உஜுபூ⁴தேஸு, விப்பஸன்னேன சேதஸா;

தே தஸ்ஸ த⁴ம்மம் தே³ஸேந்தி, ஸப்³ப³து³க்கா²பனூத³னம்;

யம் ஸோ த⁴ம்மம் இத⁴ஞ்ஞாய, பரினிப்³பா³தி அனாஸவோ’’தி. (சூளவ. 295) –

ஏவம் அயம்பி ஆவாஸே ஆனிஸம்ஸோ, அயம்பி ஆனிஸம்ஸோதி ப³ஹுதே³வரத்திம் அதிரேகதரம் தி³யட்³ட⁴யாமம் ஆவாஸானிஸம்ஸகத²ம் கதே²ஸி. தத்த² இமா கா³தா²வ ஸங்க³ஹம் ஆருள்ஹா, பகிண்ணகத⁴ம்மதே³ஸனா பன ஸங்க³ஹம் ந ஆரோஹதி. ஸந்த³ஸ்ஸேஸீதிஆதீ³னி வுத்தத்தா²னேவ.

ஆயஸ்மந்தம் ஆனந்த³ம் ஆமந்தேஸீதி த⁴ம்மகத²ம் கதா²பேதுகாமோ ஜானாபேஸி. அத² கஸ்மா ஸாரிபுத்தமஹாமோக்³க³ல்லானமஹாகஸ்ஸபாதீ³ஸு அஸீதிமஹாதே²ரேஸு விஜ்ஜமானேஸு ப⁴க³வா ஆனந்த³த்தே²ரஸ்ஸ பா⁴ரமகாஸீதி. பரிஸஜ்ஜா²ஸயவஸேன. ஆயஸ்மா ஹி ஆனந்தோ³ ப³ஹுஸ்ஸுதானம் அக்³கோ³, பஹோஸி பரிமண்ட³லேஹி பத³ப்³யஞ்ஜனேஹி மது⁴ரத⁴ம்மகத²ம் கதே²துந்தி ஸாகியமண்ட³லே பாகடோ பஞ்ஞாதோ. தஸ்ஸ ஸக்யராஜூஹி விஹாரம் க³ந்த்வாபி த⁴ம்மகதா² ஸுதபுப்³பா³, ஓரோதா⁴ பன நேஸம் ந யதா²ருசியா விஹாரம் க³ந்தும் லப⁴ந்தி, தேஸம் ஏதத³ஹோஸி – ‘‘அஹோ வத ப⁴க³வா அப்பம்யேவ த⁴ம்மகத²ம் கதே²த்வா அம்ஹாகம் ஞாதிஸேட்ட²ஸ்ஸ ஆனந்த³ஸ்ஸ பா⁴ரம் கரேய்யா’’தி. தேஸம் அஜ்ஜா²ஸயவஸேன ப⁴க³வா தஸ்ஸேவ பா⁴ரமகாஸி.

ஸேகோ² பாடிபதோ³தி படிபன்னகோ ஸேக²ஸமணோ. ஸோ துய்ஹம் படிபா⁴து உபட்டா²து, தஸ்ஸ படிபத³ம் தே³ஸேஹீதி படிபதா³ய புக்³க³லம் நியமேத்வா த³ஸ்ஸேதி. கஸ்மா பன ப⁴க³வா இமம் படிபத³ம் நியமேஸி? ப³ஹூஹி காரணேஹி. இமே தாவ ஸக்யா மங்க³லஸாலாய மங்க³லம் பச்சாஸீஸந்தி வட்³டி⁴ம் இச்ச²ந்தி, அயஞ்ச ஸேக²படிபதா³ மய்ஹம் ஸாஸனே மங்க³லபடிபதா³ வட்³ட⁴மானகபடிபதா³திபி இமம் படிபத³ம் நியமேஸி. தஸ்ஸஞ்ச பரிஸதி ஸேகா²வ ப³ஹூ நிஸின்னா, தே அத்தனா படிவித்³த⁴ட்டா²னே கதீ²யமானே அகிலமந்தாவ ஸல்லக்கே²ஸ்ஸந்தீதிபி இமம் படிபத³ம் நியமேஸி. ஆயஸ்மா ச ஆனந்தோ³ ஸேக²படிஸம்பி⁴தா³பத்தோவ, ஸோ அத்தனா படிவித்³தே⁴ பச்சக்க²ட்டா²னே கதே²ந்தோ அகிலமந்தோ விஞ்ஞாபேதும் ஸக்கி²ஸ்ஸதீதிபி இமம் படிபத³ம் நியமேஸி. ஸேக²படிபதா³ய ச திஸ்ஸோபி ஸிக்கா² ஓஸடா, தத்த² அதி⁴ஸீலஸிக்கா²ய கதி²தாய ஸகலம் வினயபிடகம் கதி²தமேவ ஹோதி, அதி⁴சித்தஸிக்கா²ய கதி²தாய ஸகலம் ஸுத்தந்தபிடகம் கதி²தம் ஹோதி, அதி⁴பஞ்ஞாஸிக்கா²ய கதி²தாய ஸகலம் அபி⁴த⁴ம்மபிடகம் கதி²தம் ஹோதி, ஆனந்தோ³ ச ப³ஹுஸ்ஸுதோ திபிடகத⁴ரோ, ஸோ பஹோதி தீஹி பிடகேஹி திஸ்ஸோ ஸிக்கா² கதே²தும், ஏவம் கதி²தே ஸக்யானம் மங்க³லமேவ வட்³டி⁴யேவ ப⁴விஸ்ஸதீதிபி இமம் படிபத³ம் நியமேஸி.

பிட்டி² மே ஆகி³லாயதீதி கஸ்மா ஆகி³லாயதி? ப⁴க³வதோ ஹி ச²ப்³ப³ஸ்ஸானி பதா⁴னம் பத³ஹந்தஸ்ஸ மஹந்தம் காயது³க்க²ம் அஹோஸி, அத²ஸ்ஸ அபரபா⁴கே³ மஹல்லககாலே பிட்டி²வாதோ உப்பஜ்ஜி. அகாரணம் வா ஏதம். பஹோதி ஹி ப⁴க³வா உப்பன்னம் வேத³னம் விக்க²ம்பே⁴த்வா ஏகம்பி த்³வேபி ஸத்தாஹே ஏகபல்லங்கேன நிஸீதி³தும். ஸந்தா²கா³ரஸாலம் பன சதூஹி இரியாபதே²ஹி பரிபு⁴ஞ்ஜிதுகாமோ அஹோஸி, தத்த² பாத³தோ⁴வனட்டா²னதோ யாவ த⁴ம்மாஸனா அக³மாஸி, ஏத்தகே டா²னே க³மனம் நிப்ப²ன்னம். த⁴ம்மாஸனம் பத்தோ தோ²கம் ட²த்வா நிஸீதி³, ஏத்தகே டா²னம். தி³யட்³ட⁴யாமம் த⁴ம்மாஸனே நிஸீதி³, ஏத்தகே டா²னே நிஸஜ்ஜா நிப்ப²ன்னா. இதா³னி த³க்கி²ணேன பஸ்ஸேன தோ²கம் நிபன்னே ஸயனம் நிப்ப²ஜ்ஜிஸ்ஸதீதி ஏவம் சதூஹி இரியாபதே²ஹி பரிபு⁴ஞ்ஜிதுகாமோ அஹோஸி. உபாதி³ன்னகஸரீரஞ்ச நாம ‘‘நோ ஆகி³லாயதீ’’தி ந வத்தப்³ப³ம், தஸ்மா சிரம் நிஸஜ்ஜாய ஸஞ்ஜாதம் அப்பகம்பி ஆகி³லாயனம் க³ஹேத்வா ஏவமாஹ.

ஸங்கா⁴டிம் பஞ்ஞாபேத்வாதி ஸந்தா²கா³ரஸ்ஸ கிர ஏகபஸ்ஸே தே ராஜானோ பட்டஸாணிம் பரிக்கி²பாபேத்வா கப்பியமஞ்சகம் பஞ்ஞபேத்வா கப்பியபச்சத்த²ரணேன அத்த²ரித்வா உபரி ஸுவண்ண-தாரக-க³ந்த⁴மாலா-தா³மபடிமண்டி³தம் விதானம் ப³ந்தி⁴த்வா க³ந்த⁴தேலப்பதீ³பம் ஆரோபயிம்ஸு ‘‘அப்பேவ நாம ஸத்தா² த⁴ம்மாஸனதோ வுட்டா²ய தோ²கம் விஸ்ஸமந்தோ இத⁴ நிபஜ்ஜேய்ய, ஏவம் நோ இமம் ஸந்தா²கா³ரம் ப⁴க³வதா சதூஹி இரியாபதே²ஹி பரிபு⁴த்தம் தீ³க⁴ரத்தம் ஹிதாய ஸுகா²ய ப⁴விஸ்ஸதீ’’தி. ஸத்தா²பி ததே³வ ஸந்தா⁴ய தத்த² ஸங்கா⁴டிம் பஞ்ஞபேத்வா நிபஜ்ஜி. உட்டா²னஸஞ்ஞம் மனஸி கரித்வாதி ஏத்தகம் காலம் அதிக்கமித்வா வுட்ட²ஹிஸ்ஸாமீதி வுட்டா²னஸஞ்ஞம் சித்தே ட²பேத்வா.

23. மஹானாமம் ஸக்கம் ஆமந்தேஸீதி ஸோ கிர தஸ்மிம் காலே தஸ்ஸம் பரிஸதி ஜேட்ட²கோ பாமோக்கோ², தஸ்மிம் ஸங்க³ஹிதே ஸேஸபரிஸா ஸங்க³ஹிதாவ ஹோதீதி தே²ரோ தமேவ ஆமந்தேஸி. ஸீலஸம்பன்னோதி ஸீலேன ஸம்பன்னோ, ஸம்பன்னஸீலோ பரிபுண்ணஸீலோதி அத்தோ². ஸத்³த⁴ம்மேஹீதி ஸுந்த³ரத⁴ம்மேஹி, ஸதம் வா ஸப்புரிஸானம் த⁴ம்மேஹி.

24. கத²ஞ்ச மஹானாமாதி இமினா ஏத்தகேன டா²னேன ஸேக²படிபதா³ய மாதிகம் ட²பேத்வா படிபாடியா வித்தா²ரேதுகாமோ ஏவமாஹ. தத்த² ஸீலஸம்பன்னோதிஆதீ³னி ‘‘ஸம்பன்னஸீலா, பி⁴க்க²வே, விஹரதா²’’தி ஆகங்கே²ய்யஸுத்தாதீ³ஸு வுத்தனயேனேவ வேதி³தப்³பா³னி.

25. காயது³ச்சரிதேனாதிஆதீ³ஸு உபயோக³த்தே² கரணவசனம், ஹிரியிதப்³பா³னி காயது³ச்சரிதாதீ³னி ஹிரியதி ஜிகு³ச்ச²தீதி அத்தோ². ஓத்தப்பனித்³தே³ஸே ஹேத்வத்தே² கரணவசனம், காயது³ச்சரிதாதீ³ஹி ஓத்தப்பஸ்ஸ ஹேதுபூ⁴தேஹி ஓத்தப்பதி பா⁴யதீதி அத்தோ². ஆரத்³த⁴வீரியோதி பக்³க³ஹிதவீரியோ அனோஸக்கிதமானஸோ. பஹானாயாதி பஹானத்தா²ய. உபஸம்பதா³யாதி படிலாப⁴த்தா²ய. தா²மவாதி வீரியதா²மேன ஸமன்னாக³தோ. த³ள்ஹபரக்கமோதி தி²ரபரக்கமோ. அனிக்கி²த்தது⁴ரோ குஸலேஸு த⁴ம்மேஸூதி குஸலேஸு த⁴ம்மேஸு அனோரோபிதது⁴ரோ அனோஸக்கிதவீரியோ. பரமேனாதி உத்தமேன. ஸதினேபக்கேனாதி ஸதியா ச நிபகபா⁴வேன ச. கஸ்மா பன ஸதிபா⁴ஜனியே பஞ்ஞா ஆக³தாதி? ஸதியா ப³லவபா⁴வதீ³பனத்த²ம். பஞ்ஞாவிப்பயுத்தா ஹி ஸதி து³ப்³ப³லா ஹோதி, ஸம்பயுத்தா ப³லவதீதி.

சிரகதம்பீதி அத்தனா வா பரேன வா காயேன சிரகதம் சேதியங்க³ணவத்தாதி³ அஸீதி மஹாவத்தபடிபத்திபூரணம். சிரபா⁴ஸிதம்பீதி அத்தனா வா பரேன வா வாசாய சிரபா⁴ஸிதம் ஸக்கச்சம் உத்³தி³ஸன-உத்³தி³ஸாபன-த⁴ம்மோஸாரண-த⁴ம்மதே³ஸனா-உபனிஸின்னகதா²-அனுமோத³னியாதி³வஸேன பவத்திதம் வசீகம்மம். ஸரிதா அனுஸ்ஸரிதாதி தஸ்மிம் காயேன சிரகதே ‘‘காயோ நாம காயவிஞ்ஞத்தி, சிரபா⁴ஸிதே வாசா நாம வசீவிஞ்ஞத்தி. தது³ப⁴யம்பி ரூபம், தம்ஸமுட்டா²பிகா சித்தசேதஸிகா அரூபம். இதி இமே ரூபாரூபத⁴ம்மா ஏவம் உப்பஜ்ஜித்வா ஏவம் நிருத்³தா⁴’’தி ஸரதி சேவ அனுஸ்ஸரதி ச, ஸதிஸம்போ³ஜ்ஜ²ங்க³ம் ஸமுட்டா²பேதீதி அத்தோ². போ³ஜ்ஜ²ங்க³ஸமுட்டா²பிகா ஹி ஸதி இத⁴ அதி⁴ப்பேதா. தாய ஸதியா ஏஸ ஸகிம்பி ஸரணேன ஸரிதா, புனப்புனம் ஸரணேன அனுஸ்ஸரிதாதி வேதி³தப்³பா³.

உத³யத்த²கா³மினியாதி பஞ்சன்னம் க²ந்தா⁴னம் உத³யவயகா³மினியா உத³யஞ்ச வயஞ்ச படிவிஜ்ஜி²தும் ஸமத்தா²ய. அரியாயாதி விக்க²ம்ப⁴னவஸேன ச ஸமுச்சே²த³வஸேன ச கிலேஸேஹி ஆரகா டி²தாய பரிஸுத்³தா⁴ய. பஞ்ஞாய ஸமன்னாக³தோதி விபஸ்ஸனாபஞ்ஞாய சேவ மக்³க³பஞ்ஞாய ச ஸமங்கீ³பூ⁴தோ. நிப்³பே³தி⁴காயாதி ஸாயேவ நிப்³பி³ஜ்ஜ²னதோ நிப்³பே³தி⁴காதி வுச்சதி, தாய ஸமன்னாக³தோதி அத்தோ². தத்த² மக்³க³பஞ்ஞாய ஸமுச்சே²த³வஸேன அனிப்³பி³த்³த⁴புப்³ப³ம் அபதா³லிதபுப்³ப³ம் லோப⁴க்க²ந்த⁴ம் தோ³ஸக்க²ந்த⁴ம் மோஹக்க²ந்த⁴ம் நிப்³பி³ஜ்ஜ²தி பதா³லேதீதி நிப்³பே³தி⁴கா. விபஸ்ஸனாபஞ்ஞாய தத³ங்க³வஸேன நிப்³பே³தி⁴காய மக்³க³பஞ்ஞாய படிலாப⁴ஸம்வத்தனதோ சாதி விபஸ்ஸனா ‘‘நிப்³பே³தி⁴கா’’தி வத்தும் வட்டதி. ஸம்மா து³க்க²க்க²யகா³மினியாதி இதா⁴பி மக்³க³பஞ்ஞா ‘‘ஸம்மா ஹேதுனா நயேன வட்டது³க்க²ம் கே²பயமானா க³ச்ச²தீதி ஸம்மா து³க்க²க்க²யகா³மினீ நாம. விபஸ்ஸனா தத³ங்க³வஸேன வட்டது³க்க²ஞ்ச கிலேஸது³க்க²ஞ்ச கே²பயமானா க³ச்ச²தீதி து³க்க²க்க²யகா³மினீ. து³க்க²க்க²யகா³மினியா வா மக்³க³பஞ்ஞாய படிலாப⁴ஸம்வத்தனதோ ஏஸா து³க்க²க்க²யகா³மினீ’’தி வேதி³தப்³பா³.

26. அபி⁴சேதஸிகானந்தி அபி⁴சித்தம் ஸேட்ட²சித்தம் ஸிதானம் நிஸ்ஸிதானம். தி³ட்ட²த⁴ம்மஸுக²விஹாரானந்தி அப்பிதப்பிதக்க²ணே ஸுக²படிலாப⁴ஹேதூனம். நிகாமலாபீ⁴தி இச்சி²திச்சி²தக்க²ணே ஸமாபஜ்ஜிதா. அகிச்ச²லாபீ⁴தி நிது³க்க²லாபீ⁴. அகஸிரலாபீ⁴தி விபுலலாபீ⁴. பகு³ணபா⁴வேன ஏகோ இச்சி²திச்சி²தக்க²ணே ஸமாபஜ்ஜிதும் ஸக்கோதி, ஸமாதி⁴பாரிபந்தி²கத⁴ம்மே பன அகிலமந்தோ விக்க²ம்பே⁴தும் ந ஸக்கோதி, ஸோ அத்தனோ அனிச்சா²ய கி²ப்பமேவ வுட்டா²தி, யதா²பரிச்சே²த³வஸேன ஸமாபத்திம் ட²பேதும் ந ஸக்கோதி அயம் கிச்ச²லாபீ⁴ கஸிரலாபீ⁴ நாம. ஏகோ இச்சி²திச்சி²தக்க²ணே ச ஸமாபஜ்ஜிதும் ஸக்கோதி, ஸமாதி⁴பாரிபந்தி²கத⁴ம்மே ச அகிலமந்தோ விக்க²ம்பே⁴தி, ஸோ யதா²பரிச்சே²த³வஸேனேவ வுட்டா²தும் ஸக்கோதி, அயம் அகிச்ச²லாபீ⁴ அகஸிரலாபீ⁴ நாம.

27. அயம் வுச்சதி மஹானாம அரியஸாவகோ ஸேகோ² பாடிபதோ³தி மஹானாம அரியஸாவகோ ஸேகோ² பாடிபதோ³ விபஸ்ஸனாக³ப்³பா⁴ய வட்³ட⁴மானகபடிபதா³ய ஸமன்னாக³தோதி வுச்சதீதி த³ஸ்ஸேதி. அபுச்சண்ட³தாயாதி அபூதிஅண்ட³தாய. ப⁴ப்³போ³ அபி⁴னிப்³பி⁴தா³யாதி விபஸ்ஸனாதி³ஞாணப்பபே⁴தா³ய ப⁴ப்³போ³. ஸம்போ³தா⁴யாதி அரியமக்³கா³ய. அனுத்தரஸ்ஸ யோக³க்கே²மஸ்ஸாதி அரஹத்தம் அனுத்தரோ யோக³க்கே²மோ நாம, தத³பி⁴க³மாய ப⁴ப்³போ³தி த³ஸ்ஸேதி. யா பனாயமேத்த² அத்த²தீ³பனத்த²ம் உபமா ஆஹடா, ஸா சேதோகி²லஸுத்தே வுத்தனயேனேவ வேதி³தப்³பா³. கேவலஞ்ஹி தத்த² ‘‘தஸ்ஸா குக்குடியா அண்டே³ஸு திவித⁴கிரியகரணம் விய ஹி இமஸ்ஸ பி⁴க்கு²னோ உஸ்ஸோள்ஹிபன்னரஸேஹி அங்கே³ஹி ஸமன்னாக³தபா⁴வோ’’தி யம் ஏவம் ஓபம்மஸம்ஸந்த³னம் ஆக³தம், தம் இத⁴ ஏவம் ஸீலஸம்பன்னோ ஹோதீதிஆதி³வசனதோ ‘‘தஸ்ஸா குக்குடியா அண்டே³ஸு திவித⁴கிரியகரணம் விய இமஸ்ஸ பி⁴க்கு²னோ ஸீலஸம்பன்னதாதீ³ஹி பன்னரஸேஹி த⁴ம்மேஹி ஸமங்கி³பா⁴வோ’’தி. ஏவம் யோஜேத்வா வேதி³தப்³ப³ம். ஸேஸம் ஸப்³ப³த்த² வுத்தஸதி³ஸமேவ.

28. இமம்யேவ அனுத்தரம் உபேக்கா²ஸதிபாரிஸுத்³தி⁴ந்தி இமம் பட²மாதி³ஜ்ஜா²னேஹி அஸதி³ஸம் உத்தமம் சதுத்த²ஜ்ஜா²னிகம் உபேக்கா²ஸதிபாரிஸுத்³தி⁴ம். பட²மாபி⁴னிப்³பி⁴தா³தி பட²மோ ஞாணபே⁴தோ³. து³தியாதீ³ஸுபி ஏஸேவ நயோ. குக்குடச்சா²பகோ பன ஏகவாரம் மாதுகுச்சி²தோ ஏகவாரம் அண்ட³கோஸதோதி த்³வே வாரே ஜாயதி. அரியஸாவகோ தீஹி விஜ்ஜாஹி தாயோ வாரே ஜாயதி. புப்³பே³னிவாஸச்சா²த³கம் தமம் வினோதே³த்வா புப்³பே³னிவாஸஞாணேன பட²மம் ஜாயதி, ஸத்தானம் சுதிபடிஸந்தி⁴ச்சா²த³கம் தமம் வினோதே³த்வா தி³ப்³ப³சக்கு²ஞாணேன து³தியம் ஜாயதி, சதுஸச்சபடிச்சா²த³கம் தமம் வினோதே³த்வா ஆஸவக்க²யஞாணேன ததியம் ஜாயதி.

29. இத³ம்பிஸ்ஸ ஹோதி சரணஸ்மிந்தி இத³ம்பி ஸீலம் அஸ்ஸ பி⁴க்கு²னோ சரணம் நாம ஹோதீதி அத்தோ². சரணம் நாம ப³ஹு அனேகவித⁴ம், ஸீலாத³யோ பன்னரஸத⁴ம்மா, தத்த² இத³ம்பி ஏகம் சரணந்தி அத்தோ². பத³த்தோ² பன சரதி தேன அக³தபுப்³ப³ம் தி³ஸம் க³ச்ச²தீதி சரணம். ஏஸ நயோ ஸப்³ப³த்த².

இத³ம்பிஸ்ஸ ஹோதி விஜ்ஜாயாதி இத³ம் புப்³பே³னிவாஸஞாணம் தஸ்ஸ விஜ்ஜா நாம ஹோதீதி அத்தோ². விஜ்ஜா நாம ப³ஹு அனேகவிதா⁴, விபஸ்ஸனஞாணாதீ³னி அட்ட² ஞாணானி, தத்த² இத³ம்பி ஞாணம் ஏகா விஜ்ஜாதிபி அத்தோ². பத³த்தோ² பன வினிவிஜ்ஜி²த்வா ஏதாய ஜானாதீதி விஜ்ஜா. ஏஸ நயோ ஸப்³ப³த்த². விஜ்ஜாஸம்பன்னோ இதிபீதி தீஹி விஜ்ஜாஹி விஜ்ஜாஸம்பன்னோ இதிபி. சரணஸம்பன்னோ இதிபீதி பஞ்சத³ஸஹி த⁴ம்மேஹி சரணஸம்பன்னோ இதிபி. தது³ப⁴யேன பன விஜ்ஜாசரணஸம்பன்னோ இதிபீதி.

30. ஸனங்குமாரேனாதி போராணககுமாரேன, சிரகாலதோ பட்டா²ய குமாரோதி பஞ்ஞாதேன. ஸோ கிர மனுஸ்ஸபதே² பஞ்சசூளககுமாரககாலே ஜா²னம் நிப்³ப³த்தேத்வா அபரிஹீனஜ்ஜா²னோ ப்³ரஹ்மலோகே நிப்³ப³த்தி, தஸ்ஸ ஸோ அத்தபா⁴வோ பியோ அஹோஸி மனாபோ, தஸ்மா தாதி³ஸேனேவ அத்தபா⁴வேன சரதி, தேன நம் ஸனங்குமாரோதி ஸஞ்ஜானந்தி. ஜனேதஸ்மிந்தி ஜனிதஸ்மிம், பஜாயாதி அத்தோ². யே கோ³த்தபடிஸாரினோதி யே ஜனேதஸ்மிம் கோ³த்தம் படிஸரந்தி ‘‘அஹம் கோ³தமோ, அஹம் கஸ்ஸபோ’’தி, தேஸு லோகே கோ³த்தபடிஸாரீஸு க²த்தியோ ஸேட்டோ². அனுமதா ப⁴க³வதாதி மம பஞ்ஹப்³யாகரணேன ஸத்³தி⁴ம் ஸம்ஸந்தி³த்வா தே³ஸிதாதி அம்ப³ட்ட²ஸுத்தே பு³த்³தே⁴ன ப⁴க³வதா ‘‘அஹம்பி, அம்ப³ட்ட², ஏவம் வதா³மி –

‘க²த்தியோ ஸேட்டோ² ஜனேதஸ்மிம், யே கோ³த்தபடிஸாரினோ;

விஜ்ஜாசரணஸம்பன்னோ, ஸோ ஸேட்டோ² தே³வமானுஸே’தி’’. (தீ³. நி. 1.277) –

ஏவம் பா⁴ஸந்தேன அனுஞ்ஞாதா அனுமோதி³தா. ஸாது⁴ ஸாது⁴ ஆனந்தா³தி, ப⁴க³வா கிர ஆதி³தோ பட்டா²ய நித்³த³ம் அனோக்கமந்தோவ இமம் ஸுத்தம் ஸுத்வா ஆனந்தே³ன ஸேக²படிபதா³ய கூடம் க³ஹிதந்தி ஞத்வா உட்டா²ய பல்லங்கம் ஆபு⁴ஜித்வா நிஸின்னோ ஸாது⁴காரம் அதா³ஸி. ஏத்தாவதா ச பன இத³ம் ஸுத்தம் ஜினபா⁴ஸிதம் நாம ஜாதம். ஸேஸம் ஸப்³ப³த்த² உத்தானமேவாதி.

பபஞ்சஸூத³னியா மஜ்ஜி²மனிகாயட்ட²கதா²ய

ஸேக²ஸுத்தவண்ணனா நிட்டி²தா.