8. ஸல்லேக²ஸுத்தவண்ணனா

81. ஏவம் மே ஸுதந்தி ஸல்லேக²ஸுத்தம். தத்த² மஹாசுந்தோ³தி தஸ்ஸ தே²ரஸ்ஸ நாமம். ஸாயன்ஹஸமயந்தி ஸாயன்ஹகாலே. படிஸல்லானா வுட்டி²தோதி ஏத்த² படிஸல்லானந்தி தேஹி தேஹி ஸத்தஸங்கா²ரேஹி படினிவத்தித்வா ஸல்லானம் நிலீயனம், ஏகீபா⁴வோ பவிவேகோதி வுத்தம் ஹோதி. யோ ததோ வுட்டி²தோ, ஸோ படிஸல்லானா வுட்டி²தோ நாம ஹோதி. அயம் பன யஸ்மா படிஸல்லானானம் உத்தமதோ ப²லஸமாபத்திதோ வுட்டா²ஸி, தஸ்மா ‘‘படிஸல்லானா வுட்டி²தோ’’தி வுத்தோ. ப⁴க³வந்தம் அபி⁴வாதே³த்வாதி ஸமத³ஸனகு²ஜ்ஜலவிபூ⁴ஸிதேன ஸிரஸா ப⁴க³வந்தம் ஸக்கச்சம் வந்தி³த்வா, அபி⁴வாதா³பேத்வா வா ‘‘ஸுகீ² ப⁴வ, சுந்தா³’’தி ஏவம் வசீபே⁴த³ம் காராபேத்வா, ப⁴க³வா பன கிர வந்தி³தோ ஸமானோ ஸுவண்ணது³ந்து³பி⁴ஸதி³ஸம் கீ³வம் பக்³க³ய்ஹ கண்ணஸுக²ம் பேமனியம் அமதாபி⁴ஸேகஸதி³ஸம் ப்³ரஹ்மகோ⁴ஸம் நிச்சா²ரேந்தோ ‘‘ஸுகீ² ஹோஹீ’’தி தஸ்ஸ தஸ்ஸ நாமம் க³ஹேத்வா வத³தி, ஏதம் ஆசிண்ணம் ததா²க³தானம். தத்ரித³ம் ஸாத⁴கஸுத்தம், ‘‘ஸக்கோ, ப⁴ந்தே, தே³வானமிந்தோ³ ஸாமச்சோ ஸபரிஜனோ ப⁴க³வதோ பாதே³ ஸிரஸா வந்த³தீதி, ஸுகீ² ஹோது பஞ்சஸிக² ஸக்கோ தே³வானமிந்தோ³ ஸாமச்சோ ஸபரிஜனோ, ஸுக²காமா ஹி தே³வா மனுஸ்ஸா அஸுரா நாகா³ க³ந்த⁴ப்³பா³, யே சஞ்ஞே ஸந்தி புது²காயா’’தி. ஏவஞ்ச பன ததா²க³தா ஏவரூபே மஹேஸக்கே² யக்கே² அபி⁴வத³ந்தீதி.

யா இமாதி இதா³னி வத்தப்³பா³பி⁴முக²ம் கரோந்தோ விய ஆஹ. அனேகவிஹிதாதி நானப்பகாரா. தி³ட்டி²யோதி மிச்சா²தி³ட்டி²யோ. லோகே உப்பஜ்ஜந்தீதி ஸத்தேஸு பாதுப⁴வந்தி. அத்தவாத³ப்படிஸம்யுத்தாதி ‘‘ரூபம் அத்ததோ ஸமனுபஸ்ஸதீ’’திஆதி³னயப்பவத்தேன அத்தவாதே³ன படிஸம்யுத்தா, தா வீஸதி ப⁴வந்தி. லோகவாத³ப்படிஸம்யுத்தாதி ‘‘ஸஸ்ஸதோ அத்தா ச லோகோ சா’’திஆதி³னயப்பவத்தேன லோகவாதே³ன படிஸம்யுத்தா, தா அட்ட² ஹோந்தி ஸஸ்ஸதோ, அஸஸ்ஸதோ, ஸஸ்ஸதோ ச அஸஸ்ஸதோ ச, நேவ ஸஸ்ஸதோ நாஸஸ்ஸதோ, அந்தவா, அனந்தவா, அந்தவா ச அனந்தவா ச, நேவந்தவா நானந்தவா அத்தா ச லோகோ சாதி ஏவம் பவத்தத்தா.

ஆதி³மேவாதிஆதீ³ஸு அயமத்தோ² கிம் நு கோ² ப⁴ந்தே ஆதி³மேவ மனஸிகரோந்தஸ்ஸ அப்பத்வாபி ஸோதாபத்திமக்³க³ம் விபஸ்ஸனாமிஸ்ஸகபட²மமனஸிகாரமேவ மனஸிகரோந்தஸ்ஸ பி⁴க்கு²னோ ஏவமேதாஸம் ஏத்தகேனேவ உபாயேன ஏதாஸம் தி³ட்டீ²னம் பஹானஞ்ச படினிஸ்ஸக்³கோ³ ச ஹோதீதி. இத³ஞ்ச தே²ரோ அத்தனா அனதி⁴மானிகோபி ஸமானோ அதி⁴மானிகானம் அதி⁴மானப்பஹானத்த²ம் அதி⁴மானிகோ விய ஹுத்வா புச்ச²தீதி வேதி³தப்³போ³. அபரே பனாஹு ‘‘தே²ரஸ்ஸ அந்தேவாஸிகா ஆதி³மனஸிகாரேனேவ தி³ட்டீ²னம் ஸமுச்சே²த³ப்பஹானம் ஹோதீதி ஏவம்ஸஞ்ஞினோபி, ஸமாபத்திவிஹாரா ஸல்லேக²விஹாராதி ஏவம்ஸஞ்ஞினோபி அத்தி². ஸோ தேஸம் அத்தா²ய ப⁴க³வந்தம் புச்ச²தீ’’தி.

82. அத²ஸ்ஸ ப⁴க³வா தாஸம் தி³ட்டீ²னம் பஹானூபாயம் த³ஸ்ஸேந்தோ யா இமாதிஆதி³மாஹ. தத்த² யத்த² சேதா தி³ட்டி²யோ உப்பஜ்ஜந்தீதிஆதி³ பஞ்சக்க²ந்தே⁴ ஸந்தா⁴ய வுத்தம். ஏதேஸு ஹி ஏதா தி³ட்டி²யோ உப்பஜ்ஜந்தி. யதா²ஹ ‘‘ரூபே கோ², பி⁴க்க²வே, ஸதி ரூபம் அபி⁴னிவிஸ்ஸ ஏவம் தி³ட்டி² உப்பஜ்ஜதி, ஸோ அத்தா ஸோ லோகோ ஸோ பேச்ச ப⁴விஸ்ஸாமி நிச்சோ து⁴வோ ஸஸ்ஸதோ அவிபரிணாமத⁴ம்மோ’’தி (ஸம். நி. 3.152) வித்தா²ரோ. ஆரம்மணவஸேன பன ஏகவசனம் கத்வா யத்த² சாதி ஆஹ, யஸ்மிம் ஆரம்மணே உப்பஜ்ஜந்தீதி வுத்தம் ஹோதி. ஏத்த² ச உப்பஜ்ஜந்தி அனுஸேந்தி ஸமுதா³சரந்தீதி இமேஸம் ஏவம் நானாகரணம் வேதி³தப்³ப³ம். ஜாதிவஸேன ஹி அஜாதா ஜாயமானா உப்பஜ்ஜந்தீதி வுச்சந்தி. புனப்புனம் ஆஸேவிதா தா²மக³தா அப்படிவினீதா அனுஸேந்தீதி. காயவசீத்³வாரம் ஸம்பத்தா ஸமுதா³சரந்தீதி, இத³மேதேஸம் நானாகரணம். தம் நேதம் மமாதிஆதீ³ஸு தம் பஞ்சக்க²ந்த⁴ப்பபே⁴த³ம் ஆரம்மணமேதம் மய்ஹம் ந ஹோதி, அஹம்பி ஏஸோ ந அஸ்மி, ஏஸோ மே அத்தாபி ந ஹோதீதி ஏவமேதம் யதா²பூ⁴தம் ஸம்மப்பஞ்ஞாய பஸ்ஸதோதி ஏவம் தாவ பத³த்தோ² வேதி³தப்³போ³.

யஸ்மா பன ஏத்த² ஏதம் மமாதி தண்ஹாகா³ஹோ, தஞ்ச க³ண்ஹந்தோ அட்ட²ஸததண்ஹாவிசரிதப்பபே⁴த³ம் தண்ஹாபபஞ்சம் க³ண்ஹாதி. ஏஸோஹமஸ்மீதி மானகா³ஹோ, தஞ்ச க³ண்ஹந்தோ நவப்பபே⁴த³ம் மானபபஞ்சம் க³ண்ஹாதி. ஏஸோ மே அத்தாதி தி³ட்டி²கா³ஹோ, தஞ்ச க³ண்ஹந்தோ த்³வாஸட்டி²தி³ட்டி²க³தப்பபே⁴த³ம் தி³ட்டி²பபஞ்சம் க³ண்ஹாதி. தஸ்மா நேதம் மமாதி வத³ந்தோ ப⁴க³வா யதா²வுத்தப்பபே⁴த³ம் தண்ஹாபபஞ்சம் படிக்கி²பதி. நேஸோஹமஸ்மீதி மானபபஞ்சம். ந மேஸோ அத்தாதி தி³ட்டி²பபஞ்சம். தி³ட்டே²கட்டா²யேவ சேத்த² தண்ஹாமானா வேதி³தப்³பா³. ஏவமேதந்தி ஏவம் ‘‘நேதம் மமா’’திஆதி³னா ஆகாரேன ஏதம் க²ந்த⁴பஞ்சகம். யதா²பூ⁴தந்தி யதா² ஸபா⁴வம், யதா² அத்தீ²தி வுத்தம் ஹோதி. க²ந்த⁴பஞ்சகஞ்ஹி ஏதேனேவ ஆகாரேன அத்தி². மமந்திஆதி³னா பன க³ய்ஹமானம்பி தேனாகாரேன நேவத்தீ²தி அதி⁴ப்பாயோ. ஸம்மப்பஞ்ஞாய பஸ்ஸதோதி ஸோதாபத்திமக்³க³பஞ்ஞாபரியோஸானாய விபஸ்ஸனாபஞ்ஞாய ஸுட்டு² பஸ்ஸந்தஸ்ஸ. ஏவமேதாஸந்தி ஏதேன உபாயேன ஏதாஸம். பஹானம் படினிஸ்ஸக்³கோ³தி உப⁴யம்பேதம் ஸமுச்சே²த³ப்பஹானஸ்ஸேவாதி⁴வசனம்.

ஏவம் ப⁴க³வா ஆதி³மனஸிகாரேனேவ தி³ட்டீ²னம் பஹானம் ஹோதி நு கோ² நோதி ஆயஸ்மதா மஹாசுந்தே³ன அதி⁴மானிகானம் வஸேன பஞ்ஹம் புட்டோ² ஸோதாபத்திமக்³கே³ன தி³ட்டி²ப்பஹானம் த³ஸ்ஸேத்வா இதா³னி ஸயமேவ அதி⁴மானிகானம் ஜா²னம் விப⁴ஜந்தோ டா²னம் கோ² பனேதந்திஆதி³மாஹ. தத்த² அதி⁴மானிகா நாம யேஸம் அப்பத்தே பத்தஸஞ்ஞாய அதி⁴மானோ உப்பஜ்ஜதி, ஸ்வாயம் உப்பஜ்ஜமானோ நேவ லோகவட்டானுஸாரீனம் பா³லபுது²ஜ்ஜனானம் உப்பஜ்ஜதி, ந அரியஸாவகானம். ந ஹி ஸோதாபன்னஸ்ஸ ‘‘ஸகதா³கா³மீ அஹ’’ந்தி அதி⁴மானோ உப்பஜ்ஜதி, ந ஸகதா³கா³மிஸ்ஸ ‘‘அனாகா³மீ அஹ’’ந்தி, ந அனாகா³மினோ ‘‘அரஹா அஹ’’ந்தி, காரகஸ்ஸேவ பன ஸமத²வஸேன வா விபஸ்ஸனாவஸேன வா விக்க²ம்பி⁴தகிலேஸஸ்ஸ நிச்சம் யுத்தபயுத்தஸ்ஸ ஆரத்³த⁴விபஸ்ஸகஸ்ஸ உப்பஜ்ஜதி. தஸ்ஸ ஹி ஸமத²விக்க²ம்பி⁴தானம் வா விபஸ்ஸனாவிக்க²ம்பி⁴தானம் வா கிலேஸானம் ஸமுதா³சாரம் அபஸ்ஸதோ ‘‘ஸோதாபன்னோ அஹந்தி வா, ஸகதா³கா³மீ, அனாகா³மீ, அரஹா அஹ’’ந்தி வா அதி⁴மானோ உப்பஜ்ஜதி, தலங்க³ரதிஸ்ஸபப்³ப³தவாஸித⁴ம்மதி³ன்னத்தே²ரேன ஓவாதி³யமானத்தே²ரானம் விய.

தே²ரஸ்ஸ கிர அசிரூபஸம்பன்னஸ்ஸேவ ஓவாதே³ ட²த்வா ப³ஹூ பி⁴க்கூ² விஸேஸம் அதி⁴க³ச்சி²ம்ஸு. தம் பவத்திம் ஸுத்வா திஸ்ஸமஹாவிஹாரவாஸீ பி⁴க்கு²ஸங்கோ⁴ ‘‘ந அட்டா²னனியோஜகோ தே²ரோதி தே²ரம் ஆனேதா²’’தி ஸம்ப³ஹுலே பி⁴க்கூ² பாஹேஸி. தே க³ந்த்வா, ‘‘ஆவுஸோ, த⁴ம்மதி³ன்ன பி⁴க்கு²ஸங்கோ⁴ தம் பக்கோஸாபேதீ’’தி ஆஹம்ஸு. ஸோ ஆஹ ‘‘கிம் பன தும்ஹே, ப⁴ந்தே, அத்தானம் க³வேஸத² பர’’ந்தி? அத்தானம் ஸப்புரிஸாதி, ஸோ தேஸம் கம்மட்டா²னமதா³ஸி, ஸப்³பே³வ அரஹத்தம் பாபுணிம்ஸு. பி⁴க்கு²ஸங்கோ⁴ புன அஞ்ஞே பி⁴க்கூ² பாஹேஸி, ஏவம் யாவததியம் பஹிதா ஸப்³பே³பி தத்தே²வ அரஹத்தம் பத்வா விஹரிம்ஸு.

ததோ ஸங்கோ⁴ க³தக³தா நாக³ச்ச²ந்தீதி அஞ்ஞதரம் வுட்³ட⁴பப்³ப³ஜிதம் பாஹேஸி. ஸோ க³ந்த்வா ச, ‘‘ப⁴ந்தே, த⁴ம்மதி³ன்ன திக்க²த்தும் திஸ்ஸமஹாவிஹாரவாஸீ பி⁴க்கு²ஸங்கோ⁴ துய்ஹம் ஸந்திகே பேஸேஸி, த்வம் நாம ஸங்க⁴ஸ்ஸ ஆணம் க³ரும் ந கரோஸி, நாக³ச்ச²ஸீ’’தி ஆஹ. தே²ரோ கிமேதந்தி பண்ணஸாலம் அப்பவிஸித்வாவ பத்தசீவரம் கா³ஹாபேத்வா தாவதே³வ நிக்க²மி, ஸோ அந்தராமக்³கே³ ஹங்கனவிஹாரம் பாவிஸி. தத்த² சேகோ மஹாதே²ரோ ஸட்டி²வஸ்ஸாதீதோ அதி⁴மானேன அரஹத்தம் படிஜானாதி. தே²ரோ தம் உபஸங்கமித்வா வந்தி³த்வா படிஸந்தா²ரம் கத்வா அதி⁴க³மம் புச்சி². தே²ரோ ஆஹ ‘‘ஆம த⁴ம்மதி³ன்ன, யம் பப்³ப³ஜிதேன காதப்³ப³ம், சிரகதம் தம் மயா, அதீதஸட்டி²வஸ்ஸோம்ஹி ஏதரஹீ’’தி. கிம், ப⁴ந்தே, இத்³தி⁴ம்பி வளஞ்ஜேதா²தி. ஆம த⁴ம்மதி³ன்னாதி. ஸாது⁴ வத, ப⁴ந்தே, ஹத்தி²ம் தும்ஹாகம் படிமுக²ம் ஆக³ச்ச²ந்தம் மாபேதா²தி. ஸாதா⁴வுஸோதி தே²ரோ ஸப்³ப³ஸேதம் ஸத்தப்பதிட்ட²ம் திதா⁴பபி⁴ன்னம் நங்கு³ட்ட²ம் பீ³ஜயமானம் ஸோண்ட³ம் முகே² பக்கி²பித்வா த்³வீஹி த³ந்தேஹி விஜ்ஜி²துகாமம் விய படிமுக²ம் ஆக³ச்ச²ந்தம் மஹாஹத்தி²ம் மாபேஸி. ஸோ தம் அத்தனாயேவ மாபிதம் ஹத்தி²ம் தி³ஸ்வா பீ⁴தோ பலாயிதும் ஆரபி⁴. ததா³வ அத்தானம் ‘‘நாஹம் அரஹா’’தி ஞத்வா த⁴ம்மதி³ன்னஸ்ஸ பாத³மூலே உக்குடிகம் நிஸீதி³த்வா ‘‘பதிட்டா² மே ஹோஹி, ஆவுஸோ’’தி ஆஹ. த⁴ம்மதி³ன்னோ ‘‘மா, ப⁴ந்தே, ஸோசி, மா அனத்தமனோ அஹோஸி, காரகானம்யேவ அதி⁴மானோ உப்பஜ்ஜதீ’’தி தே²ரம் ஸமஸ்ஸாஸேத்வா கம்மட்டா²னமதா³ஸி. தே²ரோ தஸ்ஸோவாதே³ ட²த்வா அரஹத்தம் பாபுணி.

சித்தலபப்³ப³தேபி தாதி³ஸோவ தே²ரோ வஸதி. த⁴ம்மதி³ன்னோ தம்பி உபஸங்கமித்வா ததே²வ புச்சி². ஸோபி ததே²வ ப்³யாகாஸி. ததோ நம் த⁴ம்மதி³ன்னோ கிம், ப⁴ந்தே, இத்³தி⁴ம்பி வளஞ்ஜேதா²தி ஆஹ. ஆமாவுஸோதி. ஸாது⁴ வத, ப⁴ந்தே, ஏகம் போக்க²ரணிம் மாபேதா²தி. தே²ரோ மாபேஸி. ஏத்த², ப⁴ந்தே, பது³மகு³ம்ப³ம் மாபேதா²தி. தம்பி மாபேஸி. பது³மகு³ம்பே³ மஹாபது³மம் மாபேதா²தி. தம்பி மாபேஸி. ஏதஸ்மிம் பது³மகு³ம்பே³ ட²த்வா மது⁴ரஸ்ஸரேன கா³யந்தம் நச்சந்தஞ்ச ஏகம் இத்தி²விக்³க³ஹம் மாபேதா²தி. தம்பி மாபேஸி. ஸோ ஏதம், ப⁴ந்தே, புனப்புனம் உபனிஜ்ஜா²யதா²தி வத்வா ஸயம் பாஸாத³ம் பாவிஸி. தே²ரஸ்ஸ தம் உபனிஜ்ஜா²யதோ ஸட்டி²வஸ்ஸானி விக்க²ம்பி⁴தகிலேஸா சலிம்ஸு, ஸோ ததா³ அத்தானம் ஞத்வா புரிமத்தே²ரோ விய த⁴ம்மதி³ன்னத்தே²ரஸ்ஸ ஸந்திகே கம்மட்டா²னம் க³ஹேத்வா அரஹத்தம் பாபுணி.

த⁴ம்மதி³ன்னோபி அனுபுப்³பே³ன திஸ்ஸமஹாவிஹாரம் அக³மாஸி. தஸ்மிஞ்ச ஸமயே தே²ரா சேதியங்க³ணம் ஸம்மஜ்ஜித்வா பு³த்³தா⁴ரம்மணம் பீதிம் உப்பாதே³த்வா நிஸின்னா ஹோந்தி, ஏதம் கிர தேஸம் வத்தம். தேன நேஸம் ஏகோபி ‘‘இத⁴ பத்தசீவரம் ட²பேஹீ’’தி த⁴ம்மதி³ன்னம் வத்தா புச்சி²தாபி நாஹோஸி. த⁴ம்மதி³ன்னோ ஏஸோ ப⁴வேய்யாதி ஞத்வா பன பஞ்ஹம் புச்சி²ம்ஸு. ஸோ புச்சி²தபஞ்ஹே திண்ஹேன அஸினா குமுத³னாளகலாபம் விய சி²ந்தி³த்வா பாத³ங்கு³லியா மஹாபத²விம் பஹரி. ப⁴ந்தே அயம் அசேதனா மஹாபத²வீபி த⁴ம்மதி³ன்னஸ்ஸ கு³ணம் ஜானாதி. தும்ஹே பன ந ஜானித்தா²தி ச வத்வா இமம் கா³த²மாஹ –

‘‘அசேதனாயம் பத²வீ, விஜானாதி கு³ணாகு³ணம்;

ஸசேதனாத² கோ² ப⁴ந்தே, ந ஜானாத² கு³ணாகு³ண’’ந்தி.

தாவதே³வ ச ஆகாஸே அப்³பு⁴க்³க³ந்த்வா தலங்க³ரதிஸ்ஸபப்³ப³தமேவ அக³மாஸி. ஏவம் காரகஸ்ஸேவ அதி⁴மானோ உப்பஜ்ஜதி. தஸ்மா ப⁴க³வா தாதி³ஸானம் பி⁴க்கூ²னம் வஸேன ஜா²னம் விப⁴ஜந்தோ டா²னம் கோ² பனேதந்திஆதி³மாஹ.

தஸ்ஸத்தோ², அத்தே²தம் காரணம், நோ நத்தி². யேன இதே⁴கச்சோ பி⁴க்கு² பா³ஹிரபரிப்³பா³ஜகேஹி ஸாதா⁴ரணம் விவிச்சேவ காமேஹி…பே… பட²மம் ஜா²னம் உபஸம்பஜ்ஜ விஹரேய்ய, யம் பன தஸ்ஸ ஏவமஸ்ஸ ஸல்லேகே²ன விஹராமீதி, யம் படிபத்திவிதா⁴னம் கிலேஸே ஸம்லிக²தி, தேனாஹம் விஹராமீதி, தம் ந யுஜ்ஜதி, ந ஹி அதி⁴மானிகஸ்ஸ பி⁴க்கு²னோ ஜா²னம் ஸல்லேகோ² வா ஸல்லேக²படிபதா³ வா ஹோதி. கஸ்மா? அவிபஸ்ஸனாபாத³கத்தா. ந ஹி ஸோ ஜா²னம் ஸமாபஜ்ஜித்வா ததோ வுட்டா²ய ஸங்கா²ரே ஸம்மஸதி, ஜா²னம் பனஸ்ஸ சித்தேகக்³க³மத்தம் கரோதி, தி³ட்ட²த⁴ம்மஸுக²விஹாரோ ஹோதி. தஸ்மா தமத்த²ம் த³ஸ்ஸேந்தோ ப⁴க³வா ‘‘ந கோ² பனேதே, சுந்த³, அரியஸ்ஸ வினயே ஸல்லேகா² வுச்சந்தி, தி³ட்ட²த⁴ம்மஸுக²விஹாரா ஏதே அரியஸ்ஸ வினயே வுச்சந்தீ’’தி ஆஹ.

தத்த² ஏதேதி ஜா²னத⁴ம்மவஸேன ப³ஹுவசனம் வேதி³தப்³ப³ம், ஏதே பட²மஜ்ஜா²னத⁴ம்மாதி வுத்தம் ஹோதி. ஸமாபத்திவஸேன வா, ஏகம்பி ஹி பட²மஜ்ஜா²னம் புனப்புனம் ஸமாபத்திவஸேன பவத்தத்தா ப³ஹுத்தம் க³ச்ச²தி. ஆரம்மணவஸேன வா, ஏகம்பி ஹி பட²மஜ்ஜா²னம் பத²வீகஸிணாதீ³ஸு பவத்திவஸேன ப³ஹுத்தம் க³ச்ச²தீதி. ஏஸ நயோ து³தியததியசதுத்த²ஜ்ஜா²னேஸு. ஆருப்பஜா²னேஸு பன ஆரம்மணபே⁴தா³பா⁴வதோ புரிமகாரணத்³வயவஸேனேவ ப³ஹுவசனம் வேதி³தப்³ப³ம்.

யஸ்மா சேதேஸம் அங்கா³னிபி ஸந்தானி ஆரம்மணானிபி, நிப்³பு³தானி சேவ ஸுகு²மானி சாதி வுத்தம் ஹோதி, தஸ்மா தானி ஸந்தா ஏதே விஹாராதி ஏவம் வுத்தானீதி வேதி³தப்³பா³னி. அயம் தாவ தேஸம் சதுன்னம்பி ஸாதா⁴ரணா வண்ணனா. விஸேஸவண்ணனா பன ‘‘ஸப்³ப³ஸோ ரூபஸஞ்ஞான’’ந்திஆதி³பதா³னுஸாரதோ வத்தப்³பா³ ஸியா. ஸா விஸுத்³தி⁴மக்³கே³ ஸப்³பா³காரேன வுத்தாயேவ.

83. ஏவம் யஸ்மா அதி⁴மானிகஸ்ஸ பி⁴க்கு²னோ ஜா²னவிஹாரோ அவிபஸ்ஸனாபாத³கத்தா ஸல்லேக²விஹாரோ ந ஹோதி, ந ஹி ஸோ ஜா²னம் ஸமாபஜ்ஜித்வா ததோ வுட்டா²ய ஸங்கா²ரே ஸம்மஸதி, சித்தேகக்³க³கரோ தி³ட்ட²த⁴ம்மே ஸுக²விஹாரோ பனஸ்ஸ ஹோதி, தஸ்மா தமத்த²ம் த³ஸ்ஸேந்தோ ரூபஜ்ஜா²னானி ச அரூபஜ்ஜா²னானி ச விப⁴ஜித்வா இதா³னி ச யத்த² ஸல்லேகோ² காதப்³போ³ சதுசத்தாலீஸாய ஆகாரேஹி, தஞ்ச வத்து²ம் தஞ்ச ஸல்லேக²ம் த³ஸ்ஸேந்தோ இத⁴ கோ² பன வோதிஆதி³மாஹ.

கஸ்மா பன ‘‘அட்ட²ஹி ஸமாபத்தீஹி அவிஹிம்ஸாத³யோ ஸல்லேகா²’’தி வுத்தா? லோகுத்தரபாத³கத்தா. பா³ஹிரகானஞ்ஹி அட்ட² ஸமாபத்தியோ வட்டபாத³காயேவ. ஸாஸனே ஸரணக³மனம்பி லோகுத்தரபாத³கம், பகே³வ அவிஹிம்ஸாத³யோ. இமினாயேவ ச ஸுத்தேன வேதி³தப்³ப³ம் ‘‘யதா² பா³ஹிரகஸ்ஸ அட்ட²ஸமாபத்திலாபி⁴னோ பஞ்சாபி⁴ஞ்ஞஸ்ஸாபி தி³ன்னதா³னதோ ஸாஸனே திஸரணக³தஸ்ஸ தி³ன்னதா³னம் மஹப்ப²லதரம் ஹோதீ’’தி. இத³ஞ்ஹி ஸந்தா⁴ய த³க்கி²ணாவிஸுத்³தி⁴ஸுத்தே ‘‘பா³ஹிரகே காமேஸு வீதராகே³ தா³னம் த³த்வா கோடிஸதஸஹஸ்ஸகு³ணா பாடிகங்கி²தப்³பா³. ஸோதாபத்திப²லஸச்சி²கிரியாய படிபன்னே தா³னம் த³த்வா அஸங்கே²ய்யா அப்பமேய்யா த³க்கி²ணா பாடிகங்கி²தப்³பா³, கோ பன வாதோ³ ஸோதாபன்னே’’தி வுத்தம் (ம. நி. 3.379). ஸரணக³மனதோ பட்டா²ய ஹி தத்த² ஸோதாபத்திப²லஸச்சி²கிரியாய படிபன்னோ அதி⁴ப்பேதோதி, அயம் தாவேத்த² பாளியோஜனா.

அனுபத³வண்ணனாயம் பன இதா⁴தி விஹிம்ஸாதி³வத்து²தீ³பனமேதம். கோ² பனாதி நிபாதமத்தம். வோதி கரணத்தே² ஸாமிவசனம், அயம் பன ஸங்கே²பத்தோ², யதே³தம் ‘‘பரே விஹிம்ஸகா ப⁴விஸ்ஸந்தீ’’திஆதி³னா நயேன விஹிம்ஸாதி³வத்து²ம் வதா³ம. இத⁴, சுந்த³, தும்ஹேஹி ஸல்லேகோ² காதப்³போ³தி.

ஏவம் ஸங்கே²பதோ வத்வா இதா³னி வித்தா²ரேந்தோ ‘‘பரே விஹிம்ஸகா ப⁴விஸ்ஸந்தி, மயமேத்த² அவிஹிம்ஸகா ப⁴விஸ்ஸாமாதி ஸல்லேகோ² கரணீயோ’’திஆதி³மாஹ.

தத்த² பரேதி யே கேசி இமம் ஸல்லேக²மனனுயுத்தா. விஹிம்ஸகா ப⁴விஸ்ஸந்தீதி பாணினா வா லேட்³டு³னா வாதிஆதீ³ஹி ஸத்தானம் விஹேஸகா ப⁴விஸ்ஸந்தி. மயமேத்த² அவிஹிம்ஸகா ப⁴விஸ்ஸாமாதி மயம் பன யத்தே²வ வத்து²ஸ்மிம் பரே ஏவம் விஹிம்ஸகா ப⁴விஸ்ஸந்தி, ஏத்தே²வ அவிஹிம்ஸகா ப⁴விஸ்ஸாம, அவிஹிம்ஸம் உப்பாதே³த்வா விஹரிஸ்ஸாம. இதி ஸல்லேகோ² கரணீயோதி ஏவம் தும்ஹேஹி ஸல்லேகோ² காதப்³போ³. ஸல்லேகோ²தி ச இத⁴ அவிஹிம்ஸாவ வேதி³தப்³பா³. அவிஹிம்ஸா ஹி விஹிம்ஸம் ஸல்லேக²தி, தம் சி²ந்த³தி, தஸ்மா ஸல்லேகோ²தி வுச்சதி. ஏஸ நயோ ஸப்³ப³த்த². அயம் பன விஸேஸோ. பரே மிச்சா²தி³ட்டீ²தி ஏத்த² கம்மபதா²னம் அந்தமிச்சா²தி³ட்டி²ஞ்ச மிச்ச²த்தானம் ஆதி³மிச்சா²தி³ட்டி²ஞ்ச மிஸ்ஸேத்வா தி³ட்டி² வுத்தாதி வேதி³தப்³பா³. ததா² மயமேத்த² ஸம்மாதி³ட்டீ²தி வுத்தட்டா²னே ஸம்மாதி³ட்டி². ஏத்த² ச கம்மபத²கதா² வித்தா²ரதோ ஸம்மாதி³ட்டி²ஸுத்தே ஆவி ப⁴விஸ்ஸதி. மிச்ச²த்தேஸு மிச்சா²தி³ட்டி²ஆத³யோ த்³வேதா⁴விதக்கே.

அயம் பனேத்த² ஸங்கே²போ, பாணம் அதிபாதேந்தீதி பாணாதிபாதீ பாணகா⁴தகாதி அத்தோ². அதி³ன்னம் ஆதி³யந்தீதி அதி³ன்னாதா³யீ, பரஸ்ஸ ஹாரினோதி அத்தோ². அப்³ரஹ்மம் ஹீனம் லாமகத⁴ம்மம் சரந்தீதி அப்³ரஹ்மசாரீ, மேது²னத⁴ம்மப்படிஸேவகாதி அத்தோ². ப்³ரஹ்மம் ஸேட்ட²ம் படிபத³ம் சரந்தீதி ப்³ரஹ்மசாரீ, மேது²னா படிவிரதாதி அத்தோ². ஏத்த² ச ப்³ரஹ்மசரியம் ஸல்லேகோ²தி வேதி³தப்³ப³ம். ப்³ரஹ்மசரியஞ்ஹி அப்³ரஹ்மசரியம் ஸல்லேக²தி. முஸா வத³ந்தீதி முஸாவாதீ³, பரேஸம் அத்த²ப⁴ஞ்ஜனகம் துச்ச²ம் அலிகம் வாசம் பா⁴ஸிதாரோதி அத்தோ². பிஸுணா வாசா ஏதேஸந்தி பிஸுணவாசா. பரேஸம் மம்மச்சே²தி³கா ப²ருஸா வாசா ஏதேஸந்தி ப²ருஸவாசா. ஸம்ப²ம் நிரத்த²கவசனம் பலபந்தீதி ஸம்ப²ப்பலாபீ. அபி⁴ஜ்ஜா²யந்தீதி அபி⁴ஜ்ஜா²லூ, பரப⁴ண்ட³லுப்³ப⁴னஸீலாதி அத்தோ². ப்³யாபன்னம் பூதிபூ⁴தம் சித்தமேதேஸந்தி ப்³யாபன்னசித்தா. மிச்சா² பாபிகா விஞ்ஞுக³ரஹிதா ஏதேஸம் தி³ட்டீ²தி மிச்சா²தி³ட்டீ², கம்மபத²பரியாபன்னாய நத்தி² தி³ன்னந்திஆதி³வத்து²காய, மிச்ச²த்தபரியாபன்னாய அனிய்யானிகதி³ட்டி²யா ச ஸமன்னாக³தாதி அத்தோ². ஸம்மா ஸோப⁴னா விஞ்ஞுப்பஸத்தா² ஏதேஸம் தி³ட்டீ²தி ஸம்மாதி³ட்டீ², கம்மபத²பரியாபன்னாய அத்தி² தி³ன்னந்திஆதி³காய கம்மஸ்ஸகதாதி³ட்டி²யா, ஸம்மத்தபரியாபன்னாய மக்³க³தி³ட்டி²யா ச ஸமன்னாக³தாதி அத்தோ².

மிச்சா²ஸங்கப்பாதி அயாதா²வஅனிய்யானிகஅகுஸலஸங்கப்பா. ஏஸ நயோ மிச்சா²வாசாதிஆதீ³ஸு. அயம் பன விஸேஸோ, மிச்சா²ஸங்கப்பாத³யோ விய ஹி மிச்சா²ஸதி நாம பாடிஏக்கோ கோசி த⁴ம்மோ நத்தி², அதீதம் பன சிந்தயதோ பவத்தானம் சதுன்னம்பி அகுஸலக்க²ந்தா⁴னமேதம் அதி⁴வசனம். யம்பி வுத்தம் ப⁴க³வதா – ‘‘அத்தே²ஸா, பி⁴க்க²வே, அனுஸ்ஸதி, நேஸா நத்தீ²தி வதா³மி, புத்தலாப⁴ம் வா, பி⁴க்க²வே, அனுஸ்ஸரதோ, த⁴னலாப⁴ம் வா, பி⁴க்க²வே, அனுஸ்ஸரதோ, யஸலாப⁴ம் வா, பி⁴க்க²வே, அனுஸ்ஸரதோ’’தி, தம்பி தம் தம் சிந்தேந்தஸ்ஸ ஸதிபதிரூபகேன உப்பத்திம் ஸந்தா⁴ய வுத்தந்தி வேதி³தப்³ப³ம். மிச்சா²ஞாணீதி ஏத்த² ச மிச்சா²ஞாணந்தி பாபகிரியாஸு உபாயசிந்தாவஸேன பாபம் கத்வா ‘‘ஸுகதம் மயா’’தி பச்சவேக்க²ணாகாரேன ச உப்பன்னோ மோஹோ வேதி³தப்³போ³, தேன ஸமன்னாக³தா புக்³க³லா மிச்சா²ஞாணீ. ஸம்மாஞாணீதி ஏத்த² பன ஏகூனவீஸதிபே⁴த³ம் பச்சவேக்க²ணாஞாணம் ‘‘ஸம்மாஞாண’’ந்தி வுச்சதி, தேன ஸமன்னாக³தா புக்³க³லா ஸம்மாஞாணீ. மிச்சா²விமுத்தீதி அவிமுத்தாயேவ ஸமானா ‘‘விமுத்தா மய’’ந்தி ஏவம்ஸஞ்ஞினோ, அவிமுத்தியம் வா விமுத்திஸஞ்ஞினோ. தத்ராயம் வசனத்தோ², மிச்சா² பாபிகா விபரீதா விமுத்தி ஏதேஸம் அத்தீ²தி மிச்சா²விமுத்தீ. மிச்சா²விமுத்தீதி ச யதா²வுத்தேனாகாரேன பவத்தானம் அகுஸலக்க²ந்தா⁴னமேதம் அதி⁴வசனம். ப²லஸம்பயுத்தானி பன ஸம்மாதி³ட்டி²ஆதீ³னி அட்ட²ங்கா³னி ட²பேத்வா ஸேஸத⁴ம்மா ஸம்மாவிமுத்தீதி வேதி³தப்³பா³. ஸா ச மிச்சா²விமுத்திம் ஸல்லிகி²த்வா டி²தத்தா ஸல்லேகோ²தி வேதி³தப்³பா³. தத்த² நியோஜேந்தோ ஆஹ ‘‘மயமேத்த² ஸம்மாவிமுத்தீ ப⁴விஸ்ஸாமாதி ஸல்லேகோ² கரணீயோ’’தி.

இதோ பரானி தீணி நீவரணவஸேன வுத்தானி. அபி⁴ஜ்ஜா²லூ ப்³யாபன்னசித்தாதி ஏவம் கம்மபதே²ஸு வுத்தத்தா பனேத்த² பட²மானி த்³வே நீவரணானி ந வுத்தானீதி வேதி³தப்³பா³னி. தத்த² தி²னமித்³தே⁴ன பரியுட்டி²தா அபி⁴பூ⁴தாதி தி²னமித்³த⁴பரியுட்டி²தா. உத்³த⁴ச்சேன ஸமன்னாக³தாதி உத்³த⁴தா. விசினந்தா கிச்ச²ந்தி ந ஸக்கோந்தி ஸன்னிட்டா²னம் காதுந்தி விசிகிச்சீ². கோத⁴னாதிஆதீ³னி த³ஸ சித்தஸ்ஸ உபக்கிலேஸவஸேன வுத்தானி. தத்த² கோதா⁴தீ³ஸு யம் வத்தப்³ப³ம் ஸியா, தம் ஸப்³ப³ம் த⁴ம்மதா³யாத³வத்த²ஸுத்தேஸு வுத்தம். அயம் பனேத்த² வசனத்தோ² – கோத⁴னாதி குஜ்ஜ²னஸீலா. உபனாஹீதி உபனாஹனஸீலா, உபனாஹோ வா ஏதேஸம் அத்தீ²தி உபனாஹீ. ததா² மக்கீ² பலாஸீ ச. இஸ்ஸந்தீதி இஸ்ஸுகீ. மச்ச²ராயந்தீதி மச்ச²ரீ, மச்சே²ரம் வா ஏதேஸம் அத்தீ²தி மச்ச²ரீ. ஸட²யந்தீதி ஸடா², ந ஸம்மா பா⁴ஸந்தீதி வுத்தம் ஹோதி, கேராடிகயுத்தானமேதம் அதி⁴வசனம். மாயா ஏதேஸம் அத்தீ²தி மாயாவீ. த²ம்ப⁴ஸமங்கி³தாய த²த்³தா⁴. அதிமானயோகே³ன அதிமானீ. வுத்தபச்சனீகனயேன ஸுக்கபக்கோ² வேதி³தப்³போ³.

து³ப்³ப³சாதி வத்தும் து³க்கா² கிஞ்சி வுச்சமானா ந ஸஹந்தி. தப்³பி³பரீதா ஸுவசா. தே³வத³த்தாதி³ஸதி³ஸா பாபகா மித்தா ஏதேஸந்தி பாபமித்தா. பு³த்³தா⁴ வா ஸாரிபுத்தாதி³ஸதி³ஸா வா கல்யாணா மித்தா ஏதேஸந்தி கல்யாணமித்தா. காயது³ச்சரிதாதீ³ஸு சித்தவோஸ்ஸக்³க³வஸேன பமத்தா. விபரீதா அப்பமத்தாதி வேதி³தப்³பா³. இமானி தீணி பகிண்ணகவஸேன வுத்தானி. அஸ்ஸத்³தா⁴திஆதீ³னி ஸத்த அஸத்³த⁴ம்மவஸேன. தத்த² தீஸு வத்தூ²ஸு ஸத்³தா⁴ ஏதேஸம் நத்தீ²தி அஸ்ஸத்³தா⁴. ஸுக்கபக்கே² ஸத்³த³ஹந்தீதி ஸத்³தா⁴, ஸத்³தா⁴ வா ஏதேஸம் அத்தீ²திபி ஸத்³தா⁴. நத்தி² ஏதேஸம் ஹிரீதி அஹிரிகா, அகுஸலஸமாபத்தியா அஜிகு³ச்ச²மானானமேதம் அதி⁴வசனம். ஹிரீ ஏதேஸம் மனே, ஹிரியா வா யுத்தமனாதி ஹிரிமனா. ந ஓத்தப்பந்தீதி அனோத்தப்பீ, அகுஸலஸமாபத்தியா ந பா⁴யந்தீதி வுத்தம் ஹோதி. தப்³பி³பரீதா ஓத்தப்பீ. அப்பம் ஸுதமேதேஸந்தி அப்பஸ்ஸுதா, அப்பந்தி ச தோ²கந்தி ந க³ஹேதப்³ப³ம், நத்தீ²தி க³ஹேதப்³ப³ம். ‘‘அப்பஸ்ஸுதா’’தி ஹி நிஸ்ஸுதா ஸுதவிரஹிதா வுச்சந்தி. ப³ஹு ஸுதமேதேஸந்தி ப³ஹுஸ்ஸுதா, ததா²க³தபா⁴ஸிதம் ஏகம்பி கா³த²ம் யாதா²வதோ ஞத்வா அனுரூபபடிபன்னானமேதம் அதி⁴வசனம். குச்சி²தா ஸீத³ந்தீதி குஸீதா, ஹீனவீரியானமேதம் அதி⁴வசனம். ஆரத்³த⁴ம் வீரியமேதேஸந்தி ஆரத்³த⁴வீரியா, ஸம்மப்பதா⁴னயுத்தானமேதம் அதி⁴வசனம், முட்டா² ஸதி ஏதேஸந்தி முட்ட²ஸ்ஸதீ, நட்ட²ஸ்ஸதீதி வுத்தம் ஹோதி. உபட்டி²தா ஸதி ஏதேஸந்தி உபட்டி²தஸ்ஸதீ, நிச்சம் ஆரம்மணாபி⁴முக²ப்பவத்தஸதீனமேதம் அதி⁴வசனம். து³ட்டா² பஞ்ஞா ஏதேஸந்தி து³ப்பஞ்ஞா, நட்ட²பஞ்ஞாதி வுத்தம் ஹோதி. பஞ்ஞாய ஸம்பன்னாதி பஞ்ஞாஸம்பன்னா, பஞ்ஞாதி ச இத⁴ விபஸ்ஸனாபஞ்ஞா வேதி³தப்³பா³. விபஸ்ஸனாஸம்பா⁴ரோ ஹி பரிபூரோ இமஸ்மிம் டா²னே ஆக³தோ, தஸ்மா விபஸ்ஸனாபஞ்ஞாவ அயந்தி போராணானம் ஆணா.

இதா³னி ஏகமேவ லோகுத்தரகு³ணானம் அந்தராயகரம் அனிய்யானிகதி³ட்டி²ம் தீஹாகாரேஹி த³ஸ்ஸேந்தோ ஸந்தி³ட்டி²பராமாஸீதிஆதி³மாஹ. தத்த² ஸந்தி³ட்டி²ம் பராமஸந்தீதி ஸந்தி³ட்டி²பராமாஸீ. ஆதா⁴னம் க³ண்ஹந்தீதி ஆதா⁴னக்³கா³ஹீ, ஆதா⁴னந்தி த³ள்ஹம் வுச்சதி, த³ள்ஹக்³கா³ஹீதி அத்தோ². யுத்தகாரணம் தி³ஸ்வாவ லத்³தி⁴ம் படினிஸ்ஸஜ்ஜந்தீதி படினிஸ்ஸக்³கீ³, து³க்கே²ன கிச்சே²ன கஸிரேன ப³ஹும்பி காரணம் த³ஸ்ஸேத்வா ந ஸக்கா படினிஸ்ஸக்³க³ம் காதுந்தி து³ப்படினிஸ்ஸக்³கீ³, யே அத்தனோ உப்பன்னம் தி³ட்டி²ம் இத³மேவ ஸச்சந்தி த³ள்ஹம் க³ண்ஹித்வா அபி பு³த்³தா⁴தீ³ஹி காரணம் த³ஸ்ஸேத்வா வுச்சமானா ந படினிஸ்ஸஜ்ஜந்தி, தேஸமேதம் அதி⁴வசனம். தாதி³ஸா ஹி புக்³க³லா யம் யதே³வ த⁴ம்மம் வா அத⁴ம்மம் வா க³ண்ஹந்தி, தம் ஸப்³ப³ம் ‘‘ஏவம் அம்ஹாகம் ஆசரியேஹி கதி²தம், ஏவம் அம்ஹேஹி ஸுத’’ந்தி கும்மோவ அங்கா³னி ஸகே கபாலே அந்தோயேவ ஸமோத³ஹந்தி, கும்பீ⁴லக்³கா³ஹம் க³ண்ஹந்தி ந விஸ்ஸஜ்ஜந்தி. வுத்தவிபரியாயேன ஸுக்கபக்கோ² வேதி³தப்³போ³.

84. ஏவம் சதுசத்தாலீஸாய ஆகாரேஹி ஸல்லேக²ம் த³ஸ்ஸேத்வா இதா³னி தஸ்மிம் ஸல்லேகே² சித்துப்பாத³ஸ்ஸாபி ப³ஹூபகாரதம் த³ஸ்ஸேதும் சித்துப்பாத³ம்பி கோ² அஹந்திஆதி³மாஹ.

தஸ்ஸத்தோ², அஹம், சுந்த³, குஸலேஸு த⁴ம்மேஸு சித்துப்பாத³ம்பி ப³ஹூபகாரம் வதா³மி, யா பனேதா காயேன ச வாசாய ச அனுவிதி⁴யனா, யதா² பட²மம் சித்தம் உப்பன்னம், ததே²வ தேஸம் த⁴ம்மானம் காயேன கரணம், வாசாய ச ‘‘கரோதா²’’தி ஆணாபனம் வா, உக்³க³ஹபரிபுச்சா²தீ³னி வா, தத்த² வாதோ³யேவ கோ, ஏகந்தப³ஹூபகாராயேவ ஹி தா அனுவிதி⁴யனாதி த³ஸ்ஸேதி. கஸ்மா பனேத்த² சித்துப்பாதோ³பி ப³ஹூபகாரோதி? ஏகந்தஹிதஸுகா²வஹத்தா அனுவிதி⁴யனானம் ஹேதுத்தா ச.

‘‘தா³னம் த³ஸ்ஸாமீ’’தி ஹி சித்துப்பாதோ³ ஸயம்பி ஏகந்தஹிதஸுகா²வஹோ அனுவிதி⁴யனானம்பி ஹேது, ஏவஞ்ஹி உப்பன்னசித்தத்தாயேவ து³தியதி³வஸே மஹாவீதி²ம் பித³ஹித்வா மஹாமண்ட³பம் கத்வா பி⁴க்கு²ஸதஸ்ஸ வா பி⁴க்கு²ஸஹஸ்ஸஸ்ஸ வா தா³னம் தே³தி, ‘‘பி⁴க்கு²ஸங்க⁴ம் நிமந்தேத² பூஜேத² பரிவிஸதா²’’தி பரிஜனே ஆணாபேதி. ஏவம் ‘‘ஸங்க⁴ஸ்ஸ சீவரம் ஸேனாஸனம் பே⁴ஸஜ்ஜம் த³ஸ்ஸாமீ’’தி சித்துப்பாதோ³ ஸயம்பி ஏகந்தஹிதஸுகா²வஹோ அனுவிதி⁴யனானம்பி ஹேது, ஏவம் உப்பன்னசித்தத்தாயேவ ஹி சீவராதீ³னி அபி⁴ஸங்க²ரோதி தே³தி தா³பேதி ச. ஏஸ நயோ ஸரணக³மனாதீ³ஸு.

‘‘ஸரணம் க³ச்சா²மீ’’தி ஹி சித்தம் உப்பாதே³த்வாவ பச்சா² காயேன வா வாசாய வா ஸரணம் க³ண்ஹாதி. ததா² ‘‘பஞ்சங்க³ம் அட்ட²ங்க³ம் த³ஸங்க³ம் வா ஸீலம் ஸமாதி³யிஸ்ஸாமீ’’தி சித்தம் உப்பாதே³த்வா காயேன வா வாசாய வா ஸமாதி³யதி, ‘‘பப்³ப³ஜித்வா சதூஸு ஸீலேஸு பதிட்ட²ஹிஸ்ஸாமீ’’தி ச சித்தம் உப்பாதே³த்வா காயேன வாசாய ச பூரேதப்³ப³ம் ஸீலம் பூரேதி. ‘‘பு³த்³த⁴வசனம் உக்³க³ஹேஸ்ஸாமீ’’தி சித்தம் உப்பாதே³த்வாவ ஏகம் வா நிகாயம் த்³வே வா தயோ வா சத்தாரோ வா பஞ்ச வா நிகாயே வாசாய உக்³க³ண்ஹாதி. ஏவம் து⁴தங்க³ஸமாதா³ன-கம்மட்டா²னுக்³க³ஹ-கஸிணபரிகம்ம-ஜா²னஸமாபத்திவிபஸ்ஸனாமக்³க³ப²ல- பச்சேகபோ³தி⁴-ஸம்மாஸம்போ³தி⁴வஸேன நேதப்³ப³ம்.

‘‘பு³த்³தோ⁴ ப⁴விஸ்ஸாமீ’’தி ஹி சித்துப்பாதோ³ ஸயம்பி ஏகந்தஹிதஸுகா²வஹோ அனுவிதி⁴யனானம்பி ஹேது, ஏவஞ்ஹி உப்பன்னசித்தத்தாயேவ அபரேன ஸமயேன கப்பஸதஸஹஸ்ஸாதி⁴கானி சத்தாரி அஸங்கே²ய்யானி காயேன வாசாய ச பாரமியோ பூரேத்வா ஸதே³வகம் லோகம் தாரேந்தோ விசரதி. ஏவம் ஸப்³ப³த்த² சித்துப்பாதோ³பி ப³ஹூபகாரோ. காயவாசாஹி பன அனுவிதி⁴யனா அதிப³ஹூபகாராயேவாதி வேதி³தப்³பா³.

ஏவம் குஸலேஸு த⁴ம்மேஸு சித்துப்பாத³ஸ்ஸாபி ப³ஹூபகாரதம் த³ஸ்ஸேத்வா இதா³னி தத்த² நியோஜேந்தோ ‘‘தஸ்மா திஹ சுந்தா³’’திஆதி³மாஹ. தம் அத்த²தோ பாகடமேவ.

85. ஏவம் சதுசத்தாலீஸாய ஆகாரேஹி த³ஸ்ஸிதே ஸல்லேகே² சித்துப்பாத³ஸ்ஸாபி ப³ஹூபகாரதம் த³ஸ்ஸேத்வா இதா³னி தஸ்ஸேவ ஸல்லேக²ஸ்ஸ ஹிதாதி⁴க³மாய மக்³க³பா⁴வம் த³ஸ்ஸேந்தோ ஸேய்யதா²பீதிஆதி³மாஹ.

தஸ்ஸத்தோ², யதா² நாம, சுந்த³, கா²ணுகண்டகபாஸாணாதீ³ஹி விஸமோ மக்³கோ³ ப⁴வேய்ய, தஸ்ஸ பரிக்கமனாய பரிவஜ்ஜனத்தா²ய அஞ்ஞோ ஸுபரிகம்மகதோ விய பூ⁴மிபா⁴கோ³ ஸமோ மக்³கோ³ ப⁴வேய்ய, யதா² ச ருக்க²மூலபாஸாணபபாதகும்பீ⁴லமகராதி³ பரிப்³யாகுலம் விஸமம் தித்த²மஸ்ஸ, தஸ்ஸ பரிக்கமனாய பரிவஜ்ஜனத்தா²ய அஞ்ஞம் அவிஸமம் அனுபுப்³ப³க³ம்பீ⁴ரம் ஸோபானப²லகஸதி³ஸம் தித்த²ம் ப⁴வேய்ய, யம் படிபன்னோ ஸுகே²னேவ தம் நதி³ம் வா தளாகம் வா அஜ்ஜோ²கா³ஹேத்வா ந்ஹாயேய்ய வா உத்தரேய்ய வா, ஏவமேவ கோ², சுந்த³, விஸமமக்³க³விஸமதித்த²ஸதி³ஸாய விஹிம்ஸாய ஸமன்னாக³தஸ்ஸ விஹிம்ஸகபுக்³க³லஸ்ஸ ஸமமக்³க³ஸமதித்த²ஸதி³ஸா அவிஹிம்ஸா ஹோதி பரிக்கமனாய. யதே²வ ஹி விஸமமக்³க³தித்த²பரிவஜ்ஜனத்தா²ய ஸமோ மக்³கோ³ ச தித்த²ஞ்ச படியத்தம், ஏவம் விஹிம்ஸாபரிவஜ்ஜனத்தா²ய அவிஹிம்ஸா படியத்தா, யம் படிபன்னோ ஸுகே²னேவ மனுஸ்ஸக³திம் வா தே³வக³திம் வா அஜ்ஜோ²கா³ஹேத்வா ஸம்பத்திம் வா அனுப⁴வேய்ய உத்தரேய்ய வா லோகா. ஏதேனேவ உபாயேன ஸப்³ப³பதா³னி யோஜேதப்³பா³னி.

86. ஏவம் தஸ்ஸேவ ஹிதாதி⁴க³மாய மக்³க³பா⁴வம் த³ஸ்ஸேத்வா இதா³னி உபரிபா⁴க³ங்க³மனீயதம் த³ஸ்ஸேந்தோ, ஸேய்யதா²பீதிஆதி³மாஹ.

தஸ்ஸத்தோ², யதா² நாம, சுந்த³, யே கேசி அகுஸலா த⁴ம்மா படிஸந்தி⁴யா ஜனகா வா அஜனகா வா, தி³ன்னாயபி படிஸந்தி⁴யா விபாகஜனகா வா அஜனகா வா, ஸப்³பே³ தே ஜாதிவஸேன அதோ⁴பா⁴க³ங்க³மனீயாதி ஏவம்னாமாவ ஹோந்தி, விபாககாலே அனிட்டா²கந்தவிபாகத்தா. யதா² ச யே கேசி குஸலா த⁴ம்மா படிஸந்தி⁴யா ஜனகா வா அஜனகா வா தி³ன்னாயபி படிஸந்தி⁴யா விபாகஜனகா வா அஜனகா வா, ஸப்³பே³ தே ஜாதிவஸேன உபரிபா⁴க³ங்க³மனீயாதி ஏவம்னாமாவ ஹோந்தி, விபாககாலே இட்ட²கந்தவிபாகத்தா, ஏவமேவ கோ², சுந்த³, விஹிம்ஸகஸ்ஸ…பே… உபரிபா⁴கா³யாதி. தத்ராயம் ஓபம்மஸம்ஸந்த³னா – யதா² ஸப்³பே³ அகுஸலா அதோ⁴பா⁴க³ங்க³மனீயா, ஏவம் விஹிம்ஸகஸ்ஸ ஏகா விஹிம்ஸாபி. யதா² ச ஸப்³பே³ குஸலா உபரிபா⁴க³ங்க³மனீயா, ஏவம் அவிஹிம்ஸகஸ்ஸ ஏகா அவிஹிம்ஸாபி. ஏதேனேவ உபாயேன அகுஸலம் அகுஸலேன குஸலஞ்ச குஸலேன உபமேதப்³ப³ம், அயம் கிரேத்த² அதி⁴ப்பாயோதி.

87. ஏவம் தஸ்ஸேவ ஸல்லேக²ஸ்ஸ உபரிபா⁴க³ங்க³மனீயதம் த³ஸ்ஸேத்வா இதா³னி பரினிப்³பா³பனே ஸமத்த²பா⁴வம் த³ஸ்ஸேதும் ஸோ வத சுந்தா³திஆதி³மாஹ. தத்த² ஸோதி வுத்தப்பகாரபுக்³க³லனித்³தே³ஸோ. தஸ்ஸ யோதி இமம் உத்³தே³ஸவசனம் ஆஹரித்வா யோ அத்தனா பலிபபலிபன்னோ, ஸோ வத, சுந்த³, பரம் பலிபபலிபன்னம் உத்³த⁴ரிஸ்ஸதீதி ஏவம் ஸப்³ப³பதே³ஸு ஸம்ப³ந்தோ⁴ வேதி³தப்³போ³. பலிபபலிபன்னோதி க³ம்பீ⁴ரகத்³த³மே நிமுக்³கோ³ வுச்சதி, நோ ச கோ² அரியஸ்ஸ வினயே. அரியஸ்ஸ பன வினயே பலிபந்தி பஞ்ச காமகு³ணா வுச்சந்தி. பலிபன்னோதி தத்த² நிமுக்³கோ³ பா³லபுது²ஜ்ஜனோ, தஸ்மா ஏவமேத்த² அத்த²யோஜனா வேதி³தப்³பா³. யதா², சுந்த³, கோசி புரிஸோ யாவ நாஸிகக்³கா³ க³ம்பீ⁴ரே கத்³த³மே நிமுக்³கோ³ அபரம் தத்தே²வ நிமுக்³க³ம் ஹத்தே² வா ஸீஸே வா க³ஹேத்வா உத்³த⁴ரிஸ்ஸதீதி நேதம் டா²னம் விஜ்ஜதி, ந ஹி தம் காரணமத்தி², யேன ஸோ தம் உத்³த⁴ரித்வா த²லே பதிட்ட²பேய்ய, ஏவமேவ யோ அத்தனா பஞ்சகாமகு³ணபலிபே பலிபன்னோ, ஸோ வத பரம் ததே²வ பலிபபலிபன்னம் உத்³த⁴ரிஸ்ஸதீதி நேதம் டா²னம் விஜ்ஜதி.

தத்த² ஸியா அயுத்தமேதம், புது²ஜ்ஜனானம்பி பி⁴க்கு²பி⁴க்கு²னீஉபாஸகஉபாஸிகானம் த⁴ம்மதே³ஸனம் ஸுத்வா ஹோந்தியேவ த⁴ம்மம் அபி⁴ஸமேதாரோ, தஸ்மா பலிபபலிபன்னோ உத்³த⁴ரதீதி, தம் ந ததா² த³ட்ட²ப்³ப³ம். ப⁴க³வாயேவ ஹி தத்த² உத்³த⁴ரதி, பஸம்ஸாமத்தமேவ பன த⁴ம்மகதி²கா லப⁴ந்தி ரஞ்ஞா பஹிதலேக²வாசகோ விய. யதா² ஹி ரஞ்ஞோ பச்சந்தஜனபதே³ பஹிதம் லேக²ம் தத்த² மனுஸ்ஸா லேக²ம் வாசேதும் அஜானந்தா யோ வாசேதும் ஜானாதி, தேன வாசாபேத்வா தமத்த²ம் ஸுத்வா ‘‘ரஞ்ஞோ ஆணா’’தி ஆத³ரேன ஸம்பாதே³ந்தி, ந ச நேஸம் ஹோதி ‘‘லேக²வாசகஸ்ஸ அயம் ஆணா’’தி. லேக²வாசகோ பன ‘‘விஸ்ஸட்டா²ய வாசாய வாசேஸி அனேலக³ளாயா’’தி பஸம்ஸாமத்தமேவ லப⁴தி, ஏவமேவ கிஞ்சாபி ஸாரிபுத்தபபு⁴தயோ த⁴ம்மகதி²கா த⁴ம்மம் தே³ஸேந்தி, அத² கோ² லிகி²தபண்ணவாசகோ விய தே ஹோந்தி. ப⁴க³வதோயேவ பன ஸா த⁴ம்மதே³ஸனா ரஞ்ஞோ ஆணா விய. யே ச தம் ஸுத்வா த⁴ம்மம் அபி⁴ஸமேந்தி, தே ப⁴க³வாயேவ உத்³த⁴ரதீதி வேதி³தப்³பா³. த⁴ம்மகதி²கா பன ‘‘விஸ்ஸட்டா²ய வாசாய த⁴ம்மம் தே³ஸேந்தி அனேலக³ளாயா’’தி பஸம்ஸாமத்தமேவ லப⁴ந்தீதி. தஸ்மா யுத்தமேவேதந்தி. வுத்தவிபரியாயேன ஸுக்கபக்கோ² வேதி³தப்³போ³.

அத³ந்தோ அவினீதோ அபரினிப்³பு³தோதி ஏத்த² பன அனிப்³பி³ஸதாய அத³ந்தோ. அஸிக்கி²தவினயதாய அவினீதோ. அனிப்³பு³தகிலேஸதாய அபரினிப்³பு³தோதி வேதி³தப்³போ³. ஸோ தாதி³ஸோ பரம் த³மேஸ்ஸதி, நிப்³பி³ஸம் கரிஸ்ஸதி, வினேஸ்ஸதி வா திஸ்ஸோ ஸிக்கா² ஸிக்கா²பேஸ்ஸதி, பரினிப்³பா³பேஸ்ஸதி வா தஸ்ஸ கிலேஸே நிப்³பா³பேஸ்ஸதீதி நேதம் டா²னம் விஜ்ஜதி. வுத்தவிபரியாயேன ஸுக்கபக்கோ² வேதி³தப்³போ³.

ஏவமேவ கோ², சுந்த³, விஹிம்ஸகஸ்ஸ…பே… பரினிப்³பா³னாயாதி ஏத்த² பன ஏவமத்தோ² வேதி³தப்³போ³ – யதா² ஹி அத்தனா அபலிபபலிபன்னோ பரம் பலிபபலிபன்னம் உத்³த⁴ரிஸ்ஸதி, த³ந்தோ த³மேஸ்ஸதி, வினீதோ வினேஸ்ஸதி, பரினிப்³பு³தோ பரினிப்³பா³பேஸ்ஸதீதி டா²னமேதம் விஜ்ஜதீதி. கிம் பன தந்தி? அபலிபபலிபன்னத்தம், த³ந்தத்தம் வினீதத்தம் பரினிப்³பு³தத்தஞ்ச, ஏவமேவ கோ², சுந்த³, விஹிம்ஸகஸ்ஸ புரிஸபுக்³க³லஸ்ஸ அவிஹிம்ஸா ஹோதி பரினிப்³பா³னாய. கிம் வுத்தம் ஹோதி? யோ அத்தனா அவிஹிம்ஸகோ, தஸ்ஸ யா அவிஹிம்ஸா, அயம் யா ஏஸா விஹிம்ஸகஸ்ஸ பரஸ்ஸ விஹிம்ஸா, தஸ்ஸா பரினிப்³பா³னாய ஹோதி, அத்தனா ஹி அவிஹிம்ஸகோ பரஸ்ஸ விஹிம்ஸாசேதனம் நிப்³பா³பேஸ்ஸதீதி டா²னமேதம் விஜ்ஜதி. கிம் பன தந்தி? அவிஹிம்ஸகத்தமேவ. யஞ்ஹி யேன அத்தனா அதி⁴க³தம் ஹோதி, ஸோ பரம் தத³த்தா²ய ஸமாத³பேதும் ஸக்கோதீதி.

அத² வா யதா² அத்தனா அபலிபன்னோ த³ந்தோ வினீதோ பரினிப்³பு³தோ பரம் பலிபபலிபன்னம் அத³ந்தம் அவினீதம் அபரினிப்³பு³தஞ்ச உத்³த⁴ரிஸ்ஸதி த³மேஸ்ஸதி வினேஸ்ஸதி பரினிப்³பா³பேஸ்ஸதீதி டா²னமேதம் விஜ்ஜதி, ஏவமேவ விஹிம்ஸகஸ்ஸ புரிஸபுக்³க³லஸ்ஸ விஹிம்ஸாபஹானாய மக்³க³ம் பா⁴வயதோ உப்பன்னா அவிஹிம்ஸா ஹோதி பரினிப்³பா³னாய. பரினிப்³பு³தோ விய ஹி அபரினிப்³பு³தம் அவிஹிம்ஸாசேதனாவ விஹிம்ஸாசேதனம் பரினிப்³பா³பேதும் ஸமத்தா². ஏதமத்த²ம் த³ஸ்ஸேந்தோ ‘‘ஏவமேவ கோ², சுந்தா³’’திஆதி³மாஹாதி ஏவமேத்த² அத்தோ² த³ட்ட²ப்³போ³. யதா² சேத்த², ஏவம் ஸப்³ப³பதே³ஸு. அதிவித்தா²ரப⁴யேன பன அனுபத³யோஜனா ந கதாதி.

88. ஏவம் தஸ்ஸ பரினிப்³பா³பனே ஸமத்த²பா⁴வம் த³ஸ்ஸேத்வா இதா³னி தம் தே³ஸனம் நிக³மேத்வா த⁴ம்மபடிபத்தியம் நியோஜேதும் இதி கோ², சுந்தா³திஆதி³மாஹ. தத்த² ஸல்லேக²பரியாயோதி ஸல்லேக²காரணம். ஏஸ நயோ ஸப்³ப³த்த² ஏத்த² அவிஹிம்ஸாத³யோ ஏவ விஹிம்ஸாதீ³னம் ஸல்லேக²னதோ ஸல்லேக²காரணம். தேஸம் வஸேன சித்தஸ்ஸ உப்பாதே³தப்³ப³தோ சித்துபாத³காரணம், விஹிம்ஸாதி³, பரிக்கமனஸ்ஸ ஹேதுதோ பரிக்கமனகாரணம், உபரிபா⁴க³னிப்பா²த³னதோ உபரிபா⁴க³காரணம், விஹிம்ஸாதீ³னம் பரினிப்³பா³பனதோ பரினிப்³பா³னகாரணந்தி வேதி³தப்³பா³. ஹிதேஸினாதி ஹிதம் ஏஸந்தேன. அனுகம்பகேனாதி அனுகம்பமானேன. அனுகம்பம் உபாதா³யாதி அனுகம்பம் சித்தேன பரிக்³க³ஹேத்வா, பரிச்சாதிபி வுத்தம் ஹோதி. கதம் வோ தம் மயாதி தம் மயா இமே பஞ்ச பரியாயே த³ஸ்ஸேந்தேன தும்ஹாகம் கதம். ஏத்தகமேவ ஹி அனுகம்பகஸ்ஸ ஸத்து² கிச்சம், யதி³த³ம் அவிபரீதத⁴ம்மதே³ஸனா. இதோ பரம் பன படிபத்தி நாம ஸாவகானம் கிச்சம். தேனாஹ ஏதானி, சுந்த³, ருக்க²மூலானி…பே… அம்ஹாகம் அனுஸாஸனீதி.

தத்த² ச ருக்க²மூலானீதி இமினா ருக்க²மூலஸேனாஸனம் த³ஸ்ஸேதி. ஸுஞ்ஞாகா³ரானீதி இமினா ஜனவிவித்தட்டா²னம். உப⁴யேனாபி ச யோகா³னுரூபஸேனாஸனமாசிக்க²தி, தா³யஜ்ஜம் நிய்யாதேதி. ஜா²யதா²தி ஆரம்மணூபனிஜ்ஜா²னேன அட்ட²திம்ஸாரம்மணானி, லக்க²ணூபனிஜ்ஜா²னேன ச அனிச்சாதி³தோ க²ந்தா⁴யதனாதீ³னி உபனிஜ்ஜா²யத², ஸமத²ஞ்ச விபஸ்ஸனஞ்ச வட்³டே⁴தா²தி வுத்தம் ஹோதி. மா பமாத³த்தா²தி மா பமஜ்ஜித்த². மா பச்சா² விப்படிஸாரினோ அஹுவத்தா²தி யே ஹி புப்³பே³ த³ஹரகாலே, ஆரோக்³யகாலே, ஸத்தஸப்பாயாதி³ஸம்பத்திகாலே, ஸத்து² ஸம்முகீ²பா⁴வகாலே ச யோனிஸோமனஸிகாரவிரஹிதா ரத்திந்தி³வம் மங்கு³லப⁴த்தா ஹுத்வா ஸேய்யஸுக²ம் மித்³த⁴ஸுக²மனுபோ⁴ந்தா பமஜ்ஜந்தி, தே பச்சா² ஜராகாலே, ரோக³காலே, மரணகாலே, விபத்திகாலே, ஸத்து² பரினிப்³பு³தகாலே ச தம் புப்³பே³ பமாத³விஹாரம் அனுஸ்ஸரந்தா, ஸப்படிஸந்தி⁴காலகிரியஞ்ச பா⁴ரியம் ஸம்பஸ்ஸமானா விப்படிஸாரினோ ஹோந்தி, தும்ஹே பன தாதி³ஸா மா அஹுவத்தா²தி ஏதமத்த²ம் த³ஸ்ஸேந்தோ ஆஹ ‘‘மா பச்சா² விப்படிஸாரினோ அஹுவத்தா²’’தி. அயம் வோ அம்ஹாகம் அனுஸாஸனீதி அயம் அம்ஹாகம் ஸந்திகா ‘‘ஜா²யத² மா பமாத³த்தா²’’தி தும்ஹாகம் அனுஸாஸனீ, ஓவாதோ³தி வுத்தம் ஹோதி.

பபஞ்சஸூத³னியா மஜ்ஜி²மனிகாயட்ட²கதா²ய

ஸல்லேக²ஸுத்தவண்ணனா நிட்டி²தா.