2. ஸப்³பா³ஸவஸுத்தவண்ணனா

14. ஏவம் மே ஸுதம்…பே… ஸாவத்தி²யந்தி ஸப்³பா³ஸவஸுத்தம். தத்ராயம் அபுப்³ப³பத³வண்ணனா – ஸாவத்தீ²தி ஸவத்த²ஸ்ஸ இஸினோ நிவாஸட்டா²னபூ⁴தா நக³ரீ, யதா² காகந்தீ³ மாகந்தீ³ கோஸம்பீ³தி ஏவம் தாவ அக்க²ரசிந்தகா. அட்ட²கதா²சரியா பன ப⁴ணந்தி ‘‘யம்கிஞ்சி மனுஸ்ஸானம் உபபோ⁴க³பரிபோ⁴க³ம் ஸப்³ப³மேத்த² அத்தீ²தி ஸாவத்தீ². ஸத்த²ஸமாயோகே³ ச கிம் ப⁴ண்ட³மத்தீ²தி புச்சி²தே ஸப்³ப³மத்தீ²’’தி வசனமுபாதா³ய ஸாவத்தீ².

‘‘ஸப்³ப³தா³ ஸப்³பூ³பகரணம், ஸாவத்தி²யம் ஸமோஹிதம்;

தஸ்மா ஸப்³ப³முபாதா³ய, ஸாவத்தீ²தி பவுச்சதி.

கோஸலானம் புரம் ரம்மம், த³ஸ்ஸனேய்யம் மனோரமம்;

த³ஸஹி ஸத்³தே³ஹி அவிவித்தம், அன்னபானஸமாயுதம்.

வுத்³தி⁴ம் வேபுல்லதம் பத்தம், இத்³த⁴ம் பீ²தம் மனோரமம்;

அளகமந்தா³வ தே³வானம், ஸாவத்தி²புரமுத்தம’’ந்தி.

தஸ்ஸம் ஸாவத்தி²யம். ஜேதவனேதி ஏத்த² அத்தனோ பச்சத்தி²கஜனம் ஜினாதீதி ஜேதோ, ரஞ்ஞா வா அத்தனோ பச்சத்தி²கஜனே ஜிதே ஜாதோதி ஜேதோ, மங்க³லகம்யதாய வா தஸ்ஸ ஏவம்னாமமேவ கதந்தி ஜேதோ, ஜேதஸ்ஸ வனம் ஜேதவனம். தஞ்ஹி ஜேதேன ராஜகுமாரேன ரோபிதம் ஸம்வத்³தி⁴தம் பரிபாலிதம், ஸோ ச தஸ்ஸ ஸாமீ அஹோஸி. தஸ்மா ஜேதவனந்தி வுச்சதி, தஸ்மிம் ஜேதவனே. அனாத²பிண்டி³கஸ்ஸ ஆராமேதி ஏத்த² ஸுத³த்தோ நாம ஸோ க³ஹபதி மாதாபிதூஹி கதனாமவஸேன. ஸப்³ப³காமஸமித்³தி⁴தாய பன விக³தமலமச்சே²ரதாய கருணாதி³கு³ணஸமங்கி³தாய ச நிச்சகாலம் அனாதா²னம் பிண்ட³மதா³ஸி, தேன அனாத²பிண்டி³கோதி ஸங்க²ம் க³தோ. ஆரமந்தி ஏத்த² பாணினோ விஸேஸேன வா பப்³ப³ஜிதாதி ஆராமோ, தஸ்ஸ புப்ப²ப²லாதி³ஸோபா⁴ய நாதிதூ³ரனச்சாஸன்னதாதி³பஞ்சவித⁴ஸேனாஸனங்க³ஸம்பத்தியா ச ததோ ததோ ஆக³ம்ம ரமந்தி அபி⁴ரமந்தி அனுக்கண்டி²தா ஹுத்வா நிவஸந்தீதி அத்தோ². வுத்தப்பகாராய வா ஸம்பத்தியா தத்த² தத்த² க³தேபி அத்தனோ அப்³ப⁴ந்தரம்யேவ ஆனேத்வா ரமேதீதி ஆராமோ. ஸோ ஹி அனாத²பிண்டி³கேன க³ஹபதினா ஜேதஸ்ஸ ராஜகுமாரஸ்ஸ ஹத்த²தோ அட்டா²ரஸஹி ஹிரஞ்ஞகோடீஹி கோடிஸந்த²ரேன கீணித்வா அட்டா²ரஸஹி ஹிரஞ்ஞகோடீஹி ஸேனாஸனானி காராபேத்வா அட்டா²ரஸஹி ஹிரஞ்ஞகோடீஹி விஹாரமஹம் நிட்டா²பேத்வா ஏவம் சதுபஞ்ஞாஸஹிரஞ்ஞகோடிபரிச்சாகே³ன பு³த்³த⁴ப்பமுக²ஸ்ஸ ஸங்க⁴ஸ்ஸ நிய்யாதி³தோ. தஸ்மா ‘‘அனாத²பிண்டி³கஸ்ஸ ஆராமோ’’தி வுச்சதி. தஸ்மிம் அனாத²பிண்டி³கஸ்ஸ ஆராமே.

ஏத்த² ச ‘‘ஜேதவனே’’தி வசனம் புரிமஸாமிபரிகித்தனம். ‘‘அனாத²பிண்டி³கஸ்ஸ ஆராமே’’தி பச்சி²மஸாமிபரிகித்தனம். கிமேதேஸம் பரிகித்தனே பயோஜனந்தி. புஞ்ஞகாமானம் தி³ட்டா²னுக³திஆபஜ்ஜனம். தத்ர ஹி த்³வாரகோட்ட²கபாஸாத³மாபனே பூ⁴மிவிக்கயலத்³தா⁴ அட்டா²ரஸ ஹிரஞ்ஞகோடியோ அனேககோடிஅக்³க⁴னகா ருக்கா² ச ஜேதஸ்ஸ பரிச்சாகோ³, சதுபஞ்ஞாஸ கோடியோ அனாத²பிண்டி³கஸ்ஸ. இதி தேஸம் பரிகித்தனேன ஏவம் புஞ்ஞகாமா புஞ்ஞானி கரோந்தீதி த³ஸ்ஸேந்தோ ஆயஸ்மா ஆனந்தோ³ அஞ்ஞேபி புஞ்ஞகாமே தேஸம் தி³ட்டா²னுக³திஆபஜ்ஜனே நியோஜேதி.

ஸப்³பா³ஸவஸம்வரபரியாயம் வோ, பி⁴க்க²வேதி கஸ்மா இத³ம் ஸுத்தமபா⁴ஸி? தேஸம் பி⁴க்கூ²னம் உபக்கிலேஸவிஸோத⁴னம் ஆதி³ம் கத்வா ஆஸவக்க²யாய படிபத்தித³ஸ்ஸனத்த²ம். தத்த² ஸப்³பா³ஸவஸம்வரபரியாயந்தி ஸப்³பே³ஸம் ஆஸவானம் ஸம்வரகாரணம் ஸம்வரபூ⁴தம் காரணம், யேன காரணேன தே ஸம்வரிதா பித³ஹிதா ஹுத்வா அனுப்பாத³னிரோத⁴ஸங்கா²தம் க²யம் க³ச்ச²ந்தி பஹீயந்தி நப்பவத்தந்தி, தம் காரணந்தி அத்தோ². தத்த² ஆஸவந்தீதி ஆஸவா, சக்கு²தோபி…பே… மனதோபி ஸந்த³ந்தி பவத்தந்தீதி வுத்தம் ஹோதி. த⁴ம்மதோ யாவ கோ³த்ரபு⁴ம் ஓகாஸதோ யாவ ப⁴வக்³க³ம் ஸவந்தீதி வா ஆஸவா, ஏதே த⁴ம்மே ஏதஞ்ச ஓகாஸம் அந்தோ கரித்வா பவத்தந்தீதி அத்தோ². அந்தோகரணத்தோ² ஹி அயம் ஆகாரோ. சிரபாரிவாஸியட்டே²ன மதி³ராத³யோ ஆஸவா, ஆஸவா வியாதிபி ஆஸவா. லோகஸ்மிஞ்ஹி சிரபாரிவாஸிகா மதி³ராத³யோ ஆஸவாதி வுச்சந்தி. யதி³ ச சிரபாரிவாஸியட்டே²ன ஆஸவா, ஏதேயேவ ப⁴விதுமரஹந்தி. வுத்தஞ்ஹேதம் ‘‘புரிமா, பி⁴க்க²வே, கோடி ந பஞ்ஞாயதி அவிஜ்ஜாய, இதோ புப்³பே³ அவிஜ்ஜா நாஹோஸீ’’திஆதி³ (அ. நி. 10.61). ஆயதம் வா ஸம்ஸாரது³க்க²ம் ஸவந்தி பஸவந்தீதிபி ஆஸவா. புரிமானி சேத்த² நிப்³ப³சனானி யத்த² கிலேஸா ஆஸவாதி ஆக³ச்ச²ந்தி, தத்த² யுஜ்ஜந்தி, பச்சி²மம் கம்மேபி. ந கேவலஞ்ச கம்மகிலேஸாயேவ ஆஸவா, அபிச கோ² நானப்பகாரகா உப்பத்³த³வாபி. ஸுத்தேஸு ஹி ‘‘நாஹம், சுந்த³, தி³ட்ட²த⁴ம்மிகானம்யேவ ஆஸவானம் ஸம்வராய த⁴ம்மம் தே³ஸேமீ’’தி (தீ³. நி. 3.182) ஏத்த² விவாத³மூலபூ⁴தா கிலேஸா ஆஸவாதி ஆக³தா.

‘‘யேன தே³வூபபத்யஸ்ஸ, க³ந்த⁴ப்³போ³ வா விஹங்க³மோ;

யக்க²த்தம் யேன க³ச்சே²ய்யம், மனுஸ்ஸத்தஞ்ச அப்³ப³ஜே;

தே மய்ஹம் ஆஸவா கீ²ணா, வித்³த⁴ஸ்தா வினளீகதா’’தி. (அ. நி. 4.36); –

ஏத்த² தேபூ⁴மகஞ்ச கம்மம் அவஸேஸா ச அகுஸலா த⁴ம்மா. ‘‘தி³ட்ட²த⁴ம்மிகானம் ஆஸவானம் ஸம்வராய ஸம்பராயிகானம் ஆஸவானம் படிகா⁴தாயா’’தி (பாரா. 39) ஏத்த² பரூபவாத³விப்படிஸாரவத⁴ப³ந்தா⁴த³யோ சேவ அபாயது³க்க²பூ⁴தா ச நானப்பகாரா உபத்³த³வா. தே பனேதே ஆஸவா யத்த² யதா² ஆக³தா, தத்த² ததா² வேதி³தப்³பா³.

ஏதே ஹி வினயே தாவ ‘‘தி³ட்ட²த⁴ம்மிகானம் ஆஸவானம் ஸம்வராய, ஸம்பராயிகானம் ஆஸவானம் படிகா⁴தாயா’’தி த்³வேதா⁴ ஆக³தா. ஸளாயதனே ‘‘தயோமே ஆவுஸோ ஆஸவா, காமாஸவோ ப⁴வாஸவோ அவிஜ்ஜாஸவோ’’தி (அ. நி. 6.63) திதா⁴ ஆக³தா. அஞ்ஞேஸு ச ஸுத்தந்தேஸு அபி⁴த⁴ம்மே ச தேயேவ தி³ட்டா²ஸவேன ஸஹ சதுதா⁴ ஆக³தா. நிப்³பே³தி⁴கபரியாயே – ‘‘அத்தி², பி⁴க்க²வே, ஆஸவா நிரயகா³மினியா, அத்தி² ஆஸவா திரச்சா²னயோனிகா³மினியா, அத்தி² ஆஸவா பேத்திவிஸயகா³மினியா, அத்தி² ஆஸவா மனுஸ்ஸலோககா³மினியா, அத்தி² ஆஸவா தே³வலோககா³மினியா’’தி (அ. நி. 6.63) பஞ்சதா⁴ ஆக³தா. ச²க்கனிபாதே – ‘‘அத்தி², பி⁴க்க²வே, ஆஸவா ஸம்வரா பஹாதப்³பா³’’திஆதி³னா நயேன ச²தா⁴ ஆக³தா. இமஸ்மிம் பன ஸுத்தே தேயேவ த³ஸ்ஸனாபஹாதப்³பே³ஹி ஸத்³தி⁴ம் ஸத்ததா⁴ ஆக³தாதி. அயம் தாவ ஆஸவபதே³ வசனத்தோ² சேவ பபே⁴தோ³ ச.

ஸம்வரபதே³ பன ஸம்வரயதீதி ஸம்வரோ, பித³ஹதி நிவாரேதி பவத்திதும் ந தே³தீதி அத்தோ². ததா² ஹி ‘‘அனுஜானாமி, பி⁴க்க²வே, தி³வா படிஸல்லீயந்தேன த்³வாரம் ஸம்வரித்வா படிஸல்லீயிது’’ந்தி (பாரா. 77), ‘‘ஸோதானம் ஸம்வரம்ப்³ரஊமி, பஞ்ஞாயேதே பிதீ⁴யரே’’தி (ஸு. நி. 1041) ச ஆதீ³ஸு பிதா⁴னட்டே²ன ஸம்வரமாஹ. ஸ்வாயம் ஸம்வரோ பஞ்சவிதோ⁴ ஹோதி ஸீலஸம்வரோ ஸதிஞாண க²ந்தி வீரியஸம்வரோதி. தத்த² ‘‘இமினா பாதிமோக்க²ஸம்வரேன உபேதோ’’தி (விப⁴. 511) அயம் ஸீலஸம்வரோ. பாதிமோக்க²ஸீலஞ்ஹி ஏத்த² ஸம்வரோதி வுத்தம். ‘‘சக்கு²ந்த்³ரியே ஸம்வரமாபஜ்ஜதீ’’திஆதீ³ஸு (தீ³. நி. 1.213) ஸதிஸம்வரோ. ஸதி ஹேத்த² ஸம்வரோதி வுத்தா. ‘‘ஸோதானம் ஸம்வரம் ப்³ரூமி, பஞ்ஞாயேதே பிதீ⁴யரே’’தி அயம் ஞாணஸம்வரோ. ஞாணஞ்ஹேத்த² பிதீ⁴யரேதி இமினா பிதா⁴னட்டே²ன ஸம்வரோதி வுத்தம். ‘‘க²மோ ஹோதி ஸீதஸ்ஸ…பே…, உப்பன்னம் காமவிதக்கம் நாதி⁴வாஸேதீ’’திஆதி³னா (ம. நி. 1.24-26) பன நயேன இதே⁴வ க²ந்திவீரியஸம்வரா ஆக³தா. தேஸஞ்ச ‘‘ஸப்³பா³ஸவஸம்வரபரியாய’’ந்தி இமினா உத்³தே³ஸேன ஸங்க³ஹிதத்தா ஸம்வரபா⁴வோ வேதி³தப்³போ³.

அபிச பஞ்சவிதோ⁴பி அயம் ஸம்வரோ இத⁴ ஆக³தோயேவ, தத்த² க²ந்திவீரியஸம்வரா தாவ வுத்தாயேவ. ‘‘ஸோ தஞ்ச அனாஸனம் தஞ்ச அகோ³சர’’ந்தி (ம. நி. 1.25) அயம் பனேத்த² ஸீலஸம்வரோ. ‘‘படிஸங்கா² யோனிஸோ சக்கு²ந்த்³ரியஸம்வரஸம்வுதோ’’தி (ம. நி. 1.22) அயம் ஸதிஸம்வரோ. ஸப்³ப³த்த² படிஸங்கா² ஞாணஸம்வரோ. அக்³க³ஹிதக்³க³ஹணேன பன த³ஸ்ஸனம் படிஸேவனா பா⁴வனா ச ஞாணஸம்வரோ. பரியாயந்தி ஏதேன த⁴ம்மாதி பரியாயோ, உப்பத்திம் நிரோத⁴ம் வா க³ச்ச²ந்தீதி வுத்தம் ஹோதி. ஏத்தாவதா ‘‘ஸப்³பா³ஸவஸம்வரபரியாய’’ந்தி ஏத்த² யம் வத்தப்³ப³ம், தம் வுத்தம் ஹோதி.

15. இதா³னி ஜானதோ அஹந்திஆதீ³ஸு ஜானதோதி ஜானந்தஸ்ஸ. பஸ்ஸதோதி பஸ்ஸந்தஸ்ஸ. த்³வேபி பதா³னி ஏகத்தா²னி, ப்³யஞ்ஜனமேவ நானம். ஏவம் ஸந்தேபி ஜானதோதி ஞாணலக்க²ணம் உபாதா³ய புக்³க³லம் நித்³தி³ஸதி, ஜானனலக்க²ணஞ்ஹி ஞாணம். பஸ்ஸதோதி ஞாணப்பபா⁴வம் உபாதா³ய, பஸ்ஸனப்பபா⁴வஞ்ஹி ஞாணம். ஞாணஸமங்கீ³ புக்³க³லோ சக்கு²மா விய சக்கு²னா ரூபானி ஞாணேன விவடே த⁴ம்மே பஸ்ஸதி. அபிச யோனிஸோமனஸிகாரம் உப்பாதே³தும் ஜானதோ, அயோனிஸோமனஸிகாரோ யதா² ந உப்பஜ்ஜதி, ஏவம் பஸ்ஸதோதி அயமேத்த² ஸாரோ. கேசி பனாசரியா ப³ஹூ பபஞ்சே ப⁴ணந்தி, தே இமஸ்மிம் அத்தே² ந யுஜ்ஜந்தி.

ஆஸவானம் க²யந்தி ஆஸவப்பஹானம் ஆஸவானம் அச்சந்தக்க²யஸமுப்பாத³ம் கீ²ணாகாரம் நத்தி²பா⁴வந்தி அயமேவ ஹி இமஸ்மிஞ்ச ஸுத்தே, ‘‘ஆஸவானம் க²யா அனாஸவம் சேதோவிமுத்தி’’ந்திஆதீ³ஸு (ம. நி. 1.438) ச ஆஸவக்க²யத்தோ². அஞ்ஞத்த² பன மக்³க³ப²லனிப்³பா³னானிபி ஆஸவக்க²யோதி வுச்சந்தி. ததா² ஹி –

‘‘ஸேக²ஸ்ஸ ஸிக்க²மானஸ்ஸ, உஜுமக்³கா³னுஸாரினோ;

க²யஸ்மிம் பட²மம் ஞாணம், ததோ அஞ்ஞா அனந்தரா’’தி. (இதிவு. 62) –

ஆதீ³ஸு மக்³கோ³ ஆஸவக்க²யோதி வுத்தோ,

‘‘ஆஸவானம் க²யா ஸமணோ ஹோதீ’’திஆதீ³ஸு (ம. நி. 1.438) ப²லம்.

‘‘பரவஜ்ஜானுபஸ்ஸிஸ்ஸ, நிச்சம் உஜ்ஜா²னஸஞ்ஞினோ;

ஆஸவா தஸ்ஸ வட்³ட⁴ந்தி, ஆரா ஸோ ஆஸவக்க²யா’’தி. (த⁴. ப. 253) –

ஆதீ³ஸு நிப்³பா³னம் ‘‘ஆஸவக்க²யோ’’தி வுத்தம்.

நோ அஜானதோ நோ அபஸ்ஸதோதி யோ பன ந ஜானாதி ந பஸ்ஸதி, தஸ்ஸ நோ வதா³மீதி அத்தோ². ஏதேன யே அஜானதோ அபஸ்ஸதோபி ஸம்வராதீ³ஹியேவ ஸுத்³தி⁴ம் வத³ந்தி, தே படிக்கி²த்தா ஹோந்தி. புரிமேன வா பத³த்³வயேன உபாயோ வுத்தோ, இமினா அனுபாயபடிஸேதோ⁴. ஸங்கே²பேன சேத்த² ஞாணம் ஆஸவஸம்வரபரியாயோதி த³ஸ்ஸிதம் ஹோதி.

இதா³னி யம் ஜானதோ ஆஸவானம் க²யோ ஹோதி, தம் த³ஸ்ஸேதுகாமோ கிஞ்ச, பி⁴க்க²வே, ஜானதோதி புச்ச²ம் ஆரபி⁴, தத்த² ஜானனா ப³ஹுவிதா⁴. த³ப்³ப³ஜாதிகோ ஏவ ஹி கோசி பி⁴க்கு² ச²த்தம் காதும் ஜானாதி, கோசி சீவராதீ³னம் அஞ்ஞதரம், தஸ்ஸ ஈதி³ஸானி கம்மானி வத்தஸீஸே ட²த்வா கரோந்தஸ்ஸ ஸா ஜானனா மக்³க³ப²லானம் பத³ட்டா²னம் ந ஹோதீதி ந வத்தப்³பா³. யோ பன ஸாஸனே பப்³ப³ஜித்வா வேஜ்ஜகம்மாதீ³னி காதும் ஜானாதி, தஸ்ஸேவம் ஜானதோ ஆஸவா வட்³ட⁴ந்தியேவ, தஸ்மா யம் ஜானதோ பஸ்ஸதோ ச ஆஸவானம் க²யோ ஹோதி, ததே³வ த³ஸ்ஸேந்தோ ஆஹ யோனிஸோ ச மனஸிகாரம் அயோனிஸோ ச மனஸிகாரந்தி.

தத்த² யோனிஸோ மனஸிகாரோ நாம உபாயமனஸிகாரோ பத²மனஸிகாரோ, அனிச்சாதீ³ஸு அனிச்சந்தி ஆதி³னா ஏவ நயேன ஸச்சானுலோமிகேன வா சித்தஸ்ஸ ஆவட்டனா அன்வாவட்டனா ஆபோ⁴கோ³ ஸமன்னாஹாரோ மனஸிகாரோ, அயம் வுச்சதி யோனிஸோ மனஸிகாரோதி.

அயோனிஸோ மனஸிகாரோதி அனுபாயமனஸிகாரோ உப்பத²மனஸிகாரோ. அனிச்சே நிச்சந்தி து³க்கே² ஸுக²ந்தி அனத்தனி அத்தாதி அஸுபே⁴ ஸுப⁴ந்தி அயோனிஸோ மனஸிகாரோ உப்பத²மனஸிகாரோ. ஸச்சப்படிகுலேன வா சித்தஸ்ஸ ஆவட்டனா அன்வாவட்டனா ஆபோ⁴கோ³ ஸமன்னாஹாரோ மனஸிகாரோ, அயம் வுச்சதி அயோனிஸோ மனஸிகாரோதி. ஏவம் யோனிஸோ மனஸிகாரம் உப்பாதே³தும் ஜானதோ, அயோனிஸோ மனஸிகாரோ ச யதா² ந உப்பஜ்ஜதி, ஏவம் பஸ்ஸதோ ஆஸவானம் க²யோ ஹோதி.

இதா³னி இமஸ்ஸேவத்த²ஸ்ஸ யுத்திம் த³ஸ்ஸேந்தோ ஆஹ அயோனிஸோ, பி⁴க்க²வே…பே… பஹீயந்தீதி. தேன கிம் வுத்தம் ஹோதி, யஸ்மா அயோனிஸோ மனஸிகரோதோ ஆஸவா உப்பஜ்ஜந்தி, யோனிஸோ மனஸிகரோதோ பஹீயந்தி, தஸ்மா ஜானிதப்³ப³ம் யோனிஸோ மனஸிகாரம் உப்பாதே³தும் ஜானதோ, அயோனிஸோ மனஸிகாரோ ச யதா² ந உப்பஜ்ஜதி, ஏவம் பஸ்ஸதோ ஆஸவானம் க²யோ ஹோதீதி, அயம் தாவேத்த² ஸங்கே²பவண்ணனா.

அயம் பன வித்தா²ரோ – தத்த² ‘‘யோனிஸோ அயோனிஸோ’’தி இமேஹி தாவ த்³வீஹி பதே³ஹி ஆப³த்³த⁴ம் ஹோதி உபரி ஸகலஸுத்தம். வட்டவிவட்டவஸேன ஹி உபரி ஸகலஸுத்தம் வுத்தம். அயோனிஸோ மனஸிகாரமூலகஞ்ச வட்டம், யோனிஸோ மனஸிகாரமூலகஞ்ச விவட்டம். கத²ம்? அயோனிஸோ மனஸிகாரோ ஹி வட்³ட⁴மானோ த்³வே த⁴ம்மே பரிபூரேதி அவிஜ்ஜஞ்ச ப⁴வதண்ஹஞ்ச. அவிஜ்ஜாய ச ஸதி ‘‘அவிஜ்ஜாபச்சயா ஸங்கா²ரா…பே… து³க்க²க்க²ந்த⁴ஸ்ஸ ஸமுத³யோ ஹோதி. தண்ஹாய ஸதி தண்ஹாபச்சயா உபாதா³னம்…பே… ஸமுத³யோ ஹோதீ’’தி. ஏவம் அயம் அயோனிஸோ மனஸிகாரப³ஹுலோ புக்³க³லோ வாதவேகா³பி⁴கா⁴தேன விப்பனட்ட²னாவா விய க³ங்கா³வட்டே பதிதகோ³குலம் விய சக்கயந்தே யுத்தப³லிப³த்³தோ³ விய ச புனப்புனம் ப⁴வயோனிக³திவிஞ்ஞாணட்டி²திஸத்தாவாஸேஸு ஆவட்டபரிவட்டம் கரோதி, ஏவம் தாவ அயோனிஸோ மனஸிகாரமூலகம் வட்டம்.

யோனிஸோ மனஸிகாரோ பன வட்³ட⁴மானோ – ‘‘யோனிஸோ மனஸிகாரஸம்பன்னஸ்ஸேதம், பி⁴க்க²வே, பி⁴க்கு²னோ பாடிகங்க²ம், அரியம் அட்ட²ங்கி³கம் மக்³க³ம் பா⁴வேஸ்ஸதி, அரியம் அட்ட²ங்கி³கம் மக்³க³ம் ப³ஹுலீகரிஸ்ஸதீ’’தி (ஸம். நி. 5.55) வசனதோ ஸம்மாதி³ட்டி²பமுக²ம் அட்ட²ங்கி³கம் மக்³க³ம் பரிபூரேதி. யா ச ஸம்மாதி³ட்டி², ஸா விஜ்ஜாதி தஸ்ஸ விஜ்ஜுப்பாதா³ அவிஜ்ஜானிரோதோ⁴, ‘‘அவிஜ்ஜானிரோதா⁴ ஸங்கா²ரனிரோதோ⁴…பே… ஏவம் ஏதஸ்ஸ கேவலஸ்ஸ து³க்க²க்க²ந்த⁴ஸ்ஸ நிரோதோ⁴ ஹோதீ’’தி (மஹாவ. 1) ஏவம் யோனிஸோ மனஸிகாரமூலகம் விவட்டம் வேதி³தப்³ப³ம். ஏவம் இமேஹி த்³வீஹி பதே³ஹி ஆப³த்³த⁴ம் ஹோதி உபரி ஸகலஸுத்தம்.

ஏவம் ஆப³த்³தே⁴ சேத்த² யஸ்மா புப்³பே³ ஆஸவப்பஹானம் த³ஸ்ஸேத்வா பச்சா² உப்பத்தி வுச்சமானா ந யுஜ்ஜதி. ந ஹி பஹீனா புன உப்பஜ்ஜந்தி. உப்பன்னானம் பன பஹானம் யுஜ்ஜதி, தஸ்மா உத்³தே³ஸபடிலோமதோபி ‘‘அயோனிஸோ, பி⁴க்க²வே, மனஸிகரோதோ’’திஆதி³மாஹ.

தத்த² அயோனிஸோ மனஸிகரோதோதி வுத்தப்பகாரம் அயோனிஸோ மனஸிகாரம் உப்பாத³யதோ. அனுப்பன்னா சேவ ஆஸவா உப்பஜ்ஜந்தீதி ஏத்த² யே புப்³பே³ அப்படிலத்³த⁴புப்³ப³ம் சீவராதி³ம் வா பச்சயம் உபட்டா²கஸத்³தி⁴விஹாரிகஅந்தேவாஸிகானம் வா அஞ்ஞதரம் மனுஞ்ஞம் வத்து²ம் படிலபி⁴த்வா, தம் ஸுப⁴ம் ஸுக²ந்தி அயோனிஸோ மனஸிகரோதோ, அஞ்ஞதரஞ்ஞதரம் வா பன அனனுபூ⁴தபுப்³ப³ம் ஆரம்மணம் யதா² வா ததா² வா அயோனிஸோ மனஸிகரோதோ ஆஸவா உப்பஜ்ஜந்தி, தே அனுப்பன்னா உப்பஜ்ஜந்தீதி வேதி³தப்³பா³, அஞ்ஞதா² ஹி அனமதக்³கே³ ஸம்ஸாரே அனுப்பன்னா நாம ஆஸவா ந ஸந்தி. அனுபூ⁴தபுப்³பே³பி ச வத்து²ம்ஹி ஆரம்மணே வா யஸ்ஸ பகதிஸுத்³தி⁴யா வா உத்³தே³ஸபரிபுச்சா²பரியத்தினவகம்மயோனிஸோமனஸிகாரானம் வா அஞ்ஞதரவஸேன புப்³பே³ அனுப்பஜ்ஜித்வா பச்சா² தாதி³ஸேன பச்சயேன ஸஹஸா உப்பஜ்ஜந்தி, இமேபி அனுப்பன்னா உப்பஜ்ஜந்தீதி வேதி³தப்³பா³. தேஸுயேவ பன வத்தா²ரம்மணேஸு புனப்புனம் உப்பஜ்ஜமானா உப்பன்னா பவட்³ட⁴ந்தீதி வுச்சந்தி. இதோ அஞ்ஞதா² ஹி பட²முப்பன்னானம் வட்³டி⁴ நாம நத்தி².

யோனிஸோ ச கோ², பி⁴க்க²வேதி ஏத்த² பன யஸ்ஸ பகதிஸுத்³தி⁴யா வா ஸேய்யதா²பி ஆயஸ்மதோ மஹாகஸ்ஸபஸ்ஸ ப⁴த்³தா³ய ச காபிலானியா, உத்³தே³ஸபரிபுச்சா²தீ³ஹி வா காரணேஹி ஆஸவா நுப்பஜ்ஜந்தி, ஸோ ச ஜானாதி ‘‘ந கோ² மே ஆஸவா மக்³கே³ன ஸமுக்³கா⁴தம் க³தா, ஹந்த³ நேஸம் ஸமுக்³கா⁴தாய படிபஜ்ஜாமீ’’தி. ததோ மக்³க³பா⁴வனாய ஸப்³பே³ ஸமுக்³கா⁴தேதி. தஸ்ஸ தே ஆஸவா அனுப்பன்னா ந உப்பஜ்ஜந்தீதி வுச்சந்தி. யஸ்ஸ பன காரகஸ்ஸேவ ஸதோ ஸதிஸம்மோஸேன ஸஹஸா ஆஸவா உப்பஜ்ஜந்தி, ததோ ஸம்வேக³மாபஜ்ஜித்வா யோனிஸோ பத³ஹந்தோ தே ஆஸவே ஸமுச்சி²ந்த³தி, தஸ்ஸ உப்பன்னா பஹீயந்தீதி வுச்சந்தி மண்ட³லாராமவாஸீமஹாதிஸ்ஸபூ⁴தத்தே²ரஸ்ஸ விய. ஸோ கிர தஸ்மிம்யேவ விஹாரே உத்³தே³ஸம் க³ண்ஹாதி, அத²ஸ்ஸ கா³மே பிண்டா³ய சரதோ விஸபா⁴கா³ரம்மணே கிலேஸோ உப்பஜ்ஜி, ஸோ தம் விபஸ்ஸனாய விக்க²ம்பே⁴த்வா விஹாரம் அக³மாஸி. தஸ்ஸ ஸுபினந்தேபி தம் ஆரம்மணம் ந உபட்டா²ஸி. ஸோ ‘‘அயம் கிலேஸோ வட்³டி⁴த்வா அபாயஸம்வத்தனிகோ ஹோதீ’’தி ஸம்வேக³ம் ஜனேத்வா ஆசரியம் ஆபுச்சி²த்வா விஹாரா நிக்க²ம்ம மஹாஸங்க⁴ரக்கி²தத்தே²ரஸ்ஸ ஸந்திகே ராக³படிபக்க²ம் அஸுப⁴கம்மட்டா²னம் க³ஹேத்வா கு³ம்ப³ந்தரம் பவிஸித்வா பம்ஸுகூலசீவரம் ஸந்த²ரித்வா நிஸஜ்ஜ அனாகா³மிமக்³கே³ன பஞ்சகாமகு³ணிகராக³ம் சி²ந்தி³த்வா உட்டா²ய ஆசரியம் வந்தி³த்வா புனதி³வஸே உத்³தே³ஸமக்³க³ம் பாபுணி. யே பன வத்தமானுப்பன்னா, தேஸம் படிபத்தியா பஹானம் நாம நத்தி².

16. இதா³னி ‘‘உப்பன்னா ச ஆஸவா பஹீயந்தீ’’தி இத³மேவ பத³ம் க³ஹேத்வா யே தே ஆஸவா பஹீயந்தி, தேஸம் நானப்பகாரதோ அஞ்ஞம்பி பஹானகாரணம் ஆவிகாதும் தே³ஸனம் வித்தா²ரேந்தோ அத்தி², பி⁴க்க²வே, ஆஸவா த³ஸ்ஸனா பஹாதப்³பா³திஆதி³மாஹ யதா² தம் தே³ஸனாபபே⁴த³குஸலோ த⁴ம்மராஜா. தத்த² த³ஸ்ஸனா பஹாதப்³பா³தி த³ஸ்ஸனேன பஹாதப்³பா³. ஏஸ நயோ ஸப்³ப³த்த².

த³ஸ்ஸனாபஹாதப்³ப³ஆஸவவண்ணனா

17. இதா³னி தானி பதா³னி அனுபுப்³ப³தோ ப்³யாகாதுகாமோ ‘‘கதமே ச, பி⁴க்க²வே, ஆஸவா த³ஸ்ஸனா பஹாதப்³பா³’’தி புச்ச²ம் கத்வா மூலபரியாயவண்ணனாயம் வுத்தனயேனேவ ‘‘இத⁴, பி⁴க்க²வே, அஸ்ஸுதவா புது²ஜ்ஜனோ’’தி புக்³க³லாதி⁴ட்டா²னம் தே³ஸனம் ஆரபி⁴. தத்த² மனஸிகரணீயே த⁴ம்மே நப்பஜானாதீதி ஆவஜ்ஜிதப்³பே³ ஸமன்னாஹரிதப்³பே³ த⁴ம்மே ந பஜானாதி. அமனஸிகரணீயேதி தப்³பி³பரீதே. ஏஸ நயோ ஸேஸபதே³ஸுபி. யஸ்மா பன இமே த⁴ம்மா மனஸிகரணீயா, இமே அமனஸிகரணீயாதி த⁴ம்மதோ நியமோ நத்தி², ஆகாரதோ பன அத்தி². யேனா ஆகாரேன மனஸிகரியமானா அகுஸலுப்பத்திபத³ட்டா²னா ஹோந்தி, தேனாகாரேன ந மனஸிகாதப்³பா³. யேன குஸலுப்பத்திபத³ட்டா²னா ஹோந்தி, தேனாகாரேன மனஸிகாதப்³பா³. தஸ்மா ‘‘ய’ஸ்ஸ, பி⁴க்க²வே, த⁴ம்மே மனஸிகரோதோ அனுப்பன்னோ வா காமாஸவோ’’திஆதி³மாஹ.

தத்த² ய’ஸ்ஸாதி யே அஸ்ஸ அஸ்ஸுதவதோ புது²ஜ்ஜனஸ்ஸ. மனஸிகரோதோதி ஆவஜ்ஜயதோ ஸமன்னாஹரந்தஸ்ஸ. அனுப்பன்னோ வா காமாஸவோதி ஏத்த² ஸமுச்சயத்தோ² வாஸத்³தோ³, ந விகப்பத்தோ². தஸ்மா யதா² ‘‘யாவதா, பி⁴க்க²வே, ஸத்தா அபதா³ வா த்³விபதா³ வா…பே… ததா²க³தோ தேஸம் அக்³க³மக்கா²யதீ’’தி (இதிவு. 90) வுத்தே அபதா³ ச த்³விபதா³ சாதி அத்தோ², யதா² ச ‘‘பூ⁴தானம் வா ஸத்தானம் டி²தியா ஸம்ப⁴வேஸீனம் வா அனுக்³க³ஹாயா’’தி (ம. நி. 1.402) வுத்தே பூ⁴தானஞ்ச ஸம்ப⁴வேஸீனஞ்சாதி அத்தோ², யதா² ச ‘‘அக்³கி³தோ வா உத³கதோ வா மிது²பே⁴த³தோ வா’’தி (உதா³. 76) வுத்தே அக்³கி³தோ ச உத³கதோ ச மிது²பே⁴த³தோ சாதி அத்தோ², ஏவமிதா⁴பி அனுப்பன்னோ ச காமாஸவோ உப்பஜ்ஜதி, உப்பன்னோ ச காமாஸவோ பவட்³ட⁴தீதி அத்தோ² த³ட்ட²ப்³போ³. ஏவம் ஸேஸேஸு.

ஏத்த² ச காமாஸவோதி பஞ்சகாமகு³ணிகோ ராகோ³. ப⁴வாஸவோதி ருபாரூபப⁴வே ச²ந்த³ராகோ³, ஜா²னனிகந்தி ச ஸஸ்ஸதுச்சே²த³தி³ட்டி²ஸஹக³தா. ஏவம் தி³ட்டா²ஸவோபி ப⁴வாஸவே ஏவ ஸமோதா⁴னம் க³ச்ச²தி. அவிஜ்ஜாஸவோதி சதூஸு ஸச்சேஸு அஞ்ஞாணம். தத்த² காமகு³ணே அஸ்ஸாத³தோ மனஸிகரோதோ அனுப்பன்னோ ச காமாஸவோ உப்பஜ்ஜதி, உப்பன்னோ ச பவட்³ட⁴தி. மஹக்³க³தத⁴ம்மே அஸ்ஸாத³தோ மனஸிகரோதோ அனுப்பன்னோ ச ப⁴வாஸவோ உப்பஜ்ஜதி, உப்பன்னோ ச பவட்³ட⁴தி. தீஸு பூ⁴மீஸு த⁴ம்மே சதுவிபல்லாஸபத³ட்டா²னபா⁴வேன மனஸிகரோதோ அனுப்பன்னோ ச அவிஜ்ஜாஸவோ உப்பஜ்ஜதி, உப்பன்னோ ச பவட்³ட⁴தீதி வேதி³தப்³போ³. வுத்தனயபச்சனீகதோ ஸுக்கபக்கோ² வித்தா²ரேதப்³போ³.

கஸ்மா பன தயோ ஏவ ஆஸவா இத⁴ வுத்தாதி. விமோக்க²படிபக்க²தோ. அப்பணிஹிதவிமோக்க²படிபக்கோ² ஹி காமாஸவோ,. அனிமித்தஸுஞ்ஞதவிமோக்க²படிபக்கா² இதரே. தஸ்மா இமே தயோ ஆஸவே உப்பாதே³ந்தா திண்ணம் விமோக்கா²னம் அபா⁴கி³னோ ஹோந்தி, அனுப்பாதே³ந்தா பா⁴கி³னோதி ஏதமத்த²ம் த³ஸ்ஸேந்தேன தயோ ஏவ வுத்தாதி வேதி³தப்³பா³. தி³ட்டா²ஸவோபி வா ஏத்த² வுத்தோ யேவாதி வண்ணிதமேதம்.

தஸ்ஸ அமனஸிகரணீயானம் த⁴ம்மானம் மனஸிகாராதி மனஸிகாரஹேது, யஸ்மா தே த⁴ம்மே மனஸி கரோதி, தஸ்மாதி வுத்தம் ஹோதி. ஏஸ நயோ து³தியபதே³பி. ‘‘அனுப்பன்னா சேவ ஆஸவா உப்பஜ்ஜந்தி, உப்பன்னா ச ஆஸவா பவட்³ட⁴ந்தீ’’தி ஹேட்டா² வுத்தஆஸவானம்யேவ அபே⁴த³தோ நிக³மனமேதம்.

18. ஏத்தாவதா யோ அயம் புக்³க³லாதி⁴ட்டா²னாய தே³ஸனாய த³ஸ்ஸனா பஹாதப்³பே³ ஆஸவே நித்³தி³ஸிதும் அஸ்ஸுதவா புது²ஜ்ஜனோ வுத்தோ, ஸோ யஸ்மா ‘‘அயோனிஸோ, பி⁴க்க²வே, மனஸிகரோதோ அனுப்பன்னா சேவ ஆஸவா உப்பஜ்ஜந்தீ’’தி ஏவம் ஸாமஞ்ஞதோ வுத்தானம் அயோனிஸோ மனஸிகாரபச்சயானம் காமாஸவாதீ³னம்பி அதி⁴ட்டா²னம், தஸ்மா தேபி ஆஸவே தேனேவ புக்³க³லேன த³ஸ்ஸேத்வா இதா³னி த³ஸ்ஸனா பஹாதப்³பே³ ஆஸவே த³ஸ்ஸேந்தோ ஸோ ஏவம் அயோனிஸோ மனஸி கரோதி, அஹோஸிம் நு கோ² அஹந்திஆதி³மாஹ. விசிகிச்சா²ஸீஸேன சேத்த² தி³ட்டா²ஸவம்பி த³ஸ்ஸேதும் இமம் தே³ஸனம் ஆரபி⁴.

தஸ்ஸத்தோ², யஸ்ஸ தே இமினா வுத்தனயேன ஆஸவா உப்பஜ்ஜந்தி, ஸோ புது²ஜ்ஜனோ, யோ சாயம் ‘‘அஸ்ஸுதவா’’திஆதி³னா நயேன வுத்தோ, ஸோ புது²ஜ்ஜனோ ஏவம் அயோனிஸோ அனுபாயேன உப்பதே²ன மனஸி கரோதி. கத²ம்? அஹோஸிம் நு கோ²…பே…ஸோ குஹிம் கா³மீ ப⁴விஸ்ஸதீதி. கிம் வுத்தம் ஹோதி, ஸோ ஏவம் அயோனிஸோ மனஸி கரோதி, யதா²ஸ்ஸ ‘‘அஹம் அஹோஸிம் நு கோ²’’திஆதி³னா நயேன வுத்தா ஸோளஸவிதா⁴பி விசிகிச்சா² உப்பஜ்ஜதீதி.

தத்த² அஹோஸிம் நு கோ² நனு கோ²தி ஸஸ்ஸதாகாரஞ்ச அதி⁴ச்சஸமுப்பத்திஆகாரஞ்ச நிஸ்ஸாய அதீதே அத்தனோ விஜ்ஜமானதம் அவிஜ்ஜமானதஞ்ச கங்க²தி. கிம் காரணந்தி ந வத்தப்³ப³ம். உம்மத்தகோ விய ஹி பா³லபுது²ஜ்ஜனோ யதா² வா ததா² வா பவத்ததி. அபிச அயோனிஸோ மனஸிகாரோயேவேத்த² காரணம். ஏவம் அயோனிஸோ மனஸிகாரஸ்ஸ பன கிம் காரணந்தி. ஸ்வேவ புது²ஜ்ஜனபா⁴வோ அரியானம் அத³ஸ்ஸனாதீ³னி வா. நனு ச புது²ஜ்ஜனோபி யோனிஸோ மனஸி கரோதீதி. கோ வா ஏவமாஹ ந மனஸி கரோதீதி. ந பன தத்த² புது²ஜ்ஜனபா⁴வோ காரணம், ஸத்³த⁴ம்மஸ்ஸவனகல்யாணமித்தாதீ³னி தத்த² காரணானி. ந ஹி மச்ச²மம்ஸாதீ³னி அத்தனோ அத்தனோ பகதியா ஸுக³ந்தா⁴னி, அபி⁴ஸங்கா²ரபச்சயா பன ஸுக³ந்தா⁴னிபி ஹோந்தி.

கிம் நு கோ² அஹோஸிந்தி ஜாதிலிங்கூ³பபத்தியோ நிஸ்ஸாய க²த்தியோ நு கோ² அஹோஸிம், ப்³ராஹ்மணவேஸ்ஸஸுத்³த³க³ஹட்ட²பப்³ப³ஜிததே³வமனுஸ்ஸானம் அஞ்ஞதரோதி கங்க²தி.

கத²ம் நு கோ²தி ஸண்டா²னாகாரம் நிஸ்ஸாய தீ³கோ⁴ நு கோ² அஹோஸிம், ரஸ்ஸஓதா³தகண்ஹப்பமாணிகஅப்பமாணிகாதீ³னம் அஞ்ஞதரோதி கங்க²தி. கேசி பன இஸ்ஸரனிம்மானாதி³ம் நிஸ்ஸாய கேன நு கோ² காரணேன அஹோஸிந்தி ஹேதுதோ கங்க²தீதி வத³ந்தி.

கிம் ஹுத்வா கிம் அஹோஸிந்தி ஜாதிஆதீ³னி நிஸ்ஸாய க²த்தியோ ஹுத்வா நு கோ² ப்³ராஹ்மணோ அஹோஸிம்…பே… தே³வோ ஹுத்வா மனுஸ்ஸோதி அத்தனோ பரம்பரம் கங்க²தி. ஸப்³ப³த்தே²வ பன அத்³தா⁴னந்தி காலாதி⁴வசனமேதம்.

ப⁴விஸ்ஸாமி நு கோ² நனு கோ²தி ஸஸ்ஸதாகாரஞ்ச உச்சே²தா³காரஞ்ச நிஸ்ஸாய அனாக³தே அத்தனோ விஜ்ஜமானதம் அவிஜ்ஜமானதஞ்ச கங்க²தி. ஸேஸமேத்த² வுத்தனயமேவ.

ஏதரஹி வா பச்சுப்பன்னமத்³தா⁴னந்தி இதா³னி வா படிஸந்தி⁴ம் ஆதி³ம் கத்வா சுதிபரியந்தம் ஸப்³ப³ம்பி வத்தமானகாலம் க³ஹேத்வா. அஜ்ஜ²த்தம் கத²ம்கதீ² ஹோதீதி அத்தனோ க²ந்தே⁴ஸு விசிகிச்சோ² ஹோதி. அஹம் நு கோ²ஸ்மீதி அத்தனோ அத்தி²பா⁴வம் கங்க²தி. யுத்தம் பனேதந்தி? யுத்தம் அயுத்தந்தி கா ஏத்த² சிந்தா. அபிசேத்த² இத³ம் வத்து²ம்பி உதா³ஹரந்தி. சூளமாதாய கிர புத்தோ முண்டோ³, மஹாமாதாய புத்தோ அமுண்டோ³, தம் புத்தம் முண்டே³ஸும். ஸோ உட்டா²ய அஹம் நு கோ² சூளமாதாய புத்தோதி சிந்தேஸி. ஏவம் அஹம் நு கோ²ஸ்மீதி கங்கா² ஹோதி.

நோ நு கோ²ஸ்மீதி அத்தனோ நத்தி²பா⁴வம் கங்க²தி. தத்ராபி இத³ம் வத்து² – ஏகோ கிர மச்சே² க³ண்ஹந்தோ உத³கே சிரட்டா²னேன ஸீதிபூ⁴தம் அத்தனோ ஊரும் மச்சோ²தி சிந்தேத்வா பஹரி. அபரோ ஸுஸானபஸ்ஸே கே²த்தம் ரக்க²ந்தோ பீ⁴தோ ஸங்குடிதோ ஸயி. ஸோ படிபு³ஜ்ஜி²த்வா அத்தனோ ஜண்ணுகானி த்³வே யக்கா²தி சிந்தேத்வா பஹரி. ஏவம் நோ நு கோ²ஸ்மீதி கங்க²தி.

கிம் நு கோ²ஸ்மீதி க²த்தியோவ ஸமானோ அத்தனோ க²த்தியபா⁴வம் கங்க²தி. ஏஸ நயோ ஸேஸேஸு. தே³வோ பன ஸமானோ தே³வபா⁴வம் அஜானந்தோ நாம நத்தி². ஸோபி பன ‘‘அஹம் ரூபீ நு கோ² அரூபீ நு கோ²’’திஆதி³னா நயேன கங்க²தி. க²த்தியாத³யோ கஸ்மா ந ஜானந்தீதி சே. அபச்சக்கா² தேஸம் தத்த² தத்த² குலே உப்பத்தி. க³ஹட்டா²பி ச போத்த²லிகாத³யோ பப்³ப³ஜிதஸஞ்ஞினோ. பப்³ப³ஜிதாபி ‘‘குப்பம் நு கோ² மே கம்ம’’ந்திஆதி³னா நயேன க³ஹட்ட²ஸஞ்ஞினோ. மனுஸ்ஸாபி ச ராஜானோ விய அத்தனி தே³வஸஞ்ஞினோ ஹோந்தி.

கத²ம் நு கோ²ஸ்மீதி வுத்தனயமேவ. கேவலஞ்சேத்த² அப்³ப⁴ந்தரே ஜீவோ நாம அத்தீ²தி க³ஹேத்வா தஸ்ஸ ஸண்டா²னாகாரம் நிஸ்ஸாய தீ³கோ⁴ நு கோ²ஸ்மி, ரஸ்ஸசதுரம்ஸச²ளம்ஸஅட்ட²ம்ஸஸோளஸம்ஸாதீ³னம் அஞ்ஞதரப்பகாரோதி கங்க²ந்தோ கத²ம் நு கோ²ஸ்மீதி கங்க²தீதி வேதி³தப்³போ³. ஸரீரஸண்டா²னம் பன பச்சுப்பன்னம் அஜானந்தோ நாம நத்தி².

குதோ ஆக³தோ, ஸோ குஹிம் கா³மீ ப⁴விஸ்ஸதீதி அத்தபா⁴வஸ்ஸ ஆக³திக³திட்டா²னம் கங்க²தி.

19. ஏவம் ஸோளஸப்பபே⁴த³ம் விசிகிச்ச²ம் த³ஸ்ஸேத்வா இதா³னி யம் இமினா விசிகிச்சா²ஸீஸேன தி³ட்டா²ஸவம் த³ஸ்ஸேதும் அயம் தே³ஸனா ஆரத்³தா⁴. தம் த³ஸ்ஸேந்தோ தஸ்ஸ ஏவம் அயோனிஸோ மனஸிகரோதோ ச²ன்னம் தி³ட்டீ²னந்திஆதி³மாஹ. தத்த² தஸ்ஸ புக்³க³லஸ்ஸ யதா² அயம் விசிகிச்சா² உப்பஜ்ஜதி, ஏவம் அயோனிஸோ மனஸிகரோதோ தஸ்ஸேவ ஸவிசிகிச்ச²ஸ்ஸ அயோனிஸோ மனஸிகாரஸ்ஸ தா²மக³தத்தா ச²ன்னம் தி³ட்டீ²னம் அஞ்ஞதரா தி³ட்டி² உப்பஜ்ஜதீதி வுத்தம் ஹோதி. தத்த² ஸப்³ப³பதே³ஸு வாஸத்³தோ³ விகப்பத்தோ², ஏவம் வா ஏவம் வா தி³ட்டி² உப்பஜ்ஜதீதி வுத்தம் ஹோதி. அத்தி² மே அத்தாதி சேத்த² ஸஸ்ஸததி³ட்டி² ஸப்³ப³காலேஸு அத்தனோ அத்தி²தம் க³ண்ஹாதி. ஸச்சதோ தே²ததோதி பூ⁴ததோ ச தி²ரதோ ச, ‘‘இத³ம் ஸச்ச’’ந்தி பூ⁴ததோ ஸுட்டு² த³ள்ஹபா⁴வேனாதி வுத்தம் ஹோதி. நத்தி² மே அத்தாதி அயம் பன உச்சே²த³தி³ட்டி², ஸதோ ஸத்தஸ்ஸ தத்த² தத்த² விப⁴வக்³க³ஹணதோ. அத² வா புரிமாபி தீஸு காலேஸு அத்தீ²தி க³ஹணதோ ஸஸ்ஸததி³ட்டி², பச்சுப்பன்னமேவ அத்தீ²தி க³ண்ஹந்தோ உச்சே²த³தி³ட்டி². பச்சி²மாபி அதீதானாக³தேஸு நத்தீ²தி க³ஹணதோ ப⁴ஸ்மந்தாஹுதியோதி க³ஹிததி³ட்டி²கானம் விய, உச்சே²த³தி³ட்டி². அதீதே ஏவ நத்தீ²தி க³ண்ஹந்தோ அதி⁴ச்சஸமுப்பத்திகஸ்ஸேவ ஸஸ்ஸததி³ட்டி².

அத்தனாவ அத்தானம் ஸஞ்ஜானாமீதி ஸஞ்ஞாக்க²ந்த⁴ஸீஸேன க²ந்தே⁴ அத்தாதி க³ஹேத்வா ஸஞ்ஞாய அவஸேஸக்க²ந்தே⁴ ஸஞ்ஜானதோ இமினா அத்தனா இமம் அத்தானம் ஸஞ்ஜானாமீதி ஹோதி. அத்தனாவ அனத்தானந்தி ஸஞ்ஞாக்க²ந்த⁴ம்யேவ அத்தாதி க³ஹேத்வா, இதரே சத்தாரோபி அனத்தாதி க³ஹேத்வா ஸஞ்ஞாய தேஸம் ஜானதோ ஏவம் ஹோதி. அனத்தனாவ அத்தானந்தி ஸஞ்ஞாக்க²ந்த⁴ம் அனத்தாதி. இதரே சத்தாரோ அத்தாதி க³ஹேத்வா ஸஞ்ஞாய தேஸம் ஜானதோ ஏவம் ஹோதி, ஸப்³பா³பி ஸஸ்ஸதுச்சே²த³தி³ட்டி²யோவ.

வதோ³ வேதே³ய்யோதிஆத³யோ பன ஸஸ்ஸததி³ட்டி²யா ஏவ அபி⁴னிவேஸாகாரா. தத்த² வத³தீதி வதோ³, வசீகம்மஸ்ஸ காரகோதி வுத்தம் ஹோதி. வேத³யதீதி வேதே³ய்யோ, ஜானாதி அனுப⁴வதி சாதி வுத்தம் ஹோதி. கிம் வேதே³தீதி, தத்ர தத்ர கல்யாணபாபகானம் கம்மானம் விபாகம் படிஸம்வேதே³தி. தத்ர தத்ராதி தேஸு தேஸு யோனிக³திட்டி²தினிவாஸனிகாயேஸு ஆரம்மணேஸு வா. நிச்சோதி உப்பாத³வயரஹிதோ. து⁴வோதி தி²ரோ ஸாரபூ⁴தோ. ஸஸ்ஸதோதி ஸப்³ப³காலிகோ. அவிபரிணாமத⁴ம்மோதி அத்தனோ பகதிபா⁴வம் அவிஜஹனத⁴ம்மோ, ககண்டகோ விய நானப்பகாரதம் நாபஜ்ஜதி. ஸஸ்ஸதிஸமந்தி சந்த³ஸூரியஸமுத்³த³மஹாபத²வீபப்³ப³தா லோகவோஹாரேன ஸஸ்ஸதியோதி வுச்சந்தி. ஸஸ்ஸதீஹி ஸமம் ஸஸ்ஸதிஸமம். யாவ ஸஸ்ஸதியோ திட்ட²ந்தி, தாவ ததே²வ ட²ஸ்ஸதீதி க³ண்ஹதோ ஏவம்தி³ட்டி² ஹோதி.

இத³ம் வுச்சதி, பி⁴க்க²வே, தி³ட்டி²க³தந்திஆதீ³ஸு. இத³ந்தி இதா³னி வத்தப்³ப³ஸ்ஸ பச்சக்க²னித³ஸ்ஸனம். தி³ட்டி²க³தஸம்ப³ந்தே⁴ன ச இத³ந்தி வுத்தம், ந தி³ட்டி²ஸம்ப³ந்தே⁴ன. ஏத்த² ச தி³ட்டி²யேவ தி³ட்டி²க³தம், கூ³த²க³தம் விய. தி³ட்டீ²ஸு வா க³தமித³ம் த³ஸ்ஸனம் த்³வாஸட்டி²தி³ட்டி²அந்தோக³த⁴த்தாதிபி தி³ட்டி²க³தம். தி³ட்டி²யா வா க³தம் தி³ட்டி²க³தம். இத³ஞ்ஹி அத்தி² மே அத்தாதிஆதி³ தி³ட்டி²யா க³மனமத்தமேவ, நத்தே²த்த² அத்தா வா நிச்சோ வா கோசீதி வுத்தம் ஹோதி. ஸா சாயம் தி³ட்டி² து³ன்னிக்³க³மனட்டே²ன க³ஹனம். து³ரதிக்கமட்டே²ன ஸப்படிப⁴யட்டே²ன ச கந்தாரோ, து³ப்³பி⁴க்க²கந்தாரவாளகந்தாராத³யோ விய. ஸம்மாதி³ட்டி²யா வினிவிஜ்ஜ²னட்டே²ன விலோமனட்டே²ன வா விஸூகம். கதா³சி ஸஸ்ஸதஸ்ஸ, கதா³சி உச்சே²த³ஸ்ஸ க³ஹணதோ விரூபம் ப²ந்தி³தந்தி விப்ப²ந்தி³தம். ப³ந்த⁴னட்டே²ன ஸம்யோஜனம். தேனாஹ ‘‘தி³ட்டி²க³ஹனம்…பே… தி³ட்டி²ஸம்யோஜன’’ந்தி. இதா³னிஸ்ஸ தமேவ ப³ந்த⁴னத்த²ம் த³ஸ்ஸேந்தோ தி³ட்டி²ஸம்யோஜனஸம்யுத்தோதிஆதி³மாஹ. தஸ்ஸாயம் ஸங்கே²பத்தோ². இமினா தி³ட்டி²ஸம்யோஜனேன ஸம்யுத்தோ புது²ஜ்ஜனோ ஏதேஹி ஜாதிஆதீ³ஹி ந பரிமுச்சதீதி. கிம் வா ப³ஹுனா, ஸகலவட்டது³க்க²தோபி ந முச்சதீதி.

20. ஏவம் ச²ப்பபே⁴த³ம் தி³ட்டா²ஸவம் த³ஸ்ஸேத்வா யஸ்மா ஸீலப்³ப³தபராமாஸோ காமாஸவாதி³வசனேனேவ த³ஸ்ஸிதோ ஹோதி. காமஸுக²த்த²ஞ்ஹி ப⁴வஸுக²ப⁴வவிஸுத்³தி⁴அத்த²ஞ்ச அவிஜ்ஜாய அபி⁴பூ⁴தா இதோ ப³ஹித்³தா⁴ ஸமணப்³ராஹ்மணா ஸீலப்³ப³தானி பராமஸந்தி, தஸ்மா தம் அத³ஸ்ஸேத்வா தி³ட்டி²க்³க³ஹணேன வா தஸ்ஸ க³ஹிதத்தாபி தம் அத³ஸ்ஸேத்வாவ இதா³னி யோ புக்³க³லோ த³ஸ்ஸனா பஹாதப்³பே³ ஆஸவே பஜஹதி, தம் த³ஸ்ஸேத்வா தேஸம் ஆஸவானம் பஹானம் த³ஸ்ஸேதும் புப்³பே³ வா அயோனிஸோ மனஸிகரோதோ புது²ஜ்ஜனஸ்ஸ தேஸம் உப்பத்திம் த³ஸ்ஸேத்வா இதா³னி தப்³பி³பரீதஸ்ஸ பஹானம் த³ஸ்ஸேதும் ஸுதவா ச கோ², பி⁴க்க²வேதிஆதி³மாஹ.

தஸ்ஸத்தோ², யாவ ‘‘ஸோ இத³ம் து³க்க²’’ந்தி ஆக³ச்ச²தி, தாவ ஹேட்டா² வுத்தனயேன ச வுத்தபச்சனீகதோ ச வேதி³தப்³போ³. பச்சனீகதோ ச ஸப்³பா³காரேன அரியத⁴ம்மஸ்ஸ அகோவிதா³வினீதபச்சனீகதோ அயம் ‘‘ஸுதவா அரியஸாவகோ அரியத⁴ம்மஸ்ஸ கோவிதோ³ அரியத⁴ம்மே ஸுவினீதோ’’தி வேதி³தப்³போ³. அபிச கோ² ஸிகா²பத்தவிபஸ்ஸனதோ பபு⁴தி யாவ கோ³த்ரபு⁴, தாவ தத³னுரூபேன அத்தே²ன அயம் அரியஸாவகோதி வேதி³தப்³போ³.

21. ‘‘ஸோ இத³ம் து³க்க²ந்தி யோனிஸோ மனஸி கரோதீ’’திஆதீ³ஸு பன அயம் அத்த²விபா⁴வனா, ஸோ சதுஸச்சகம்மட்டா²னிகோ அரியஸாவகோ தண்ஹாவஜ்ஜா தேபூ⁴மகா க²ந்தா⁴ து³க்க²ம், தண்ஹா து³க்க²ஸமுத³யோ, உபி⁴ன்னம் அப்பவத்தி நிரோதோ⁴, நிரோத⁴ஸம்பாபகோ மக்³கோ³தி ஏவம் புப்³பே³வ ஆசரியஸந்திகே உக்³க³ஹிதசதுஸச்சகம்மட்டா²னோ அபரேன ஸமயேன விபஸ்ஸனாமக்³க³ம் ஸமாருள்ஹோ ஸமானோ தே தேபூ⁴மகே க²ந்தே⁴ இத³ம் து³க்க²ந்தி யோனிஸோ மனஸி கரோதி, உபாயேன பதே²ன ஸமன்னாஹரதி சேவ விபஸ்ஸதி ச. ஏத்த² ஹி யாவ ஸோதாபத்திமக்³கோ³, தாவ மனஸிகாரஸீஸேனேவ விபஸ்ஸனா வுத்தா. யா பனாயம் தஸ்ஸேவ து³க்க²ஸ்ஸ ஸமுட்டா²பிகா பபா⁴விகா தண்ஹா, அயம் ஸமுத³யோதி யோனிஸோ மனஸி கரோதி. யஸ்மா பன து³க்க²ஞ்ச ஸமுத³யோ ச இத³ம் டா²னம் பத்வா நிருஜ்ஜ²ந்தி நப்பவத்தந்தி, தஸ்மா யதி³த³ம் நிப்³பா³னம் நாம, அயம் து³க்க²னிரோதோ⁴தி யோனிஸோ மனஸி கரோதி. நிரோத⁴ஸம்பாபகம் அட்ட²ங்கி³கம் மக்³க³ம் அயம் து³க்க²னிரோத⁴கா³மினீ படிபதா³தி யோனிஸோ மனஸி கரோதி, உபாயேன பதே²ன ஸமன்னாஹரதி சேவ விபஸ்ஸதி ச.

தத்ராயம் உபாயோ, அபி⁴னிவேஸோ நாம வட்டே ஹோதி, விவட்டே நத்தி². தஸ்மா ‘‘அயம் அத்தி² இமஸ்மிம் காயே பத²வீதா⁴து, ஆபோதா⁴தூ’’திஆதி³னா நயேன ஸகஸந்ததியம் சத்தாரி பூ⁴தானி தத³னுஸாரேன உபாதா³ரூபானி ச பரிக்³க³ஹேத்வா அயம் ரூபக்க²ந்தோ⁴தி வவத்த²பேதி. தம் வவத்தா²பயதோ உப்பன்னே ததா³ரம்மணே சித்தசேதஸிகே த⁴ம்மே இமே சத்தாரோ அரூபக்க²ந்தா⁴தி வவத்த²பேதி. ததோ இமே பஞ்சக்க²ந்தா⁴ து³க்க²ந்தி வவத்த²பேதி. தே பன ஸங்கே²பதோ நாமஞ்ச ரூபஞ்சாதி த்³வே பா⁴கா³யேவ ஹோந்தி. இத³ஞ்ச நாமரூபம் ஸஹேது ஸப்பச்சயம் உப்பஜ்ஜதி. தஸ்ஸ அயம் ஹேது அயம் பச்சயோதி அவிஜ்ஜாப⁴வதண்ஹாகம்மாஹாராதி³கே ஹேதுபச்சயே வவத்த²பேதி. ததோ தேஸம் பச்சயானஞ்ச பச்சயுப்பன்னத⁴ம்மானஞ்ச யாதா²வஸரஸலக்க²ணம் வவத்த²பேத்வா இமே த⁴ம்மா அஹுத்வா ஹோந்தீதி அனிச்சலக்க²ணம் ஆரோபேதி, உத³யப்³ப³யபீளிதத்தா து³க்கா²தி து³க்க²லக்க²ணம் ஆரோபேதி. அவஸவத்தனதோ அனத்தாதி அனத்தலக்க²ணம் ஆரோபேதி. ஏவம் தீணி லக்க²ணானி ஆரோபேத்வா படிபாடியா விபஸ்ஸனம் பவத்தேந்தோ ஸோதாபத்திமக்³க³ம் பாபுணாதி.

தஸ்மிம் க²ணே சத்தாரி ஸச்சானி ஏகபடிவேதே⁴னேவ படிவிஜ்ஜ²தி, ஏகாபி⁴ஸமயேன அபி⁴ஸமேதி. து³க்க²ம் பரிஞ்ஞாபடிவேதே⁴ன படிவிஜ்ஜ²தி, ஸமுத³யம் பஹானபடிவேதே⁴ன, நிரோத⁴ம் ஸச்சி²கிரியாபடிவேதே⁴ன, மக்³க³ம் பா⁴வனாபடிவேதே⁴ன. து³க்க²ஞ்ச பரிஞ்ஞாபி⁴ஸமயேன அபி⁴ஸமேதி…பே… மக்³க³ம் பா⁴வனாபி⁴ஸமயேன அபி⁴ஸமேதி, நோ ச கோ² அஞ்ஞமஞ்ஞேன ஞாணேன. ஏகஞாணேனேவ ஹி ஏஸ நிரோத⁴ம் ஆரம்மணதோ, ஸேஸானி கிச்சதோ படிவிஜ்ஜ²தி சேவ அபி⁴ஸமேதி ச. ந ஹிஸ்ஸ தஸ்மிம் ஸமயே ஏவம் ஹோதி – ‘‘அஹம் து³க்க²ம் பரிஜானாமீ’’தி வா…பே… ‘‘மக்³க³ம் பா⁴வேமீ’’தி வா. அபிச க்²வஸ்ஸ ஆரம்மணம் கத்வா படிவேத⁴வஸேன நிரோத⁴ம் ஸச்சி²கரோதோ ஏவம் தம் ஞாணம் து³க்க²பரிஞ்ஞாகிச்சம்பி ஸமுத³யபஹானகிச்சம்பி மக்³க³பா⁴வனாகிச்சம்பி கரோதியேவ. தஸ்ஸேவம் உபாயேன யோனிஸோ மனஸிகரோதோ தீணி ஸம்யோஜனானி பஹீயந்தி, வீஸதிவத்து²கா ஸக்காயதி³ட்டி², அட்ட²வத்து²கா விசிகிச்சா², ‘‘ஸீலேன ஸுத்³தி⁴ வதேன ஸுத்³தீ⁴’’தி ஸீலப்³ப³தானம் பராமஸனதோ ஸீலப்³ப³தபராமாஸோதி. தத்த² சதூஸு ஆஸவேஸு ஸக்காயதி³ட்டி²ஸீலப்³ப³தபராமாஸா தி³ட்டா²ஸவேன ஸங்க³ஹிதத்தா ஆஸவா சேவ ஸம்யோஜனா ச. விசிகிச்சா² ஸம்யோஜனமேவ, ந ஆஸவோ. ‘‘த³ஸ்ஸனா பஹாதப்³பா³ ஆஸவா’’தி ஏத்த² பரியாபன்னத்தா பன ஆஸவாதி.

‘‘இமே வுச்சந்தி…பே… பஹாதப்³பா³’’தி இமே ஸக்காயதி³ட்டி²ஆத³யோ த³ஸ்ஸனா பஹாதப்³பா³ நாம ஆஸவாதி த³ஸ்ஸேந்தோ ஆஹ. அத² வா யா அயம் ச²ன்னம் தி³ட்டீ²னம் அஞ்ஞதரா தி³ட்டி² உப்பஜ்ஜதீதி ஏவம் ஸரூபேனேவ ஸக்காயதி³ட்டி² விப⁴த்தா. தம் ஸந்தா⁴யாஹ ‘‘இமே வுச்சந்தி, பி⁴க்க²வே’’தி. ஸா ச யஸ்மா ஸஹஜாதபஹானேகட்டே²ஹி ஸத்³தி⁴ம் பஹீயதி. தி³ட்டா²ஸவே ஹி பஹீயமானே தம்ஸஹஜாதோ சதூஸு தி³ட்டி²ஸம்பயுத்தசித்தேஸு காமாஸவோபி அவிஜ்ஜாஸவோபி பஹீயதி. பஹானேகட்டோ² பன சதூஸு தி³ட்டி²விப்பயுத்தேஸு நாக³ஸுபண்ணாதி³ஸமித்³தி⁴பத்த²னாவஸேன உப்பஜ்ஜமானோ ப⁴வாஸவோ. தேனேவ ஸம்பயுத்தோ அவிஜ்ஜாஸவோபி, த்³வீஸு தோ³மனஸ்ஸசித்தேஸு பாணாதிபாதாதி³னிப்³ப³த்தகோ அவிஜ்ஜாஸவோபி, ததா² விசிகிச்சா²சித்தஸம்பயுத்தோ அவிஜ்ஜாஸவோபீதி ஏவம் ஸப்³ப³தா²பி அவஸேஸா தயோபி ஆஸவா பஹீயந்தி. தஸ்மா ப³ஹுவசனனித்³தே³ஸோ கதோதி ஏவமேத்த² அத்தோ² வேதி³தப்³போ³. ஏஸ போராணானம் அதி⁴ப்பாயோ.

த³ஸ்ஸனா பஹாதப்³பா³தி த³ஸ்ஸனம் நாம ஸோதாபத்திமக்³கோ³, தேன பஹாதப்³பா³தி அத்தோ². கஸ்மா ஸோதாபத்திமக்³கோ³ த³ஸ்ஸனம்? பட²மம் நிப்³பா³னத³ஸ்ஸனதோ. நனு கோ³த்ரபு⁴ பட²மதரம் பஸ்ஸதீதி? நோ ந பஸ்ஸதி. தி³ஸ்வா கத்தப்³ப³கிச்சம் பன ந கரோதி ஸம்யோஜனானம் அப்பஹானதோ. தஸ்மா பஸ்ஸதீதி ந வத்தப்³போ³. யத்த² கத்த²சி ராஜானம் தி³ஸ்வாபி பண்ணாகாரம் த³த்வா கிச்சனிப்ப²த்தியா அதி³ட்ட²த்தா ‘‘அஜ்ஜாபி ராஜானம் ந பஸ்ஸாமீ’’தி வத³ந்தோ கா³மவாஸீ புரிஸோ சேத்த² நித³ஸ்ஸனம்.

த³ஸ்ஸனாபஹாதப்³ப³ஆஸவவண்ணனா நிட்டி²தா.

ஸம்வராபஹாதப்³ப³ஆஸவவண்ணனா

22. ஏவம் த³ஸ்ஸனேன பஹாதப்³பே³ ஆஸவே த³ஸ்ஸேத்வா இதா³னி தத³னந்தருத்³தி³ட்டே² ஸம்வரா பஹாதப்³பே³ த³ஸ்ஸேதும், கதமே ச, பி⁴க்க²வே, ஆஸவா ஸம்வரா பஹாதப்³பா³தி ஆஹ. ஏவம் ஸப்³ப³த்த² ஸம்ப³ந்தோ⁴ வேதி³தப்³போ³. இதோ பரஞ்ஹி அத்த²மத்தமேவ வண்ணயிஸ்ஸாம.

நனு ச த³ஸ்ஸனேன பா⁴வனாயாதி இமேஹி த்³வீஹி அப்பஹாதப்³போ³ ஆஸவோ நாம நத்தி², அத² கஸ்மா விஸும் ஸம்வராதீ³ஹி பஹாதப்³பே³ த³ஸ்ஸேதீதி. ஸம்வராதீ³ஹி புப்³ப³பா⁴கே³ விக்க²ம்பி⁴தா ஆஸவா சதூஹி மக்³கே³ஹி ஸமுக்³கா⁴தம் க³ச்ச²ந்தி, தஸ்மா தேஸம் மக்³கா³னம் புப்³ப³பா⁴கே³ இமேஹி பஞ்சஹாகாரேஹி விக்க²ம்ப⁴னப்பஹானம் த³ஸ்ஸேந்தோ ஏவமாஹ. தஸ்மா யோ சாயம் வுத்தோ பட²மோ த³ஸ்ஸனமக்³கோ³யேவ, இதா³னி பா⁴வனானாமேன வுச்சிஸ்ஸந்தி தயோ மக்³கா³, தேஸம் ஸப்³பே³ஸம்பி அயம் புப்³ப³பா⁴க³படிபதா³தி வேதி³தப்³பா³.

தத்த² இதா⁴தி இமஸ்மிம் ஸாஸனே. படிஸங்கா²தி படிஸங்கா²ய. தத்தா²யம் ஸங்கா²ஸத்³தோ³ ஞாணகோட்டா²ஸபஞ்ஞத்திக³ணனாஸு தி³ஸ்ஸதி. ‘‘ஸங்கா²யேகம் படிஸேவதீ’’திஆதீ³ஸு (ம. நி. 2.168) ஹி ஞாணே தி³ஸ்ஸதி. ‘‘பபஞ்சஸஞ்ஞாஸங்கா² ஸமுதா³சரந்தீ’’திஆதீ³ஸு (ம. நி. 1.201) கோட்டா²ஸே. ‘‘தேஸம் தேஸம் த⁴ம்மானம் ஸங்கா² ஸமஞ்ஞா’’திஆதீ³ஸு (த⁴. ஸ. 1313) பஞ்ஞத்தியம். ‘‘ந ஸுகரம் ஸங்கா²து’’ந்திஆதீ³ஸு (ஸம். நி. 2.128) க³ணனாயம். இத⁴ பன ஞாணே த³ட்ட²ப்³போ³.

படிஸங்கா² யோனிஸோதி ஹி உபாயேன பதே²ன படிஸங்கா²ய ஞத்வா பச்சவேக்கி²த்வாதி அத்தோ². ஏத்த² ச அஸம்வரே ஆதீ³னவபடிஸங்கா² யோனிஸோ படிஸங்கா²தி வேதி³தப்³பா³. ஸா சாயம் ‘‘வரம், பி⁴க்க²வே, தத்தாய அயோஸலாகாய ஆதி³த்தாய ஸம்பஜ்ஜலிதாய ஸஜோதிபூ⁴தாய சக்கு²ந்த்³ரியம் ஸம்பலிமட்ட²ம், ந த்வேவ சக்கு²விஞ்ஞேய்யேஸு ரூபேஸு அனுப்³யஞ்ஜனஸோ நிமித்தக்³கா³ஹோ’’திஆதி³னா (ஸம். நி. 4.235) ஆதி³த்தபரியாயனயேன வேதி³தப்³பா³. சக்கு²ந்த்³ரியஸம்வரஸம்வுதோ விஹரதீதி ஏத்த² சக்கு²மேவ இந்த்³ரியம் சக்கு²ந்த்³ரியம், ஸம்வரணதோ ஸம்வரோ, பித³ஹனதோ த²கனதோதி வுத்தம் ஹோதி. ஸதியா ஏதம் அதி⁴வசனம். சக்கு²ந்த்³ரியே ஸம்வரோ சக்கு²ந்த்³ரியஸம்வரோ. தித்த²காகோ ஆவாடகச்ச²போ வனமஹிம்ஸோதிஆத³யோ விய.

தத்த² கிஞ்சாபி சக்கு²ந்த்³ரியே ஸம்வரோ வா அஸம்வரோ வா நத்தி². ந ஹி சக்கு²பஸாத³ம் நிஸ்ஸாய ஸதி வா முட்ட²ஸச்சம் வா உப்பஜ்ஜதி. அபிச யதா³ ரூபாரம்மணம் சக்கு²ஸ்ஸ ஆபாத²ம் ஆக³ச்ச²தி, ததா³ ப⁴வங்கே³ த்³விக்க²த்தும் உப்பஜ்ஜித்வா நிருத்³தே⁴ கிரியமனோதா⁴து ஆவஜ்ஜனகிச்சம் ஸாத⁴யமானா உப்பஜ்ஜித்வா நிருஜ்ஜ²தி, ததோ சக்கு²விஞ்ஞாணம் த³ஸ்ஸனகிச்சம், ததோ விபாகமனோதா⁴து ஸம்படிச்ச²னகிச்சம், ததோ விபாகாஹேதுகமனோவிஞ்ஞாணதா⁴து ஸந்தீரணகிச்சம், ததோ கிரியாஹேதுகமனோவிஞ்ஞாணதா⁴து வோட்ட²ப்³ப³னகிச்சம் ஸாத⁴யமானா உப்பஜ்ஜித்வா நிருஜ்ஜ²தி. தத³னந்தரம் ஜவனம் ஜவதி.

தத்த²பி நேவ ப⁴வங்க³ஸமயே, ந ஆவஜ்ஜனாதீ³னம் அஞ்ஞதரஸமயே ஸம்வரோ வா அஸம்வரோ வா அத்தி². ஜவனக்க²ணே பன ஸசே து³ஸ்ஸீல்யம் வா முட்ட²ஸச்சம் வா அஞ்ஞாணம் வா அக்க²ந்தி வா கோஸஜ்ஜம் வா உப்பஜ்ஜதி, அயம் அஸம்வரோ ஹோதி. ஏவம் ஹோந்தோபி ஸோ சக்கு²ந்த்³ரியே அஸம்வரோதி வுச்சதி. கஸ்மா? தஸ்மிஞ்ஹி ஸதி த்³வாரம்பி அகு³த்தம் ஹோதி, ப⁴வங்க³ம்பி ஆவஜ்ஜனாதீ³னி வீதி²சித்தானிபி. யதா² கிம், யதா² நக³ரே சதூஸு த்³வாரேஸு அஸம்வுதேஸு கிஞ்சாபி அந்தோ க⁴ரகோட்ட²கக³ப்³பா⁴த³யோ ஸுஸம்வுதா, ததா²பி அந்தோனக³ரே ஸப்³ப³ம் ப⁴ண்ட³ம் அரக்கி²தம் அகோ³பிதமேவ ஹோதி. நக³ரத்³வாரேன ஹி பவிஸித்வா சோரா யதி³ச்ச²ந்தி, தம் கரேய்யும், ஏவமேவ ஜவனே து³ஸ்ஸீல்யாதீ³ஸு உப்பன்னேஸு, தஸ்மிம் அஸம்வரே ஸதி த்³வாரம்பி அகு³த்தம் ஹோதி, ப⁴வங்க³ம்பி ஆவஜ்ஜனாதீ³னி வீதி²சித்தானிபீதி.

தஸ்மிம் பன ஸீலாதீ³ஸு உப்பன்னேஸு த்³வாரம்பி கு³த்தம் ஹோதி, ப⁴வங்க³ம்பி ஆவஜ்ஜனாதீ³னி வீதி²சித்தானிபி. யதா² கிம்? யதா² நக³ரத்³வாரேஸு ஸுஸம்வுதேஸு கிஞ்சாபி அந்தோ க⁴ராத³யோ அஸம்வுதா, ததா²பி அந்தோனக³ரே ஸப்³ப³ம் ப⁴ண்ட³ம் ஸுரக்கி²தம் ஸுகோ³பிதமேவ ஹோதி. நக³ரத்³வாரேஸு ஹி பிஹிதேஸு சோரானம் பவேஸோ நத்தி², ஏவமேவ ஜவனே ஸீலாதீ³ஸு உப்பன்னேஸு த்³வாரம்பி ஸுகு³த்தம் ஹோதி, ப⁴வங்க³ம்பி ஆவஜ்ஜனாதீ³னி வீதி²சித்தானிபி. தஸ்மா ஜவனக்க²ணே உப்பஜ்ஜமானோபி சக்கு²ந்த்³ரியே ஸம்வரோதி வுத்தோ. இத⁴ சாயம் ஸதிஸம்வரோ அதி⁴ப்பேதோதி வேதி³தப்³போ³. சக்கு²ந்த்³ரியஸம்வரேன ஸம்வுதோ சக்கு²ந்த்³ரியஸம்வரஸம்வுதோ, உபேதோதி வுத்தம் ஹோதி. ததா² ஹி, பாதிமோக்க²ஸம்வரஸம்வுதோதி இமஸ்ஸ விப⁴ங்கே³ ‘‘இமினா பாதிமோக்க²ஸம்வரேன உபேதோ ஹோதி…பே… ஸமன்னாக³தோ’’தி (விப⁴. 511) வுத்தம். தம் ஏகஜ்ஜ²ம் கத்வா சக்கு²ந்த்³ரியஸம்வரேன ஸம்வுதோதி ஏவமத்தோ² வேதி³தப்³போ³.

அத² வா ஸம்வரீதி ஸம்வுதோ, த²கேஸி பித³ஹீதி வுத்தம் ஹோதி. சக்கு²ந்த்³ரியே ஸம்வரஸம்வுதோ சக்கு²ந்த்³ரியஸம்வரஸம்வுதோ, சக்கு²ந்த்³ரியஸம்வரஸஞ்ஞிதம் ஸதிகவாடம் சக்கு²த்³வாரே, க⁴ரத்³வாரே கவாடம் விய ஸம்வரி த²கேஸி பித³ஹீதி வுத்தம் ஹோதி. அயமேவ சேத்த² அத்தோ² ஸுந்த³ரதரோ. ததா² ஹி ‘‘சக்கு²ந்த்³ரியஸம்வரம் அஸம்வுதஸ்ஸ விஹரதோ ஸம்வுதஸ்ஸ விஹரதோ’’தி ஏதேஸு பதே³ஸு அயமேவ அத்தோ² தி³ஸ்ஸதி.

விஹரதீதி ஏவம் சக்கு²ந்த்³ரியஸம்வரஸம்வுதோ யேன கேனசி இரியாபத²விஹாரேன விஹரதி. யஞ்ஹிஸ்ஸாதிஆதி³ம்ஹி யம் சக்கு²ந்த்³ரியஸம்வரம் அஸ்ஸ பி⁴க்கு²னோ அஸம்வுதஸ்ஸ அத²கேத்வா அபித³ஹித்வா விஹரந்தஸ்ஸாதி ஏவமத்தோ² வேதி³தப்³போ³. அத² வா, யே-காரஸ்ஸ யந்தி ஆதே³ஸோ. ஹிகாரோ ச பத³பூரணோ, யே அஸ்ஸாதி அத்தோ².

உப்பஜ்ஜேய்யுந்தி நிப்³ப³த்தேய்யும். ஆஸவா விகா⁴தபரிளாஹாதி சத்தாரோ ஆஸவா ச அஞ்ஞே ச விகா⁴தகரா கிலேஸபரிளாஹா விபாகபரிளாஹா ச. சக்கு²த்³வாரே ஹி இட்டா²ரம்மணம் ஆபாத²க³தம் காமஸ்ஸாத³வஸேன அஸ்ஸாத³யதோ அபி⁴னந்த³தோ காமாஸவோ உப்பஜ்ஜதி, ஈதி³ஸம் அஞ்ஞஸ்மிம்பி ஸுக³திப⁴வே லபி⁴ஸ்ஸாமீதி ப⁴வபத்த²னாய அஸ்ஸாத³யதோ ப⁴வாஸவோ உப்பஜ்ஜதி, ஸத்தோதி வா ஸத்தஸ்ஸாதி வா க³ண்ஹந்தஸ்ஸ தி³ட்டா²ஸவோ உப்பஜ்ஜதி, ஸப்³பே³ஹேவ ஸஹஜாதம் அஞ்ஞாணம் அவிஜ்ஜாஸவோதி சத்தாரோ ஆஸவா உப்பஜ்ஜந்தி. தேஹி ஸம்பயுத்தா அபரே கிலேஸா விகா⁴தபரிளாஹா, ஆயதிம் வா தேஸம் விபாகா. தேபி ஹி அஸம்வுதஸ்ஸேவ விஹரதோ உப்பஜ்ஜேய்யுந்தி வுச்சந்தி.

ஏவம்ஸ தேதி ஏவம் அஸ்ஸ தே. ஏவம் ஏதேன உபாயேன ந ஹோந்தி, நோ அஞ்ஞதா²தி வுத்தம் ஹோதி. ஏஸ நயோ படிஸங்கா² யோனிஸோ ஸோதிந்த்³ரியஸம்வரஸம்வுதோதிஆதீ³ஸு.

இமே வுச்சந்தி, பி⁴க்க²வே, ஆஸவா ஸம்வரா பஹாதப்³பா³தி இமே ச²ஸு த்³வாரேஸு சத்தாரோ சத்தாரோ கத்வா சதுவீஸதி ஆஸவா ஸம்வரேன பஹாதப்³பா³தி வுச்சந்தி. ஸப்³ப³த்தே²வ சேத்த² ஸதிஸம்வரோ ஏவ ஸம்வரோதி வேதி³தப்³போ³.

ஸம்வராபஹாதப்³ப³ஆஸவவண்ணனா நிட்டி²தா.

படிஸேவனாபஹாதப்³ப³ஆஸவவண்ணனா

23. படிஸங்கா² யோனிஸோ சீவரந்திஆதீ³ஸு யம் வத்தப்³ப³ம், தம் ஸப்³ப³ம் விஸுத்³தி⁴மக்³கே³ ஸீலகதா²யம் வுத்தமேவ. யஞ்ஹிஸ்ஸாதி யம் சீவரபிண்ட³பாதாதீ³ஸு வா அஞ்ஞதரம் அஸ்ஸ. அப்படிஸேவதோதி ஏவம் யோனிஸோ அப்படிஸேவந்தஸ்ஸ. ஸேஸம் வுத்தனயமேவ. கேவலம் பனித⁴ அலத்³த⁴ம் சீவராதி³ம் பத்த²யதோ லத்³த⁴ம் வா அஸ்ஸாத³யதோ காமாஸவஸ்ஸ உப்பத்தி வேதி³தப்³பா³. ஈதி³ஸம் அஞ்ஞஸ்மிம்பி ஸம்பத்திப⁴வே ஸுக³திப⁴வே லபி⁴ஸ்ஸாமீதி ப⁴வபத்த²னாய அஸ்ஸாத³யதோ ப⁴வாஸவஸ்ஸ, அஹம் லபா⁴மி ந லபா⁴மீதி வா மய்ஹம் வா இத³ந்தி அத்தஸஞ்ஞம் அதி⁴ட்ட²ஹதோ தி³ட்டா²ஸவஸ்ஸ உப்பத்தி வேதி³தப்³பா³. ஸப்³பே³ஹேவ பன ஸஹஜாதோ அவிஜ்ஜாஸவோதி ஏவம் சதுன்னம் ஆஸவானம் உப்பத்தி விபாகபரிளாஹா ச நவவேத³னுப்பாத³னதோபி வேதி³தப்³பா³.

இமே வுச்சந்தி, பி⁴க்க²வே, ஆஸவா படிஸேவனா பஹாதப்³பா³தி இமே ஏகமேகஸ்மிம் பச்சயே சத்தாரோ சத்தாரோ கத்வா ஸோளஸ ஆஸவா இமினா ஞாணஸம்வரஸங்கா²தேன பச்சவேக்க²ணபடிஸேவனேன பஹாதப்³பா³தி வுச்சந்தி.

படிஸேவனாபஹாதப்³ப³ஆஸவவண்ணனா நிட்டி²தா.

அதி⁴வாஸனாபஹாதப்³ப³ஆஸவவண்ணனா

24. படிஸங்கா² யோனிஸோ க²மோ ஹோதி ஸீதஸ்ஸாதி உபாயேன பதே²ன பச்சவேக்கி²த்வா க²மோ ஹோதி ஸீதஸ்ஸ ஸீதம் க²மதி ஸஹதி, ந அவீரபுரிஸோ விய அப்பமத்தகேனபி ஸீதேன சலதி கம்பதி கம்மட்டா²னம் விஜஹதி. அபிச கோ² லோமஸனாக³த்தே²ரோ விய அனப்பகேனாபி ஸீதேன பு²ட்டோ² ந சலதி ந கம்பதி, கம்மட்டா²னமேவ மனஸி கரோதி. தே²ரோ கிர சேதியபப்³ப³தே பியங்கு³கு³ஹாயம் பதா⁴னக⁴ரே விஹரந்தோ அந்தரட்ட²கே ஹிமபாதஸமயே லோகந்தரிகனிரயே பச்சவேக்கி²த்வா கம்மட்டா²னம் அவிஜஹந்தோவ அப்³போ⁴காஸே வீதினாமேஸி. ஏவம் உண்ஹாதீ³ஸுபி அத்த²யோஜனா வேதி³தப்³பா³.

கேவலஞ்ஹி யோ பி⁴க்கு² அதி⁴மத்தம்பி உண்ஹம் ஸஹதி ஸ்வேவ தே²ரோ விய, அயம் ‘‘க²மோ உண்ஹஸ்ஸா’’தி வேதி³தப்³போ³. தே²ரோ கிர கி³ம்ஹஸமயே பச்சா²ப⁴த்தம் ப³ஹிசங்கமே நிஸீதி³. கம்மட்டா²னம் மனஸிகரோந்தோ ஸேதா³பிஸ்ஸ கச்சே²ஹி முச்சந்தி. அத² நம் அந்தேவாஸிகோ ஆஹ ‘‘இத⁴, ப⁴ந்தே, நிஸீத³த², ஸீதலோ ஓகாஸோ’’தி. தே²ரோ ‘‘உண்ஹப⁴யேனேவம்ஹி ஆவுஸோ இத⁴ நிஸின்னோ’’தி அவீசிமஹானிரயம் பச்சவேக்கி²த்வா நிஸீதி³யேவ. உண்ஹந்தி சேத்த² அக்³கி³ஸந்தாபோவ வேதி³தப்³போ³. ஸூரியஸந்தாபவஸேன பனேதம் வத்து² வுத்தம்.

யோ ச த்³வே தயோ வாரே ப⁴த்தம் வா பானீயம் வா அலப⁴மானோபி அனமதக்³கே³ ஸம்ஸாரே அத்தனோ பேத்திவிஸயூபபத்திம் பச்சவேக்கி²த்வா அவேதே⁴ந்தோ கம்மட்டா²னம் ந விஜஹதியேவ. அதி⁴மத்தேஹி ட³ம்ஸமகஸவாதாதபஸம்ப²ஸ்ஸேஹி பு²ட்டோ² சாபி திரச்சா²னூபபத்திம் பச்சவேக்கி²த்வா அவேதே⁴ந்தோ கம்மட்டா²னம் ந விஜஹதியேவ. ஸரீஸபஸம்ப²ஸ்ஸேன பு²ட்டோ² சாபி அனமதக்³கே³ ஸம்ஸாரே ஸீஹப்³யக்³கா⁴தி³முகே²ஸு அனேகவாரம் பரிவத்திதபுப்³ப³பா⁴வம் பச்சவேக்கி²த்வா அவேதே⁴ந்தோ கம்மட்டா²னம் ந விஜஹதியேவ பதா⁴னியத்தே²ரோ விய. அயம் ‘‘க²மோ ஜிக⁴ச்சா²ய…பே… ஸரீஸபஸம்ப²ஸ்ஸான’’ந்தி வேதி³தப்³போ³.

தே²ரம் கிர க²ண்ட³சேலவிஹாரே கணிகாரபதா⁴னியக⁴ரே அரியவம்ஸம் ஸுணந்தம் கோ⁴ரவிஸோ ஸப்போ ட³ம்ஸி. தே²ரோ ஜானித்வாபி பஸன்னசித்தோ நிஸின்னோ த⁴ம்மம்யேவ ஸுணாதி. விஸவேகோ³ த²த்³தோ⁴ அஹோஸி. தே²ரோ உபஸம்பத³மண்ட³லம் ஆதி³ம் கத்வா ஸீலம் பச்சவேக்கி²த்வா பரிஸுத்³த⁴ஸீலோஹமஸ்மீதி பீதிம் உப்பாதே³ஸி. ஸஹ பீதுப்பாதா³ விஸம் நிவத்தித்வா பத²விம் பாவிஸி. தே²ரோ தத்தே²வ சித்தேகக்³க³தம் லபி⁴த்வா விபஸ்ஸனம் வட்³டே⁴த்வா அரஹத்தம் பாபுணி.

யோ பன அக்கோஸவஸேன து³ருத்தே து³ருத்தத்தாயேவ ச து³ராக³தே அபி அந்திமவத்து²ஸஞ்ஞிதே வசனபதே² ஸுத்வா க²ந்திகு³ணம்யேவ பச்சவேக்கி²த்வா ந வேத⁴தி தீ³க⁴பா⁴ணகஅப⁴யத்தே²ரோ விய. அயம் ‘‘க²மோ து³ருத்தானம் து³ராக³தானம் வசனபதா²ன’’ந்தி வேதி³தப்³போ³.

தே²ரோ கிர பச்சயஸந்தோஸபா⁴வனாராமதாய மஹாஅரியவம்ஸப்படிபத³ம் கதே²ஸி, ஸப்³போ³ மஹாகா³மோ ஆக³ச்ச²தி. தே²ரஸ்ஸ மஹாஸக்காரோ உப்பஜ்ஜதி. தம் அஞ்ஞதரோ மஹாதே²ரோ அதி⁴வாஸேதும் அஸக்கோந்தோ தீ³க⁴பா⁴ணகோ அரியவம்ஸம் கதே²மீதி ஸப்³ப³ரத்திம் கோலாஹலம் கரோஸீதிஆதீ³ஹி அக்கோஸி. உபோ⁴பி ச அத்தனோ அத்தனோ விஹாரம் க³ச்ச²ந்தா கா³வுதமத்தம் ஏகபதே²ன அக³மம்ஸு. ஸகலகா³வுதம்பி ஸோ தம் அக்கோஸியேவ. ததோ யத்த² த்³வின்னம் விஹாரானம் மக்³கோ³ பி⁴ஜ்ஜதி, தத்த² ட²த்வா தீ³க⁴பா⁴ணகத்தே²ரோ தம் வந்தி³த்வா ‘‘ஏஸ, ப⁴ந்தே, தும்ஹாகம் மக்³கோ³’’தி ஆஹ. ஸோ அஸுணந்தோ விய அக³மாஸி. தே²ரோபி விஹாரம் க³ந்த்வா பாதே³ பக்கா²லேத்வா நிஸீதி³. தமேனம் அந்தேவாஸிகோ ‘‘கிம், ப⁴ந்தே, ஸகலகா³வுதம் பரிபா⁴ஸந்தம் ந கிஞ்சி அவோசுத்தா²’’தி ஆஹ. தே²ரோ ‘‘க²ந்தியேவ, ஆவுஸோ, மய்ஹம் பா⁴ரோ, ந அக்க²ந்தி. ஏகபது³த்³தா⁴ரேபி கம்மட்டா²னவியோக³ம் ந பஸ்ஸாமீ’’தி ஆஹ. ஏத்த² ச வசனமேவ வசனபதோ²தி வேதி³தப்³போ³.

யோ பன உப்பன்னா ஸாரீரிகா வேத³னா து³க்க²மனட்டே²ன து³க்கா², ப³ஹலட்டே²ன திப்³பா³, ப²ருஸட்டே²ன க²ரா, திகி²ணட்டே²ன கடுகா, அஸ்ஸாத³விரஹதோ அஸாதா, மனம் அவட்³ட⁴னதோ அமனாபா, பாணஹரணஸமத்த²தாய பாணஹரா அதி⁴வாஸேதியேவ, ந வேத⁴தி. ஏவம் ஸபா⁴வோ ஹோதி சித்தலபப்³ப³தே பதா⁴னியத்தே²ரோ விய. அயம் ‘‘உப்பன்னானம்…பே… அதி⁴வாஸனஜாதிகோ’’தி வேதி³தப்³போ³.

தே²ரஸ்ஸ கிர ரத்திம் பதா⁴னேன வீதினாமேத்வா டி²தஸ்ஸ உத³ரவாதோ உப்பஜ்ஜி. ஸோ தம் அதி⁴வாஸேதும் அஸக்கோந்தோ ஆவத்ததி பரிவத்ததி. தமேனம் சங்கமபஸ்ஸே டி²தோ பிண்ட³பாதியத்தே²ரோ ஆஹ ‘‘ஆவுஸோ, பப்³ப³ஜிதோ நாம அதி⁴வாஸனஸீலோ ஹோதீ’’தி. ஸோ ‘‘ஸாது⁴, ப⁴ந்தே’’தி அதி⁴வாஸேத்வா நிச்சலோ ஸயி. வாதோ நாபி⁴தோ யாவ ஹத³யம் பா²லேதி. தே²ரோ வேத³னம் விக்க²ம்பே⁴த்வா விபஸ்ஸந்தோ முஹுத்தேன அனாகா³மீ ஹுத்வா பரினிப்³பா³யீதி.

யஞ்ஹிஸ்ஸாதி ஸீதாதீ³ஸு யம்கிஞ்சி ஏகத⁴ம்மம்பி அஸ்ஸ. அனதி⁴வாஸயதோதி அனதி⁴வாஸேந்தஸ்ஸ அக்க²மந்தஸ்ஸ. ஸேஸம் வுத்தனயமேவ. ஆஸவுப்பத்தி பனேத்த² ஏவம் வேதி³தப்³பா³. ஸீதேன பு²ட்ட²ஸ்ஸ உண்ஹம் பத்த²யந்தஸ்ஸ காமாஸவோ உப்பஜ்ஜதி, ஏவம் ஸப்³ப³த்த². நத்தி² நோ ஸம்பத்திப⁴வே ஸுக³திப⁴வே ஸீதம் வா உண்ஹம் வாதி ப⁴வம் பத்த²யந்தஸ்ஸ ப⁴வாஸவோ. மய்ஹம் ஸீதம் உண்ஹந்தி கா³ஹோ தி³ட்டா²ஸவோ. ஸப்³பே³ஹேவ ஸம்பயுத்தோ அவிஜ்ஜாஸவோதி.

‘‘இமே வுச்சந்தி…பே… அதி⁴வாஸனா பஹாதப்³பா³’’தி இமே ஸீதாதீ³ஸு ஏகமேகஸ்ஸ வஸேன சத்தாரோ சத்தாரோ கத்வா அனேகே ஆஸவா இமாய க²ந்திஸம்வரஸங்கா²தாய அதி⁴வாஸனாய பஹாதப்³பா³தி வுச்சந்தீதி அத்தோ². ஏத்த² ச யஸ்மா அயம் க²ந்தி ஸீதாதி³த⁴ம்மே அதி⁴வாஸேதி, அத்தனோ உபரி ஆரோபேத்வா வாஸேதியேவ. ந அஸஹமானா ஹுத்வா நிரஸ்ஸதி, தஸ்மா ‘‘அதி⁴வாஸனா’’தி வுச்சதீதி வேதி³தப்³பா³.

அதி⁴வாஸனாபஹாதப்³ப³ஆஸவவண்ணனா நிட்டி²தா.

பரிவஜ்ஜனாபஹாதப்³ப³ஆஸவவண்ணனா

25. படிஸங்கா² யோனிஸோ சண்ட³ம் ஹத்தி²ம் பரிவஜ்ஜேதீதி அஹம் ஸமணோதி சண்ட³ஸ்ஸ ஹத்தி²ஸ்ஸ ஆஸன்னே ந டா²தப்³ப³ம். ததோனிதா³னஞ்ஹி மரணம்பி ஸியா மரணமத்தம்பி து³க்க²ந்தி ஏவம் உபாயேன பதே²ன பச்சயேன பச்சவேக்கி²த்வா சண்ட³ம் ஹத்தி²ம் பரிவஜ்ஜேதி படிக்கமதி. ஏஸ நயோ ஸப்³ப³த்த². சண்ட³ந்தி ச து³ட்ட²ம், வாளந்தி வுத்தம் ஹோதி. கா²ணுந்தி க²தி³ரகா²ணுஆதி³ம். கண்டகட்டா²னந்தி கண்டகானம் டா²னம், யத்த² கண்டகா விஜ்ஜந்தி, தம் ஓகாஸந்தி வுத்தம் ஹோதி. ஸோப்³ப⁴ந்தி ஸப்³ப³தோ பரிச்சி²ன்னதடம். பபாதந்தி ஏகதோ சி²ன்னதடம். சந்த³னிகந்தி உச்சி²ட்டோ²த³கக³ப்³ப⁴மலாதீ³னம் ச²ட்³ட³னட்டா²னம். ஓளிக³ல்லந்தி தேஸம்யேவ ஸகத்³த³மாதீ³னம் ஸந்த³னோகாஸம். தம் ஜண்ணுமத்தம்பி அஸுசிப⁴ரிதம் ஹோதி, த்³வேபி சேதானி டா²னானி அமனுஸ்ஸது³ட்டா²னி ஹோந்தி. தஸ்மா தானி வஜ்ஜேதப்³பா³னி. அனாஸனேதி ஏத்த² பன அயுத்தம் ஆஸனம் அனாஸனம், தம் அத்த²தோ அனியதவத்து²கம் ரஹோபடிச்ச²ன்னாஸனந்தி வேதி³தப்³ப³ம். அகோ³சரேதி ஏத்த²பி ச அயுத்தோ கோ³சரோ அகோ³சரோ, ஸோ வேஸியாதி³பே⁴த³தோ பஞ்சவிதோ⁴. பாபகே மித்தேதி லாமகே து³ஸ்ஸீலே மித்தபதிரூபகே, அமித்தே வா. ப⁴ஜந்தந்தி ஸேவமானம். விஞ்ஞூ ஸப்³ரஹ்மசாரீதி பண்டி³தா பு³த்³தி⁴ஸம்பன்னா ஸப்³ரஹ்மசாரயோ, பி⁴க்கூ²னமேதம் அதி⁴வசனம். தே ஹி ஏககம்மம் ஏகுத்³தே³ஸோ ஸமஸிக்க²தாதி இமம் ப்³ரஹ்மம் ஸமானம் சரந்தி, தஸ்மா ஸப்³ரஹ்மசாரீதி வுச்சந்தி. பாபகேஸு டா²னேஸூதி லாமகேஸு டா²னேஸு. ஓகப்பேய்யுந்தி ஸத்³த³ஹேய்யும், அதி⁴முச்சேய்யும் ‘‘அத்³தா⁴ அயமாயஸ்மா அகாஸி வா கரிஸ்ஸதி வா’’தி.

யஞ்ஹிஸ்ஸாதி ஹத்தி²ஆதீ³ஸு யம்கிஞ்சி ஏகம்பி அஸ்ஸ. ஸேஸம் வுத்தனயமேவ. ஆஸவுப்பத்தி பனேத்த² ஏவம் வேதி³தப்³பா³. ஹத்தி²ஆதி³னிதா³னேன து³க்கே²ன பு²ட்ட²ஸ்ஸ ஸுக²ம் பத்த²யதோ காமாஸவோ உப்பஜ்ஜதி. நத்தி² நோ ஸம்பத்திப⁴வே ஸுக³திப⁴வே ஈதி³ஸம் து³க்க²ந்தி ப⁴வம் பத்தே²ந்தஸ்ஸ ப⁴வாஸவோ. மம் ஹத்தீ² மத்³த³தி, மம் அஸ்ஸோதி கா³ஹோ தி³ட்டா²ஸவோ. ஸப்³பே³ஹேவ ஸம்பயுத்தோ அவிஜ்ஜாஸவோதி.

இமே வுச்சந்தி…பே… பரிவஜ்ஜனா பஹாதப்³பா³தி இமே ஹத்தி²ஆதீ³ஸு ஏகேகஸ்ஸ வஸேன சத்தாரோ சத்தாரோ கத்வா அனேகே ஆஸவா இமினா ஸீலஸம்வரஸங்கா²தேன பரிவஜ்ஜனேன பஹாதப்³பா³தி வுச்சந்தீதி வேதி³தப்³பா³.

பரிவஜ்ஜனாபஹாதப்³ப³ஆஸவவண்ணனா நிட்டி²தா.

வினோத³னாபஹாதப்³ப³ஆஸவவண்ணனா

26. படிஸங்கா² யோனிஸோ உப்பன்னம் காமவிதக்கம் நாதி⁴வாஸேதீதி ‘‘இதி பாயம் விதக்கோ அகுஸலோ, இதிபி ஸாவஜ்ஜோ, இதிபி து³க்க²விபாகோ, ஸோ ச கோ² அத்தப்³யாபா³தா⁴ய ஸம்வத்ததீ’’திஆதி³னா நயேன யோனிஸோ காமவிதக்கே ஆதீ³னவம் பச்சவேக்கி²த்வா தஸ்மிம் தஸ்மிம் ஆரம்மணே உப்பன்னம் ஜாதமபி⁴னிப்³ப³த்தம் காமவிதக்கம் நாதி⁴வாஸேதி, சித்தம் ஆரோபேத்வா ந வாஸேதி, அப்³ப⁴ந்தரே வா ந வாஸேதீதிபி அத்தோ².

அனதி⁴வாஸேந்தோ கிம் கரோதீதி? பஜஹதி ச²ட்³டே³தி.

கிம் கசவரம் விய பிடகேனாதி? ந ஹி, அபிச கோ² நம் வினோதே³தி துத³தி விஜ்ஜ²தி நீஹரதி.

கிம் ப³லிப³த்³த³ம் விய பதோதே³னாதி? ந ஹி, அத² கோ² நம் ப்³யந்தீகரோதி விக³தந்தம் கரோதி. யதா²ஸ்ஸ அந்தோபி நாவஸிஸ்ஸதி அந்தமஸோ ப⁴ங்க³மத்தம்பி, ததா² நம் கரோதி.

கத²ம் பன நம் ததா² கரோதீதி? அனபா⁴வம் க³மேதீதி அனு அனு அபா⁴வம் க³மேதி, விக்க²ம்ப⁴னப்பஹானேன யதா² ஸுவிக்க²ம்பி⁴தோ ஹோதி, ததா² கரோதீதி வுத்தம் ஹோதி. ஏஸ நயோ ப்³யாபாத³விஹிம்ஸாவிதக்கேஸு.

ஏத்த² ச காமவிதக்கோதி ‘‘யோ காமபடிஸம்யுத்தோ தக்கோ விதக்கோ மிச்சா²ஸங்கப்போ’’தி விப⁴ங்கே³ (விப⁴. 910) வுத்தோ. ஏஸ நயோ இதரேஸு. உப்பன்னுப்பன்னேதி உப்பன்னே உப்பன்னே, உப்பன்னமத்தேயேவாதி வுத்தம் ஹோதி. ஸகிம் வா உப்பன்னே வினோதே³த்வா து³தியவாரே அஜ்ஜு²பேக்கி²தா ந ஹோதி, ஸதக்க²த்தும்பி உப்பன்னே உப்பன்னே வினோதே³தியேவ. பாபகே அகுஸலேதி லாமகட்டே²ன பாபகே, அகோஸல்லதாய அகுஸலே. த⁴ம்மேதி தேயேவ காமவிதக்காத³யோ ஸப்³பே³பி வா நவ மஹாவிதக்கே. தத்த² தயோ வுத்தா ஏவ. அவஸேஸா ‘‘ஞாதிவிதக்கோ ஜனபத³விதக்கோ அமரவிதக்கோ பரானுத்³த³யதாபடிஸம்யுத்தோ விதக்கோ லாப⁴ஸக்காரஸிலோகபடிஸம்யுத்தோ விதக்கோ அனவஞ்ஞத்திபடிஸம்யுத்தோ விதக்கோ’’தி (மஹானி. 207) இமே ச².

யஞ்ஹிஸ்ஸாதி ஏதேஸு விதக்கேஸு யம்கிஞ்சி அஸ்ஸ, ஸேஸம் வுத்தனயமேவ. காமவிதக்கோ பனேத்த² காமாஸவோ ஏவ. தப்³பி³ஸேஸோ ப⁴வாஸவோ. தம்ஸம்பயுத்தோ தி³ட்டா²ஸவோ. ஸப்³ப³விதக்கேஸு அவிஜ்ஜாஸவோதி ஏவம் ஆஸவுப்பத்திபி வேதி³தப்³பா³.

இமே வுச்சந்தி…பே… வினோத³னா பஹாதப்³பா³தி இமே காமவிதக்காதி³வஸேன வுத்தப்பகாரா ஆஸவா இமினா தஸ்மிம் தஸ்மிம் விதக்கே ஆதீ³னவபச்சவேக்க²ணஸஹிதேன வீரியஸம்வரஸங்கா²தேன வினோத³னேன பஹாதப்³பா³தி வுச்சந்தீதி வேதி³தப்³பா³.

வினோத³னாபஹாதப்³ப³ஆஸவவண்ணனா நிட்டி²தா.

பா⁴வனாபஹாதப்³ப³ஆஸவவண்ணனா

27. படிஸங்கா² யோனிஸோ ஸதிஸம்போ³ஜ்ஜ²ங்க³ம் பா⁴வேதீதி அபா⁴வனாய ஆதீ³னவம், பா⁴வனாய ச ஆனிஸம்ஸம் உபாயேன பதே²ன பச்சவேக்கி²த்வா ஸதிஸம்போ³ஜ்ஜ²ங்க³ம் பா⁴வேதி, ஏஸ நயோ ஸப்³ப³த்த². ஏத்த² ச கிஞ்சாபி இமே உபரிமக்³க³த்தயஸமயஸம்பூ⁴தா லோகுத்தரபோ³ஜ்ஜ²ங்கா³ ஏவ அதி⁴ப்பேதா, ததா²பி ஆதி³கம்மிகானம் போ³ஜ்ஜ²ங்கே³ஸு அஸம்மோஹத்த²ம் லோகியலோகுத்தரமிஸ்ஸகேன நேஸம் நயேன அத்த²வண்ணனம் கரிஸ்ஸாமி. இத⁴ பன லோகியனயம் பஹாய லோகுத்தரனயோ ஏவ க³ஹேதப்³போ³. தத்த² ஸதிஸம்போ³ஜ்ஜ²ங்க³ந்திஆதி³னா நயேன வுத்தானம் ஸத்தன்னம் ஆதி³பதா³னம்யேவ தாவ –

அத்த²தோ லக்க²ணாதீ³ஹி, கமதோ ச வினிச்ச²யோ;

அனூனாதி⁴கதோ சேவ, விஞ்ஞாதப்³போ³ விபா⁴வினா.

தத்த² ஸதிஸம்போ³ஜ்ஜ²ங்கே³ தாவ ஸரணட்டே²ன ஸதி. ஸா பனேஸா உபட்டா²னலக்க²ணா, அபிலாபனலக்க²ணா வா. வுத்தம்பி ஹேதம் ‘‘யதா², மஹாராஜ, ரஞ்ஞோ ப⁴ண்டா³கா³ரிகோ ரஞ்ஞோ ஸாபதேய்யம் அபிலாபேதி, ஏத்தகம், மஹாராஜ, ஹிரஞ்ஞம், ஏத்தகம் ஸுவண்ணம், ஏத்தகம் ஸாபதேய்யந்தி, ஏவமேவ கோ², மஹாராஜ, ஸதி உப்பஜ்ஜமானா குஸலாகுஸலஸாவஜ்ஜானவஜ்ஜஹீனபணீதகண்ஹஸுக்கஸப்படிபா⁴கே³ த⁴ம்மே அபிலாபேதி. இமே சத்தாரோ ஸதிபட்டா²னா’’தி (மி. ப. 2.1.13) வித்தா²ரோ. அபிலாபனரஸா. கிச்சவஸேனேவ ஹிஸ்ஸ ஏதம் லக்க²ணம் தே²ரேன வுத்தம். அஸம்மோஸரஸா வா. கோ³சராபி⁴முக²பா⁴வபச்சுபட்டா²னா. ஸதி ஏவ ஸம்போ³ஜ்ஜ²ங்கோ³ ஸதிஸம்போ³ஜ்ஜ²ங்கோ³. தத்த² போ³தி⁴யா போ³தி⁴ஸ்ஸ வா அங்கோ³தி போ³ஜ்ஜ²ங்கோ³.

கிம் வுத்தம் ஹோதி? யா ஹி அயம் த⁴ம்மஸாமக்³கீ³, யாய லோகியலோகுத்தரமக்³க³க்க²ணே உப்பஜ்ஜமானாய லீனுத்³த⁴ச்சபதிட்டா²னாயூஹன-காமஸுக²த்தகிலமதா²னுயோக³-உச்சே²த³ஸஸ்ஸதாபி⁴னிவேஸாதீ³னம் அனேகேஸம் உபத்³த³வானம் படிபக்க²பூ⁴தாய ஸதித⁴ம்மவிசயவீரியபீதிபஸ்ஸத்³தி⁴ஸமாதி⁴உபேக்கா²ஸங்கா²தாய த⁴ம்மஸாமக்³கி³யா அரியஸாவகோ பு³ஜ்ஜ²தீதி கத்வா ‘‘போ³தீ⁴’’தி வுச்சதி. பு³ஜ்ஜ²தீதி கிலேஸஸந்தானனித்³தா³ய உட்ட²ஹதி, சத்தாரி வா அரியஸச்சானி படிவிஜ்ஜ²தி, நிப்³பா³னமேவ வா ஸச்சி²கரோதீதி வுத்தம் ஹோதி. யதா²ஹ ‘‘ஸத்த போ³ஜ்ஜ²ங்கே³ பா⁴வேத்வா அனுத்தரம் ஸம்மாஸம்போ³தி⁴ம் அபி⁴ஸம்பு³த்³தோ⁴’’தி. தஸ்ஸா த⁴ம்மஸாமக்³கி³ஸங்கா²தாய போ³தி⁴யா அங்கோ³திபி போ³ஜ்ஜ²ங்கோ³, ஜா²னங்க³மக்³க³ங்கா³த³யோ விய.

யோபேஸ யதா²வுத்தப்பகாராய ஏதாய த⁴ம்மஸாமக்³கி³யா பு³ஜ்ஜ²தீதி கத்வா அரியஸாவகோ ‘‘போ³தீ⁴’’தி வுச்சதி, தஸ்ஸ போ³தி⁴ஸ்ஸ அங்கோ³திபி போ³ஜ்ஜ²ங்கோ³, ஸேனங்க³ரத²ங்கா³த³யோ விய. தேனாஹு அட்ட²கதா²சரியா ‘‘பு³ஜ்ஜ²னகஸ்ஸ புக்³க³லஸ்ஸ அங்கா³தி வா போ³ஜ்ஜ²ங்கா³’’தி. அபிச ‘‘போ³ஜ்ஜ²ங்கா³தி கேனட்டே²ன போ³ஜ்ஜ²ங்கா³? போ³தா⁴ய ஸம்வத்தந்தீதி போ³ஜ்ஜ²ங்கா³, பு³ஜ்ஜ²ந்தீதி போ³ஜ்ஜ²ங்கா³, அனுபு³ஜ்ஜ²ந்தீதி போ³ஜ்ஜ²ங்கா³, படிபு³ஜ்ஜ²ந்தீதி போ³ஜ்ஜ²ங்கா³, ஸம்பு³ஜ்ஜ²ந்தீதி போ³ஜ்ஜ²ங்கா³’’திஆதி³னா (படி. ம. 3.17) படிஸம்பி⁴தா³னயேனாபி அத்தோ² வேதி³தப்³போ³. பஸத்தோ² ஸுந்த³ரோ வா போ³ஜ்ஜ²ங்கோ³தி ஸம்போ³ஜ்ஜ²ங்கோ³. ஏவம் ஸதி ஏவ ஸம்போ³ஜ்ஜ²ங்கோ³ ஸதிஸம்போ³ஜ்ஜ²ங்கோ³. தம் ஸதிஸம்போ³ஜ்ஜ²ங்க³ம். ஏவம் தாவ ஏகஸ்ஸ ஆதி³பத³ஸ்ஸ அத்த²தோ லக்க²ணாதீ³ஹி ச வினிச்ச²யோ விஞ்ஞாதப்³போ³.

து³தியாதீ³ஸு பன சதுஸச்சத⁴ம்மே விசினாதீதி த⁴ம்மவிசயோ. ஸோ பன விசயலக்க²ணோ, ஓபா⁴ஸனரஸோ, அஸம்மோஹபச்சுபட்டா²னோ. வீரபா⁴வதோ விதி⁴னா ஈரயிதப்³ப³தோ ச வீரியம். தம் பக்³க³ஹலக்க²ணம், உபத்த²ம்ப⁴னரஸம், அனோஸீத³னபச்சுபட்டா²னம். பீணயதீதி பீதி. ஸா ப²ரணலக்க²ணா, துட்டி²லக்க²ணா வா, காயசித்தானம் பீணனரஸா, தேஸம்யேவ ஓத³க்³யபச்சுபட்டா²னா. காயசித்தத³ரத²பஸ்ஸம்ப⁴னதோ பஸ்ஸத்³தி⁴. ஸா உபஸமலக்க²ணா, காயசித்தத³ரத²னிம்மத்³த³னரஸா, ஆயசித்தானம் அபரிப்ப²ந்த³னபூ⁴தஸீதிபா⁴வபச்சுபட்டா²னா. ஸமாதா⁴னதோ ஸமாதி⁴. ஸோ அவிக்கே²பலக்க²ணோ, அவிஸாரலக்க²ணோ வா, சித்தசேதஸிகானம் ஸம்பிண்ட³னரஸோ, சித்தட்டி²திபச்சுபட்டா²னோ. அஜ்ஜு²பேக்க²னதோ உபேக்கா². ஸா படிஸங்கா²னலக்க²ணா, ஸமவாஹிதலக்க²ணா வா, ஊனாதி⁴கதானிவாரணரஸா, பக்க²பாதுபச்சே²த³ரஸா வா, மஜ்ஜ²த்தபா⁴வபச்சுபட்டா²னா. ஸேஸம் வுத்தனயமேவ. ஏவம் ஸேஸபதா³னம்பி அத்த²தோ லக்க²ணாதீ³ஹி ச வினிச்ச²யோ விஞ்ஞாதப்³போ³.

கமதோதி ஏத்த² ச ‘‘ஸதிஞ்ச க்²வாஹம், பி⁴க்க²வே, ஸப்³ப³த்தி²கம் வதா³மீ’’தி (ஸம். நி. 5.234) வசனதோ ஸப்³பே³ஸம் ஸேஸபோ³ஜ்ஜ²ங்கா³னம் உபகாரகத்தா ஸதிஸம்போ³ஜ்ஜ²ங்கோ³வ பட²மம் வுத்தோ. ததோ பரம் ‘‘ஸோ ததா² ஸதோ விஹரந்தோ தம் த⁴ம்மம் பஞ்ஞாய பவிசினதீ’’திஆதி³னா (விப⁴. 469) நயேன ஸேஸபோ³ஜ்ஜ²ங்கா³னம் புப்³பா³பரியவசனே பயோஜனம் ஸுத்தேயேவ வுத்தம். ஏவமேத்த² கமதோபி வினிச்ச²யோ விஞ்ஞாதப்³போ³.

அனூனாதி⁴கதோதி கஸ்மா பன ப⁴க³வதா ஸத்தேவ போ³ஜ்ஜ²ங்கா³ வுத்தா அனூனா அனதி⁴காதி. லீனுத்³த⁴ச்சபடிபக்க²தோ ஸப்³ப³த்தி²கதோ ச. ஏத்த² ஹி தயோ போ³ஜ்ஜ²ங்கா³ லீனஸ்ஸ படிபக்கா². யதா²ஹ – ‘‘யஸ்மிஞ்ச கோ², பி⁴க்க²வே, ஸமயே லீனம் சித்தம் ஹோதி, காலோ தஸ்மிம் ஸமயே த⁴ம்மவிசயஸம்போ³ஜ்ஜ²ங்க³ஸ்ஸ பா⁴வனாய, காலோ வீரியஸம்போ³ஜ்ஜ²ங்க³ஸ்ஸ பா⁴வனாய, காலோ பீதிஸம்போ³ஜ்ஜ²ங்க³ஸ்ஸ பா⁴வனாயா’’தி (ஸம். நி. 5.234). தயோ உத்³த⁴ச்சஸ்ஸ படிபக்கா². யதா²ஹ – ‘‘யஸ்மிஞ்ச கோ², பி⁴க்க²வே, ஸமயே உத்³த⁴தம் சித்தம் ஹோதி, காலோ தஸ்மிம் ஸமயே பஸ்ஸத்³தி⁴ஸம்போ³ஜ்ஜ²ங்க³ஸ்ஸ பா⁴வனாய, காலோ ஸமாதி⁴ஸம்போ³ஜ்ஜ²ங்க³ஸ்ஸ பா⁴வனாய, காலோ உபேக்கா²ஸம்போ³ஜ்ஜ²ங்க³ஸ்ஸ பா⁴வனாயா’’தி (ஸம். நி. 5.234). ஏகோ பனேத்த² ஸப்³ப³த்தி²கோ. யதா²ஹ – ‘‘ஸதிஞ்ச க்²வாஹம், பி⁴க்க²வே, ஸப்³ப³த்தி²கம் வதா³மீ’’தி. ‘‘ஸப்³ப³த்த²க’’ந்திபி பாடோ², த்³வின்னம்பி ஸப்³ப³த்த² இச்சி²தப்³ப³ந்தி அத்தோ². ஏவம் லீனுத்³த⁴ச்சபடிபக்க²தோ ஸப்³ப³த்தி²கதோ ச ஸத்தேவ போ³ஜ்ஜ²ங்கா³ வுத்தா அனூனா அனதி⁴காதி, ஏவமேத்த² அனூனாதி⁴கதோபி வினிச்ச²யோ விஞ்ஞாதப்³போ³.

ஏவம் தாவ ‘‘ஸதிஸம்போ³ஜ்ஜ²ங்க³’’ந்திஆதி³னா நயேன வுத்தானம் ஸத்தன்னம் ஆதி³பதா³னம்யேவ அத்த²வண்ணனம் ஞத்வா இதா³னி பா⁴வேதி விவேகனிஸ்ஸிதந்திஆதீ³ஸு ஏவம் ஞாதப்³பா³. பா⁴வேதீதி வட்³டே⁴தி, அத்தனோ சித்தஸந்தானே புனப்புனம் ஜனேதி அபி⁴னிப்³ப³த்தேதீதி அத்தோ². விவேகனிஸ்ஸிதந்தி விவேகே நிஸ்ஸிதம். விவேகோதி விவித்ததா. ஸ்வாயம் தத³ங்க³விவேகோ விக்க²ம்ப⁴னஸமுச்சே²த³படிப்பஸ்ஸத்³தி⁴ நிஸ்ஸரணவிவேகோதி பஞ்சவிதோ⁴. தஸ்ஸ நானத்தம் ‘‘அரியத⁴ம்மே அவினீதோ’’தி ஏத்த² வுத்தனயேனேவ வேதி³தப்³ப³ம். அயமேவ ஹி தத்த² வினயோதி வுத்தோ. ஏவம் ஏதஸ்மிம் பஞ்சவிதே⁴ விவேகே.

விவேகனிஸ்ஸிதந்தி தத³ங்க³விவேகனிஸ்ஸிதம் ஸமுச்சே²த³விவேகனிஸ்ஸிதம் நிஸ்ஸரணவிவேகனிஸ்ஸிதஞ்ச ஸதிஸம்போ³ஜ்ஜ²ங்க³ம் பா⁴வேதீதி அயமத்தோ² வேதி³தப்³போ³. ததா² ஹி அயம் போ³ஜ்ஜ²ங்க³பா⁴வனானுயுத்தோ யோகீ³ விபஸ்ஸனாக்க²ணே கிச்சதோ தத³ங்க³விவேகனிஸ்ஸிதம், அஜ்ஜா²ஸயதோ நிஸ்ஸரணவிவேகனிஸ்ஸிதம், மக்³க³காலே பன கிச்சதோ ஸமுச்சே²த³விவேகனிஸ்ஸிதம், ஆரம்மணதோ நிஸ்ஸரணவிவேகனிஸ்ஸிதம் ஸதிஸம்போ³ஜ்ஜ²ங்க³ம் பா⁴வேதி. பஞ்சவித⁴விவேகனிஸ்ஸிதந்திபி ஏகே, தே ஹி ந கேவலம் ப³லவவிபஸ்ஸனாமக்³க³ப²லக்க²ணேஸு ஏவ போ³ஜ்ஜ²ங்கே³ உத்³த⁴ரந்தி, விபஸ்ஸனாபாத³ககஸிணஜ்ஜா²னஆனாபானாஸுப⁴ப்³ரஹ்மவிஹாரஜ்ஜா²னேஸுபி உத்³த⁴ரந்தி. ந ச படிஸித்³தா⁴ அட்ட²கதா²சரியேஹி. தஸ்மா தேஸம் மதேன ஏதேஸம் ஜா²னானம் பவத்திக்க²ணே கிச்சதோ ஏவ விக்க²ம்ப⁴னவிவேகனிஸ்ஸிதம். யதா² ச ‘‘விபஸ்ஸனாக்க²ணே அஜ்ஜா²ஸயதோ நிஸ்ஸரணவிவேகனிஸ்ஸித’’ந்தி வுத்தம், ஏவம் படிப்பஸ்ஸத்³தி⁴விவேகனிஸ்ஸிதம்பி பா⁴வேதீதி வத்தும் வட்டதி. ஏஸ நயோ விராக³னிஸ்ஸிதாதீ³ஸு. விவேகட்டா² ஏவ ஹி விராகா³த³யோ.

கேவலஞ்ஹேத்த² வோஸ்ஸக்³கோ³ து³விதோ⁴ பரிச்சாக³வோஸ்ஸக்³கோ³ ச பக்க²ந்த³னவோஸ்ஸக்³கோ³ சாதி. தத்த² பரிச்சாக³வோஸ்ஸக்³கோ³தி விபஸ்ஸனாக்க²ணே ச தத³ங்க³வஸேன, மக்³க³க்க²ணே ச ஸமுச்சே²த³வஸேன கிலேஸப்பஹானம். பக்க²ந்த³னவோஸ்ஸக்³கோ³தி விபஸ்ஸனாக்க²ணே தன்னின்னபா⁴வேன, மக்³க³க்க²ணே பன ஆரம்மணகரணேன நிப்³பா³னபக்க²ந்த³னம். தது³ப⁴யம்பி இமஸ்மிம் லோகியலோகுத்தரமிஸ்ஸகே அத்த²வண்ணனானயே வட்டதி. ததா² ஹி அயம் ஸதிஸம்போ³ஜ்ஜ²ங்கோ³ யதா²வுத்தேன பகாரேன கிலேஸே பரிச்சஜதி, நிப்³பா³னஞ்ச பக்க²ந்த³தி. வோஸ்ஸக்³க³பரிணாமிந்தி இமினா பன ஸகலேன வசனேன வோஸ்ஸக்³க³த்தம் பரிணமந்தம் பரிணதஞ்ச பரிபச்சந்தம் பரிபக்கஞ்சாதி. இத³ம் வுத்தம் ஹோதி ‘‘அயஞ்ஹி போ³ஜ்ஜ²ங்க³பா⁴வனானுயுத்தோ பி⁴க்கு² யதா² ஸதிஸம்போ³ஜ்ஜ²ங்கோ³ கிலேஸபரிச்சாக³வோஸ்ஸக்³க³த்தம் நிப்³பா³னபக்க²ந்த³னவோஸ்ஸக்³க³த்தஞ்ச பரிபச்சதி, யதா² ச பரிபக்கோ ஹோதி, ததா² நம் பா⁴வேதீ’’தி. ஏஸ நயோ ஸேஸபோ³ஜ்ஜ²ங்கே³ஸு.

இத⁴ பன நிப்³பா³னம்யேவ ஸப்³ப³ஸங்க²தேஹி விவித்தத்தா விவேகோ, ஸப்³பே³ஸம் விராக³பா⁴வதோ விராகோ³, நிரோத⁴பா⁴வதோ நிரோதோ⁴தி வுத்தம். மக்³கோ³ ஏவ ச வோஸ்ஸக்³க³பரிணாமீ, தஸ்மா ஸதிஸம்போ³ஜ்ஜ²ங்க³ம் பா⁴வேதி விவேகம் ஆரம்மணம் கத்வா பவத்தியா விவேகனிஸ்ஸிதம். ததா² விராக³னிஸ்ஸிதம் நிரோத⁴னிஸ்ஸிதம். தஞ்ச கோ² அரியமக்³க³க்க²ணுப்பத்தியா கிலேஸானம் ஸமுச்சே²த³தோ பரிச்சாக³பா⁴வேன ச நிப்³பா³னபக்க²ந்த³னபா⁴வேன ச பரிணதம் பரிபக்கந்தி அயமேவ அத்தோ² த³ட்ட²ப்³போ³. ஏஸ நயோ ஸேஸபோ³ஜ்ஜ²ங்கே³ஸு.

யஞ்ஹிஸ்ஸாதி ஏதேஸு போ³ஜ்ஜ²ங்கே³ஸு யம்கிஞ்சி அஸ்ஸ. ஸேஸம் வுத்தனயமேவ. ஆஸவுப்பத்தியம் பனேத்த² இமேஸம் உபரிமக்³க³த்தயஸம்பயுத்தானம் போ³ஜ்ஜ²ங்கா³னம் அபா⁴விதத்தா யே உப்பஜ்ஜேய்யும் காமாஸவோ ப⁴வாஸவோ அவிஜ்ஜாஸவோதி தயோ ஆஸவா, பா⁴வயதோ ஏவம்ஸ தே ஆஸவா ந ஹோந்தீதி அயம் நயோ வேதி³தப்³போ³.

இமே வுச்சந்தி…பே… பா⁴வனா பஹாதப்³பா³தி இமே தயோ ஆஸவா இமாய மக்³க³த்தயஸம்பயுத்தாய போ³ஜ்ஜ²ங்க³பா⁴வனாய பஹாதப்³பா³தி வுச்சந்தீதி வேதி³தப்³பா³.

28. இதா³னி இமேஹி ஸத்தஹாகாரேஹி பஹீனாஸவம் பி⁴க்கு²ம் தோ²மேந்தோ ஆஸவப்பஹானே சஸ்ஸ ஆனிஸம்ஸம் த³ஸ்ஸேந்தோ ஏதேஹேவ ச காரணேஹி ஆஸவப்பஹானே ஸத்தானம் உஸ்ஸுக்கம் ஜனேந்தோ யதோ கோ², பி⁴க்க²வே…பே… அந்தமகாஸி து³க்க²ஸ்ஸாதி ஆஹ. தத்த² யதோ கோ²தி ஸாமிவசனே தோகாரோ, யஸ்ஸ கோ²தி வுத்தம் ஹோதி. போராணா பன யஸ்மிம் காலேதி வண்ணயந்தி. யே ஆஸவா த³ஸ்ஸனா பஹாதப்³பா³தி யே ஆஸவா த³ஸ்ஸனேன பஹாதப்³பா³, தே த³ஸ்ஸனேனேவ பஹீனா ஹோந்தி, ந அப்பஹீனேஸுயேவ பஹீனஸஞ்ஞீ ஹோதி. ஏவம் ஸப்³ப³த்த² வித்தா²ரோ.

ஸப்³பா³ஸவஸம்வரஸம்வுதோதி ஸப்³பே³ஹி ஆஸவபிதா⁴னேஹி பிஹிதோ, ஸப்³பே³ஸம் வா ஆஸவானம் பிதா⁴னேஹி பிஹிதோ. அச்சே²ச்சி² தண்ஹந்தி ஸப்³ப³ம்பி தண்ஹம் சி²ந்தி³, ஸம்சி²ந்தி³ ஸமுச்சி²ந்தி³. விவத்தயி ஸம்யோஜனந்தி த³ஸவித⁴ம்பி ஸம்யோஜனம் பரிவத்தயி நிம்மலமகாஸி. ஸம்மாதி ஹேதுனா காரணேன. மானாபி⁴ஸமயாதி மானஸ்ஸ த³ஸ்ஸனாபி⁴ஸமயா பஹானாபி⁴ஸமயா ச. அரஹத்தமக்³கோ³ ஹி கிச்சவஸேன மானம் பஸ்ஸதி, அயமஸ்ஸ த³ஸ்ஸனாபி⁴ஸமயோ. தேன தி³ட்டோ² பன ஸோ தாவதே³வ பஹீயதி தி³ட்ட²விஸேன தி³ட்ட²ஸத்தானம் ஜீவிதம் விய. அயமஸ்ஸ பஹானாபி⁴ஸமயோ.

அந்தமகாஸி து³க்க²ஸ்ஸாதி ஏவம் அரஹத்தமக்³கே³ன ஸம்மா மானஸ்ஸ தி³ட்ட²த்தா பஹீனத்தா ச யே இமே ‘‘காயப³ந்த⁴னஸ்ஸ அந்தோ ஜீரதி (சூளவ. 278). ஹரிதந்தம் வா’’தி (ம. நி. 1.304) ஏவம் வுத்தஅந்திமமரியாத³ந்தோ ச, ‘‘அந்தமித³ம், பி⁴க்க²வே, ஜீவிகான’’ந்தி (இதிவு. 91; ஸம். நி. 3.80) ஏவம் வுத்தலாமகந்தோ ச, ‘‘ஸக்காயோ ஏகோ அந்தோ’’தி (அ. நி. 6.61) ஏவம் வுத்தகோட்டா²ஸந்தோ ச, ‘‘ஏஸேவந்தோ து³க்க²ஸ்ஸ ஸப்³ப³பச்சயஸங்க²யா’’தி (ஸம். நி. 2.51) ஏவம் வுத்தகோடந்தோ சாதி ஏவம் சத்தாரோ அந்தா, தேஸு ஸப்³ப³ஸ்ஸேவ வட்டது³க்க²ஸ்ஸ அந்தம் சதுத்த²கோடிஸங்கா²தம் அந்திமகோடிஸங்கா²தம் அந்தமகாஸி பரிச்சே²த³ம் பரிவடுமம் அகாஸி. அந்திமஸமுஸ்ஸயமத்தாவஸேஸம் து³க்க²ம் அகாஸீதி வுத்தம் ஹோதி.

அத்தமனா தே பி⁴க்கூ²தி ஸகமனா துட்ட²மனா, பீதிஸோமனஸ்ஸேஹி வா ஸம்பயுத்தமனா ஹுத்வா. ப⁴க³வதோ பா⁴ஸிதம் அபி⁴னந்து³ந்தி இத³ம் து³க்க²ஸ்ஸ அந்தகிரியாபரியோஸானம் ப⁴க³வதோ பா⁴ஸிதம் ஸுகதி²தம் ஸுலபிதம், ஏவமேதம் ப⁴க³வா ஏவமேதம் ஸுக³தாதி மத்த²கேன ஸம்படிச்ச²ந்தா அப்³ப⁴னுமோதி³ம்ஸூதி.

ஸேஸமேத்த² யம் ந வுத்தம், தம் புப்³பே³ வுத்தத்தா ச ஸுவிஞ்ஞேய்யத்தா ச ந வுத்தம். தஸ்மா ஸப்³ப³ம் வுத்தானுஸாரேன அனுபத³ஸோ பச்சவேக்கி²தப்³ப³ம்.

பா⁴வனாபஹாதப்³ப³ஆஸவவண்ணனா நிட்டி²தா.

பபஞ்சஸூத³னியா மஜ்ஜி²மனிகாயட்ட²கதா²ய

ஸப்³பா³ஸவஸுத்தவண்ணனா நிட்டி²தா.