2. லகு²மாவிமானவண்ணனா

அபி⁴க்கந்தேன வண்ணேனாதி லகு²மாவிமானம். தஸ்ஸ கா உப்பத்தி? ப⁴க³வதி பா³ராணஸியம் விஹரந்தே கேவட்டத்³வாரம் நாம பா³ராணஸினக³ரஸ்ஸ ஏகம் த்³வாரம், தஸ்ஸ அவிதூ³ரே நிவிட்ட²கா³மோபி ‘‘கேவட்டத்³வார’’ந்த்வேவ பஞ்ஞாயித்த². தத்த² லகு²மா நாம ஏகா இத்தீ² ஸத்³தா⁴ பஸன்னா பு³த்³தி⁴ஸம்பன்னா தேன த்³வாரேன பவிஸந்தே பி⁴க்கூ² தி³ஸ்வா வந்தி³த்வா அத்தனோ கே³ஹம் நேத்வா கடச்சு²பி⁴க்க²ம் த³த்வா தேனேவ பரிசயேன ஸத்³தா⁴ய வட்³ட⁴மானாய ஆஸனஸாலம் காரேத்வா தத்த² பவிட்டா²னம் பி⁴க்கூ²னம் ஆஸனம் உபனேதி, பானீயம் பரிபோ⁴ஜனீயம் உபட்ட²பேதி. யஞ்ச ஓத³னகும்மாஸடா³காதி³ அத்தனோ கே³ஹே விஜ்ஜதி, தம் பி⁴க்கூ²னம் தே³தி. ஸா பி⁴க்கூ²னம் ஸந்திகே த⁴ம்மம் ஸுத்வா ஸரணேஸு ச ஸீலேஸு ச பதிட்டா²ய ஸமாஹிதா ஹுத்வா விபஸ்ஸனாகம்மட்டா²னம் உக்³க³ஹேத்வா விபஸ்ஸனம் உஸ்ஸுக்காபேந்தீ உபனிஸ்ஸயஸம்பன்னதாய ந சிரஸ்ஸேவ ஸோதாபத்திப²லே பதிட்ட²ஹி. ஸா அபரபா⁴கே³ காலம் கத்வா தாவதிம்ஸப⁴வனே மஹதி விமானே நிப்³ப³த்தி, அச்ச²ராஸஹஸ்ஸஞ்சஸ்ஸா பரிவாரோ அஹோஸி. ஸா தத்த² தி³ப்³ப³ஸம்பத்திம் அனுப⁴வந்தீ பமோத³மானா விசரதி. தம் ஆயஸ்மா மஹாமோக்³க³ல்லானோ தே³வசாரிகம் சரந்தோ ‘‘அபி⁴க்கந்தேன வண்ணேனா’’திஆதி³கா³தா²ஹி புச்சீ²தி ஸப்³ப³ம் வுத்தனயமேவ. தேன வுத்தம் –

173. ‘‘அபி⁴க்கந்தேன வண்ணேன, யா த்வம் திட்ட²ஸி தே³வதே;

ஓபா⁴ஸேந்தீ தி³ஸா ஸப்³பா³, ஓஸதீ⁴ விய தாரகா.

174. ‘‘கேன தேதாதி³ஸோ வண்ணோ, கேன தே இத⁴ மிஜ்ஜ²தி;

உப்பஜ்ஜந்தி ச தே போ⁴கா³, யே கேசி மனஸோ பியா.

175. ‘‘புச்சா²மி தம் தே³வி மஹானுபா⁴வே, மனுஸ்ஸபூ⁴தா கிமகாஸி புஞ்ஞம்;

கேனாஸி ஏவம் ஜலிதானுபா⁴வா, வண்ணோ ச தே ஸப்³ப³தி³ஸா பபா⁴ஸதீ’’தி.

176. ‘‘ஸா தே³வதா அத்தமனா, மோக்³க³ல்லானேன புச்சி²தா;

பஞ்ஹம் புட்டா² வியாகாஸி, யஸ்ஸ கம்மஸ்ஸித³ம் ப²லம்’’.

177. ‘‘கேவட்டத்³வாரா நிக்க²ம்ம, அஹு மய்ஹம் நிவேஸனம்;

தத்த² ஸஞ்சரமானானம், ஸாவகானம் மஹேஸினம்.

178. ‘‘ஓத³னம் கும்மாஸம் டா³கம், லோணஸோவீரகஞ்சஹம்;

அதா³ஸிம் உஜுபூ⁴தேஸு, விப்பஸன்னேன சேதஸா.

179. ‘‘சாதுத்³த³ஸிம் பஞ்சத³ஸிம், யா ச பக்க²ஸ்ஸ அட்ட²மீ;

பாடிஹாரியபக்க²ஞ்ச, அட்ட²ங்க³ஸுஸமாக³தம்.

180. ‘‘உபோஸத²ம் உபவஸிஸ்ஸம், ஸதா³ ஸீலேஸு ஸம்வுதா;

ஸஞ்ஞமா ஸம்விபா⁴கா³ ச, விமானம் ஆவஸாமஹம்.

181. ‘‘பாணாதிபாதா விரதா, முஸாவாதா³ ச ஸஞ்ஞதா;

தே²ய்யா ச அதிசாரா ச, மஜ்ஜபானா ச ஆரகா.

182. ‘‘பஞ்சஸிக்கா²பதே³ ரதா, அரியஸச்சான கோவிதா³;

உபாஸிகா சக்கு²மதோ, கோ³தமஸ்ஸ யஸஸ்ஸினோ.

183. ‘‘தேன மேதாதி³ஸோ வண்ணோ…பே… வண்ணோ ச மே ஸப்³ப³தி³ஸா பபா⁴ஸதீ’’தி.

மம ச, ப⁴ந்தே, வசனேன ப⁴க³வதோ பாதே³ ஸிரஸா வந்தே³ய்யாஸி ‘‘லகு²மா நாம, ப⁴ந்தே, உபாஸிகா ப⁴க³வதோ பாதே³ ஸிரஸா வந்த³தீ’’தி. அனச்ச²ரியம் கோ² பனேதம், ப⁴ந்தே, யம் மம் ப⁴க³வா அஞ்ஞதரஸ்மிம் ஸாமஞ்ஞப²லே ப்³யாகரேய்ய. தம் ப⁴க³வா ஸகதா³கா³மிப²லே ப்³யாகாஸீதி.

177. தத்த² கேவட்டத்³வாரா நிக்க²ம்மாதி கேவட்டத்³வாரதோ நிக்க²மனட்டா²னே.

178. டா³கந்தி தண்டு³லேய்யகாதி³ஸாகப்³யஞ்ஜனம். லோணஸோவீரகந்தி த⁴ஞ்ஞரஸாதீ³ஹி ப³ஹூஹி ஸம்பா⁴ரேஹி ஸம்பாதே³தப்³ப³ம் ஏகம் பானகம். ‘‘ஆசாமகஞ்ஜிகலோணூத³க’’ந்திபி வத³ந்தி.

புச்சா²விஸ்ஸஜ்ஜனாவஸானே ஸா தே²ரஸ்ஸ த⁴ம்மதே³ஸனாய ஸகதா³கா³மிப²லம் பாபுணி. ஸேஸம் உத்தராவிதா⁴னே வுத்தனயானுஸாரேன ஏவ வேதி³தப்³ப³ம்.

லகு²மாவிமானவண்ணனா நிட்டி²தா.