2. து³தியபீட²விமானவண்ணனா

பீட²ம் தே வேளுரியமயந்தி து³தியபீட²விமானம். தஸ்ஸ அட்டு²ப்பத்தி ச அத்த²வண்ணனா ச பட²மே வுத்தனயேனேவ வேதி³தப்³பா³. அயம் பன விஸேஸோ – ஸாவத்தி²வாஸினீ கிர ஏகா இத்தீ² அத்தனோ கே³ஹம் பிண்டா³ய பவிட்ட²ம் ஏகம் தே²ரம் பஸ்ஸித்வா பஸன்னசித்தா தஸ்ஸ ஆஸனம் தே³ந்தீ அத்தனோ பீட²ம் உபரி நீலவத்தே²ன அத்த²ரித்வா அதா³ஸி. தேன தஸ்ஸா தே³வலோகே நிப்³ப³த்தாய வேளுரியமயம் பல்லங்கவிமானம் நிப்³ப³த்தம். தேன வுத்தம் –

8. ‘‘பீட²ம் தே வேளுரியமயம் உளாரம், மனோஜவம் க³ச்ச²தி யேனகாமம்;

அலங்கதே மல்யத⁴ரே ஸுவத்தே², ஓபா⁴ஸஸி விஜ்ஜுரிவப்³ப⁴ கூடம்.

9. ‘‘கேன தேதாதி³ஸோ வண்ணோ, கேன தே இத⁴ மிஜ்ஜ²தி;

உப்பஜ்ஜந்தி ச தே போ⁴கா³, யே கேசி மனஸோ பியா.

10. ‘‘புச்சா²மி தம் தே³வி மஹானுபா⁴வே, மனுஸ்ஸபூ⁴தா கிமகாஸி புஞ்ஞம்;

கேனாஸி ஏவம் ஜலிதானுபா⁴வா, வண்ணோ ச தே ஸப்³ப³தி³ஸா பபா⁴ஸதீ’’தி.

11. ‘‘ஸா தே³வதா அத்தமனா, மோக்³க³ல்லானேன புச்சி²தா;

பஞ்ஹம் புட்டா² வியாகாஸி, யஸ்ஸ கம்மஸ்ஸித³ம் ப²லம்’’.

12. ‘‘அஹம் மனுஸ்ஸேஸு மனுஸ்ஸபூ⁴தா, அப்³பா⁴க³தானாஸனகம் அதா³ஸிம்;

அபி⁴வாத³யிம் அஞ்ஜலிகம் அகாஸிம், யதா²னுபா⁴வஞ்ச அதா³ஸி தா³னம்.

13. ‘‘தேன மேதாதி³ஸோ வண்ணோ, தேன மே இத⁴ மிஜ்ஜ²தி;

உப்பஜ்ஜந்தி ச மே போ⁴கா³, யே கேசி மனஸோ பியா.

14. ‘‘அக்கா²மி தே பி⁴க்கு² மஹானுபா⁴வ, மனுஸ்ஸபூ⁴தா யமகாஸி புஞ்ஞம்;

தேனம்ஹி ஏவம் ஜலிதானுபா⁴வா, வண்ணோ ச மே ஸப்³ப³தி³ஸா பபா⁴ஸதீ’’தி.

8. தத்த² வேளுரியமயந்தி வேளுரியமணிமயம். வேளுரியமணி நாம விளூரபப்³ப³தஸ்ஸ விளூரகா³மஸ்ஸ ச அவிதூ³ரே உப்பஜ்ஜனகமணி. தஸ்ஸ கிர விளூரகா³மட்டா²னே ஆகரோ, விளூரஸ்ஸ பன அவிதூ³ரே ப⁴வத்தா வேளுரியந்தேவ பஞ்ஞாயித்த². தம்ஸதி³ஸவண்ணனிப⁴தாய தே³வலோகேபிஸ்ஸ ததே²வ நாமம் ஜாதம் யதா² தம் மனுஸ்ஸலோகே லத்³த⁴னாமவஸேனேவ தே³வலோகே தே³வபுத்தானம். தம் பன மயூரகீ³வவண்ணம் வா ஹோதி, வாயஸபத்தவண்ணம் வா, ஸினித்³த⁴வேணுபத்தவண்ணம் வா. இத⁴ பன மயூரகீ³வவண்ணம் வேதி³தப்³ப³ம். ஸேஸம் ஸப்³ப³ம் பட²மபீட²விமானே வுத்தஸதி³ஸமேவாதி.

து³தியபீட²விமானவண்ணனா நிட்டி²தா.