3. ததியபீட²விமானவண்ணனா

பீட²ம் தே ஸோவண்ணமயந்தி ததியபீட²விமானம். தஸ்ஸ வத்து² ராஜக³ஹே ஸமுட்டி²தம். அஞ்ஞதரோ கிர கீ²ணாஸவத்தே²ரோ ராஜக³ஹே பிண்டா³ய சரித்வா ப⁴த்தம் க³ஹேத்வா உபகட்டே² காலே ப⁴த்தகிச்சம் காதுகாமோ ஏகம் விவடத்³வாரகே³ஹம் உபஸங்கமி. தஸ்மிம் பன கே³ஹே கே³ஹஸாமினீ இத்தீ² ஸத்³தா⁴ பஸன்னா தே²ரஸ்ஸ ஆகாரம் ஸல்லக்கே²த்வா ‘‘ஏத², ப⁴ந்தே, இத⁴ நிஸீதி³த்வா ப⁴த்தகிச்சம் கரோதா²’’தி அத்தனோ ப⁴த்³த³பீட²ம் பஞ்ஞாபேத்வா உபரி பீதவத்த²ம் அத்த²ரித்வா நிரபேக்க²பரிச்சாக³வஸேன அதா³ஸி, ‘‘இத³ம் மே புஞ்ஞம் ஆயதிம் ஸோவண்ணபீட²படிலாபா⁴ய ஹோதூ’’தி பத்த²னஞ்ச பட்ட²பேஸி. அத² தே²ரே தத்த² நிஸீதி³த்வா ப⁴த்தகிச்சம் கத்வா பத்தம் தோ⁴வித்வா உட்டா²ய க³ச்ச²ந்தே ‘‘ப⁴ந்தே, இத³மாஸனம் தும்ஹாகம்யேவ பரிச்சத்தம், மய்ஹம் அனுக்³க³ஹத்த²ம் பரிபு⁴ஞ்ஜதா²’’தி ஆஹ. தே²ரோ தஸ்ஸா அனுகம்பாய தம் பீட²ம் ஸம்படிச்சி²த்வா ஸங்க⁴ஸ்ஸ தா³பேஸி. ஸா அபரேன ஸமயேன அஞ்ஞதரேன ரோகே³ன பு²ட்டா² காலம் கத்வா தாவதிம்ஸப⁴வனே நிப்³ப³த்தீதிஆதி³ ஸப்³ப³ம் பட²மவிமானவண்ணனாயம் வுத்தனயேனேவ வேதி³தப்³ப³ம். தேன வுத்தம் –

15. ‘‘பீட²ம் தே ஸோவண்ணமயம் உளாரம், மனோஜவம் க³ச்ச²தி யேனகாமம்;

அலங்கதே மல்யத⁴ரே ஸுவத்தே²,ஓபா⁴ஸஸி விஜ்ஜுரிவப்³ப⁴கூடம்.

16. ‘‘கேன தேதாதி³ஸோ வண்ணோ, கேன தே இத⁴ மிஜ்ஜ²தி;

உப்பஜ்ஜந்தி ச தே போ⁴கா³, யே கேசி மனஸோ பியா.

17. ‘‘புச்சா²மி தம் தே³வி மஹானுபா⁴வே, மனுஸ்ஸபூ⁴தா கிமகாஸி புஞ்ஞம்;

கேனாஸி ஏவம் ஜலிதானுபா⁴வா, வண்ணோ ச தே ஸப்³ப³தி³ஸா பபா⁴ஸதீ’’தி.

18. ‘‘ஸா தே³வதா அத்தமனா, மோக்³க³ல்லானேன புச்சி²தா;

பஞ்ஹம் புட்டா² வியாகாஸி, யஸ்ஸ கம்மஸ்ஸித³ம் ப²லம்’’.

19. ‘‘அப்பஸ்ஸ கம்மஸ்ஸ ப²லம் மமேத³ம், யேனம்ஹி ஏவம் ஜலிதானுபா⁴வா;

அஹம் மனுஸ்ஸேஸு மனுஸ்ஸபூ⁴தா, புரிமாய ஜாதியா மனுஸ்ஸலோகே.

20. ‘‘அத்³த³ஸம் விரஜம் பி⁴க்கு²ம், விப்பஸன்னமனாவிலம்;

தஸ்ஸ அதா³ஸஹம் பீட²ம், பஸன்னா ஸேஹி பாணிபி⁴.

21. ‘‘தேன மேதாதி³ஸோ வண்ணோ, தேன மே இத⁴ மிஜ்ஜ²தி;

உப்பஜ்ஜந்தீ ச மே போ⁴கா³, யே கேசி மனஸோ பியா.

22. ‘‘அக்கா²மி தே பி⁴க்கு² மஹானுபா⁴வ, மனுஸ்ஸபூ⁴தா யமகாஸி புஞ்ஞம்;

தேனம்ஹி ஏவம் ஜலிதானுபா⁴வா, வண்ணோ ச மே ஸப்³ப³தி³ஸா பபா⁴ஸதீ’’தி.

19. யஞ்ச பன பஞ்சமகா³தா²யம் புரிமாய ஜாதியா மனுஸ்ஸலோகேதிஆதி³, ஏத்த² ஜாதி-ஸத்³தோ³ அத்தே²வ ஸங்க²தலக்க²ணே ‘‘ஜாதி த்³வீஹி க²ந்தே⁴ஹி ஸங்க³ஹிதா’’திஆதீ³ஸு (தா⁴து. 71). அத்தி² நிகாயே ‘‘நிக³ண்டா² நாம ஸமணஜாதீ’’திஆதீ³ஸு (அ. நி. 3.71). அத்தி² படிஸந்தி⁴யம் ‘‘யம் மாதுகுச்சி²ஸ்மிம் பட²மம் சித்தம் உப்பன்னம், பட²மம் விஞ்ஞாணம் பாதுபூ⁴தம், தது³பாதா³ய ஸாவஸ்ஸ ஜாதீ’’திஆதீ³ஸு (மஹாவ. 124). அத்தி² குலே ‘‘அக்கி²த்தோ அனுபகுட்டோ² ஜாதிவாதே³னா’’திஆதீ³ஸு (தீ³. நி. 1.303). அத்தி² பஸுதியம் ‘‘ஸம்பதிஜாதோ, ஆனந்த³, போ³தி⁴ஸத்தோ’’திஆதீ³ஸு (தீ³. நி. 2.31; ம. நி. 3.207). அத்தி² ப⁴வே ‘‘ஏகம்பி ஜாதிம் த்³வேபி ஜாதியோ’’திஆதீ³ஸு (தீ³. நி. 1.244; ம. நி. 1.53). இதா⁴பி ப⁴வே ஏவ த³ட்ட²ப்³போ³. தஸ்மா புரிமாய ஜாதியா புரிமஸ்மிம் ப⁴வே அனந்தராதீதே புரிமே அத்தபா⁴வேதி அத்தோ². பு⁴ம்மத்தே² ஹித³ம் கரணவசனம். மனுஸ்ஸலோகேதி மனுஸ்ஸலோகப⁴வே, ராஜக³ஹம் ஸந்தா⁴ய வத³தி. ஓகாஸலோகோ ஹி இத⁴ அதி⁴ப்பேதோ, ஸத்தலோகோ பன ‘‘மனுஸ்ஸேஸூ’’தி இமினா வுத்தோயேவ.

20. அத்³த³ஸந்தி அத்³த³க்கி²ம். விரஜந்தி விக³தராகா³தி³ரஜத்தா விரஜம். பி⁴க்கு²ந்தி பி⁴ன்னகிலேஸத்தா பி⁴க்கு²ம், ஸப்³ப³ஸோ கிலேஸகாலுஸ்ஸியாபா⁴வேன விப்பஸன்னசித்ததாய விப்பஸன்னம், அனாவிலஸங்கப்பதாய அனாவிலம். புரிமம் புரிமஞ்சேத்த² பத³ம் பச்சி²மஸ்ஸ பச்சி²மஸ்ஸ காரணவசனம், விக³தராகா³தி³ரஜத்தா பி⁴ன்னகிலேஸதாய பி⁴க்கு²ம், பி⁴ன்னகிலேஸத்தா கிலேஸகாலுஸ்ஸியாபா⁴வேன விப்பஸன்னம், விப்பஸன்னமனத்தா அனாவிலந்தி. பச்சி²மம் பச்சி²மம் வா பத³ம் புரிமஸ்ஸ புரிமஸ்ஸ காரணவசனம், விரஜம் பி⁴க்கு²கு³ணயோக³தோ. பி⁴ன்னகிலேஸோ ஹி பி⁴க்கு². பி⁴க்கு²ம் விப்பஸன்னபா⁴வதோ. கிலேஸகாலுஸ்ஸியாபா⁴வேன விப்பஸன்னமானஸோ ஹி பி⁴க்கு². விப்பஸன்னம் அனாவிலஸங்கப்பபா⁴வதோதி. ராக³ரஜாபா⁴வேன வா ‘‘விரஜ’’ந்தி வுத்தம், தோ³ஸகாலுஸ்ஸியாபா⁴வேன ‘‘விப்பஸன்ன’’ந்தி, மோஹப்³யாகுலாபா⁴வேன ‘‘அனாவில’’ந்தி. ஏவம்பூ⁴தோ பரமத்த²தோ பி⁴க்கு² நாம ஹோதீதி ‘‘பி⁴க்கு²’’ந்தி வுத்தம். அதா³ஸஹந்தி அதா³ஸிம் அஹம். பீட²ந்தி ததா³ மம ஸந்திகே விஜ்ஜமானம் ப⁴த்³த³பீட²ம். பஸன்னாதி கம்மப²லஸத்³தா⁴ய ரதனத்தயஸத்³தா⁴ய ச பஸன்னசித்தா. ஸேஹி பாணிபீ⁴தி அஞ்ஞம் அனாணாபேத்வா அத்தனோ ஹத்தே²ஹி உபனீய பீட²ம் பஞ்ஞாபேத்வா அதா³ஸிந்தி அத்தோ².

ஏத்த² ச ‘‘விரஜம் பி⁴க்கு²ம் விப்பஸன்னமனாவில’’ந்தி இமினா கே²த்தஸம்பத்திம் த³ஸ்ஸேதி, ‘‘பஸன்னா’’தி இமினா சித்தஸம்பத்திம், ‘‘ஸேஹி பாணிபீ⁴’’தி இமினா பயோக³ஸம்பத்திம். ததா² ‘‘பஸன்னா’’தி இமினா ஸக்கச்சதா³னம் அனுபஹச்சதா³னந்தி ச இமே த்³வே தா³னகு³ணா த³ஸ்ஸிதா, ‘‘ஸேஹி பாணிபீ⁴’’தி இமினா ஸஹத்தே²ன தா³னம் அனுபவித்³த⁴தா³னந்தி இமே த்³வே தா³னகு³ணா த³ஸ்ஸிதா, பீதவத்த²ஸ்ஸ அத்த²ரணேன நிஸீத³னகாலஞ்ஞுதாய சித்திம் கத்வா தா³னம் காலேன தா³னந்தி இமே த்³வே தா³னகு³ணா த³ஸ்ஸிதாதி வேதி³தப்³பா³. ஸேஸம் ஹேட்டா² வுத்தனயமேவ.

ததியபீட²விமானவண்ணனா நிட்டி²தா.