16. ஸிரிமாவிமானவண்ணனா

யுத்தா ச தே பரமஅலங்கதா ஹயாதி ஸிரிமாவிமானம். தஸ்ஸ கா உப்பத்தி? ப⁴க³வா ராஜக³ஹே விஹரதி வேளுவனே கலந்த³கனிவாபே. தேன ச ஸமயேன ஹேட்டா² அனந்தரவத்து²ம்ஹி வுத்தா ஸிரிமா க³ணிகா ஸோதாபத்திப²லஸ்ஸ அதி⁴க³தத்தா விஸ்ஸஜ்ஜிதகிலிட்ட²கம்மந்தா ஹுத்வா ஸங்க⁴ஸ்ஸ அட்ட² ஸலாகப⁴த்தானி பட்ட²பேஸி. ஆதி³தோ பட்டா²ய நிப³த்³த⁴ம் அட்ட² பி⁴க்கூ² கே³ஹம் ஆக³ச்ச²ந்தி. ஸா ‘‘ஸப்பிம் க³ண்ஹத² கீ²ரம் க³ண்ஹதா²’’திஆதீ³னி வத்வா தேஸம் பத்தே பூரேதி, ஏகேன லத்³த⁴ம் திண்ணம்பி சதுன்னம்பி பஹோதி, தே³வஸிகம் ஸோளஸகஹாபணபரிப்³ப³யேன பிண்ட³பாதோ தீ³யதி. அதே²கதி³வஸம் ஏகோ பி⁴க்கு² தஸ்ஸா கே³ஹே அட்ட²கப⁴த்தம் பு⁴ஞ்ஜித்வா தியோஜனமத்த²கே ஏகம் விஹாரம் அக³மாஸி. அத² நம் ஸாயம் தே²ருபட்டா²னே நிஸின்னம் புச்சி²ம்ஸு, ‘‘ஆவுஸோ, கஹம் பி⁴க்க²ம் க³ஹேத்வா இதா⁴க³தோஸீ’’தி? ‘‘ஸிரிமாய அட்ட²கப⁴த்தம் மே பு⁴த்த’’ந்தி. ‘‘தம் மனாபம் கத்வா தே³தி, ஆவுஸோ’’தி. ‘‘ந ஸக்கா தஸ்ஸா ப⁴த்தம் வண்ணேதும், அதிபணீதம் கத்வா தே³தி, ஏகேன லத்³த⁴ம் திண்ணம்பி சதுன்னம்பி பஹோதி, தஸ்ஸா பன தே³ய்யத⁴ம்மதோபி த³ஸ்ஸனமேவ உத்தரிதரம்’’. ஸா ஹி இத்தீ² ஏவரூபா ச ஏவரூபா சாதி தஸ்ஸா கு³ணே கதே²ஸி.

அதே²கோ பி⁴க்கு² தஸ்ஸா கு³ணகத²ம் ஸுத்வா அதி³ஸ்வாபி ஸவனேனேவ ஸினேஹம் உப்பாதே³த்வா ‘‘மயா தத்த² க³ந்த்வா தம் த³ட்டு²ம் வட்டதீ’’தி அத்தனோ வஸ்ஸக்³க³ம் கதே²த்வா தம் பி⁴க்கு²ம் டி²திகம் புச்சி²த்வா ‘‘ஸ்வே, ஆவுஸோ, தஸ்மிம் கே³ஹே த்வம் ஸங்க⁴த்தே²ரோ ஹுத்வா அட்ட²கப⁴த்தம் லபி⁴ஸ்ஸஸீ’’தி ஸுத்வா தங்க²ணஞ்ஞேவ பத்தசீவரமாதா³ய பக்கந்தோ பாதோவ அருணே உக்³க³ச்ச²ந்தே ஸலாகக்³க³ம் பவிஸித்வா டி²தோ ஸங்க⁴த்தே²ரோ ஹுத்வா தஸ்ஸா கே³ஹே அட்ட²கப⁴த்தம் லபி⁴. யோ பன ஸோ பி⁴க்கு² ஹிய்யோ பு⁴ஞ்ஜித்வா பக்காமி, தஸ்ஸ க³தவேலாயமேவஸ்ஸா ஸரீரே ரோகோ³ உப்பஜ்ஜி. தஸ்மா ஆப⁴ரணானி ஓமுஞ்சித்வா நிபஜ்ஜி. அத²ஸ்ஸா தா³ஸியோ அட்ட²கப⁴த்தம் லபி⁴தும் ஆக³தே பி⁴க்கூ² தி³ஸ்வா ஆரோசேஸும். ஸா க³ந்த்வா ஸஹத்தா² பத்தே க³ஹேதும் வா நிஸீதா³பேதும் வா அஸக்கோந்தீ தா³ஸியோ ஆணாபேஸி ‘‘அம்மா பத்தே க³ஹேத்வா அய்யே நிஸீதா³பேத்வா யாகு³ம் பாயேத்வா க²ஜ்ஜகம் த³த்வா ப⁴த்தவேலாய பத்தே பூரேத்வா தே³தா²’’தி. தா ‘‘ஸாது⁴, அய்யே’’தி பி⁴க்கூ² பவேஸேத்வா யாகு³ம் பாயேத்வா க²ஜ்ஜகம் த³த்வா ப⁴த்தவேலாய ப⁴த்தஸ்ஸ பத்தே பூரேத்வா தஸ்ஸா ஆரோசயிம்ஸு. ஸா ‘‘மம் பரிக்³க³ஹேத்வா நேத², அய்யே வந்தி³ஸ்ஸாமீ’’தி வத்வா தாஹி பரிக்³க³ஹேத்வா பி⁴க்கூ²னம் ஸந்திகம் நீதா வேத⁴மானேன ஸரீரேன பி⁴க்கூ² வந்தி³. ஸோ பி⁴க்கு² தம் ஓலோகேத்வா சிந்தேஸி ‘‘கி³லானாய தாவ அயம் ஏதிஸ்ஸா ரூபஸோபா⁴, அரோக³காலே பன ஸப்³பா³ப⁴ரணபடிமண்டி³தாய இமிஸ்ஸா கீதி³ஸீ ரூபஸம்பத்தீ’’தி. அத²ஸ்ஸ அனேகவஸ்ஸகோடிஸன்னிசிதோ கிலேஸோ ஸமுதா³சரி. ஸோ அஞ்ஞாணீ ஹுத்வா ப⁴த்தம் பு⁴ஞ்ஜிதும் அஸக்கோந்தோ பத்தம் ஆதா³ய விஹாரம் க³ந்த்வா பத்தம் பிதா⁴ய ஏகமந்தே ட²பேத்வா சீவரகண்ணம் பத்த²ரித்வா நிபஜ்ஜி. அத² நம் ஏகோ ஸஹாயகோ பி⁴க்கு² யாசந்தோபி போ⁴ஜேதும் நாஸக்கி², ஸோ சி²ன்னப⁴த்தோ அஹோஸி.

தம் தி³வஸமேவ ஸாயன்ஹஸமயே ஸிரிமா காலமகாஸி. ராஜா ஸத்து² ஸாஸனம் பேஸேஸி ‘‘ப⁴ந்தே, ஜீவகஸ்ஸ கனிட்ட²ப⁴கி³னீ ஸிரிமா காலமகாஸீ’’தி. ஸத்தா² தம் ஸுத்வா ரஞ்ஞோ ஸாஸனம் பஹிணி ‘‘ஸிரிமாய ஸரீரஜா²பனகிச்சம் நத்தி², ஆமகஸுஸானே தம் யதா² காகாத³யோ ந கா²த³ந்தி, ததா² நிபஜ்ஜாபேத்வா ரக்கா²பேதா²’’தி. ராஜா ததா² அகாஸி. படிபாடியா தயோ தி³வஸா அதிக்கந்தா, சதுத்தே² தி³வஸே ஸரீரம் உத்³து⁴மாயி, நவஹி வணமுகே²ஹி புளவகா பக்³க⁴ரிம்ஸு, ஸகலஸரீரம் பி⁴ன்னஸாலிப⁴த்தசாடி விய அஹோஸி. ராஜா நக³ரே பே⁴ரிம் சராபேஸி ‘‘ட²பேத்வா கே³ஹரக்க²ணகதா³ரகே ஸிரிமாய த³ஸ்ஸனத்த²ம் அனாக³ச்ச²ந்தானம் அட்ட² கஹாபணா த³ண்டோ³’’தி. ஸத்து² ஸந்திகஞ்ச பேஸேஸி ‘‘பு³த்³த⁴ப்பமுகோ² கிர ஸங்கோ⁴ ஸிரிமாய த³ஸ்ஸனத்த²ம் ஆக³ச்ச²தூ’’தி. ஸத்தா² பி⁴க்கூ²னம் ஆரோசாபேஸி ‘‘ஸிரிமாய த³ஸ்ஸனத்த²ம் க³மிஸ்ஸாமா’’தி.

ஸோபி த³ஹரபி⁴க்கு² சத்தாரோ தி³வஸே கஸ்ஸசி வசனம் அக்³க³ஹேத்வா சி²ன்னப⁴த்தோவ நிபஜ்ஜி. பத்தே ப⁴த்தம் பூதிகம் ஜாதம், பத்தே மலம்பி உட்ட²ஹி. அத² ஸோ ஸஹாயகபி⁴க்கு²னா உபஸங்கமித்வா ‘‘ஆவுஸோ ஸத்தா² ஸிரிமாய த³ஸ்ஸனத்த²ம் க³ச்ச²தீ’’தி வுச்சமானோ ததா² சா²தஜ்ஜ²த்தோபி ‘‘ஸிரிமா’’தி வுத்தபதே³யேவ ஸஹஸா உட்ட²ஹித்வா ‘‘ஸத்தா² ஸிரிமம் த³ட்டு²ம் க³ச்ச²தி, த்வம்பி க³மிஸ்ஸஸீ’’தி? ‘‘ஆம க³மிஸ்ஸாமீ’’தி ப⁴த்தம் ச²ட்³டே³த்வா பத்தம் தோ⁴வித்வா த²விகாய பக்கி²பித்வா பி⁴க்கு²ஸங்கே⁴ன ஸத்³தி⁴ம் அக³மாஸி. ஸத்தா² பி⁴க்கு²ஸங்க⁴பரிவுதோ ஏகபஸ்ஸே அட்டா²ஸி, பி⁴க்கு²னிஸங்கோ⁴பி ராஜபரிஸாபி உபாஸகபரிஸாபி உபாஸிகாபரிஸாபி ஏகேகபஸ்ஸே அட்ட²ம்ஸு.

ஸத்தா² ராஜானம் புச்சி² ‘‘கா ஏஸா, மஹாராஜா’’தி? ‘‘ப⁴ந்தே, ஜீவகஸ்ஸ கனிட்ட²ப⁴கி³னீ ஸிரிமா நாமா’’தி. ‘‘ஸிரிமா ஏஸா’’தி? ‘‘ஆம, ப⁴ந்தே’’தி. தேன ஹி நக³ரே பே⁴ரிம் சராபேஹி ‘‘ஸஹஸ்ஸம் த³த்வா ஸிரிமம் க³ண்ஹந்தூ’’தி. ராஜா ததா² காரேஸி, ஏகோபி ‘‘ஹ’’ந்தி வா ‘‘ஹு’’ந்தி வா வத³ந்தோ நாம நாஹோஸி. ராஜா ஸத்து² ஆரோசேஸி ‘‘ந க³ண்ஹந்தி ப⁴ந்தே’’தி, தேன ஹி மஹாராஜ அக்³க⁴ம் ஓஹாபேஹீதி. ராஜா ‘‘பஞ்சஸதானி த³த்வா க³ண்ஹந்தூ’’தி பே⁴ரிம் சராபேத்வா கஞ்சி க³ண்ஹனகம் அதி³ஸ்வா ‘‘அட்³ட⁴தேய்யஸதானி, த்³வேஸதானி, ஸதம், பஞ்ஞாஸம், பஞ்சவீஸதி, வீஸதி கஹாபணே, த³ஸ கஹாபணே, பஞ்ச கஹாபணே, ஏகம் கஹாபணம், அட்³ட⁴ம், பாத³ம், மாஸகம், காகணிகம் த³த்வா ஸிரிமம் க³ண்ஹந்தூ’’தி பே⁴ரிம் சராபேத்வா ‘‘முதா⁴பி க³ண்ஹந்தூ’’தி பே⁴ரிம் சராபேஸி, ததா²பி ‘‘ஹ’’ந்தி வா ‘‘ஹு’’ந்தி வா வத³ந்தோ நாம நாஹோஸி. ராஜா ‘‘முதா⁴பி, ப⁴ந்தே, க³ண்ஹந்தோ நத்தீ²’’தி ஆஹ. ஸத்தா² ‘‘பஸ்ஸத², பி⁴க்க²வே, மஹாஜனஸ்ஸ பியமாதுகா³மம், இமஸ்மிம்யேவ நக³ரே ஸஹஸ்ஸம் த³த்வா புப்³பே³ ஏகதி³வஸம் லபி⁴ம்ஸு, இதா³னி முதா⁴பி க³ண்ஹந்தோ நத்தி² ஏவரூபம் நாம ரூபம் க²யவயப்பத்தம் ஆஹரிமேஹி அலங்காரேஹி விசித்தகதம் நவன்னம் வண்ணமுகா²னம் வஸேன அருபூ⁴தம் தீஹி அட்டி²ஸதேஹி ஸமுஸ்ஸிதம் நிச்சாதுரம் கேவலம் பா³லமஹாஜனேன ப³ஹுதா⁴ ஸங்கப்பிததாய ப³ஹுஸங்கப்பம் அத்³து⁴வம் அத்தபா⁴வ’’ந்தி த³ஸ்ஸேந்தோ –

‘‘பஸ்ஸ சித்தகதம் பி³ம்ப³ம், அருகாயம் ஸமுஸ்ஸிதம்;

ஆதுரம் ப³ஹுஸங்கப்பம், யஸ்ஸ நத்தி² து⁴வம் டி²தீ’’தி. (தே²ரகா³. 1160) –

கா³த²மாஹ. தே³ஸனாபரியோஸானே ஸிரிமாய படிப³த்³த⁴சித்தோ பி⁴க்கு² விக³தச²ந்த³ராகோ³ ஹுத்வா விபஸ்ஸனம் வட்³டே⁴த்வா அரஹத்தம் பாபுணி, சதுராஸீதியா பாணஸஹஸ்ஸானம் த⁴ம்மாபி⁴ஸமயோ அஹோஸி.

தேன ச ஸமயேன ஸிரிமா தே³வகஞ்ஞா அத்தனோ விப⁴வஸமித்³தி⁴ம் ஓலோகேத்வா ஆக³தட்டா²னம் ஓலோகேந்தீ புரிமத்தபா⁴வே அத்தனோ ஸரீரஸமீபே பி⁴க்கு²ஸங்க⁴பரிவுதம் ப⁴க³வந்தம் டி²தம் மஹாஜனகாயஞ்ச ஸன்னிபதிதம் தி³ஸ்வா பஞ்சஹி தே³வகஞ்ஞாஸதேஹி பரிவுதா பஞ்சஹி ரத²ஸதேஹி தி³ஸ்ஸமானகாயா ஆக³ந்த்வா ரத²தோ ஓதரித்வா ஸபரிவாரா ப⁴க³வந்தம் வந்தி³த்வா கதஞ்ஜலீ அட்டா²ஸி. தேன ச ஸமயேன ஆயஸ்மா வங்கீ³ஸோ ப⁴க³வதோ அவிதூ³ரே டி²தோ ஹோதி. ஸோ ப⁴க³வந்தம் ஏதத³வோச ‘‘படிபா⁴தி மம் ப⁴க³வா ஏகம் பஞ்ஹம் புச்சி²து’’ந்தி. ‘‘படிபா⁴து தம் வங்கீ³ஸா’’தி ப⁴க³வா அவோச. ஆயஸ்மா வங்கீ³ஸோ தம் ஸிரிமம் தே³வதீ⁴தரம் –

137. ‘‘யுத்தா ச தே பரமஅலங்கதா ஹயா, அதோ⁴முகா² அக⁴ஸிக³மா ப³லீ ஜவா;

அபி⁴னிம்மிதா பஞ்சரதா²ஸதா ச தே, அன்வேந்தி தம் ஸாரதி²சோதி³தா ஹயா.

138. ‘‘ஸா திட்ட²ஸி ரத²வரே அலங்கதா,

ஓபா⁴ஸயம் ஜலமிவ ஜோதி போவகோ;

புச்சா²மி தம் வரதனு அனோமத³ஸ்ஸனே,

கஸ்மா நு காயா அனதி⁴வரம் உபாக³மீ’’தி. – படிபுச்சி²;

137. தத்த² யுத்தா ச தே பரமஅலங்கதா ஹயாதி பரமம் அதிவிய விஸேஸதோ அலங்கதா, பரமேஹி வா உத்தமேஹி தி³ப்³பே³ஹி அஸ்ஸாலங்காரேஹி அலங்கதா, பரமா வா அக்³கா³ ஸேட்டா² ஆஜானீயா ஸப்³பா³லங்காரேஹி அலங்கதா ஹயா அஸ்ஸா தே தவ ரதே² யோஜிதா, யுத்தா வா தே ரத²ஸ்ஸ ச அனுச்ச²விகா, அஞ்ஞமஞ்ஞம் வா ஸதி³ஸதாய யுத்தா ஸம்ஸட்டா²தி அத்தோ². ஏத்த² ச ‘‘பரமஅலங்கதா’’தி புரிமஸ்மிம் பக்கே² ஸந்தி⁴ம் அகத்வா து³தியஸ்மிம் பக்கே² அவிப⁴த்திகனித்³தே³ஸோ த³ட்ட²ப்³போ³. அதோ⁴முகா²தி ஹேட்டா²முகா². யதி³பி தே ததா³ பகதியாவ டி²தா, தே³வலோகதோ ஓரோஹணவஸேன ‘‘அதோ⁴முகா²’’தி வுத்தா. அக⁴ஸிக³மாதி வேஹாஸம்க³மா. ப³லீதி ப³லவந்தோ. ஜவாதி ஜவனகா, ப³லவந்தோ சேவ வேக³வந்தோ சாதி அத்தோ². அபி⁴னிம்மிதாதி தவ புஞ்ஞகம்மேன நிம்மிதா நிப்³ப³த்தா. ஸயம் நிம்மிதமேவ வா ஸந்தா⁴ய ‘‘அபி⁴னிம்மிதா’’தி வுத்தம் நிம்மானரதிபா⁴வதோ ஸிரிமாய தே³வதீ⁴தாய. பஞ்சரதா²ஸதாதி கா³தா²ஸுக²த்த²ம் த²காரஸ்ஸ தீ³க⁴ம் லிங்க³விபல்லாஸஞ்ச கத்வா வுத்தம், விப⁴த்திஅலோபோ வா த³ட்ட²ப்³போ³, பஞ்ச ரத²ஸதானீதி அத்தோ². அன்வேந்தி தம் ஸாரதி²சோதி³தா ஹயாதி ஸாரதீ²ஹி சோதி³தா விய ரதே²ஸு யுத்தா இமே ஹயா ப⁴த்³தே³, தே³வதே, தம் அனுக³ச்ச²ந்தி. ‘‘ஸாரதி²அசோதி³தா’’தி கேசி பட²ந்தி, ஸாரதீ²ஹி அசோதி³தா ஏவ அனுக³ச்ச²ந்தீதி அத்தோ². ‘‘ஸாரதி²சோதி³தா ஹயா’’தி ஏகம்யேவ வா பத³ம் கா³தா²ஸுக²த்த²ம் தீ³க⁴ம் கத்வா வுத்தம், ஸாரதி²சோதி³தஹயா பஞ்ச ரத²ஸதாதி யோஜனா.

138. ஸா திட்ட²ஸீதி ஸா த்வம் திட்ட²ஸி. ரத²வரேதி ரது²த்தமே. அலங்கதாதி ஸட்டி²ஸகடபா⁴ரேஹி தி³ப்³பா³லங்காரேஹி அலங்கதஸரீரா. ஓபா⁴ஸயம் ஜலமிவ ஜோதி பாவகோதி ஓபா⁴ஸேந்தீ ஜோதிரிவ ஜலந்தீ பாவகோ விய ச திட்ட²ஸி, ஸமந்ததோ ஓபா⁴ஸேந்தீ ஜலந்தீ திட்ட²ஸீதி வுத்தம் ஹோதி. ‘‘ஜோதீ’’தி ச சந்தி³மஸூரியனக்க²த்ததாரகரூபானம் ஸாதா⁴ரணனாமம். வரதனூதி உத்தமரூபத⁴ரே ஸப்³ப³ங்க³ஸோப⁴னே. ததோ ஏவ அனோமத³ஸ்ஸனே அலாமகத³ஸ்ஸனே, த³ஸ்ஸனீயே பாஸாதி³கேதி அத்தோ². கஸ்மா நு காயா அனதி⁴வரம் உபாக³மீதி குதோ நாம தே³வகாயதோ அனுத்தரம் ஸம்மாஸம்பு³த்³த⁴ம் பயிருபாஸனாய உபக³ஞ்சி² உபக³தாஸி.

ஏவம் தே²ரேன புச்சி²தா ஸா தே³வதா அத்தானம் ஆவிகரோந்தீ –

139. ‘‘காமக்³க³பத்தானம் யமாஹுனுத்தரம், நிம்மாய நிம்மாய ரமந்தி தே³வதா;

தஸ்மா காயா அச்ச²ரா காமவண்ணினீ, இதா⁴க³தா அனதி⁴வரம் நமஸ்ஸிது’’ந்தி. –

கா³த²மாஹ.

139. தத்த² காமக்³க³பத்தானம் யமாஹுனுத்தரந்தி காமூபபோ⁴கே³ஹி அக்³க³பா⁴வம் பத்தானம் பரனிம்மிதவஸவத்தீனம் தே³வானம் யம் தே³வகாயம் யஸேன போ⁴கா³தி³வஸேன ச அனுத்தரந்தி வத³ந்தி, ததோ காயா. நிம்மாய நிம்மாய ரமந்தி தே³வதாதி நிம்மானரதிதே³வதா அத்தனா யதா²ருசிதே காமே ஸயம் நிம்மினித்வா நிம்மினித்வா ரமந்தி கீளந்தி லளந்தா அபி⁴ரமந்தி. தஸ்மா காயாதி தஸ்மா நிம்மானரதிதே³வனிகாயா. காமவண்ணினீதி காமரூபத⁴ரா யதி²ச்சி²தரூபதா⁴ரினீ. இதா⁴க³தாதி இத⁴ இமஸ்மிம் மனுஸ்ஸலோகே, இமம் வா மனுஸ்ஸலோகம் ஆக³தா.

ஏவம் தே³வதாய அத்தனோ நிம்மானரதிதே³வதாபா⁴வே கதி²தே புன தே²ரோ தஸ்ஸா புரிமப⁴வம் தத்த² கதபுஞ்ஞகம்மம் லத்³தி⁴ஞ்ச கதா²பேதுகாமோ –

140. ‘‘கிம் த்வம் புரே ஸுசரிதமாசரீத⁴, கேனச்ச²ஸி த்வம் அமிதயஸா ஸுகே²தி⁴தா;

இத்³தீ⁴ ச தே அனதி⁴வரா விஹங்க³மா, வண்ணோ ச தே த³ஸ தி³ஸா விரோசதி.

141. ‘‘தே³வேஹி த்வம் பரிவுதா ஸக்கதா சஸி,

குதோ சுதா ஸுக³திக³தாஸி தே³வதே;

கஸ்ஸ வா த்வம் வசனகரானுஸாஸனிம்,

ஆசிக்க² மே த்வம் யதி³ பு³த்³த⁴ஸாவிகா’’தி. – த்³வே கா³தா² அபா⁴ஸி;

140. தத்த² ஆசரீதி தீ³க⁴ம் கத்வா வுத்தம், உபசினீதி அத்தோ². இதா⁴தி நிபாதமத்தம், இத⁴ வா இமஸ்மிம் தே³வத்தபா⁴வே. கேனச்ச²ஸீதி கேன புஞ்ஞகம்மேன அஸ்ஸத்தா² அச்ச²ஸி. ‘‘கேனாஸி த்வ’’ந்தி கேசி பட²ந்தி. அமிதயஸாதி ந மிதயஸா அனப்பகபரிவாரா. ஸுகே²தி⁴தாதி ஸுகே²ன வட்³டி⁴தா, ஸுபரிப்³ரூஹிததி³ப்³ப³ஸுகா²தி அத்தோ². இத்³தீ⁴தி தி³ப்³பா³னுபா⁴வோ. அனதி⁴வராதி அதி⁴கா விஸிட்டா² அஞ்ஞா ஏதிஸ்ஸா நத்தீ²தி அனதி⁴வரா, அதிஉத்தமாதி அத்தோ². விஹங்க³மாதி வேஹாஸகா³மினீ. த³ஸ தி³ஸாதி த³ஸபி தி³ஸா. விரோசதீதி ஓபா⁴ஸேதி.

141. பரிவுதா ஸக்கதா சஸீதி ஸமந்ததோ பரிவாரிதா ஸம்பா⁴விதா ச அஸி. குதோ சுதா ஸுக³திக³தாஸீதி பஞ்சஸு க³தீஸு கதரக³திதோ சுதா ஹுத்வா ஸுக³திம் இமம் தே³வக³திம் படிஸந்தி⁴வஸேன உபக³தா அஸி. கஸ்ஸ வா த்வம் வசனகரானுஸாஸனிந்தி கஸ்ஸ நு வா ஸத்து² ஸாஸனே பாவசனே ஓவாதா³னுஸாஸனிஸம்படிச்ச²னேன த்வம் வசனகரா அஸீதி யோஜனா. கஸ்ஸ வா த்வம் ஸத்து² வசனகரா அனுஸாஸகஸ்ஸ அனுஸிட்டி²யம் பதிட்டா²னேனாதி ஏவம் வா ஏத்த² அத்தோ² த³ட்ட²ப்³போ³. ஏவம் அனுத்³தே³ஸிகவஸேன தஸ்ஸா லத்³தி⁴ம் புச்சி²த்வா புன உத்³தே³ஸிகவஸேன ‘‘ஆசிக்க² மே த்வம் யதி³ பு³த்³த⁴ஸாவிகா’’தி புச்ச²தி. தத்த² பு³த்³த⁴ஸாவிகாதி ஸப்³ப³ம்பி ஞேய்யத⁴ம்மம் ஸயம்பு⁴ஞாணேன ஹத்த²தலே ஆமலகம் விய பச்சக்க²தோ பு³த்³த⁴த்தா பு³த்³த⁴ஸ்ஸ ப⁴க³வதோ த⁴ம்மஸ்ஸவனந்தே ஜாதாதி பு³த்³த⁴ஸாவிகா.

ஏவம் தே²ரேன புச்சி²தமத்த²ம் கதே²ந்தீ தே³வதா இமா கா³தா² அபா⁴ஸி –

142. ‘‘நக³ந்தரே நக³ரவரே ஸுமாபிதே, பரிசாரிகா ராஜவரஸ்ஸ ஸிரிமதோ;

நச்சே கீ³தே பரமஸுஸிக்கி²தா அஹும், ஸிரிமாதி மம் ராஜக³ஹே அவேதி³ம்ஸு.

143. ‘‘பு³த்³தோ⁴ ச மே இஸினிஸபோ⁴ வினாயகோ, அதே³ஸயீ ஸமுத³யது³க்க²னிச்சதம்;

அஸங்க²தம் து³க்க²னிரோத⁴ ஸஸ்ஸதம், மக்³க³ஞ்சிமம் அகுடிலமஞ்ஜஸம் ஸிவம்.

144. ‘‘ஸுத்வானஹம் அமதபத³ம் அஸங்க²தம், ததா²க³தஸ்ஸனதி⁴வரஸ்ஸ ஸாஸனம்;

ஸீலேஸ்வஹம் பரமஸுஸம்வுதா அஹும், த⁴ம்மே டி²தா நரவரபு³த்³த⁴தே³ஸிதே.

145. ‘‘ஞத்வானஹம் விரஜபத³ம் அஸங்க²தம், ததா²க³தேனனதி⁴வரேன தே³ஸிதம்;

தத்தே²வஹம் ஸமத²ஸமாதி⁴மாபு²ஸிம், ஸாயேவ மே பரமனியாமதா அஹு.

146. ‘‘லத்³தா⁴னஹம் அமதவரம் விஸேஸனம், ஏகம்ஸிகா அபி⁴ஸமயே விஸேஸிய;

அஸம்ஸயா ப³ஹுஜனபூஜிதா அஹம், கி²ட்³டா³ரதிம் பச்சனுபோ⁴மனப்பகம்.

147. ‘‘ஏவம் அஹம் அமதத³ஸம்ஹி தே³வதா, ததா²க³தஸ்ஸனதி⁴வரஸ்ஸ ஸாவிகா;

த⁴ம்மத்³த³ஸா பட²மப²லே பதிட்டி²தா, ஸோதாபன்னா ந ச பன மத்தி² து³க்³க³தி.

148. ‘‘ஸா வந்தி³தும் அனதி⁴வரம் உபாக³மிம், பாஸாதி³கே குஸலரதே ச பி⁴க்க²வோ;

நமஸ்ஸிதும் ஸமணஸமாக³மம் ஸிவம், ஸகா³ரவா ஸிரிமதோ த⁴ம்மராஜினோ.

149. ‘‘தி³ஸ்வா முனிம் முதி³தமனம்ஹி பீணிதா, ததா²க³தம் நரவரத³ம்மஸாரதி²ம்;

தண்ஹச்சி²த³ம் குஸலரதம் வினாயகம், வந்தா³மஹம் பரமஹிதானுகம்பக’’ந்தி.

142. தத்த² நக³ந்தரேதி இஸிகி³லிவேபுல்லவேபா⁴ரபண்ட³வகி³ஜ்ஜ²கூடஸங்கா²தானம் பஞ்சன்னம் பப்³ப³தானம் அந்தரே வேமஜ்ஜே², யதோ தம் நக³ரம் ‘‘கி³ரிப்³ப³ஜ’’ந்தி வுச்சதி. நக³ரவரேதி உத்தமனக³ரே, ராஜக³ஹம் ஸந்தா⁴யாஹ. ஸுமாபிதேதி மஹாகோ³விந்த³பண்டி³தேன வத்து²விஜ்ஜாவிதி⁴னா ஸம்மதே³வ நிவேஸிதே. பரிசாரிகாதி ஸம்கீ³தபரிசரியாய உபட்டா²யிகா. ராஜவரஸ்ஸாதி பி³ம்பி³ஸாரமஹாராஜஸ்ஸ. ஸிரிமதோதி ஏத்த² ‘‘ஸிரீதி பு³த்³தி⁴புஞ்ஞானம் அதி⁴வசன’’ந்தி வத³ந்தி. அத² வா புஞ்ஞனிப்³ப³த்தா ஸரீரஸோப⁴க்³கா³தி³ஸம்பத்தி கதபுஞ்ஞம் நிஸ்ஸயதி, கதபுஞ்ஞேஹி வா நிஸ்ஸீயதீதி ‘‘ஸிரீ’’தி வுச்சதி, ஸா ஏதஸ்ஸ அத்தீ²தி ஸிரிமா, தஸ்ஸ ஸிரிமதோ. பரமஸுஸிக்கி²தாதி அதிவிய ஸம்மதே³வ ச ஸிக்கி²தா. அஹுந்தி அஹோஸிம். அவேதி³ம்ஸூதி அஞ்ஞாஸும்.

143. இஸினிஸபோ⁴தி க³வஸதஜேட்ட²கோ உஸபோ⁴, க³வஸஹஸ்ஸஜேட்ட²கோ வஸபோ⁴, வஜஸதஜேட்ட²கோ வா உஸபோ⁴, வஜஸஹஸ்ஸஜேட்ட²கோ வஸபோ⁴, ஸப்³ப³க³வஸேட்டோ² ஸப்³ப³பரிஸ்ஸயஸஹோ ஸேதோ பாஸாதி³கோ மஹாபா⁴ரவஹோ அஸனிஸதஸத்³தே³ஹிபி அஸம்பகம்பியோ நிஸபோ⁴. ரதா² ஸோ அத்தனோ நிஸப⁴ப³லேன ஸமன்னாக³தோ சதூஹி பாதே³ஹி பத²விம் உப்பீளேத்வா கேனசி பரிஸ்ஸயேன அகம்பியோ அசலட்டா²னேன திட்ட²தி, ஏவம் ப⁴க³வா த³ஸஹி ததா²க³தப³லேஹி ஸமன்னாக³தோ சதூஹி வேஸாரஜ்ஜபாதே³ஹி அட்ட²பரிஸபத²விம் உப்பீளேத்வா ஸதே³வகே லோகே கேனசி பச்சத்தி²கேன பச்சாமித்தேன அகம்பியோ அசலட்டா²னேன திட்ட²தி, தஸ்மா நிஸபோ⁴ வியாதி நிஸபோ⁴. ஸீலாதீ³னம் த⁴ம்மக்க²ந்தா⁴னம் ஏஸனட்டே²ன ‘‘இஸீ’’தி லத்³த⁴வோஹாரேஸு ஸேக்கா²ஸேக்க²இஸீஸு நிஸபோ⁴, இஸீனம் வா நிஸபோ⁴, இஸி ச ஸோ நிஸபோ⁴ சாதி வா இஸினிஸபோ⁴. வேனேய்யஸத்தே வினேதீதி வினாயகோ, நாயகவிரஹிதோதி வா வினாயகோ, ஸயம்பூ⁴தி அத்தோ².

அதே³ஸயீ ஸமுத³யது³க்க²னிச்சதந்தி ஸமுத³யஸச்சஸ்ஸ ச து³க்க²ஸச்சஸ்ஸ ச அனிச்சதம் வயத⁴ம்மதம் அபா⁴ஸி. தேன ‘‘யம்கிஞ்சி ஸமுத³யத⁴ம்மம், ஸப்³ப³ம் தம் நிரோத⁴த⁴ம்ம’’ந்தி அத்தனோ அபி⁴ஸமயஞாணஸ்ஸ பவத்திஆகாரம் த³ஸ்ஸேதி. ஸமுத³யது³க்க²னிச்சதந்தி வா ஸமுத³யஸச்சஞ்ச து³க்க²ஸச்சஞ்ச அனிச்சதஞ்ச. தத்த² ஸமுத³யஸச்சது³க்க²ஸச்சக்³க³ஹணேன விபஸ்ஸனாய பூ⁴மிம் த³ஸ்ஸேதி, அனிச்சதாக³ஹணேன தஸ்ஸா பவத்திஆகாரம் த³ஸ்ஸேதி. ஸங்கா²ரானஞ்ஹி அனிச்சாகாரே விபா⁴விதே து³க்கா²காரோ அனத்தாகாரோபி விபா⁴விதோயேவ ஹோதி தம்னிப³ந்த⁴னத்தா தேஸம். தேனாஹ ‘‘யத³னிச்சம், தம் து³க்க²ம், யம் து³க்க²ம், தத³னத்தா’’தி (ஸம். நி. 3.15). அஸங்க²தம் து³க்க²னிரோத⁴ஸஸ்ஸதந்தி கேனசி பச்சயேன ந ஸங்க²தந்தி அஸங்க²தம், ஸப்³ப³காலம் தத²பா⁴வேன ஸஸ்ஸதம், ஸகலவட்டது³க்க²னிரோத⁴பா⁴வதோ து³க்க²னிரோத⁴ம் அரியஸச்சஞ்ச மே அதே³ஸயீதி யோஜனா. மக்³க³ஞ்சிமம் அகுடிலமஞ்ஜஸம் ஸிவந்தி அந்தத்³வயபரிவஜ்ஜனேன குடிலபா⁴வகரானம் மாயாதீ³னம் காயவங்காதீ³னஞ்ச பஹானேன அகுடிலம், ததோ ஏவ அஞ்ஜஸம், அஸிவபா⁴வகரானம் காமராகா³தீ³னம் ஸமுச்சி²ந்த³னேன ஸிவம் நிப்³பா³னம். மக்³க³ந்தி நிப்³பா³னத்தி²கேஹி மக்³கீ³யதி, கிலேஸே வா மாரேந்தோ க³ச்ச²தீதி ‘‘மக்³கோ³’’தி லத்³த⁴னாமம் இத³ம் தும்ஹாகஞ்ச மமஞ்ச பச்சக்க²பூ⁴தம் து³க்க²னிரோத⁴கா³மினிபடிபதா³ஸங்கா²தம் அரியஸச்சஞ்ச மே அதே³ஸயீதி யோஜனா.

144. ஸுத்வானஹம் அமதபத³ம் அஸங்க²தம், ததா²க³தஸ்ஸனதி⁴வரஸ்ஸ ஸாஸனந்தி ஏத்த² அயம் ஸங்கே²பத்தோ² – ததா² ஆக³மனாதி³அத்தே²ன ததா²க³தஸ்ஸ, ஸதே³வகே லோகே அக்³க³பா⁴வதோ அனதி⁴வரஸ்ஸ, ஸம்மாஸம்பு³த்³த⁴ஸ்ஸ அமதபத³ம் அஸங்க²தம் நிப்³பா³னம் உத்³தி³ஸ்ஸ தே³ஸிதத்தா, அமதஸ்ஸ வா நிப்³பா³னஸ்ஸ படிபஜ்ஜனுபாயத்தா கேனசிபி அஸங்க²ரணீயத்தா ச அமதபத³ம் அஸங்க²தம் ஸாஸனம் ஸத்³த⁴ம்மம் அஹம் ஸுத்வானாதி. ஸீலேஸ்வஹந்தி ஸீலேஸு நிப்பா²தே³தப்³பே³ஸு அஹம். பரமஸுஸம்வுதாதி அதிவிய ஸம்மதே³வ ஸம்வுதா. அஹுந்தி அஹோஸிம். த⁴ம்மே டி²தாதி படிபத்தித⁴ம்மே பதிட்டி²தா.

145. ஞத்வானாதி ஸச்சி²கிரியாபி⁴ஸமயவஸேன ஜானித்வா. தத்தே²வாதி தஸ்மிம்யேவ க²ணே, தஸ்மிம்யேவ வா அத்தபா⁴வே. ஸமத²ஸமாதி⁴மாபு²ஸிந்தி பச்சனீகத⁴ம்மானம் ஸமுச்சே²த³வஸேன ஸமனதோ வூபஸமனதோ பரமத்த²ஸமத²பூ⁴தம் லோகுத்தரஸமாதி⁴ம் ஆபு²ஸிம் அதி⁴க³ச்சி²ம். யதி³பி யஸ்மிம் க²ணே நிரோத⁴ஸ்ஸ ஸச்சி²கிரியாபி⁴ஸமயோ, தஸ்மிம்யேவ க²ணே மக்³க³ஸ்ஸ பா⁴வனாபி⁴ஸமயோ, ஆரம்மணபடிவேத⁴ம் பன பா⁴வனாபடிவேத⁴ஸ்ஸேவ புரிமஸித்³தி⁴காரணம் விய கத்வா த³ஸ்ஸேதும் –

‘‘ஞத்வானஹம் விரஜபத³ம் அஸங்க²தம், ததா²க³தேனனதி⁴வரேன தே³ஸிதம்’’.

தத்தே²வஹம் ‘ஸமத²ஸமாதி⁴மாபு²ஸி’ந்தி வுத்தம் யதா² ‘‘சக்கு²ஞ்ச படிச்ச ரூபே ச உப்பஜ்ஜதி சக்கு²விஞ்ஞாண’’ந்தி (ம. நி. 1.400; 3.421; ஸம். நி. 4.60). ஞத்வானாதி வா ஸமானகாலவஸேன வுத்தந்தி வேதி³தப்³ப³ம் யதா² ‘‘நிஹந்த்வான தமம் ஸப்³ப³ம், ஆதி³ச்சோ நப⁴முக்³க³தோ’’தி. ஸாயேவாதி யா லோகுத்தரஸமாதி⁴பு²ஸனா லத்³தா⁴, ஸாயேவ. பரமனியாமதாதி பரமா உத்தமா மக்³க³னியாமதா.

146. விஸேஸனந்தி புது²ஜ்ஜனேஹி விஸேஸகம் விஸிட்ட²பா⁴வஸாத⁴கம். ஏகம்ஸிகாதி ‘‘ஸம்மாஸம்பு³த்³தோ⁴ ப⁴க³வா, ஸ்வாக்கா²தோ த⁴ம்மோ, ஸுப்படிபன்னோ ஸங்கோ⁴’’தி ஏகம்ஸகா³ஹவதீ ரதனத்தயே நிப்³பி³சிகிச்சா². அபி⁴ஸமயே விஸேஸியாதி ஸச்சபடிவேத⁴வஸேன விஸேஸம் பத்வா. ‘‘விஸேஸினீ’’திபி பட²ந்தி, அபி⁴ஸமயஹேது விஸேஸவதீதி அத்தோ². அஸம்ஸயாதி ஸோளஸவத்து²காய அட்ட²வத்து²காய ச விசிகிச்சா²ய பஹீனத்தா அபக³தஸம்ஸயா. ‘‘அஸம்ஸியா’’தி கேசி பட²ந்தி. ப³ஹுஜனபூஜிதாதி ஸுக³தீஹி பரேஹி பத்த²னீயகு³ணாதி அத்தோ². கி²ட்³டா³ரதிந்தி கி²ட்³டா³பூ⁴தம் ரதிம், அத² வா கி²ட்³ட³ஞ்ச ரதிஞ்ச கி²ட்³டா³விஹாரஞ்ச ரதிஸுக²ஞ்ச.

147. அமதத³ஸம்ஹீதி அமதத³ஸா நிப்³பா³னத³ஸ்ஸாவினீ அம்ஹி. த⁴ம்மத்³த³ஸாதி சதுஸச்சத⁴ம்மம் தி³ட்ட²வதீ. ஸோதாபன்னாதி அரியமக்³க³ஸோதம் ஆதி³தோ பத்தா. ந ச பன மத்தி² து³க்³க³தீதி ந ச பன மே அத்தி² து³க்³க³தி அவினிபாதத⁴ம்மத்தா.

148. பாஸாதி³கேதி பஸாதா³வஹே. குஸலரதேதி குஸலே அனவஜ்ஜத⁴ம்மே நிப்³பா³னே ரதே. பி⁴க்க²வோதி பி⁴க்கூ² நமஸ்ஸிதும் உபாக³மிந்தி யோஜனா. ஸமணஸமாக³மம் ஸிவந்தி ஸமணானம் ஸமிதபாபானம் பு³த்³த⁴பு³த்³த⁴ஸாவகானம் ஸிவஞ்ச த⁴ம்மம் கே²மம் ஸமாக³மம் ஸங்க³மம் பயிருபாஸிதும் உபாக³மிந்தி ஸம்ப³ந்தோ⁴. ஸிரிமதோ த⁴ம்மராஜினோதி பு⁴ம்மத்தே² ஸாமிவசனம். ஸிரிமதி த⁴ம்மராஜினீதி அத்தோ². ஏவமேவ ச கேசி பட²ந்தி.

149. முதி³தமனம்ஹீதி மோதி³தமனா அம்ஹி. பீணிதாதி துட்டா², பீதிரஸவஸேன வா தித்தா. நரவரத³ம்மஸாரதி²ந்தி நரவரோ ச ஸோ அக்³க³புக்³க³லத்தா, த³ம்மானம் த³மேதப்³பா³னம் வேனேய்யானம் நிப்³பா³னாபி⁴முக²ம் ஸாரணதோ த³ம்மஸாரதி² சாதி நரவரத³ம்மஸாரதி², தம். பரமஹிதானுகம்பகந்தி பரமேன உத்தமேன ஹிதேன ஸப்³ப³ஸத்தானம் அனுகம்பகம்.

ஏவம் ஸிரிமா தே³வதீ⁴தா அத்தனோ லத்³தி⁴பவேத³னமுகே²ன ரதனத்தயே பஸாத³ம் பவேதே³த்வா ப⁴க³வந்தம் பி⁴க்கு²ஸங்க⁴ஞ்ச வந்தி³த்வா பத³க்கி²ணம் கத்வா தே³வலோகமேவ க³தா. ப⁴க³வா தமேவ ஓதிண்ணவத்து²ம் அட்டு²ப்பத்திம் கத்வா த⁴ம்மம் தே³ஸேஸி, தே³ஸனாபரியோஸானே உக்கண்டி²தபி⁴க்கு² அரஹத்தம் பாபுணி, ஸம்பத்தபரிஸாயபி ஸா த⁴ம்மதே³ஸனா ஸாத்தி²கா ஜாதாதி.

ஸிரிமாவிமானவண்ணனா நிட்டி²தா.