15. உத்தராவிமானவண்ணனா

அபி⁴க்கந்தேன வண்ணேனாதி உத்தராவிமானம். தஸ்ஸ கா உப்பத்தி? ப⁴க³வா ராஜக³ஹே விஹரதி வேளுவனே கலந்த³கனிவாபே. தேன ச ஸமயேன புண்ணோ நாம து³க்³க³தபுரிஸோ ராஜக³ஹஸேட்டி²ம் உபனிஸ்ஸாய ஜீவதி, தஸ்ஸ ப⁴ரியா உத்தரா, உத்தரா ச நாம தீ⁴தாதி த்³வே ஏவ கே³ஹமானுஸகா. அதே²கதி³வஸம் ராஜக³ஹே ‘‘மஹாஜனேன ஸத்தாஹம் நக்க²த்தம் கீளிதப்³ப³’’ந்தி கோ⁴ஸனம் கரிம்ஸு. தம் ஸுத்வா ஸேட்டி² பாதோவ ஆக³தம் புண்ணம் ‘‘தாத, அம்ஹாகம் பரிஜனோ நக்க²த்தம் கீளிதுகாமோ, த்வம் கிம் நக்க²த்தம் கீளிஸ்ஸஸி, உதா³ஹு ப⁴திம் கரிஸ்ஸஸீ’’தி ஆஹ. ‘‘ஸாமி, நக்க²த்தம் நாம ஸத⁴னானம் ஹோதி, மம பன கே³ஹே ஸ்வாதனாய யாகு³தண்டு³லானிபி நத்தி², கிம் மே நக்க²த்தேன? கோ³ணே லப⁴ந்தோ கஸிதும் க³மிஸ்ஸாமீ’தி. ‘‘தேன ஹி கோ³ணே க³ண்ஹஸ்ஸூ’’தி. ஸோ ப³லவகோ³ணே ச ப⁴த்³த³னங்க³லஞ்ச க³ஹேத்வா ‘‘ப⁴த்³தே³, நாக³ரா நக்க²த்தம் கீளந்தி, அஹம் த³லித்³த³தாய ப⁴திம் காதும் க³மிஸ்ஸாமி, மய்ஹம்பி தாவ அஜ்ஜ தி³கு³ணம் நிவாபம் பசித்வா ப⁴த்தம் ஆஹரேய்யாஸீ’’தி ப⁴ரியம் வத்வா கே²த்தம் அக³மாஸி.

ஸாரிபுத்தத்தே²ரோபி ஸத்தாஹம் நிரோத⁴ஸமாபன்னோ ததோ வுட்டா²ய ‘‘கஸ்ஸ நு கோ² அஜ்ஜ மயா ஸங்க³ஹம் காதும் வட்டதீ’’தி ஓலோகேந்தோ புண்ணம் அத்தனோ ஞாணஜாலஸ்ஸ அந்தோ பவிட்ட²ம் தி³ஸ்வா ‘‘ஸத்³தோ⁴ நு கோ² ஏஸ, ஸக்கி²ஸ்ஸதி வா மே ஸங்க³ஹம் காது’’ந்தி ஓலோகேந்தோ தஸ்ஸ ஸத்³த⁴பா⁴வஞ்ச ஸங்க³ஹம் காதும் ஸமத்த²பா⁴வஞ்ச தப்பச்சயா ச தஸ்ஸ மஹாஸம்பத்திபடிலாப⁴ம் ஞத்வா பத்தசீவரம் ஆதா³ய தஸ்ஸ கஸனட்டா²னம் க³ந்த்வா ஆவாடதீரே ஏகம் கு³ம்ப³ம் ஓலோகேந்தோ அட்டா²ஸி. புண்ணோ தே²ரம் தி³ஸ்வாவ கஸிம் ட²பேத்வா பஞ்சபதிட்டி²தேன தே²ரம் வந்தி³த்வா ‘‘த³ந்தகட்டே²ன அத்தோ² ப⁴விஸ்ஸதீ’’தி த³ந்தகட்ட²ம் கப்பியம் கத்வா அதா³ஸி. அத²ஸ்ஸ தே²ரோ பத்தஞ்ச பரிஸ்ஸாவனஞ்ச நீஹரித்வா அதா³ஸி. ஸோ ‘‘பானீயேன அத்தோ² ப⁴விஸ்ஸதீ’’தி தம் ஆதா³ய பானீயம் பரிஸ்ஸாவேத்வா அதா³ஸி.

தே²ரோ சிந்தேஸி ‘‘அயம் பரேஸம் பச்சி²மகே³ஹே வஸதி, ஸசஸ்ஸ கே³ஹத்³வாரம் க³மிஸ்ஸாமி, இமஸ்ஸ ப⁴ரியா மம் த³ட்டு²ம் ந ஸக்கி²ஸ்ஸதி, யாவஸ்ஸ ப⁴ரியா ப⁴த்தம் ஆதா³ய மக்³க³ம் படிபஜ்ஜதி, தாவ இதே⁴வ ப⁴விஸ்ஸாமீ’’தி. ஸோ தத்தே²வ தோ²கம் வீதினாமேத்வா தஸ்ஸா மக்³கா³ருள்ஹபா⁴வம் ஞத்வா அந்தோனக³ராபி⁴முகோ² பாயாஸி. ஸா அந்தராமக்³கே³ தே²ரம் தி³ஸ்வா சிந்தேஸி ‘‘அப்பேகதா³ஹம் தே³ய்யத⁴ம்மே ஸதி அய்யம் ந பஸ்ஸாமி, அப்பேகதா³ மே அய்யம் பஸ்ஸந்தியா தே³ய்யத⁴ம்மோ ந ஹோதி, அஜ்ஜ பன மே அய்யோ ச தி³ட்டோ², தே³ய்யத⁴ம்மோ சாயம் அத்தி², கரிஸ்ஸதி நு கோ² மே ஸங்க³ஹ’’ந்தி. ஸா ப⁴த்தபா⁴ஜனம் ஓதாரேத்வா தே²ரம் பஞ்சபதிட்டி²தேன வந்தி³த்வா ‘‘ப⁴ந்தே, இத³ம் லூக²ம் வா பணீதம் வாதி அசிந்தேத்வா தா³ஸஸ்ஸ வோ ஸங்க³ஹம் கரோதா²’’தி ஆஹ. அத² தே²ரோ பத்தம் உபனாமேத்வா தாய ஏகேன ஹத்தே²ன பா⁴ஜனம் தா⁴ரேத்வா ஏகேன ஹத்தே²ன ததோ ப⁴த்தம் த³த³மானாய உபட்³ட⁴ப⁴த்தே தி³ன்னே ‘‘அல’’ந்தி ஹத்தே²ன பத்தம் பித³ஹி. ஸா ‘‘ப⁴ந்தே, ஏகோவ படிவீஸோ, ந ஸக்கா த்³விதா⁴ காதும், தும்ஹாகம் தா³ஸஸ்ஸ இத⁴லோகஸங்க³ஹம் அகத்வா பரலோகஸங்க³ஹம் கரோத², நிரவஸேஸமேவ தா³துகாமாம்ஹீ’’தி வத்வா ஸப்³ப³மேவஸ்ஸ பத்தே பதிட்டா²பேத்வா ‘‘தும்ஹேஹி தி³ட்ட²த⁴ம்மஸ்ஸ பா⁴கி³னீ அஸ்ஸ’’ந்தி பத்த²னம் அகாஸி. தே²ரோ ‘‘ஏவம் ஹோதூ’’தி வத்வா டி²தகோவ அனுமோத³னம் கத்வா ஏகஸ்மிம் உத³கபா²ஸுகட்டா²னே நிஸீதி³த்வா ப⁴த்தகிச்சம் அகாஸி. ஸாபி படினிவத்தித்வா தண்டு³லே பரியேஸித்வா ப⁴த்தம் பசி.

புண்ணோபி அட்³ட⁴கரீஸமத்தம் டா²னம் கஸித்வா ஜிக⁴ச்ச²ம் ஸஹிதும் அஸக்கோந்தோ கோ³ணே விஸ்ஸஜ்ஜேத்வா ஏகம் ருக்க²சா²யம் பவிஸித்வா மக்³க³ம் ஓலோகேந்தோ நிஸீதி³. அத²ஸ்ஸ ப⁴ரியா ப⁴த்தமாதா³ய க³ச்ச²மானா தம் தி³ஸ்வாவ ‘‘ஏஸ ஜிக⁴ச்சா²பீளிதோ மம் ஓலோகேந்தோ நிஸின்னோ, ஸசே மம் ‘அதிவிய சிராயீ’தி தஜ்ஜேத்வா பதோத³லட்டி²யா பஹரிஸ்ஸதி, மயா கதகம்மம் நிரத்த²கம் ப⁴விஸ்ஸதி, படிகச்சேவஸ்ஸ ஆரோசேஸ்ஸாமீ’’தி சிந்தேத்வா ஏவமாஹ ‘‘ஸாமி, அஜ்ஜேகதி³வஸம் சித்தம் பஸாதே³ஹி, மா மயா கதகம்மம் நிரத்த²கம் கரி, அஹம் பாதோவ தே ப⁴த்தம் ஆஹரந்தீ அந்தராமக்³கே³ த⁴ம்மஸேனாபதிம் தி³ஸ்வா தவ ப⁴த்தம் தஸ்ஸ த³த்வா புன கே³ஹம் க³ந்த்வா ப⁴த்தம் பசித்வா ஆக³தா, பஸாதே³ஹி, ஸாமி, சித்த’’ந்தி. ஸோ ‘‘கிம் வதே³ஸி, ப⁴த்³தே³’’தி புச்சி²த்வா புன தமத்த²ம் ஸுத்வா ‘‘ப⁴த்³தே³, ஸாது⁴ வத தே கதம் மம ப⁴த்தம் அய்யஸ்ஸ த³த³மானாய, மயாபிஸ்ஸ அஜ்ஜ பாதோவ த³ந்தகட்ட²ஞ்ச முகோ²த³கஞ்ச தி³ன்ன’’ந்தி பஸன்னமானஸோ தம் வசனம் அபி⁴னந்தி³த்வா உஸ்ஸூரே லத்³த⁴ப⁴த்ததாய கிலந்தகாயோ தஸ்ஸா அங்கே ஸீஸம் கத்வா நித்³த³ம் ஓக்கமி.

அத²ஸ்ஸ பாதோவ கஸிதட்டா²னம் பம்ஸுசுண்ணம் உபாதா³ய ஸப்³ப³ம் ரத்தஸுவண்ணம் ஹுத்வா கணிகாரபுப்ப²ராஸி விய ஸோப⁴மானம் அட்டா²ஸி. ஸோ பபு³த்³தோ⁴ ஓலோகேத்வா ப⁴ரியம் ஆஹ ‘‘ப⁴த்³தே³, ஏதம் மயா கஸிதட்டா²னம் ஸப்³ப³ம் மம ஸுவண்ணம் ஹுத்வா பஞ்ஞாயதி, கிம் நு கோ² மே அதிஉஸ்ஸூரே லத்³த⁴ப⁴த்ததாய அக்கீ²னி ப⁴மந்தீ’’தி. ‘‘ஸாமி, மய்ஹம்பி ஏவமேவ பஞ்ஞாயதீ’’தி. ஸோ உட்டா²ய தத்த² க³ந்த்வா ஏகம் பிண்ட³ம் க³ஹேத்வா நங்க³லஸீஸே பஹரித்வா ஸுவண்ணபா⁴வம் ஞத்வா ‘‘அஹோ அய்யஸ்ஸ த⁴ம்மஸேனாபதிஸ்ஸ தி³ன்னதா³னே அஜ்ஜேவ விபாகோ த³ஸ்ஸிதோ, ந கோ² பன ஸக்கா ஏத்தகம் த⁴னம் படிச்சா²தே³த்வா பரிபு⁴ஞ்ஜிது’’ந்தி ப⁴ரியாய ஆப⁴தம் ப⁴த்தபாதிம் ஸுவண்ணஸ்ஸ பூரேத்வா ராஜகுலம் க³ந்த்வா ரஞ்ஞா கதோகாஸோ பவிஸித்வா ராஜானம் அபி⁴வாதே³த்வா ‘‘கிம் தாதா’’தி வுத்தே ‘‘தே³வ, அஜ்ஜ மயா கஸிதட்டா²னம் ஸப்³ப³ம் ஸுவண்ணராஸிமேவ ஹுத்வா டி²தம், ஸுவண்ணம் ஆஹராபேதும் வட்டதீ’’தி ஆஹ. ‘‘கோஸி த்வ’’ந்தி? ‘‘புண்ணோ நாமாஹ’’ந்தி. ‘‘கிம் பன தே அஜ்ஜ கத’’ந்தி? ‘‘த⁴ம்மஸேனாபதிஸ்ஸ மே பாதோவ த³ந்தகட்ட²ஞ்ச முகோ²த³கஞ்ச தி³ன்னம், ப⁴ரியாயபி மே மய்ஹம் ஆஹடப⁴த்தம் தஸ்ஸேவ தி³ன்ன’’ந்தி.

தம் ஸுத்வா ராஜா ‘‘அஜ்ஜேவ கிர போ⁴ த⁴ம்மஸேனாபதிஸ்ஸ தி³ன்னதா³னே விபாகோ த³ஸ்ஸிதோ’’தி வத்வா ‘‘தாத, கிம் கரோமீ’’தி புச்சி². ‘‘ப³ஹூனி ஸகடஸஹஸ்ஸானி பஹிணித்வா ஸுவண்ணம் ஆஹராபேதா²’’தி. ராஜா ஸகடானி பஹிணி. ராஜபுரிஸேஸு ‘‘ரஞ்ஞோ ஸந்தக’’ந்தி க³ண்ஹந்தேஸு க³ஹிதம் க³ஹிதம் மத்திகாவ ஹோதி. தேஹி க³ந்த்வா ரஞ்ஞோ ஆரோசிதே ‘‘தாதா, தும்ஹேஹி கிந்தி வத்வா க³ஹித’’ந்தி புட்டா² ‘‘தும்ஹாகம் ஸந்தக’’ந்தி ஆஹம்ஸு. தேன ஹி, தாதா, புன க³ச்ச²த², ‘‘புண்ணஸ்ஸ ஸந்தக’’ந்தி வத்வா க³ண்ஹதா²தி. தே ததா² கரிம்ஸு க³ஹிதம் க³ஹிதம் ஸுவண்ணமேவ அஹோஸி. தம் ஸப்³ப³ம் ஆஹரித்வா ராஜங்க³ணே ராஸிம் அகம்ஸு, அஸீதிஹத்து²ப்³பே³தோ⁴ ராஸி அஹோஸி. ராஜா நாக³ரே ஸன்னிபாதாபேத்வா ஆஹ ‘‘இமஸ்மிம் நக³ரே அத்தி² கஸ்ஸசி ஏத்தகம் ஸுவண்ண’’ந்தி? ‘‘நத்தி², தே³வா’’தி. ‘‘கிம் பனஸ்ஸ தா³தும் வட்டதீ’’தி? ‘‘ஸேட்டி²ச்ச²த்தம், தே³வா’’தி. ராஜா ‘‘ப³ஹுத⁴னஸேட்டி² நாம ஹோதூ’’தி மஹந்தேன போ⁴கே³ன ஸத்³தி⁴ம் தஸ்ஸ ஸேட்டி²ச்ச²த்தம் அதா³ஸி.

அத² நம் ஸோ ஆஹ ‘‘மயம், தே³வ, ஏத்தகம் காலம் பரகுலே வஸிம்ஹா, வஸனட்டா²னம் நோ தே³தா²’’தி. தேன ஹி பஸ்ஸ, ஏஸ கு³ம்போ³ பஞ்ஞாயதி, ஏதம் ஹராபேத்வா கே³ஹம் காரேஹீதி புராணஸேட்டி²ஸ்ஸ கே³ஹட்டா²னம் ஆசிக்கி². ஸோ தஸ்மிம் டா²னே கதிபாஹேனேவ கே³ஹம் காராபேத்வா கே³ஹபவேஸனமங்க³லஞ்ச ச²த்தமங்க³லஞ்ச ஏகதோவ கரோந்தோ ஸத்தாஹம் பு³த்³த⁴ப்பமுக²ஸ்ஸ பி⁴க்கு²ஸங்க⁴ஸ்ஸ தா³னம் அதா³ஸி. அத²ஸ்ஸ ஸத்தா² தா³னானுமோத³னம் கரோந்தோ அனுபுப்³பி³ம் கத²ம் கதே²ஸி. த⁴ம்மகதா²வஸானே புண்ணஸேட்டி² ச ப⁴ரியா சஸ்ஸ தீ⁴தா ச உத்தராதி தயோபி ஜனா ஸோதாபன்னா அஹேஸும்.

அபரபா⁴கே³ ராஜக³ஹஸேட்டி² புண்ணஸேட்டி²னோ தீ⁴தரம் அத்தனோ புத்தஸ்ஸ வாரேஸி. ஸோ ‘‘நாஹம் த³ஸ்ஸாமீ’’தி வுத்தோ ‘‘மா ஏவம் கரோது, ஏத்தகம் காலம் அம்ஹே நிஸ்ஸாய வஸந்தேனேவ தே ஸம்பத்தி லத்³தா⁴, தே³து மே புத்தஸ்ஸ தே தீ⁴தர’’ந்தி ஆஹ. ஸோ ‘‘மிச்சா²தி³ட்டி²கா தும்ஹே, மம தீ⁴தா தீஹி ரதனேஹி வினா வஸிதும் ந ஸக்கோதி, நேவஸ்ஸ தீ⁴தரம் த³ஸ்ஸாமீ’’தி ஆஹ. அத² நம் ப³ஹூ ஸேட்டி²க³ஹபதிகாத³யோ குலபுத்தா ‘‘மா தேன ஸத்³தி⁴ம் விஸ்ஸாஸம் பி⁴ந்தி³, தே³ஹிஸ்ஸ தீ⁴தர’’ந்தி யாசிம்ஸு. ஸோ தேஸம் வசனம் ஸம்படிச்சி²த்வா ஆஸாள்ஹிபுண்ணமாய தீ⁴தரம் அதா³ஸி. ஸா பதிகுலம் க³தகாலதோ பட்டா²ய பி⁴க்கு²ம் வா பி⁴க்கு²னிம் வா உபஸங்கமிதும் தா³னம் வா தா³தும் த⁴ம்மம் வா ஸோதும் நாலத்த², ஏவம் அட்³ட⁴தியேஸு மாஸேஸு வீதிவத்தேஸு அத்தனோ ஸந்திகே டி²தே பரிசாரிகே புச்சி² ‘‘இதா³னி கித்தகம் அந்தோவஸ்ஸம் அவஸிட்ட²’’ந்தி? ‘‘அட்³ட⁴மாஸோ, அய்யே’’தி. ஸா மாதாபிதூனம் ஸாஸனம் பஹிணி ‘‘கஸ்மா மம் ஏவரூபே ப³ந்த⁴னாகா³ரே பக்கி²பிம்ஸு, வரம் தும்ஹேஹி மம் லக்க²ணாஹதம் கத்வா பரேஸம் தா³ஸிம் ஸாவேதும், ந ஏவரூபஸ்ஸ மிச்சா²தி³ட்டி²கஸ்ஸ குலஸ்ஸ தா³தும், ஆக³தகாலதோ பட்டா²ய பி⁴க்கு²த³ஸ்ஸனாதீ³ஸு ஏகம்பி புஞ்ஞம் காதும் ந லபா⁴மீ’’தி. அத²ஸ்ஸா பிதா ‘‘து³க்கி²தா வத மே தீ⁴தா’’தி அனத்தமனதம் பவேதே³த்வா பஞ்சத³ஸ கஹாபணஸஹஸ்ஸானி பேஸேஸி, ‘‘இமஸ்மிம் நக³ரே ஸிரிமா நாம க³ணிகா அத்தி², தே³வஸிகம் ஸஹஸ்ஸம் க³ண்ஹாதி, இமேஹி கஹாபணேஹி தம் ஆனேத்வா ஸாமிகஸ்ஸ நிய்யாதே³த்வா ஸயம் யதா²ருசி புஞ்ஞானி கரோதூ’’தி ஸாஸனஞ்ச பஹிணி. உத்தரா ததா² கத்வா ஸாமிகேன ஸிரிமம் தி³ஸ்வா ‘‘கிமித³’’ந்தி வுத்தே ‘‘ஸாமி, இமம் அட்³ட⁴மாஸம் மம ஸஹாயிகா தும்ஹே பரிசரது, அஹம் பன இமம் அட்³ட⁴மாஸம் தா³னஞ்சேவ தா³துகாமா த⁴ம்மஞ்ச ஸோதுகாமா’’தி ஆஹ. ஸோ தம் அபி⁴ரூபம் இத்தி²ம் தி³ஸ்வா உப்பன்னஸினேஹோ ‘‘ஸாதூ⁴’’தி ஸம்படிச்சி².

உத்தராபி கோ² பு³த்³த⁴ப்பமுக²ம் பி⁴க்கு²ஸங்க⁴ம் நிமந்தேத்வா ‘‘ப⁴ந்தே, இமம் அட்³ட⁴மாஸம் அஞ்ஞத்த² அக³ந்த்வா இதே⁴வ பி⁴க்கா² க³ஹேதப்³பா³’’தி ஸத்து² படிஞ்ஞம் க³ஹேத்வா ‘‘இதோ தா³னி பட்டா²ய யாவ மஹாபவாரணா, தாவ ஸத்தா²ரம் உபட்டா²தும் த⁴ம்மஞ்ச ஸோதும் லபி⁴ஸ்ஸாமீ’’தி துட்ட²மானஸா ‘‘ஏவம் யாகு³ம் பசத², ஏவம் ப⁴த்தம் பசத², ஏவம் பூவம் பசதா²’’தி மஹானஸே ஸப்³ப³கிச்சானி ஸம்வித³ஹந்தீ விசரதி. அத²ஸ்ஸா ஸாமிகோ ‘‘ஸ்வே மஹாபவாரணா ப⁴விஸ்ஸதீ’’தி மஹானஸாபி⁴முகோ² வாதபானே ட²த்வா ‘‘கிம் நு கோ² கரோந்தீ ஸா அந்த⁴பா³லா விசரதீ’’தி ஓலோகேத்வா தம் ஸேத³கிலின்னம் சா²ரிகாய ஓகிண்ணம் அங்கா³ரமஸிமக்கி²தம் ததா² ஸம்வித³ஹித்வா விசரமானம் தி³ஸ்வா ‘‘அஹோ அந்த⁴பா³லா ஏவரூபே டா²னே இமம் ஸிரிஸம்பத்திம் நானுப⁴வதி, ‘‘முண்ட³கஸமணே உபட்ட²ஹிஸ்ஸாமீ’தி துட்ட²சித்தா விசரதீ’’தி ஹஸித்வா அபக³ஞ்சி².

தஸ்மிம் அபக³தே தஸ்ஸ ஸந்திகே டி²தா ஸிரிமா ‘‘கிம் நு கோ² ஓலோகேத்வா ஏஸ ஹஸதீ’’தி தேனேவ வாதபானேன ஓலோகேந்தீ உத்தரம் தி³ஸ்வா ‘‘இமம் ஓலோகேத்வா இமினா ஹஸிதம், அத்³தா⁴ இமஸ்ஸ ஏதாய ஸத்³தி⁴ம் ஸந்த²வோ அத்தீ²’’தி சிந்தேஸி. ஸா கிர அட்³ட⁴மாஸம் தஸ்மிம் கே³ஹே பா³ஹிரகஇத்தீ² ஹுத்வா வஸமானாபி தம் ஸம்பத்திம் அனுப⁴வமானா அத்தனோ பா³ஹிரகஇத்தி²பா⁴வம் அஜானித்வா ‘‘அஹம் க⁴ரஸாமினீ’’தி ஸஞ்ஞமகாஸி. ஸா உத்தராய ஆகா⁴தம் ப³ந்தி⁴த்வா ‘‘து³க்க²மஸ்ஸா உப்பாதே³ஸ்ஸாமீ’’தி பாஸாதா³ ஓருய்ஹ மஹானஸம் பவிஸித்வா பூவபசனட்டா²னே பக்குதி²தம் ஸப்பிம் கடச்சு²னா ஆதா³ய உத்தராபி⁴முக²ம் பாயாஸி. உத்தரா தம் ஆக³ச்ச²ந்திம் தி³ஸ்வா ‘‘மம ஸஹாயிகாய மய்ஹம் உபகாரோ கதோ, சக்கவாளம் அதிஸம்பா³த⁴ம், ப்³ரஹ்மலோகோ அதினீசகோ, மம பன ஸஹாயிகாய கு³ணோவ மஹந்தோ, அஹம்பி ஏதம் நிஸ்ஸாய தா³னஞ்ச தா³தும் த⁴ம்மஞ்ச ஸோதும் லபி⁴ம், ஸசே மம ஏதிஸ்ஸாய உபரி கோதோ⁴ அத்தி², இத³ம் ஸப்பி மம் த³ஹது, ஸசே நத்தி², மா மம் த³ஹதூ’’தி தம் மேத்தாய ப²ரி. தாய தஸ்ஸா மத்த²கே ஆஸிஞ்சிதம்பி பக்குதி²தஸப்பி ஸீதோத³கம் விய அஹோஸி. அத² நம் ‘‘இத³ம் ஸீதலம் ப⁴விஸ்ஸதீ’’தி புன கடச்சு²கம் பூரேத்வா ஆதா³ய ஆக³ச்ச²ந்திம் உத்தராய தா³ஸியோ தி³ஸ்வா ‘‘அரே து³ப்³பி³னீதே ந த்வம் அம்ஹாகம் அய்யாய உபரி பக்கஸப்பிம் ஆஸிஞ்சிதும் அனுச்ச²விகா’’தி ஸந்தஜ்ஜேந்தியோ இதோ சிதோ ச உட்டா²ய ஹத்தே²ஹி ச பாதே³ஹி ச போதே²த்வா பூ⁴மியம் பாதேஸும், உத்தரா வாரேந்தீபி வாரேதும் நாஸக்கி². அத² ஸா உபரி ட²த்வா ஸப்³பா³ தா³ஸியோ படிபா³ஹித்வா ‘‘கிஸ்ஸ தே ஏவரூபம் பா⁴ரியம் கம்மம் கத’’ந்தி ஸிரிமம் ஓவதி³த்வா உண்ஹோத³கேன ந்ஹாபேத்வா ஸதபாகதேலேன அப்³ப⁴ஞ்ஜி.

தஸ்மிம் க²ணே ஸா அத்தனோ பா³ஹிரகித்தி²பா⁴வம் ஞத்வா சிந்தேஸி ‘‘மயா பா⁴ரியம் கம்மம் கதம் ஸாமிகஸ்ஸ ஹஸிதமத்தகாரணா இமிஸ்ஸா உபரி பக்கஸப்பிம் ஆஸிஞ்சந்தியா, அயம் ‘க³ண்ஹத² ந’ந்தி தா³ஸியோ ந ஆணாபேத்வா மம் விஹேட²னகாலேபி ஸப்³பா³ தா³ஸியோ படிபா³ஹித்வா மய்ஹம் கத்தப்³ப³மேவ அகாஸி. ஸசாஹம் இமம் ந க²மாபேஸ்ஸாமி, முத்³தா⁴ மே ஸத்ததா⁴ ப²லேய்யா’’தி தஸ்ஸா பாத³மூலே நிபஜ்ஜித்வா ‘‘அய்யே, க²மாஹி மே தோ³ஸ’’ந்தி ஆஹ. ‘‘அஹம் ஸப்பிதிகா தீ⁴தா, பிதரி மே க²மாபிதே க²மிஸ்ஸாமீ’’தி. ‘‘ஹோது, அய்யே, பிதரம்பி தே புண்ணஸேட்டி²ம் க²மாபேஸ்ஸாமீ’’தி. ‘‘புண்ணோ மம வட்டே ஜனகபிதா, விவட்டே ஜனகபிதரி க²மாபிதே பன அஹம் க²மிஸ்ஸாமீ’’தி. ‘‘கோ பன தே விவட்டே ஜனகபிதா’’தி? ‘‘ஸம்மாஸம்பு³த்³தோ⁴’’தி. ‘‘மய்ஹம் தேன ஸத்³தி⁴ம் விஸ்ஸாஸோ நத்தி², அஹம் கிம் கரிஸ்ஸாமீ’’தி? ‘‘ஸத்தா² ஸ்வே பி⁴க்கு²ஸங்க⁴ம் ஆதா³ய இதா⁴க³மிஸ்ஸதி, த்வம் யதா²லத்³த⁴ம் ஸக்காரம் க³ஹேத்வா இதே⁴வ ஆக³ந்த்வா தம் க²மாபேஹீ’’தி. ஸா ‘‘ஸாது⁴, அய்யே’’தி உட்டா²ய அத்தனோ கே³ஹம் க³ந்த்வா பஞ்சஸதபரிசாரிகித்தி²யோ ஆணாபேத்வா நானாவிதா⁴னி கா²த³னீயபோ⁴ஜனீயானி சேவ ஸூபேய்யானி ச ஸம்பாதே³த்வா புனதி³வஸே தம் ஸக்காரம் ஆதா³ய உத்தராய கே³ஹம் ஆக³ந்த்வா பு³த்³த⁴ப்பமுக²ஸ்ஸ பி⁴க்கு²ஸங்க⁴ஸ்ஸ பத்தே பதிட்டா²பேதும் அவிஸஹந்தீ அட்டா²ஸி, தம் ஸப்³ப³ம் க³ஹேத்வா உத்தராவ ஸம்வித³ஹி.

ஸிரிமாபி ஸத்து² ப⁴த்தகிச்சாவஸானே ஸத்³தி⁴ம் பரிவாரேன ஸத்து² பாத³மூலே நிபஜ்ஜி. அத² நம் ஸத்தா² புச்சி² ‘‘கோ தே அபராதோ⁴’’தி. ‘‘ப⁴ந்தே மயா ஹிய்யோ இத³ம் நாம கதம், அத² மே ஸஹாயிகா மம் விஹேட²யமானா தா³ஸியோ நிவாரேத்வா மய்ஹம் உபகாரமேவ அகாஸி. ஸாஹம் இமிஸ்ஸா கு³ணம் ஜானித்வா இமம் க²மாபேஸிம், அத² மம் ஏஸா ‘தும்ஹேஸு க²மாபிதேஸு க²மிஸ்ஸாமீ’தி ஆஹா’’தி. ‘‘ஏவம் கிர உத்தரே’’தி. ‘‘ஆம, ப⁴ந்தே, ஸீஸே மே ஸஹாயிகாய பக்கஸப்பி ஆஸித்த’’ந்தி. ‘‘அத² தயா கிம் சிந்தித’’ந்தி? ‘‘சக்கவாளம் அதிஸம்பா³த⁴ம், ப்³ரஹ்மலோகோ அதினீசகோ, மம ஸஹாயிகாய கு³ணோவ மஹந்தோ, அஹஞ்ஹி ஏதம் நிஸ்ஸாய தா³னஞ்ச தா³தும் த⁴ம்மஞ்ச ஸோதும் அலத்த²ம், ஸசே மே இமிஸ்ஸா உபரி கோதோ⁴ அத்தி², இத³ம் மம் த³ஹது, நோ சே, மா த³ஹதூ’’தி ஏவம் சிந்தேத்வா இமம் மேத்தாய ப²ரிம், ப⁴ந்தேதி. ஸத்தா² ‘‘ஸாது⁴ ஸாது⁴, உத்தரே, ஏவம் கோத⁴ம் ஜினிதும் வட்டதி. கோத⁴னோ ஹி நாம அக்கோதே⁴ன, அக்கோஸகோ அனக்கோஸந்தேன, பரிபா⁴ஸகோ அபரிபா⁴ஸந்தேன, த²த்³த⁴மச்ச²ரீ அத்தனோ ஸந்தகஸ்ஸ தா³னேன, முஸாவாதீ³ ஸச்சவசனேன ஜினிதப்³போ³’’தி இமமத்த²ம் த³ஸ்ஸேந்தோ –

‘‘அக்கோதே⁴ன ஜினே கோத⁴ம், அஸாது⁴ம் ஸாது⁴னா ஜினே;

ஜினே கத³ரியம் தா³னேன, ஸச்சேனாலிகவாதி³ன’’ந்தி. (த⁴. ப. 223) –

இமம் கா³த²ம் வத்வா கா³தா²பரியோஸானே சதுஸச்சகத²ம் அபா⁴ஸி. ஸச்சபரியோஸானே உத்தரா ஸகதா³கா³மிப²லே பதிட்ட²ஹி, ஸாமிகோ ச ஸஸுரோ ச ஸஸ்ஸு ச ஸோதாபத்திப²லம் ஸச்சி²கரிம்ஸு, ஸிரிமாபி பஞ்சஸதபரிவாரா ஸோதாபன்னா அஹோஸி. அபரபா⁴கே³ உத்தரா காலம் கத்வா தாவதிம்ஸப⁴வனே உப்பஜ்ஜி. அதா²யஸ்மா மஹாமோக்³க³ல்லானோ ஹேட்டா² வுத்தனயேனேவ தே³வசாரிகம் சரந்தோ உத்தரம் தே³வதீ⁴தரம் தி³ஸ்வா –

124. ‘‘அபி⁴க்கந்தேன வண்ணேன, யா த்வம் திட்ட²ஸி தே³வதே;

ஓபா⁴ஸேந்தீ தி³ஸா ஸப்³பா³, ஓஸதீ⁴ விய தாரகா.

125. ‘‘கேன தேதாதி³ஸோ வண்ணோ, கேன தே இத⁴ மிஜ்ஜ²தி;

உப்பஜ்ஜந்தி ச தே போ⁴கா³, யே கேசி மனஸோ பியா.

126. ‘‘புச்சா²மி தம் தே³வி மஹானுபா⁴வே,

மனுஸ்ஸபூ⁴தா கிமகாஸி புஞ்ஞம்;

கேனாஸி ஏவம் ஜலிதானுபா⁴வா,

வண்ணோ ச தே ஸப்³ப³தி³ஸா பபா⁴ஸதீ’’தி. – படிபுச்சி²;

127. ‘‘ஸா தே³வதா அத்தமனா, மோக்³க³ல்லானேன புச்சி²தா;

பஞ்ஹம் புட்டா² வியாகாஸி, யஸ்ஸ கம்மஸ்ஸித³ம் ப²லம்’’.

128. ‘‘இஸ்ஸா ச மச்சே²ரமதோ² பளாஸோ, நாஹோஸி மய்ஹம் க⁴ரமாவஸந்தியா;

அக்கோத⁴னா ப⁴த்து வஸானுவத்தினீ, உபோஸதே² நிச்சஹமப்பமத்தா.

129. ‘‘சாதுத்³த³ஸிம் பஞ்சத³ஸிம், யா ச பக்க²ஸ்ஸ அட்ட²மீ;

பாடிஹாரியபக்க²ஞ்ச, அட்ட²ங்க³ஸுஸமாக³தம்.

130. ‘‘உபோஸத²ம் உபவஸிஸ்ஸம், ஸதா³ ஸீலேஸு ஸம்வுதா;

ஸஞ்ஞமா ஸம்விபா⁴கா³ ச, விமானம் ஆவஸாமஹம்.

131. ‘‘பாணாதிபாதா விரதா, முஸாவாதா³ ச ஸஞ்ஞதா;

தே²ய்யா ச அதிசாரா ச, மஜ்ஜபானா ச ஆரகா.

132. ‘‘பஞ்சஸிக்கா²பதே³ ரதா, அரியஸச்சான கோவிதா³;

உபாஸிகா சக்கு²மதோ, கோ³தமஸ்ஸ யஸஸ்ஸினோ.

133. ‘‘ஸாஹம் ஸகேன ஸீலேன, யஸஸா ச யஸஸ்ஸினீ;

அனுபோ⁴மி ஸகம் புஞ்ஞம், ஸுகி²தா சம்ஹினாமயா.

134. ‘‘தேன மேதாதி³ஸோ வண்ணோ, தேன மே இத⁴ மிஜ்ஜ²தி;

உப்பஜ்ஜந்தி ச மே போ⁴கா³, யே கேசி மனஸோ பியா.

135. ‘‘அக்கா²மி தே பி⁴க்கு² மஹானுபா⁴வ, மனுஸ்ஸபூ⁴தா யமஹம் அகாஸிம்;

தேனம்ஹி ஏவம் ஜலிதானுபா⁴வா, வண்ணோ ச மே ஸப்³ப³தி³ஸா பபா⁴ஸதீ’’தி. –

தே³வதாபிஸ்ஸ விஸ்ஸஜ்ஜேஸி.

126. மம ச, ப⁴ந்தே, வசனேன ப⁴க³வதோ பாதே³ ஸிரஸா வந்தே³ய்யாஸி ‘‘உத்தரா நாம ப⁴ந்தே, உபாஸிகா ப⁴க³வதோ பாதே³ ஸிரஸா வந்த³தீ’’தி. அனச்ச²ரியம் கோ² பனேதம், ப⁴ந்தே, யம் மம் ப⁴க³வா அஞ்ஞதரஸ்மிம் ஸாமஞ்ஞப²லே ப்³யாகரேய்ய, தம் ப⁴க³வா ஸகதா³கா³மிப²லே ப்³யாகாஸீதி.

128. தத்த² இஸ்ஸா ச மச்சே²ரமதோ² பளாஸோ, நாஹோஸி மய்ஹம் க⁴ரமாவஸந்தியாதி யா ச அகா³ரமஜ்ஜே² வஸந்தீனம் அஞ்ஞாஸம் இத்தீ²னம் ஸம்பத்திஆதி³விஸயா பரஸம்பத்திஉஸூயனலக்க²ணா இஸ்ஸா, யஞ்ச தாவகாலிகாதி³வஸேனாபி கிஞ்சி யாசந்தானம் அதா³துகாமதாய அத்தஸம்பத்தினிகூ³ஹனலக்க²ணம் மச்ச²ரியம், யோ ச குலபதே³ஸாதி³னா பரேஹி யுக³க்³கா³ஹலக்க²ணோ பளாஸோ உப்பஜ்ஜதி, ஸோ திவிதோ⁴பி பாபத⁴ம்மோ கே³ஹே டி²தாய மய்ஹம் ஸதிபி பச்சயஸமவாயே நாஹோஸி ந உப்பஜ்ஜி. அக்கோத⁴னாதி க²ந்திமேத்தானுத்³த³யஸம்பன்னதாய அகுஜ்ஜ²னஸபா⁴வா. ப⁴த்து வஸானுவத்தினீதி புப்³பு³ட்டா²னபச்சா²னிபாதனாதி³னா ஸாமிகஸ்ஸ அனுகூலபா⁴வேன வஸே வத்தனஸீலா, மனாபசாரினீதி அத்தோ². உபோஸதே² நிச்சஹமப்பமத்தாதி அஹம் உபோஸத²ஸீலரக்க²ணே நிச்சம் அப்பமத்தா அப்பமாத³விஹாரினீ.

129. தமேவ உபோஸதே² அப்பமாத³ம் த³ஸ்ஸேந்தீ யேஸு தி³வஸேஸு தம் ரக்கி²தப்³ப³ம், யாதி³ஸம் யதா² ச ரக்கி²தப்³ப³ம், தம் த³ஸ்ஸேதும் ‘‘சாதுத்³த³ஸி’’ந்திஆதி³மாஹ. தத்த² சாதுத்³த³ஸிம் பஞ்சத³ஸிந்தி பக்க²ஸ்ஸாதி ஸம்ப³ந்தோ⁴, அச்சந்தஸம்யோகே³ சேதம் உபயோக³வசனம். யா ச பக்க²ஸ்ஸ அட்ட²மீதி ஏத்த² சாதி வசனஸேஸோ. பாடிஹாரியபக்க²ஞ்சாதி படிஹரணகபக்க²ஞ்ச, சாதுத்³த³ஸீபஞ்சத³ஸீஅட்ட²மீனம் யதா²க்கமம் ஆதி³தோ அந்ததோ சாதி பவேஸனனிக்க²மனவஸேன உபோஸத²ஸீலஸ்ஸ படிஹரிதப்³ப³ம் பக்க²ஞ்ச, தேரஸீ பாடிபதா³ ஸத்தமீ நவமீ சாதி அத்தோ². அட்ட²ங்க³ஸுஸமாக³தந்தி பாணாதிபாதாவேரமணீஆதீ³ஹி அட்ட²ஹங்கே³ஹி ஏவ ஸுட்டு² ஸமாக³தம் ஸமன்னாக³தம்.

130. உபவஸிஸ்ஸந்தி உபவஸிம். அதீதத்தே² ஹி இத³ம் அனாக³தவசனம். கேசி பன ‘‘உபவஸிம்’’இச்சேவ பட²ந்தி. ஸதா³தி ஸப்படிஹாரிகேஸு ஸப்³பே³ஸு உபோஸத²தி³வஸேஸு. ஸீலேஸூதி உபோஸத²ஸீலேஸு ஸாதே⁴தப்³பே³ஸு. நிப்பா²தே³தப்³பே³ ஹி இத³ம் பு⁴ம்மம். ஸம்வுதாதி காயவாசாசித்தேஹி ஸம்வுதா. ஸதா³தி வா ஸப்³ப³காலம். ஸீலேஸூதி நிச்சஸீலேஸு. ஸம்வுதாதி காயவாசாஹி ஸம்வுதா.

131. இதா³னி தம் நிச்சஸீலம் த³ஸ்ஸேதும் ‘‘பாணாதிபாதா விரதா’’திஆதி³ வுத்தம். தத்த² பாணோதி வோஹாரதோ ஸத்தோ, பரமத்த²தோ ஜீவிதிந்த்³ரியம். பாணஸ்ஸ அதிபாதோ பாணவதோ⁴ பாணகா⁴தோ பாணாதிபாதோ, அத்த²தோ பாணே பாணஸஞ்ஞினோ ஜீவிதிந்த்³ரியுபச்சே²த³கஉபக்கமஸமுட்டா²பிகா காயவசீத்³வாரானம் அஞ்ஞதரத்³வாரபவத்தா வத⁴கசேதனா. ததோ பாணாதிபாதா. விரதாதி ஓரதா, நிவத்தாதி அத்தோ².

முஸாவாதா³தி முஸா நாம விஸம்வாத³னபுரேக்கா²ரஸ்ஸ அத்த²ப⁴ஞ்ஜனகோ வசீபயோகோ³ வா காயபயோகோ³ வா, விஸம்வாத³னாதி⁴ப்பாயேன பரஸ்ஸ விஸம்வாத³ககாயவசீபயோக³ஸமுட்டா²பிகா சேதனா முஸாவாதோ³. அத² வா முஸாதி அபூ⁴தம் அதச்ச²ம் வத்து², வாதோ³தி தஸ்ஸ பூ⁴ததோ தச்ச²தோ விஞ்ஞாபேதுகாமஸ்ஸ ததா² விஞ்ஞத்திஸமுட்டா²பிகா சேதனா. ததோ முஸாவாதா³ ஸஞ்ஞதா ஓரதா, விரதாதி அத்தோ². ச-ஸத்³தோ³ ஸம்பிண்ட³னத்தோ².

தே²ய்யாதி தே²ய்யம் வுச்சதி தே²னபா⁴வோ, சோரிகாய பரஸ்ஸஹரணந்தி அத்தோ². அத்த²தோ பரபரிக்³க³ஹிதே பரபரிக்³க³ஹிதஸஞ்ஞினோ ததா³தா³யகஉபக்கமஸமுட்டா²பிகா தே²ய்யசேதனா தே²ய்யம். ததோ தே²ய்யா ஸஞ்ஞதா, ஆரகாதி வா ஸம்ப³ந்தோ⁴.

அதிசாராதி அதிச்ச சாரோ அதிசாரோ, லோகமரியாத³ம் அதிக்கமித்வா அக³மனீயட்டா²னே காமவஸேன சாரோ மிச்சா²சாரோதி அத்தோ². அக³மனீயட்டா²னம் நாம – புரிஸானம் மாதுரக்கி²தா பிதுரக்கி²தா மாதாபிதுரக்கி²தா பா⁴துரக்கி²தா ப⁴கி³னிரக்கி²தா ஞாதிரக்கி²தா கோ³த்தரக்கி²தா த⁴ம்மரக்கி²தா ஸாரக்கா² ஸபரித³ண்டா³தி த³ஸ, த⁴னக்கீதா ச²ந்த³வாஸினீ போ⁴க³வாஸினீ படவாஸினீ ஓத³பத்தகினீ ஓப⁴டசும்ப³டா தா³ஸீ ச ப⁴ரியா கம்மகாரீ ச ப⁴ரியா த⁴ஜாஹடா முஹுத்திகாதி த³ஸாதி வீஸதி இத்தி²யோ. இத்தீ²ஸு பன த்³வின்னம் ஸாரக்க²ஸபரித³ண்டா³னம் த³ஸன்னஞ்ச த⁴னக்கீதாதீ³னந்தி த்³வாத³ஸன்னம் அஞ்ஞபுரிஸா அக³மனீயட்டா²னம், இத³மேவ இத⁴ அதி⁴ப்பேதம். லக்க²ணதோ பன அஸத்³த⁴ம்மாதி⁴ப்பாயேன காயத்³வாரபவத்தா அக³மனீயட்டா²னவீதிக்கமசேதனா அதிசாரோ. தஸ்மா அதிசாரா.

மஜ்ஜபானாதி மஜ்ஜம் வுச்சதிமத³னீயட்டே²ன ஸுரா ச மேரயஞ்ச, பிவந்தி தேனாதி பானம், மஜ்ஜஸ்ஸ பானம் மஜ்ஜபானம். யாய து³ஸ்ஸீல்யசேதனாய மஜ்ஜஸங்கா²தம் பிட்ட²ஸுரா, பூவஸுரா, ஓத³னியஸுரா, கிண்ணபக்கி²த்தா, ஸம்பா⁴ரஸம்யுத்தாதி பஞ்சபே⁴த³ம் ஸுரம் வா, புப்பா²ஸவோ, ப²லாஸவோ, மத்⁴வாஸவோ, கு³ளாஸவோ, ஸம்பா⁴ரஸம்யுத்தோதி பஞ்சபே⁴த³ம் மேரயம் வா பீ³ஜதோ பட்டா²ய குஸக்³கே³னாபி பிவதி, ஸா சேதனா மஜ்ஜபானம். தஸ்மா மஜ்ஜபானா ஆரகா விரதா.

132. ஏவம் ‘‘பாணாதிபாதா விரதா’’திஆதி³னா பஹாதப்³ப³த⁴ம்மவஸேன விப⁴ஜித்வா த³ஸ்ஸிதம் நிச்சஸீலம் புன ஸமாதா³தப்³ப³தாவஸேன ஏகதோ கத்வா த³ஸ்ஸேந்தீ ‘‘பஞ்சஸிக்கா²பதே³ ரதா’’தி ஆஹ. தத்த² ஸிக்கா²பத³ந்தி ஸிக்கி²தப்³ப³பத³ம், ஸிக்கா²கோட்டா²ஸேதி அத்தோ². அத² வா ஜா²னாத³யோ ஸப்³பே³பி குஸலா த⁴ம்மா ஸிக்கி²தப்³ப³தோ ஸிக்கா², பஞ்சஸு பன ஸீலங்கே³ஸு யம்கிஞ்சி அங்க³ம் தாஸம் ஸிக்கா²னம் பதிட்டா²னட்டே²ன பத³ந்தி ஸிக்கா²னம் பத³த்தா ஸிக்கா²பத³ம், பஞ்ச ஸீலங்கா³னி. தஸ்மிம் பஞ்சவிதே⁴ ஸிக்கா²பதே³ ரதா அபி⁴ரதாதி பஞ்சஸிக்கா²பதே³ ரதா. அரியஸச்சான கோவிதா³தி பரிஞ்ஞாபஹானஸச்சி²கிரியாபா⁴வனாபி⁴ஸமயவஸேன து³க்க²ஸமுத³யனிரோத⁴மக்³க³ஸங்கா²தேஸு சதூஸு அரியஸச்சேஸு குஸலா நிபுணா, படிவித்³த⁴சதுஸச்சாதி அத்தோ². கோ³தமஸ்ஸாதி ப⁴க³வந்தம் கோ³த்தேன கித்தேதி. யஸஸ்ஸினோதி கித்திமதோ, பரிவாரவதோ வா.

133. ஸாஹந்தி ஸா யதா²வுத்தகு³ணா அஹம். ஸகேன ஸீலேனாதி அனுஸ்ஸுகிதாதி³னா அத்தனோ ஸபா⁴வஸீலேன ச உபோஸத²ஸீலாதி³ஸமாதா³னஸீலேன ச காரணபூ⁴தேன. தஞ்ஹி ஸத்தானம் கம்மஸ்ஸகதாய ஹிதஸுகா²வஹதாய ச விஸேஸதோ ‘‘ஸக’’ந்தி வுச்சதி. தேனேவாஹ –

‘‘தஞ்ஹி தஸ்ஸ ஸகம் ஹோதி, தஞ்ச ஆதா³ய க³ச்ச²தி;

தஞ்சஸ்ஸ அனுக³ம் ஹோதி, சா²யாவ அனபாயினீ’’தி. (ஸம். நி. 1.115);

யஸஸா ச யஸஸ்ஸினீதி ‘‘உத்தரா உபாஸிகா ஸீலாசாரஸம்பன்னா அனுஸ்ஸுகீ அமச்ச²ரீ அக்கோத⁴னா’’திஆதி³னா ‘‘ஆக³தப²லா விஞ்ஞாதஸாஸனா’’திஆதி³னா ச யதா²பூ⁴தகு³ணாதி⁴க³தேன ஜலதலே தேலேன விய ஸமந்ததோ பத்த²டேன கித்திஸத்³தே³ன யஸஸ்ஸினீ கித்திமதீ, தேன வா ஸீலகு³ணேன இத⁴ அதி⁴க³தேன யஸபரிவாரேன யஸஸ்ஸினீ ஸம்பன்னபரிவாரா. அனுபோ⁴மி ஸகம் புஞ்ஞந்தி யதூ²பசிதம் அத்தனோ புஞ்ஞம் பச்சனுபோ⁴மி. யஸ்ஸ ஹி புஞ்ஞப²லம் அனுபூ⁴யதி, ப²லூபசாரேன தம் புஞ்ஞம்பி அனுபூ⁴யதீதி வுச்சதி. அத² வா புது²ஜ்ஜனபா⁴வதோ ஸுசரிதப²லம்பி ‘‘புஞ்ஞ’’ந்தி வுச்சதி. யதா²ஹ ‘‘குஸலானம், பி⁴க்க²வே, த⁴ம்மானம் ஸமாதா³னஹேது ஏவமித³ம் புஞ்ஞம் பவட்³ட⁴தீ’’தி. ஸுகி²தா சம்ஹினாமயாதி தி³ப்³ப³ஸுகே²ன ச ப²லஸுகே²ன ச ஸுகி²தா சம்ஹி ப⁴வாமி, காயிகசேதஸிகது³க்கா²பா⁴வதோ அனாமயா அரோகா³.

136. மம சாதி ச-ஸத்³தோ³ ஸமுச்சயத்தோ². தேன ‘‘மம வசனேன ச வந்தே³ய்யாஸி, ந தவ ஸபா⁴வேனேவா’’தி வந்த³னம் ஸமுச்சினோதி. அனச்ச²ரியந்திஆதி³னா அத்தனோ அரியஸாவிகாபா⁴வஸ்ஸ பாகடபா⁴வம் த³ஸ்ஸேதி. தம் ப⁴க³வாதிஆதி³ ஸங்கீ³திகாரவசனம். ஸேஸம் வுத்தனயமேவாதி.

உத்தராவிமானவண்ணனா நிட்டி²தா.