9. பட²மத³ப்³ப³ஸுத்தவண்ணனா

79. நவமே ஆயஸ்மாதி பியவசனம். த³ப்³போ³தி தஸ்ஸ தே²ரஸ்ஸ நாமம். மல்லபுத்தோதி மல்லராஜஸ்ஸ புத்தோ. ஸோ ஹி ஆயஸ்மா பது³முத்தரஸ்ஸ ப⁴க³வதோ பாத³மூலே கதாபி⁴னீஹாரோ கப்பஸதஸஹஸ்ஸம் உபசிதபுஞ்ஞஸஞ்சயோ அம்ஹாகம் ப⁴க³வதோ காலே மல்லராஜஸ்ஸ தே³விகா குச்சி²யம் நிப்³ப³த்தோ கதாதி⁴காரத்தா ஜாதியா ஸத்தவஸ்ஸிககாலேயேவ மாதாபிதரோ உபஸங்கமித்வா பப்³ப³ஜ்ஜம் யாசி. தே ச ‘‘பப்³ப³ஜித்வாபி ஆசாரம் தாவ ஸிக்க²து, ஸசே தம் நாபி⁴ரமிஸ்ஸதி, இதே⁴வ ஆக³மிஸ்ஸதீ’’தி அனுஜானிம்ஸு. ஸோ ஸத்தா²ரம் உபஸங்கமித்வா பப்³ப³ஜ்ஜம் யாசி. ஸத்தா²பிஸ்ஸ உபனிஸ்ஸயஸம்பத்திம் ஓலோகேத்வா பப்³ப³ஜ்ஜம் அனுஜானி. தஸ்ஸ பப்³ப³ஜ்ஜாஸமயே தி³ன்னஓவாதே³ன ப⁴வத்தயம் ஆதி³த்தம் விய உபட்டா²ஸி. ஸோ விபஸ்ஸனம் பட்ட²பேத்வா கு²ரக்³கே³யேவ அரஹத்தம் பாபுணி. யம்கிஞ்சி ஸாவகேன பத்தப்³ப³ம், ‘‘திஸ்ஸோ விஜ்ஜா சதஸ்ஸோ படிஸம்பி⁴தா³ ச²ளபி⁴ஞ்ஞா நவ லோகுத்தரத⁴ம்மா’’தி ஏவமாதி³கம் ஸப்³ப³ம் அதி⁴க³ந்த்வா அஸீதியா மஹாஸாவகேஸு அப்³ப⁴ந்தரோ அஹோஸி. வுத்தஞ்ஹேதம் தேன ஆயஸ்மதா –

‘‘மயா கோ² ஜாதியா ஸத்தவஸ்ஸேன அரஹத்தம் ஸச்சி²கதம், யம்கிஞ்சி ஸாவகேன பத்தப்³ப³ம், ஸப்³ப³ம் தம் அனுப்பத்தம் மயா’’திஆதி³ (பாரா. 380).

யேன ப⁴க³வா தேனுபஸங்கமீதி ஸோ கிராயஸ்மா ஏகதி³வஸம் ராஜக³ஹே பிண்டா³ய சரித்வா பச்சா²ப⁴த்தம் பிண்ட³பாதப்படிக்கந்தோ ப⁴க³வதோ வத்தம் த³ஸ்ஸேத்வா தி³வாட்டா²னம் க³ந்த்வா உத³ககும்ப⁴தோ உத³கம் க³ஹேத்வா பாதே³ பக்கா²லேத்வா க³த்தானி ஸீதிம் கத்வா சம்மக்க²ண்ட³ம் பஞ்ஞாபேத்வா நிஸின்னோ காலபரிச்சே²த³ம் கத்வா ஸமாபத்திம் ஸமாபஜ்ஜி. அதா²யஸ்மா யதா²காலபரிச்சே²த³ம் ஸமாபத்திதோ வுட்ட²ஹித்வா அத்தனோ ஆயுஸங்கா²ரே ஓலோகேஸி. தஸ்ஸ தே பரிக்கீ²ணா கதிபயமுஹுத்திகா உபட்ட²ஹிம்ஸு. ஸோ சிந்தேஸி – ‘‘ந கோ² மேதம் பதிரூபம், யமஹம் ஸத்து² அனாரோசேத்வா ஸப்³ரஹ்மசாரீஹி ச அவிதி³தோ இத⁴ யதா²னிஸின்னோவ பரினிப்³பா³யிஸ்ஸாமி. யம்னூனாஹம் ஸத்தா²ரம் உபஸங்கமித்வா பரினிப்³பா³னம் அனுஜானாபேத்வா ஸத்து² வத்தம் த³ஸ்ஸேத்வா ஸாஸனஸ்ஸ நிய்யானிகபா⁴வத³ஸ்ஸனத்த²ம் மய்ஹம் இத்³தா⁴னுபா⁴வம் விபா⁴வேந்தோ ஆகாஸே நிஸீதி³த்வா தேஜோதா⁴தும் ஸமாபஜ்ஜித்வா பரினிப்³பா³யேய்யம். ஏவம் ஸந்தே யே மயி அஸ்ஸத்³தா⁴ அப்பஸன்னா, தேஸம்பி பஸாதோ³ உப்பஜ்ஜிஸ்ஸதி, தத³ஸ்ஸ தேஸம் தீ³க⁴ரத்தம் ஹிதாய ஸுகா²யா’’தி. ஏவஞ்ச ஸோ ஆயஸ்மா சிந்தேத்வா ப⁴க³வந்தம் உபஸங்கமித்வா ஸப்³ப³ம் தம் ததே²வ அகாஸி. தேன வுத்தம் – ‘‘அத² கோ² ஆயஸ்மா த³ப்³போ³ மல்லபுத்தோ யேன ப⁴க³வா தேனுபஸங்கமீ’’திஆதி³.

தத்த² பரினிப்³பா³னகாலோ மேதி ‘‘ப⁴க³வா மய்ஹம் அனுபாதி³ஸேஸாய நிப்³பா³னதா⁴துயா பரினிப்³பா³னகாலோ உபட்டி²தோ, தமஹம் ப⁴க³வதோ ஆரோசேத்வா பரினிப்³பா³யிதுகாமோம்ஹீ’’தி த³ஸ்ஸேதி. கேசி பனாஹு ‘‘ந தாவ தே²ரோ ஜிண்ணோ, ந ச கி³லானோ, பரினிப்³பா³னாய ச ஸத்தா²ரம் ஆபுச்ச²தி, கிம் தத்த² காரணம்? ‘மேத்தியபூ⁴மஜகா பி⁴க்கூ² புப்³பே³ மம் அமூலகேன பாராஜிகேன அனுத்³த⁴ம்ஸேஸும், தஸ்மிம் அதி⁴கரணே வூபஸந்தேபி அக்கோஸந்தியேவ. தேஸம் ஸத்³த³ஹித்வா அஞ்ஞேபி புது²ஜ்ஜனா மயி அகா³ரவம் பரிப⁴வஞ்ச கரோந்தி. இமஞ்ச து³க்க²பா⁴ரம் நிரத்த²கம் வஹித்வா கிம் பயோஜனம், தஸ்மாஹம் இதா³னேவ பரினிப்³பா³யிஸ்ஸாமீ’தி ஸன்னிட்டா²னம் கத்வா ஸத்தா²ரம் ஆபுச்சீ²’’தி. தம் அகாரணம். ந ஹி கீ²ணாஸவா அபரிக்கீ²ணே ஆயுஸங்கா²ரே பரேஸம் உபவாதா³தி³ப⁴யேன பரினிப்³பா³னாய சேதேந்தி க⁴டயந்தி வாயமந்தி, ந ச பரேஸம் பஸம்ஸாதி³ஹேது சிரம் திட்ட²ந்தி, அத² கோ² ஸரஸேனேவ அத்தனோ ஆயுஸங்கா²ரஸ்ஸ பரிக்க²யம் ஆக³மேந்தி. யதா²ஹ –

‘‘நாபி⁴கங்கா²மி மரணம், நாபி⁴கங்கா²மி ஜீவிதம்;

காலஞ்ச படிகங்கா²மி, நிப்³பி³ஸம் ப⁴தகோ யதா²’’தி. (தே²ரகா³. 196, 606; மி. ப. 2.2.4) –

ப⁴க³வாபிஸ்ஸ ஆயுஸங்கா²ரம் ஓலோகேத்வா பரிக்கீ²ணபா⁴வம் ஞத்வா ‘‘யஸ்ஸதா³னி த்வம், த³ப்³ப³, காலம் மஞ்ஞஸீ’’தி ஆஹ.

வேஹாஸம் அப்³பு⁴க்³க³ந்த்வாதி ஆகாஸம் அபி⁴உக்³க³ந்த்வா, வேஹாஸம் க³ந்த்வாதி அத்தோ². அபி⁴ஸத்³த³யோகே³ன ஹி இத³ம் உபயோக³வசனம், அத்தோ² பன பு⁴ம்மவஸேன வேதி³தப்³போ³. வேஹாஸம் அப்³பு⁴க்³க³ந்த்வா கிம் அகாஸீதி ஆஹ – ‘‘ஆகாஸே அந்தலிக்கே² பல்லங்கேன நிஸீதி³த்வா’’திஆதி³. தத்த² தேஜோதா⁴தும் ஸமாபஜ்ஜித்வாதி தேஜோகஸிணசதுத்த²ஜ்ஜா²னஸமாபத்திம் ஸமாபஜ்ஜித்வா. தே²ரோ ஹி ததா³ ப⁴க³வந்தம் வந்தி³த்வா திக்க²த்தும் பத³க்கி²ணம் கத்வா ஏகமந்தம் டி²தோ ‘‘ப⁴க³வா கப்பஸதஸஹஸ்ஸம் தும்ஹேஹி ஸத்³தி⁴ம் தத்த² தத்த² வஸந்தோ புஞ்ஞானி கரோந்தோ இமமேவத்த²ம் ஸந்தா⁴ய அகாஸிம், ஸ்வாயமத்தோ² அஜ்ஜ மத்த²கம் பத்தோ, இத³ம் பச்சி²மத³ஸ்ஸன’’ந்தி ஆஹ. யே தத்த² புது²ஜ்ஜனபி⁴க்கூ² ஸோதாபன்னஸகதா³கா³மினோ ச, தேஸு ஏகச்சானம் மஹந்தம் காருஞ்ஞம் அஹோஸி, ஏகச்சே ஆரோத³னப்பத்தா அஹேஸும். அத²ஸ்ஸ ப⁴க³வா சித்தாசாரம் ஞத்வா ‘‘தேன ஹி, த³ப்³ப³, மய்ஹம் பி⁴க்கு²ஸங்க⁴ஸ்ஸ ச இத்³தி⁴பாடிஹாரியம் த³ஸ்ஸேஹீ’’தி ஆஹ. தாவதே³வ ஸப்³போ³ பி⁴க்கு²ஸங்கோ⁴ ஸன்னிபதி. அதா²யஸ்மா த³ப்³போ³ ‘‘ஏகோபி ஹுத்வா ப³ஹுதா⁴ ஹோதீ’’திஆதி³னா (படி. ம. 1.102; தீ³. நி. 1.484) நயேன ஆக³தானி ஸாவகஸாதா⁴ரணானி ஸப்³பா³னி பாடிஹாரியானி த³ஸ்ஸேத்வா புன ச ப⁴க³வந்தம் வந்தி³த்வா ஆகாஸம் அப்³பு⁴க்³க³ந்த்வா ஆகாஸே பத²விம் நிம்மினித்வா தத்த² பல்லங்கேன நிஸின்னோ தேஜோகஸிணஸமாபத்தியா பரிகம்மம் கத்வா ஸமாபத்திம் ஸமாபஜ்ஜித்வா வுட்டா²ய ஸரீரம் ஆவஜ்ஜித்வா புன ஸமாபத்திம் ஸமாபஜ்ஜித்வா ஸரீரஜா²பனதேஜோதா⁴தும் அதி⁴ட்ட²ஹித்வா பரினிப்³பா³யி. ஸஹ அதி⁴ட்டா²னேன ஸப்³போ³ காயோ அக்³கி³னா ஆதி³த்தோ அஹோஸி. க²ணேனேவ ச ஸோ அக்³கி³ கப்பவுட்டா²னக்³கி³ விய அணுமத்தம்பி ஸங்கா²ரக³தம் மஸிமத்தம்பி தத்த² கிஞ்சி அனவஸேஸேந்தோ அதி⁴ட்டா²னப³லேன ஜா²பேத்வா நிப்³பா³யி. தேன வுத்தம் – ‘‘அத² கோ² ஆயஸ்மா த³ப்³போ³ மல்லபுத்தோ’’திஆதி³. தத்த² வுட்ட²ஹித்வா பரினிப்³பா³யீதி இத்³தி⁴சித்ததோ வுட்ட²ஹித்வா ப⁴வங்க³சித்தேன பரினிப்³பா³யி.

ஜா²யமானஸ்ஸாதி ஜாலியமானஸ்ஸ. ட³ய்ஹமானஸ்ஸாதி தஸ்ஸேவ வேவசனம். அத² வா ஜா²யமானஸ்ஸாதி ஜாலாபவத்திக்க²ணம் ஸந்தா⁴ய வுத்தம், ட³ய்ஹமானஸ்ஸாதி வீதச்சிதங்கா³ரக்க²ணம். சா²ரிகாதி ப⁴ஸ்மம். மஸீதி கஜ்ஜலம். ந பஞ்ஞாயித்தா²தி ந பஸ்ஸித்த², அதி⁴ட்டா²னப³லேன ஸப்³ப³ம் க²ணேனேவ அந்தரதா⁴யித்தா²தி அத்தோ². கஸ்மா பன தே²ரோ உத்தரிமனுஸ்ஸத⁴ம்மம் இத்³தி⁴பாடிஹாரியம் த³ஸ்ஸேஸி, நனு ப⁴க³வதா இத்³தி⁴பாடிஹாரியகரணம் படிக்கி²த்தந்தி? ந சோதே³தப்³ப³மேதம் கி³ஹீனம் ஸம்முகா² பாடிஹாரியகரணஸ்ஸ படிக்கி²த்தத்தா. தஞ்ச கோ² விகுப்³ப³னவஸேன, ந பனேவம் அதி⁴ட்டா²னவஸேன. அயம் பனாயஸ்மா த⁴ம்மஸாமினா ஆணத்தோவ பாடிஹாரியம் த³ஸ்ஸேஸி.

ஏதமத்த²ம் விதி³த்வாதி ஏதம் ஆயஸ்மதோ த³ப்³ப³ஸ்ஸ மல்லபுத்தஸ்ஸ அனுபாதா³பரினிப்³பா³னம் ஸப்³பா³காரதோ விதி³த்வா தத³த்த²பரிதீ³பனம் இமம் உதா³னம் உதா³னேஸி.

தத்த² அபே⁴தி³ காயோதி ஸப்³போ³ பூ⁴துபாதா³யபபே⁴தோ³ சதுஸந்ததிரூபகாயோ பி⁴ஜ்ஜி, அனவஸேஸதோ ட³ய்ஹி, அந்தரதா⁴யி, அனுப்பத்தித⁴ம்மதம் ஆபஜ்ஜி. நிரோதி⁴ ஸஞ்ஞாதி ரூபாயதனாதி³கோ³சரதாய ரூபஸஞ்ஞாதி³பே⁴தா³ ஸப்³பா³பி ஸஞ்ஞா அப்படிஸந்தி⁴கேன நிரோதே⁴ன நிருஜ்ஜி². வேத³னா ஸீதிப⁴விம்ஸு ஸப்³பா³தி விபாகவேத³னா கிரியவேத³னாதி ஸப்³பா³பி வேத³னா அப்படிஸந்தி⁴கனிரோதே⁴ன நிருத்³த⁴த்தா அணுமத்தம்பி வேத³னாத³ரத²ஸ்ஸ அபா⁴வதோ ஸீதிபூ⁴தா அஹேஸும், குஸலாகுஸலவேத³னா பன அரஹத்தப²லக்க²ணேயேவ நிரோத⁴ம் க³தா. ‘‘ஸீதிரஹிம்ஸூ’’திபி பட²ந்தி, ஸந்தா நிருத்³தா⁴ அஹேஸுந்தி அத்தோ². வூபஸமிம்ஸு ஸங்கா²ராதி விபாககிரியப்பபே⁴தா³ ஸப்³பே³பி ப²ஸ்ஸாத³யோ ஸங்கா²ரக்க²ந்த⁴த⁴ம்மா அப்படிஸந்தி⁴கனிரோதே⁴னேவ நிருத்³த⁴த்தா விஸேஸேன உபஸமிம்ஸு. விஞ்ஞாணம் அத்த²மாக³மாதி விஞ்ஞாணம்பி விபாககிரியப்பபே⁴த³ம் ஸப்³ப³ம் அப்படிஸந்தி⁴கனிரோதே⁴னேவ அத்த²ம் வினாஸம் உபச்சே²த³ம் அக³மா அக³ச்சி².

இதி ப⁴க³வா ஆயஸ்மதோ த³ப்³ப³ஸ்ஸ மல்லபுத்தஸ்ஸ பஞ்சன்னம்பி க²ந்தா⁴னம் புப்³பே³யேவ கிலேஸாபி⁴ஸங்கா²ருபாதா³னஸ்ஸ அனவஸேஸதோ நிருத்³த⁴த்தா அனுபாதா³னோ விய ஜாதவேதோ³ அப்படிஸந்தி⁴கனிரோதே⁴ன நிருத்³த⁴பா⁴வம் நிஸ்ஸாய பீதிவேக³விஸ்ஸட்ட²ம் உதா³னம் உதா³னேஸீதி.

நவமஸுத்தவண்ணனா நிட்டி²தா.