4. சதுத்த²னிப்³பா³னபடிஸம்யுத்தஸுத்தவண்ணனா

74. சதுத்தே² அத² கோ² ப⁴க³வா ஏதமத்த²ம் விதி³த்வாதி ததா³ கிர ப⁴க³வதா அனேகபரியாயேன ஸந்த³ஸ்ஸனாதி³வஸேன நிப்³பா³னபடிஸம்யுத்தாய த⁴ம்மதே³ஸனாய கதாய தேஸம் பி⁴க்கூ²னம் ஏதத³ஹோஸி – ‘‘அயம் தாவ ப⁴க³வதா அமதமஹானிப்³பா³னதா⁴துயா அனேகாகாரவோகாரம் ஆனிஸம்ஸம் த³ஸ்ஸேந்தேன அனஞ்ஞஸாதா⁴ரணோ ஆனுபா⁴வோ பகாஸிதோ, அதி⁴க³மூபாயோ பனஸ்ஸா ந பா⁴ஸிதோ, கத²ம் நு கோ² படிபஜ்ஜந்தேஹி அம்ஹேஹி அயம் அதி⁴க³ந்தப்³பா³’’தி. அத² ப⁴க³வா தேஸம் பி⁴க்கூ²னம் ஏதம் யதா²வுத்தபரிவிதக்கஸங்கா²தம் அத்த²ம் ஸப்³பா³காரதோ விதி³த்வா. இமம் உதா³னந்தி தண்ஹாவஸேன கத்த²சி அனிஸ்ஸிதஸ்ஸ பஸ்ஸத்³த⁴காயசித்தஸ்ஸ வீதி²படிபன்னவிபஸ்ஸனஸ்ஸ அரியமக்³கே³ன அனவஸேஸதோ தண்ஹாபஹானேன நிப்³பா³னாதி⁴க³மவிபா⁴வனம் இமம் உதா³னம் உதா³னேஸி.

தத்த² நிஸ்ஸிதஸ்ஸ சலிதந்தி ரூபாதி³ஸங்கா²ரே தண்ஹாதி³ட்டீ²ஹி நிஸ்ஸிதஸ்ஸ சலிதம் ‘‘ஏதம் மம, ஏஸோ மே அத்தா’’தி தண்ஹாதி³ட்டி²விப்ப²ந்தி³தம் ஹோதி. அப்பஹீனதண்ஹாதி³ட்டி²கஸ்ஸ ஹி புக்³க³லஸ்ஸ ஸுகா²தீ³ஸு உப்பன்னேஸு தானி அபி⁴பு⁴ய்ய விஹரிதும் அஸக்கோந்தஸ்ஸ ‘‘மம வேத³னா, அஹம் வேதி³யாமீ’’திஆதி³னா தண்ஹாதி³ட்டி²கா³ஹவஸேன குஸலப்பவத்திதோ சித்தஸந்தானஸ்ஸ சலனம் கம்பனம், அவக்க²லிதம் வா ஹோதீதி அத்தோ². அனிஸ்ஸிதஸ்ஸ சலிதம் நத்தீ²தி யோ பன விஸுத்³தி⁴படிபத³ம் படிபஜ்ஜந்தோ ஸமத²விபஸ்ஸனாஹி தண்ஹாதி³ட்டி²யோ விக்க²ம்பே⁴த்வா அனிச்சாதி³வஸேன ஸங்கா²ரே ஸம்மஸந்தோ விஹரதி, தஸ்ஸ தம் அனிஸ்ஸிதஸ்ஸ யதா²வுத்தம் சலிதம் அவக்க²லிதம், விப்ப²ந்தி³தம் வா நத்தி² காரணஸ்ஸ ஸுவிக்க²ம்பி⁴தத்தா.

சலிதே அஸதீதி யதா²வுத்தே சலிதே அஸதி யதா² தண்ஹாதி³ட்டி²கா³ஹா நப்பவத்தந்தி, ததா² வீதி²படிபன்னாய விபஸ்ஸனாய தம் உஸ்ஸுக்கந்தஸ்ஸ. பஸ்ஸத்³தீ⁴தி விபஸ்ஸனாசித்தஸஹஜாதானம் காயசித்தானம் ஸாரம்ப⁴கரகிலேஸவூபஸமினீ து³விதா⁴பி பஸ்ஸத்³தி⁴ ஹோதி. பஸ்ஸத்³தி⁴யா ஸதி நதி ந ஹோதீதி புப்³பே³னாபரம் விஸேஸயுத்தாய பஸ்ஸத்³தி⁴யா ஸதி அனவஜ்ஜஸுகா²தி⁴ட்டா²னம் ஸமாதி⁴ம் வட்³டே⁴த்வா தம் பஞ்ஞாய ஸமவாயகரணேன ஸமத²விபஸ்ஸனம் யுக³னத்³த⁴ம் யோஜேத்வா மக்³க³பரம்பராய கிலேஸே கே²பேந்தஸ்ஸ காமப⁴வாதீ³ஸு நமனதோ ‘‘நதீ’’தி லத்³த⁴னாமா தண்ஹா அரஹத்தமக்³க³க்க²ணே அனவஸேஸதோ ந ஹோதி, அனுப்பத்தித⁴ம்மதம் ஆபாதி³தத்தா ந உப்பஜ்ஜதீதி அத்தோ².

நதியா அஸதீதி அரஹத்தமக்³கே³ன தண்ஹாய ஸுப்பஹீனத்தா ப⁴வாதி³அத்தா²ய ஆலயனிகந்தி பரியுட்டா²னே அஸதி. ஆக³திக³தி ந ஹோதீதி படிஸந்தி⁴வஸேன இத⁴ ஆக³தி ஆக³மனம் சுதிவஸேன க³தி இதோ பரலோகக³மனம் பேச்சபா⁴வோ ந ஹோதி ந பவத்ததி. ஆக³திக³தியா அஸதீதி வுத்தனயேன ஆக³தியா ச க³தியா ச அஸதி. சுதூபபாதோ ந ஹோதீதி அபராபரம் சவனுபபஜ்ஜனம் ந ஹோதி ந பவத்ததி. அஸதி ஹி கிலேஸவட்டே கம்மவட்டம் பச்சி²ன்னமேவ, பச்சி²ன்னே ச தஸ்மிம் குதோ விபாகவட்டஸ்ஸ ஸம்ப⁴வோ. தேனாஹ – ‘‘சுதூபபாதே அஸதி நேவித⁴ ந ஹுர’’ந்திஆதி³. தத்த² யம் வத்தப்³ப³ம், தம் ஹேட்டா² பா³ஹியஸுத்தே வித்தா²ரதோ வுத்தமேவ. தஸ்மா தத்த² வுத்தனயேனேவ அத்தோ² வேதி³தப்³போ³.

இதி ப⁴க³வா இதா⁴பி தேஸம் பி⁴க்கூ²னம் அனவஸேஸதோ வட்டது³க்க²வூபஸமஹேதுபூ⁴தம் அமதமஹானிப்³பா³னஸ்ஸ ஆனுபா⁴வம் ஸம்மாபடிபத்தியா பகாஸேதி.

சதுத்த²ஸுத்தவண்ணனா நிட்டி²தா.