7. கங்கா²ரேவதஸுத்தவண்ணனா

47. ஸத்தமே கங்கா²ரேவதோதி தஸ்ஸ தே²ரஸ்ஸ நாமம். ஸோ ஹி ஸாஸனே பப்³ப³ஜித்வா லத்³தூ⁴பஸம்பதோ³ ஸீலவா கல்யாணத⁴ம்மோ விஹரதி, ‘‘அகப்பியா முக்³கா³, ந கப்பந்தி முக்³கா³ பரிபு⁴ஞ்ஜிதும், அகப்பியோ கு³ளோ’’தி (மஹாவ. 272) ச ஆதி³னா வினயகுக்குச்சஸங்கா²தகங்கா²ப³ஹுலோ பன ஹோதி. தேன கங்கா²ரேவதோதி பஞ்ஞாயித்த². ஸோ அபரபா⁴கே³ ஸத்து² ஸந்திகே கம்மட்டா²னம் க³ஹேத்வா க⁴டேந்தோ வாயமந்தோ ச²ளபி⁴ஞ்ஞா ஸச்சி²கத்வா ஜா²னஸுகே²ன ப²லஸுகே²ன வீதினாமேதி, யேபு⁴ய்யேன பன அத்தனா அதி⁴க³தம் அரியமக்³க³ம் க³ரும் கத்வா பச்சவேக்க²தி. தேன வுத்தம் – ‘‘அத்தனோ கங்கா²விதரணவிஸுத்³தி⁴ம் பச்சவேக்க²மானோ’’தி. மக்³க³பஞ்ஞா ஹி ‘‘அஹோஸிம் நு கோ² அஹம் அதீதமத்³தா⁴ன’’ந்திஆதி³னயபவத்தாய (ம. நி. 1.18; ஸம். நி. 2.20) ஸோளஸவத்து²காய, ‘‘பு³த்³தே⁴ கங்க²தி…பே… படிச்சஸமுப்பன்னேஸு த⁴ம்மேஸு கங்க²தீ’’தி (த⁴. ஸ. 1008) ஏவம் வுத்தாய அட்ட²வத்து²காய, பகே³வ இதராஸந்தி அனவஸேஸதோ ஸப்³ப³கங்கா²னம் விதரணதோ ஸமதிக்கமனதோ, அஞ்ஞேஹி ச அத்தனா பஹாதப்³ப³கிலேஸேஹி அச்சந்தவிஸுஜ்ஜ²னதோ ‘‘கங்கா²விதரணவிஸுத்³தீ⁴’’தி இதா⁴தி⁴ப்பேதா. தஞ்ஹி அயமாயஸ்மா தீ³க⁴ரத்தம் கங்கா²பகதத்தா ‘‘இமம் மக்³க³த⁴ம்மம் அதி⁴க³ம்ம இமா மே கங்கா² அனவஸேஸா பஹீனா’’தி க³ரும் கத்வா பச்சவேக்க²மானோ நிஸீதி³, ந ஸப்பச்சயனாமரூபத³ஸ்ஸனம் அனிச்சந்திகத்தா தஸ்ஸ கங்கா²விதரணஸ்ஸ.

ஏதமத்த²ம் விதி³த்வாதி ஏதம் அரியமக்³க³ஸ்ஸ அனவஸேஸகங்கா²விதரணஸங்கா²தம் அத்த²ம் விதி³த்வா தத³த்த²தீ³பகம் இமம் உதா³னம் உதா³னேஸி.

தத்த² யா காசி கங்கா² இத⁴ வா ஹுரம் வாதி இத⁴ இமஸ்மிம் பச்சுப்பன்னே அத்தபா⁴வே ‘‘அஹம் நு கோ²ஸ்மி நோ நு கோ²ஸ்மீ’’திஆதி³னா ஹுரம் வா, அதீதானாக³தேஸு அத்தபா⁴வேஸு ‘‘அஹோஸிம் நு கோ² அஹம் அதீதமத்³தா⁴ன’’ந்திஆதி³னா உப்பஜ்ஜனகா கங்கா². ஸகவேதி³யா வா பரவேதி³யா வாதி தா ஏவம் வுத்தனயேனேவ ஸகஅத்தபா⁴வே ஆரம்மணவஸேன படிலபி⁴தப்³பா³ய பவத்தியா ஸகவேதி³யா வா பரஸ்ஸ அத்தபா⁴வே படிலபி⁴தப்³பா³ய ‘‘பு³த்³தோ⁴ நு கோ², நோ நு கோ²’’திஆதி³னா வா பரஸ்மிம் பதா⁴னே உத்தமே படிலபி⁴தப்³பா³ய பவத்தியா பரவேதி³யா வா யா காசி கங்கா² விசிகிச்சா². யே ஜா²யினோ தா பஜஹந்தி ஸப்³பா³, ஆதாபினோ ப்³ரஹ்மசரியம் சரந்தாதி யே ஆரம்மணூபனிஜ்ஜா²னேன லக்க²ணூபனிஜ்ஜா²னேன ஜா²யினோ விபஸ்ஸனம் உஸ்ஸுக்காபேத்வா சதுப்³பி³த⁴ஸம்மப்பதா⁴னபாரிபூரியா ஆதாபினோ மக்³க³ப்³ரஹ்மசரியம் சரந்தா அதி⁴க³ச்ச²ந்தா ஸத்³தா⁴னுஸாரீஆதி³ப்பபே⁴தா³ பட²மமக்³க³ட்டா² புக்³க³லா, தா ஸப்³பா³ கங்கா² பஜஹந்தி ஸமுச்சி²ந்த³ந்தி மக்³க³க்க²ணே. ததோ பரம் பன தா பஹீனா நாம ஹோந்தி, தஸ்மா இதோ அஞ்ஞம் தாஸம் அச்சந்தப்பஹானம் நாம நத்தீ²தி அதி⁴ப்பாயோ.

இதி ப⁴க³வா ஜா²னமுகே²ன ஆயஸ்மதோ கங்கா²ரேவதஸ்ஸ ஜா²னஸீஸேன அரியமக்³கா³தி⁴க³மம் தோ²மேந்தோ தோ²மனாவஸேன உதா³னம் உதா³னேஸி. தேனேவ ச நம் ‘‘ஏதத³க்³க³ம், பி⁴க்க²வே, மம ஸாவகானம் பி⁴க்கூ²னம் ஜா²யீனம் யதி³த³ம் கங்கா²ரேவதோ’’தி (அ. நி. 1.204) ஜா²யீபா⁴வேன ஏதத³க்³கே³ ட²பேஸீதி.

ஸத்தமஸுத்தவண்ணனா நிட்டி²தா.