1. உத்தராதே²ரீகா³தா²வண்ணனா

ஸத்தகனிபாதே முஸலானி க³ஹேத்வானாதி உத்தராய தே²ரியா கா³தா². அயம்பி புரிமபு³த்³தே⁴ஸு கதாதி⁴காரா தத்த² தத்த² ப⁴வே விவட்டூபனிஸ்ஸயம் குஸலம் உபசினந்தீ, அனுக்கமேன ஸம்பா⁴விதகுஸலமூலா ஸமுபசிதவிமோக்க²ஸம்பா⁴ரா பரிபக்கவிமுத்திபரிபாசனீயத⁴ம்மா ஹுத்வா, இமஸ்மிம் பு³த்³து⁴ப்பாதே³ ஸாவத்தி²யம் அஞ்ஞதரஸ்மிம் குலகே³ஹே நிப்³ப³த்தித்வா உத்தராதி லத்³த⁴னாமா அனுக்கமேன விஞ்ஞுதம் பத்வா படாசாராய தே²ரியா ஸந்திகம் உபஸங்கமி. தே²ரீ தஸ்ஸா த⁴ம்மம் கதே²ஸி. ஸா த⁴ம்மம் ஸுத்வா ஸம்ஸாரே ஜாதஸம்வேகா³ ஸாஸனே அபி⁴ப்பஸன்னா ஹுத்வா பப்³ப³ஜி. பப்³ப³ஜித்வா ச கதபுப்³ப³கிச்சா படாசாராய தே²ரியா ஸந்திகே விபஸ்ஸனம் பட்ட²பேத்வா பா⁴வனமனுயுஞ்ஜந்தீ உபனிஸ்ஸயஸம்பன்னதாய இந்த்³ரியானம் பரிபாகம் க³தத்தா ச ந சிரஸ்ஸேவ விபஸ்ஸனம் உஸ்ஸுக்காபேத்வா ஸஹ படிஸம்பி⁴தா³ஹி அரஹத்தம் பாபுணி. அரஹத்தம் பன பத்வா அத்தனோ படிபத்திம் பச்சவேக்கி²த்வா உதா³னவஸேன –

175. ‘‘முஸலானி க³ஹேத்வான, த⁴ஞ்ஞம் கோட்டேந்தி மாணவா;

புத்ததா³ரானி போஸேந்தா, த⁴னம் விந்த³ந்தி மாணவா.

176. ‘‘க⁴டேத² பு³த்³த⁴ஸாஸனே, யம் கத்வா நானுதப்பதி;

கி²ப்பம் பாதா³னி தோ⁴வித்வா, ஏகமந்தம் நிஸீத³த².

177. ‘‘சித்தம் உபட்ட²பேத்வான, ஏகக்³க³ம் ஸுஸமாஹிதம்;

பச்சவேக்க²த² ஸங்கா²ரே, பரதோ நோ ச அத்ததோ.

178. ‘‘தஸ்ஸாஹம் வசனம் ஸுத்வா, படாசாரானுஸாஸனிம்;

பாதே³ பக்கா²லயித்வான, ஏகமந்தே உபாவிஸிம்.

179. ‘‘ரத்தியா புரிமே யாமே, புப்³ப³ஜாதிமனுஸ்ஸரிம்;

ரத்தியா மஜ்ஜி²மே யாமே, தி³ப்³ப³சக்கு²ம் விஸோத⁴யிம்.

180. ‘‘ரத்தியா பச்சி²மே யாமே, தமோக்க²ந்த⁴ம் பதா³லயிம்;

தேவிஜ்ஜா அத² வுட்டா²ஸிம், கதா தே அனுஸாஸனீ.

181. ‘‘ஸக்கம்வ தே³வா தித³ஸா, ஸங்கா³மே அபராஜிதம்;

புரக்க²த்வா விஹஸ்ஸாமி, தேவிஜ்ஜாம்ஹி அனாஸவா’’தி. –

இமா கா³தா² அபா⁴ஸி.

தத்த² சித்தம் உபட்ட²பேத்வானாதி பா⁴வனாசித்தம் கம்மட்டா²னே உபட்ட²பேத்வா. கத²ம்? ஏகக்³க³ம் ஸுஸமாஹிதம் பச்சவேக்க²தா²தி படிபத்திம் அவேக்க²த², ஸங்கா²ரே அனிச்சாதிபி, து³க்கா²திபி, அனத்தாதிபி லக்க²ணத்தயம் விபஸ்ஸதா²தி அத்தோ². இத³ஞ்ச ஓவாத³காலே அத்தனோ அஞ்ஞேஸஞ்ச பி⁴க்கு²னீனம் தே²ரியாதீ³னம் ஓவாத³ஸ்ஸ அனுவாத³வஸேன வுத்தம். படாசாரானுஸாஸனிந்தி படாசாராய தே²ரியா அனுஸிட்டி²ம். ‘‘படாசாராய ஸாஸன’’ந்திபி வா பாடோ².

அத² வுட்டா²ஸிந்தி தேவிஜ்ஜாபா⁴வப்பத்திதோ பச்சா² ஆஸனதோ வுட்டா²ஸிம். அயம்பி தே²ரீ ஏகதி³வஸம் படாசாராய தே²ரியா ஸந்திகே கம்மட்டா²னம் ஸோதே⁴த்வா அத்தனோ வஸனட்டா²னம் பவிஸித்வா பல்லங்கம் ஆபு⁴ஜித்வா நிஸீதி³. ‘‘ந தாவிமம் பல்லங்கம் பி⁴ந்தி³ஸ்ஸாமி, யாவ மே ந அனுபாதா³ய ஆஸவேஹி சித்தம் விமுச்சதீ’’தி நிச்ச²யம் கத்வா ஸம்மஸனம் ஆரபி⁴த்வா, அனுக்கமேன விபஸ்ஸனம் உஸ்ஸுக்காபேத்வா மக்³க³படிபாடியா அபி⁴ஞ்ஞாபடிஸம்பி⁴தா³பரிவாரம் அரஹத்தம் பத்வா ஏகூனவீஸதியா பச்சவேக்க²ணாஞாணாய பவத்தாய ‘‘இதா³னிம்ஹி கதகிச்சா’’தி ஸோமனஸ்ஸஜாதா இமா கா³தா² உதா³னேத்வா பாதே³ பஸாரேஸி அருணுக்³க³மனவேலாயம். ததோ ஸம்மதே³வ விபா⁴தாய ரத்தியா தே²ரியா ஸந்திகம் உபக³ந்த்வா இமா கா³தா² பச்சுதா³ஹாஸி. தேன வுத்தம் ‘‘கதா தே அனுஸாஸனீ’’திஆதி³. ஸேஸம் ஸப்³ப³ம் ஹேட்டா² வுத்தனயமேவ.

உத்தராதே²ரீகா³தா²வண்ணனா நிட்டி²தா.