8. விஜயாதே²ரீகா³தா²வண்ணனா

சதுக்க²த்துந்திஆதி³கா விஜயாய தே²ரியா கா³தா². அயம்பி புரிமபு³த்³தே⁴ஸு கதாதி⁴காரா தத்த² தத்த² ப⁴வே விவட்டூபனிஸ்ஸயம் குஸலம் உபசினந்தீ, அனுக்கமேன பரிப்³ரூஹிதகுஸலமூலா தே³வமனுஸ்ஸேஸு ஸம்ஸரந்தீ, இமஸ்மிம் பு³த்³து⁴ப்பாதே³ ராஜக³ஹே அஞ்ஞதரஸ்மிம் குலகே³ஹே நிப்³ப³த்தித்வா விஞ்ஞுதம் பத்வா கே²மாய தே²ரியா கி³ஹிகாலே ஸஹாயிகா அஹோஸி. ஸா தஸ்ஸா பப்³ப³ஜிதபா⁴வம் ஸுத்வா ‘‘ஸாபி நாம ராஜமஹேஸீ பப்³ப³ஜிஸ்ஸதி கிமங்க³ம் பனாஹ’’ந்தி பப்³ப³ஜிதுகாமாயேவ ஹுத்வா கே²மாதே²ரியா ஸந்திகம் உபஸங்கமி. தே²ரீ தஸ்ஸா அஜ்ஜா²ஸயம் ஞத்வா ததா² த⁴ம்மம் தே³ஸேஸி, யதா² ஸம்ஸாரே ஸம்விக்³க³மானஸா ஸாஸனே ஸா அபி⁴ப்பஸன்னா ப⁴விஸ்ஸதி. ஸா தம் த⁴ம்மம் ஸுத்வா ஸம்வேக³ஜாதா படிலத்³த⁴ஸத்³தா⁴ ச ஹுத்வா பப்³ப³ஜ்ஜம் யாசி. தே²ரீ தம் பப்³பா³ஜேஸி. ஸா பப்³ப³ஜித்வா கதபுப்³ப³கிச்சா விபஸ்ஸனம் பட்ட²பேத்வா ஹேதுஸம்பன்னதாய, ந சிரஸ்ஸேவ ஸஹ படிஸம்பி⁴தா³ஹி அரஹத்தம் பத்வா அத்தனோ படிபத்திம் பச்சவேக்கி²த்வா உதா³னவஸேன –

169. ‘‘சதுக்க²த்தும் பஞ்சக்க²த்தும், விஹாரா உபனிக்க²மிம்;

அலத்³தா⁴ சேதஸோ ஸந்திம், சித்தே அவஸவத்தினீ.

170. ‘‘பி⁴க்கு²னிம் உபஸங்கம்ம, ஸக்கச்சம் பரிபுச்ச²ஹம்;

ஸா மே த⁴ம்மமதே³ஸேஸி, தா⁴துஆயதனானி ச.

171. ‘‘சத்தாரி அரியஸச்சானி, இந்த்³ரியானி ப³லானி ச;

போ³ஜ்ஜ²ங்க³ட்ட²ங்கி³கம் மக்³க³ம், உத்தமத்த²ஸ்ஸ பத்தியா.

172. ‘‘தஸ்ஸாஹம் வசனம் ஸுத்வா, கரோந்தீ அனுஸாஸனிம்;

ரத்தியா புரிமே யாமே, புப்³ப³ஜாதிமனுஸ்ஸரிம்.

173. ‘‘ரத்தியா மஜ்ஜி²மே யாமே, தி³ப்³ப³சக்கு²ம் விஸோத⁴யிம்;

ரத்தியா பச்சி²மே யாமே, தமோக²ந்த⁴ம் பதா³லயிம்.

174. ‘‘பீதிஸுகே²ன ச காயம், ப²ரித்வா விஹரிம் ததா³;

ஸத்தமியா பாதே³ பஸாரேஸிம், தமோக²ந்த⁴ம் பதா³லியா’’தி. –

இமா கா³தா² அபா⁴ஸி.

தத்த² பி⁴க்கு²னிந்தி கே²மாதே²ரிம் ஸந்தா⁴ய வத³தி.

போ³ஜ்ஜ²ங்க³ட்ட²ங்கி³கம் மக்³க³ந்தி ஸத்தபோ³ஜ்ஜ²ங்க³ஞ்ச அட்ட²ங்கி³கஞ்ச அரியமக்³க³ம். உத்தமத்த²ஸ்ஸ பத்தியாதி அரஹத்தஸ்ஸ நிப்³பா³னஸ்ஸேவ வா பத்தியா அதி⁴க³மாய.

பீதிஸுகே²னாதி ப²லஸமாபத்திபரியாபன்னாய பீதியா ஸுகே²ன ச. காயந்தி தம்ஸம்பயுத்தம் நாமகாயம் தத³னுஸாரேன ரூபகாயஞ்ச. ப²ரித்வாதி பு²ஸித்வா ப்³யாபேத்வா வா. ஸத்தமியா பாதே³ பஸாரேஸிந்தி விபஸ்ஸனாய ஆரத்³த⁴தி³வஸதோ ஸத்தமியம் பல்லங்கம் பி⁴ந்தி³த்வா பாதே³ பஸாரேஸிம். கத²ம்? தமோக²ந்த⁴ம் பதா³லிய, அப்பதா³லிதபுப்³ப³ம் மோஹக்க²ந்த⁴ம் அக்³க³மக்³க³ஞாணாஸினா பதா³லேத்வா. ஸேஸம் ஹேட்டா² வுத்தனயமேவ.

விஜயாதே²ரீகா³தா²வண்ணனா நிட்டி²தா.

ச²க்கனிபாதவண்ணனா நிட்டி²தா.