7. கு³த்தாதே²ரீகா³தா²வண்ணனா

கு³த்தே யத³த்த²ம் பப்³ப³ஜ்ஜாதிஆதி³கா கு³த்தாய தே²ரியா கா³தா². அயம்பி புரிமபு³த்³தே⁴ஸு கதாதி⁴காரா தத்த² தத்த² ப⁴வே விவட்டூபனிஸ்ஸயம் குஸலம் உபசினந்தீ அனுக்கமேன ஸம்ப⁴தவிமோக்க²ஸம்பா⁴ரா ஹுத்வா, பரிபக்ககுஸலமூலா ஸுக³தீஸுயேவ ஸம்ஸரந்தீ இமஸ்மிம் பு³த்³து⁴ப்பாதே³ ஸாவத்தி²யம் ப்³ராஹ்மணகுலே நிப்³ப³த்தா, கு³த்தாதிஸ்ஸா நாமம் அஹோஸி. ஸா விஞ்ஞுதம் பத்வா உபனிஸ்ஸயஸம்பத்தியா சோதி³யமானா க⁴ராவாஸம் ஜிகு³ச்ச²ந்தீ மாதாபிதரோ அனுஜானாபேத்வா மஹாபஜாபதிகோ³தமியா ஸந்திகே பப்³ப³ஜி. பப்³ப³ஜித்வா ச விபஸ்ஸனம் பட்ட²பேத்வா பா⁴வனம் அனுயுஞ்ஜந்தியா தஸ்ஸா சித்தம் சிரகாலபரிசயேன ப³ஹித்³தா⁴ரம்மணே விதா⁴வதி, ஏகக்³க³ம் நாஹோஸி. ஸத்தா² தி³ஸ்வா தம் அனுக்³க³ண்ஹந்தோ, க³ந்த⁴குடியம் யதா²னிஸின்னோவ ஓபா⁴ஸம் ப²ரித்வா தஸ்ஸா ஆஸன்னே ஆகாஸே நிஸின்னம் விய அத்தானம் த³ஸ்ஸேத்வா ஓவத³ந்தோ –

163. ‘‘கு³த்தே யத³த்த²ம் பப்³ப³ஜ்ஜா, ஹித்வா புத்தம் வஸும் பியம்;

தமேவ அனுப்³ரூஹேஹி, மா சித்தஸ்ஸ வஸம் க³மி.

164. ‘‘சித்தேன வஞ்சிதா ஸத்தா, மாரஸ்ஸ விஸயே ரதா;

அனேகஜாதிஸம்ஸாரம், ஸந்தா⁴வந்தி அவித்³த³ஸூ.

165. ‘‘காமாச்ச²ந்த³ஞ்ச ப்³யாபாத³ம், ஸக்காயதி³ட்டி²மேவ ச;

ஸீலப்³ப³தபராமாஸம், விசிகிச்ச²ம் ச பஞ்சமம்.

166. ‘‘ஸம்யோஜனானி ஏதானி, பஜஹித்வான பி⁴க்கு²னீ;

ஓரம்பா⁴க³மனீயானி, நயித³ம் புனரேஹிஸி.

167. ‘‘ராக³ம் மானம் அவிஜ்ஜஞ்ச, உத்³த⁴ச்சஞ்ச விவஜ்ஜிய;

ஸம்யோஜனானி சே²த்வான, து³க்க²ஸ்ஸந்தம் கரிஸ்ஸஸி.

168. ‘‘கே²பேத்வா ஜாதிஸம்ஸாரம், பரிஞ்ஞாய புனப்³ப⁴வம்;

தி³ட்டே²வ த⁴ம்மே நிச்சா²தா, உபஸந்தா சரிஸ்ஸஸீ’’தி. – இமா கா³தா² ஆபா⁴ஸி;

தத்த² தமேவ அனுப்³ரூஹேஹீதி யத³த்த²ம் யஸ்ஸ கிலேஸபரினிப்³பா³னஸ்ஸ க²ந்த⁴பரினிப்³பா³னஸ்ஸ ச அத்தா²ய. ஹித்வா புத்தம் வஸும் பியந்தி பியாயிதப்³ப³ம் ஞாதிபரிவட்டம் போ⁴க³க்க²ந்த⁴ஞ்ச ஹித்வா மம ஸாஸனே பப்³ப³ஜ்ஜா ப்³ரஹ்மசரியவாஸோ இச்சி²தோ, தமேவ வட்³டே⁴ய்யாஸி ஸம்பாதே³ய்யாஸி. மா சித்தஸ்ஸ வஸம் க³மீதி தீ³க⁴ரத்தம் ரூபாதி³ஆரம்மணவஸேன வட்³டி⁴தஸ்ஸ கூடசித்தஸ்ஸ வஸம் மா க³ச்சி².

யஸ்மா சித்தம் நாமேதம் மாயூபமம், யேன வஞ்சிதா அந்த⁴புது²ஜ்ஜனா மாரவஸானுகா³ ஸம்ஸாரம் நாதிவத்தந்தி. தேன வுத்தம் ‘‘சித்தேன வஞ்சிதா’’திஆதி³.

ஸம்யோஜனானி ஏதானீதி ஏதானி ‘‘காமச்ச²ந்த³ஞ்ச ப்³யாபாத³’’ந்திஆதி³னா யதா²வுத்தானி பஞ்ச ப³ந்த⁴னட்டே²ன ஸம்யோஜனானி. பஜஹித்வானாதி அனாகா³மிமக்³கே³ன ஸமுச்சி²ந்தி³த்வா. பி⁴க்கு²னீதி தஸ்ஸா ஆலபனம். ஓரம்பா⁴க³மனீயானீதி ரூபாரூபதா⁴துதோ ஹேட்டா²பா⁴கே³ காமதா⁴துயம் மனுஸ்ஸஜீவஸ்ஸ ஹிதானி உபகாரானி தத்த² படிஸந்தி⁴யா பச்சயபா⁴வதோ. ம-காரோ பத³ஸந்தி⁴கரோ. ‘‘ஓரமாக³மனீயானீ’’தி பாளி, ஸோ ஏவத்தோ². நயித³ம் புனரேஹிஸீதி ஓரம்பா⁴கி³யானம் ஸம்யோஜனானம் பஹானேன இத³ம் காமட்டா²னம் காமப⁴வம் படிஸந்தி⁴வஸேன புன நாக³மிஸ்ஸஸி. ர-காரோ பத³ஸந்தி⁴கரோ. ‘‘இத்த²’’ந்தி வா பாளி, இத்த²த்தம் காமப⁴வமிச்சேவ அத்தோ².

ராக³ந்தி ரூபராக³ஞ்ச அரூபராக³ஞ்ச. மானந்தி அக்³க³மக்³க³வஜ்ஜ²ம் மானம். அவிஜ்ஜஞ்ச உத்³த⁴ச்சஞ்சாதி ஏத்தா²பி ஏஸேவ நயோ. விவஜ்ஜியாதி விபஸ்ஸனாய விக்க²ம்பே⁴த்வா. ஸம்யோஜனானி சே²த்வானாதி ஏதானி ரூபராகா³தீ³னி பஞ்சுத்³த⁴ம்பா⁴கி³யானி ஸம்யோஜனானி அரஹத்தமக்³கே³ன ஸமுச்சி²ந்தி³த்வா. து³க்க²ஸ்ஸந்தம் கரிஸ்ஸஸீதி ஸப்³ப³ஸ்ஸாபி வட்டது³க்க²ஸ்ஸ பரியந்தம் பரியோஸானம் பாபுணிஸ்ஸஸி.

கே²பேத்வா ஜாதிஸம்ஸாரந்தி ஜாதி ஸமூலிகஸம்ஸாரபவத்திம் பரியோஸாபேத்வா. நிச்சா²தாதி நித்தண்ஹா. உபஸந்தாதி ஸப்³ப³ஸோ கிலேஸானம் வூபஸமேன உபஸந்தா. ஸேஸம் வுத்தனயமேவ.

ஏவம் ஸத்தா²ரா இமாஸு கா³தா²ஸு பா⁴ஸிதாஸு கா³தா²பரியோஸானே தே²ரீ ஸஹ படிஸம்பி⁴தா³ஹி அரஹத்தம் பத்வா உதா³னவஸேன ப⁴க³வதா பா⁴ஸிதனியாமேனேவ இமா கா³தா² அபா⁴ஸி. தேனேவ தா தே²ரியா கா³தா² நாம ஜாதா.

கு³த்தாதே²ரீகா³தா²வண்ணனா நிட்டி²தா.