3. ஸீஹாதே²ரீகா³தா²வண்ணனா

அயோனிஸோ மனஸிகாராதிஆதி³கா ஸீஹாய தே²ரியா கா³தா². அயம்பி புரிமபு³த்³தே⁴ஸு கதாதி⁴காரா தத்த² தத்த² ப⁴வே விவட்டூபனிஸ்ஸயம் குஸலம் உபசினித்வா இமஸ்மிம் பு³த்³து⁴ப்பாதே³ வேஸாலியம் ஸீஹஸேனாபதினோ ப⁴கி³னியா தீ⁴தா ஹுத்வா நிப்³ப³த்தி. தஸ்ஸா ‘‘மாதுலஸ்ஸ நாமம் கரோமா’’தி ஸீஹாதி நாமம் அகம்ஸு. ஸா விஞ்ஞுதம் பத்வா ஏகதி³வஸம் ஸத்தா²ரா ஸீஹஸ்ஸ ஸேனாபதினோ த⁴ம்மே தே³ஸியமானே தம் த⁴ம்மம் ஸுத்வா படிலத்³த⁴ஸத்³தா⁴ மாதாபிதரோ அனுஜானாபேத்வா பப்³ப³ஜி. பப்³ப³ஜித்வா ச விபஸ்ஸனம் ஆரபி⁴த்வாபி ப³ஹித்³தா⁴ புது²த்தாரம்மணே விதா⁴வந்தம் சித்தம் நிவத்தேதும் அஸக்கோந்தீ ஸத்த ஸம்வச்ச²ரானி மிச்சா²விதக்கேஹி பா³தீ⁴யமானா சித்தஸ்ஸாத³ம் அலப⁴ந்தீ ‘‘கிம் மே இமினா பாபஜீவிதேன, உப்³ப³ந்தி⁴த்வா மரிஸ்ஸாமீ’’தி பாஸம் க³ஹேத்வா ருக்க²ஸாகா²யம் லக்³கி³த்வா தம் அத்தனோ கண்டே² படிமுஞ்சந்தீ புப்³பா³சிண்ணவஸேன விபஸ்ஸனாய சித்தம் அபி⁴னீஹரி, அந்திமப⁴விகதாய பாஸஸ்ஸ ப³ந்த⁴னம் கீ³வட்டா²னே அஹோஸி, ஞாணஸ்ஸ பரிபாகம் க³தத்தா ஸா தாவதே³வ விபஸ்ஸனம் வட்³டே⁴த்வா ஸஹ படிஸம்பி⁴தா³ஹி அரஹத்தம் பாபுணி. அரஹத்தம் பத்தஸமகாலமேவ ச பாஸப³ந்தோ⁴ கீ³வதோ முச்சித்வா வினிவத்தி. ஸா அரஹத்தே பதிட்டி²தா உதா³னவஸேன –

77. ‘‘அயோனிஸோ மனஸிகாரா, காமராகே³ன அட்டிதா;

அஹோஸிம் உத்³த⁴தா புப்³பே³, சித்தே அவஸவத்தினீ.

78. ‘‘பரியுட்டி²தா க்லேஸேஹி, ஸுப⁴ஸஞ்ஞானுவத்தினீ;

ஸமம் சித்தஸ்ஸ ந லபி⁴ம், ராக³சித்தவஸானுகா³.

79. ‘‘கிஸா பண்டு³ விவண்ணா ச, ஸத்த வஸ்ஸானி சாரிஹம்;

நாஹம் தி³வா வா ரத்திம் வா, ஸுக²ம் விந்தி³ம் ஸுது³க்கி²தா.

80. ‘‘ததோ ரஜ்ஜும் க³ஹேத்வான, பாவிஸிம் வனமந்தரம்;

வரம் மே இத⁴ உப்³ப³ந்த⁴ம், யஞ்ச ஹீனம் புனாசரே.

81. ‘‘த³ள்ஹபாஸம் கரித்வான, ருக்க²ஸாகா²ய ப³ந்தி⁴ய;

பக்கி²பிம் பாஸம் கீ³வாயம், அத² சித்தம் விமுச்சி மே’’தி. –

இமா கா³தா² அபா⁴ஸி.

தத்த² அயோனிஸோ மனஸிகாராதி அனுபாயமனஸிகாரேன, அஸுபே⁴ ஸுப⁴ந்தி விபல்லாஸக்³கா³ஹேன. காமராகே³ன அட்டிதாதி காமகு³ணேஸு ச²ந்த³ராகே³ன பீளிதா. அஹோஸிம் உத்³த⁴தா புப்³பே³, சித்தே அவஸவத்தினீதி புப்³பே³ மம சித்தே மய்ஹம் வஸே அவத்தமானே உத்³த⁴தா நானாரம்மணே விக்கி²த்தசித்தா அஸமாஹிதா அஹோஸிம்.

பரியுட்டி²தா க்லேஸேஹி, ஸுப⁴ஸஞ்ஞானுவத்தினீதி பரியுட்டா²னபத்தேஹி காமராகா³தி³கிலேஸேஹி அபி⁴பூ⁴தா ரூபாதீ³ஸு ஸுப⁴ந்தி பவத்தாய காமஸஞ்ஞாய அனுவத்தனஸீலா. ஸமம் சித்தஸ்ஸ ந லபி⁴ம், ராக³சித்தவஸானுகா³தி காமராக³ஸம்பயுத்தசித்தஸ்ஸ வஸம் அனுக³ச்ச²ந்தீ ஈஸகம்பி சித்தஸ்ஸ ஸமம் சேதோஸமத²ம் சித்தேகக்³க³தம் ந லபி⁴ம்.

கிஸா பண்டு³ விவண்ணா சாதி ஏவம் உக்கண்டி²தபா⁴வேன கிஸா த⁴மனிஸந்த²தக³த்தா உப்பண்டு³ப்பண்டு³கஜாதா ததோ ஏவ விவண்ணா விக³தச²விவண்ணா ச ஹுத்வா. ஸத்த வஸ்ஸானீதி ஸத்த ஸம்வச்ச²ரானி. சாரிஹந்தி சரிம் அஹம். நாஹம் தி³வா வா ரத்திம் வா, ஸுக²ம் விந்தி³ம் ஸுது³க்கி²தாதி ஏவமஹம் ஸத்தஸு ஸம்வச்ச²ரேஸு கிலேஸது³க்கே²ன து³க்கி²தா ஏகதா³பி தி³வா வா ரத்திம் வா ஸமணஸுக²ம் ந படிலபி⁴ம்.

ததோதி கிலேஸபரியுட்டா²னேன ஸமணஸுகா²லாப⁴பா⁴வதோ. ரஜ்ஜும் க³ஹேத்வான பாவிஸிம், வனமந்தரந்தி பாஸரஜ்ஜும் ஆதா³ய வனந்தரம் பாவிஸிம். கிமத்த²ம் பாவிஸீதி சே ஆஹ – ‘‘வரம் மே இத⁴ உப்³ப³ந்த⁴ம், யஞ்ச ஹீனம் புனாசரே’’தி யத³ஹம் ஸமணத⁴ம்மம் காதும் அஸக்கோந்தீ ஹீனம் கி³ஹிபா⁴வம் புன ஆசரே ஆசரேய்யம் அனுதிட்டே²ய்யம், ததோ ஸதகு³ணேன ஸஹஸ்ஸகு³ணேன இமஸ்மிம் வனந்தரே உப்³ப³ந்த⁴ம் ப³ந்தி⁴த்வா மரணம் மே வரம் ஸேட்ட²ந்தி அத்தோ². அத² சித்தம் விமுச்சி மேதி யதா³ ருக்க²ஸாகா²ய ப³ந்த⁴பாஸம் கீ³வாயம் பக்கி²பி, அத² தத³னந்தரமேவ வுட்டா²னகா³மினிவிபஸ்ஸனாமக்³கே³ன க⁴டிதத்தா மக்³க³படிபாடியா ஸப்³பா³ஸவேஹி மம சித்தம் விமுச்சி விமுத்தம் அஹோஸீதி.

ஸீஹாதே²ரீகா³தா²வண்ணனா நிட்டி²தா.