4. ஸுந்த³ரீனந்தா³தே²ரீகா³தா²வண்ணனா

ஆதுரம் அஸுசிந்திஆதி³கா ஸுந்த³ரீனந்தா³ய தே²ரியா கா³தா². அயம்பி கிர பது³முத்தரஸ்ஸ ப⁴க³வதோ காலே ஹம்ஸவதீனக³ரே குலகே³ஹே நிப்³ப³த்தித்வா விஞ்ஞுதம் பத்வா, ஸத்து² ஸந்திகே த⁴ம்மம் ஸுணந்தீ ஸத்தா²ரம் ஏகம் பி⁴க்கு²னிம் ஜா²யினீனம் அக்³க³ட்டா²னே ட²பேந்தம் தி³ஸ்வா அதி⁴காரகம்மம் கத்வா தம் டா²னந்தரம் பத்தே²த்வா குஸலம் உபசினந்தீ கப்பஸதஸஹஸ்ஸம் தே³வமனுஸ்ஸேஸு ஸம்ஸரந்தீ இமஸ்மிம் பு³த்³து⁴ப்பாதே³ ஸக்யராஜகுலே நிப்³ப³த்தி. நந்தா³திஸ்ஸா நாமம் அகம்ஸு. அபரபா⁴கே³ ரூபஸம்பத்தியா ஸுந்த³ரீனந்தா³, ஜனபத³கல்யாணீதி ச பஞ்ஞாயித்த². ஸா அம்ஹாகம் ப⁴க³வதி ஸப்³ப³ஞ்ஞுதம் பத்வா அனுபுப்³பே³ன கபிலவத்து²ம் க³ந்த்வா நந்த³குமாரஞ்ச ராஹுலகுமாரஞ்ச பப்³பா³ஜேத்வா க³தே ஸுத்³தோ⁴த³னமஹாராஜே ச பரினிப்³பு³தே மஹாபஜாபதிகோ³தமியா ராஹுலமாதாய ச பப்³ப³ஜிதாய சிந்தேஸி – ‘‘மய்ஹம் ஜேட்ட²பா⁴தா சக்கவத்திரஜ்ஜம் பஹாய பப்³ப³ஜித்வா லோகே அக்³க³புக்³க³லோ பு³த்³தோ⁴ ஜாதோ, புத்தோபிஸ்ஸ ராஹுலகுமாரோ பப்³ப³ஜி, ப⁴த்தாபி மே நந்த³ராஜா, மாதாபி மஹாபஜாபதிகோ³தமீ, ப⁴கி³னீபி ராஹுலமாதா பப்³ப³ஜிதா, இதா³னாஹம் கே³ஹே கிம் கரிஸ்ஸாமி, பப்³ப³ஜிஸ்ஸாமீ’’தி பி⁴க்கு²னுபஸ்ஸயம் க³ந்த்வா ஞாதிஸினேஹேன பப்³ப³ஜி, நோ ஸத்³தா⁴ய. தஸ்மா பப்³ப³ஜித்வாபி ரூபம் நிஸ்ஸாய உப்பன்னமதா³. ‘‘ஸத்தா² ரூபம் விவண்ணேதி க³ரஹதி, அனேகபரியாயேன ரூபே ஆதீ³னவம் த³ஸ்ஸேதீ’’தி பு³த்³து⁴பட்டா²னம் ந க³ச்ச²தீதிஆதி³ ஸப்³ப³ம் ஹேட்டா² அபி⁴ரூபனந்தா³ய வத்து²ஸ்மிம் வுத்தனயேனேவ வேதி³தப்³ப³ம். அயம் பன விஸேஸோ – ஸத்தா²ரா நிம்மிதம் இத்தி²ரூபம் அனுக்கமேன ஜராபி⁴பூ⁴தம் தி³ஸ்வா அனிச்சதோ து³க்க²தோ அனத்ததோ மனஸிகரோந்தியா தே²ரியா கம்மட்டா²னாபி⁴முக²ம் சித்தம் அஹோஸி. தம் தி³ஸ்வா ஸத்தா² தஸ்ஸா ஸப்பாயவஸேன த⁴ம்மம் தே³ஸேந்தோ –

82. ‘‘ஆதுரம் அஸுசிம் பூதிம், பஸ்ஸ நந்தே³ ஸமுஸ்ஸயம்;

அஸுபா⁴ய சித்தம் பா⁴வேஹி, ஏகக்³க³ம் ஸுஸமாஹிதம்.

83. ‘‘யதா² இத³ம் ததா² ஏதம், யதா² ஏதம் ததா² இத³ம்;

து³க்³க³ந்த⁴ம் பூதிகம் வாதி, பா³லானம் அபி⁴னந்தி³தம்.

84. ‘‘ஏவமேதம் அவேக்க²ந்தீ, ரத்திந்தி³வமதந்தி³தா;

ததோ ஸகாய பஞ்ஞாய, அபி⁴னிப்³பி³ஜ்ஜ² த³க்கி²ஸ’’ந்தி. –

இமா திஸ்ஸோ கா³தா² அபா⁴ஸி.

ஸா தே³ஸனானுஸாரேன ஞாணம் பேஸேத்வா ஸோதாபத்திப²லே பதிட்ட²ஹி. தஸ்ஸா உபரிமக்³க³த்தா²ய கம்மட்டா²னம் ஆசிக்க²ந்தோ ‘‘நந்தே³, இமஸ்மிம் ஸரீரே அப்பமத்தகோபி ஸாரோ நத்தி², மம்ஸலோஹிதலேபனோ ஜராதீ³னம் வாஸபூ⁴தோ, அட்டி²புஞ்ஜமத்தோ ஏவாய’’ந்தி த³ஸ்ஸேதும் –

‘‘அட்டி²னம் நக³ரம் கதம், மம்ஸலோஹிதலேபனம்;

யத்த² ஜரா ச மச்சு ச, மானோ மக்கோ² ச ஓஹிதோ’’தி. (த⁴. ப. 150) –

த⁴ம்மபதே³ இமம் கா³த²மாஹ.

ஸா தே³ஸனாவஸானே அரஹத்தம் பாபுணி. தேன வுத்தம் அபதா³னே (அப. தே²ரீ 2.3.166-219) –

‘‘பது³முத்தரோ நாம ஜினோ, ஸப்³ப³த⁴ம்மான பாரகூ³;

இதோ ஸதஸஹஸ்ஸம்ஹி, கப்பே உப்பஜ்ஜி நாயகோ.

‘‘ஓவாத³கோ விஞ்ஞாபகோ, தாரகோ ஸப்³ப³பாணினம்;

தே³ஸனாகுஸலோ பு³த்³தோ⁴, தாரேஸி ஜனதம் ப³ஹும்.

‘‘அனுகம்பகோ காருணிகோ, ஹிதேஸீ ஸப்³ப³பாணினம்;

ஸம்பத்தே தித்தி²யே ஸப்³பே³, பஞ்சஸீலே பதிட்ட²பி.

‘‘ஏவம் நிராகுலம் ஆஸி, ஸுஞ்ஞதம் தித்தி²யேஹி ச;

விசித்தம் அரஹந்தேஹி, வஸீபூ⁴தேஹி தாதி³பி⁴.

‘‘ரதனானட்ட²பஞ்ஞாஸம், உக்³க³தோவ மஹாமுனி;

கஞ்சனக்³கி⁴யஸங்காஸோ, பா³த்திம்ஸவரலக்க²ணோ.

‘‘வஸ்ஸஸதஸஹஸ்ஸானி, ஆயு விஜ்ஜதி தாவதே³;

தாவதா திட்ட²மானோ ஸோ, தாரேஸி ஜனதம் ப³ஹும்.

‘‘ததா³ஹம் ஹம்ஸவதியம், ஜாதா ஸேட்டி²குலே அஹும்;

நானாரதனபஜ்ஜோதே, மஹாஸுக²ஸமப்பிதா.

‘‘உபேத்வா தம் மஹாவீரம், அஸ்ஸோஸிம் த⁴ம்மதே³ஸனம்;

அமதம் பரமஸ்ஸாத³ம், பரமத்த²னிவேத³கம்.

‘‘ததா³ நிமந்தயித்வான, ஸஸங்க⁴ம் லோகனாயகம்;

த³த்வா தஸ்ஸ மஹாதா³னம், பஸன்னா ஸேஹி பாணிபி⁴.

‘‘ஜா²யினீனம் பி⁴க்கு²னீனம், அக்³க³ட்டா²னமபத்த²யிம்;

நிபச்ச ஸிரஸா தீ⁴ரம், ஸஸங்க⁴ம் லோகனாயகம்.

‘‘ததா³ அத³ந்தத³மகோ, திலோகஸரணோ பபூ⁴;

ப்³யாகாஸி நரஸாரதி², லச்ச²ஸே தம் ஸுபத்தி²தம்.

‘‘ஸதஸஹஸ்ஸிதோ கப்பே, ஓக்காககுலஸம்ப⁴வோ;

கோ³தமோ நாம கோ³த்தேன, ஸத்தா² லோகே ப⁴விஸ்ஸதி.

‘‘தஸ்ஸ த⁴ம்மேஸு தா³யாதா³, ஓரஸா த⁴ம்மனிம்மிதா;

நந்தா³தி நாம நாமேன, ஹேஸ்ஸதி ஸத்து² ஸாவிகா.

‘‘தம் ஸுத்வா முதி³தா ஹுத்வா, யாவஜீவம் ததா³ ஜினம்;

மேத்தசித்தா பரிசரிம், பச்சயேஹி வினாயகம்.

‘‘தேன கம்மேன ஸுகதேன, சேதனாபணிதீ⁴ஹி ச;

ஜஹித்வா மானுஸம் தே³ஹம், தாவதிம்ஸமக³ச்ச²ஹம்.

‘‘ததோ சுதா யாமமக³ம், ததோஹம் துஸிதம் க³தா;

ததோ ச நிம்மானரதிம், வஸவத்திபுரம் ததோ.

‘‘யத்த² யத்தூ²பபஜ்ஜாமி, தஸ்ஸ கம்மஸ்ஸ வாஹஸா;

தத்த² தத்தே²வ ராஜூனம், மஹேஸித்தமகாரயிம்.

‘‘ததோ சுதா மனுஸ்ஸத்தே, ராஜானம் சக்கவத்தினம்;

மண்ட³லீனஞ்ச ராஜூனம், மஹேஸித்தமகாரயிம்.

‘‘ஸம்பத்திம் அனுபோ⁴த்வான, தே³வேஸு மனுஜேஸு ச;

ஸப்³ப³த்த² ஸுகி²தா ஹுத்வா, நேககப்பேஸு ஸம்ஸரிம்.

‘‘பச்சி²மே ப⁴வே ஸம்பத்தே, ஸுரம்மே கபிலவ்ஹயே;

ரஞ்ஞோ ஸுத்³தோ⁴த³னஸ்ஸாஹம், தீ⁴தா ஆஸிம் அனிந்தி³தா.

‘‘ஸிரியா ரூபினிம் தி³ஸ்வா, நந்தி³தம் ஆஸி தம் குலம்;

தேன நந்தா³தி மே நாமம், ஸுந்த³ரம் பவரம் அஹு.

‘‘யுவதீனஞ்ச ஸப்³பா³ஸம், கல்யாணீதி ச விஸ்ஸுதா;

தஸ்மிம்பி நக³ரே ரம்மே, ட²பேத்வா தம் யஸோத⁴ரம்.

‘‘ஜேட்டோ² பா⁴தா திலோகக்³கோ³, பச்சி²மோ அரஹா ததா²;

ஏகாகினீ க³ஹட்டா²ஹம், மாதரா பரிசோதி³தா.

‘‘ஸாகியம்ஹி குலே ஜாதா, புத்தே பு³த்³தா⁴னுஜா துவம்;

நந்தே³னபி வினா பூ⁴தா, அகா³ரே கின்னு அச்ச²ஸி.

‘‘ஜராவஸானம் யோப்³ப³ஞ்ஞம், ரூபம் அஸுசிஸம்மதம்;

ரோக³ந்தமபிசாரோக்³யம், ஜீவிதம் மரணந்திகம்.

‘‘இத³ம்பி தே ஸுப⁴ம் ரூபம், ஸஸீகந்தம் மனோஹரம்;

பூ⁴ஸனானம் அலங்காரம், ஸிரிஸங்கா⁴டஸம்னிப⁴ம்.

‘‘புஞ்ஜிதம் லோகஸாரம்வ, நயனானம் ரஸாயனம்;

புஞ்ஞானம் கித்திஜனனம், உக்காககுலனந்த³னம்.

‘‘ந சிரேனேவ காலேன, ஜரா ஸமதி⁴ஸேஸ்ஸதி;

விஹாய கே³ஹம் காருஞ்ஞே, சர த⁴ம்மமனிந்தி³தே.

‘‘ஸுத்வாஹம் மாது வசனம், பப்³ப³ஜிம் அனகா³ரியம்;

தே³ஹேன நது சித்தேன, ரூபயோப்³ப³னலாளிதா.

‘‘மஹதா ச பயத்தேன, ஜா²னஜ்ஜே²ன பரம் மம;

காதுஞ்ச வத³தே மாதா, ந சாஹம் தத்த² உஸ்ஸுகா.

‘‘ததோ மஹாகாருணிகோ, தி³ஸ்வா மம் காமலாலஸம்;

நிப்³ப³ந்த³னத்த²ம் ரூபஸ்மிம், மம சக்கு²பதே² ஜினோ.

‘‘ஸகேன ஆனுபா⁴வேன, இத்தி²ம் மாபேஸி ஸோபி⁴னிம்;

த³ஸ்ஸனீயம் ஸுருசிரம், மமதோபி ஸுரூபினிம்.

‘‘தமஹம் விம்ஹிதா தி³ஸ்வா, அதிவிம்ஹிததே³ஹினிம்;

சிந்தயிம் ஸப²லம் மேதி, நேத்தலாப⁴ஞ்ச மானுஸம்.

‘‘தமஹம் ஏஹி ஸுப⁴கே³, யேனத்தோ² தம் வதே³ஹி மே;

குலம் தே நாமகோ³த்தஞ்ச, வத³ மே யதி³ தே பியம்.

‘‘ந வஞ்சகாலோ ஸுப⁴கே³, உச்ச²ங்கே³ மம் நிவாஸய;

ஸீத³ந்தீவ மமங்கா³னி, பஸுப்பயமுஹுத்தகம்.

‘‘ததோ ஸீஸம் மமங்கே³ ஸா, கத்வா ஸயி ஸுலோசனா;

தஸ்ஸா நலாடே பதிதா, லுத்³தா⁴ பரமதா³ருணா.

‘‘ஸஹ தஸ்ஸா நிபாதேன, பிளகா உபபஜ்ஜத²;

பக்³க⁴ரிம்ஸு பபி⁴ன்னா ச, குணபா புப்³ப³லோஹிதா.

‘‘பபி⁴ன்னம் வத³னஞ்சாபி, குணபம் பூதிக³ந்த⁴னம்;

உத்³து⁴மாதம் வினிலஞ்ச, புப்³ப³ஞ்சாபி ஸரீரகம்.

‘‘ஸா பவேதி³தஸப்³ப³ங்கீ³, நிஸ்ஸஸந்தீ முஹும் முஹும்;

வேத³யந்தீ ஸகம் து³க்க²ம், கருணம் பரிதே³வயி.

‘‘து³க்கே²ன து³க்கி²தா ஹோமி, பு²ஸயந்தி ச வேத³னா;

மஹாது³க்கே² நிமுக்³க³ம்ஹி, ஸரணம் ஹோஹி மே ஸகீ².

‘‘குஹிம் வத³னஸோதம் தே, குஹிம் தே துங்க³னாஸிகா;

தம்ப³பி³ம்ப³வரோட்ட²ந்தே, வத³னம் தே குஹிம் க³தம்.

‘‘குஹிம் ஸஸீனிப⁴ம் வண்ணம், கம்பு³கீ³வா குஹிம் க³தா;

தோ³ளா லோலாவ தே கண்ணா, வேவண்ணம் ஸமுபாக³தா.

‘‘மகுளகா²ரகாகாரா, கலிகாவ பயோத⁴ரா;

பபி⁴ன்னா பூதிகுணபா, து³ட்ட²க³ந்தி⁴த்தமாக³தா.

‘‘வேதி³மஜ்ஜா²வ ஸுஸ்ஸோணீ, ஸூனாவ நீதகிப்³பி³ஸா;

ஜாதா அமஜ்ஜ²ப⁴ரிதா, அஹோ ரூபமஸஸ்ஸதம்.

‘‘ஸப்³ப³ம் ஸரீரஸஞ்ஜாதம், பூதிக³ந்த⁴ம் ப⁴யானகம்;

ஸுஸானமிவ பீ³ப⁴ச்ச²ம், ரமந்தே யத்த² பா³லிஸா.

‘‘ததா³ மஹாகாருணிகோ, பா⁴தா மே லோகனாயகோ;

தி³ஸ்வா ஸம்விக்³க³சித்தம் மம், இமா கா³தா² அபா⁴ஸத².

‘‘ஆதுரம் குணபம் பூதிம், பஸ்ஸ நந்தே³ ஸமுஸ்ஸயம்;

அஸுபா⁴ய சித்தம் பா⁴வேஹி, ஏகக்³க³ம் ஸுஸமாஹிதம்.

‘‘யதா² இத³ம் ததா² ஏதம், யதா² ஏதம் ததா² இத³ம்;

து³க்³க³ந்த⁴ம் பூதிகம் வாதி, பா³லானம் அபி⁴னந்தி³தம்.

‘‘ஏவமேதம் அவேக்க²ந்தீ, ரத்திந்தி³வமதந்தி³தா;

ததோ ஸகாய பஞ்ஞாய, அபி⁴னிப்³பி³ஜ்ஜ² த³க்கி²ஸம்.

‘‘ததோஹம் அதிஸம்விக்³கா³, ஸுத்வா கா³தா² ஸுபா⁴ஸிதா;

தத்ரட்டி²தாவஹம் ஸந்தீ, அரஹத்தமபாபுணிம்.

‘‘யத்த² யத்த² நிஸின்னாஹம், ஸதா³ ஜா²னபராயணா;

ஜினோ தஸ்மிம் கு³ணே துட்டோ², ஏதத³க்³கே³ ட²பேஸி மம்.

‘‘கிலேஸா ஜா²பிதா மய்ஹம்…பே… கதம் பு³த்³த⁴ஸ்ஸ ஸாஸன’’ந்தி.

அரஹத்தம் பன பத்வா அத்தனோ படிபத்திம் பச்சவேக்கி²த்வா உதா³னவஸேன ‘‘ஆதுரம் அஸுசி’’ந்திஆதி³னா ஸத்தா²ரா தே³ஸிதாஹி தீஹி கா³தா²ஹி ஸத்³தி⁴ம் –

85. ‘‘தஸ்ஸா மே அப்பமத்தாய, விசினந்தியா யோனிஸோ;

யதா²பூ⁴தம் அயம் காயோ, தி³ட்டோ² ஸந்தரபா³ஹிரோ.

86. ‘‘அத² நிப்³பி³ந்த³ஹம் காயே, அஜ்ஜ²த்தஞ்ச விரஜ்ஜஹம்;

அப்பமத்தா விஸம்யுத்தா, உபஸந்தாம்ஹி நிப்³பு³தா’’தி. –

இமா த்³வே கா³தா² அபா⁴ஸி.

தத்த² ஏவமேதம் அவேக்க²ந்தீ…பே… த³க்கி²ஸந்தி ஏதம் ஆதுராதி³ஸபா⁴வம் காயம் ஏவம் ‘‘யதா² இத³ம் ததா² ஏத’’ந்திஆதி³னா வுத்தப்பகாரேன ரத்திந்தி³வம் ஸப்³ப³காலம் அதந்தி³தா ஹுத்வா பரதோ கோ⁴ஸஹேதுகம் ஸுதமயஞாணம் முஞ்சித்வா, ததோ தம்னிமித்தம் அத்தனி ஸம்பூ⁴தத்தா ஸகாயபா⁴வனாமயாய பஞ்ஞாய யாதா²வதோ க⁴னவினிப்³போ⁴க³கரணேன அபி⁴னிப்³பி³ஜ்ஜ², கத²ம் நு கோ² த³க்கி²ஸம் பஸ்ஸிஸ்ஸந்தி ஆபோ⁴க³புரேசாரிகேன புப்³ப³பா⁴க³ஞாணசக்கு²னா அவேக்க²ந்தீ விசினந்தீதி அத்தோ².

தேனாஹ ‘‘தஸ்ஸா மே அப்பமத்தாயா’’திஆதி³. தஸ்ஸத்தோ² – தஸ்ஸா மே ஸதிஅவிப்பவாஸேன அப்பமத்தாய யோனிஸோ உபாயேன அனிச்சாதி³வஸேன விபஸ்ஸனாபஞ்ஞாய விசினந்தியா வீமம்ஸந்தியா, அயம் க²ந்த⁴பஞ்சகஸங்கா²தோ காயோ ஸஸந்தானபரஸந்தானவிபா⁴க³தோ ஸந்தரபா³ஹிரோ யதா²பூ⁴தம் தி³ட்டோ².

அத² ததா² த³ஸ்ஸனதோ பச்சா² நிப்³பி³ந்த³ஹம் காயே விபஸ்ஸனாபஞ்ஞாஸஹிதாய மக்³க³பஞ்ஞாய அத்தபா⁴வே நிப்³பி³ந்தி³ம், விஸேஸதோவ அஜ்ஜ²த்தஸந்தானே விரஜ்ஜி விராக³ம் ஆபஜ்ஜிம், அஹம் யதா²பூ⁴தாய அப்பமாத³படிபத்தியா மத்த²கப்பத்தியா அப்பமத்தா ஸப்³ப³ஸோ ஸம்யோஜனானம் ஸமுச்சி²ன்னத்தா விஸம்யுத்தா உபஸந்தா ச நிப்³பு³தா ச அம்ஹீதி.

ஸுந்த³ரீனந்தா³தே²ரீகா³தா²வண்ணனா நிட்டி²தா.