1. அபி⁴ரூபனந்தா³தே²ரீகா³தா²வண்ணனா

து³கனிபாதே ஆதுரம் அஸுசிம் பூதிந்திஆதி³கா அபி⁴ரூபனந்தா³ய ஸிக்க²மானாய கா³தா². அயம் கிர விபஸ்ஸிஸ்ஸ ப⁴க³வதோ காலே ப³ந்து⁴மதீனக³ரே க³ஹபதிமஹாஸாலஸ்ஸ தீ⁴தா ஹுத்வா ஸத்து² ஸந்திகே த⁴ம்மம் ஸுத்வா ஸரணேஸு ச ஸீலேஸு ச பதிட்டி²தா ஸத்த²ரி பரினிப்³பு³தே தா⁴துசேதியம் ரதனபடிமண்டி³தேன ஸுவண்ணச்ச²த்தேன பூஜம் கத்வா, காலங்கத்வா ஸக்³கே³ நிப்³ப³த்தித்வா அபராபரம் ஸுக³தீஸுயேவ ஸம்ஸரந்தீ இமஸ்மிம் பு³த்³து⁴ப்பாதே³ கபிலவத்து²னக³ரே கே²மகஸ்ஸ ஸக்கஸ்ஸ அக்³க³மஹேஸியா குச்சி²ஸ்மிம் நிப்³ப³த்தி. நந்தா³திஸ்ஸா நாமம் அஹோஸி. ஸா அத்தபா⁴வஸ்ஸ அதிவிய ரூபஸோப⁴க்³க³ப்பத்தியா அபி⁴ரூபா த³ஸ்ஸனீயா பாஸாதி³கா அபி⁴ரூபனந்தா³த்வேவ பஞ்ஞாயித்த². தஸ்ஸா வயப்பத்தாய வாரேய்யதி³வஸேயேவ வரபூ⁴தோ ஸக்யகுமாரோ காலமகாஸி. அத² நம் மாதாபிதரோ அகாமம் பப்³பா³ஜேஸும்.

ஸா பப்³ப³ஜித்வாபி ரூபம் நிஸ்ஸாய உப்பன்னமதா³ ‘‘ஸத்தா² ரூபம் விவண்ணேதி க³ரஹதி அனேகபரியாயேன ரூபே ஆதீ³னவம் த³ஸ்ஸேதீ’’தி பு³த்³து⁴பட்டா²னம் ந க³ச்ச²தி. ப⁴க³வா தஸ்ஸா ஞாணபரிபாகம் ஞத்வா மஹாபஜாபதிம் ஆணாபேஸி ‘‘ஸப்³பா³பி பி⁴க்கு²னியோ படிபாடியா ஓவாத³ம் ஆக³ச்ச²ந்தூ’’தி. ஸா அத்தனோ வாரே ஸம்பத்தே அஞ்ஞம் பேஸேஸி. ப⁴க³வா ‘‘வாரே ஸம்பத்தே அத்தனாவ ஆக³ந்தப்³ப³ம், ந அஞ்ஞா பேஸேதப்³பா³’’தி ஆஹ. ஸா ஸத்து² ஆணம் லங்கி⁴தும் அஸக்கோந்தீ பி⁴க்கு²னீஹி ஸத்³தி⁴ம் பு³த்³து⁴பட்டா²னம் அக³மாஸி. ப⁴க³வா இத்³தி⁴யா ஏகம் அபி⁴ரூபம் இத்தி²ரூபம் மாபேத்வா புன ஜராஜிண்ணம் த³ஸ்ஸேத்வா ஸம்வேக³ம் உப்பாதே³த்வா –

19. ‘‘ஆதுரம் அஸுசிம் பூதிம், பஸ்ஸ நந்தே³ ஸமுஸ்ஸயம்;

அஸுபா⁴ய சித்தம் பா⁴வேஹி, ஏகக்³க³ம் ஸுஸமாஹிதம்.

20. ‘‘அனிமித்தஞ்ச பா⁴வேஹி, மானானுஸயமுஜ்ஜஹ;

ததோ மானாபி⁴ஸமயா, உபஸந்தா சரிஸ்ஸஸீ’’தி. –

இமா த்³வே கா³தா² அபா⁴ஸி. தாஸம் அத்தோ² ஹேட்டா² வுத்தனயோ ஏவ. கா³தா²பரியோஸானே அபி⁴ரூபனந்தா³ அரஹத்தம் பாபுணி. தேன வுத்தம் அபதா³னே –

‘‘நக³ரே ப³ந்து⁴மதியா, ப³ந்து⁴மா நாம க²த்தியோ;

தஸ்ஸ ரஞ்ஞோ அஹும் ப⁴ரியா, ஏகஜ்ஜ²ம் சாரயாமஹம்.

‘‘ரஹோக³தா நிஸீதி³த்வா, ஏவம் சிந்தேஸஹம் ததா³;

ஆதா³ய க³மனீயஞ்ஹி, குஸலம் நத்தி² மே கதம்.

‘‘மஹாபி⁴தாபம் கடுகம், கோ⁴ரரூபம் ஸுதா³ருணம்;

நிரயம் நூன க³ச்சா²மி, ஏத்த² மே நத்தி² ஸம்ஸயோ.

‘‘ஏவாஹம் சிந்தயித்வான, பஹம்ஸேத்வான மானஸம்;

ராஜானம் உபக³ந்த்வான, இத³ம் வசனமப்³ரவிம்.

‘‘இத்தீ² நாம மயம் தே³வ, புரிஸானுக³தா ஸதா³;

ஏகம் மே ஸமணம் தே³ஹி, போ⁴ஜயிஸ்ஸாமி க²த்திய.

‘‘அதா³ஸி மே மஹாராஜா, ஸமணம் பா⁴விதிந்த்³ரியம்;

தஸ்ஸ பத்தம் க³ஹேத்வான, பரமன்னேன பூரயிம்.

‘‘பூரயித்வா பரமன்னம், ஸஹஸ்ஸக்³க⁴னகேனஹம்;

வத்த²யுகே³ன சா²தே³த்வா, அதா³ஸிம் துட்ட²மானஸா.

‘‘தேன கம்மேன ஸுகதேன, சேதனாபணிதீ⁴ஹி ச;

ஜஹித்வா மானுஸம் தே³ஹம், தாவதிம்ஸமக³ச்ச²ஹம்.

‘‘ஸஹஸ்ஸம் தே³வராஜூனம், மஹேஸித்தமகாரயிம்;

ஸஹஸ்ஸம் சக்கவத்தீனம், மஹேஸித்தமகாரயிம்.

‘‘பதே³ஸரஜ்ஜம் விபுலம், க³ணனாதோ அஸங்கி²யம்;

நானாவித⁴ம் ப³ஹும் புஞ்ஞம், தஸ்ஸ கம்மப²லா ததோ.

‘‘உப்பலஸ்ஸேவ மே வண்ணா, அபி⁴ரூபா ஸுத³ஸ்ஸனா;

இத்தீ² ஸப்³ப³ங்க³ஸம்பன்னா, அபி⁴ஜாதா ஜுதிந்த⁴ரா.

‘‘பச்சி²மே ப⁴வஸம்பத்தே, அஜாயிம் ஸாகியே குலே;

நாரீஸஹஸ்ஸபாமோக்கா², ஸுத்³தோ⁴த³னஸுதஸ்ஸஹம்.

‘‘நிப்³பி³ந்தி³த்வா அகா³ரேஹம், பப்³ப³ஜிம் அனகா³ரியம்;

ஸத்தமிம் ரத்திம் ஸம்பத்வா, சதுஸச்சம் அபாபுணிம்.

‘‘சீவரபிண்ட³பாதஞ்ச, பச்சயஞ்ச ஸேனாஸனம்;

பரிமேதும் ந ஸக்கோமி, பிண்ட³பாதஸ்ஸித³ம் ப²லம்.

‘‘யம் மய்ஹம் புரிமம் கம்மம், குஸலம் ஜனிதம் முனி;

துய்ஹத்தா²ய மஹாவீர, பரிசிண்ணம் ப³ஹும் மயா.

‘‘ஏகதிம்ஸே இதோ கப்பே, யம் தா³னமத³தி³ம் ததா³;

து³க்³க³திம் நாபி⁴ஜானாமி, பிண்ட³பாதஸ்ஸித³ம் ப²லம்.

‘‘து³வே க³தீ பஜானாமி, தே³வத்தம் அத² மானுஸம்;

அஞ்ஞம் க³திம் ந ஜானாமி, பிண்ட³பாதஸ்ஸித³ம் ப²லம்.

‘‘உச்சே குலே பஜானாமி, தயோ ஸாலே மஹாத⁴னே;

அஞ்ஞம் குலம் ந ஜானாமி, பிண்ட³பாதஸ்ஸித³ம் ப²லம்.

‘‘ப⁴வாப⁴வே ஸம்ஸரித்வா, ஸுக்கமூலேன சோதி³தா;

அமனாபம் ந பஸ்ஸாமி, ஸோமனஸ்ஸகதம் ப²லம்.

‘‘இத்³தீ⁴ஸு ச வஸீ ஹோமி, தி³ப்³பா³ய ஸோததா⁴துயா;

சேதோபரியஞாணஸ்ஸ, வஸீ ஹோமி மஹாமுனே.

‘‘புப்³பே³னிவாஸம் ஜானாமி, தி³ப்³ப³சக்கு² விஸோதி⁴தம்;

ஸப்³பா³ஸவபரிக்கீ²ணா, நத்தி² தா³னி புனப்³ப⁴வோ.

‘‘அத்த²த⁴ம்மனிருத்தீஸு, படிபா⁴னே ததே²வ ச;

ஞாணம் மம மஹாவீர, உப்பன்னம் தவ ஸந்திகே.

‘‘கிலேஸா ஜா²பிதா மய்ஹம்…பே… கதம் பு³த்³த⁴ஸ்ஸ ஸாஸன’’ந்தி.

அரஹத்தம் பத்வா பன ஸா ஸயம்பி உதா³னவஸேன தாயேவ கா³தா² அபா⁴ஸி, இத³மேவ சஸ்ஸா அஞ்ஞாப்³யாகரணம் அஹோஸீதி.

அபி⁴ரூபனந்தா³தே²ரீகா³தா²வண்ணனா நிட்டி²தா.