3. சாபாதே²ரீகா³தா²வண்ணனா

லட்டி²ஹத்தோ² புரே ஆஸீதிஆதி³கா சாபாய தே²ரியா கா³தா². அயம்பி புரிமபு³த்³தே⁴ஸு கதாதி⁴காரா தத்த² தத்த² ப⁴வே விவட்டூபனிஸ்ஸயம் குஸலம் உபசினந்தீ, அனுக்கமேன உபசிதகுஸலமூலா ஸம்ப⁴தவிமோக்க²ஸம்பா⁴ரா ஹுத்வா இமஸ்மிம் பு³த்³து⁴ப்பாதே³ வங்க³ஹாரஜனபதே³ அஞ்ஞதரஸ்மிம் மிக³லுத்³த³ககா³மே ஜேட்ட²கமிக³லுத்³த³கஸ்ஸ தீ⁴தா ஹுத்வா நிப்³ப³த்தி, சாபாதிஸ்ஸா நாமம் அஹோஸி. தேன ச ஸமயேன உபகோ ஆஜீவகோ போ³தி⁴மண்ட³தோ த⁴ம்மசக்கம் பவத்தேதும் பா³ராணஸிம் உத்³தி³ஸ்ஸ க³ச்ச²ந்தேன ஸத்தா²ரா ஸமாக³தோ ‘‘விப்பஸன்னானி கோ² தே, ஆவுஸோ, இந்த்³ரியானி, பரிஸுத்³தோ⁴ ச²விவண்ணோ பரியோதா³தோ, கம்ஸி த்வம், ஆவுஸோ, உத்³தி³ஸ்ஸ பப்³ப³ஜிதோ, கோ வா தே ஸத்தா², கஸ்ஸ வா த்வம் த⁴ம்மம் ரோசேஸீ’’தி (மஹாவ. 11; ம. நி. 1.285) புச்சி²த்வா –

‘‘ஸப்³பா³பி⁴பூ⁴ ஸப்³ப³விதூ³ஹமஸ்மி, ஸப்³பே³ஸு த⁴ம்மேஸு அனூபலித்தோ;

ஸப்³ப³ஞ்ஜஹோ தண்ஹாக்க²யே விமுத்தோ, ஸயம் அபி⁴ஞ்ஞாய கமுத்³தி³ஸேய்யம். (த⁴. ப. 353; மஹாவ. 11; கதா². 405; ம. நி. 1.285);

‘‘ந மே ஆசரியோ அத்தி², ஸதி³ஸோ மே ந விஜ்ஜதி;

ஸதே³வகஸ்மிம் லோகஸ்மிம், நத்தி² மே படிபுக்³க³லோ.

‘‘அஹஞ்ஹி அரஹா லோகே, அஹம் ஸத்தா² அனுத்தரோ;

ஏகோம்ஹி ஸம்மாஸம்பு³த்³தோ⁴, ஸீதிபூ⁴தோம்ஹி நிப்³பு³தோ.

‘‘த⁴ம்மசக்கம் பவத்தேதும், க³ச்சா²மி காஸினம் புரம்;

அந்தீ⁴பூ⁴தஸ்மிம் லோகஸ்மிம், ஆஹஞ்ச²ம் அமதது³ந்து³பி⁴’’ந்தி. (மஹாவ. 11; கதா². 405; ம. நி. 1.285) –

ஸத்தா²ரா அத்தனோ ஸப்³ப³ஞ்ஞுபு³த்³த⁴பா⁴வே த⁴ம்மசக்கபவத்தனே ச பவேதி³தே பஸன்னசித்தோ ஸோ ‘‘ஹுபேய்யபாவுஸோ, அரஹஸி அனந்தஜினோ’’தி (மஹாவ. 11; ம. நி. 1.285) வத்வா உம்மக்³க³ம் க³ஹேத்வா பக்கந்தோ வங்க³ஹாரஜனபத³ம் அக³மாஸி. ஸோ தத்த² ஏகம் மிக³லுத்³த³ககா³மகம் உபனிஸ்ஸாய வாஸம் கப்பேஸி. தம் தத்த² ஜேட்ட²கமிக³லுத்³த³கோ உபட்டா²ஸி. ஸோ ஏகதி³வஸம் தூ³ரம் மிக³வம் க³ச்ச²ந்தோ ‘‘மய்ஹம் அரஹந்தே மா பமஜ்ஜீ’’தி அத்தனோ தீ⁴தரம் சாபம் ஆணாபேத்வா அக³மாஸி ஸத்³தி⁴ம் புத்தபா⁴துகேஹி. ஸா சஸ்ஸ தீ⁴தா அபி⁴ரூபா ஹோதி த³ஸ்ஸனீயா.

அத² கோ² உபகோ ஆஜீவகோ பி⁴க்கா²சாரவேலாயம் மிக³லுத்³த³கஸ்ஸ க⁴ரம் க³தோ பரிவிஸிதும் உபக³தம் சாபம் தி³ஸ்வா ராகே³ன அபி⁴பூ⁴தோ பு⁴ஞ்ஜிதும்பி அஸக்கோந்தோ பா⁴ஜனேன ப⁴த்தம் ஆதா³ய வஸனட்டா²னம் க³ந்த்வா ப⁴த்தம் ஏகமந்தே நிக்கி²பித்வா ‘‘ஸசே சாபம் லபி⁴ஸ்ஸாமி, ஜீவாமி, நோ சே, மரிஸ்ஸாமீ’’தி நிராஹாரோ நிபஜ்ஜி. ஸத்தமே தி³வஸே மிக³லுத்³த³கோ ஆக³ந்த்வா தீ⁴தரம் புச்சி² – ‘‘கிம் மய்ஹம் அரஹந்தே ந பமஜ்ஜீ’’தி? ஸா ‘‘ஏகதி³வஸமேவ ஆக³ந்த்வா புன நாக³தபுப்³போ³’’தி ஆஹ. மிக³லுத்³த³கோ ச தாவதே³வஸ்ஸ வஸனட்டா²னம் க³ந்த்வா ‘‘கிம், ப⁴ந்தே, அபா²ஸுக’’ந்தி பாதே³ பரிமஜ்ஜந்தோ புச்சி². உபகோ நித்து²னந்தோ பரிவத்ததியேவ. ஸோ ‘‘வத³த², ப⁴ந்தே, யம் மயா ஸக்கா காதும், ஸப்³ப³ம் தம் கரிஸ்ஸாமீ’’தி ஆஹ. உபகோ ஏகேன பரியாயேன அத்தனோ அஜ்ஜா²ஸயம் ஆரோசேஸி. ‘‘இதரோ ஜானாஸி பன, ப⁴ந்தே, கிஞ்சி ஸிப்ப’’ந்தி. ‘‘ந ஜானாமீ’’தி. ‘‘ந, ப⁴ந்தே, கிஞ்சி ஸிப்பம் அஜானந்தேன ஸக்கா க⁴ரம் ஆவஸிது’’ந்தி. ஸோ ஆஹ – ‘‘நாஹம் கிஞ்சி ஸிப்பம் ஜானாமி, அபிச தும்ஹாகம் மம்ஸஹாரகோ ப⁴விஸ்ஸாமி, மம்ஸஞ்ச விக்கிணிஸ்ஸாமீ’’தி. மாக³விகோ ‘‘அம்ஹாகம்பி ஏததே³வ ருச்சதீ’’தி உத்தரஸாடகம் த³த்வா அத்தனோ ஸஹாயகஸ்ஸ கே³ஹே கதிபாஹம் வஸாபேத்வா தாதி³ஸே தி³வஸே க⁴ரம் ஆனேத்வா தீ⁴தரம் அதா³ஸி.

அத² காலே க³ச்ச²ந்தே தேஸம் ஸம்வாஸமன்வாய புத்தோ நிப்³ப³த்தி, ஸுப⁴த்³தோ³திஸ்ஸ நாமம் அகம்ஸு. சாபா தஸ்ஸ ரோத³னகாலே ‘‘உபகஸ்ஸ புத்த, ஆஜீவகஸ்ஸ புத்த, மம்ஸஹாரகஸ்ஸ புத்த, மா ரோதி³ மா ரோதீ³’’திஆதி³னா புத்ததோஸனகீ³தேன உபகம் உப்பண்டே³ஸி. ஸோ ‘‘மா த்வம் சாபே மம் ‘அனாதோ²’தி மஞ்ஞி, அத்தி² மே ஸஹாயோ அனந்தஜினோ நாம, தஸ்ஸாஹம் ஸந்திகம் க³மிஸ்ஸாமீ’’தி ஆஹ. சாபா ‘‘ஏவமயம் அட்டீயதீ’’தி ஞத்வா புனப்புனம் ததா² கதே²ஸியேவ. ஸோ ஏகதி³வஸம் தாய ததா² வுத்தோ குஜ்ஜி²த்வா க³ந்துமாரத்³தோ⁴. தாய தம் தம் வத்வா அனுனீயமானோபி ஸஞ்ஞத்திம் அனாக³ச்ச²ந்தோ பச்சி²மதி³ஸாபி⁴முகோ² பக்காமி.

ப⁴க³வா ச தேன ஸமயேன ஸாவத்தி²யம் ஜேதவனே விஹரந்தோ பி⁴க்கூ²னம் ஆசிக்கி² – ‘‘யோ, பி⁴க்க²வே, அஜ்ஜ ‘குஹிம் அனந்தஜினோ’தி இதா⁴க³ந்த்வா புச்ச²தி, தம் மம ஸந்திகம் பேஸேதா²’’தி. உபகோபி ‘‘குஹிம் அனந்தஜினோ வஸதீ’’தி தத்த² தத்த² புச்ச²ந்தோ அனுபுப்³பே³ன ஸாவத்தி²ம் க³ந்த்வா விஹாரம் பவிஸித்வா விஹாரமஜ்ஜே² ட²த்வா ‘‘குஹிம் அனந்தஜினோ’’தி புச்சி². தம் பி⁴க்கூ² ப⁴க³வதோ ஸந்திகம் நயிம்ஸு. ஸோ ப⁴க³வந்தம் தி³ஸ்வா ‘‘ஜானாத² மம் ப⁴க³வா’’தி ஆஹ. ‘‘ஆம, ஜானாமி, குஹிம் பன த்வம் ஏத்தகம் காலம் வஸீ’’தி? ‘‘வங்க³ஹாரஜனபதே³, ப⁴ந்தே’’தி. ‘‘உபக, இதா³னி மஹல்லகோ ஜாதோ பப்³ப³ஜிதும் ஸக்கி²ஸ்ஸஸீ’’தி? ‘‘பப்³ப³ஜிஸ்ஸாமி, ப⁴ந்தே’’தி. ஸத்தா² அஞ்ஞதரம் பி⁴க்கு²ம் ஆணாபேஸி – ‘‘ஏஹி த்வம், பி⁴க்கு², இமம் பப்³பா³ஜேஹீ’’தி. ஸோ தம் பப்³பா³ஜேஸி. ஸோ பப்³ப³ஜிதோ ஸத்து² ஸந்திகே கம்மட்டா²னம் க³ஹேத்வா பா⁴வனம் அனுயுஞ்ஜந்தோ ந சிரஸ்ஸேவ அனாகா³மிப²லே பதிட்டா²ய காலம் கத்வா அவிஹேஸு நிப்³ப³த்தோ, நிப்³ப³த்தக்க²ணேயேவ அரஹத்தம் பாபுணி. அவிஹேஸு நிப்³ப³த்தமத்தா ஸத்த ஜனா அரஹத்தம் பத்தா, தேஸம் அயம் அஞ்ஞதரோ. வுத்தஞ்ஹேதம் –

‘‘அவிஹம் உபபன்னாஸே, விமுத்தா ஸத்த பி⁴க்க²வோ;

ராக³தோ³ஸபரிக்கீ²ணா, திண்ணா லோகே விஸத்திகம்.

‘‘உபகோபலக³ண்டோ³ ச, பக்குஸாதி ச தே தயோ;

ப⁴த்³தி³யோ க²ண்ட³தே³வோ ச, பா³ஹுரக்³கி³ ச ஸிங்கி³யோ;

தே ஹித்வா மானுஸம் தே³ஹம், தி³ப்³ப³யோக³ம் உபச்சகு³’’ந்தி. (ஸம். நி. 1.105);

உபகே பன பக்கந்தே நிப்³பி³ந்த³ஹத³யா சாபா தா³ரகம் அய்யகஸ்ஸ நிய்யாதே³த்வா புப்³பே³ உபகேன க³தமக்³க³ம் க³ச்ச²ந்தீ ஸாவத்தி²ம் க³ந்த்வா பி⁴க்கு²னீனம் ஸந்திகே பப்³ப³ஜித்வா விபஸ்ஸனாய கம்மம் கரோந்தீ மக்³க³படிபாடியா அரஹத்தே பதிட்டி²தா, அத்தனோ படிபத்திம் பச்சவேக்கி²த்வா புப்³பே³ உபகேன அத்தனா ச கதி²தகா³தா²யோ உதா³னவஸேன ஏகஜ்ஜ²ம் கத்வா –

292. ‘‘லட்டி²ஹத்தோ² புரே ஆஸி, ஸோ தா³னி மிக³லுத்³த³கோ;

ஆஸாய பலிபா கோ⁴ரா, நாஸக்கி² பாரமேதவே.

293. ‘‘ஸுமத்தம் மம் மஞ்ஞமானா, சாபி புத்தமதோஸயி;

சாபாய ப³ந்த⁴னம் சே²த்வா, பப்³ப³ஜிஸ்ஸம் புனோபஹம்.

294. ‘‘மா மே குஜ்ஜி² மஹாவீர, மா மே குஜ்ஜி² மஹாமுனி;

ந ஹி கோத⁴பரேதஸ்ஸ, ஸுத்³தி⁴ அத்தி² குதோ தபோ.

295. ‘‘பக்கமிஸ்ஸஞ்ச நாளாதோ, கோத⁴ நாளாய வச்ச²தி;

ப³ந்த⁴ந்தீ இத்தி²ரூபேன, ஸமணே த⁴ம்மஜீவினோ.

296. ‘‘ஏஹி காள நிவத்தஸ்ஸு, பு⁴ஞ்ஜ காமே யதா² புரே;

அஹஞ்ச தே வஸீகதா, யே ச மே ஸந்தி ஞாதகா.

297. ‘‘ஏத்தோ சாபே சதுப்³பா⁴க³ம், யதா² பா⁴ஸஸி த்வஞ்ச மே;

தயி ரத்தஸ்ஸ போஸஸ்ஸ, உளாரம் வத தம் ஸியா.

298. ‘‘காளங்கி³னிம்வ தக்காரிம், புப்பி²தம் கி³ரிமுத்³த⁴னி;

பு²ல்லம் தா³லிமலட்டி²ம்வ, அந்தோதீ³பேவ பாடலிம்.

299. ‘‘ஹரிசந்த³னலித்தங்கி³ம், காஸிகுத்தமதா⁴ரினிம்;

தம் மம் ரூபவதிம் ஸந்திம், கஸ்ஸ ஓஹாயம் க³ச்ச²ஸி.

300. ‘‘ஸாகுந்திகோவ ஸகுணிம், யதா² ப³ந்தி⁴துமிச்ச²தி;

ஆஹரிமேன ரூபேன, ந மம் த்வம் பா³த⁴யிஸ்ஸஸி.

301. ‘‘இமஞ்ச மே புத்தப²லம், காள உப்பாதி³தம் தயா;

தம் மம் புத்தவதிம் ஸந்திம், கஸ்ஸ ஓஹாய க³ச்ச²ஸி.

302. ‘‘ஜஹந்தி புத்தே ஸப்பஞ்ஞா, ததோ ஞாதீ ததோ த⁴னம்;

பப்³ப³ஜந்தி மஹாவீரா, நாகோ³ சே²த்வாவ ப³ந்த⁴னம்.

303. ‘‘இதா³னி தே இமம் புத்தம், த³ண்டே³ன சு²ரிகாய வா;

பூ⁴மியம் வா நிஸும்பி⁴ஸ்ஸம், புத்தஸோகா ந க³ச்ச²ஸி.

304. ‘‘ஸசே புத்தம் ஸிங்கா³லானம், குக்குரானம் பதா³ஹிஸி;

ந மம் புத்தகத்தே ஜம்மி, புனராவத்தயிஸ்ஸஸி.

305. ‘‘ஹந்த³ கோ² தா³னி ப⁴த்³த³ந்தே, குஹிம் காள க³மிஸ்ஸஸி;

கதமம் கா³மனிக³மம், நக³ரம் ராஜதா⁴னியோ.

306. ‘‘அஹும்ஹ புப்³பே³ க³ணினோ, அஸ்ஸமணா ஸமணமானினோ;

கா³மேன கா³மம் விசரிம்ஹ, நக³ரே ராஜதா⁴னியோ.

307. ‘‘ஏஸோ ஹி ப⁴க³வா பு³த்³தோ⁴, நதி³ம் நேரஞ்ஜரம் பதி;

ஸப்³ப³து³க்க²ப்பஹானாய, த⁴ம்மம் தே³ஸேதி பாணினம்;

தஸ்ஸாஹம் ஸந்திகம் க³ச்ச²ம், ஸோ மே ஸத்தா² ப⁴விஸ்ஸதி.

308. ‘‘வந்த³னம் தா³னி மே வஜ்ஜாஸி, லோகனாத²ம் அனுத்தரம்;

பத³க்கி²ணஞ்ச கத்வான, ஆதி³ஸேய்யாஸி த³க்கி²ணம்.

309. ‘‘ஏதம் கோ² லப்³ப⁴மம்ஹேஹி, யதா² பா⁴ஸஸி த்வஞ்ச மே;

வந்த³னம் தா³னி தே வஜ்ஜம், லோகனாத²ம் அனுத்தரம்;

பத³க்கி²ணஞ்ச கத்வான, ஆதி³ஸிஸ்ஸாமி த³க்கி²ணம்.

310. ‘‘ததோ ச காளோ பக்காமி, நதி³ம் நேரஞ்ஜரம் பதி;

ஸோ அத்³த³ஸாஸி ஸம்பு³த்³த⁴ம், தே³ஸேந்தம் அமதம் பத³ம்.

311. ‘‘து³க்க²ம் து³க்க²ஸமுப்பாத³ம், து³க்க²ஸ்ஸ ச அதிக்கமம்;

அரியம் சட்ட²ங்கி³கம் மக்³க³ம், து³க்கூ²பஸமகா³மினம்.

312. ‘‘தஸ்ஸ பாதா³னி வந்தி³த்வா, கத்வான நம் பத³க்கி²ணம்;

சாபாய ஆதி³ஸித்வான, பப்³ப³ஜிம் அனகா³ரியம்;

திஸ்ஸோ விஜ்ஜா அனுப்பத்தா, கதம் பு³த்³த⁴ஸ்ஸ ஸாஸன’’ந்தி. –

இமா கா³தா² அபா⁴ஸி.

தத்த² லட்டி²ஹத்தோ²தி த³ண்ட³ஹத்தோ². புரேதி புப்³பே³ பரிப்³பா³ஜககாலே சண்ட³கோ³ணகுக்குராதீ³னம் பரிஹரணத்த²ம் த³ண்ட³ம் ஹத்தே²ன க³ஹேத்வா விசரணகோ அஹோஸி. ஸோ தா³னி மிக³லுத்³த³கோதி ஸோ இதா³னி மிக³லுத்³தே³ஹி ஸத்³தி⁴ம் ஸம்போ⁴க³ஸம்வாஸேஹி மிக³லுத்³தோ³ மாக³விகோ ஜாதோ. ஆஸாயாதி தண்ஹாய. ‘‘ஆஸயா’’திபி பாடோ², அஜ்ஜா²ஸயஹேதூதி அத்தோ². பலிபாதி காமபங்கதோ தி³ட்டி²பங்கதோ ச. கோ⁴ராதி அவிதி³தவிபுலானத்தா²வஹத்தா தா³ருணதோ கோ⁴ரா. நாஸக்கி² பாரமேதவேதி தஸ்ஸேவ பலிபஸ்ஸ பாரபூ⁴தம் நிப்³பா³னம் ஏதும் க³ந்தும் ந அஸக்கி², ந அபி⁴ஸம்பு⁴னீதி அத்தானமேவ ஸந்தா⁴ய உபகோ வத³தி.

ஸுமத்தம் மம் மஞ்ஞமானாதி அத்தனி ஸுட்டு² மத்தம் மத³ப்பத்தம் காமகே³த⁴வஸேன லக்³க³ம் பமத்தம் வா கத்வா மம் ஸல்லக்க²ந்தீ. சாபா புத்தமதோஸயீதி மிக³லுத்³த³ஸ்ஸ தீ⁴தா சாபா ‘‘ஆஜீவகஸ்ஸ புத்தா’’திஆதி³னா மம் க⁴ட்டேந்தீ புத்தம் தோஸேஸி கேளாயஸி. ‘‘ஸுபதி மம் மஞ்ஞமானா’’தி ச பட²ந்தி, ஸுபதீதி மம் மஞ்ஞமானாதி அத்தோ². சாபாய ப³ந்த⁴னம் சே²த்வாதி சாபாய தயி உப்பன்னம் கிலேஸப³ந்த⁴னம் சி²ந்தி³த்வா. பப்³ப³ஜிஸ்ஸம் புனோபஹந்தி புன து³தியவாரம்பி அஹம் பப்³ப³ஜிஸ்ஸாமி.

இதா³னி தஸ்ஸா ‘‘மய்ஹம் அத்தோ² நத்தீ²’’தி வத³தி, தம் ஸுத்வா சாபா க²மாபேந்தீ ‘‘மா மே குஜ்ஜீ²’’தி கா³த²மாஹ. தத்த² மா மே குஜ்ஜீ²தி கேளிகரணமத்தேன மா மய்ஹம் குஜ்ஜி². மஹாவீர, மஹாமுனீதி உபகம் ஆலபதி. தஞ்ஹி ஸா புப்³பே³பி பப்³ப³ஜிதோ, இதா³னிபி பப்³ப³ஜிதுகாமோதி கத்வா க²ந்திஞ்ச பச்சாஸீஸந்தீ ‘‘மஹாமுனீ’’தி ஆஹ. தேனேவாஹ – ‘‘ந ஹி கோத⁴பரேதஸ்ஸ, ஸுத்³தி⁴ அத்தி² குதோ தபோ’’தி, த்வம் ஏத்தகம்பி அஸஹந்தோ கத²ம் சித்தம் த³மேஸ்ஸஸி, கத²ம் வா தபம் சரிஸ்ஸஸீதி அதி⁴ப்பாயோ.

அத² நாளம் க³ந்த்வா ஜீவிதுகாமோஸீதி சாபாய வுத்தோ ஆஹ – ‘‘பக்கமிஸ்ஸஞ்ச நாளாதோ, கோத⁴ நாளாய வச்ச²தீ’’தி கோ இத⁴ நாளாய வஸிஸ்ஸதி, நாளாதோவ அஹம் பக்கமிஸ்ஸாமேவ. ஸோ ஹி தஸ்ஸ ஜாதகா³மோ, ததோ நிக்க²மித்வா பப்³ப³ஜி. ஸோ ச மக³த⁴ரட்டே² போ³தி⁴மண்ட³ஸ்ஸ ஆஸன்னபதே³ஸே, தம் ஸந்தா⁴ய வுத்தம். ப³ந்த⁴ந்தீ இத்தி²ரூபேன, ஸமணே த⁴ம்மஜீவினோதி சாபே த்வம் த⁴ம்மேன ஜீவந்தே த⁴ம்மிகே பப்³ப³ஜிதே அத்தனோ இத்தி²ரூபேன இத்தி²குத்தாகப்பேஹி ப³ந்த⁴ந்தீ திட்ட²ஸி. யேனாஹம் இதா³னி ஏதி³ஸோ ஜாதோ, தஸ்மா தம் பரிச்சஜாமீதி அதி⁴ப்பாயோ.

ஏவம் வுத்தே சாபா தம் நிவத்தேதுகாமா ‘‘ஏஹி, காளா’’தி கா³த²மாஹ. தஸ்ஸத்தோ² – காளவண்ணதாய, காள, உபக, ஏஹி நிவத்தஸ்ஸு மா பக்கமி, புப்³பே³ விய காமே பரிபு⁴ஞ்ஜ, அஹஞ்ச யே ச மே ஸந்தி ஞாதகா, தே ஸப்³பே³வ துய்ஹம் மா பக்கமிதுகாமதாய வஸீகதா வஸவத்தினோ கதாதி.

தம் ஸுத்வா உபகோ ‘‘ஏத்தோ சாபே’’தி கா³த²மாஹ. தத்த² சாபேதி சாபே. சாபஸதி³ஸஅங்க³லட்டி²தாய ஹி ஸா, சாபாதி நாமம் லபி⁴, தஸ்மா, சாபாதி வுச்சதி. த்வம் சாபே, யதா² பா⁴ஸஸி, இதா³னி யாதி³ஸம் கதே²ஸி, இதோ சதுப்³பா⁴க³மேவ பியஸமுதா³சாரம் கரேய்யாஸி. தயி ரத்தஸ்ஸ ராகா³பி⁴பூ⁴தஸ்ஸ புரிஸஸ்ஸ உளாரம் வத தம் ஸியா, அஹம் பனேதரஹி தயி காமேஸு ச விரத்தோ, தஸ்மா சாபாய வசனே ந திட்டா²மீதி அதி⁴ப்பாயோ.

புன, சாபா, அத்தனி தஸ்ஸ ஆஸத்திம் உப்பாதே³துகாமா ‘‘காளங்கி³னி’’ந்தி ஆஹ. தத்த², காளாதி தஸ்ஸாலபனம். அங்கி³னிந்தி அங்க³லட்டி²ஸம்பன்னம். இவாதி உபமாய நிபாதோ. தக்காரிம் புப்பி²தம் கி³ரிமுத்³த⁴னீதி பப்³ப³தமுத்³த⁴னி டி²தம் ஸுபுப்பி²ததா³லிமலட்டி²ம் விய. ‘‘உக்காகா³ரி’’ந்தி ச கேசி பட²ந்தி, அங்க³த்தி²லட்டி²ம் வியாதி அத்தோ². கி³ரிமுத்³த⁴னீதி ச இத³ம் கேனசி அனுபஹதஸோப⁴தாத³ஸ்ஸனத்த²ம் வுத்தம். கேசி ‘‘காலிங்கி³னி’’ந்தி பாட²ம் வத்வா தஸ்ஸ கும்ப⁴ண்ட³லதாஸதி³ஸந்தி அத்த²ம் வத³ந்தி. பு²ல்லம் தா³லிமலட்டி²ம்வாதி புப்பி²தம் பீ³ஜபூரலதம் விய. அந்தோதீ³பேவ பாடலிந்தி தீ³பகப்³ப⁴ந்தரே புப்பி²தபாடலிருக்க²ம் விய, தீ³பக்³க³ஹணஞ்சேத்த² ஸோபா⁴பாடிஹாரியத³ஸ்ஸனத்த²மேவ.

ஹரிசந்த³னலித்தங்கி³ந்தி லோஹிதசந்த³னேன அனுலித்தஸப்³ப³ங்கி³ம். காஸிகுத்தமதா⁴ரினிந்தி உத்தமகாஸிகவத்த²த⁴ரம். தம் மந்தி தாதி³ஸம் மம். ரூபவதிம் ஸந்திந்தி ரூபஸம்பன்னம் ஸமானம். கஸ்ஸ ஓஹாய க³ச்ச²ஸீதி கஸ்ஸ நாம ஸத்தஸ்ஸ, கஸ்ஸ வா ஹேதுனோ, கேன காரணேன, ஓஹாய பஹாய பரிச்சஜித்வா க³ச்ச²ஸி.

இதோ பரம்பி தேஸம் வசனபடிவசனகா³தா²வ ட²பேத்வா பரியோஸானே திஸ்ஸோ கா³தா². தத்த² ஸாகுந்திகோவாதி ஸகுணலுத்³தோ³ விய. ஆஹரிமேன ரூபேனாதி கேஸமண்ட³னாதி³னா ஸரீரஜக்³க³னேன சேவ வத்தா²ப⁴ரணாதி³னா ச அபி⁴ஸங்கா²ரிகேன ரூபேன வண்ணேன கித்திமேன சாதுரியேனாதி அத்தோ². ந மம் த்வம் பா³த⁴யிஸ்ஸஸீதி புப்³பே³ விய இதா³னி மம் த்வம் ந பா³தி⁴தும் ஸக்கி²ஸ்ஸஸி.

புத்தப²லந்தி புத்தஸங்கா²தம் ப²லம் புத்தபஸவோ.

ஸப்பஞ்ஞாதி பஞ்ஞவந்தோ, ஸம்ஸாரே ஆதீ³னவவிபா⁴வினியா பஞ்ஞாய ஸமன்னாக³தாதி அதி⁴ப்பாயோ. தே ஹி அப்பம் வா மஹந்தம் வா ஞாதிபரிவட்டம் போ⁴க³க்க²ந்த⁴ம் வா பஹாய பப்³ப³ஜந்தி. தேனாஹ – ‘‘பப்³ப³ஜந்தி மஹாவீரா, நாகோ³ சே²த்வாவ ப³ந்த⁴ன’’ந்தி, அயப³ந்த⁴னம் விய ஹத்தி²னாகோ³ கி³ஹிப³ந்த⁴னம் சி²ந்தி³த்வா மஹாவீரியாவ பப்³ப³ஜந்தி, ந நிஹீனவீரியாதி அத்தோ².

த³ண்டே³னாதி யேன கேனசி த³ண்டே³ன. சு²ரிகாயாதி கு²ரேன. பூ⁴மியம் வா நிஸும்பி⁴ஸ்ஸந்தி பத²வியம் பாதேத்வா போத²னவிஜ்ஜ²னாதி³னா விபா³தி⁴ஸ்ஸாமி. புத்தஸோகா ந க³ச்ச²ஸீதி புத்தஸோகனிமித்தம் ந க³ச்சி²ஸ்ஸஸி.

பதா³ஹிஸீதி த³ஸ்ஸஸி. புத்தகத்தேதி புத்தகாரணா. ஜம்மீதி தஸ்ஸா ஆலபனம், லாமகேதி அத்தோ².

இதா³னி தஸ்ஸ க³மனம் அனுஜானித்வா க³மனட்டா²னம் ஜானிதும் ‘‘ஹந்த³ கோ²’’தி கா³த²மாஹ.

இதரோ புப்³பே³ அஹம் அனிய்யானிகம் ஸாஸனம் பக்³க³ய்ஹ அட்டா²ஸிம், இதா³னி பன நிய்யானிகே அனந்தஜினஸ்ஸ ஸாஸனே டா²துகாமோ, தஸ்மா தஸ்ஸ ஸந்திகம் க³மிஸ்ஸாமீதி த³ஸ்ஸேந்தோ ‘‘அஹும்ஹா’’திஆதி³மாஹ. தத்த² க³ணினோதி க³ணத⁴ரா. அஸ்ஸமணாதி ந ஸமிதபாபா. ஸமணமானினோதி ஸமிதபாபாதி ஏவம் ஸஞ்ஞினோ. விசரிம்ஹாதி பூரணாதீ³ஸு அத்தானம் பக்கி²பித்வா வத³தி.

நேரஞ்ஜரம் பதீதி நேரஞ்ஜராய நதி³யா ஸமீபே தஸ்ஸா தீரே. பு³த்³தோ⁴தி அபி⁴ஸம்போ³தி⁴ம் பத்தோ, அபி⁴ஸம்போ³தி⁴ம் பத்வா த⁴ம்மம் தே³ஸேந்தோ ஸப்³ப³காலம் ப⁴க³வா தத்தே²வ வஸீதி அதி⁴ப்பாயேன வத³தி.

வந்த³னம் தா³னி மே வஜ்ஜாஸீதி மம வந்த³னம் வதே³ய்யாஸி, மம வசனேன லோகனாத²ம் அனுத்தரம் வதே³ய்யாஸீதி அத்தோ². பத³க்கி²ணஞ்ச கத்வான, ஆதி³ஸேய்யாஸி த³க்கி²ணந்தி பு³த்³த⁴ம் ப⁴க³வந்தம் திக்க²த்தும் பத³க்கி²ணம் கத்வாபி சதூஸு டா²னேஸு வந்தி³த்வா, ததோ புஞ்ஞதோ மய்ஹம் பத்திதா³னம் தே³ந்தோ பத³க்கி²ணம் ஆதி³ஸேய்யாஸி பு³த்³த⁴கு³ணானம் ஸுதபுப்³ப³த்தா ஹேதுஸம்பன்னதாய ச ஏவம் வத³தி.

ஏதம் கோ² லப்³ப⁴மம்ஹேஹீதி ஏதம் பத³க்கி²ணகரணம் புஞ்ஞம் அம்ஹேஹி தவ தா³தும் ஸக்கா, ந நிவத்தனம், புப்³பே³ விய காமூபபோ⁴கோ³ ச ந ஸக்காதி அதி⁴ப்பாயோ. தே வஜ்ஜந்தி தவ வந்த³னம் வஜ்ஜம் வக்கா²மி.

ஸோதி காளோ, அத்³த³ஸாஸீதி அத்³த³க்கி².

ஸத்து²தே³ஸனாயம் ஸச்சகதா²ய பதா⁴னத்தா தப்³பி³னிமுத்தாய அபா⁴வதோ ‘‘து³க்க²’’ந்திஆதி³ வுத்தம், ஸேஸம் வுத்தனயமேவ.

சாபாதே²ரீகா³தா²வண்ணனா நிட்டி²தா.