13. வீஸதினிபாதோ

1. அம்ப³பாலீதே²ரீகா³தா²வண்ணனா

வீஸதினிபாதே காளகா ப⁴மரவண்ணஸாதி³ஸாதிஆதி³கா அம்ப³பாலியா தே²ரியா கா³தா². அயம்பி புரிமபு³த்³தே⁴ஸு கதாதி⁴காரா தத்த² தத்த² ப⁴வே விவட்டூபனிஸ்ஸயம் குஸலம் உபசினந்தீ ஸிகி²ஸ்ஸ ப⁴க³வதோ ஸாஸனே பப்³ப³ஜித்வா உபஸம்பன்னா ஹுத்வா பி⁴க்கு²னிஸிக்கா²பத³ம் ஸமாதா³ய விஹரந்தீ, ஏகதி³வஸம் ஸம்ப³ஹுலாஹி பி⁴க்கு²னீஹி ஸத்³தி⁴ம் சேதியம் வந்தி³த்வா பத³க்கி²ணம் கரோந்தீ புரேதரம் க³ச்ச²ந்தியா கீ²ணாஸவத்தே²ரியா கி²பந்தியா ஸஹஸா கே²ளபிண்ட³ம் சேதியங்க³ணே பதிதம், கீ²ணாஸவத்தே²ரியா அபஸ்ஸித்வா க³தாய அயம் பச்ச²தோ க³ச்ச²ந்தீ தம் கே²ளபிண்ட³ம் தி³ஸ்வா ‘‘கா நாம க³ணிகா இமஸ்மிம் டா²னே கே²ளபிண்ட³ம் பாதேஸீ’’தி அக்கோஸி. ஸா பி⁴க்கு²னிகாலே ஸீலம் ரக்க²ந்தீ க³ப்³ப⁴வாஸம் ஜிகு³ச்சி²த்வா ஓபபாதிகத்தபா⁴வே சித்தம் ட²பேஸி. தேன சரிமத்தபா⁴வே வேஸாலியம் ராஜுய்யானே அம்ப³ருக்க²மூலே ஓபபாதிகா ஹுத்வா நிப்³ப³த்தி. தம் தி³ஸ்வா உய்யானபாலோ நக³ரம் உபனேஸி. அம்ப³ருக்க²மூலே நிப்³ப³த்ததாய ஸா அம்ப³பாலீத்வேவ வோஹரீயித்த². அத² நம் அபி⁴ரூபம் த³ஸ்ஸனீயம் பாஸாதி³கம் விலாஸகந்ததாதி³கு³ணவிஸேஸஸமுதி³தம் தி³ஸ்வா ஸம்ப³ஹுலா ராஜகுமாரா அத்தனோ அத்தனோ பரிக்³க³ஹம் காதுகாமா அஞ்ஞமஞ்ஞம் கலஹம் அகம்ஸு. தேஸம் கலஹவூபஸமத்த²ம் தஸ்ஸா கம்மஸஞ்சோதி³தா வோஹாரிகா ‘‘ஸப்³பே³ஸம் ஹோதூ’’தி க³ணிகாட்டா²னே ட²பேஸும். ஸா ஸத்த²ரி படிலத்³த⁴ஸத்³தா⁴ அத்தனோ உய்யானே விஹாரம் கத்வா பு³த்³த⁴ப்பமுக²ஸ்ஸ பி⁴க்கு²ஸங்க⁴ஸ்ஸ நிய்யாதே³த்வா பச்சா² அத்தனோ புத்தஸ்ஸ விமலகோண்ட³ஞ்ஞத்தே²ரஸ்ஸ ஸந்திகே த⁴ம்மம் ஸுத்வா பப்³ப³ஜித்வா விபஸ்ஸனாய கம்மம் கரோந்தீ அத்தனோ ஸரீரஸ்ஸ ஜராஜிண்ணபா⁴வம் நிஸ்ஸாய ஸம்வேக³ஜாதா ஸங்கா²ரானம் அனிச்சதம் விபா⁴வேந்தீ –

252. ‘‘காளகா ப⁴மரவண்ணஸாதி³ஸா, வேல்லிதக்³கா³ மம முத்³த⁴ஜா அஹும்;

தே ஜராய ஸாணவாகஸாதி³ஸா, ஸச்சவாதி³வசனம் அனஞ்ஞதா².

253. ‘‘வாஸிதோவ ஸுரபீ⁴ கரண்ட³கோ, புப்ப²பூர மம உத்தமங்க³ஜோ;

தம் ஜராயத² ஸலோமக³ந்தி⁴கம், ஸச்சவாதி³வசனம் அனஞ்ஞதா².

254. ‘‘கானனம்வ ஸஹிதம் ஸுரோபிதம், கோச்ச²ஸூசிவிசிதக்³க³ஸோபி⁴தம்;

தம் ஜராய விரலம் தஹிம் தஹிம், ஸச்சவாதி³வசனம் அனஞ்ஞதா².

255. ‘‘கண்ஹக²ந்த⁴கஸுவண்ணமண்டி³தம், ஸோப⁴தே ஸுவேணீஹிலங்கதம்;

தம் ஜராய க²லிதம் ஸிரம் கதம், ஸச்சவாதி³வசனம் அனஞ்ஞதா².

256. ‘‘சித்தகாரஸுகதாவ லேகி²கா, ஸோப⁴ரே ஸு ப⁴முகா புரே மம;

தா ஜராய வலிபி⁴ப்பலம்பி³தா, ஸச்சவாதி³வசனம் அனஞ்ஞதா².

257. ‘‘ப⁴ஸ்ஸரா ஸுருசிரா யதா² மணீ, நேத்தஹேஸுமபி⁴னீலமாயதா;

தே ஜராயபி⁴ஹதா ந ஸோப⁴ரே, ஸச்சவாதி³வசனம் அனஞ்ஞதா².

258. ‘‘ஸண்ஹதுங்க³ஸதி³ஸீ ச நாஸிகா, ஸோப⁴தே ஸு அபி⁴யோப்³ப³னம் பதி;

ஸா ஜராய உபகூலிதா விய, ஸச்சவாதி³வசனம் அனஞ்ஞதா².

259. ‘‘கங்கணம்வ ஸுகதம் ஸுனிட்டி²தம், ஸோப⁴ரே ஸு மம கண்ணபாளியோ;

தா ஜராய வலிபி⁴ப்பலம்பி³தா, ஸச்சவாதி³வசனம் அனஞ்ஞதா².

260. ‘‘பத்தலீமகுலவண்ணஸாதி³ஸா, ஸோப⁴ரே ஸு த³ந்தா புரே மம;

தே ஜராய க²ண்டி³தா சாஸிதா, ஸச்சவாதி³வசனம் அனஞ்ஞதா².

261. ‘‘கானனம்ஹி வனஸண்ட³சாரினீ, கோகிலாவ மது⁴ரம் நிகூஜிஹம்;

தம் ஜராய க²லிதம் தஹிம் தஹிம், ஸச்சவாதி³வசனம் அனஞ்ஞதா².

262. ‘‘ஸண்ஹகம்பு³ரிவ ஸுப்பமஜ்ஜிதா, ஸோப⁴தே ஸு கீ³வா புரே மம;

ஸா ஜராய ப⁴க்³கா³ வினாமிதா, ஸச்சவாதி³வசனம் அனஞ்ஞதா².

263. ‘‘வட்டபலிக⁴ஸதி³ஸோபமா உபோ⁴, ஸோப⁴ரே ஸு பா³ஹா புரே மம;

தா ஜராய யதா² பாடலிப்³ப³லிதா, ஸச்சவாதி³வசனம் அனஞ்ஞதா².

264. ‘‘ஸண்ஹமுத்³தி³கஸுவண்ணமண்டி³தா, ஸோப⁴ரே ஸு ஹத்தா² புரே மம;

தே ஜராய யதா² மூலமூலிகா, ஸச்சவாதி³வசனம் அனஞ்ஞதா².

265. ‘‘பீனவட்டஸஹிபு⁴க்³க³தா உபோ⁴, ஸோப⁴ரே ஸு த²னகா புரே மம;

தே²விகீவ லம்ப³ந்தி நோத³கா, ஸச்சவாதி³வசனம் அனஞ்ஞதா².

266. ‘‘கஞ்சனஸ்ஸ ப²லகம்வ ஸம்மட்ட²ம், ஸோப⁴தே ஸு காயோ புரே மம;

ஸோ வலீஹி ஸுகு²மாஹி ஓததோ, ஸச்சவாதி³வசனம் அனஞ்ஞதா².

267. ‘‘நாக³போ⁴க³ஸதி³ஸோபமா உபோ⁴, ஸோப⁴ரே ஸு ஊரூ புரே மம;

தே ஜராய யதா² வேளுனாளியோ, ஸச்சவாதி³வசனம் அனஞ்ஞதா².

268. ‘‘ஸண்ஹனூபுரஸுவண்ணமண்டி³தா, ஸோப⁴ரே ஸு ஜங்கா⁴ புரே மம;

தா ஜராய திலத³ண்ட³காரிவ, ஸச்சவாதி³வசனம் அனஞ்ஞதா².

269. ‘‘தூலபுண்ணஸதி³ஸோபமா உபோ⁴, ஸோப⁴ரே ஸு பாதா³ புரே மம;

தே ஜராய பு²டிதா வலீமதா, ஸச்சவாதி³வசனம் அனஞ்ஞதா².

270. ‘‘ஏதி³ஸோ அஹு அயம் ஸமுஸ்ஸயோ, ஜஜ்ஜரோ ப³ஹுது³கா²னமாலயோ;

ஸோபலேபபதிதோ ஜராக⁴ரோ, ஸச்சவாதி³வசனம் அனஞ்ஞதா²’’தி. –

இமா கா³தா²யோ அபா⁴ஸி.

தத்த² காளகாதி காளகவண்ணா. ப⁴மரவண்ணஸாதி³ஸாதி காளகா ஹோந்தாபி ப⁴மரஸதி³ஸவண்ணா, ஸினித்³த⁴னீலாதி அத்தோ². வேல்லிதக்³கா³தி குஞ்சிதக்³கா³, மூலதோ பட்டா²ய யாவ அக்³கா³ குஞ்சிதா வேல்லிதாதி அத்தோ². முத்³த⁴ஜாதி கேஸா. ஜராயாதி ஜராஹேது ஜராய உபஹதஸோபா⁴. ஸாணவாகஸாதி³ஸாதி ஸாணஸதி³ஸா வாகஸதி³ஸா ச, ஸாணவாகஸதி³ஸா சேவ மகசிவாகஸதி³ஸா சாதிபி அத்தோ². ஸச்சவாதி³வசனம் அனஞ்ஞதா²தி ஸச்சவாதி³னோ அவிதத²வாதி³னோ ஸம்மாஸம்பு³த்³த⁴ஸ்ஸ ‘‘ஸப்³ப³ம் ரூபம் அனிச்சம் ஜராபி⁴பூ⁴த’’ந்திஆதி³வசனம் அனஞ்ஞதா² யதா²பூ⁴தமேவ, ந தத்த² விதத²ம் அத்தீ²தி.

வாஸிதோவ ஸுரபீ⁴ கரண்ட³கோதி புப்ப²க³ந்த⁴வாஸசுண்ணாதீ³ஹி வாஸிதோ வாஸம் கா³ஹாபிதோ பஸாத⁴னஸமுக்³கோ³ விய ஸுக³ந்தி⁴. புப்ப²பூர மம உத்தமங்க³ஜோதி சம்பகஸுமனமல்லிகாதீ³ஹி புப்பே²ஹி பூரிதோ புப்³பே³ மம கேஸகலாபோ நிம்மலோதி அத்தோ². தந்தி உத்தமங்க³ஜம். அத² பச்சா² ஏதரஹி ஸலோமக³ந்தி⁴கம் பாகதிகலோமக³ந்த⁴மேவ ஜாதம். அத² வா ஸலோமக³ந்தி⁴கந்தி மேண்ட³கலோமேஹி ஸமானக³ந்த⁴ம். ‘‘ஏளகலோமக³ந்த⁴’’ந்திபி வத³ந்தி.

கானனம்வ ஸஹிதம் ஸுரோபிதந்தி ஸுட்டு² ரோபிதம் ஸஹிதம் க⁴னஸன்னிவேஸம் உத்³த⁴மேவ உட்டி²தம் உஜுகதீ³க⁴ஸாக²ம் உபவனம் விய. கோச்ச²ஸூசிவிசிதக்³க³ஸோபி⁴தந்தி புப்³பே³ கோச்சே²ன ஸுவண்ணஸூசியா ச கேஸஜடாவிஜடனேன விசிதக்³க³ம் ஹுத்வா ஸோபி⁴தம், க⁴னபா⁴வேன வா கோச்ச²ஸதி³ஸம் ஹுத்வா பணத³ந்தஸூசீஹி விசிதக்³க³தாய ஸோபி⁴தம். தந்தி உத்தமங்க³ஜம். விரலம் தஹிம் தஹிந்தி தத்த² தத்த² விரலம் விலூனகேஸம்.

கண்ஹக²ந்த⁴கஸுவண்ணமண்டி³தந்தி ஸுவண்ணவஜிராதீ³ஹி விபூ⁴ஸிதம் கண்ஹகேஸபுஞ்ஜகம். யே பன ‘‘ஸண்ஹகண்ட³கஸுவண்ணமண்டி³த’’ந்தி பட²ந்தி, தேஸம் ஸண்ஹாஹி ஸுவண்ணஸூசீஹி ஜடாவிஜடனேன மண்டி³தந்தி அத்தோ². ஸோப⁴தே ஸுவேணீஹிலங்கதந்தி ஸுந்த³ரேஹி ராஜருக்க²மாலா ஸதி³ஸேஹி கேஸவேணீஹி அலங்கதம் ஹுத்வா புப்³பே³ விராஜதே. தம் ஜராய க²லிதம் ஸிரம் கதந்தி தம் ததா² ஸோபி⁴தம் ஸிரம் இதா³னி ஜராய க²லிதம் க²ண்டி³தாக²ண்டி³தம் விலூனகேஸம் கதம்.

சித்தகாரஸுகதாவ லேகி²காதி சித்தகாரேன ஸிப்பினா நீலாய வண்ணதா⁴துயா ஸுட்டு² கதா லேகா² விய ஸோப⁴தே. ஸு ப⁴முகா புரே மமாதி ஸுந்த³ரா ப⁴முகா புப்³பே³ மம ஸோப⁴னம் க³தா. வலிபி⁴ப்பலம்பி³தாதி நலாடந்தே உப்பன்னாஹி வலீஹி பலம்ப³ந்தா டி²தா.

ப⁴ஸ்ஸராதி பா⁴ஸுரா. ஸுருசிராதி ஸுட்டு² ருசிரா. யதா² மணீதி மணிமுத்³தி³கா விய. நேத்தஹேஸுந்தி ஸுனேத்தா அஹேஸும். அபி⁴னீலமாயதாதி அபி⁴னீலா ஹுத்வா ஆயதா. தேதி நேத்தா. ஜராயபி⁴ஹதாதி ஜராய அபி⁴ஹதா.

ஸண்ஹதுங்க³ஸதி³ஸீ சாதி ஸண்ஹா துங்கா³ ஸேஸமுகா²வயவானம் அனுரூபா ச. ஸோப⁴தேதி வட்டேத்வா ட²பிதஹரிதாலவட்டி விய மம நாஸிகா ஸோப⁴தே. ஸு அபி⁴யோப்³ப³னம் பதீதி ஸுந்த³ரே அபி⁴னவயோப்³ப³னகாலே ஸா நாஸிகா இதா³னி ஜராய நிவாரிதஸோப⁴தாய பரிஸேதி³தா விய வரத்தா விய ச ஜாதா.

கங்கணம்வ ஸுகதம் ஸுனிட்டி²தந்தி ஸுபரிகம்மகதம் ஸுவண்ணகங்கணம் விய வட்டுலபா⁴வம் ஸந்தா⁴ய வத³தி. ஸோப⁴ரேதி ஸோப⁴ந்தே. ‘‘ஸோப⁴ந்தே’’தி வா பாடோ². ஸுஇதி நிபாதமத்தம். கண்ணபாளியோதி கண்ணக³ந்தா⁴. வலிபி⁴ப்பலம்பி³தாதி தஹிம் தஹிம் உப்பன்னவலீஹி வலிதா ஹுத்வா வட்டனியா பணாமிதவத்த²க²ந்தா⁴ விய ப⁴ஸ்ஸந்தா ஓலம்ப³ந்தி.

பத்தலீமகுலவண்ணஸாதி³ஸாதி கத³லிமகுலஸதி³ஸவண்ணஸண்டா²னா. க²ண்டி³தாதி பே⁴த³னபதனேஹி க²ண்டி³தா க²ண்ட³பா⁴வம் க³தா. அஸிதாதி வண்ணபே⁴தே³ன அஸிதபா⁴வம் க³தா.

கானனம்ஹி வனஸண்ட³சாரினீ, கோகிலாவ மது⁴ரம் நிகூஜிஹந்தி வனஸண்டே³ கோ³சரசரணேன வனஸண்ட³சாரினீ கானனே அனுஸம்கீ³தனிவாஸினீ கோகிலா விய மது⁴ராலாபம் நிகூஜிஹம். தந்தி நிகூஜிதம் ஆலாபம். க²லிதம் தஹிம் தஹிந்தி க²ண்ட³த³ந்தாதி³பா⁴வேன தத்த² தத்த² பக்க²லிதம் ஜாதம்.

ஸண்ஹகம்பு³ரிவ ஸுப்பமஜ்ஜிதாதி ஸுட்டு² பமஜ்ஜிதா ஸண்ஹா ஸுவண்ணஸங்கா² விய. ப⁴க்³கா³ வினாமிதாதி மம்ஸபரிக்க²யேன விபூ⁴தஸிராஜாலதாய ப⁴க்³கா³ ஹுத்வா வினதா.

வட்டபலிக⁴ஸதி³ஸோபமாதி வட்டேன பலிக⁴த³ண்டே³ன ஸமஸமா. தாதி தா உபோ⁴பி பா³ஹாயோ. யதா² பாடலிப்³ப³லிதாதி ஜஜ்ஜரபா⁴வேன பலிதபாடலிஸாகா²ஸதி³ஸா.

ஸண்ஹமுத்³தி³கஸுவண்ணமண்டி³தாதி ஸுவண்ணமயாஹி மட்ட²பா⁴ஸுராஹி முத்³தி³காஹி விபூ⁴ஸிதா. யதா² மூலமூலிகாதி மூலககண்ட³ஸதி³ஸா.

பீனவட்டஸஹிதுக்³க³தாதி பீனா வட்டா அஞ்ஞமஞ்ஞம் ஸஹிதாவ ஹுத்வா உக்³க³தா உத்³த⁴முகா². ஸோப⁴தே ஸு த²னகா புரே மமாதி மம உபோ⁴பி த²னா யதா²வுத்தரூபா ஹுத்வா ஸுவண்ணகலஸியோ விய ஸோபி⁴ம்ஸு. புது²த்தே ஹி இத³ம் ஏகவசனம், அதீதத்தே² ச வத்தமானவசனம். தே²விகீவ லம்ப³ந்தி நோத³காதி தே உபோ⁴பி மே த²னா நோத³கா க³லிதஜலா வேணுத³ண்ட³கே ட²பிதஉத³கப⁴ஸ்மா விய லம்ப³ந்தி.

கஞ்சனப²லகம்வ ஸம்மட்ட²ந்தி ஜாதிஹிங்கு³லகேன மக்கி²த்வா சிரபரிமஜ்ஜிதஸோவண்ணப²லகம் விய ஸோப⁴தே. ஸோ வலீஹி ஸுகு²மாஹி ஓததோதி ஸோ மம காயோ இதா³னி ஸுகு²மாஹி வலீஹி தஹிம் தஹிம் விததோ வலித்தசதம் ஆபன்னோ.

நாக³போ⁴க³ஸதி³ஸோபமாதி ஹத்தி²னாக³ஸ்ஸ ஹத்தே²ன ஸமஸமா. ஹத்தோ² ஹி இத⁴ பு⁴ஞ்ஜதி ஏதேனாதி போ⁴கோ³தி வுத்தோ. தேதி ஊருயோ. யதா² வேளுனாளியோதி இதா³னி வேளுபப்³ப³ஸதி³ஸா அஹேஸும்.

ஸண்ஹனூபுரஸுவண்ணமண்டி³தாதி ஸினித்³த⁴மட்டே²ஹி ஸுவண்ணனூபுரேஹி விபூ⁴ஸிதா. ஜங்கா⁴தி அட்டி²ஜங்கா⁴யோ. தாதி தா ஜங்கா⁴யோ. திலத³ண்ட³காரிவாதி அப்பமம்ஸலோஹிதத்தா கிஸபா⁴வேன லூனாவஸிட்ட²விஸுக்க²திலத³ண்ட³கா விய அஹேஸும். ர-காரோ பத³ஸந்தி⁴கரோ.

தூலபுண்ணஸதி³ஸோபமாதி முது³ஸினித்³த⁴பா⁴வேன ஸிம்ப³லிதூலபுண்ணபலிகு³ண்டி²தஉபாஹனஸதி³ஸா. தே மம பாதா³ இதா³னி பு²டிதா ப²லிதா, வலீமதா வலிமந்தோ ஜாதா.

ஏதி³ஸோதி ஏவரூபோ. அஹு அஹோஸி யதா²வுத்தப்பகாரோ. அயம் ஸமுஸ்ஸயோதி அயம் மம காயோ. ஜஜ்ஜரோதி ஸிதி²லாப³ந்தோ⁴. ப³ஹுது³கா²னமாலயோதி ஜராதி³ஹேதுகானம் ப³ஹூனம் து³க்கா²னம் ஆலயபூ⁴தோ. ஸோபலேபபதிதோதி ஸோ அயம் ஸமுஸ்ஸயோ அபலேபபதிதோ அபி⁴ஸங்கா²ராலேபபரிக்க²யேன பதிதோ பாதாபி⁴முகோ²தி அத்தோ². ஸோபி அலேபபதிதோதி வா பத³விபா⁴கோ³, ஸோ ஏவத்தோ². ஜராக⁴ரோதி ஜிண்ணக⁴ரஸதி³ஸோ. ஜராய வா க⁴ரபூ⁴தோ அஹோஸி. தஸ்மா ஸச்சவாதி³னோ த⁴ம்மானம் யதா²பூ⁴தம் ஸபா⁴வம் ஸம்மதே³வ ஞத்வா கத²னதோ அவிதத²வாதி³னோ ஸம்மாஸம்பு³த்³த⁴ஸ்ஸ மம ஸத்து²வசனம் அனஞ்ஞதா².

ஏவம் அயம் தே²ரீ அத்தனோ அத்தபா⁴வே அனிச்சதாய ஸல்லக்க²ணமுகே²ன ஸப்³பே³ஸுபி தேபூ⁴மகத⁴ம்மேஸு அனிச்சதம் உபதா⁴ரேத்வா தத³னுஸாரேன தத்த² து³க்க²லக்க²ணம் அனத்தலக்க²ணஞ்ச ஆரோபேத்வா விபஸ்ஸனம் உஸ்ஸுக்காபேந்தீ மக்³க³படிபாடியா அரஹத்தம் பாபுணி. தேன வுத்தம் அபதா³னே (அப. தே²ரீ 2.4.204-219) –

‘‘யோ ரம்ஸிபு²ஸிதாவேளோ, பு²ஸ்ஸோ நாம மஹாமுனி;

தஸ்ஸாஹம் ப⁴கி³னீ ஆஸிம், அஜாயிம் க²த்தியே குலே.

‘‘தஸ்ஸ த⁴ம்மம் ஸுணித்வாஹம், விப்பஸன்னேன சேதஸா;

மஹாதா³னம் த³தி³த்வான, பத்த²யிம் ரூபஸம்பத³ம்.

‘‘ஏகதிம்ஸே இதோ கப்பே, ஸிகீ² லோகக்³க³னாயகோ;

உப்பன்னோ லோகபஜ்ஜோதோ, திலோகஸரணோ ஜினோ.

‘‘ததா³ருணபுரே ரம்மே, ப்³ரஹ்மஞ்ஞகுலஸம்ப⁴வா;

விமுத்தசித்தம் குபிதா, பி⁴க்கு²னிம் அபி⁴ஸாபயிம்.

‘‘வேஸிகாவ அனாசாரா, ஜினஸாஸனதூ³ஸிகா;

ஏவம் அக்கோஸயித்வான, தேன பாபேன கம்முனா.

‘‘தா³ருணம் நிரயம் க³ந்த்வா, மஹாது³க்க²ஸமப்பிதா;

ததோ சுதா மனுஸ்ஸேஸு, உபபன்னா தபஸ்ஸினீ.

‘‘த³ஸஜாதிஸஹஸ்ஸானி, க³ணிகத்தமகாரயிம்;

தம்ஹா பாபா ந முச்சிஸ்ஸம், பு⁴த்வா து³ட்ட²விஸம் யதா².

‘‘ப்³ரஹ்மசரியமஸேவிஸ்ஸம், கஸ்ஸபே ஜினஸாஸனே;

தேன கம்மவிபாகேன, அஜாயிம் தித³ஸே புரே.

‘‘பச்சி²மே ப⁴வே ஸம்பத்தே, அஹோஸிம் ஓபபாதிகா;

அம்ப³ஸாக²ந்தரே ஜாதா, அம்ப³பாலீதி தேனஹம்.

‘‘பரிவுதா பாணகோடீஹி, பப்³ப³ஜிம் ஜினஸாஸனே;

பத்தாஹம் அசலம் டா²னம், தீ⁴தா பு³த்³த⁴ஸ்ஸ ஓரஸா.

‘‘இத்³தீ⁴ஸு ச வஸீ ஹோமி, ஸோததா⁴துவிஸுத்³தி⁴யா;

சேதோபரியஞாணஸ்ஸ, வஸீ ஹோமி மஹாமுனி.

‘‘புப்³பே³னிவாஸம் ஜானாமி, தி³ப்³ப³சக்கு² விஸோதி⁴தம்;

ஸப்³பா³ஸவபரிக்கீ²ணா, நத்தி² தா³னி புனப்³ப⁴வோ.

‘‘அத்த²த⁴ம்மனிருத்தீஸு, படிபா⁴னே ததே²வ ச;

ஞாணம் மே விமலம் ஸுத்³த⁴ம், பு³த்³த⁴ஸேட்ட²ஸ்ஸ வாஹஸா.

‘‘கிலேஸா ஜா²பிதா மய்ஹம், ப⁴வா ஸப்³பே³ ஸமூஹதா;

நாகீ³வ ப³ந்த⁴னம் சே²த்வா, விஹராமி அனாஸவா.

‘‘ஸ்வாக³தம் வத மே ஆஸி, பு³த்³த⁴ஸேட்ட²ஸ்ஸ ஸந்திகே;

திஸ்ஸோ விஜ்ஜா அனுப்பத்தா, கதம் பு³த்³த⁴ஸ்ஸ ஸாஸனம்.

‘‘படிஸம்பி⁴தா³ சதஸ்ஸோ, விமோக்கா²பி ச அட்டி²மே;

ச²ளபி⁴ஞ்ஞா ஸச்சி²கதா, கதம் பு³த்³த⁴ஸ்ஸ ஸாஸன’’ந்தி.

அரஹத்தம் பன பத்வா அத்தனோ படிபத்திம் பச்சவேக்கி²த்வா உதா³னவஸேன தா ஏவ கா³தா² பச்சுதா³ஹாஸீதி.

அம்ப³பாலீதே²ரீகா³தா²வண்ணனா நிட்டி²தா.

2. ரோஹினீதே²ரீகா³தா²வண்ணனா

ஸமணாதி போ⁴தி ஸுபீதிஆதி³கா ரோஹினியா தே²ரியா கா³தா². அயம்பி புரிமபு³த்³தே⁴ஸு கதாதி⁴காரா தத்த² தத்த² ப⁴வே விவட்டூபனிஸ்ஸயம் குஸலம் உபசினந்தீ இதோ ஏகனவுதிகப்பே விபஸ்ஸிஸ்ஸ ப⁴க³வதோ காலே குலகே³ஹே நிப்³ப³த்தித்வா விஞ்ஞுதம் பத்வா, ஏகதி³வஸம் ப³ந்து⁴மதீனக³ரே ப⁴க³வந்தம் பிண்டா³ய சரந்தம் தி³ஸ்வா பத்தம் க³ஹேத்வா பூவஸ்ஸ பூரேத்வா ப⁴க³வதோ த³த்வா பீதிஸோமனஸ்ஸஜாதா பஞ்சபதிட்டி²தேன வந்தி³. ஸா தேன புஞ்ஞகம்மேன தே³வமனுஸ்ஸேஸு ஸம்ஸரந்தீ அனுக்கமேன உபசிதவிமோக்க²ஸம்பா⁴ரா ஹுத்வா இமஸ்மிம் பு³த்³து⁴ப்பாதே³ வேஸாலியம் மஹாவிப⁴வஸ்ஸ ப்³ராஹ்மணஸ்ஸ கே³ஹே நிப்³ப³த்தித்வா ரோஹினீதி லத்³த⁴னாமா விஞ்ஞுதம் பத்வா, ஸத்த²ரி வேஸாலியம் விஹரந்தே விஹாரம் க³ந்தவா த⁴ம்மம் ஸுத்வா ஸோதாபன்னா ஹுத்வா மாதாபிதூனம் த⁴ம்மம் தே³ஸேத்வா ஸாஸனே பஸாத³ம் உப்பாதே³த்வா தே அனுஜானாபேத்வா ஸயம் பப்³ப³ஜித்வா விபஸ்ஸனாய கம்மம் கரோந்தீ ந சிரஸ்ஸேவ ஸஹ படிஸம்பி⁴தா³ஹி அரஹத்தம் பாபுணி. தேன வுத்தம் –

‘‘நக³ரே ப³ந்து⁴மதியா, விபஸ்ஸிஸ்ஸ மஹேஸினோ;

பிண்டா³ய விசரந்தஸ்ஸ, பூவேதா³ஸிமஹம் ததா³.

‘‘தேன கம்மேன ஸுகதேன, சேதனாபணிதீ⁴ஹி ச;

தத்த² சித்தம் பஸாதே³த்வா, தாவதிம்ஸமக³ச்ச²ஹம்.

‘‘ச²த்திம்ஸதே³வராஜூனம், மஹேஸித்தமகாரயிம்;

பஞ்ஞாஸசக்கவத்தீனம், மஹேஸித்தமகாரயிம்.

‘‘மனஸா பத்தி²தா நாம, ஸப்³பா³ மய்ஹம் ஸமிஜ்ஜ²த²;

ஸம்பத்திம் அனுபோ⁴த்வான, தே³வேஸு மனுஜேஸு ச.

‘‘பச்சி²மே ப⁴வஸம்பத்தே, ஜாதோ விப்பகுலே அஹம்;

ரோஹினீ நாம நாமேன, ஞாதகேஹி பியாயிதா.

‘‘பி⁴க்கூ²னம் ஸந்திகம் க³ந்த்வா, த⁴ம்மம் ஸுத்வா யதா²தத²ம்;

ஸம்விக்³க³மானஸா ஹுத்வா, பப்³ப³ஜிம் அனகா³ரியம்.

‘‘யோனிஸோ பத³ஹந்தீனம், அரஹத்தமபாபுணிம்;

ஏகனவுதிதோ கப்பே, யம் தா³னமத³தி³ம் ததா³;

து³க்³க³திம் நாபி⁴ஜானாமி, பூவதா³னஸ்ஸித³ம் ப²லம்.

‘‘கிலேஸா ஜா²பிதா மய்ஹம்…பே… கதம் பு³த்³த⁴ஸ்ஸ ஸாஸன’’ந்தி.

அரஹத்தம் பன பத்வா அத்தனோ படிபத்திம் பச்சவேக்கி²த்வா புப்³பே³ ஸோதாபன்னகாலே பிதரா அத்தனா ச வசனபடிவசனவஸேன வுத்தகா³தா² உதா³னவஸேன பா⁴ஸந்தீ –

271. ‘‘ஸமணாதி போ⁴தி ஸுபி, ஸமணாதி பபு³ஜ்ஜ²ஸி;

ஸமணானேவ கித்தேஸி, ஸமணீ நூன ப⁴விஸ்ஸஸி.

272. ‘‘விபுலம் அன்னஞ்ச பானஞ்ச, ஸமணானம் பவேச்ச²ஸி;

ரோஹினீ தா³னி புச்சா²மி, கேன தே ஸமணா பியா.

273. ‘‘அகம்மகாமா அலஸா, பரத³த்தூபஜீவினோ;

ஆஸம்ஸுகா ஸாது³காமா, கேன தே ஸமணா பியா.

274. ‘‘சிரஸ்ஸம் வத மம் தாத, ஸமணானம் பரிபுச்ச²ஸி;

தேஸம் தே கித்தயிஸ்ஸாமி, பஞ்ஞாஸீலபரக்கமம்.

275. ‘‘கம்மகாமா அனலஸா, கம்மஸேட்ட²ஸ்ஸ காரகா;

ராக³ம் தோ³ஸம் பஜஹந்தி, தேன மே ஸமணா பியா.

276. ‘‘தீணி பாபஸ்ஸ மூலானி, து⁴னந்தி ஸுசிகாரினோ;

ஸப்³ப³ம் பாபம் பஹீனேஸம், தேன மே ஸமணா பியா.

277. ‘‘காயகம்மம் ஸுசி நேஸம், வசீகம்மஞ்ச தாதி³ஸம்;

மனோகம்மம் ஸுசி நேஸம், தேன மே ஸமணா பியா.

278. ‘‘விமலா ஸங்க²முத்தாவ, ஸுத்³தா⁴ ஸந்தரபா³ஹிரா;

புண்ணா ஸுக்கான த⁴ம்மானம், தேன மே ஸமணா பியா.

279. ‘‘ப³ஹுஸ்ஸுதா த⁴ம்மத⁴ரா, அரியா த⁴ம்மஜீவினோ;

அத்த²ம் த⁴ம்மஞ்ச தே³ஸேந்தி, தேன மே ஸமணா பியா.

280. ‘‘ப³ஹுஸ்ஸுதா த⁴ம்மத⁴ரா, அரியா த⁴ம்மஜீவினோ;

ஏகக்³க³சித்தா ஸதிமந்தோ, தேன மே ஸமணா பியா.

281. ‘‘தூ³ரங்க³மா ஸதிமந்தோ, மந்தபா⁴ணீ அனுத்³த⁴தா;

து³க்க²ஸ்ஸந்தம் பஜானந்தி, தேன மே ஸமணா பியா.

282. ‘‘யஸ்மா கா³மா பக்கமந்தி, ந விலோகேந்தி கிஞ்சனம்;

அனபேக்கா²வ க³ச்ச²ந்தி, தேன மே ஸமணா பியா.

283. ‘‘ந தே ஸம் கோட்டே² ஓபேந்தி, ந கும்பி⁴ம் ந க²ளோபியம்;

பரினிட்டி²தமேஸானா, தேன மே ஸமணா பியா.

284. ‘‘ந தே ஹிரஞ்ஞம் க³ண்ஹந்தி, ந ஸுவண்ணம் ந ரூபியம்;

பச்சுப்பன்னேன யாபேந்தி, தேன மே ஸமணா பியா.

285. ‘‘நானாகுலா பப்³ப³ஜிதா, நானாஜனபதே³ஹி ச;

அஞ்ஞமஞ்ஞம் பிஹயந்தி, தேன மே ஸமணா பியா.

286. ‘‘அத்தா²ய வத நோ போ⁴தி, குலே ஜாதாஸி ரோஹினீ;

ஸத்³தா⁴ பு³த்³தே⁴ ச த⁴ம்மே ச, ஸங்கே⁴ ச திப்³ப³கா³ரவா.

287. ‘‘துவஞ்ஹேதம் பஜானாஸி, புஞ்ஞக்கே²த்தம் அனுத்தரம்;

அம்ஹம்பி ஏதே ஸமணா, படிக்³க³ண்ஹந்தி த³க்கி²ணம்.

288. ‘‘பதிட்டி²தோ ஹேத்த² யஞ்ஞோ, விபுலோ நோ ப⁴விஸ்ஸதி;