14. ஸப்³ப³காமித்தே²ரகா³தா²வண்ணனா

த்³விபாத³கோதிஆதி³கா ஆயஸ்மதோ ஸப்³ப³காமித்தே²ரஸ்ஸ கா³தா². கா உப்பத்தி? அயம் கிர பது³முத்தரஸ்ஸ ப⁴க³வதோ ஸாஸனே உப்பன்னம் அப்³பு³த³ம் ஸோதே⁴த்வா படிபாகதிகம் ட²பேந்தம் ஏகம் தே²ரம் தி³ஸ்வா, ‘‘அஹம்பி அனாக³தே ஏகஸ்ஸ பு³த்³த⁴ஸ்ஸ ஸாஸனே அப்³பு³த³ம் ஸோதே⁴த்வா படிபாகதிகம் ட²பேதும் ஸமத்தோ² ப⁴வேய்ய’’ந்தி பத்த²னம் பட்ட²பேத்வா தத³னுரூபானி புஞ்ஞானி கத்வா தே³வமனுஸ்ஸேஸு ஸம்ஸரந்தோ இமஸ்மிம் பு³த்³து⁴ப்பாதே³ அபரினிப்³பு³தே ஏவ ப⁴க³வதி வேஸாலியம் க²த்தியகுலே நிப்³ப³த்தித்வா ஸப்³ப³காமோதி லத்³த⁴னாமோ வயப்பத்தோ ஞாதகேஹி தா³ரபரிக்³க³ஹம் காரிதோ நிஸ்ஸரணஜ்ஜா²ஸயதாய க⁴ராவாஸம் ஜிகு³ச்ச²ந்தோ த⁴ம்மப⁴ண்டா³கா³ரிகஸ்ஸ ஸந்திகே பப்³ப³ஜித்வா ஸமணத⁴ம்மம் கரோந்தோ உபஜ்ஜா²யேன ஸத்³தி⁴ம் வேஸாலிம் உபக³தோ ஞாதிக⁴ரம் அக³மாஸி. தத்த² நம் புராணது³தியிகா பதிவியோக³து³க்கி²தா கிஸா து³ப்³ப³ண்ணா அனலங்கதா கிலிட்ட²வத்த²னிவஸனா வந்தி³த்வா ரோத³மானா ஏகமந்தம் அட்டா²ஸி. தம் தி³ஸ்வா தே²ரஸ்ஸ கருணாபுரஸ்ஸரம் மேத்தம் உபட்டா²பயதோ அனுபூ⁴தாரம்மணே அயோனிஸோமனஸிகாரவஸேன ஸஹஸா கிலேஸோ உப்பஜ்ஜி.

ஸோ தேன கஸாஹி தாளிதோ ஆஜானீயோ விய ஸஞ்ஜாதஸம்வேகோ³ தாவதே³வ ஸுஸானம் க³ந்த்வா, அஸுப⁴னிமித்தம் உக்³க³ஹேத்வா, தத்த² படிலத்³த⁴ஜா²னம் பாத³கம் கத்வா, விபஸ்ஸனம் வட்³டே⁴த்வா, அரஹத்தம் பாபுணி. அத²ஸ்ஸ ஸஸுரோ அலங்கதபடியத்தம் தீ⁴தரம் ஆதா³ய மஹதா பரிவாரேன நம் உப்பப்³பா³ஜேதுகாமோ விஹாரம் அக³மாஸி. தே²ரோ தஸ்ஸா அதி⁴ப்பாயம் ஞத்வா அத்தனோ காமேஸு விரத்தபா⁴வம் ஸப்³ப³த்த² ச அனுபலித்ததம் பகாஸேந்தோ –

453. ‘‘த்³விபாத³கோயம் அஸுசி, து³க்³க³ந்தோ⁴ பரிஹீரதி;

நானாகுணபபரிபூரோ, விஸ்ஸவந்தோ ததோ ததோ.

454. ‘‘மிக³ம் நிலீனம் கூடேன, ப³ளிஸேனேவ அம்பு³ஜம்;

வானரம் விய லேபேன, பா³த⁴யந்தி புது²ஜ்ஜனம்.

455. ‘‘ரூபா ஸத்³தா³ ரஸா க³ந்தா⁴, போ²ட்ட²ப்³பா³ ச மனோரமா;

பஞ்ச காமகு³ணா ஏதே, இத்தி²ரூபஸ்மி தி³ஸ்ஸரே.

456. ‘‘யே ஏதா உபஸேவந்தி, ரத்தசித்தா புது²ஜ்ஜனா;

வட்³டே⁴ந்தி கடஸிம் கோ⁴ரம், ஆசினந்தி புனப்³ப⁴வம்.

457. ‘‘யோ சேதா பரிவஜ்ஜேதி, ஸப்பஸ்ஸேவ பதா³ ஸிரோ;

ஸோமம் விஸத்திகம் லோகே, ஸதோ ஸமதிவத்ததி.

458. ‘‘காமேஸ்வாதீ³னவம் தி³ஸ்வா, நேக்க²ம்மம் த³ட்டு² கே²மதோ;

நிஸ்ஸடோ ஸப்³ப³காமேஹி, பத்தோ மே ஆஸவக்க²யோ’’தி. –

இமா கா³தா² அபா⁴ஸி.

தத்த² த்³விபாத³கோதி யதி³பி அபாத³காத³யோபி காயா அஸுசீயேவ, அதி⁴காரவஸேன பன உக்கட்ட²பரிச்சே²தே³ன வா ஏவம் வுத்தம். யஸ்மா வா அஞ்ஞே அஸுசிபூ⁴தாபி காயா லோணம்பி³லாதீ³ஹி அபி⁴ஸங்க²ரித்வா மனுஸ்ஸானம் போ⁴ஜனேபி உபனீயந்தி, ந பன மனுஸ்ஸகாயோ, தஸ்மா அஸுசிதரஸபா⁴வமஸ்ஸ த³ஸ்ஸேந்தோ ‘‘த்³விபாத³கோ’’தி ஆஹ. அயந்தி ததா³ உபட்டி²தம் இத்தி²ரூபம் ஸந்தா⁴யாஹ. அஸுசீதி அஸுசி ஏவ, ந ஏத்த² கிஞ்சிபி ஸுசீதி அத்தோ². து³க்³க³ந்தோ⁴ பரிஹீரதீதி து³க்³க³ந்தோ⁴ ஸமானோ புப்ப²க³ந்தா⁴தீ³ஹி ஸங்க²ரித்வா பரிஹரீயதி. நானாகுணபபரிபூரோதி கேஸாதி³அனேகப்பகாரகுணபப⁴ரிதோ. விஸ்ஸவந்தோ ததோ ததோதி புப்ப²க³ந்தா⁴தீ³ஹிஸ்ஸ ஜேகு³ச்ச²பா⁴வம் படிச்சா²தே³தும் வாயமந்தானம்பி தம் வாயாமம் நிப்ப²லம் கத்வா நவஹி த்³வாரேஹி கே²ளஸிங்கா⁴ணிகாதீ³னி லோமகூபேஹி ச ஸேத³ஜல்லிகம் ‘விஸ்ஸவந்தோயேவ பரிஹீரதீ’தி ஸம்ப³ந்தோ⁴.

ஏவம் ஜேகு³ச்சோ²பி ஸமானோ சாயம் காயோ கூடாதீ³ஹி விய மிகா³தி³கே அத்தனோ ரூபாதீ³ஹி அந்த⁴புது²ஜ்ஜனே வஞ்சேதியேவாதி த³ஸ்ஸேந்தோ ‘‘மிக³’’ந்திஆதி³மாஹ. தத்த² மிக³ம் நிலீனம் கூடேனாதி பாஸவாகராதி³னா கூடேன நிலீனம், படிச்ச²ன்னம் கத்வா மிக³ம் விய நேஸாதோ³. வக்க²மானோ ஹி இவ-ஸத்³தோ³ இதா⁴பி ஆனேத்வா யோஜேதப்³போ³. ப³ளிஸேனேவ அம்பு³ஜந்தி அம்பு³ஜம் மச்ச²ம் ஆமிஸப³த்³தே⁴ன ப³ளிஸேன விய பா³ளிஸிகோ. வானரம் விய லேபேனாதி ருக்க²ஸிலாதீ³ஸு பக்கி²த்தேன மக்கடலேபேன மக்கடம் விய மிக³லுத்³தோ³ அந்த⁴புது²ஜ்ஜனம் வஞ்சேந்தோ பா³தே⁴ந்தீதி.

கே பன பா³தே⁴ந்தீதி ஆஹ. ‘‘ரூபா ஸத்³தா³’’திஆதி³. ரூபாத³யோ ஹி பஞ்ச காமகோட்டா²ஸா விஸேஸதோ விஸபா⁴க³வத்து²ஸன்னிஸ்ஸயா விபல்லாஸூபனிஸ்ஸயேன அயோனிஸோமனஸிகாரேன பரிக்கி²த்தானம் அந்த⁴புது²ஜ்ஜனானம் மனோ ரமேந்தோ கிலேஸவத்து²தாய அனத்தா²வஹபா⁴வதோ தே பா³தே⁴ந்தி நாம. தேன வுத்தம் ‘‘ரூபா ஸத்³தா³…பே… இத்தி²ரூபஸ்மி தி³ஸ்ஸரே’’தி.

இத்தி²க்³க³ஹணஞ்சேத்த² அதி⁴காரவஸேன கதந்தி வேதி³தப்³ப³ம். தேனேவாஹ ‘‘யே ஏதா உபஸேவந்தீ’’திஆதி³. தஸ்ஸத்தோ² – யே புது²ஜ்ஜனா ஏதா இத்தி²யோ ரத்தசித்தா ராகா³பி⁴பூ⁴தசித்தா உபபோ⁴க³வத்து²ஸஞ்ஞாய உபஸேவந்தி. வட்³டே⁴ந்தி கடஸிம் கோ⁴ரந்தி தே ஜாதிஆதீ³ஹி நிரயாதீ³ஹி ச கோ⁴ரம், ப⁴யானகம், அந்த⁴பா³லேஹி அபி⁴ரமிதப்³ப³தோ கடஸிஸங்கா²தம் ஸம்ஸாரம் புனப்புனம் உப்பத்திமரணாதி³னா வட்³டே⁴ந்தி. தேனாஹ ‘‘ஆசினந்தி புனப்³ப⁴வ’’ந்தி.

யோ சேதாதி யோ பன புக்³க³லோ ஏதா இத்தி²யோ தத்த² ச²ந்த³ராக³ஸ்ஸ விக்க²ம்ப⁴னேன வா ஸமுச்சி²ந்த³னேன வா அத்தனோ பாதே³ன ஸப்பஸ்ஸ ஸிரம் விய பரிவஜ்ஜேதி, ஸோ ஸப்³ப³ம் லோகம் விஸஜித்வா டி²தத்தா லோகே விஸத்திகாஸங்கா²தம் தண்ஹம் ஸதோ ஹுத்வா ஸமதிவத்ததி.

காமேஸ்வாதீ³னவம் தி³ஸ்வாதி ‘‘அட்டி²கங்கலூபமா காமா ப³ஹுது³க்கா² ப³ஹுபாயாஸா’’திஆதி³னா (பாசி. 417; சூளவ. 65; ம. நி. 1.234) வத்து²காமேஸு கிலேஸகாமேஸு அனேகாகாரவோகாரம் ஆதீ³னவம், தோ³ஸம், தி³ஸ்வா. நேக்க²ம்மம் த³ட்டு² கே²மதோதி காமேஹி ப⁴வேஹி ச நிக்க²ந்தபா⁴வதோ நேக்க²ம்மம், பப்³ப³ஜ்ஜம், நிப்³பா³னஞ்ச, கே²மதோ, அனுபத்³த³வதோ, த³ட்டு², தி³ஸ்வா. ஸப்³ப³காமேஹிபி தேபூ⁴மகத⁴ம்மேஹி நிஸ்ஸடோ விஸம்யுத்தோ. ஸப்³பே³பி தேபூ⁴மகா த⁴ம்மா காமனீயட்டே²ன காமா, தேஹி ச தே²ரோ விஸம்யுத்தோ. தேனாஹ ‘‘பத்தோ மே ஆஸவக்க²யோ’’தி.

ஏவம் தே²ரோ ஆதி³தோ பஞ்சஹி கா³தா²ஹி த⁴ம்மம் கதே²த்வா ச²ட்ட²கா³தா²ய அஞ்ஞம் ப்³யாகாஸி. தம் ஸுத்வா ஸஸுரோ ‘‘அயம் ஸப்³ப³த்த² அனுபலித்தோ, ந ஸக்கா இமம் காமேஸு பதாரேது’’ந்தி யதா²க³தமக்³கே³னேவ க³தோ. தே²ரோபி வஸ்ஸஸதபரினிப்³பு³தே ப⁴க³வதி உபஸம்பதா³ய வீஸவஸ்ஸஸதிகோ பத²ப்³யா தே²ரோ ஹுத்வா, வேஸாலிகேஹி வஜ்ஜிபுத்தேஹி உப்பாதி³தம் ஸாஸனஸ்ஸ அப்³பு³த³ம் ஸோதே⁴த்வா, து³தியம் த⁴ம்மஸங்கீ³திம் ஸங்கா³யித்வா ‘‘அனாக³தே த⁴ம்மாஸோககாலே உப்பஜ்ஜனகம் அப்³பு³த³ம் ஸோதே⁴ஹீ’’தி திஸ்ஸமஹாப்³ரஹ்மானம் ஆணாபேத்வா அனுபாதி³ஸேஸாய நிப்³பா³னதா⁴துயா பரினிப்³பா³யி.

ஸப்³ப³காமித்தே²ரகா³தா²வண்ணனா நிட்டி²தா.

ச²க்கனிபாதவண்ணனா நிட்டி²தா.