9. சந்த³னத்தே²ரகா³தா²வண்ணனா

ஜாதரூபேனாதிஆதி³கா ஆயஸ்மதோ சந்த³னத்தே²ரஸ்ஸ கா³தா². கா உப்பத்தி? அயம்பி புரிமபு³த்³தே⁴ஸு கதாதி⁴காரோ தத்த² தத்த² ப⁴வே புஞ்ஞானி உபசினந்தோ இதோ ஏகதிம்ஸே கப்பே பு³த்³த⁴ஸுஞ்ஞே லோகே ருக்க²தே³வதா ஹுத்வா நிப்³ப³த்தோ ஸுத³ஸ்ஸனம் நாம பச்சேகபு³த்³த⁴ம் பப்³ப³தந்தரே வஸந்தம் தி³ஸ்வா பஸன்னமானஸோ குடஜபுப்பே²ஹி பூஜம் அகாஸி. ஸோ தேன புஞ்ஞகம்மேன தே³வமனுஸ்ஸேஸு ஸம்ஸரந்தோ இமஸ்மிம் பு³த்³து⁴ப்பாதே³ ஸாவத்தி²யம் விப⁴வஸம்பன்னே குலே நிப்³ப³த்தித்வா சந்த³னோதி லத்³த⁴னாமோ வயப்பத்தோ க⁴ராவாஸம் வஸந்தோ ஸத்து² ஸந்திகே த⁴ம்மம் ஸுத்வா ஸோதாபன்னோ அஹோஸி. ஸோ ஏகம் புத்தம் லபி⁴த்வா க⁴ராவாஸம் பஹாய பப்³ப³ஜித்வா விபஸ்ஸனாய கம்மட்டா²னம் க³ஹேத்வா அரஞ்ஞே விஹரந்தோ ஸத்தா²ரம் வந்தி³தும் ஸாவத்தி²ம் ஆக³தோ ஸுஸானே வஸதி. தஸ்ஸ ஆக³தபா⁴வம் ஸுத்வா புராணது³தியிகா அலங்கதபடியத்தா தா³ரகம் ஆதா³ய மஹதா பரிவாரேன தே²ரஸ்ஸ ஸந்திகம் க³ச்ச²தி – ‘‘இத்தி²குத்தாதீ³ஹி நம் பலோபே⁴த்வா உப்பப்³பா³ஜேஸ்ஸாமீ’’தி. தே²ரோ தம் ஆக³ச்ச²ந்திம் தூ³ரதோவ தி³ஸ்வா ‘‘இதா³னிஸ்ஸா அவிஸயோ ப⁴விஸ்ஸாமீ’’தி யதா²ரத்³த⁴ம் விபஸ்ஸனம் உஸ்ஸுக்காபேத்வா ச²ளபி⁴ஞ்ஞோ அஹோஸி. தேன வுத்தம் அபதா³னே (அப. தே²ர 2.52.37-43) –

‘‘ஹிமவந்தஸ்ஸாவிதூ³ரே, வஸலோ நாம பப்³ப³தோ;

பு³த்³தோ⁴ ஸுத³ஸ்ஸனோ நாம, வஸதே பப்³ப³தந்தரே.

‘‘புப்ப²ம் ஹேமவந்தம் மய்ஹ, வேஹாஸம் அக³மாஸஹம்;

தத்த²த்³த³ஸாஸிம் ஸம்பு³த்³த⁴ம், ஓக⁴திண்ணமனாஸவம்.

‘‘புப்ப²ம் குடஜமாதா³ய, ஸிரே கத்வான அஞ்ஜலிம்;

பு³த்³த⁴ஸ்ஸ அபி⁴ரோபேஸிம், ஸயம்பு⁴ஸ்ஸ மஹேஸினோ.

‘‘ஏகதிம்ஸே இதோ கப்பே, யம் புப்ப²மபி⁴பூஜயிம்;

து³க்³க³திம் நாபி⁴ஜானாமி, பு³த்³த⁴பூஜாயித³ம் ப²லம்.

‘‘கிலேஸா ஜா²பிதா மய்ஹம்…பே… கதம் பு³த்³த⁴ஸ்ஸ ஸாஸன’’ந்தி.

ச²ளபி⁴ஞ்ஞோ பன ஹுத்வா ஆகாஸே ட²த்வா தஸ்ஸா த⁴ம்மம் தே³ஸேத்வா ஸரணேஸு ச ஸீலேஸு ச பதிட்டா²பேத்வா ஸயம் அத்தனா புப்³பே³ வஸிதட்டா²னமேவ க³தோ. ஸஹாயபி⁴க்கூ²ஹி – ‘‘விப்பஸன்னானி கோ² தே, ஆவுஸோ, இந்த்³ரியானி, கச்சி தயா ஸச்சானி படிவித்³தா⁴னீ’’தி புட்டோ² –

299. ‘‘ஜாதரூபேன ஸஞ்ச²ன்னா, தா³ஸீக³ணபுரக்க²தா;

அங்கேன புத்தமாதா³ய, ப⁴ரியா மம் உபாக³மி.

300. ‘‘தஞ்ச தி³ஸ்வான ஆயந்திம், ஸகபுத்தஸ்ஸ மாதரம்;

அலங்கதம் ஸுவஸனம், மச்சுபாஸம்வ ஓட்³டி³தம்.

301. ‘‘ததோ மே மனஸீகாரோ, யோனிஸோ உத³பஜ்ஜத²;

ஆதீ³னவோ பாதுரஹு, நிப்³பி³தா³ ஸமதிட்ட²த².

302. ‘‘ததோ சித்தம் விமுச்சி மே, பஸ்ஸ த⁴ம்மஸுத⁴ம்மதம்;

திஸ்ஸோ விஜ்ஜா அனுப்பத்தா, கதம் பு³த்³த⁴ஸ்ஸ ஸாஸன’’ந்தி. –

இமாஹி கா³தா²ஹி அத்தனோ படிபத்திம் கதே²ந்தோ அஞ்ஞம் ப்³யாகாஸி.

தத்த² ஜாதரூபேன ஸஞ்ச²ன்னாதி ஜாதரூபமயேன ஸீஸூபகா³தி³அலங்காரேன அலங்கரணவஸேன படிச்சா²தி³தஸரீரா, ஸப்³பா³ப⁴ரணபூ⁴ஸிதாதி அத்தோ². தா³ஸீக³ணபுரக்க²தாதி யதா²ரஹம் அலங்கதபடியத்தேன அத்தனோ தா³ஸிக³ணேன புரதோ கதா பரிவாரிதாதி அத்தோ². அங்கேன புத்தமாதா³யாதி ‘‘அபி நாம புத்தம்பி தி³ஸ்வா கே³ஹஸ்ஸிதஸாதோ ப⁴வேய்யா’’தி புத்தம் அத்தனோ அங்கேன க³ஹேத்வா.

ஆயந்திந்தி ஆக³ச்ச²ந்திம். ஸகபுத்தஸ்ஸ மாதரந்தி மம ஓரஸபுத்தஸ்ஸ ஜனனிம், மய்ஹம் புராணது³தியிகந்தி அத்தோ². ஸப்³ப³மித³ம் தே²ரோ அத்தனோ காமராக³ஸமுச்சே²த³ம் ப³ஹுமஞ்ஞந்தோ வத³தி. யோனிஸோ உத³பஜ்ஜதா²தி ‘‘ஏவரூபாபி நாம ஸம்பத்தி ஜராப்³யாதி⁴மரணேஹி அபி⁴பு⁴ய்யதி, அஹோ ஸங்கா²ரா அனிச்சா அது⁴வா அனஸ்ஸாஸிகா’’தி ஏவம் யோனிஸோமனஸிகாரோ உப்பஜ்ஜி. ஸேஸம் ஹேட்டா² வுத்தனயமேவ.

சந்த³னத்தே²ரகா³தா²வண்ணனா நிட்டி²தா.