2. பச்சயத்தே²ரகா³தா²வண்ணனா

பஞ்சாஹாஹம் பப்³ப³ஜிதோதி ஆயஸ்மதோ பச்சயத்தே²ரஸ்ஸ கா³தா². கா உப்பத்தி? அயம்பி புரிமபு³த்³தே⁴ஸு கதாதி⁴காரோ தத்த² தத்த² ப⁴வே புஞ்ஞானி உபசினந்தோ இதோ ஏகனவுதே கப்பே விபஸ்ஸிஸ்ஸ ப⁴க³வதோ காலே குலகே³ஹே நிப்³ப³த்தித்வா விஞ்ஞுதம் பத்தோ ஏகதி³வஸம் ஸத்தா²ரம் வினதாய நாம நதி³யா தீரே க³ச்ச²ந்தம் தி³ஸ்வா பஸன்னமானஸோ மனுஞ்ஞத³ஸ்ஸனானி மஹந்தானி உது³ம்ப³ரப²லானி ஓசினித்வா உபனாமேஸி. ஸோ தேன புஞ்ஞகம்மேன ஸுக³தீஸுயேவ ஸம்ஸரந்தோ இமஸ்மிம் ப⁴த்³த³கப்பே கஸ்ஸபே ப⁴க³வதி லோகே உப்பஜ்ஜித்வா பவத்தவரத⁴ம்மசக்கே வேனேய்யஜனானுக்³க³ஹம் கரோந்தே தஸ்ஸ ஸாஸனே பப்³ப³ஜித்வா விபஸ்ஸனம் பட்ட²பேத்வா பா⁴வனமனுயுஞ்ஜந்தோ ஏகதி³வஸம் ஸம்ஸாரது³க்க²ம் சிந்தேத்வா

அதிவிய ஸஞ்ஜாதஸம்வேகோ³ விஹாரே நிஸின்னோ ‘‘அரஹத்தம் அப்பத்வா இதோ ந நிக்க²மிஸ்ஸாமீ’’தி சித்தம் அதி⁴ட்டா²ய வாயமந்தோ ஞாணஸ்ஸ அபரிபக்கத்தா விபஸ்ஸனம் உஸ்ஸுக்காபேதும் நாஸக்கி². ஸோ காலங்கத்வா தே³வமனுஸ்ஸேஸு ஸம்ஸரந்தோ இமஸ்மிம் பு³த்³து⁴ப்பாதே³ ரோஹிதனக³ரே க²த்தியகுலே நிப்³ப³த்தித்வா பச்சயோதி லத்³த⁴னாமோ வயப்பத்தோ பிது அச்சயேன ரஜ்ஜே பதிட்டி²தோ ஏகதி³வஸம் மஹாராஜப³லிம் காதும் ஆரபி⁴. தத்த² மஹாஜனோ ஸன்னிபதி. தஸ்மிம் ஸமாக³மே தஸ்ஸ பஸாத³ஞ்ஜனனத்த²ம் ஸத்தா² மஹாஜனஸ்ஸ பேக்க²ந்தஸ்ஸேவ ஆகாஸே வேஸ்ஸவணேன நிம்மிதே ரதனமயகூடாகா³ரே ரதனமயஸீஹாஸனே நிஸீதி³த்வா த⁴ம்மம் தே³ஸேஸி. மஹதோ ஜனகாயஸ்ஸ த⁴ம்மாபி⁴ஸமயோ அஹோஸி. தம் த⁴ம்மம் ஸுத்வா பச்சயராஜாபி ரஜ்ஜம் பஹாய புரிமஹேதுஸஞ்சோதி³தோ பப்³ப³ஜி. ஸோ யதா² கஸ்ஸபஸ்ஸ ப⁴க³வதோ காலே படிஞ்ஞம் அகாஸி, ஏவம் படிஞ்ஞம் கத்வா விஹாரம் பவிஸித்வா விபஸ்ஸனம் வட்³டே⁴ந்தோ ஞாணஸ்ஸ பரிபாகம் க³தத்தா தாவதே³வ அரஹத்தம் பாபுணி. தேன வுத்தம் அபதா³னே (அப. தே²ர 1.39.15-20) –

‘‘வினதானதி³யா தீரே, விஹாஸி புரிஸுத்தமோ;

அத்³த³ஸம் விரஜம் பு³த்³த⁴ம், ஏகக்³க³ம் ஸுஸமாஹிதம்.

‘‘தஸ்மிம் பஸன்னமானஸோ, கிலேஸமலதோ⁴வனே;

உது³ம்ப³ரப²லம் க³ய்ஹ, பு³த்³த⁴ஸேட்ட²ஸ்ஸதா³ஸஹம்.

‘‘ஏகனவுதிதோ கப்பே, யம் ப²லமத³தி³ம் ததா³;

து³க்³க³திம் நாபி⁴ஜானாமி, ப²லதா³னஸ்ஸித³ம் ப²லம்.

‘‘இமம்ஹி ப⁴த்³த³கே கப்பே, ஸம்விக்³க³மானமானஸோ;

கஸ்ஸபஸ்ஸ ப⁴க³வதோ, ஸாஸனே பப்³ப³ஜிம் அஹம்.

‘‘ததா² பப்³ப³ஜிதோ ஸந்தோ, பா⁴வனம் அனுயுஞ்ஜிஸம்;

ந விஹாரா நிக்க²மிஸ்ஸம், இதி கத்வான மானஸம்.

‘‘உத்தமத்த²ம் அஸம்பத்தோ, ந ச பத்தோம்ஹி தாவதே³;

இதா³னி பன ஞாணஸ்ஸ, பரிபாகேன நிப்³பு³தோ;

பத்தோம்ஹி அசலம் டா²னம், பு²ஸித்வா அச்சுதம் பத³ம்.

‘‘கிலேஸா ஜா²பிதா மய்ஹம்…பே… கதம் பு³த்³த⁴ஸ்ஸ ஸாஸன’’ந்தி.

அரஹத்தம் பன பத்வா அத்தனோ படிபத்திகித்தனமுகே²ன அஞ்ஞம் ப்³யாகரோந்தோ –

222. ‘‘பஞ்சாஹாஹம் பப்³ப³ஜிதோ, ஸேகோ² அப்பத்தமானஸோ;

விஹாரம் மே பவிட்ட²ஸ்ஸ, சேதஸோ பணிதீ⁴ அஹு.

223. ‘‘நாஸிஸ்ஸம் ந பிவிஸ்ஸாமி, விஹாரதோ ந நிக்க²மே;

நபி பஸ்ஸம் நிபாதேஸ்ஸம், தண்ஹாஸல்லே அனூஹதே.

224. ‘‘தஸ்ஸ மேவம் விஹரதோ, பஸ்ஸ வீரியபரக்கமம்;

திஸ்ஸோ விஜ்ஜா அனுப்பத்தா, கதம் பு³த்³த⁴ஸ்ஸ ஸாஸன’’ந்தி. –

இமா திஸ்ஸோ கா³தா² அபா⁴ஸி.

தத்த² பஞ்சாஹாஹம் பப்³ப³ஜிதோதி பஞ்சாஹோ அஹம், பப்³ப³ஜிதோ ஹுத்வா பஞ்சாஹோ, பப்³ப³ஜிததி³வஸதோ பஞ்சமோ அஹோ நிட்டி²தோதி அத்தோ². ஸேகோ² அப்பத்தமானஸோதி அதி⁴ஸீலஸிக்கா²தீ³னம் ஸிக்க²னதோ ஸேகோ². அனவஸேஸதோ மானம் ஸியதி ஸமுச்சி²ந்த³தீதி மானஸோ, அக்³க³மக்³கோ³, தம்னிப்³ப³த்திதோ மானஸதோ ஆக³தம் மானஸம், அரஹத்தம், தம், ஸோ வா அப்பத்தோ ஏதேனாதி அப்பத்தமானஸோ. விஹாரம் மே பவிட்ட²ஸ்ஸ, சேதஸோ பணிதீ⁴ அஹூதி ஏவம் ஸேக²ஸ்ஸ மே வஸனகவிஹாரம் ஓவரகம் பவிட்ட²ஸ்ஸ ஸதோ ஏவரூபோ இதா³னி வுச்சமானாகாரோ சேதோபணிதி⁴ அஹோஸி, ஏவம் மயா சித்தம் பணிஹிதந்தி அத்தோ².

நாஸிஸ்ஸந்திஆதி³னா சித்தபணிதி⁴ம் த³ஸ்ஸேதி. தத்த² நாஸிஸ்ஸந்தி யம்கிஞ்சி போ⁴ஜனம் ந பு⁴ஞ்ஜிஸ்ஸம் ந பு⁴ஞ்ஜிஸ்ஸாமி தண்ஹாஸல்லே மம ஹத³யக³தே அனூஹதே அனுத்³த⁴தேதி ஏவம் ஸப்³ப³பதே³ஸு யோஜேதப்³ப³ம். ந பிவிஸ்ஸாமீதி யம்கிஞ்சி பாதப்³ப³ம் ந பிவிஸ்ஸாமி. விஹாரதோ ந நிக்க²மேதி இமஸ்மா இதா³னி மயா நிஸின்னக³ப்³ப⁴தோ ந நிக்க²மேய்யம். நபி பஸ்ஸம் நிபாதேஸ்ஸந்தி மம ஸரீரஸ்ஸ த்³வீஸு பஸ்ஸேஸு ஏகம்பி பஸ்ஸம் காயகிலமத²வினோத³னத்த²ம் ந நிபாதேஸ்ஸம், ஏகபஸ்ஸேனபி ந நிபஜ்ஜிஸ்ஸாமீதி அத்தோ².

தஸ்ஸ மேவம் விஹரதோதி தஸ்ஸ மே ஏவம் சித்தம் பணிதா⁴ய த³ள்ஹவீரியாதி⁴ட்டா²னம் கத்வா விபஸ்ஸனானுயோக³வஸேன விஹரதோ. பஸ்ஸ வீரியபரக்கமந்தி விதி⁴னா ஈரயிதப்³ப³தோ ‘‘வீரியம்’’ பரம் டா²னம் அக்கமனதோ ‘‘பரக்கமோ’’தி ச லத்³த⁴னாமம் உஸ்ஸோள்ஹீபூ⁴தம் வாயாமம் பஸ்ஸ ஜானாஹி. யஸ்ஸ பனானுபா⁴வேன மயா திஸ்ஸோ விஜ்ஜா அனுப்பத்தா, கதம் பு³த்³த⁴ஸ்ஸ ஸாஸனந்தி வுத்தத்த²மேவ.

பச்சயத்தே²ரகா³தா²வண்ணனா நிட்டி²தா.