15. ஹாரிதத்தே²ரகா³தா²வண்ணனா

யோ புப்³பே³ கரணீயானீதி ஆயஸ்மதோ ஹாரிதத்தே²ரஸ்ஸ கா³தா². கா உப்பத்தி? அயம்பி பது³முத்தரஸ்ஸ ப⁴க³வதோ காலே குலகே³ஹே நிப்³ப³த்தித்வா விஞ்ஞுதம் பத்தோ ஸத்த²ரி பரினிப்³பு³தே தஸ்ஸ சிதகபூஜாய கயிரமானாய க³ந்தே⁴ன பூஜம் அகாஸி. ஸோ தேன புஞ்ஞகம்மேன தே³வமனுஸ்ஸேஸு ஸம்ஸரந்தோ இமஸ்மிம் பு³த்³து⁴ப்பாதே³ ஸாவத்தி²யம் ப்³ராஹ்மணகுலே நிப்³ப³த்தித்வா ஹாரிதோதி லத்³த⁴னாமோ வயப்பத்தோ ஜாதிமானம் நிஸ்ஸாய அஞ்ஞே வஸலவாதே³ன ஸமுதா³சரதி. ஸோ பி⁴க்கூ²னம் ஸந்திகம் க³ந்த்வா த⁴ம்மம் ஸுத்வா படிலத்³த⁴ஸத்³தோ⁴ பப்³ப³ஜிதோபி சிரபரிசிதத்தா வஸலஸமுதா³சாரம் ந விஸ்ஸஜ்ஜி. அதே²கதி³வஸம் ஸத்து² ஸந்திகே த⁴ம்மம் ஸுத்வா ஸஞ்ஜாதஸம்வேகோ³ விபஸ்ஸனம் பட்ட²பேத்வா அத்தனோ சித்தப்பவத்திம் உபபரிக்க²ந்தோ மானுத்³த⁴ச்சவிக்³க³ஹிததம் தி³ஸ்வா தம் பஹாய விபஸ்ஸனம் உஸ்ஸுக்காபேத்வா அரஹத்தம் பாபுணி. தேன வுத்தம் அபதா³னே (அப. தே²ர 2.46.63-67) –

‘‘சிதாஸு குருமானாஸு, நானாக³ந்தே⁴ ஸமாஹடே;

பஸன்னசித்தோ ஸுமனோ, க³ந்த⁴முட்டி²மபூஜயிம்.

‘‘ஸதஸஹஸ்ஸிதோ கப்பே, சிதகம் யமபூஜயிம்;

து³க்³க³திம் நாபி⁴ஜானாமி, சிதபூஜாயித³ம் ப²லம்.

‘‘கிலேஸா ஜா²பிதா மய்ஹம்…பே… கதம் பு³த்³த⁴ஸ்ஸ ஸாஸன’’ந்தி.

அரஹா பன ஹுத்வா விமுத்திஸுக²ம் அனுப⁴வந்தோ ‘‘யோ புப்³பே³ கரணீயானீ’’திஆதி³னா தீஹி கா³தா²ஹி பி⁴க்கூ²னம் ஓவாத³தா³னமுகே²ன அஞ்ஞம் ப்³யாகாஸி. தாஸம் அத்தோ² ஹேட்டா² வுத்தோயேவ.

ஹாரிதத்தே²ரகா³தா²வண்ணனா நிட்டி²தா.