3. ப்³ரஹ்மாலித்தே²ரகா³தா²வண்ணனா

கஸ்ஸிந்த்³ரியானி ஸமத²ங்க³தானீதி ஆயஸ்மதோ ப்³ரஹ்மாலித்தே²ரஸ்ஸ கா³தா². கா உப்பத்தி? அயம்பி புரிமபு³த்³தே⁴ஸு கதாதி⁴காரோ தத்த² தத்த² ப⁴வே விவட்டூபனிஸ்ஸயம் குஸலம் உபசினந்தோ விபஸ்ஸிஸ்ஸ ப⁴க³வதோ காலே குலகே³ஹே நிப்³ப³த்தித்வா விஞ்ஞுதம் பத்தோ ஏகதி³வஸம் ஸத்தா²ரம் பிண்டா³ய சரந்தம் தி³ஸ்வா பஸன்னமானஸோ வந்தி³த்வா பாத³ப²லம் அதா³ஸி. ஸத்தா² அனுமோத³னம் வத்வா பக்காமி. ஸோ தேன புஞ்ஞகம்மேன தே³வமனுஸ்ஸேஸு ஸம்ஸரந்தோ இமஸ்மிம் பு³த்³து⁴ப்பாதே³ கோஸலரட்டே² ப்³ராஹ்மணகுலே நிப்³ப³த்தித்வா ப்³ரஹ்மாலீதி லத்³த⁴னாமோ விஞ்ஞுதம் பத்தோ ஹேதுஸம்பத்தியா சோதி³யமானோ ஸம்ஸாரே ஸஞ்ஜாதஸம்வேகோ³ தாதி³ஸேன கல்யாணமித்தஸன்னிஸ்ஸயேன பு³த்³த⁴ஸாஸனே பப்³ப³ஜித்வா பதிரூபகம்மட்டா²னம் க³ஹேத்வா அரஞ்ஞே விஹரந்தோ ஞாணஸ்ஸ பரிபாகக³தத்தா நசிரஸ்ஸேவ விபஸ்ஸனம் வட்³டே⁴த்வா ச²ளபி⁴ஞ்ஞோ அஹோஸி. தேன வுத்தம் அபதா³னே (அப. தே²ர 2.51.63-67) –

‘‘ஸுவண்ணவண்ணம் ஸம்பு³த்³த⁴ம், ஆஹுதீனம் படிக்³க³ஹம்;

ரதி²யம் படிபஜ்ஜந்தம், பாத³ப²லம் அதா³ஸஹம்.

‘‘ஏகனவுதிதோ கப்பே, யம் ப²லம் அத³தி³ம் ததா³;

து³க்³க³திம் நாபி⁴ஜானாமி, ப²லதா³னஸ்ஸித³ம் ப²லம்.

‘‘கிலேஸா ஜா²பிதா மய்ஹம்…பே… கதம் பு³த்³த⁴ஸ்ஸ ஸாஸன’’ந்தி.

ச²ளபி⁴ஞ்ஞோ பன ஹுத்வா மக்³க³ஸுகே²ன ப²லஸுகே²ன வீதினாமேந்தோ ஏகதி³வஸம் பதா⁴னபரிக்³கா³ஹகேன தே²ரேன தஸ்மிம் அரஞ்ஞாயதனே பி⁴க்கூ² உத்³தி³ஸ்ஸ வுத்தம் பதா⁴னானுயோக³ம் பரிக்³க³ண்ஹந்தோ –

205. ‘‘கஸ்ஸிந்த்³ரியானி ஸமத²ங்க³தானி, அஸ்ஸா யதா² ஸாரதி²னா ஸுத³ந்தா;

பஹீனமானஸ்ஸ அனாஸவஸ்ஸ, தே³வாபி கஸ்ஸ பிஹயந்தி தாதி³னோ.

206. ‘‘மய்ஹிந்த்³ரியானி ஸமத²ங்க³தானி, அஸ்ஸா யதா² ஸாரதி²னா ஸுத³ந்தா;

பஹீனமானஸ்ஸ அனாஸவஸ்ஸ, தே³வாபி மய்ஹம் பிஹயந்தி தாதி³னோ’’தி. –

கா³தா²த்³வயம் அபா⁴ஸி.

தஸ்ஸத்தோ² – இமஸ்மிம் அரஞ்ஞாயதனே வஸந்தேஸு பி⁴க்கூ²ஸு கஸ்ஸ பி⁴க்கு²னோ தே²ரஸ்ஸ வா நவஸ்ஸ வா மஜ்ஜி²மஸ்ஸ வா சே²கேன ஸாரதி²னா ஸுத³ந்தா அஸ்ஸா விய மனச்ச²ட்டா²னி இந்த்³ரியானி ஸமத²ம் த³ந்தபா⁴வம் நிப்³பி³ஸேவனபா⁴வம் க³தானி. கஸ்ஸ நவவித⁴ம்பி மானம் பஹாய டி²தத்தா பஹீனமானஸ்ஸ சதுன்னம்பி ஆஸவானம் அபா⁴வேன அனாஸவஸ்ஸ இட்டா²தீ³ஸு தாதி³லக்க²ணப்பத்தியா தாதி³னோ தே³வாபி பிஹயந்தி மனுஸ்ஸாபி ஸம்மாபடிபத்தித³ஸ்ஸனாதி³னா ச ஆத³ரேன பத்தே²ந்தீதி.

தத்த² ச கா³தா²யம் புரிமட்³டே⁴ன அனாகா³மிமக்³கா³தி⁴க³மோ புட்டோ², அனாகா³மினோபி ஹி இந்த்³ரியானி பஹீனகாமராக³ப்³யாபாத³தாய ஸமத²ம் நிப்³பி³ஸேவனதம் க³தானி ஹோந்தி. இதரேன அரஹத்தமக்³க³படிலாபோ⁴, அரஹா ஹி ‘‘பஹீனமானோ அனாஸவோ தாதீ³’’தி ச வுச்சதி.

அதா²யஸ்மா ப்³ரஹ்மாலி பதா⁴னபரிக்³கா³ஹகேன வுத்தம் ‘‘கஸ்ஸிந்த்³ரியானீ’’தி கா³த²ம் பச்சனுபா⁴ஸி. தத³த்த²ம் அத்தூபனாயிகவஸேன விஸ்ஸஜ்ஜேந்தோ ‘‘மய்ஹிந்த்³ரியானீ’’திஆதி³காய து³தியகா³தா²ய அஞ்ஞம் ப்³யாகாஸி, தத்த² மய்ஹிந்த்³ரியானீதி மம சக்கா²தீ³னி இந்த்³ரியானி. ஸேஸம் வுத்தனயமேவ.

ப்³ரஹ்மாலித்தே²ரகா³தா²வண்ணனா நிட்டி²தா.