7. ஸோணபோடிரியபுத்தத்தே²ரகா³தா²வண்ணனா

ந தாவ ஸுபிதும் ஹோதீதி ஆயஸ்மதோ ஸோணஸ்ஸ போடிரியபுத்தஸ்ஸ கா³தா². கா உப்பத்தி? அயம்பி புரிமபு³த்³தே⁴ஸு கதாதி⁴காரோ ஸிகி²ஸ்ஸ ப⁴க³வதோ காலே வனசரோ ஹுத்வா ஜீவந்தோ ஏகதி³வஸம் ஸத்தா²ரம் தி³ஸ்வா பஸன்னசித்தோ குரஞ்ஜியப²லம் ஸத்து²னோ அதா³ஸி. ஸோ தேன புஞ்ஞகம்மேன தே³வமனுஸ்ஸேஸு ஸம்ஸரந்தோ இமஸ்மிம் பு³த்³து⁴ப்பாதே³ கபிலவத்து²ஸ்மிம் போடிரியஸ்ஸ நாம கா³மபோ⁴ஜகஸ்ஸ புத்தோ ஹுத்வா நிப்³ப³த்தி, ஸோணோதிஸ்ஸ நாமம் அஹோஸி. ஸோ வயப்பத்தோ ப⁴த்³தி³யஸ்ஸ ஸாகியரஞ்ஞோ ஸேனாபதி அஹோஸி. அத² ப⁴த்³தி³யராஜே ஹேட்டா² வுத்தனயேன பப்³ப³ஜிதே, ஸேனாபதி ‘‘ராஜாபி நாம பப்³ப³ஜி, கிம் மய்ஹம் க⁴ராவாஸேனா’’தி பப்³ப³ஜி? பப்³ப³ஜித்வா பன நித்³தா³ராமோ விஹரதி, ந பா⁴வனமனுயுஞ்ஜதி. தம் ப⁴க³வா அனுபியாயம் அம்ப³வனே விஹரந்தோ அத்தனோ ஓபா⁴ஸம் ப²ராபேத்வா தேனஸ்ஸ ஸதிம் ஜனேத்வா இமாய கா³தா²ய தம் ஓவத³ந்தோ –

193. ‘‘ந தாவ ஸுபிதும் ஹோதி, ரத்தி நக்க²த்தமாலினீ;

படிஜக்³கி³துமேவேஸா, ரத்தி ஹோதி விஜானதா.

194. ‘‘ஹத்தி²க்க²ந்தா⁴வபதிதம், குஞ்ஜரோ சே அனுக்கமே;

ஸங்கா³மே மே மதம் ஸேய்யோ, யஞ்சே ஜீவே பராஜிதோ’’தி. – கா³தா²த்³வயம் அபா⁴ஸி;

தத்த² ந தாவ ஸுபிதும் ஹோதி, ரத்தி நக்க²த்தமாலினீதி அட்ட²ஹி அக்க²ணேஹி வஜ்ஜிதம் நவமம் க²ணம் லபி⁴த்வா டி²தஸ்ஸ விஞ்ஞுஜாதிகஸ்ஸ யாவ ந அரஹத்தம் ஹத்த²க³தம் ஹோதி, தாவ அயம் நக்க²த்தமாலினீ ரத்தி ஸுபிதும் நித்³தா³யிதும் ந ஹோதி, ஸுபனஸ்ஸ காலோ ந ஹோதி. அபிச கோ² படிஜக்³கி³துமேவேஸா, ரத்தி ஹோதி விஜானதாதி ஏஸா ரத்தி நாம மனுஸ்ஸானம் மிக³பக்கீ²னஞ்ச நித்³தூ³பக³மனேன விஸேஸதோ நிஸ்ஸத்³த³வேலாபூ⁴தா படிபத்திம் அத்தனி ஸஞ்ஜக்³கி³தும் ஜாக³ரியானுயோக³மனுயுஞ்ஜிதுமேவ விஜானதா விஞ்ஞுனா இச்சி²தா ஹோதீதி.

தம் ஸுத்வா ஸோணோ ஸம்விக்³க³தரமானஸோ ஹிரோத்தப்பம் பச்சுபட்ட²பேத்வா அப்³போ⁴காஸிகங்க³ம் அதி⁴ட்டா²ய விபஸ்ஸனாய கம்மம் கரோந்தோ ‘‘ஹத்தி²க்க²ந்தோ⁴வ பதித’’ந்தி து³தியம் கா³த²மாஹ. தத்த² அவபதிதந்தி அவமுக²ம் பதிதம் உத்³த⁴ம்பாத³ம் அதோ⁴முக²ம் பதிதம். குஞ்ஜரோ சே அனுக்கமேதி குஞ்ஜரோ அனுக்கமேய்ய சே. இத³ம் வுத்தம் ஹோதி – யதா³ஹம் ஹத்தி²மாருஹித்வா ஸங்கா³மம் பவிட்டோ² ஹத்தி²க்க²ந்த⁴தோ பதிதோ, ததா³ஹம் ஸங்கா³மே தேன ஹத்தி²னா மத்³தி³தோ மதோ அஹோஸிம் சே, தம் மே மரணம் ஸேய்யோ, யஞ்சே இதா³னி கிலேஸேஹி பராஜிதோ ஜீவேய்யம், தம் ந ஸேய்யோதி. இமம் கா³த²ம் வத³ந்தோயேவ விபஸ்ஸனம் உஸ்ஸுக்காபேத்வா அரஹத்தம் பாபுணி. தேன வுத்தம் அபதா³னே (அப. தே²ர 2.52.1-6) –

‘‘மிக³லுத்³தோ³ புரே ஆஸிம், விபினே விசரம் அஹம்;

அத்³த³ஸம் விரஜம் பு³த்³த⁴ம், ஸப்³ப³த⁴ம்மான பாரகு³ம்.

‘‘குரஞ்ஜியப²லம் க³ய்ஹ, பு³த்³த⁴ஸேட்ட²ஸ்ஸதா³ஸஹம்;

புஞ்ஞக்கே²த்தஸ்ஸ தாதி³னோ, பஸன்னோ ஸேஹி பாணிபி⁴.

‘‘ஏகதிம்ஸே இதோ கப்பே, யம் ப²லம் அத³தி³ம் ததா³;

து³க்³க³திம் நாபி⁴ஜானாமி, ப²லதா³னஸ்ஸித³ம் ப²லம்.

‘‘கிலேஸா ஜா²பிதா மய்ஹம்…பே… கதம் பு³த்³த⁴ஸ்ஸ ஸாஸன’’ந்தி.

அரஹத்தம் பன பத்வா ‘‘ஸத்தா²ரா வுத்தம், அத்தனா வுத்த’’ந்தி உப⁴யஞ்ஹி கா³த²ம் ‘‘ஹத்தி²க்க²ந்தா⁴வபதித’’ந்திஆதி³னா பச்சுதா³ஹாஸி. தேன இத³மேவ அஞ்ஞாப்³யாகரணம் அஹோஸீதி.

ஸோணபோடிரியபுத்தத்தே²ரகா³தா²வண்ணனா நிட்டி²தா.