3. ஸோபி⁴தத்தே²ரகா³தா²வண்ணனா

ஸதிமா பஞ்ஞவாதி ஆயஸ்மதோ ஸோபி⁴தத்தே²ரஸ்ஸ கா³தா². கா உப்பத்தி? அயம்பி புரிமபு³த்³தே⁴ஸு கதாதி⁴காரோ தத்த² தத்த² ப⁴வே புஞ்ஞானி உபசினந்தோ பது³முத்தரஸ்ஸ ப⁴க³வதோ காலே ஹம்ஸவதீனக³ரே குலகே³ஹே நிப்³ப³த்தித்வா வயப்பத்தோ ஸத்து² த⁴ம்மதே³ஸனம் ஸுணந்தோ ஸத்தா²ரம் ஏகம் பி⁴க்கு²ம் புப்³பே³னிவாஸஞாணலாபீ⁴னம் பி⁴க்கூ²னம் அக்³க³ட்டா²னே ட²பேந்தம் தி³ஸ்வா ஸயம்பி தம் டா²னந்தரம் உத்³தி³ஸ்ஸ பத்த²னம் கத்வா புஞ்ஞானி கத்வா ஸுக³தீஸுயேவ ஸம்ஸரந்தோ ஸுமேத⁴ஸ்ஸ ப⁴க³வதோ காலே ப்³ராஹ்மணகுலே நிப்³ப³த்தித்வா விஞ்ஞுதம் பத்தோ ப்³ராஹ்மணானம் விஜ்ஜாஸிப்பேஸு நிப்ப²த்திம் க³ந்த்வா நேக்க²ம்மாதி⁴முத்தோ க⁴ராவாஸம் பஹாய தாபஸபப்³ப³ஜ்ஜம் பப்³ப³ஜித்வா ஹிமவந்தஸ்ஸ ஸமீபே அரஞ்ஞாயதனே அஸ்ஸமம் காரேத்வா வனமூலப²லாப²லேன யாபேந்தோ பு³த்³து⁴ப்பாத³ம் ஸுத்வா ஸப்³ப³த்த² ஏகரத்திவாஸேனேவ ப⁴த்³த³வதீனக³ரே ஸத்தா²ரம் உபஸங்கமித்வா பஸன்னமானஸோ ‘‘துவம் ஸத்தா² ச கேது சா’’திஆதீ³ஹி ச²ஹி கா³தா²ஹி அபி⁴த்த²வி, ஸத்தா² சஸ்ஸ பா⁴வினிம் ஸம்பத்திம் பகாஸேஸி. ஸோ தேன புஞ்ஞகம்மேன தே³வமனுஸ்ஸேஸு ஸம்ஸரந்தோ இமஸ்மிம் பு³த்³து⁴ப்பாதே³ ஸாவத்தி²யம் ப்³ராஹ்மணகுலே நிப்³ப³த்தி. ஸோபி⁴தோதிஸ்ஸ நாமம் அகம்ஸு. ஸோ அபரேன ஸமயேன ஸத்து² த⁴ம்மதே³ஸனம் ஸுத்வா படிலத்³த⁴ஸத்³தோ⁴ பப்³ப³ஜித்வா விபஸ்ஸனம் வட்³டே⁴த்வா ச²ளபி⁴ஞ்ஞோ அஹோஸி. புப்³பே³னிவாஸஞாணே சிண்ணவஸீ ச அஹோஸி. தேன வுத்தம் அபதா³னே (அப. தே²ர 2.49.46-74) –

‘‘த³க்கி²ணே ஹிமவந்தஸ்ஸ, ஸுகதோ அஸ்ஸமோ மம;

உத்தமத்த²ம் க³வேஸந்தோ, வஸாமி விபினே ததா³.

‘‘லாபா⁴லாபே⁴ன ஸந்துட்டோ², மூலேன ச ப²லேன ச;

அன்வேஸந்தோ ஆசரியம், வஸாமி ஏககோ அஹம்.

‘‘ஸுமேதோ⁴ நாம ஸம்பு³த்³தோ⁴, லோகே உப்பஜ்ஜி தாவதே³;

சதுஸச்சம் பகாஸேதி, உத்³த⁴ரந்தோ மஹாஜனம்.

‘‘நாஹம் ஸுணோமி ஸம்பு³த்³த⁴ம், நபி மே கோசி ஸம்ஸதி;

அட்ட²வஸ்ஸே அதிக்கந்தே, அஸ்ஸோஸிம் லோகனாயகம்.

‘‘அக்³கி³தா³ரும் நீஹரித்வா, ஸம்மஜ்ஜித்வான அஸ்ஸமம்;

கா²ரிபா⁴ரம் க³ஹேத்வான, நிக்க²மிம் விபினா அஹம்.

‘‘ஏகரத்திம் வஸந்தோஹம், கா³மேஸு நிக³மேஸு ச;

அனுபுப்³பே³ன சந்த³வதிம், ததா³ஹம் உபஸங்கமிம்.

‘‘ப⁴க³வா தம்ஹி ஸமயே, ஸுமேதோ⁴ லோகனாயகோ;

உத்³த⁴ரந்தோ ப³ஹூ ஸத்தே, தே³ஸேதி அமதம் பத³ம்.

‘‘ஜனகாயமதிக்கம்ம, வந்தி³த்வா ஜினஸாக³ரம்;

ஏகம்ஸம் அஜினம் கத்வா, ஸந்த²விம் லோகனாயகம்.

‘‘துவம் ஸத்தா² ச கேது ச, த⁴ஜோ யூபோ ச பாணினம்;

பராயனோ பதிட்டா² ச, தீ³போ ச த்³விபது³த்தமோ.

‘‘நேபுஞ்ஞோ த³ஸ்ஸனே வீரோ, தாரேஸி ஜனதம் துவம்;

நத்த²ஞ்ஞோ தாரகோ லோகே, தவுத்தரிதரோ முனே.

‘‘ஸக்கா தே²வே குஸக்³கே³ன, பமேதும் ஸாக³ருத்தமே;

ந த்வேவ தவ ஸப்³ப³ஞ்ஞு, ஞாணம் ஸக்கா பமேதவே.

‘‘துலத³ண்டே³ ட²பேத்வான, மஹிம் ஸக்கா த⁴ரேதவே;

நத்வேவ தவ பஞ்ஞாய, பமாணமத்தி² சக்கு²ம.

‘‘ஆகாஸோ மினிதும் ஸக்கா, ரஜ்ஜுயா அங்கு³லேன வா;

நத்வேவ தவ ஸப்³ப³ஞ்ஞு, ஸீலம் ஸக்கா பமேதவே.

‘‘மஹாஸமுத்³தே³ உத³கம், ஆகாஸோ ச வஸுந்த⁴ரா;

பரிமேய்யானி ஏதானி, அப்பமேய்யோஸி சக்கு²ம.

‘‘ச²ஹி கா³தா²ஹி ஸப்³ப³ஞ்ஞும், கித்தயித்வா மஹாயஸம்;

அஞ்ஜலிம் பக்³க³ஹேத்வான, துண்ஹீ அட்டா²ஸஹம் ததா³.

‘‘யம் வத³ந்தி ஸுமேதோ⁴தி, பூ⁴ரிபஞ்ஞம் ஸுமேத⁴ஸம்;

பி⁴க்கு²ஸங்கே⁴ நிஸீதி³த்வா, இமா கா³தா² அபா⁴ஸத².

‘‘யோ மே ஞாணம் பகித்தேஸி, விப்பஸன்னேன சேதஸா;

தமஹம் கித்தயிஸ்ஸாமி, ஸுணாத² மம பா⁴ஸதோ.

‘‘ஸத்தஸத்ததி கப்பானி, தே³வலோகே ரமிஸ்ஸதி;

ஸஹஸ்ஸக்க²த்தும் தே³விந்தோ³, தே³வரஜ்ஜம் கரிஸ்ஸதி.

‘‘அனேகஸதக்க²த்துஞ்ச, சக்கவத்தீ ப⁴விஸ்ஸதி;

பதே³ஸரஜ்ஜம் விபுலம், க³ணனாதோ அஸங்கி²யம்.

‘‘தே³வபூ⁴தோ மனுஸ்ஸோ வா, புஞ்ஞகம்மஸமாஹிதோ;

அனூனமனஸங்கப்போ, திக்க²பஞ்ஞோ ப⁴விஸ்ஸதி.

‘‘திம்ஸகப்பஸஹஸ்ஸம்ஹி, ஓக்காககுலஸம்ப⁴வோ;

கோ³தமோ நாம கோ³த்தேன, ஸத்தா² லோகே ப⁴விஸ்ஸதி.

‘‘அகா³ரா அபி⁴னிக்க²ம்ம, பப்³ப³ஜிஸ்ஸதிகிஞ்சனோ;

ஜாதியா ஸத்தவஸ்ஸேன, அரஹத்தம் பு²ஸிஸ்ஸதி.

‘‘யதோ ஸராமி அத்தானம், யதோ பத்தோஸ்மி ஸாஸனம்;

ஏத்த²ந்தரே ந ஜானாமி, சேதனம் அமனோரமம்.

‘‘ஸம்ஸரித்வா ப⁴வே ஸப்³பே³, ஸம்பத்தானுப⁴விம் அஹம்;

போ⁴கே³ மே ஊனதா நத்தி², ப²லம் ஞாணஸ்ஸ தோ²மனே.

‘‘தியக்³கீ³ நிப்³பு³தா மய்ஹம், ப⁴வா ஸப்³பே³ ஸமூஹதா;

ஸப்³பா³ஸவா பரிக்கீ²ணா, நத்தி² தா³னி புனப்³ப⁴வோ.

‘‘திம்ஸகப்பஸஹஸ்ஸம்ஹி, யம் ஞாணமத²விம் அஹம்;

து³க்³க³திம் நாபி⁴ஜானாமி, ப²லம் ஞாணஸ்ஸ தோ²மனே.

‘‘கிலேஸா ஜா²பிதா மய்ஹம்…பே… கதம் பு³த்³த⁴ஸ்ஸ ஸாஸன’’ந்தி.

ஸோ அரஹத்தம் பன பத்வா அத்தனோ புப்³பே³னிவாஸம் அனுபடிபாடியா அனுஸ்ஸரந்தோ யாவ அஸஞ்ஞப⁴வே அசித்தகபடிஸந்தி⁴, தாவ அத்³த³ஸ. ததோ பஞ்ச கப்பஸதானி சித்தப்பவத்திம் அதி³ஸ்வா அவஸானேவ தி³ஸ்வா ‘‘கிமேத’’ந்தி ஆவஜ்ஜேந்தோ நயவஸேன ‘‘அஸஞ்ஞப⁴வோ ப⁴விஸ்ஸதீ’’தி நிட்ட²ம் அக³மாஸி. தேனாஹ ப⁴க³வா – ‘‘அத்தி², பி⁴க்க²வே, அஸஞ்ஞஸத்தா நாம தீ³கா⁴யுகா தே³வா, ததோ சுதோ ஸோபி⁴தோ இதூ⁴பபன்னோ, ஸோ ஏதம் ப⁴வம் ஜானாதி, ஸோபி⁴தோ அனுஸ்ஸரதீ’’தி (பாரா. 232 அத்த²தோ ஸமானம்). ஏவம் நயவஸேன அனுஸ்ஸரந்தஸ்ஸ அனுஸ்ஸரணகோஸல்லம் தி³ஸ்வா ஸத்தா² தே²ரம் புப்³பே³னிவாஸம் அனுஸ்ஸரந்தானம் அக்³க³ட்டா²னே ட²பேஸி. ததோ ஏவ சாயம் ஆயஸ்மா ஸவிஸேஸம் அத்தனோ புப்³பே³னிவாஸானுஸ்ஸதிஞாணம் தஸ்ஸ ச பச்சயபூ⁴தம் படிபத்திம் பச்சவேக்கி²த்வா ஸோமனஸ்ஸஜாதோ தத³த்த²தீ³பனம் உதா³னம் உதா³னேந்தோ –

165. ‘‘ஸதிமா பஞ்ஞவா பி⁴க்கு², ஆரத்³த⁴ப³லவீரியோ;

பஞ்ச கப்பஸதானாஹம், ஏகரத்திம் அனுஸ்ஸரிம்.

166. ‘‘சத்தாரோ ஸதிபட்டா²னே, ஸத்த அட்ட² ச பா⁴வயம்;

பஞ்ச கப்பஸதானாஹம், ஏகரத்திம் அனுஸ்ஸரி’’ந்தி. – கா³தா²த்³வயம் அபா⁴ஸி;

தத்த² ஸதிமாதி ஸயம் ஸமுதா³க³மனஸம்பன்னாய ஸதிபட்டா²னபா⁴வனாபாரிபூரியா ஸதிவேபுல்லப்பத்தியா ச ஸதிமா. பஞ்ஞவாதி ச²ளபி⁴ஞ்ஞாபாரிபூரியா பஞ்ஞாவேபுல்லப்பத்தியா ச பஞ்ஞவா. பி⁴ன்னகிலேஸதாய பி⁴க்கு². ஸத்³தா⁴தி³ப³லானஞ்சேவ சதுப்³பி³த⁴ஸம்மப்பதா⁴னவீரியஸ்ஸ ச ஸம்ஸித்³தி⁴பாரிபூரியா ஆரத்³த⁴ப³லவீரியோ. ஸத்³தா⁴தீ³னஞ்ஹேத்த² ப³லக்³க³ஹணேன க³ஹணம் ஸதிபி ஸதிஆதீ³னம் ப³லபா⁴வே, யதா² ‘‘கோ³ப³லிப³த்³தா⁴ புஞ்ஞஞாணஸம்பா⁴ரா’’தி. பஞ்ச கப்பஸதானாஹம், ஏகரத்திம் அனுஸ்ஸரிந்தி ஏகரத்திம் விய அனுஸ்ஸரிம். விய-ஸத்³தோ³ ஹி இத⁴ லுத்தனித்³தி³ட்டோ², ஏதேன புப்³பே³னிவாஸானுஸ்ஸதிஞாணே அத்தனோ ஞாணவஸீபா⁴வம் தீ³பேதி.

இதா³னி யாய படிபத்தியா அத்தனோ ஸதிமந்தாதி³பா⁴வோ ஸாதிஸயம் புப்³பே³னிவாஸஞாணஞ்ச ஸித்³த⁴ம், தம் த³ஸ்ஸேதும் ‘‘சத்தாரோ’’திஆதி³னா து³தியம் கா³த²மாஹ. தத்த² சத்தாரோ ஸதிபட்டா²னேதி காயானுபஸ்ஸனாதி³கே அத்தனோ விஸயபே⁴தே³ன சதுப்³பி³தே⁴ லோகியலோகுத்தரமிஸ்ஸகே ஸதிஸங்கா²தே ஸதிபட்டா²னே. ஸத்தாதி ஸத்த போ³ஜ்ஜ²ங்கே³. அட்டா²தி அட்ட² மக்³க³ங்கா³னி. ஸதிபட்டா²னேஸு ஹி ஸுப்பதிட்டி²தசித்தஸ்ஸ ஸத்த போ³ஜ்ஜ²ங்கா³ பா⁴வனாபாரிபூரிம் க³தா ஏவ ஹோந்தி, ததா² அரியோ அட்ட²ங்கி³கோ மக்³கோ³. தேனாஹ த⁴ம்மஸேனாபதி – ‘‘சதூஸு ஸதிபட்டா²னேஸு ஸுப்பதிட்டி²தசித்தா ஸத்த போ³ஜ்ஜ²ங்கே³ யதா²பூ⁴தம் பா⁴வேத்வா’’திஆதீ³ஹி (தீ³. நி. 3.143) ஸத்தகோட்டா²ஸிகேஸு ஸத்ததிம்ஸாய போ³தி⁴பக்கி²யத⁴ம்மேஸு ஏகஸ்மிம் கோட்டா²ஸே பா⁴வனாபாரிபூரிம் க³ச்ச²ந்தே இதரே அக³ச்ச²ந்தா நாம நத்தீ²தி. பா⁴வயந்தி பா⁴வனாஹேது. ஸேஸம் வுத்தனயமேவ.

ஸோபி⁴தத்தே²ரகா³தா²வண்ணனா நிட்டி²தா.