4. வல்லியத்தே²ரகா³தா²வண்ணனா

யம் கிச்சம் த³ள்ஹவீரியேனாதிஆதி³கா ஆயஸ்மதோ வல்லியத்தே²ரஸ்ஸ கா³தா². கா உப்பத்தி? அயம்பி புரிமபு³த்³தே⁴ஸு கதாதி⁴காரோ தத்த² தத்த² ப⁴வே புஞ்ஞானி உபசினந்தோ ஸுமேத⁴ஸ்ஸ ப⁴க³வதோ காலே ப்³ராஹ்மணகுலே நிப்³ப³த்தித்வா விஞ்ஞுதம் பத்தோ விஜ்ஜாஸிப்பேஸு நிப்ப²த்திம் க³தோ அஸீதிகோடிவிப⁴வம் பஹாய தாபஸபப்³ப³ஜ்ஜம் பப்³ப³ஜித்வா பப்³ப³தபாதே³ அரஞ்ஞாயதனே ஏகிஸ்ஸா நதி³யா தீரே அஸ்ஸமம் காரேத்வா விஹரந்தோ அத்தனோ அனுக்³க³ண்ஹனத்த²ம் உபக³தம் ஸத்தா²ரம் தி³ஸ்வா பஸன்னமானஸோ அஜினசம்மம் பத்த²ரித்வா அதா³ஸி. தத்த² நிஸின்னம் ப⁴க³வந்தம் புப்பே²ஹி ச சந்த³னேன ச பூஜேத்வா அம்ப³ப²லானி த³த்வா பஞ்சபதிட்டி²தேன வந்தி³. தஸ்ஸ ப⁴க³வா நிஸின்னாஸனஸம்பத்திம் பகாஸேந்தோ அனுமோத³னம் வத்வா பக்காமி. ஸோ தேன புஞ்ஞகம்மேன தே³வமனுஸ்ஸேஸு ஸம்ஸரந்தோ இமஸ்மிம் பு³த்³து⁴ப்பாதே³ வேஸாலியம் ப்³ராஹ்மணகுலே நிப்³ப³த்தித்வா ‘‘கண்ஹமித்தோ’’தி லத்³த⁴னாமோ வயப்பத்தோ ஸத்து² வேஸாலிக³மனே பு³த்³தா⁴னுபா⁴வம் தி³ஸ்வா படிலத்³த⁴ஸத்³தோ⁴ மஹாகச்சானத்தே²ரஸ்ஸ ஸந்திகே பப்³ப³ஜி. ஸோ மந்த³பஞ்ஞோ த³ந்த⁴பரக்கமோ ச ஹுத்வா சிரம் காலம் விஞ்ஞும் ஸப்³ரஹ்மசாரிம் நிஸ்ஸாயேவ வஸதி. பி⁴க்கூ² ‘‘யதா² நாம வல்லி ருக்கா²தீ³ஸு கிஞ்சி அனிஸ்ஸாய வட்³டி⁴தும் ந ஸக்கோதி, ஏவமயம்பி கஞ்சி பண்டி³தம் அனிஸ்ஸாய வட்³டி⁴தும் ந ஸக்கோதீ’’தி வல்லியோத்வேவ ஸமுதா³சரிம்ஸு. அபரபா⁴கே³ பன வேணுத³த்தத்தே²ரம் உபஸங்கமித்வா தஸ்ஸ ஓவாதே³ ட²த்வா ஸதோ ஸம்பஜானோ ஹுத்வா விஹரந்தோ ஞாணஸ்ஸ பரிபாகம் க³தத்தா படிபத்திக்கமம் தே²ரம் புச்ச²ந்தோ –

167. ‘‘யம் கிச்சம் த³ள்ஹவீரியேன, யம் கிச்சம் போ³த்³து⁴மிச்ச²தா;

கரிஸ்ஸம் நாவரஜ்ஜி²ஸ்ஸம், பஸ்ஸ வீரியம் பரக்கமம்.

168. ‘‘த்வஞ்ச மே மக்³க³மக்கா²ஹி, அஞ்ஜஸம் அமதோக³த⁴ம்;

அஹம் மோனேன மோனிஸ்ஸம், க³ங்கா³ஸோதோவ ஸாக³ர’’ந்தி. – கா³தா²த்³வயம் அபா⁴ஸி;

தத்த² யம் கிச்சம் த³ள்ஹவீரியேனாதி த³ள்ஹேன வீரியேன தி²ரேன பரக்கமேன, த³ள்ஹவீரியேன வா புரிஸதோ⁴ரய்ஹேன யம் கிச்சம் காதப்³ப³ம் படிபஜ்ஜிதப்³ப³ம். யம் கிச்சம் போ³த்³து⁴மிச்ச²தாதி சத்தாரி அரியஸச்சானி நிப்³பா³னமேவ வா போ³த்³து⁴ம் பு³ஜ்ஜி²தும் இச்ச²ந்தேன படிவிஜ்ஜி²துகாமேன யம் கிச்சம் கரணீயம். கரிஸ்ஸம் நாவரஜ்ஜி²ஸ்ஸந்தி தமஹம் தா³னி கரிஸ்ஸம் ந விராதே⁴ஸ்ஸம், யதா²னுஸிட்ட²ம் படிபஜ்ஜிஸ்ஸாமி. பஸ்ஸ வீரியம் பரக்கமந்தி யதா² படிபஜ்ஜமானே த⁴ம்மே விதி⁴னா ஈரணதோ ‘‘வீரியம்’’, பரம் பரம் டா²னம் அக்கமனதோ ‘‘பரக்கமோ’’தி ச லத்³த⁴னாமம் ஸம்மாவாயாமம் பஸ்ஸ ந ஸத்³த⁴மேவாதி அத்தனோ கத்துகாமதம் த³ஸ்ஸேதி.

த்வஞ்சாதி கம்மட்டா²னதா³யகம் கல்யாணமித்தம் ஆலபதி. மேதி மய்ஹம். மக்³க³மக்கா²ஹீதி அரியமக்³க³ம் கதே²ஹி, லோகுத்தரமக்³க³ஸம்பாபகம் சதுஸச்சகம்மட்டா²னம் கதே²ஹீதி அத்தோ². அஞ்ஜஸந்தி உஜுகம் மஜ்ஜி²மபடிபதா³பா⁴வேன அந்தத்³வயஸ்ஸ அனுபக³மனதோ. அமதே நிப்³பா³னே ஸம்பாபகபா⁴வேன பதிட்டி²தத்தா அமதோக³த⁴ம். மோனேனாதி ஞாணேன மக்³க³பஞ்ஞாய. மோனிஸ்ஸந்தி ஜானிஸ்ஸம் நிப்³பா³னம் படிவிஜ்ஜி²ஸ்ஸம் பாபுணிஸ்ஸம். க³ங்கா³ஸோதோவ ஸாக³ரந்தி யதா² க³ங்கா³ய ஸோதோ ஸாக³ரம் ஸமுத்³த³ம் அவிரஜ்ஜ²ந்தோ ஏகம்ஸதோ ஓகா³ஹதி, ஏவம் ‘‘அஹம் கம்மட்டா²னம் அனுயுஞ்ஜந்தோ மக்³க³ஞாணேன நிப்³பா³னம் அதி⁴க³மிஸ்ஸாமி, தஸ்மா தம் கம்மட்டா²னம் மே ஆசிக்க²தா²’’தி தே²ரம் கம்மட்டா²னம் யாசி.

தம் ஸுத்வா வேணுத³த்தத்தே²ரோ தஸ்ஸ கம்மட்டா²னம் அதா³ஸி. ஸோபி கம்மட்டா²னம் அனுயுஞ்ஜந்தோ நசிரஸ்ஸேவ விபஸ்ஸனம் உஸ்ஸுக்காபேத்வா அரஹத்தம் பாபுணி. தேன வுத்தம் அபதா³னே (அப. தே²ர 2.49.75-105) –

‘‘பஞ்ச காமகு³ணே ஹித்வா, பியரூபே மனோரமே;

அஸீதி கோடியோ ஹித்வா, பப்³ப³ஜிம் அனகா³ரியம்.

‘‘பப்³ப³ஜித்வான காயேன, பாபகம்மம் விவஜ்ஜயிம்;

வசீது³ச்சரிதம் ஹித்வா, நதீ³கூலே வஸாமஹம்.

‘‘ஏககம் மம் விஹரந்தம், பு³த்³த⁴ஸேட்டோ² உபாக³மி;

நாஹம் ஜானாமி பு³த்³தோ⁴தி, அகாஸிம் படிஸந்தா²ரம்.

‘‘கரித்வா படிஸந்தா²ரம், நாமகோ³த்தமபுச்ச²ஹம்;

தே³வதானுஸி க³ந்த⁴ப்³போ³, அது³ ஸக்கோ புரிந்த³தோ³.

‘‘கோ வா த்வம் கஸ்ஸ வா புத்தோ, மஹாப்³ரஹ்மா இதா⁴க³தோ;

விரோசேஸி தி³ஸா ஸப்³பா³, உத³யம் ஸூரியோ யதா².

‘‘ஸஹஸ்ஸாரானி சக்கானி, பாதே³ தி³ஸ்ஸந்தி மாரிஸ;

கோ வா த்வம் கஸ்ஸ வா புத்தோ, கத²ம் ஜானேமு தம் மயம்.

‘‘நாமகோ³த்தம் பவேதே³ஹி, ஸம்ஸயம் அபனேஹி மே;

நம்ஹி தே³வா ந க³ந்த⁴ப்³போ³, நம்ஹி ஸக்கோ புரிந்த³தோ³.

‘‘ப்³ரஹ்மபா⁴வோ ச மே நத்தி², ஏதேஸம் உத்தமோ அஹம்;

அதீதோ விஸயம் தேஸம், தா³லயிம் காமப³ந்த⁴னம்.

‘‘ஸப்³பே³ கிலேஸே ஜா²பேத்வா, பத்தோ ஸம்போ³தி⁴முத்தமம்;

தஸ்ஸ வாசம் ஸுணித்வாஹம், இத³ம் வசனமப்³ரவிம்.

‘‘யதி³ பு³த்³தோ⁴ஸி ஸப்³ப³ஞ்ஞூ, நிஸீத³ த்வம் மஹாமுனே;

தமஹம் பூஜயிஸ்ஸாமி, து³க்க²ஸ்ஸந்தகரோ துவம்.

‘‘பத்த²ரித்வாஜினசம்மம், அதா³ஸி ஸத்து²னோ அஹம்;

நிஸீதி³ தத்த² ப⁴க³வா, ஸீஹோவ கி³ரிக³ப்³ப⁴ரே.

‘‘கி²ப்பம் பப்³ப³தமாருய்ஹ, அம்ப³ஸ்ஸ ப²லமக்³க³ஹிம்;

ஸாலகல்யாணிகம் புப்ப²ம், சந்த³னஞ்ச மஹாரஹம்.

‘‘கி²ப்பம் பக்³க³ய்ஹ தம் ஸப்³ப³ம், உபேத்வா லோகனாயகம்;

ப²லம் பு³த்³த⁴ஸ்ஸ த³த்வான, ஸாலபுப்ப²மபூஜயிம்.

‘‘சந்த³னம் அனுலிம்பித்வா, அவந்தி³ம் ஸத்து²னோ அஹம்;

பஸன்னசித்தோ ஸுமனோ, விபுலாய ச பீதியா.

‘‘அஜினம்ஹி நிஸீதி³த்வா, ஸுமேதோ⁴ லோகனாயகோ;

மம கம்மம் பகித்தேஸி, ஹாஸயந்தோ மமம் ததா³.

‘‘இமினா ப²லதா³னேன, க³ந்த⁴மாலேஹி சூப⁴யம்;

பஞ்சவீஸே கப்பஸதே, தே³வலோகே ரமிஸ்ஸதி.

‘‘அனூனமனஸங்கப்போ, வஸவத்தீ ப⁴விஸ்ஸதி;

ச²ப்³பீ³ஸதிகப்பஸதே, மனுஸ்ஸத்தம் க³மிஸ்ஸதி.

‘‘ப⁴விஸ்ஸதி சக்கவத்தீ, சாதுரந்தோ மஹித்³தி⁴கோ;

வேபா⁴ரம் நாம நக³ரம், விஸ்ஸகம்மேன மாபிதம்.

‘‘ஹேஸ்ஸதி ஸப்³ப³ஸோவண்ணம், நானாரதனபூ⁴ஸிதம்;

ஏதேனேவ உபாயேன, ஸம்ஸரிஸ்ஸதி ஸோ ப⁴வே.

‘‘ஸப்³ப³த்த² பூஜிதோ ஹுத்வா, தே³வத்தே அத² மானுஸே;

பச்சி²மே ப⁴வே ஸம்பத்தே, ப்³ரஹ்மப³ந்து⁴ ப⁴விஸ்ஸதி.

‘‘அகா³ரா அபி⁴னிக்க²ம்ம, அனகா³ரீ ப⁴விஸ்ஸதி;

அபி⁴ஞ்ஞாபாரகூ³ ஹுத்வா, நிப்³பா³யிஸ்ஸதினாஸவோ.

‘‘இத³ம் வத்வான ஸம்பு³த்³தோ⁴, ஸுமேதோ⁴ லோகனாயகோ;

மம நிஜ்ஜா²யமானஸ்ஸ, பக்காமி அனிலஞ்ஜஸே.

‘‘தேன கம்மேன ஸுகதேன, சேதனாபணிதீ⁴ஹி ச;

ஜஹித்வா மானுஸம் தே³ஹம், தாவதிம்ஸமக³ச்ச²ஹம்.

‘‘துஸிததோ சவித்வான, நிப்³ப³த்திம் மாதுகுச்சி²யம்;

போ⁴கே³ மே ஊனதா நத்தி², யம்ஹி க³ப்³பே⁴ வஸாமஹம்.

‘‘மாதுகுச்சி²க³தே மயி, அன்னபானஞ்ச போ⁴ஜனம்;

மாதுயா மம ச²ந்தே³ன, நிப்³ப³த்ததி யதி³ச்ச²கம்.

‘‘ஜாதியா பஞ்சவஸ்ஸேன, பப்³ப³ஜிம் அனகா³ரியம்;

ஓரோபிதம்ஹி கேஸம்ஹி, அரஹத்தமபாபுணிம்.

‘‘புப்³ப³கம்மம் க³வேஸந்தோ, ஓரேன நாத்³த³ஸம் அஹம்;

திம்ஸகப்பஸஹஸ்ஸம்ஹி, மம கம்மமனுஸ்ஸரிம்.

‘‘நமோ தே புரிஸாஜஞ்ஞ, நமோ தே புரிஸுத்தம;

தவ ஸாஸனமாக³ம்ம, பத்தோம்ஹி அசலம் பத³ம்.

‘‘திம்ஸகப்பஸஹஸ்ஸம்ஹி, யம் பு³த்³த⁴மபி⁴பூஜயிம்;

து³க்³க³திம் நாபி⁴ஜானாமி, பு³த்³த⁴பூஜாயித³ம் ப²லம்.

‘‘கிலேஸா ஜா²பிதா மய்ஹம்…பே… கதம் பு³த்³த⁴ஸ்ஸ ஸாஸன’’ந்தி.

அரஹத்தம் பன பத்வா அஞ்ஞம் ப்³யாகரோந்தோ தே²ரோ இமாயேவ கா³தா² அபா⁴ஸீதி.

வல்லியத்தே²ரகா³தா²வண்ணனா நிட்டி²தா.