10. பாராபரியத்தே²ரகா³தா²வண்ணனா

ஸமணஸ்ஸ அஹு சிந்தாதிஆதி³கா ஆயஸ்மதோ பாராபரியத்தே²ரஸ்ஸ கா³தா². இமஸ்ஸ வத்து² ஹேட்டா² ஆக³தமேவ. தா ச கா³தா² ஸத்த²ரி த⁴ரந்தே அத்தனோ புது²ஜ்ஜனகாலே மனச்ச²ட்டா²னம் இந்த்³ரியானம் நிக்³க³ண்ஹனசிந்தாய பகாஸனவஸேன பா⁴ஸிதா. இமா பன அபரபா⁴கே³ ஸத்த²ரி பரினிப்³பு³தே அத்தனோ ச பரினிப்³பா³னே உபட்டி²தே ததா³ ஆயதிஞ்ச பி⁴க்கூ²னம் உத்³த⁴ம்மபடிபத்தியா பகாஸனவஸேன பா⁴ஸிதா. தத்த² –

920. ‘‘ஸமணஸ்ஸ அஹு சிந்தா, புப்பி²தம்ஹி மஹாவனே;

ஏகக்³க³ஸ்ஸ நிஸின்னஸ்ஸ, பவிவித்தஸ்ஸ ஜா²யினோ’’தி. –

அயம் கா³தா² ஸங்கீ³திகாரேஹி ட²பிதா. தஸ்ஸத்தோ² ஹேட்டா² வுத்தனயோவ. அயம் பன ஸம்ப³ந்தோ⁴ – ஸத்த²ரி அக்³க³ஸாவகேஸு ஏகச்சேஸு மஹாதே²ரேஸு ச பரினிப்³பு³தேஸு அதீதஸத்து²கே பாவசனே ஸுப்³ப³சேஸு ஸிக்கா²காமேஸு பி⁴க்கூ²ஸு து³ல்லபே⁴ஸு, து³ப்³ப³சேஸு மிச்சா²படிபத்திப³ஹுலேஸு பி⁴க்கூ²ஸு ச ஜாதேஸு ஸுபுப்பி²தே மஹந்தே ஸாலவனே நிஸின்னஸ்ஸ பவிவித்தஸ்ஸ ஏகக்³க³ஸ்ஸ ஜா²யனஸீலஸ்ஸ, ஸமிதபாபதாய ஸமணஸ்ஸ, பாராபரியத்தே²ரஸ்ஸ படிபத்திம் நிஸ்ஸாய சிந்தா வீமம்ஸா அஹோஸீதி இதரா –

921. ‘‘அஞ்ஞதா² லோகனாத²ம்ஹி, திட்ட²ந்தே புரிஸுத்தமே;

இரியம் ஆஸி பி⁴க்கூ²னம், அஞ்ஞதா² தா³னி தி³ஸ்ஸதி.

922. ‘‘ஸீதவாதபரித்தாணம், ஹிரிகோபீனசா²த³னம்;

மத்தட்டி²யம் அபு⁴ஞ்ஜிம்ஸு, ஸந்துட்டா² இதரீதரே.

923. ‘‘பணீதம் யதி³ வா லூக²ம், அப்பம் வா யதி³ வா ப³ஹும்;

யாபனத்த²ம் அபு⁴ஞ்ஜிம்ஸு, அகி³த்³தா⁴ நாதி⁴முச்சி²தா.

924. ‘‘ஜீவிதானம் பரிக்கா²ரே, பே⁴ஸஜ்ஜே அத² பச்சயே;

ந பா³ள்ஹம் உஸ்ஸுகா ஆஸும், யதா² தே ஆஸவக்க²யே.

925. ‘‘அரஞ்ஞே ருக்க²மூலேஸு, கந்த³ராஸு கு³ஹாஸு ச;

விவேகமனுப்³ரூஹந்தா, விஹம்ஸு தப்பராயணா.

926. ‘‘நீசா நிவிட்டா² ஸுப⁴ரா, முதூ³ அத²த்³த⁴மானஸா;

அப்³யாஸேகா அமுக²ரா, அத்த²சிந்தாவஸானுகா³.

927. ‘‘ததோ பாஸாதி³கம் ஆஸி, க³தம் பு⁴த்தம் நிஸேவிதம்;

ஸினித்³தா⁴ தேலதா⁴ராவ, அஹோஸி இரியாபதோ².

928. ‘‘ஸப்³பா³ஸவபரிக்கீ²ணா, மஹாஜா²யீ மஹாஹிதா;

நிப்³பு³தா தா³னி தே தே²ரா, பரித்தா தா³னி தாதி³ஸா.

929. ‘‘குஸலானஞ்ச த⁴ம்மானம், பஞ்ஞாய ச பரிக்க²யா;

ஸப்³பா³காரவரூபேதம், லுஜ்ஜதே ஜினஸாஸனம்.

930. ‘‘பாபகானஞ்ச த⁴ம்மானம், கிலேஸானஞ்ச யோ உது;

உபட்டி²தா விவேகாய, யே ச ஸத்³த⁴ம்மஸேஸகா.

931. ‘‘தே கிலேஸா பவட்³ட⁴ந்தா, ஆவிஸந்தி ப³ஹும் ஜனம்;

கீளந்தி மஞ்ஞே பா³லேஹி, உம்மத்தேஹிவ ரக்க²ஸா.

932. ‘‘கிலேஸேஹாபி⁴பூ⁴தா தே, தேன தேன விதா⁴விதா;

நரா கிலேஸவத்தூ²ஸு, ஸஸங்கா³மேவ கோ⁴ஸிதே.

933. ‘‘பரிச்சஜித்வா ஸத்³த⁴ம்மம், அஞ்ஞமஞ்ஞேஹி ப⁴ண்ட³ரே;

தி³ட்டி²க³தானி அன்வேந்தா, இத³ம் ஸேய்யோதி மஞ்ஞரே.

934. ‘‘த⁴னஞ்ச புத்தம் ப⁴ரியஞ்ச, ச²ட்³ட³யித்வான நிக்³க³தா;

கடச்சு²பி⁴க்க²ஹேதூபி, அகிச்சா²னி நிஸேவரே.

935. ‘‘உத³ராவதே³ஹகம் பு⁴த்வா, ஸயந்துத்தானஸேய்யகா;

கதா² வட்³டே⁴ந்தி படிபு³த்³தா⁴, யா கதா² ஸத்து²க³ரஹிதா.

936. ‘‘ஸப்³ப³காருகஸிப்பானி, சித்திம் கத்வான ஸிக்க²ரே;

அவூபஸந்தா அஜ்ஜ²த்தம், ஸாமஞ்ஞத்தோ²திஅச்ச²தி.

937. ‘‘மத்திகம் தேலசுண்ணஞ்ச, உத³காஸனபோ⁴ஜனம்;

கி³ஹீனம் உபனாமேந்தி, ஆகங்க²ந்தா ப³ஹுத்தரம்.

938. ‘‘த³ந்தபோனம் கபித்த²ஞ்ச, புப்ப²ம் கா²த³னியானி ச;

பிண்ட³பாதே ச ஸம்பன்னே, அம்பே³ ஆமலகானி ச.

939. ‘‘பே⁴ஸஜ்ஜேஸு யதா² வேஜ்ஜா, கிச்சாகிச்சே யதா² கி³ஹீ;

க³ணிகாவ விபூ⁴ஸாயம், இஸ்ஸரே க²த்தியா யதா².

940. ‘‘நேகதிகா வஞ்சனிகா, கூடஸக்கீ² அபாடுகா;

ப³ஹூஹி பரிகப்பேஹி, ஆமிஸம் பரிபு⁴ஞ்ஜரே.

941. ‘‘லேஸகப்பே பரியாயே, பரிகப்பேனுதா⁴விதா;

ஜீவிகத்தா² உபாயேன, ஸங்கட்³ட⁴ந்தி ப³ஹும் த⁴னம்.

942. ‘‘உபட்டா²பேந்தி பரிஸம், கம்மதோ நோ ச த⁴ம்மதோ;

த⁴ம்மம் பரேஸம் தே³ஸேந்தி, லாப⁴தோ நோ ச அத்த²தோ.

943. ‘‘ஸங்க⁴லாப⁴ஸ்ஸ ப⁴ண்ட³ந்தி, ஸங்க⁴தோ பரிபா³ஹிரா;

பரலாபோ⁴பஜீவந்தா, அஹிரீகா ந லஜ்ஜரே.

944. ‘‘நானுயுத்தா ததா² ஏகே, முண்டா³ ஸங்கா⁴டிபாருதா;

ஸம்பா⁴வனம்யேவிச்ச²ந்தி, லாப⁴ஸக்காரமுச்சி²தா.

945. ‘‘ஏவம் நானப்பயாதம்ஹி, ந தா³னி ஸுகரம் ததா²;

அபு²ஸிதம் வா பு²ஸிதும், பு²ஸிதம் வானுரக்கி²தும்.

946. ‘‘யதா² கண்டகட்டா²னம்ஹி, சரேய்ய அனுபாஹனோ;

ஸதிம் உபட்ட²பேத்வான, ஏவம் கா³மே முனீ சரே.

947. ‘‘ஸரித்வா புப்³ப³கே யோகீ³, தேஸம் வத்தமனுஸ்ஸரம்;

கிஞ்சாபி பச்சி²மோ காலோ, பு²ஸேய்ய அமதம் பத³ம்.

948. ‘‘இத³ம் வத்வா ஸாலவனே, ஸமணோ பா⁴விதிந்த்³ரியோ;

ப்³ராஹ்மணோ பரினிப்³பா³யீ, இஸி கீ²ணபுனப்³ப⁴வோ’’தி. –

இமா கா³தா² தே²ரேனேவ பா⁴ஸிதா.

தத்த² இரியம் ஆஸி பி⁴க்கூ²னந்தி புரிஸுத்தமே லோகனாத²ம்ஹி ஸம்மாஸம்பு³த்³தே⁴ திட்ட²ந்தே த⁴ரந்தே ஏதரஹி படிபத்திபா⁴வதோ. அஞ்ஞதா² அஞ்ஞேன பகாரேன பி⁴க்கூ²னம் இரியம் சரிதம் அஹோஸி யதா²னுஸிட்ட²ம் படிபத்திபா⁴வதோ. அஞ்ஞதா² தா³னி தி³ஸ்ஸதீதி இதா³னி பன ததோ அஞ்ஞதா² பி⁴க்கூ²னம் இரியம் தி³ஸ்ஸதி அயாதா²வபடிபத்திபா⁴வதோதி அதி⁴ப்பாயோ.

இதா³னி ஸத்த²ரி த⁴ரந்தே யேனாகாரேன பி⁴க்கூ²னம் படிபத்தி அஹோஸி, தம் தாவ த³ஸ்ஸேதும் ‘‘ஸீதவாதபரித்தாண’’ந்திஆதி³ வுத்தம். தத்த² மத்தட்டி²யந்தி தம் மத்தம் பயோஜனம். யாவதே³வ ஸீதவாதபரித்தாணம், யாவதே³வ ஹிரீகோபீனபடிச்சா²த³னம் கத்வா சீவரம் பரிபு⁴ஞ்ஜிம்ஸு. கத²ம்? ஸந்துட்டா² இதரீதரே யஸ்மிம் தஸ்மிம் ஹீனே பணீதே வா யதா²லத்³தே⁴ பச்சயே ஸந்தோஸம் ஆபன்னா.

பணீதந்தி உளாரம் ஸப்பிஆதி³னா ஸம்ஸட்ட²ம், தத³பா⁴வேன லூக²ம். அப்பந்தி, சதுபஞ்சாலோபமத்தம்பி. ப³ஹும் யாபனத்த²ம் அபு⁴ஞ்ஜிம்ஸூதி பணீதம் ப³ஹும் பு⁴ஞ்ஜந்தாபி யாபனமத்தமேவ ஆஹாரம் பு⁴ஞ்ஜிம்ஸு. ததோ ஏவ அகி³த்³தா⁴ கே³த⁴ம் அனாபன்னா. நாதி⁴முச்சி²தா ந அஜ்ஜோ²ஸிதா அக்க²ப்³ப⁴ஞ்ஜனம் விய ஸாகடிகா, வணலேபனம் விய வணினோ அபு⁴ஞ்ஜிம்ஸு.

ஜீவிதானம் பரிக்கா²ரே, பே⁴ஸஜ்ஜே அத² பச்சயேபி ஜீவிதானம் பவத்தியா பரிக்கா²ரபூ⁴தே பே⁴ஸஜ்ஜஸங்கா²தே பச்சயே கி³லானபச்சயே. யதா² தேதி யதா² தே புரிமகா பி⁴க்கூ² ஆஸவக்க²யே உஸ்ஸுகா யுத்தா ஆஸும், ததா² தே ரோகா³பி⁴பூ⁴தாபி கி³லானபச்சயே பா³ள்ஹம் அதிவிய உஸ்ஸுகா நாஹேஸுந்தி அத்தோ².

தப்பராயணாதி விவேகபராயணா விவேகபோணா. ஏவம் சதூஹி கா³தா²ஹி சதுபச்சயஸந்தோஸம் பா⁴வனாபி⁴ரதிஞ்ச த³ஸ்ஸேந்தேன தேஸம் அரியவம்ஸபடிபதா³ த³ஸ்ஸிதா.

நீசாதி ‘‘மயம் பம்ஸுகூலிகா பிண்ட³பாதிகா’’தி அத்துக்கம்ஸனபரவம்ப⁴னானி அகத்வா நீசவுத்தினோ, நிவாதவுத்தினோதி அத்தோ². நிவிட்டா²தி ஸாஸனே நிவிட்ட²ஸத்³தா⁴. ஸுப⁴ராதி அப்பிச்ச²தாதி³பா⁴வேன ஸுபோஸா. முதூ³தி வத்தபடிபத்தியம் ஸகலே ச ப்³ரஹ்மசரியே முதூ³, ஸுபரிகம்மகதஸுவண்ணம் விய வினியோக³க்க²மா. முதூ³தி வா அபா⁴குடிகா உத்தானமுகா² புப்பி²தமுகே²ன படிஸந்தா²ரவுத்தினோ, ஸுதித்த²ம் விய ஸுகா²வஹாதி வுத்தம் ஹோதி. அத²த்³த⁴மானஸாதி அகதி²னசித்தா தேன ஸுப்³ப³சபா⁴வமாஹ. அப்³யாஸேகாதி ஸதிவிப்பவாஸாபா⁴வதோ கிலேஸப்³யாஸேகரஹிதா, அந்தரந்தரா தண்ஹாதி³ட்டி²மானாதீ³ஹி அவோகிண்ணாதி அத்தோ². அமுக²ராதி ந முக²ரா, ந முகே²ன க²ரா வசீபாக³ப்³பி⁴யரஹிதாதி வா அத்தோ². அத்த²சிந்தாவஸானுகா³தி ஹிதசிந்தாவஸானுகா³ஹிதசிந்தாவஸிகா, அத்தனோ பரேஸஞ்ச ஹிதசிந்தமேவ அனுபரிவத்தனகா.

ததோதி தஸ்மா நீசவுத்தாதி³ஹேது. பாஸாதி³கந்தி பஸாத³ஜனிகம் படிபத்திம் பஸ்ஸந்தானம் ஸுணந்தானஞ்ச பஸாதா³வஹம். க³தந்தி அபி⁴க்கந்தபடிக்கந்தபரிவத்தனாதி³க³மனம். க³தந்தி வா காயவாசாபவத்தி. பு⁴த்தந்தி சதுபச்சயபரிபோ⁴கோ³. நிஸேவிதந்தி கோ³சரனிஸேவனம். ஸினித்³தா⁴ தேலதா⁴ராவாதி யதா² அனிவத்திதா குஸலஜனாபி⁴ஸிஞ்சிதா ஸவந்தீ தேலதா⁴ரா அவிச்சி²ன்னா ஸினித்³தா⁴ மட்டா² த³ஸ்ஸனீயா பாஸாதி³கா ஹோதி, ஏவம் தேஸம் ஆகப்பஸம்பன்னானம் இரியாபதோ² அச்சி²த்³தோ³ ஸண்ஹோ மட்டோ² த³ஸ்ஸனீயோ பாஸாதி³கோ அஹோஸி.

மஹாஜா²யீதி மஹந்தேஹி ஜா²னேஹி ஜா²யனஸீலா, மஹந்தம் வா நிப்³பா³னம் ஜா²யந்தீதி மஹாஜா²யீ. ததோ ஏவ மஹாஹிதா, மஹந்தேஹி ஹிதேஹி ஸமன்னாக³தாதி அத்தோ². தே தே²ராதி தே யதா²வுத்தப்பகாரா படிபத்திபராயணா தே²ரா இதா³னி பரினிப்³பு³தாதி அத்தோ². பரித்தா தா³னி தாதி³ஸாதி இதா³னி பச்சி²மே காலே தாதி³ஸா ததா²ரூபா தே²ரா பரித்தா அப்பகா கதிபயா ஏவாதி வுத்தம் ஹோதி.

குஸலானஞ்ச த⁴ம்மானந்தி விவட்டஸ்ஸ உபனிஸ்ஸயபூ⁴தானம் விமோக்க²ஸம்பா⁴ரானம் அனவஜ்ஜத⁴ம்மானம். பஞ்ஞாய சாதி ததா²ரூபாய பஞ்ஞாய ச. பரிக்க²யாதி அபா⁴வதோ அனுப்பத்திதோ. காமஞ்சேத்த² பஞ்ஞாபி ஸியா அனவஜ்ஜத⁴ம்மா, ப³ஹுகாரபா⁴வத³ஸ்ஸனத்த²ம் பனஸ்ஸா விஸும் க³ஹணம் யதா² புஞ்ஞஞாணஸம்பா⁴ராதி. ஸப்³பா³காரவரூபேதந்தி ஆதி³கல்யாணதாதீ³ஹி ஸப்³பே³ஹி ஆகாரவரேஹி பகாரவிஸேஸேஹி உபேதம் யுத்தம் ஜினஸ்ஸ ப⁴க³வதோ ஸாஸனம் லுஜ்ஜதி வினஸ்ஸதீதி அத்தோ².

பாபகானஞ்ச த⁴ம்மானம், கிலேஸானஞ்ச யோ உதூதி காயது³ச்சரிதாதீ³னம் பாபத⁴ம்மானம் லோபா⁴தீ³னஞ்ச கிலேஸானம் யோ உது யோ காலோ, ஸோ அயம் வத்ததீதி வசனஸேஸோ. உபட்டி²தா விவேகாய, யே ச ஸத்³த⁴ம்மஸேஸகாதி யே பன ஏவரூபே காலே காயசித்தஉபதி⁴விவேகத்தா²ய உபட்டி²தா ஆரத்³த⁴வீரியா, தே ச ஸேஸபடிபத்திஸத்³த⁴ம்மகா ஹோந்தி. அயஞ்ஹேத்த² அதி⁴ப்பாயோ – ஸுவிஸுத்³த⁴ஸீலாசாராபி ஸமானா இதா³னி ஏகச்சே பி⁴க்கூ² இரியாபத²ஸண்டா²பனம், ஸமத²விபஸ்ஸனாபா⁴வனாவிதா⁴னம், மஹாபலிபோ³தூ⁴பச்சே²தோ³, கு²த்³த³கபலிபோ³தூ⁴பச்சே²தோ³தி ஏவமாதி³புப்³ப³கிச்சம் ஸம்பாதே³த்வா பா⁴வனமனுயுஞ்ஜந்தி. தே ஸேஸபடிபத்திஸத்³த⁴ம்மகா, படிபத்திம் மத்த²கம் பாபேதும் ந ஸக்கோந்தீதி.

தே கிலேஸா பவட்³ட⁴ந்தாதி யே ப⁴க³வதோ ஓரஸபுத்தேஹி ச ததா³ பரிக்க²யம் பரியாதா³னம் க³மிதா கிலேஸா, தே ஏதரஹி லத்³தோ⁴காஸா பி⁴க்கூ²ஸு வுத்³தி⁴ம் விரூள்ஹிம் வேபுல்லம் ஆபஜ்ஜந்தா. ஆவிஸந்தி ப³ஹும் ஜனந்தி கல்யாணமித்தரஹிதம் அயோனிஸோமனஸிகாரப³ஹுலம் அந்த⁴பா³லஜனம் அபி⁴ப⁴வித்வா அவஸம் கரோந்தா ஆவிஸந்தி ஸந்தானம் அனுபவிஸந்தி. ஏவம்பூ⁴தா ச தே கீளந்தி மஞ்ஞே பா³லேஹி, உம்மத்தேஹிவ ரக்க²ஸா, யதா² நாம கேளிஸீலா ரக்க²ஸா பி⁴ஸக்கரஹிதே உம்மத்தே ஆவிஸித்வா தே அனயப்³யஸனம் ஆபாதே³ந்தா தேஹி கீளந்தி, ஏவம் தே கிலேஸா ஸம்மாஸம்பு³த்³த⁴பி⁴ஸக்கரஹிதே அந்த⁴பா³லே பி⁴க்கூ² ஆவிஸித்வா தேஸம் தி³ட்ட²த⁴ம்மிகாதி³பே⁴த³ம் அனத்த²ம் உப்பாதே³ந்தா தேஹி ஸத்³தி⁴ம் கீளந்தி மஞ்ஞே, கீளந்தா விய ஹோந்தீதி அத்தோ².

தேன தேனாதி தேன தேன ஆரம்மணபா⁴கே³ன. விதா⁴விதாதி விரூபம் தா⁴விதா அஸாருப்பவஸேன படிபஜ்ஜந்தா. கிலேஸவத்தூ²ஸூதி பட²மம் உப்பன்னம் கிலேஸா பச்சா² உப்பஜ்ஜனகானம் காரணபா⁴வதோ கிலேஸாவ கிலேஸவத்தூ²னி, தேஸு கிலேஸவத்தூ²ஸு ஸமூஹிதேஸு. ஸஸங்கா³மேவ கோ⁴ஸிதேதி ஹிரஞ்ஞஸுவண்ணமணிமுத்தாதி³கம் த⁴னம் விப்பகிரித்வா ‘‘யம் யம் ஹிரஞ்ஞஸுவண்ணாதி³ யஸ்ஸ யஸ்ஸ ஹத்த²க³தம், தம் தம் தஸ்ஸ தஸ்ஸேவ ஹோதூ’’தி ஏவம் காமகோ⁴ஸனா ஸஸங்கா³மகோ⁴ஸனா நாம. தத்தா²யமத்தோ² – கிலேஸவத்தூ²ஸு ‘‘யோ யோ கிலேஸோ யம் யம் ஸத்தம் க³ண்ஹாதி அபி⁴ப⁴வதி, ஸோ ஸோ தஸ்ஸ தஸ்ஸ ஹோதூ’’தி கிலேஸஸேனாபதினா மாரேன ஸஸங்கா³மே கோ⁴ஸிதே விய. தேஹி தேஹி கிலேஸேஹி அபி⁴பூ⁴தா தே பா³லபுது²ஜ்ஜனா தேன தேன ஆரம்மணபா⁴கே³ன விதா⁴விதா வோஸிதாதி.

தே ஏவம் விதா⁴விதா கிம் கரோந்தீதி ஆஹ ‘‘பரிச்சஜித்வா ஸத்³த⁴ம்மம், அஞ்ஞமஞ்ஞேஹி ப⁴ண்ட³ரே’’தி. தஸ்ஸத்தோ² – படிபத்திஸத்³த⁴ம்மம் ச²ட்³டே³த்வா ஆமிஸகிஞ்ஜக்க²ஹேது அஞ்ஞமஞ்ஞேஹி ப⁴ண்ட³ரே கலஹம் கரோந்தீதி. தி³ட்டி²க³தானீதி ‘‘விஞ்ஞாணமத்தமேவ அத்தி², நத்தே²வ ரூபத⁴ம்மா’’தி, ‘‘யதா² புக்³க³லோ நாம பரமத்த²தோ நத்தி², ஏவம் ஸபா⁴வத⁴ம்மாபி பரமத்த²தோ நத்தி², வோஹாரமத்தமேவா’’தி ச ஏவமாதீ³னி தி³ட்டி²க³தானி மிச்சா²கா³ஹே அன்வேந்தா அனுக³ச்ச²ந்தா இத³ம் ஸேய்யோ இத³மேவ ஸேட்ட²ம், அஞ்ஞம் மிச்சா²தி மஞ்ஞந்தி.

நிக்³க³தாதி கே³ஹதோ நிக்க²ந்தா. கடச்சு²பி⁴க்க²ஹேதூபீதி கடச்சு²மத்தபி⁴க்கா²னிமித்தம்பி. தம் த³த³ந்தஸ்ஸ க³ஹட்ட²ஸ்ஸ அனனுலோமிகஸம்ஸக்³க³வஸேன அகிச்சானி பப்³ப³ஜிதேன அகத்தப்³பா³னி கம்மானி நிஸேவரே கரோந்தி.

உத³ராவதே³ஹகம் பு⁴த்வாதி ‘‘ஊனூத³ரோ மிதாஹாரோ’’தி (தே²ரகா³. 982; மி. ப. 6.5.10) வுத்தவசனம் அசிந்தேத்வா உத³ரபூரம் பு⁴ஞ்ஜித்வா. ஸயந்துத்தானஸேய்யகாதி ‘‘த³க்கி²ணேன பஸ்ஸேன ஸீஹஸேய்யம் கப்பேதி பாதே³ பாத³ம் அச்சாதா⁴ய ஸதோ ஸம்பஜானோ’’தி (அ. நி. 8.9; விப⁴. 519) வுத்தவிதா⁴னம் அனனுஸ்ஸரித்வா உத்தானஸேய்யகா ஸயந்தி. யா கதா² ஸத்து²க³ரஹிதாதி ராஜகதா²தி³திரச்சா²னகத²ம் ஸந்தா⁴ய வத³தி.

ஸப்³ப³காருகஸிப்பானீதி ஸப்³பே³ஹி வேஸ்ஸாதீ³ஹி காருகேஹி கத்தப்³பா³னி ப⁴த்ததாலவண்டகரணாதீ³னி ஹத்த²ஸிப்பானி. சித்திம் கத்வானாதி ஸக்கச்சம் ஸாத³ரம் கத்வா. அவூபஸந்தா அஜ்ஜ²த்தந்தி கிலேஸவூபஸமாபா⁴வதோ க³த்³து³ஹனமத்தம்பி ஸமாதா⁴னாபா⁴வதோ ச அஜ்ஜ²த்தம் அவூபஸந்தா, அவூபஸந்தசித்தாதி அத்தோ². ஸாமஞ்ஞத்தோ²தி ஸமணத⁴ம்மோ. அதிஅச்ச²தீதி தேஸம் ஆஜீவகிச்சபஸுததாய ஏகதே³ஸம்பி அபு²ஸனதோ விஸும்யேவ நிஸீத³தி, அனல்லீயதீதி வுத்தம் ஹோதி.

மத்திகந்தி பாகதிகம் வா பஞ்சவண்ணம் வா கி³ஹீனம் வினியோக³க்க²மம் மத்திகம். தேலசுண்ணஞ்சாதி பாகதிகம், அபி⁴ஸங்க²தம் வா தேலஞ்ச சுண்ணஞ்ச. உத³காஸனபோ⁴ஜனந்தி உத³கஞ்ச ஆஸனஞ்ச போ⁴ஜனஞ்ச. ஆகங்க²ந்தா ப³ஹுத்தரந்தி ப³ஹும் பிண்ட³பாதாதி³உத்தருத்தரம் ஆகங்க²ந்தா ‘‘அம்ஹேஹி மத்திகாதீ³ஸு தி³ன்னேஸு மனுஸ்ஸா த³ள்ஹப⁴த்திகா ஹுத்வா ப³ஹும் உத்தருத்தரம் சதுபச்சயஜாதம் த³ஸ்ஸந்தீ’’தி அதி⁴ப்பாயேன கி³ஹீனம் உபனாமேந்தீதி அத்தோ².

த³ந்தே புனந்தி ஸோதே⁴ந்தி ஏதேனாதி த³ந்தபோனம், த³ந்தகட்ட²ம். கபித்த²ந்தி கபித்த²ப²லம். புப்ப²ந்தி ஸுமனசம்பகாதி³புப்ப²ம். கா²த³னீயானீதி அட்டா²ரஸவிதே⁴பி க²ஜ்ஜகவிஸேஸே. பிண்ட³பாதே ச ஸம்பன்னேதி வண்ணாதி³ஸம்பயுத்தே ஓத³னவிஸேஸே. ‘‘அம்பே³ ஆமலகானி சா’’தி ச-ஸத்³தே³ன மாதுலுங்க³தாலனாளிகேராதி³ப²லானி அவுத்தானி ஸங்க³ண்ஹாதி. ஸப்³ப³த்த² கி³ஹீனம் உபனாமேந்தி ஆகங்க²ந்தா ப³ஹுத்தரந்தி யோஜனா.

பே⁴ஸஜ்ஜேஸு யதா² வேஜ்ஜாதி கி³ஹீனம் பே⁴ஸஜ்ஜப்பயோகே³ஸு யதா² வேஜ்ஜா, ததா² பி⁴க்கூ² படிபஜ்ஜந்தீதி அதி⁴ப்பாயோ. கிச்சாகிச்சே யதா² கி³ஹீதி க³ஹட்டா²னம் கு²த்³த³கே சேவ மஹந்தே ச கிச்சே கத்தப்³பே³ கி³ஹீ விய. க³ணிகாவ விபூ⁴ஸாயந்தி அத்தனோ ஸரீரஸ்ஸ விபூ⁴ஸனே ரூபூபஜீவினியோ விய. இஸ்ஸரே க²த்தியா யதா²தி இஸ்ஸரே இஸ்ஸரியபவத்தனே யதா² க²த்தியா, ஏவம் குலபதீ ஹுத்வா வத்தந்தீதி அத்தோ².

நேகதிகாதி நிகதியம் நியுத்தா, அமணிம்யேவ மணிம், அஸுவண்ணம்யேவ ஸுவண்ணம் கத்வா படிரூபஸாசியோக³னிரதா. வஞ்சனிகாதி கூடமானாதீ³ஹி விப்பலம்ப³கா. கூடஸக்கீ²தி அயாதா²வஸக்கி²னோ. அபாடுகாதி வாமகா, அஸம்யதவுத்தீதி அத்தோ². ப³ஹூஹி பரிகப்பேஹீதி யதா²வுத்தேஹி அஞ்ஞேஹி ச ப³ஹூஹி மிச்சா²ஜீவப்பகாரேஹி.

லேஸகப்பேதி கப்பியலேஸே கப்பியபடிரூபே. பரியாயேதி, பச்சயேஸு பரியாயஸ்ஸ யோகே³. பரிகப்பேதி வட்³டி⁴ஆதி³விகப்பனே, ஸப்³ப³த்த² விஸயே பு⁴ம்மம். அனுதா⁴விதாதி மஹிச்ச²தாதீ³ஹி பாபத⁴ம்மேஹி அனுதா⁴விதா வோஸிதா. ஜீவிகத்தா² ஜீவிகப்பயோஜனா ஆஜீவஹேதுகா. உபாயேனாதி பரிகதா²தி³னா உபாயேன பச்சயுப்பாத³னனயேன. ஸங்கட்³ட⁴ந்தீதி ஸம்ஹரந்தி.

உபட்டா²பேந்தி பரிஸந்தி பரிஸாய அத்தானம் உபட்ட²பேந்தி, யதா² பரிஸா அத்தானம் உபட்ட²பேந்தி, ஏவம் பரிஸம் ஸங்க³ண்ஹந்தீதி அத்தோ². கம்மதோதி கம்மஹேது. தே ஹி அத்தனோ கத்தப்³ப³வேய்யாவச்சனிமித்தம் உபட்ட²பேந்தி. நோ ச த⁴ம்மதோதி த⁴ம்மனிமித்தம் நோ ச உபட்ட²பேந்தி. யோ ஸத்தா²ரா உல்லும்பனஸபா⁴வஸண்டி²தாய பரிஸாய ஸங்க³ஹோ அனுஞ்ஞாதோ, தேன ந ஸங்க³ண்ஹந்தீதி அத்தோ². லாப⁴தோதி லாப⁴ஹேது, ‘‘அய்யோ ப³ஹுஸ்ஸுதோ, பா⁴ணகோ, ‘த⁴ம்மகதி²கோ’தி ஏவம் ஸம்பா⁴வேந்தோ மஹாஜனோ மய்ஹம் லாப⁴ஸக்காரே உபனயிஸ்ஸதீ’’தி இச்சா²சாரே ட²த்வா லாப⁴னிமித்தம் பரேஸம் த⁴ம்மம் தே³ஸேந்தி. நோ ச அத்த²தோதி யோ ஸோ விமுத்தாயதனஸீஸே ட²த்வா ஸத்³த⁴ம்மம் கதே²ந்தேன பத்தப்³போ³ அத்தோ², ந தம்தி³ட்ட²த⁴ம்மிகாதி³பே⁴த³ஹிதனிமித்தம் த⁴ம்மம் தே³ஸேந்தீதி அத்தோ².

ஸங்க⁴லாப⁴ஸ்ஸ ப⁴ண்ட³ந்தீதி ஸங்க⁴லாப⁴ஹேது ப⁴ண்ட³ந்தி ‘‘மய்ஹம் பாபுணாதி, ந துய்ஹ’’ந்திஆதி³னா கலஹம் கரோந்தி. ஸங்க⁴தோ பரிபா³ஹிராதி, அரியஸங்க⁴தோ ப³ஹிபூ⁴தா அரியஸங்கே⁴ தத³பா⁴வதோ. பரலாபோ⁴பஜீவந்தாதி ஸாஸனே லாப⁴ஸ்ஸ அந்த⁴பா³லபுது²ஜ்ஜனேஹி பரே ஸீலாதி³கு³ணஸம்பன்னே ஸேக்கே² உத்³தி³ஸ்ஸ உப்பன்னத்தா தம் பரலாப⁴ம், பரதோ வா தா³யகதோ லத்³த⁴ப்³ப³லாப⁴ம் உபஜீவந்தா ப⁴ண்ட³னகாரகா பி⁴க்கூ² பாபஜிகு³ச்சா²ய அபா⁴வதோ அஹிரிகா ஸமானா ச ‘‘மயம் பரலாப⁴ம் பு⁴ஞ்ஜாம, பரபடிப³த்³த⁴ஜீவிகா’’திபி ந லஜ்ஜரே ந ஹிரீயந்தி.

நானுயுத்தாதி ஸமணகரணேஹி த⁴ம்மேஹி அனனுயுத்தா. ததா²தி யதா² புப்³பே³ வுத்தா ப³ந்த⁴னகாரகாத³யோ, ததா². ஏகேதி ஏகச்சே. முண்டா³ ஸங்கா⁴டிபாருதாதி கேவலம் முண்டி³தகேஸதாய முண்டா³ பிலோதிகக²ண்டே³ஹி ஸங்க⁴டிதட்டே²ன ‘‘ஸங்கா⁴டீ’’தி லத்³த⁴னாமேன சீவரேன பாருதஸரீரா. ஸம்பா⁴வனம்யேவிச்ச²ந்தி, லாப⁴ஸக்காரமுச்சி²தாதி லாப⁴ஸக்காராஸாய முச்சி²தா அஜ்ஜோ²ஸிதா ஹுத்வா, ‘‘பேஸலோ து⁴தவாதோ³ ப³ஹுஸ்ஸுதோ’’தி வா மது⁴ரவசனமனுயுத்தா ‘‘அரியோ’’தி ச கேவலம் ஸம்பா⁴வனம் ப³ஹுமானம்யேவ இச்ச²ந்தி ஏஸந்தி, ந தன்னிமித்தே கு³ணேதி அத்தோ².

ஏவந்தி ‘‘குஸலானஞ்ச த⁴ம்மானம் பஞ்ஞாய ச பரிக்க²யா’’தி வுத்தனயேன. நானப்பயாதம்ஹீதி நானப்பகாரே பே⁴த³னத⁴ம்மே பயாதே ஸமகதே, நானப்பகாரேன வா ஸம்கிலேஸத⁴ம்மே பயாதும் பவத்திதும் ஆரத்³தே⁴. ந தா³னி ஸுகரம் ததா²தி இதா³னி இமஸ்மிம் து³ல்லப⁴கல்யாணமித்தே து³ல்லப⁴ஸப்பாயஸத்³த⁴ம்மஸ்ஸவனே ச காலே யதா² ஸத்த²ரி த⁴ரந்தே அபு²ஸிதம் அபு²ட்ட²ம், அனதி⁴க³தம் ஜா²னவிபஸ்ஸனம் பு²ஸிதும் அதி⁴க³ந்தும், பு²ஸிதம் வா ஹானபா⁴கி³யம் டி²திபா⁴கி³யமேவ வா அஹுத்வா யதா² விஸேஸபா⁴கி³யம் ஹோதி, ததா² அனுரக்கி²தும் பாலேதும் ஸுகரம், ததா² ந ஸுகரம், ததா² ஸம்பாதே³தும் ந ஸக்காதி அத்தோ².

இதா³னி அத்தனோ பரினிப்³பா³னகாலஸ்ஸ ஆஸன்னத்தா ஸம்கி²த்தேன ஓவாதே³ன ஸப்³ரஹ்மசாரிம் ஓவத³ந்தோ ‘‘யதா² கண்டகட்டா²னம்ஹீ’’திஆதி³மாஹ. தஸ்ஸத்தோ² – யதா² புரிஸோ கேனசிதே³வ பயோஜனேன கண்டகனிசிதே பதே³ஸே அனுபாஹனோ விசரந்தோ ‘‘மா மம் கண்டகோ விஜ்ஜீ²’’தி ஸதிம் உபட்ட²பேத்வாவ விசரதி, ஏவம் கிலேஸகண்டகனிசிதே கோ³சரகா³மே பயோஜனேன சரந்தோ முனி ஸதிம் உபட்ட²பேத்வான ஸதிஸம்பஜஞ்ஞயுத்தோ அப்பமத்தோவ சரேய்ய கம்மட்டா²னம் அவிஜஹந்தோதி வுத்தம் ஹோதி.

ஸரித்வா புப்³ப³கே யோகீ³, தேஸம் வத்தமனுஸ்ஸரந்தி புரிமகே யோகே³ பா⁴வனாய யுத்ததாய யோகீ³ ஆரத்³த⁴விபஸ்ஸகே ஸரித்வா தேஸம் வத்தம் ஆக³மானுஸாரேன ஸம்மாபடிபத்திபா⁴வனாவிதி⁴ம் அனுஸ்ஸரந்தோ து⁴ரனிக்கே²பம் அகத்வா யதா²படிபஜ்ஜந்தோ. கிஞ்சாபி பச்சி²மோ காலோதி யதி³பாயம் அதீதஸத்து²கோ சரிமோ காலோ, ததா²பி யதா²த⁴ம்மமேவ படிபஜ்ஜந்தோ விபஸ்ஸனம் உஸ்ஸுக்காபேந்தோ பு²ஸேய்ய அமதம் பத³ம் நிப்³பா³னம் அதி⁴க³ச்சே²ய்ய.

இத³ம் வத்வாதி, யதா²த³ஸ்ஸிதம் ஸம்கிலேஸவோதா³னேஸு இமம் படிபத்திவிதி⁴ம் கதே²த்வா. அயஞ்ச ஓஸானகா³தா² ஸங்கீ³திகாரேஹி தே²ரஸ்ஸ பரினிப்³பா³னம் பகாஸேதும் வுத்தாதி வேதி³தப்³பா³.

பாராபரியத்தே²ரகா³தா²வண்ணனா நிட்டி²தா.

வீஸதினிபாதவண்ணனா நிட்டி²தா.