9. (பட²ம) தே³வஸப⁴த்தே²ரகா³தா²வண்ணனா

உத்திண்ணா பங்கபலிபாதி ஆயஸ்மதோ தே³வஸப⁴த்தே²ரஸ்ஸ கா³தா². கா உப்பத்தி? ஸோபி புரிமபு³த்³தே⁴ஸு கதாதி⁴காரோ தத்த² தத்த² ப⁴வே விவட்டூபனிஸ்ஸயம் புஞ்ஞம் உபசினந்தோ ஸிகி²ஸ்ஸ ப⁴க³வதோ காலே பாராவதயோனியம் நிப்³ப³த்தோ ஏகதி³வஸம் ஸத்தா²ரம் தி³ஸ்வா பஸன்னமானஸோ பியாலப²லம் உபனேஸி. ஸத்தா² தஸ்ஸ பஸாத³ஸம்வட்³ட⁴னத்த²ம் தம் பரிபு⁴ஞ்ஜி. ஸோ தேன அதிவிய பஸன்னசித்தோ ஹுத்வா காலேன காலம் உபஸங்கமித்வா வந்தி³த்வா சித்தம் பஸாதே³தி. ஸோ தேன புஞ்ஞகம்மேன தே³வலோகே நிப்³ப³த்தோ அபராபரம் புஞ்ஞானி கத்வா தே³வமனுஸ்ஸேஸு ஸம்ஸரந்தோ இமஸ்மிம் பு³த்³து⁴ப்பாதே³ அஞ்ஞதரஸ்ஸ மண்ட³லிகரஞ்ஞோ புத்தோ ஹுத்வா நிப்³ப³த்தோ தருணகாலேயேவ ரஜ்ஜே பதிட்டி²தோ ரஜ்ஜஸுக²மனுப⁴வந்தோ வுத்³தோ⁴ ஸத்தா²ரம் உபஸங்கமி, தஸ்ஸ ஸத்தா² த⁴ம்மம் தே³ஸேஸி. ஸோ த⁴ம்மம் ஸுத்வா படிலத்³த⁴ஸத்³தோ⁴ ஸம்வேக³ஜாதோ ரஜ்ஜம் பஹாய பப்³ப³ஜித்வா விபஸ்ஸனாய கம்மம் கரோந்தோ நசிரஸ்ஸேவ அரஹத்தம் பாபுணி. தேன வுத்தம் அபதா³னே (அப. தே²ர 1.14.66-72) –

‘‘பாராவதோ ததா³ ஆஸிம், பரம் அனுபரோத⁴கோ;

பப்³பா⁴ரே ஸேய்யம் கப்பேமி, அவிதூ³ரே ஸிகி²ஸத்து²னோ.

‘‘ஸாயம் பாதஞ்ச பஸ்ஸாமி, பு³த்³த⁴ம் லோகக்³க³னாயகம்;

தே³ய்யத⁴ம்மோ ச மே நத்தி², த்³விபதி³ந்த³ஸ்ஸ தாதி³னோ.

‘‘பியாலப²லமாதா³ய, அக³மம் பு³த்³த⁴ஸந்திகம்;

படிக்³க³ஹேஸி ப⁴க³வா, லோகஜேட்டோ² நராஸபோ⁴.

‘‘ததோ பரம் உபாதா³ய, பரிசாரிம் வினாயகம்;

தேன சித்தப்பஸாதே³ன, தத்த² காலங்கதோ அஹம்.

‘‘ஏகத்திம்ஸே இதோ கப்பே, யம் ப²லம் அத³தி³ம் அஹம்;

து³க்³க³திம் நாபி⁴ஜானாமி, ப²லதா³னஸ்ஸித³ம் ப²லம்.

‘‘இதோ பன்னரஸே கப்பே, தயோ ஆஸும் பியாலினோ;

ஸத்தரதனஸம்பன்னா, சக்கவத்தீ மஹப்³ப³லா.

‘‘கிலேஸா ஜா²பிதா மய்ஹம்…பே… கதம் பு³த்³த⁴ஸ்ஸ ஸாஸன’’ந்தி.

அரஹத்தம் பன பத்வா பஹீனகிலேஸபச்சவேக்க²ணவஸேன உப்பன்னஸோமனஸ்ஸோ உதா³னம் உதா³னேந்தோ –

89. ‘‘உத்திண்ணா பங்கபலிபா, பாதாலா பரிவஜ்ஜிதா;

முத்தோ ஓகா⁴ ச க³ந்தா² ச, ஸப்³பே³ மானா விஸம்ஹதா’’தி. – கா³த²ம் அபா⁴ஸி;

தத்த² உத்திண்ணாதி உத்தரிதா அதிக்கந்தா. பங்கபலிபாதி பங்கா ச பலிபா ச. பங்கோ வுச்சதி பகதிகத்³த³மோ. ‘‘பலிபோ’’தி க³ம்பீ⁴ரபுது²லோ மஹாகத்³த³மோ. இத⁴ பன பங்கோ வியாதி பங்கோ, காமராகோ³ அஸுசிபா⁴வாபாத³னேன சித்தஸ்ஸ மக்க²னதோ. பலிபோ வியாதி பலிபோ, புத்ததா³ராதி³விஸயோ ப³ஹலோ ச²ந்த³ராகோ³ வுத்தனயேன ஸம்மக்க²னதோ து³ருத்தரணதோ ச. தே மயா அனாகா³மிமக்³கே³ன ஸப்³ப³ஸோ அதிக்கந்தாதி ஆஹ ‘‘உத்திண்ணா பங்கபலிபா’’தி. பாதாலாதி பாதாயாலந்தி பாதாலா, மஹாஸமுத்³தே³ நின்னதரபதே³ஸா. கேசி பன நாக³ப⁴வனம் ‘‘பாதால’’ந்தி வத³ந்தி. இத⁴ பன அகா³ஹது³ரவக்³கா³ஹது³ருத்தரணட்டே²ன பாதாலா வியாதி பாதாலா, தி³ட்டி²யோ. தே ச மயா பட²மமக்³கா³தி⁴க³மேனேவ ஸப்³ப³தா² வஜ்ஜிதா ஸமுச்சி²ன்னாதி ஆஹ ‘‘பாதாலா பரிவஜ்ஜிதா’’தி முத்தோ ஓகா⁴ ச க³ந்தா² சாதி காமோகா⁴தி³ஓக⁴தோ அபி⁴ஜ்ஜா²காயக³ந்தா²தி³க³ந்த²தோ ச தேன தேன மக்³கே³ன முத்தோ பரிமுத்தோ, புன அனபி⁴கிரணஅக³ந்த²னவஸேன அதிக்கந்தோதி அத்தோ². ஸப்³பே³ மானா விஸம்ஹதாதி நவவிதா⁴பி மானா அக்³க³மக்³கா³தி⁴க³மேன விஸேஸதோ ஸங்கா⁴தம் வினாஸம் ஆபாதி³தா ஸமுச்சி²ன்னா ‘‘மானவிதா⁴ ஹதா’’தி கேசி பட²ந்தி, மானகோட்டா²ஸாதி அத்தோ². ‘‘மானவிஸா’’தி அபரே, தேஸம் பன மானவிஸஸ்ஸ து³க்க²ஸ்ஸ ப²லதோ மானவிஸாதி அத்தோ² த³ட்ட²ப்³போ³.

(பட²ம) தே³வஸப⁴த்தே²ரகா³தா²வண்ணனா நிட்டி²தா.