7. ஹத்தா²ரோஹபுத்தத்தே²ரகா³தா²வண்ணனா

இத³ம் புரே சித்தமசாரி சாரிகந்தி ஆயஸ்மதோ ஹத்தா²ரோஹபுத்தத்தே²ரஸ்ஸ கா³தா². கா உப்பத்தி? ஸோ கிர புரிமபு³த்³தே⁴ஸு கதாதி⁴காரோ தத்த² தத்த² ப⁴வே விவட்டூபனிஸ்ஸயம் புஞ்ஞம் உபசினந்தோ விபஸ்ஸிஸ்ஸ ப⁴க³வதோ காலே குலகே³ஹே நிப்³ப³த்தித்வா விஞ்ஞுதம் பத்தோ ஏகதி³வஸம் ஸத்தா²ரம் பி⁴க்கு²ஸங்க⁴பரிவுதம் விஹாரதோ நிக்க²ந்தம் தி³ஸ்வா பஸன்னசித்தோ புப்பே²ஹி பூஜம் கத்வா பஞ்சபதிட்டி²தேன வந்தி³த்வா பத³க்கி²ணம் கத்வா பக்காமி. ஸோ தேன புஞ்ஞகம்மேன தே³வமனுஸ்ஸேஸு ஸம்ஸரந்தோ இமஸ்மிம் பு³த்³து⁴ப்பாதே³ ஸாவத்தி²யம் ஹத்தா²ரோஹகுலே நிப்³ப³த்தித்வா விஞ்ஞுதம் பத்தோ ஹத்தி²ஸிப்பே நிப்ப²த்திம் அக³மாஸி. ஸோ ஏகதி³வஸம் ஹத்தி²ம் ஸிக்கா²பேந்தோ நதீ³தீரம் க³ந்த்வா ஹேதுஸம்பத்தியா சோதி³யமானோ ‘‘கிம் மய்ஹம் இமினா ஹத்தி²த³மனேன, அத்தானம் த³மனமேவ வர’’ந்தி சிந்தேத்வா ப⁴க³வந்தம் உபஸங்கமித்வா த⁴ம்மம் ஸுத்வா படிலத்³த⁴ஸத்³தோ⁴ பப்³ப³ஜித்வாவ சரியானுகூலம் கம்மட்டா²னம் க³ஹேத்வா விபஸ்ஸனாய கம்மம் கரோந்தோ சிரபரிசயேன கம்மட்டா²னதோ ப³ஹித்³தா⁴ விதா⁴வந்தம் சித்தம் சே²கோ ஹத்தா²சரியோ விய அங்குஸேன சண்ட³மத்தவரவாரணம் படிஸங்கா²னஅங்குஸேன நிக்³க³ண்ஹந்தோ ‘‘இத³ம் புரே சித்தமசாரி சாரிக’’ந்தி கா³த²ம் அபா⁴ஸி.

77. தத்த² இத³ந்தி வுச்சமானஸ்ஸ சித்தஸ்ஸ அத்தபச்சக்க²தாய வுத்தம். புரேதி நிக்³க³ஹகாலதோ புப்³பே³. அசாரீதி விசரி, அனவட்டி²ததாய நானாரம்மணேஸு பரிப்³ப⁴மி. சாரிகந்தி யதா²காமசரியம். தேனாஹ ‘‘யேனிச்ச²கம் யத்த²காமம் யதா²ஸுக²’’ந்தி. தந்தி தம் சித்தம். அஜ்ஜாதி ஏதரஹி. நிக்³க³ஹேஸ்ஸாமீதி நிக்³க³ண்ஹிஸ்ஸாமி, நிப்³பி³ஸேவனம் கரிஸ்ஸாமி. யோனிஸோதி உபாயேன. யதா² கிம்? ஹத்தி²ப்பபி⁴ன்னம் விய அங்குஸக்³க³ஹோ. இத³ம் வுத்தம் ஹோதி – இத³ம் மம சித்தம் நாம இதோ புப்³பே³ ரூபாதீ³ஸு ஆரம்மணேஸு யேன யேன ரமிதும் இச்ச²தி, தஸ்ஸ தஸ்ஸ வஸேன யேனிச்ச²கம், யத்த² யத்த² சஸ்ஸ காமோ, தஸ்ஸ தஸ்ஸ வஸேன யத்த²காமம், யதா² யதா² விசரந்தஸ்ஸ ஸுக²ம் ஹோதி, ததே²வ சரணதோ யதா²ஸுக²ம் தீ³க⁴ரத்தம் சாரிகம் அசரி, தம் அஜ்ஜபாஹம் பி⁴ன்னமத³மத்தஹத்தி²ம் ஹத்தா²சரியஸங்கா²தோ சே²கோ அங்குஸக்³க³ஹோ அங்குஸேன விய யோனிஸோமனஸிகாரேன நிக்³க³ஹேஸ்ஸாமி, நாஸ்ஸ வீதிக்கமிதும் த³ஸ்ஸாமீதி. ஏவம் வத³ந்தோ ஏவ ச தே²ரோ விபஸ்ஸனம் வட்³டே⁴த்வா அரஹத்தம் ஸச்சா²காஸி. தேன வுத்தம் அபதா³னே (அப. தே²ர 1.13.91-96) –

‘‘ஸுவண்ணவண்ணோ ஸம்பு³த்³தோ⁴, விபஸ்ஸீ த³க்கி²ணாரஹோ;

புரக்க²தோ ஸாவகேஹி, ஆராமா அபி⁴னிக்க²மி.

‘‘தி³ஸ்வானஹம் பு³த்³த⁴ஸேட்ட²ம், ஸப்³ப³ஞ்ஞும் தமனாஸகம்;

பஸன்னசித்தோ ஸுமனோ, க³ண்டி²புப்ப²ம் அபூஜயிம்.

‘‘தேன சித்தப்பஸாதே³ன, த்³விபதி³ந்த³ஸ்ஸ தாதி³னோ;

ஹட்டோ² ஹட்டே²ன சித்தேன, புன வந்தி³ம் ததா²க³தம்.

‘‘ஏகனவுதிதோ கப்பே, யம் புப்ப²மபி⁴ரோபயிம்;

து³க்³க³திம் நாபி⁴ஜானாமி, பு³த்³த⁴பூஜாயித³ம் ப²லம்.

‘‘ஏகதாலீஸிதோ கப்பே, சரணோ நாம க²த்தியோ;

ஸத்தரதனஸம்பன்னோ, சக்கவத்தீ மஹப்³ப³லோ.

‘‘கிலேஸா ஜா²பிதா மய்ஹம்…பே… கதம் பு³த்³த⁴ஸ்ஸ ஸாஸன’’ந்தி.

அயமேவ ச தே²ரஸ்ஸ அஞ்ஞாப்³யாகரணகா³தா² அஹோஸீதி.

ஹத்தா²ரோஹபுத்தத்தே²ரகா³தா²வண்ணனா நிட்டி²தா.