8. அட்ட²மவக்³கோ³

1. வச்ச²பாலத்தே²ரகா³தா²வண்ணனா

ஸுஸுகு²மனிபுணத்த²த³ஸ்ஸினாதி ஆயஸ்மதோ வச்ச²பாலத்தே²ரஸ்ஸ கா³தா². கா உப்பத்தி? அயம்பி புரிமபு³த்³தே⁴ஸு கதாதி⁴காரோ தத்த² தத்த² ப⁴வே புஞ்ஞானி ஆசினந்தோ தே³வமனுஸ்ஸேஸு ஸம்ஸரந்தோ இதோ ஏகனவுதே கப்பே ப்³ராஹ்மணகுலே நிப்³ப³த்தித்வா ப்³ராஹ்மணஸிப்பேஸு நிப்ப²த்திம் க³ந்த்வா அக்³கி³ம் பரிசரந்தோ ஏகதி³வஸம் மஹதியா கம்ஸபாதியா பாயாஸம் ஆதா³ய த³க்கி²ணேய்யம் பரியேஸந்தோ விபஸ்ஸிம் ப⁴க³வந்தம் ஆகாஸே சங்கமந்தம் தி³ஸ்வா அச்ச²ரியப்³பு⁴தசித்தஜாதோ ப⁴க³வந்தம் அபி⁴வாதே³த்வா தா³துகாமதம் த³ஸ்ஸேஸி. படிக்³க³ஹேஸி ப⁴க³வா அனுகம்பம் உபாதா³ய. ஸோ தேன புஞ்ஞகம்மேன தே³வமனுஸ்ஸேஸு ஸம்ஸரந்தோ இமஸ்மிம் பு³த்³து⁴ப்பாதே³ ராஜக³ஹே விப⁴வஸம்பன்னஸ்ஸ ப்³ராஹ்மணஸ்ஸ புத்தோ ஹுத்வா நிப்³ப³த்தி, வச்ச²பாலோதிஸ்ஸ நாமம் அஹோஸி. ஸோ பி³ம்பி³ஸாரஸமாக³மே உருவேலகஸ்ஸபத்தே²ரேன இத்³தி⁴பாடிஹாரியம் த³ஸ்ஸேத்வா ஸத்து² பரமனிபச்சகாரே கதே தம் தி³ஸ்வா படிலத்³த⁴ஸத்³தோ⁴ பப்³ப³ஜித்வா ஸத்தாஹபப்³ப³ஜிதோ ஏவ விபஸ்ஸனம் வட்³டே⁴த்வா ச²ளபி⁴ஞ்ஞோ அஹோஸி. தேன வுத்தம் அபதா³னே (அப. தே²ர 1.13.26-34) –

‘‘ஸுவண்ணவண்ணோ ஸம்பு³த்³தோ⁴, பா³த்திம்ஸவரலக்க²ணோ;

பவனா அபி⁴னிக்க²ந்தோ, பி⁴க்கு²ஸங்க⁴புரக்க²தோ.

‘‘மஹச்சா கம்ஸபாதியா, வட்³டே⁴த்வா பாயஸம் அஹம்;

ஆஹுதிம் யிட்டு²காமோ ஸோ, உபனேஸிம் ப³லிம் அஹம்.

‘‘ப⁴க³வா தம்ஹி ஸமயே, லோகஜேட்டோ² நராஸபோ⁴;

சங்கமம் ஸுஸமாரூள்ஹோ, அம்ப³ரே அனிலாயனே.

‘‘தஞ்ச அச்ச²ரியம் தி³ஸ்வா, அப்³பு⁴தம் லோமஹம்ஸனம்;

ட²பயித்வா கம்ஸபாதிம், விபஸ்ஸிம் அபி⁴வாத³யிம்.

‘‘துவம் தே³வோஸி ஸப்³ப³ஞ்ஞூ, ஸதே³வே ஸஹமானுஸே;

அனுகம்பம் உபாதா³ய, படிக்³க³ண்ஹ மஹாமுனி.

‘‘படிக்³க³ஹேஸி ப⁴க³வா, ஸப்³ப³ஞ்ஞூ லோகனாயகோ;

மம ஸங்கப்பமஞ்ஞாய, ஸத்தா² லோகே மஹாமுனி.

‘‘ஏகனவுதிதோ கப்பே, யம் தா³னமத³தி³ம் ததா³;

து³க்³க³திம் நாபி⁴ஜானாமி, பாயாஸஸ்ஸ இத³ம் ப²லம்.

‘‘ஏகதாலீஸிதோ கப்பே, பு³த்³தோ⁴ நாமாஸி க²த்தியோ;

ஸத்தரதனஸம்பன்னோ, சக்கவத்தீ மஹப்³ப³லோ.

‘‘கிலேஸா ஜா²பிதா மய்ஹம்…பே… கதம் பு³த்³த⁴ஸ்ஸ ஸாஸன’’ந்தி.

அரஹத்தம் பன பத்வா ஸுகே²னேவ அத்தனா நிப்³பா³னஸ்ஸ அதி⁴க³தபா⁴வம் விபா⁴வேந்தோ –

71. ‘‘ஸுஸுகு²மனிபுணத்த²த³ஸ்ஸினா, மதிகுஸலேன நிவாதவுத்தினா;

ஸம்ஸேவிதவுத்³த⁴ஸீலினா, நிப்³பா³னம் ந ஹி தேன து³ல்லப⁴’’ந்தி. –

இமம் கா³த²ம் அபா⁴ஸி.

தத்த² ஸுஸுகு²மனிபுணத்த²த³ஸ்ஸினாதி அதிவிய து³த்³த³ஸட்டே²ன ஸுகு²மே, ஸண்ஹட்டே²ன நிபுணே ஸச்சபடிச்சஸமுப்பாதா³தி³அத்தே² அனிச்சதாதி³ம் ஓரோபேத்வா பஸ்ஸதீதி ஸுஸுகு²மனிபுணத்த²த³ஸ்ஸீ, தேன. மதிகுஸலேனாதி மதியா பஞ்ஞாய குஸலேன சே²கேன, ‘‘ஏவம் பவத்தமானஸ்ஸ பஞ்ஞா வட்³ட⁴தி, ஏவம் ந வட்³ட⁴தீ’’தி த⁴ம்மவிசயஸம்போ³ஜ்ஜ²ங்க³பஞ்ஞாய உப்பாத³னே குஸலேன. நிவாதவுத்தினாதி ஸப்³ரஹ்மசாரீஸு நிவாதனீசவத்தனஸீலேன, வுட்³டே⁴ஸு நவேஸு ச யதா²னுரூபபடிபத்தினா. ஸம்ஸேவிதவுத்³த⁴ஸீலினாதி ஸம்ஸேவிதம் ஆசிண்ணம் வுத்³த⁴ஸீலம் ஸம்ஸேவிதவுத்³த⁴ஸீலம், தம் யஸ்ஸ அத்தி², தேன ஸம்ஸேவிதவுத்³த⁴ஸீலினா. அத² வா ஸம்ஸேவிதா உபாஸிதா வுத்³த⁴ஸீலினோ ஏதேனாதி ஸம்ஸேவிதவுத்³த⁴ஸீலீ, தேன. ஹீதிஸத்³தோ³ ஹேதுஅத்தோ². யஸ்மா யோ நிவாதவுத்தி ஸம்ஸேவிதவுத்³த⁴ஸீலீ மதிகுஸலோ ஸுஸுகு²மனிபுணத்த²த³ஸ்ஸீ ச, தஸ்மா நிப்³பா³னம் ந தஸ்ஸ து³ல்லப⁴ந்தி அத்தோ². நிவாதவுத்திதாய ஹி ஸம்ஸேவிதவுத்³த⁴ஸீலிதாய ச பண்டி³தா தம் ஓவதி³தப்³ப³ம் அனுஸாஸிதப்³ப³ம் மஞ்ஞந்தி, தேஸஞ்ச ஓவாதே³ டி²தோ ஸயம் மதிகுஸலதாய ஸுஸுகு²மனிபுணத்த²த³ஸ்ஸிதாய ச விபஸ்ஸனாய கம்மம் கரோந்தோ நசிரஸ்ஸேவ நிப்³பா³னம் அதி⁴க³ச்ச²தீதி, அயமேவ ச தே²ரஸ்ஸ அஞ்ஞாப்³யாகரணகா³தா² அஹோஸீதி.

வச்ச²பாலத்தே²ரகா³தா²வண்ணனா நிட்டி²தா.

2. ஆதுமத்தே²ரகா³தா²வண்ணனா

யதா² களீரோ ஸுஸு வட்³டி⁴தக்³கோ³தி ஆயஸ்மதோ ஆதுமத்தே²ரஸ்ஸ கா³தா². கா உப்பத்தி? ஸோபி புரிமபு³த்³தே⁴ஸு கதாதி⁴காரோ தத்த² தத்த² ப⁴வே விவட்டூபனிஸ்ஸயம் புஞ்ஞம் ஆசினந்தோ இதோ ஏகனவுதே கப்பே குலகே³ஹே நிப்³ப³த்தித்வா விஞ்ஞுதம் பத்தோ விபஸ்ஸிம் ப⁴க³வந்தம் அந்தரவீதி²யம் க³ச்ச²ந்தம் தி³ஸ்வா பஸன்னமானஸோ க³ந்தோ⁴த³கேன க³ந்த⁴சுண்ணேன ச பூஜம் அகாஸி. ஸோ தேன புஞ்ஞகம்மேன தே³வலோகே நிப்³ப³த்தோ அபராபரம் ஸுக³தீஸுயேவ ஸம்ஸரந்தோ கஸ்ஸபஸ்ஸ ப⁴க³வதோ ஸாஸனே பப்³ப³ஜித்வா ஸமணத⁴ம்மம் அகாஸி, ஞாணஸ்ஸ பன அபரிபக்கத்தா விஸேஸம் நிப்³ப³த்தேதும் நாஸக்கி². அத² இமஸ்மிம் பு³த்³து⁴ப்பாதே³ ஸாவத்தி²யம் ஸேட்டி²புத்தோ ஹுத்வா நிப்³ப³த்தி, ஆதுமோதிஸ்ஸ நாமம் அஹோஸி. தஸ்ஸ வயப்பத்தஸ்ஸ மாதா ‘‘புத்தஸ்ஸ மே ப⁴ரியம் ஆனேஸ்ஸாமா’’தி ஞாதகேஹி ஸம்மந்தேஸி. ஸோ தம் உபதா⁴ரேத்வா ஹேதுஸம்பத்தியா சோதி³யமானோ ‘‘கிம் மய்ஹம் க⁴ராவாஸேன, இதா³னேவ பப்³ப³ஜிஸ்ஸாமீ’’தி பி⁴க்கூ²னம் ஸந்திகம் க³ந்த்வா பப்³ப³ஜி. பப்³ப³ஜிதம்பி நம் மாதா உப்பப்³பா³ஜேதுகாமா நானானயேஹி பலோபே⁴தி. ஸோ தஸ்ஸா அவஸரம் அத³த்வா அத்தனோ அஜ்ஜா²ஸயம் பகாஸேந்தோ –

72. ‘‘யதா² களீரோ ஸுஸு வட்³டி⁴தக்³கோ³, து³ன்னிக்க²மோ ஹோதி பஸாக²ஜாதோ;

ஏவம் அஹம் ப⁴ரியாயானீதாய, அனுமஞ்ஞ மம் பப்³ப³ஜிதோம்ஹி தா³னீ’’தி. –

கா³த²ம் அபா⁴ஸி.

தத்த² களீரோதி அங்குரோ, இத⁴ பன வம்ஸங்குரோ அதி⁴ப்பேதோ. ஸுஸூதி தருணோ. வட்³டி⁴தக்³கோ³தி பவட்³டி⁴தஸாகோ². ஸுஸுவட்³டி⁴தக்³கோ³தி வா ஸுட்டு² வட்³டி⁴தஸாகோ² ஸஞ்ஜாதபத்தஸாகோ². து³ன்னிக்க²மோதி வேளுகு³ம்ப³தோ நிக்கா²மேதும் நீஹரிதும் அஸக்குணேய்யோ. பஸாக²ஜாதோதி ஜாதபஸாகோ², ஸாகா²னம்பி பப்³பே³ பப்³பே³ உப்பன்னஅனுஸாகோ². ஏவம் அஹம் ப⁴ரியாயானீதாயாதி யதா² வம்ஸோ வட்³டி⁴தக்³கோ³ வம்ஸந்தரேஸு ஸம்ஸட்ட² ஸாகா²பஸாகோ² வேளுகு³ம்ப³தோ து³ன்னீஹரணீயோ ஹோதி, ஏவம் அஹம்பி ப⁴ரியாய மய்ஹம் ஆனீதாய புத்ததீ⁴தாதி³வஸேன வட்³டி⁴தக்³கோ³ ஆஸத்திவஸேன க⁴ராவாஸதோ து³ன்னீஹரணீயோ ப⁴வேய்யம். யதா² பன வம்ஸகளீரோ அஸஞ்ஜாதஸாக²ப³ந்தோ⁴ வேளுகு³ம்ப³தோ ஸுனீஹரணீயோவ ஹோதி, ஏவம் அஹம்பி அஸஞ்ஜாதபுத்ததா³ராதி³ப³ந்தோ⁴ ஸுனீஹரணீயோ ஹோமி, தஸ்மா அனானீதாய ஏவ ப⁴ரியாய அனுமஞ்ஞ மம் அத்தனாவ மம் அனுஜானாபேத்வா. பப்³ப³ஜிதோம்ஹி தா³னீதி, ‘‘இதா³னி பன பப்³ப³ஜிதோ அம்ஹி, ஸாது⁴ ஸுட்டூ²’’தி அத்தனோ நேக்க²ம்மாபி⁴ரதிம் பகாஸேஸி, அத² வா ‘‘அனுமஞ்ஞ மம் பப்³ப³ஜிதோம்ஹி தா³னீ’’தி மாது கதே²தி. அயஞ்ஹேத்த² அத்தோ² – யதி³பி தாய புப்³பே³ நானுமதம், இதா³னி பன பப்³ப³ஜிதோ அம்ஹி, தஸ்மா அனுமஞ்ஞ அனுஜானாஹி மம் ஸமணபா⁴வேயேவ டா²தும், நாஹம் தயா நிவத்தனீயோதி. ஏவம் பன கதே²ந்தோ யதா²டி²தோவ விபஸ்ஸனம் வட்³டே⁴த்வா மக்³க³படிபாடியா கிலேஸே கே²பேத்வா ச²ளபி⁴ஞ்ஞோ அஹோஸி. தேன வுத்தம் அபதா³னே (அப. தே²ர 1.13.35-40) –

‘‘நிஸஜ்ஜ பாஸாத³வரே, விபஸ்ஸிம் அத்³த³ஸம் ஜினம்;

ககுத⁴ம் விலஸந்தம்வ, ஸப்³ப³ஞ்ஞும் தமனாஸகம்.

‘‘பாஸாத³ஸ்ஸாவிதூ³ரே ச, க³ச்ச²தி லோகனாயகோ;

பபா⁴ நித்³தா⁴வதே தஸ்ஸ, யதா² ச ஸதரம்ஸினோ.

‘‘க³ந்தோ⁴த³கஞ்ச பக்³க³ய்ஹ, பு³த்³த⁴ஸேட்ட²ம் ஸமோகிரிம்;

தேன சித்தப்பஸாதே³ன, தத்த² காலங்கதோ அஹம்.

‘‘ஏகனவுதிதோ கப்பே, யம் க³ந்தோ⁴த³கமாகிரிம்;

து³க்³க³திம் நாபி⁴ஜானாமி, பு³த்³த⁴பூஜாயித³ம் ப²லம்.

‘‘ஏகதிம்ஸே இதோ கப்பே, ஸுக³ந்தோ⁴ நாம க²த்தியோ;

ஸத்தரதனஸம்பன்னோ, சக்கவத்தீ மஹப்³ப³லோ.

‘‘கிலேஸா ஜா²பிதா மய்ஹம்…பே… கதம் பு³த்³த⁴ஸ்ஸ ஸாஸன’’ந்தி.

ச²ளபி⁴ஞ்ஞோ பன ஹுத்வா மாதரம் ஆபுச்சி²த்வா தஸ்ஸா பேக்க²ந்தியாயேவ ஆகாஸேன பக்காமி. ஸோ அரஹத்தப்பத்தியா உத்தரிகாலம்பி அந்தரந்தரா தமேவ கா³த²ம் பச்சுதா³ஹாஸி.

தத்த² ‘‘பப்³ப³ஜிதோம்ஹீ’’தி இமினாபதே³ஸேன அயம்பி தே²ரஸ்ஸ அஞ்ஞாப்³யாகரணகா³தா² அஹோஸி அத்தனோ ஸந்தானே ராகா³தி³மலஸ்ஸ பப்³பா³ஜிதபா⁴வதீ³பனதோ. தேனாஹ ப⁴க³வா – ‘‘பப்³பா³ஜயமத்தனோ மலம், தஸ்மா ‘பப்³ப³ஜிதோ’தி வுச்சதீ’’தி (த⁴. ப. 388).

ஆதுமத்தே²ரகா³தா²வண்ணனா நிட்டி²தா.

3. மாணவத்தே²ரகா³தா²வண்ணனா

ஜிண்ணஞ்ச தி³ஸ்வா து³கி²தஞ்ச ப்³யாதி⁴தந்தி ஆயஸ்மதோ மாணவத்தே²ரஸ்ஸ கா³தா². கா உப்பத்தி? அயம்பி புரிமபு³த்³தே⁴ஸு கதாதி⁴காரோ தத்த² தத்த² ப⁴வே விவட்டூபனிஸ்ஸயம் குஸலம் உபசினந்தோ இதோ ஏகனவுதே கப்பே ப்³ராஹ்மணகுலே நிப்³ப³த்தித்வா லக்க²ணத⁴ரோ ஹுத்வா விபஸ்ஸிஸ்ஸ ப⁴க³வதோ அபி⁴ஜாதியா லக்க²ணானி பரிக்³க³ஹேத்வா புப்³ப³னிமித்தானி ஸாவேத்வா, ‘‘ஏகம்ஸேன அயம் பு³த்³தோ⁴ ப⁴விஸ்ஸதீ’’தி ப்³யாகரித்வா நானானயேஹி தோ²மேத்வா அபி⁴வாதே³த்வா பத³க்கி²ணம் கத்வா பக்காமி. ஸோ தேன புஞ்ஞகம்மேன ஸுக³தீஸுயேவ ஸம்ஸரந்தோ இமஸ்மிம் பு³த்³து⁴ப்பாதே³ ஸாவத்தி²யம் ப்³ராஹ்மணமஹாஸாலஸ்ஸ கே³ஹே நிப்³ப³த்தித்வா யாவ ஸத்தவஸ்ஸானி, தாவ அந்தோக⁴ரேயேவ வட்³டி⁴த்வா ஸத்தமே ஸம்வச்ச²ரே உபனயனத்த²ம் உய்யானம் நீதோ அந்தராமக்³கே³ ஜிண்ணாதுரமதே தி³ஸ்வா தேஸம் அதி³ட்ட²புப்³ப³த்தா தே பரிஜனே புச்சி²த்வா ஜராரோக³மரணஸபா⁴வம் ஸுத்வா ஸஞ்ஜாதஸம்வேகோ³ ததோ அனிவத்தந்தோ விஹாரம் க³ந்த்வா ஸத்து² ஸந்திகே த⁴ம்மம் ஸுத்வா மாதாபிதரோ அனுஜானாபேத்வா பப்³ப³ஜித்வா விபஸ்ஸனம் பட்ட²பேத்வா நசிரஸ்ஸேவ அரஹத்தம் பாபுணி. தேன வுத்தம் அபதா³னே (அப. தே²ர 1.13.41-64) –

‘‘ஜாயமானே விபஸ்ஸிம்ஹி, நிமித்தம் ப்³யாகரிம் அஹம்;

நிப்³பா³பயிஞ்ச ஜனதம், பு³த்³தோ⁴ லோகே ப⁴விஸ்ஸதி.

‘‘யஸ்மிஞ்ச ஜாயமானஸ்மிம், த³ஸஸஹஸ்ஸி கம்பதி;

ஸோ தா³னி ப⁴க³வா ஸத்தா², த⁴ம்மம் தே³ஸேதி சக்கு²மா.

‘‘யஸ்மிஞ்ச ஜாயமானஸ்மிம், ஆலோகோ விபுலோ அஹு;

ஸோ தா³னி ப⁴க³வா ஸத்தா², த⁴ம்மம் தே³ஸேதி சக்கு²மா.

‘‘யஸ்மிஞ்ச ஜாயமானஸ்மிம், ஸரிதாயோ ந ஸந்த³யும்;

ஸோ தா³னி ப⁴க³வா ஸத்தா², த⁴ம்மம் தே³ஸேதி சக்கு²மா.

‘‘யஸ்மிஞ்ச ஜாயமானஸ்மிம், அவீசக்³கி³ ந பஜ்ஜலி;

ஸோ தா³னி ப⁴க³வா ஸத்தா², த⁴ம்மம் தே³ஸேதி சக்கு²மா.

‘‘யஸ்மிஞ்ச ஜாயமானஸ்மிம், பக்கி²ஸங்கோ⁴ ந ஸஞ்சரி;

ஸோ தா³னி ப⁴க³வா ஸத்தா², த⁴ம்மம் தே³ஸேதி சக்கு²மா.

‘‘யஸ்மிஞ்ச ஜாயமானஸ்மிம், வாதக்க²ந்தோ⁴ ந வாயதி;

ஸோ தா³னி ப⁴க³வா ஸத்தா², த⁴ம்மம் தே³ஸேதி சக்கு²மா.

‘‘யஸ்மிஞ்ச ஜாயமானஸ்மிம், ஸப்³ப³ரதனானி ஜோதயும்;

ஸோ தா³னி ப⁴க³வா ஸத்தா², த⁴ம்மம் தே³ஸேதி சக்கு²மா.

‘‘யஸ்மிஞ்ச ஜாயமானஸ்மிம், ஸத்தாஸும் பத³விக்கமா;

ஸோ தா³னி ப⁴க³வா ஸத்தா², த⁴ம்மம் தே³ஸேதி சக்கு²மா.

‘‘ஜாதமத்தோ ச ஸம்பு³த்³தோ⁴, தி³ஸா ஸப்³பா³ விலோகயி;

வாசாஸபி⁴முதீ³ரேஸி, ஏஸா பு³த்³தா⁴ன த⁴ம்மதா.

‘‘ஸம்வேஜயித்வா ஜனதம், த²வித்வா லோகனாயகம்;

ஸம்பு³த்³த⁴ம் அபி⁴வாதே³த்வா, பக்காமிம் பாசினாமுகோ².

‘‘ஏகனவுதிதோ கப்பே, யம் பு³த்³த⁴மபி⁴தோ²மயிம்;

து³க்³க³திம் நாபி⁴ஜானாமி, தோ²மனாய இத³ம் ப²லம்.

‘‘இதோ நவுதிகப்பம்ஹி, ஸம்முகா²த²விகவ்ஹயோ;

ஸத்தரதனஸம்பன்னோ, சக்கவத்தீ மஹப்³ப³லோ.

‘‘பத²வீது³ந்து³பி⁴ நாம, ஏகூனனவுதிம்ஹிதோ;

ஸத்தரதனஸம்பன்னோ, சக்கவத்தீ மஹப்³ப³லோ.

‘‘அட்டா²ஸீதிம்ஹிதோ கப்பே, ஓபா⁴ஸோ நாம க²த்தியோ;

ஸத்தரதனஸம்பன்னோ, சக்கவத்தீ மஹப்³ப³லோ.

‘‘ஸத்தாஸீதிம்ஹிதோ கப்பே, ஸரிதச்சே²த³னவ்ஹயோ;

ஸத்தரதனஸம்பன்னோ, சக்கவத்தீ மஹப்³ப³லோ.

‘‘அக்³கி³னிப்³பா³பனோ நாம, கப்பானம் ச²ளஸீதியா;

ஸத்தரதனஸம்பன்னோ, சக்கவத்தீ மஹப்³ப³லோ.

‘‘க³திபச்சே²த³னோ நாம, கப்பானம் பஞ்சஸீதியா;

ஸத்தரதனஸம்பன்னோ, சக்கவத்தீ மஹப்³ப³லோ.

‘‘ராஜா வாதஸமோ நாம, கப்பானம் சுல்லஸீதியா;

ஸத்தரதனஸம்பன்னோ, சக்கவத்தீ மஹப்³ப³லோ.

‘‘ரதனபஜ்ஜலோ நாம, கப்பானம் தேஅஸீதியா;

ஸத்தரதனஸம்பன்னோ, சக்கவத்தீ மஹப்³ப³லோ.

‘‘பத³விக்கமனோ நாம, கப்பானம் த்³வேஅஸீதியா;

ஸத்தரதனஸம்பன்னோ, சக்கவத்தீ மஹப்³ப³லோ.

‘‘ராஜா விலோகனோ நாம, கப்பானம் ஏகஸீதியா;

ஸத்தரதனஸம்பன்னோ, சக்கவத்தீ மஹப்³ப³லோ.

‘‘கி³ரஸாரோதி நாமேன, கப்பேஸீதிம்ஹி க²த்தியோ;

ஸத்தரதனஸம்பன்னோ, சக்கவத்தீ மஹப்³ப³லோ.

‘‘கிலேஸா ஜா²பிதா மய்ஹம்…பே… கதம் பு³த்³த⁴ஸ்ஸ ஸாஸன’’ந்தி.

அதி⁴க³தாரஹத்தோ பன பி⁴க்கூ²ஹி, ‘‘கேன, த்வம் ஆவுஸோ, ஸம்வேகே³ன அதித³ஹரோவ ஸமானோ பப்³ப³ஜிதோ’’தி புச்சி²தோ அத்தனோ பப்³ப³ஜ்ஜானிமித்தகித்தனாபதே³ஸேன அஞ்ஞம் ப்³யாகரோந்தோ –

73. ‘‘ஜிண்ணஞ்ச தி³ஸ்வா து³கி²தஞ்ச ப்³யாதி⁴தம், மதஞ்ச தி³ஸ்வா க³தமாயுஸங்க²யம்;

ததோ அஹம் நிக்க²மிதூன பப்³ப³ஜிம், பஹாய காமானி மனோரமானீ’’தி. –

கா³த²ம் அபா⁴ஸி.

தத்த² ஜிண்ணந்தி ஜராய அபி⁴பூ⁴தம், க²ண்டி³ச்சபாலிச்சவலித்தசதாதீ³ஹி ஸமங்கீ³பூ⁴தம். து³கி²தந்தி து³க்க²ப்பத்தம். ப்³யாதி⁴தந்தி கி³லானம். ஏத்த² ச ‘‘ப்³யாதி⁴த’’ந்தி வுத்தேபி து³க்க²ப்பத்தபா⁴வோ ஸித்³தோ⁴, ‘‘து³கி²த’’ந்தி வசனம் தஸ்ஸ பா³ள்ஹகி³லானபா⁴வபரிதீ³பனத்த²ம். மதந்தி காலங்கதம், யஸ்மா காலங்கதோ ஆயுனோ க²யம் வயம் பே⁴த³ம் க³தோ நாம ஹோதி, தஸ்மா வுத்தம் ‘‘க³தமாயுஸங்க²ய’’ந்தி. தஸ்மா ஜிண்ணப்³யாதி⁴மதானம் தி³ட்ட²த்தா, ‘‘இமே ஜராத³யோ நாம ந இமேஸம்யேவ, அத² கோ² ஸப்³ப³ஸாதா⁴ரணா, தஸ்மா அஹம்பி ஜராதி³கே அனதிவத்தோ’’தி ஸம்விக்³க³த்தா. நிக்க²மிதூனாதி நிக்க²மித்வா, அயமேவ வா பாடோ². பப்³ப³ஜ்ஜாதி⁴ப்பாயேன க⁴ரதோ நிக்³க³ந்த்வா. பப்³ப³ஜிந்தி ஸத்து² ஸாஸனே பப்³ப³ஜம் உபக³தோ. பஹாய காமானி மனோரமானீதி இட்ட²கந்தாதி³பா⁴வதோ அவீதராகா³னம் மனோ ரமேந்தீதி மனோரமே வத்து²காமே பஜஹித்வா, தப்படிப³த்³த⁴ஸ்ஸ ச²ந்த³ராக³ஸ்ஸ அரியமக்³கே³ன ஸமுச்சி²ந்த³னேன நிரபேக்க²பா⁴வேன ச²ட்³டே³த்வாதி அத்தோ². காமானம் பஹானகித்தனமுகே²ன சேதம் தே²ரஸ்ஸ அஞ்ஞாப்³யாகரணம் அஹோஸி. மாணவகாலே பப்³ப³ஜிதத்தா இமஸ்ஸ தே²ரஸ்ஸ மாணவோத்வேவ ஸமஞ்ஞா ஜாதாதி.

மாணவத்தே²ரகா³தா²வண்ணனா நிட்டி²தா.

4. ஸுயாமனத்தே²ரகா³தா²வண்ணனா

காமச்ச²ந்தோ³ ச ப்³யாபாதோ³தி ஆயஸ்மதோ ஸுயாமனத்தே²ரஸ்ஸ கா³தா². கா உப்பத்தி? அயம்பி புரிமபு³த்³தே⁴ஸு கதாதி⁴காரோ தத்த² தத்த² ப⁴வே புஞ்ஞானி உபசினந்தோ இதோ ஏகனவுதே கப்பே விபஸ்ஸிஸ்ஸ ப⁴க³வதோ காலே த⁴ஞ்ஞவதீனக³ரே ப்³ராஹ்மணகுலே நிப்³ப³த்தித்வா வயப்பத்தோ ப்³ராஹ்மணஸிப்பேஸு நிப்ப²த்திம் பத்வா ப்³ராஹ்மணமந்தே வாசேதி. தேன ச ஸமயேன விபஸ்ஸீ ப⁴க³வா மஹதா பி⁴க்கு²ஸங்கே⁴ன ஸத்³தி⁴ம் த⁴ஞ்ஞவதீனக³ரம் பிண்டா³ய பவிட்டோ² ஹோதி. தம் தி³ஸ்வா ப்³ராஹ்மணோ பஸன்னசித்தோ அத்தனோ கே³ஹம் நேத்வா ஆஸனம் பஞ்ஞாபேத்வா தஸ்ஸூபரி புப்ப²ஸந்தா²ரம் ஸந்த²ரித்வா அதா³ஸி, ஸத்த²ரி தத்த² நிஸின்னே பணீதேன ஆஹாரேன ஸந்தப்பேஸி, பு⁴த்தாவிஞ்ச புப்ப²க³ந்தே⁴ன பூஜேஸி. ஸத்தா² அனுமோத³னம் வத்வா பக்காமி. ஸோ தேன புஞ்ஞகம்மேன தே³வலோகே நிப்³ப³த்தித்வா அபராபரம் புஞ்ஞானி கத்வா தே³வமனுஸ்ஸேஸு ஸம்ஸரந்தோ இமஸ்மிம் பு³த்³து⁴ப்பாதே³ வேஸாலியம் அஞ்ஞதரஸ்ஸ ப்³ராஹ்மணஸ்ஸ புத்தோ ஹுத்வா நிப்³ப³த்தி, ஸுயாமனோதிஸ்ஸ நாமம் அஹோஸி. ஸோ வயப்பத்தோ திண்ணம் வேதா³னம் பாரகூ³ பரமனிஸ்ஸமயுத்தோ ஹுத்வா கே³ஹவாஸீனம் காமூபபோ⁴க³ம் ஜிகு³ச்சி²த்வா ஜா²னனின்னோ ப⁴க³வதோ வேஸாலிக³மனே படிலத்³த⁴ஸத்³தோ⁴ பப்³ப³ஜித்வா கு²ரக்³கே³யேவ அரஹத்தம் பாபுணி. தேன வுத்தம் அபதா³னே (அப. தே²ர 1.13.65-74) –

‘‘நக³ரே த⁴ஞ்ஞவதியா, அஹோஸிம் ப்³ராஹ்மணோ ததா³;

லக்க²ணே இதிஹாஸே ச, ஸனிக⁴ண்டு³ஸகேடுபே⁴.

‘‘பத³கோ வேய்யாகரணோ, நிமித்தகோவிதோ³ அஹம்;

மந்தே ச ஸிஸ்ஸே வாசேஸிம், திண்ணம் வேதா³ன பாரகூ³.

‘‘பஞ்ச உப்பலஹத்தா²னி, பிட்டி²யம் ட²பிதானி மே;

ஆஹுதிம் யிட்டு²காமோஹம், பிதுமாதுஸமாக³மே.

‘‘ததா³ விபஸ்ஸீ ப⁴க³வா, பி⁴க்கு²ஸங்க⁴புரக்க²தோ;

ஓபா⁴ஸேந்தோ தி³ஸா ஸப்³பா³, ஆக³ச்ச²தி நராஸபோ⁴.

‘‘ஆஸனம் பஞ்ஞபேத்வான, நிமந்தேத்வா மஹாமுனிம்;

ஸந்த²ரித்வான தம் புப்ப²ம், அபி⁴னேஸிம் ஸகம் க⁴ரம்.

‘‘யம் மே அத்தி² ஸகே கே³ஹே, ஆமிஸம் பச்சுபட்டி²தம்;

தாஹம் பு³த்³த⁴ஸ்ஸ பாதா³ஸிம், பஸன்னோ ஸேஹி பாணிபி⁴.

‘‘பு⁴த்தாவிம் காலமஞ்ஞாய புப்ப²ஹத்த²மதா³ஸஹம்;

அனுமோதி³த்வான ஸப்³ப³ஞ்ஞூ, பக்காமி உத்தராமுகோ².

‘‘ஏகனவுதிதோ கப்பே, யம் புப்ப²மத³தி³ம் ததா³;

து³க்³க³திம் நாபி⁴ஜானாமி, புப்ப²தா³னஸ்ஸித³ம் ப²லம்.

‘‘அனந்தரம் இதோ கப்பே, ராஜாஹும் வரத³ஸ்ஸனோ;

ஸத்தரதனஸம்பன்னோ, சக்கவத்தீ மஹப்³ப³லோ.

‘‘கிலேஸா ஜா²பிதா மய்ஹம்…பே… கதம் பு³த்³த⁴ஸ்ஸ ஸாஸன’’ந்தி.

அரஹத்தம் பன பத்வா நீவரணப்பஹானகித்தனமுகே²ன அஞ்ஞம் ப்³யாகரோந்தோ –

74. ‘‘காமச்ச²ந்தோ³ ச ப்³யாபாதோ³, தி²னமித்³த⁴ஞ்ச பி⁴க்கு²னோ;

உத்³த⁴ச்சம் விசிகிச்சா² ச, ஸப்³ப³ஸோவ ந விஜ்ஜதீ’’தி. – கா³த²ம் அபா⁴ஸி;

தத்த² காமச்ச²ந்தோ³தி காமேஸு ச²ந்தோ³, காமோ ச ஸோ ச²ந்தோ³ சாதிபி காமச்ச²ந்தோ³, காமராகோ³. இத⁴ பன ஸப்³போ³பி ராகோ³ காமச்ச²ந்தோ³ அக்³க³மக்³க³வஜ்ஜ²ஸ்ஸாபி அதி⁴ப்பேதத்தா, தேனாஹ ‘‘ஸப்³ப³ஸோவ ந விஜ்ஜதீ’’தி. ஸப்³பே³பி ஹி தேபூ⁴மகத⁴ம்மா காமனீயட்டே²ன காமா, தத்த² பவத்தோ ராகோ³ காமச்ச²ந்தோ³, தேனாஹ ப⁴க³வா – ‘‘ஆருப்பே காமச்ச²ந்த³னீவரணம் படிச்ச தி²னமித்³த⁴னீவரணம் உத்³த⁴ச்சனீவரணம் அவிஜ்ஜானீவரணம் உப்பஜ்ஜதீ’’தி (பட்டா². 3.8.8) ப்³யாபஜ்ஜதி சித்தம் பூதிபா⁴வம் க³ச்ச²தி ஏதேனாதி ப்³யாபாதோ³, ‘‘அனத்த²ம் மே அசரீ’’திஆதி³னயப்பவத்தோ (த⁴. ஸ. 1066; விப⁴. 909) ஆகா⁴தோ. தி²னம் சித்தஸ்ஸ அகல்யதா அனுஸ்ஸாஹஸம்ஹனனம், மித்³த⁴ம் காயஸ்ஸ அகல்யதா அஸத்திவிகா⁴தோ, தது³ப⁴யம்பி தி²னஞ்ச மித்³த⁴ஞ்ச தி²னமித்³த⁴ம், கிச்சாஹாரபடிபக்கா²னம் ஏகதாய ஏகம் கத்வா வுத்தம். உத்³த⁴தபா⁴வோ உத்³த⁴ச்சம், யேன த⁴ம்மேன சித்தம் உத்³த⁴தம் ஹோதி அவூபஸந்தம், ஸோ சேதஸோ விக்கே²போ உத்³த⁴ச்சம். உத்³த⁴ச்சக்³க³ஹணேனேவ சேத்த² கிச்சாஹாரபடிபக்கா²னம் ஸமானதாய குக்குச்சம்பி க³ஹிதமேவாதி த³ட்ட²ப்³ப³ம். தம் பச்சா²னுதாபலக்க²ணம். யோ ஹி கதாகதகுஸலாகுஸலூபனிஸ்ஸயோ விப்படிஸாரோ, தம் குக்குச்சம். விசிகிச்சா²தி, ‘‘ஏவம் நு கோ² ந நு கோ²’’தி ஸம்ஸயம் ஆபஜ்ஜதி, த⁴ம்மஸபா⁴வம் வா விசினந்தோ கிச்ச²தி கிலமதி ஏதாயாதி விசிகிச்சா², பு³த்³தா⁴தி³வத்து²கோ ஸம்ஸயோ. ஸப்³ப³ஸோதி அனவஸேஸதோ. ந விஜ்ஜதீதி நத்தி², மக்³கே³ன ஸமுச்சி²ன்னத்தா ந உபலப்³ப⁴தி. இத³ஞ்ச பத³த்³வயம் பச்சேகம் யோஜேதப்³ப³ம் அயஞ்ஹேத்த² யோஜனா – யஸ்ஸ பி⁴க்கு²னோ தேன தேன அரியமக்³கே³ன ஸமுச்சி²ன்னத்தா காமச்ச²ந்தோ³ ச ப்³யாபாதோ³ ச தி²னமித்³த⁴ஞ்ச உத்³த⁴ச்சகுக்குச்சஞ்ச விசிகிச்சா² ச ஸப்³ப³ஸோவ ந விஜ்ஜதி, தஸ்ஸ ந கிஞ்சி கரணீயம், கதஸ்ஸ வா பதிசயோதி அஞ்ஞாபதே³ஸேன அஞ்ஞம் ப்³யாகரோதி. பஞ்சஸு ஹி நீவரணேஸு மக்³கே³ன ஸமுச்சி²ன்னேஸு ததே³கட்ட²தாய ஸப்³பே³பி கிலேஸா ஸமுச்சி²ன்னாயேவ ஹோந்தி. தேனாஹ – ‘‘ஸப்³பே³தே ப⁴க³வந்தோ பஞ்ச நீவரணே பஹாய சேதஸோ உபக்கிலேஸே’’தி (தீ³. நி. 2.146).

ஸுயாமனத்தே²ரகா³தா²வண்ணனா நிட்டி²தா.

5. ஸுஸாரத³த்தே²ரகா³தா²வண்ணனா

ஸாது⁴ ஸுவிஹிதான த³ஸ்ஸனந்தி ஆயஸ்மதோ ஸுஸாரத³த்தே²ரஸ்ஸ கா³தா². கா உப்பத்தி? ஸோ கிர பது³முத்தரஸ்ஸ ப⁴க³வதோ காலே ப்³ராஹ்மணகுலே நிப்³ப³த்தித்வா விஜ்ஜாபதே³ஸு நிப்ப²த்திம் க³ந்த்வா காமேஸு ஆதீ³னவம் தி³ஸ்வா க⁴ராவாஸம் பஹாய தாபஸபப்³ப³ஜ்ஜம் பப்³ப³ஜித்வா ஹிமவந்தப்பதே³ஸே அரஞ்ஞாயதனே அஸ்ஸமம் காரேத்வா விஹாஸி. அத² நம் அனுக்³க³ண்ஹந்தோ பது³முத்தரோ ப⁴க³வா பி⁴க்கா²சாரவேலாயம் உபஸங்கமி. ஸோ தூ³ரதோவ தி³ஸ்வா பஸன்னமானஸோ பச்சுக்³க³ந்த்வா பத்தம் க³ஹேத்வா மது⁴ரானி ப²லானி பக்கி²பித்வா அதா³ஸி. ப⁴க³வா தம் படிக்³க³ஹேத்வா அனுமோத³னம் கத்வா பக்காமி. ஸோ தேன புஞ்ஞகம்மேன தே³வமனுஸ்ஸேஸு ஸம்ஸரந்தோ இமஸ்மிம் பு³த்³து⁴ப்பாதே³ த⁴ம்மஸேனாபதினோ ஞாதிப்³ராஹ்மணகுலே நிப்³ப³த்தித்வா மந்த³பஞ்ஞத்தா ஸுஸாரதோ³தி க³ஹிதனாமோ அபரபா⁴கே³ த⁴ம்மஸேனாபதிஸ்ஸ ஸந்திகே த⁴ம்மம் ஸுத்வா படிலத்³த⁴ஸத்³தோ⁴ பப்³ப³ஜித்வா விபஸ்ஸனம் வட்³டே⁴த்வா அரஹத்தம் பாபுணி. தேன வுத்தம் அபதா³னே (அப. தே²ர 1.13.75-83) –

‘‘அஜ்ஜா²யகோ மந்தத⁴ரோ, திண்ணம் வேதா³ன பாரகூ³;

ஹிமவந்தஸ்ஸாவிதூ³ரே, வஸாமி அஸ்ஸமே அஹம்.

‘‘அக்³கி³ஹுத்தஞ்ச மே அத்தி², புண்ட³ரீகப²லானி ச;

புடகே நிக்கி²பித்வான, து³மக்³கே³ லக்³கி³தம் மயா.

‘‘பது³முத்தரோ லோகவிதூ³, ஆஹுதீனம் படிக்³க³ஹோ;

மமுத்³த⁴ரிதுகாமோ ஸோ, பி⁴க்க²ந்தோ மமுபாக³மி.

‘‘பஸன்னசித்தோ ஸுமனோ, ப²லம் பு³த்³த⁴ஸ்ஸதா³ஸஹம்;

வித்திஸஞ்ஜனனோ மய்ஹம், தி³ட்ட²த⁴ம்மஸுகா²வஹோ.

‘‘ஸுவண்ணவண்ணோ ஸம்பு³த்³தோ⁴, ஆஹுதீனம் படிக்³க³ஹோ;

அந்தலிக்கே² டி²தோ ஸத்தா², இமம் கா³த²ம் அபா⁴ஸத².

‘‘இமினா ப²லதா³னேன, சேதனாபணிதீ⁴ஹி ச;

கப்பானம் ஸதஸஹஸ்ஸம், து³க்³க³திம் நுபபஜ்ஜஸி.

‘‘தேனேவ ஸுக்கமூலேன, அனுபோ⁴த்வான ஸம்பதா³;

பத்தோம்ஹி அசலம் டா²னம், ஹித்வா ஜயபராஜயம்.

‘‘இதோ ஸத்தஸதே கப்பே, ராஜா ஆஸிம் ஸுமங்க³லோ;

ஸத்தரதனஸம்பன்னோ, சக்கவத்தீ மஹப்³ப³லோ.

‘‘கிலேஸா ஜா²பிதா மய்ஹம்…பே… கதம் பு³த்³த⁴ஸ்ஸ ஸாஸன’’ந்தி.

அரஹத்தம் பன பத்வா ஸப்புரிஸூபனிஸ்ஸயானிஸம்ஸகித்தனாபதே³ஸேன அஞ்ஞம் ப்³யாகரோந்தோ –

75. ‘‘ஸாது⁴ ஸுவிஹிதான த³ஸ்ஸனம், கங்கா² சி²ஜ்ஜதி பு³த்³தி⁴ வட்³ட⁴தி;

பா³லம்பி கரோந்தி பண்டி³தம், தஸ்மா ஸாது⁴ ஸதம் ஸமாக³மோ’’தி. –

கா³த²ம் அபா⁴ஸி.