8. ஏகுதா³னியத்தே²ரகா³தா²வண்ணனா

அதி⁴சேதஸோ அப்பமஜ்ஜதோதி ஆயஸ்மதோ ஏகுதா³னியத்தே²ரஸ்ஸ கா³தா². கா உப்பத்தி? அயம்பி புரிமபு³த்³தே⁴ஸு கதாதி⁴காரோ தத்த² தத்த² ப⁴வே விவட்டூபனிஸ்ஸயம் புஞ்ஞம் உபசினந்தோ அத்த²த³ஸ்ஸிஸ்ஸ ப⁴க³வதோ காலே யக்க²ஸேனாபதி ஹுத்வா நிப்³ப³த்தோ ஸத்த²ரி பரினிப்³பு³தே, ‘‘அலாபா⁴ வத மே, து³ல்லத்³த⁴ம் வத மே, யோஹம் ஸத்து²த⁴ரமானகாலே தா³னாதி³புஞ்ஞம் காதும் நாலத்த²’’ந்தி பரிதே³வஸோகமாபன்னோ அஹோஸி. அத² நம் ஸாக³ரோ நாம ஸத்து² ஸாவகோ ஸோகம் வினோதே³த்வா ஸத்து² தூ²பபூஜாயம் நியோஜேஸி. ஸோ பஞ்ச வஸ்ஸானி தூ²பம் பூஜேத்வா ததோ சுதோ தேன புஞ்ஞேன தே³வமனுஸ்ஸேஸு ஏவ ஸம்ஸரந்தோ கஸ்ஸபஸ்ஸ ப⁴க³வதோ காலே குலகே³ஹே நிப்³ப³த்தித்வா விஞ்ஞுதம் பத்தோ காலேன காலம் ஸத்து² ஸந்திகம் உபஸங்கமி. தஸ்மிஞ்ச ஸமயே ஸத்தா² ‘‘அதி⁴சேதஸோ’’தி கா³தா²ய ஸாவகே அபி⁴ண்ஹம் ஓவதி³. ஸோ தம் ஸுத்வா ஸத்³தா⁴ஜாதோ பப்³ப³ஜி. பப்³ப³ஜித்வா ச பன தமேவ கா³த²ம் புனப்புனம் பரிவத்தேதி. ஸோ தத்த² வீஸதிவஸ்ஸஸஹஸ்ஸானி ஸமணத⁴ம்மம் கரோந்தோ ஞாணஸ்ஸ அபரிபக்கத்தா விஸேஸம் நிப்³ப³த்தேது நாஸக்கி². ததோ பன சுதோ தே³வலோகே நிப்³ப³த்தித்வா அபராபரம் ஸுக³தீஸுயேவ ஸம்ஸரந்தோ இமஸ்மிம் பு³த்³து⁴ப்பாதே³ ஸாவத்தி²யம் விப⁴வஸம்பன்னஸ்ஸ ப்³ராஹ்மணஸ்ஸ புத்தோ ஹுத்வா நிப்³ப³த்தோ விஞ்ஞுதம் பத்வா ஜேதவனபடிக்³க³ஹணஸமயே பு³த்³தா⁴னுபா⁴வம் தி³ஸ்வா படிலத்³த⁴ஸத்³தோ⁴ பப்³ப³ஜித்வா கதபுப்³ப³கிச்சோ அரஞ்ஞே விஹரந்தோ ஸத்து² ஸந்திகம் அக³மாஸி. தஸ்மிஞ்ச ஸமயே ஸத்தா² ஆயஸ்மந்தம் ஸாரிபுத்தம் அத்தனோ அவிதூ³ரே அதி⁴சித்தமனுயுத்தம் தி³ஸ்வா ‘‘அதி⁴சேதஸோ’’தி இமம் உதா³னம் உதா³னேஸி. தம் ஸுத்வா அயம் சிரகாலம் பா⁴வனாய அரஞ்ஞே விஹரந்தோபி காலேன காலம் தமேவ கா³த²ம் உதா³னேதி, தேனஸ்ஸ ஏகுதா³னியோதி ஸமஞ்ஞா உத³பாதி³. ஸோ அதே²கதி³வஸம் சித்தேகக்³க³தம் லபி⁴த்வா விபஸ்ஸனம் வட்³டே⁴த்வா அரஹத்தம் பாபுணி. தேன வுத்தம் அபதா³னே (அப. தே²ர 1.12.72-81) –

‘‘அத்த²த³ஸ்ஸிம்ஹி ஸுக³தே, நிப்³பு³தே ஸமனந்தரா;

யக்க²யோனிம் உபபஜ்ஜிம், யஸம் பத்தோ சஹம் ததா³.

‘‘து³ல்லத்³த⁴ம் வத மே ஆஸி, து³ப்பபா⁴தம் து³ருட்டி²தம்;

யம் மே போ⁴கே³ விஜ்ஜமானே, பரினிப்³பா³யி சக்கு²மா.

‘‘மம ஸங்கப்பமஞ்ஞாய, ஸாக³ரோ நாம ஸாவகோ;

மமுத்³த⁴ரிதுகாமோ ஸோ, ஆக³ச்சி² மம ஸந்திகம்.

‘‘கிம் நு ஸோசஸி மா பா⁴யி, சர த⁴ம்மம் ஸுமேத⁴ஸ;

அனுப்பதி³ன்னா பு³த்³தே⁴ன, ஸப்³பே³ஸம் பீ³ஜஸம்பதா³.

‘‘யோ சே பூரேய்ய ஸம்பு³த்³த⁴ம், திட்ட²ந்தம் லோகனாயகம்;

தா⁴தும் ஸாஸபமத்தம்பி, நிப்³பு³தஸ்ஸாபி பூஜயே.

‘‘ஸமே சித்தப்பஸாத³ம்ஹி, ஸமம் புஞ்ஞம் மஹக்³க³தம்;

தஸ்மா தூ²பம் கரித்வான, பூஜேஹி ஜினதா⁴துயோ.

‘‘ஸாக³ரஸ்ஸ வசோ ஸுத்வா, பு³த்³த⁴தூ²பம் அகாஸஹம்;

பஞ்சவஸ்ஸே பரிசரிம், முனினோ தூ²பமுத்தமம்.

‘‘தேன கம்மேன த்³விபதி³ந்த³, லோகஜேட்ட² நராஸப⁴;

ஸம்பத்திம் அனுபோ⁴த்வான, அரஹத்தமபாபுணிம்.

‘‘பூ⁴ரிபஞ்ஞா ச சத்தாரோ, ஸத்தகப்பஸதே இதோ;

ஸத்தரதனஸம்பன்னா, சக்கவத்தீ மஹப்³ப³லா.

‘‘கிலேஸா ஜா²பிதா மய்ஹம்…பே… கதம் பு³த்³த⁴ஸ்ஸ ஸாஸன’’ந்தி.

அரஹத்தம் பன பத்வா விமுத்திஸுகே²ன விஹரந்தோ ஏகதி³வஸம் ஆயஸ்மதா த⁴ம்மப⁴ண்டா³கா³ரிகேன படிபா⁴னம் வீமம்ஸிதும், ‘‘ஆவுஸோ, மய்ஹம் த⁴ம்மம் ப⁴ணாஹீ’’தி அஜ்ஜி²ட்டோ² சிரகாலபரிசிதத்தா –

68. ‘‘அதி⁴சேதஸோ அப்பமஜ்ஜதோ, முனினோ மோனபதே²ஸு ஸிக்க²தோ;

ஸோகா ந ப⁴வந்தி தாதி³னோ, உபஸந்தஸ்ஸ ஸதா³ ஸதீமதோ’’தி. (உதா³. 37) –

இமமேவ கா³த²ம் அபா⁴ஸி.

தத்த² அதி⁴சேதஸோதி அதி⁴சித்தவதோ, ஸப்³ப³சித்தானம் அதி⁴கேன அரஹத்தப²லசித்தேன ஸமன்னாக³தஸ்ஸாதி அத்தோ². அப்பமஜ்ஜதோதி நப்பமஜ்ஜதோ, அப்பமாதே³ன அனவஜ்ஜத⁴ம்மேஸு ஸாதச்சகிரியாய ஸமன்னாக³தஸ்ஸாதி வுத்தம் ஹோதி. முனினோதி ‘‘யோ முனாதி உபோ⁴ லோகே, முனி தேன பவுச்சதீ’’தி (த⁴. ப. 269; மஹானி. 149; சூளனி. மேத்தகூ³மாணவபுச்சா²னித்³தே³ஸ 21) ஏவம் உப⁴யலோகமுனனேன வா, மோனம் வுச்சதி ஞாணம், தேன அரஹத்தப²லபஞ்ஞாஸங்கா²தேன மோனேன ஸமன்னாக³ததாய வா கீ²ணாஸவோ முனி நாம, தஸ்ஸ முனினோ. மோனபதே²ஸு ஸிக்க²தோதி அரஹத்தஞாணஸங்கா²தஸ்ஸ மோனஸ்ஸ பதே²ஸு உபாயமக்³கே³ஸு ஸத்ததிம்ஸபோ³தி⁴பக்கி²யத⁴ம்மேஸு, தீஸு வா ஸிக்கா²ஸு ஸிக்க²தோ. இத³ஞ்ச புப்³ப³பா⁴க³படிபத³ம் க³ஹேத்வா வுத்தம். பரினிட்டி²தஸிக்கோ² ஹி அரஹா, தஸ்மா ஏவம் ஸிக்க²தோ, இமாய ஸிக்கா²ய முனிபா⁴வம் பத்தஸ்ஸ முனினோதி ஏவமேத்த² அத்தோ² த³ட்ட²ப்³போ³. யஸ்மா சேததே³வம் தஸ்மா ஹேட்டி²மமக்³க³ப²லசித்தானம் வஸேன அதி⁴சேதஸோ, சதுஸச்சஸம்போ³தி⁴படிபத்தியம் அப்பமாத³வஸேன அப்பமஜ்ஜதோ, அக்³க³மக்³க³ஞாணஸமன்னாக³மேன முனினோதி ஏவமேதேஸம் பதா³னம் அத்தோ² யுஜ்ஜதியேவ. அத² வா ‘‘அப்பமஜ்ஜதோ ஸிக்க²தோ’’ பதா⁴னஹேதூ அக்கா²தாதி த³ட்ட²ப்³பா³. தஸ்மா அப்பமஜ்ஜனஹேது ஸிக்க²னஹேது ச அதி⁴சேதஸோதி அத்தோ².

ஸோகா ந ப⁴வந்தி தாதி³னோதி தாதி³ஸஸ்ஸ கீ²ணாஸவமுனினோ அப்³ப⁴ந்தரே இட்ட²வியோகா³தி³வத்து²கா ஸோகா சித்தஸந்தாபா ந ஹோந்தி. அத² வா தாதி³லக்க²ணப்பத்தஸ்ஸ அஸேக்க²முனினோ ஸோகா ந ப⁴வந்தீதி. உபஸந்தஸ்ஸாதி ராகா³தீ³னம் அச்சந்தூபஸமேன உபஸந்தஸ்ஸ. ஸதா³ ஸதீமதோதி ஸதிவேபுல்லப்பத்தியா நிச்சகாலம் ஸதியா அவிரஹிதஸ்ஸ.

ஏத்த² ச ‘‘அதி⁴சேதஸோ’’தி இமினா அதி⁴சித்தஸிக்கா², ‘‘அப்பமஜ்ஜதோ’’தி இமினா அதி⁴ஸீலஸிக்கா², ‘‘முனினோ மோனபதே²ஸு ஸிக்க²தோ’’தி ஏதேஹி அதி⁴பஞ்ஞாஸிக்கா². ‘‘முனினோ’’தி வா ஏதேன அதி⁴பஞ்ஞாஸிக்கா², ‘‘மோனபதே²ஸு ஸிக்க²தோ’’தி ஏதேன தாஸம் லோகுத்தரஸிக்கா²னம் புப்³ப³பா⁴க³படிபதா³, ‘‘ஸோகா ந ப⁴வந்தீ’’திஆதீ³ஹி ஸிக்கா²பாரிபூரியா ஆனிஸம்ஸா பகாஸிதாதி வேதி³தப்³ப³ம் அயமேவ ச தே²ரஸ்ஸ அஞ்ஞாப்³யாகரணகா³தா² அஹோஸி.

ஏகுதா³னியத்தே²ரகா³தா²வண்ணனா நிட்டி²தா.