4. விமலகோண்ட³ஞ்ஞத்தே²ரகா³தா²வண்ணனா

து³மவ்ஹயாய உப்பன்னோதி விமலகோண்ட³ஞ்ஞத்தே²ரஸ்ஸ கா³தா². கா உப்பத்தி? அயம்பி புரிமபு³த்³தே⁴ஸு கதாதி⁴காரோ தத்த² தத்த² ப⁴வே விவட்டூபனிஸ்ஸயம் புஞ்ஞம் உபசினந்தோ இதோ ஏகனவுதே கப்பே விபஸ்ஸிஸ்ஸ ப⁴க³வதோ காலே விப⁴வஸம்பன்னே குலே நிப்³ப³த்தித்வா விஞ்ஞுதம் பத்தோ ஏகதி³வஸம் விபஸ்ஸிம் ப⁴க³வந்தம் மஹதியா பரிஸாய பரிவுதம் த⁴ம்மம் தே³ஸேந்தம் தி³ஸ்வா பஸன்னமானஸோ சதூஹி ஸுவண்ணபுப்பே²ஹி பூஜேஸி. ப⁴க³வா தஸ்ஸ பஸாத³ஸம்வட்³ட⁴னத்த²ம் ததா²ரூபம் இத்³தா⁴பி⁴ஸங்கா²ரம் அபி⁴ஸங்கா²ரேஸி, யதா² ஸுவண்ணாபா⁴ ஸகலம் தம் பதே³ஸம் ஓத்த²ரதி. தம் தி³ஸ்வா பி⁴ய்யோஸோமத்தாய பஸன்னமானஸோ ஹுத்வா ப⁴க³வந்தம் வந்தி³த்வா தம் நிமித்தம் க³ஹேத்வா அத்தனோ கே³ஹம் க³ந்த்வா பு³த்³தா⁴ரம்மணம் பீதிம் அவிஜஹந்தோ கேனசி ரோகே³ன காலம் கத்வா துஸிதேஸு உபபன்னோ அபராபரம் புஞ்ஞானி கத்வா தே³வமனுஸ்ஸேஸு ஸம்ஸரந்தோ இமஸ்மிம் பு³த்³து⁴ப்பாதே³ ராஜானம் பி³ம்பி³ஸாரம் படிச்ச அம்ப³பாலியா குச்சி²ம்ஹி படிஸந்தி⁴ம் க³ண்ஹி. ராஜா ஹி பி³ம்பி³ஸாரோ தருணகாலே அம்ப³பாலியா ரூபஸம்பத்திம் ஸுத்வா ஸஞ்ஜாதாபி⁴லாஸோ கதிபயமனுஸ்ஸபரிவாரோ அஞ்ஞாதகவேஸேன வேஸாலிம் க³ந்த்வா ஏகரத்திம் தாய ஸம்வாஸம் கப்பேஸி. ததா³ அயம் தஸ்ஸா குச்சி²ம்ஹி படிஸந்தி⁴ம் அக்³க³ஹேஸி. ஸா ச க³ப்³ப⁴ஸ்ஸ பதிட்டி²தபா⁴வம் தஸ்ஸ ஆரோசேஸி. ராஜாபி அத்தானம் ஜானாபேத்வா தா³தப்³ப³யுத்தகம் த³த்வா பக்காமி. ஸா க³ப்³ப⁴ஸ்ஸ பரிபாகமன்வாய புத்தம் விஜாயி, ‘‘விமலோ’’திஸ்ஸ நாமம் அஹோஸி, பச்சா² விமலகோண்ட³ஞ்ஞோதி பஞ்ஞாயித்த². ஸோ வயப்பத்தோ ப⁴க³வதோ வேஸாலிக³மனே பு³த்³தா⁴னுபா⁴வம் தி³ஸ்வா பஸன்னமானஸோ பப்³ப³ஜித்வா கதபுப்³ப³கிச்சோ விபஸ்ஸனம் பட்ட²பேத்வா நசிரஸ்ஸேவ அரஹத்தம் பாபுணி. தேன வுத்தம் அபதா³னே (அப. தே²ர 1.12.40-48) –

‘‘விபஸ்ஸீ நாம ப⁴க³வா, லோகஜேட்டோ² நராஸபோ⁴;

நிஸின்னோ ஜனகாயஸ்ஸ, தே³ஸேஸி அமதம் பத³ம்.

‘‘தஸ்ஸாஹம் த⁴ம்மம் ஸுத்வான, த்³விபதி³ன்னஸ்ஸ தாதி³னோ;

ஸோண்ணபுப்பா²னி சத்தாரி, பு³த்³த⁴ஸ்ஸ அபி⁴ரோபயிம்.

‘‘ஸுவண்ணச்ச²த³னம் ஆஸி, யாவதா பரிஸா ததா³;

பு³த்³தா⁴பா⁴ ச ஸுவண்ணாபா⁴, ஆலோகோ விபுலோ அஹு.

‘‘உத³க்³க³சித்தோ ஸுமனோ, வேத³ஜாதோ கதஞ்ஜலீ;

வித்திஸஞ்ஜனனோ தேஸம், தி³ட்ட²த⁴ம்மஸுகா²வஹோ.

‘‘ஆயாசித்வான ஸம்பு³த்³த⁴ம், வந்தி³த்வான ச ஸுப்³ப³தம்;

பாமோஜ்ஜம் ஜனயித்வான, ஸகம் ப⁴வனுபாக³மிம்.

‘‘ப⁴வனே உபவிட்டோ²ஹம், பு³த்³த⁴ஸேட்ட²ம் அனுஸ்ஸரிம்;

தேன சித்தப்பஸாதே³ன, துஸிதம் உபபஜ்ஜஹம்.

‘‘ஏகனவுதிதோ கப்பே, யம் புப்ப²மபி⁴ரோபயிம்;

து³க்³க³திம் நாபி⁴ஜானாமி, பு³த்³த⁴பூஜாயித³ம் ப²லம்.

‘‘ஸோளஸாஸிம்ஸு ராஜானோ, நேமிஸம்மதனாமகா;

தேதாலீஸே இதோ கப்பே, சக்கவத்தீ மஹப்³ப³லா.

‘‘கிலேஸா ஜா²பிதா மய்ஹம்…பே… கதம் பு³த்³த⁴ஸ்ஸ ஸாஸன’’ந்தி.

அரஹத்தம் பன பத்வா அஞ்ஞாபதே³ஸேன அஞ்ஞம் ப்³யாகரோந்தோ ‘‘து³மவ்ஹயாயா’’தி கா³த²ம் அபா⁴ஸி.

64. தத்த² து³மவ்ஹயாயாதி து³மேன அம்பே³ன அவ்ஹாதப்³பா³ய, அம்ப³பாலியாதி அத்தோ². ஆதா⁴ரே சேதம் பு⁴ம்மவசனம். உப்பன்னோதி தஸ்ஸா குச்சி²யம் உப்பன்னோ உப்பஜ்ஜமானோ ச. ஜாதோ பண்ட³ரகேதுனாதி த⁴வலவத்த²த⁴ஜத்தா ‘‘பண்ட³ரகேதூ’’தி பஞ்ஞாதேன பி³ம்பி³ஸாரரஞ்ஞா ஹேதுபூ⁴தேன ஜாதோ, தம் படிச்ச நிப்³ப³த்தோதி அத்தோ². உப்பன்னோதி வா பட²மாபி⁴னிப்³ப³த்தித³ஸ்ஸனம். ததோ ஹி ஜாதோதி அபி⁴ஜாதித³ஸ்ஸனம். விஜாயனகாலதோ பட்டா²ய ஹி லோகே ஜாதவோஹாரோ. ஏத்த² ச ‘‘து³மவ்ஹயாய உப்பன்னோ’’தி இமினா அத்துக்கம்ஸனபா⁴வம் அபனேதி, அனேகபதிபுத்தானம்பி விஸேஸாதி⁴க³மஸம்ப⁴வஞ்ச தீ³பேதி. ‘‘ஜாதோ பண்ட³ரகேதுனா’’தி இமினா விஞ்ஞாதபிதிகத³ஸ்ஸனேன பரவம்ப⁴னம் அபனேதி. கேதுஹாதி மானப்பஹாயீ. மானோ ஹி உண்ணதிலக்க²ணத்தா கேது வியாதி கேது. ததா² ஹி ஸோ ‘‘கேதுகம்யதாபச்சுபட்டா²னோ’’தி வுச்சதி. கேதுனாயேவாதி பஞ்ஞாய ஏவ. பஞ்ஞா ஹி அனவஜ்ஜத⁴ம்மேஸு அச்சுக்³க³தட்டே²ன மாரஸேனப்பமத்³த³னேன புப்³ப³ங்க³மட்டே²ன ச அரியானம் த⁴ஜா நாம. தேனாஹ ‘‘த⁴ம்மோ ஹி இஸினம் த⁴ஜோ’’தி (ஸம். நி. 2.241; அ. நி. 4.48; ஜா. 2.21.494). மஹாகேதும் பத⁴ம்ஸயீதி மஹாவிஸயதாய மஹந்தா, ஸேய்யமானஜாதிமானாதி³பே⁴த³தோ ப³ஹவோ ச மானப்பகாரா, இதரே ச கிலேஸத⁴ம்மா ஸமுஸ்ஸிதட்டே²ன கேது ஏதஸ்ஸாதி மஹாகேது மாரோ பாபிமா. தம் ப³லவித⁴மனவிஸயாதிக்கமனவஸேன அபி⁴ப⁴வி நிப்³பி³ஸேவனம் அகாஸீதி. ‘‘மஹாகேதும் பத⁴ம்ஸயீ’’தி அத்தானம் பரம் விய த³ஸ்ஸேந்தோ அஞ்ஞாபதே³ஸேன அரஹத்தம் ப்³யாகாஸி.

விமலகோண்ட³ஞ்ஞத்தே²ரகா³தா²வண்ணனா நிட்டி²தா.