9. கோஸலவிஹாரித்தே²ரகா³தா²வண்ணனா

ஸத்³தா⁴யாஹம் பப்³ப³ஜிதோதி ஆயஸ்மதோ கோஸலவிஹாரித்தே²ரஸ்ஸ கா³தா². கா உப்பத்தி? அயம்பி கிர பது³முத்தரஸ்ஸ ப⁴க³வதோ காலே குஸலபீ³ஜம் ரோபேத்வா தம் தம் புஞ்ஞம் அகாஸி. ஸேஸம் அஞ்ஜனவனியத்தே²ரவத்து²ஸதி³ஸமேவ. அயம் பன விஸேஸோ – அயம் கிர வுத்தனயேன பப்³ப³ஜித்வா கதபுப்³ப³கிச்சோ கோஸலரட்டே² அஞ்ஞதரஸ்மிம் கா³மே ஏகம் உபாஸககுலம் நிஸ்ஸாய அரஞ்ஞே விஹரதி, தம் ஸோ உபாஸகோ ருக்க²மூலே வஸந்தம் தி³ஸ்வா குடிகம் காரேத்வா அதா³ஸி. தே²ரோ குடிகாயம் விஹரந்தோ ஆவாஸஸப்பாயேன ஸமாதா⁴னம் லபி⁴த்வா விபஸ்ஸனம் உஸ்ஸுக்காபேத்வா நசிரஸ்ஸேவ அரஹத்தம் பாபுணி. தேன வுத்தம் அபதா³னே (அப. தே²ர 1.11.53-61) –

‘‘ஹிமவந்தஸ்ஸாவிதூ³ரே, வஸாமி பண்ணஸந்த²ரே;

கா⁴ஸேஸு கே³த⁴மாபன்னோ, ஸேய்யஸீலோ சஹம் ததா³.

‘‘க²ணந்தாலுகலம்பா³னி, பி³ளாலிதக்கலானி ச;

கோலம் ப⁴ல்லாதகம் பி³ல்லம், ஆஹத்வா படியாதி³தம்.

‘‘பது³முத்தரோ லோகவிதூ³, ஆஹுதீனம் படிக்³க³ஹோ;

மம ஸங்கப்பமஞ்ஞாய, ஆக³ச்சி² மம ஸந்திகம்.

‘‘உபாக³தம் மஹானாக³ம், தே³வதே³வம் நராஸப⁴ம்;

பி³ளாலிம் பக்³க³ஹேத்வான, பத்தம்ஹி ஓகிரிம் அஹம்.

‘‘பரிபு⁴ஞ்ஜி மஹாவீரோ, தோஸயந்தோ மமம் ததா³;

பரிபு⁴ஞ்ஜித்வான ஸப்³ப³ஞ்ஞூ, இமம் கா³த²ம் அபா⁴ஸத².

‘‘ஸகம் சித்தம் பஸாதே³த்வா, பி³ளாலிம் மே அதா³ துவம்;

கப்பானம் ஸதஸஹஸ்ஸம், து³க்³க³திம் நுபபஜ்ஜஸி.

‘‘சரிமம் வத்ததே மய்ஹம், ப⁴வா ஸப்³பே³ ஸமூஹதா;

தா⁴ரேமி அந்திமம் தே³ஹம், ஸம்மாஸம்பு³த்³த⁴ஸாஸனே.

‘‘சதுபஞ்ஞாஸிதோ கப்பே, ஸுமேக²லிய ஸவ்ஹயோ;

ஸத்தரதனஸம்பன்னோ, சக்கவத்தீ மஹப்³ப³லோ.

‘‘கிலேஸா ஜா²பிதா மய்ஹம்…பே… கதம் பு³த்³த⁴ஸ்ஸ ஸாஸன’’ந்தி.

அரஹத்தம் பன பத்வா விமுத்திஸுக²ப்படிஸம்வேத³னேன உப்பன்னபீதிவேகே³ன உதா³னேந்தோ ‘‘ஸத்³தா⁴யாஹம் பப்³ப³ஜிதோ’’தி கா³த²ம் அபா⁴ஸி.

59. தத்த² ஸத்³தா⁴யாதி ப⁴க³வதோ வேஸாலிம் உபக³மனே ஆனுபா⁴வம் தி³ஸ்வா, ‘‘ஏகந்தனிய்யானிகம் இத³ம் ஸாஸனம், தஸ்மா அத்³தா⁴ இமாய படிபத்தியா ஜராமரணதோ முச்சிஸ்ஸாமீ’’தி உப்பன்னஸத்³தா⁴வஸேன பப்³ப³ஜிதோ பப்³ப³ஜ்ஜம் உபக³தோ. அரஞ்ஞே மே குடிகா கதாதி தஸ்ஸா பப்³ப³ஜ்ஜாய அனுரூபவஸேன அரஞ்ஞே வஸதோ மே குடிகா கதா, பப்³ப³ஜ்ஜானுரூபம் ஆரஞ்ஞகோ ஹுத்வா வூபகட்டோ² விஹராமீதி த³ஸ்ஸேதி. தேனாஹ ‘‘அப்பமத்தோ ச ஆதாபீ, ஸம்பஜானோ பதிஸ்ஸதோ’’தி. அரஞ்ஞவாஸலத்³தே⁴ன காயவிவேகேன ஜாக³ரியம் அனுயுஞ்ஜந்தோ தத்த² ஸதியா அவிப்பவாஸேன அப்பமத்தோ, ஆரத்³த⁴வீரியதாய ஆதாபீ, புப்³ப³பா⁴கி³யஸதிஸம்பஜஞ்ஞபாரிபூரியா விபஸ்ஸனம் வட்³டே⁴த்வா அரஹத்தாதி⁴க³மேன பஞ்ஞாஸதிவேபுல்லப்பத்தியா அச்சந்தமேவ ஸம்பஜானோ பதிஸ்ஸதோ விஹராமீதி அத்தோ². அப்பமத்தபா⁴வாதி³கித்தனே சஸ்ஸ இத³மேவ அஞ்ஞாப்³யாகரணம் அஹோஸி கோஸலரட்டே² சிரனிவாஸிபா⁴வேன பன கோஸலவிஹாரீதி ஸமஞ்ஞா ஜாதாதி.

கோஸலவிஹாரித்தே²ரகா³தா²வண்ணனா நிட்டி²தா.